Top Stories

Grid List

பகான் டத்தோ, ஏப்ரல். 22- சனிக்கிழமை அதிகாலை தாம் தங்கியிருந்த ஸ்தாப்பாக் இடாமான் அடுக்கு மாடி வீட்டிலிருந்து அண்டையிலுள்ள பள்ளிவாசலுக்குச் சென்று கொண்டிருந்த போது பாலஸ்தீனத்தைச் சேர்ந்த  விரிவுரையாளர் ஒருவரை சுட்டுக் கொன்ற இரு ஆசாமிகள், ரஷ்யாவின் தென் பிராந்தியங்களைச் சேர்ந்தவர்களாக இருக்கக்கூடும் என நம்பப்படுவதாக துணைப்பிரதமர் டத்தோஶ்ரீ அகமட் ஸாஹிட் ஹமிடி தெரிவித்தார்.

அந்தக் கொலையாளிகள் உளவுத் துறையைச் சேர்ந்தவர்களாக இருக்கக்கூடும். இவர்களைத் தேடுவதில் அனைத்துலகப் போலீஸ் மற்றும் ஆசியான் போலீஸ் ஆகிய தரப்புக்களின் உதவியை தாங்கள் நாடவிருப்பதாக அவர் சொன்னார்.

எல்லா கோணங்களையும் உள்ளடக்கும் வகையில் இந்தக் கொலை குறித்த விசாரணைகள் முடுக்கி விடப்பட்டிருப்பதாகவும் இந்தக் கொலைச் சதிகாரகளை பிடிக்கும் வரையில் விசாரணையை ஓயாது  என்றும் டத்தோஶ்ரீ ஸாஹிட் சொன்னார். 

காலையில் தொழுகைக்காக சென்று கொண்டிருந்த வழியில் ஃபாடி அல் பதாஷ் என்ற 35 வயதுடைய அந்த பாலஸ்தீனர் சுட்டுக் கொல்லப்பட்டார். இவர் இங்குள்ள தனியார் கல்லூரி ஒன்றில் விரிவுரையாளராகப் பணியாற்றி வந்தார்.

துருக்கியில் நடைபெறும் ஓர் அனைத்துலக மாநாட்டிற்கு இன்று மாலையில் புறப்பட்டுச் செல்வதற்காக ஃபாடி அல் பத்தாஷ் திட்டமிட்டிருந்ததாகத் தெரிய வந்துள்ளது.

 

கோலாலம்பூர், ஏப்ரல் 21- மலேசியாவைச் சேர்ந்த மருத்துவத்துறை மாணவியான வி. தர்ஷினி (வயது 24) என்பவர் இந்தோனிசியாவின்  பாலியில் நடந்த சாலை விபத்து ஒன்றில் உயிரிழந்தார். இறுதியாண்டு மாணவியான அவர், பயணம் செய்த மோட்டார் சைக்கிள்,  சாலையோரம் நிறுத்தி வைக்கப்பட்டிருந்த லோரி ஒன்றின் மீது மோதி விபத்துக்கு உள்ளானது. 

நேற்று  மாலை 6.45 மணியளவில் தங்களுடைய  தங்கும் விடுதியில் இருந்து இதர இரு நண்பர்களுடன் டென்பசார் என்ற இடத்திற்குச் சென்று கொண்டிருந்த போது நின்றிருந்த ஒரு லோரியின் மீது மோட்டார் சைக்கிள்  மோதியது.  

உதயானா பல்கலைக்கழகத்தில் படித்து வரும் தர்ஷினி, ஷா ஆலம்,  ஶ்ரீமூடாவைச் சேர்ந்தவர் எனத் தெரிய வந்துள்ளது. தலையில் கடுமையாகக் காயமடைந்ததால் விபத்து நடந்த இடத்திலேயே அவர் உயிர்நீத்தார்.

தர்ஷினியுடன் பயணம் செய்த இதர இரு நண்பர்களும் பாலியைச் சுற்றிப் பார்க்கச் சென்றிருந்ததாக கூறப்பட்டது. இவர்களில் ஒருவரான எஸ். சிவமலர் கடுமையாக காயமடைந்து கவலைக்கிடமான நிலையில் மருத்துவமனையில் சிகிச்சை பெற்று வருகிறார்.

தர்ஷினியின் உடல் தற்போது டென்பசாரிலுள்ள பொது மருத்துவமனையில் வைக்கப்பட்டுள்ளது. சம்பந்தப்பட்ட  தர்சினியின் குடும்பத்திற்கு உதவுதற்காக மலேசியத் தூரகத்தைச் சேர்ந்த உயர் அதிகாரி ஒருவர் மருத்துவமனையில் இருந்து வருகிறார் எனத் தகவல் கிடைத்துள்ளது.

இதனிடையே தர்ஷினியின் உடல் ஞாயிறுக்கிழமை மலேசியாவுக்கு கொண்டு வரப்படும் என்று தூதரகப் பேச்சாளர் ஒருவர் தெரிவித்துள்ளார்.

குவந்தான்,ஏப்ரல் 21- சாலை கடக்கும் போது கவனமாக கடக்க வேண்டும். ஆனால் 100 கிலோ எடையைத் தூக்கிக் கொண்டு ஊர்ந்து செல்ல நேர்ந்த போது இந்த மலைப்பாம்பு வாகம் ஏறியதால் படுகாயம் அடைந்து விட்டது.

தீயணைப்பு மற்றும் மீட்புப்படைப் பிரிவைச் சேர்ந்தவர்கள் காயமடைந்த இந்தப் பாம்பை மீட்டனர். கிட்டத்தட்ட 7 மீட்டர் நீளம் கொண்ட இந்தப் பாம்பு பார்ப்பதற்கே அசுரத்தனமாக காட்சி அளித்தது.

வியாழக்கிழமை அதிகாலை 2 மணியளவில் இந்த சாலையைப் பயன்படுத்திய வாகன மோட்டிகளிடம் இருந்து தங்களுக்கு அவசர அழைப்பு வந்ததாக மிட்புப்படைப் பிரிவின் துணை இயக்குனர் முகம்மட் சானி ஹருண் என்பவர் தெரிவித்தார்

 

எட்டுப் பேர் கொண்ட குழு அந்த இடத்திற்கு விரைந்து காயமடைந்த இந்த மலைப்பாம்பைப் பிடிக்க கிட்டதிட்ட ஏழு மணி நேரம் போராட நேர்ந்ததாக அவர் சொன்னார்.

இந்தப்பாம்பு மிகப் பெரியதாகவும் மிகுந்த ஆக்ரோஷத்துடன் இருந்ததால் தங்களுடைய மீட்புப் படைக்குழு கடும் சிரமத்தை எதிர்கொள்ள நேர்ந்தது என்று அவர் குறிப்பிட்டார். இந்தப் பாம்பு தற்போது வனவிலங்கு, தேசிய பூங்கா துறைக்கு அனுப்பப்பட்டுள்ளது.  

 

கோலாலம்பூர், ஏப்ரல்.21 –கோத்தாராஜா நாடாளுமன்றத் தொகுதியில், அதிரடியாக ஓர் இளம் புதுமுகத்தை நிறுத்த மஇகா முடிவு செய்திருப்பதாக தெரிகிறது. மஇகா இளைஞர் பகுதியைச் சேர்ந்த 36 வயதுடைய டி.கஜேந்திரன் கோத்தா ராஜாவில் நிறுத்தப்படலாம் என்று எதிர்ப்பார்க்கப் படுகிறது.

சிலாங்கூர் மாநில மஇகா இளைஞர் பிரிவைச் சேர்ந்த கஜேந்திரன், அண்மைய காலமாகவே சிலாங்கூரில், பல்வேறு அரசியல் நடவடிக்கை களிலும்  ஈடுபட்டு வந்தார்.

இந்நிலையில், கடந்த பொதுத் தேர்தலில் பாஸ் கட்சியிடம் இழந்த கோத்தா ராஜாவை மீட்கும் முயற்சியாக, ஓர் இளைஞரை அந்தத் தொகுதியில் நிறுத்த மஇகா முயற்சிப்பதாக தெரிகிறது.

அதே வேளையில் இத்தொகுதியில் எதிர்க்கட்சி கூட்டணியான பக்காத்தான் ஹராப்பான் சார்பில், அமானா நெகாரா கட்சியின் தேசியத் தலைவரும் மூத்த அரசியல்வாதியான மாட் சாபு போட்டியிடுவார் என்று எதிர்ப்பார்க்கபடுகிறது.

இதனிடையே சிகாமட் தொகுதியில் டத்தோஶ்ரீ டாக்டர் சுப்பிரமணியம், தாப்பாவில் டத்தோஶ்ரீ எம்.சரவணன், உலு சிலாங்கூரில் டத்தோ கமலநாதன் ஆகியோர் போட்டியிடுவது உறுதியாகி இருக்கிறது.

சுங்கை பூலோ நாடாளுமன்றத் தொகுதியில் முன்னாள் மஇகாவின் பொதுச் செயலாளர் பிரகாஷ் ராவ், கேமரன்மலை தொகுதியில் மஇகா இளைஞர் பகுதித் தலைவர் டத்தோ சி.சிவராஜ் ஆகியோர் போட்டியிடுவது கிட்டத்தட்ட உறுதியாகி உள்ளது.

சுங்கை சிப்புட் தொகுதிக்கு டி. தங்கராணி போட்டியிடக்கூடும் என்ற தகவலுக்கு இடையே அங்கு, சில பிரச்னைகள் உருவாகி இருப்பதாகவும் கூறப்பட்டது.

தங்கராணியை அடுத்து, முன்னாள் தெலுக்கெமாங் எம்.பி. டத்தோ சோதிநாதன், டத்தோஶ்ரீ வேள்பாரி ஆகியோரின் பெயர்களும் இத்தொகுதியில் அடிபட்டு வருகின்றன.

பினாங்கு, ஏப்ரல் 21- மலேசியாவிலேயே முதன் முறையாக பினாங்கு மாநிலத்தில் மலேசிய இந்தியர்களின் பாரம்பரிய தொல்பொருள் அருங்காட்சியகம் ஒன்று திறக்கப்பட உள்ளது.

இந்த அருங்காட்சியகம் மேமாதம் முதல் தேதியன்று அதிகாரப்பூர்வமாக திறக்கப்படும். பினாங்கு மெக்காலிஸ்டர் சாலையில் உள்ள இந்த அறப்பணி வாரிய அலுவலக வளாகப் பகுதியில் பினாங்கு மலேசிய இந்தியர் அருங்காட்சியம் அமைக்கப்பட்டிருக்கிறது.

 

மலேசியாவில், இந்தியர்களின் பாரம்பரிய பெருமைகளைப் புலப்படுத்தும் முதலாவது அருங்காட்சியகம் இது என்பது குறிப்பிடத்தக்கது.

இந்த அருங்காட்சியகத்தில் முந்தைய தலைமுறையினர் பயன்படுத்திய பல்வேறு பொருள்கள் பொதுமக்களின் காட்சிக்கான பொக்கிஷமாக வைக்கப்பட்டிருக்கின்றன.

அதேவேளையில், இதுபோன்ற பாரம்பரிய, தொன்மை மிகுந்த பொருள்கள்  தங்கள் வசம் இருந்தால், அதனை இந்த அருங்காட்சியகத்தில் பொதுமக்களின் பார்வைக்கு வைக்க யாரேனும் விரும்பினால், அவ்வாறு செய்ய முன் வரலாம் என்று பொதுமக்களுக்கு கோரிக்கை விடுக்கப்பட்டுள்ளது.

 

விருப்பம் உள்ளவர்கள் கொம்தாரிலுள்ள பினாங்கு அறப்பணி வாரியத்துடன் 04-6505215 அல்லது திரு. கிருஷ்ணசாமி 012-4881553 என்ற தொலைப்பேசி எண்களுடன் தொடர்பு கொள்ளலாம்.

மே மாதம் 1ஆம் தேதி செவ்வாய்க்கிழமையன்று காலை 10 மணியளவில் இந்த அருங்காட்சியகத்தை பினாங்கு முதல்வர் லிம் குவான் எங் மற்றும் 2-ஆவது துணை முதல்வர் பேராசிரியர் இராமசாமி ஆகியோர் அதிகாரப்பூர்வமாக திறந்து வைக்க உள்ளனர்.

ஜொகூர் பாரு, ஏப்ரல் 21 – செனாயில், ஜாலான் பெலிம்பிங் என்ற இடத்திலுள்ள ஒரு மலிவு விலை தங்கும் விடுதியில், இந்தோனேசிய வீட்டுப்பணிப் பெண்ணை பாலியல் பலாத்காரத்திற்கு உட்படுத்தியதாக போலீஸ்காரர் ஒருவர் கைது செய்யப்பட்டார்.
இந்தச் சம்பவம் தொடர்பாக, சம்பந்தப்பட்ட பணிப்பெண் போலீசில் புகார் செய்ததைத் தொடர்ந்து, 30 வயதுடைய அந்தப் போலீஸ்காரரை தாங்கள் கைது செய்ததாக ஜொகூர் மாநில குற்றப்புலனாய்வுத் துறைத் தலைவர் கமாலுடின் காசிம் தெரிவித்தார்.
அந்தப் பணிப் பெண், தாமான் புக்கிட் இண்டாவிலுள்ள வீடு ஒன்றில் பணிப்பெண்ணாக வேலை செய்த நிலையில், முதலாளியுடன் ஏற்பட்ட அதிருப்தியால் வீட்டை விட்டு வெளியேறி போலீஸ் நிலையத்தில் புகார் செய்ய வந்தார்.
அப்போது ஸ்கூடாய் போலீஸ் நிலையத்தைச் சேர்ந்த அந்தப் போலீஸ்காரர், அந்தப் பணிப்பெண்ணின் கடப்பிதழ் மற்றும் ஆவணங்களை அவருடைய முதலாளியின் வீட்டிலிருந்து மீட்டு எடுத்து வருவதற்கு உதவுவதாகக் கூறி, அந்தப் பெண்ணை அழைத்துக் கொண்டு சென்றார்.
ஆனால், முதலாளி வீட்டுக்கு கொண்டு செல்லாமல், தங்கும் விடுதிக்கு கொண்டு அந்தப் பெண்ணை கட்டாயப்படுத்தி அவருடன் உடலுறவில் அந்தப் போலீஸ்காரர் ஈடுபட்டுள்ளார். இதன் பின்னர் அந்தப் பெண்ணை மிரட்டிய போலீஸ்காரர் அவரை அங்கேயே விட்டு விட்டு வெளியேறி விட்டார்.
இது குறித்து விரிவாக பணிப்பெண் போலீஸ் புகாரில் தெரிவித்துள்ளார்.
இந்தப் புகாரின் அடிப்படையில் கைது செய்யப்பட்ட போலீஸ்காரர், குற்றவியல் சட்டத்தின் 376 ஆவது பிரிவின் கற்பழிப்புக்காக இவர் விசாரிக்கப்பட்டு வருகிறார்.

கோலாலம்பூர், ஏப்ரல் 21 – இம்முறை பொதுத் தேர்தலில், நாடாளுமன்ற வேட்பாளராக இரு பெண் வேட்பாளர்களை மஇகா களத்தில் இறக்கிவிட தீர்மானித்திருப்பதாக தெரிகிறது.

மஇகா மகளிர் பிரிவுத் தேசியத் தலைவியான டத்தோ மோகனா முனியாண்டி, மஇகாவின் பாரம்பரியத் தொகுதியாகக் கருதப்படும் காப்பார் நாடாளுமன்றத் தொகுதியில் போட்டியிட வாய்ப்பை பிரகாசமாக  பெற்றுள்ளார்.

அதே வேளையில் மற்றொரு பெண் வேட்பாளராக பேராவைச் சேர்ந்த டி. தங்கராணி போட்டியிடக் கூடும் என்று தகவல் வெளியாகி இருக்கிறது. மஇகாவின் மற்றொரு பாரம்பரியத் தொகுதியான சுங்கை சிப்புட் தொகுதியில் தங்கராணி போட்டியிடுவார் என்ற ஆருடம் மிக வலுவாக உள்ளது. இவர் மஇகா மகளிர் பிரிவின் துணைத்தலைவியாக இருந்து வருகிறார்.

கடந்த காலத்தில் காப்பார் நாடாளுமன்றத் தொகுதியில் மஇகா தனது மகளிர் பிரிவு தலைவிகளான டாக்டர் லீலா ராமா, மற்றும் டத்தின் படுக்கா கோமளா கிருஷ்ணமோர்த்தி ஆகியோரை நிறுத்தி வெற்றி கண்டுள்ளது.

சிரம்பான், ஏப்ரல் 21 –பிரதமர் துறை துணையமைச்சரும் மஇகா தேசிய துணைத்தலைவரான டத்தோஶ்ரீ எஸ்.கே. தேவமணி, நெகிரி செம்பிலானிl உள்ள ஜெலுபு நாடாளுமன்றத் தொகுதியில் போட்டியிடக் கூடும் என்று எதிர்ப்பார்க்கப்படுகிறது.

முன்பு தெலுக் கெமாங் என்று அழைக்கப்பட்ட போர்ட்டிக்சன் நாடாளுமன்றத் தொகுதியில் மஇகா வேட்பாளருக்குப் பதிலாக, அம்னோவைச் சேர்ந்த ஒருவர் போட்டியிடக்கூடும் என்ற நிலையில் அதற்கு மாற்றாக, அம்னோவின் செல்வாக்குமிக்க தொகுதிகளில் ஒன்றான ஜெலுபுவில் தேவமணி போட்டியிட வாய்ப்பு வழங்கப்படும் என்ற தகவல் வெளியாகி உள்ளது.

கடந்த 2013 ஆம் ஆண்டுத் தேர்தலில் சுங்கை சிப்புட் தொகுதியில் தேவமணி போட்டியிட்டார் என்பது குறிப்பிடத்தக்கது.

ஜெலுபுவில் போட்டியிடக்கூடும் என்ற ஆருடம் குறித்து, கருத்துரைத்த தேவமணி, "எதையும் நான் இப்போதைக்குச் சொல்ல முடியாது பொறுத்திருங்கள்" என்று குறிப்பிட்டார்.

கடந்த தேர்தலில் ஜெலுபுவில் போட்டியிட்டு வென்ற தேசிய முன்னணி வேட்பாளர் டத்தோ ஜைனுடின் இஸ்மாயில் கடந்த 4 மாதங்களுக்கு முன்பு காலமாகி விட்டார் என்பது குறிப்பிடத்தக்கது.

கோலாலம்பூர், ஏப்ரல் 21- கடந்த 2017ஆம் ஆண்டின் பீர் திருவிழா என்ற நிகழ்ச்சியின் போது வெடிகுண்டுத் தாக்குதல் நடத்தத் திட்டமிட்டிருந்ததாக இரண்டு நபர்களுக்கு இங்குள்ள உயர் நீதிமன்றத்தில் 14 ஆண்டுகள் சிறைத் தண்டனை விதிக்கப்பட்டது.

இத்தகைய வெடிகுண்டுத் தாக்குதல் நடத்தப்படும் சாத்தியத்தை அறிந்த போலீசார் இவர்கள் இருவரையும் கைது செய்யாமல் போயிருந்தால், அந்த பீர் விழா நிகழ்ச்சியை அன்றைய தினமே போலீசார் ரத்து செய்யாமல் போயிருந்தால், என்ன நடந்திருக்கும்? என்று நீதிபதி டத்தோ சோஃபியான் அப்துல் ரசாக் கேள்வி எழுப்பினார்.

மேற்கண்ட வகையில் போலீசார் செயல்படாமல் போயிருந்தால், அந்த நாளில், அந்த இடத்தில் வெடிகுண்டு தாக்குதல் நடத்தப்பட்டு பலர் உயிரிழந்திருக்கக்கூடும் என்று நீதிபதி சோஃபியான் சுட்டிக் காட்டினார்.

 

35 வயதுடைய மஹாடி இப்ராகிம் மற்றும் 26 வயதுடைய அகமட் அஸ்மி ஆகிய இருவருக்கும் 14 ஆண்டுகள் சிறைத் தண்டனை விதித்து நீதிபதி தீர்ப்புக் கூறினார்.வெடிகுண்டு தயாரிப்பதில் ஈடுபட்டதற்காக மஹாடிக்கும், அவரைப் போலயே பயங்கரவாத நடவடிக்கைகளுக்கு உடந்தையாக இருந்ததாக அகமட் அஸ்மிக்கும் தண்டனை விதிக்கப்பட்டது. இவர்கள் இருவருக்கும் .எஸ் தீவிரவாத இயக்கத்துடன் தொடர்பு இருந்ததாக நீதிமன்றத்தில் கூறப்பட்டது.

சென்னை, ஏப்ரல் 21 - பெண் பத்திரிகையாளர்களைப் பற்றி தவறாக சமூக வலைத்தளங்களில் பதிவிட்ட பாஜகவைச் சேர்ந்த எஸ்.வி. சேகர் மீது கடுமையன நடவடிக்கை எடுக்கப்படும் என்று தமிழக பாஜக தலைவர் தமிழிசை செளந்தரராஜன் தெரிவித்துள்ளார்.

தமிழக ஆளுநர் பன்வாரிலால் புரோஹித் பெண் பத்திரிகையாளர் ஒருவரின் கன்னத்தில் தட்டிய விவகாரம் தமிழகத்தில் பெரும் கொந்தளிப்பை ஏற்படுத்தியுள்ளது. இந்நிலையில், பத்திரிகையாளர்கள் ஆளூநருக்கு எதிரான கருத்தை பதிவு செய்து வருகின்றனர்.

இது குறித்து சமூக வலைத்தளங்களில் கருத்து தெரிவித்த பாஜகவைச் சேர்ந்த எஸ்.வி.சேகர், பெண் பத்திரிகையாளர்களை இழிவாக பதிவிட்டு இருந்தார். இதனால், எஸ்.வி. சேகருக்கு எதிராக பத்திரிகையாளர்கள் போராட்டம் நடத்தி வருகின்றனர்.

எஸ்.வி. சேகரை கைது செய்ய வேண்டும் என்றும் அவர்கள் கோரிக்கை விடுத்துள்ளனர். இதனால், தமிழகத்தில் பரபரப்பு ஏற்பட்டுள்ளது. இது குறித்து இன்று பத்திரிக்கையாளர்களைச் சந்தித்த தமிழக பாஜக தலைவர் தமிழிசை சௌந்தரராஜன், எஸ்.வி. சேகர் பெண்கள் பற்றி தெரிவித்து இருக்கும் கருத்தை ஏற்றுக்கொள்ள முடியாது.

அவர் மீது கட்சி ரீதியான நடவடிக்கை எடுக்க மேற்கொண்டு வருகிறோம். தவறான கருத்துகளைப் பரப்புவர்கள் யாராக இருந்தாலும், அவர்கள் மீது நடவடிக்கை எடுக்கப்படும். சமூக வலைத்தளங்களில் கருத்தை தெரிவித்து விட்டு, அதை நான் எழுதவில்லை என்று சொல்வதை ஏற்றுக்கொள்ள முடியாது. இது மன்னிக்க முடியாத குற்றம். சமூக வலைத்தளத்தில் ஒருமுறை தப்பான கருத்தை கூறிவிட்டாலும், அது பரவிக் கொண்டேதன் இருக்கும்.

தமிழகத்தில் ஆக்கப்பூர்வமான அரசியல் சூழல் வர வேண்டும் என்று பாஜக நினைப்பதாகவும், பொது வாழ்க்கையில் ஈடுபட்டு இருப்பவர்கள் தவறான கருத்துகளை பரப்பக் கூடாது. இவ்வாறு தமிழிசை தெரிவித்தார்.

புதுடில்லி, ஏப் 21- வெளிநாட்டிலிருந்து  திரும்பி வந்த கையோடு அவசர அமைச்சரவை கூட்டத்தை பிரதமர் மோடி கூட்டியுள்ளார். வெளிநாடுகளில் எழுந்துள்ள பல கேள்விகளுக்கு விடையாக, சிறுமிகள் பலாத்காரத்திற்கு எதிராக மரண தண்டனை விதிப்பது குறித்து அமைச்சரவை முடிவெடுக்கக்கூடும் என்ற தகவல் பரபரப்பாகி இருக்கின்றது

சிறுமிகளை பாலியல் பலாத்காரம் செய்வோருக்கு தூக்கு தண்டனை விதிப்பது, பொருளாதார குற்றங்களில் ஈடுபட்டு வெளிநாட்டுக்கு தப்பிச் செல்வோரின் சொத்துகளை முடக்குவது , உள்ளிட்ட அவசர கூட்டங்களுக்கு இன்றைய அமைச்சரவை கூட்டத்தில் ஒப்புதல் வழங்கப்பட உள்ளதாக தகவல் வெளியாகி உள்ளது

மத்திய அமைச்சர் மேனகா ஏற்கனவே வீடியோ மூலம் வெளியிட்டுள்ள செய்தியில்  சிறுமிகளை பலாத்காரம் செய்வோருக்கு தூக்கு தண்டனை அளிக்கும் வகையில் சட்ட திருத்தம் கொண்டு வரப்படும் என கூறி இருந்தார்.

அத்துடன் அனைத்துலக நாணய நிதி தலைவர் கிறிஸ்டைனும் பெண்களை பாதுகாப்பதில் கவனம் செலுத்த வேண்டும் என்று மோடியை வலியுறுத்தி இருந்தார். இதனால் இன்றைய பொதுக் கூட்டத்தில் குழந்தைகள் பாதுகாப்பு சட்டத்தில் திருத்தம் வரலாம் என்று எதிர்பபார்க்கலாம் என தெரியவருகிறது.

சென்னை, ஏப்.20.  நேற்று முதல் நடிகை குஷ்பு தன்னுடைய பெயரை  "நஹ்கத் கான்" என  மாற்றிக் கொண்டுள்ளார். ஆனால், இந்தப் பெயர்  பாஜகவினருக்காக மட்டும் என்று பதிவு செய்துள்ளார்.

இஸ்லாமிய மதத்தைச் சேர்ந்த குஷ்பு,  தனது இயற்பெயரை மறைத்து வருகிறார் என பாஜகவினர் விமர்சனம் செய்தனர்.

இதற்கு பதிலடி கொடுக்கும் விதமாக தனது பெயரை உடனடியாக மாற்றி பதிவிட்டார். காங்கிரஸ் கட்சியின் தேசிய செய்தித் தொடர்பாளரான குஷ்பு,  இதுவரை குஷ்பு சுந்தர் என்றே தனது பெயரை பதிவு செய்திருந்தார். நேற்று முதல் தன்னுடைய டுவிட்டரில் நஹ்கத் கான் என்று பெயரை மாற்றி, இந்த பெயர் பாஜகவினர்களுக்கு மட்டுமே என்று பதில் கூறியுள்ளார்.

புதுடில்லி, ஏப் 20- பாலியல் வன்கொடுமை உள்ளிட்ட பெண்களுக்கு எதிரான பாலியல் உள்பட பல குற்றவியல் நடவடிக்கையில் ஈடுபட்ட 48 எம்.பி - எம்எல்ஏக்கள் வழக்குகளை எதிர்கொண்டு வருகின்றனர்.

இது குறித்து ஜனநாயக சீர்திருத்தங்களுக்கான கூட்டமைப்பு (ஏ.டி.ஆர்) வெளியிட்ட அறிக்கையில் கூறப்பட்டுள்ளதாவது 1.580 எம்பி மற்றும் எம்எல்ஏக்கள் மீது கிரிமினல் வழக்கு நிலுவையில் உள்ளது.

 இதில் 48 பேர் மீது பெண்களுக்கு எதிரான கிரிமினல் நடவடிக்கையில் ஈடுபட்டது தொடர்பான வழக்குகள் நிலுவையில் உள்ளது. 48 பேரில் 45 பேர் எம்எல்ஏக்கள் , 3 பேர் எம்.பிக்கள் அடங்குவர்.

அதிகபட்சமாக பா.ஜ கட்சியை சேர்ந்த 12 பேர் மீதும், சிவசேனாவை சேர்ந்த 7 பேர் மற்றும் திரிணாமுல் காங்கிரஸ் கட்சியில் 6 பேர் மீது பெண்களுக்கு எதிரான குற்றவியல் நடவடிக்கை வழக்கு பதிவு செய்யப்பட்டுள்ளது. 

தேர்தலின் போது தாக்கல் செய்யப்பட்ட பிராமணப் பத்திரத்தை ஆய்வு செய்ததில் இத்தகவல் தெரிய வந்துள்ளது. இவ்வாறு அந்த அறிக்கையில் தெரிவிக்கப்பட்டுள்ளது.

மேலும் அனைத்து கட்சிகளும் பெண்களுக்கு எதிரான கிரிமினல் நடவடிக்கையில் ஈடுபட்டவர்களுக்கு தேர்தல் போட்டியிட வாய்ப்பு வழங்கி யுள்ளன எனவும் அந்த அறிக்கை தெரிவித்துள்ளது.

சென்னை, ஏப் 29- நடிகை ஹன்சிகா சினிமாவுக்கு நடுவே சமூக சேவை பணிகளிலும் ஈடுபட்டு வருகிறார். சம்பாதித்த பணத்தை ரியல் எஸ்டேட்டில் முதலீடு செய்வது- வீடுகள் வாங்குவது- தொழில் தொடங்குவது என்று இருப்பவர்களுக்கு மத்தியில் சம்பளத்தில் ஒரு பகுதியை ஆதரவற்றோருக்கு ஒதுக்கி உதவி செய்து வருகிறார். 

ஒவ்வொரு பிறந்த நாளிலும் ஓர் ஆதரவற்ற குழந்தையை தத்தெடுத்து வரும் அவரது குழந்தைகளின் எண்ணிக்கை தற்போது 30 ஆக உயர்ந்து உள்ளது. 

இது குறித்து ஹன்சிகா கூறியதாவது: இந்த உலகத்தில் குழந்தைகளை கஷ்டப்பட்டு பெற்று தான் 'அம்மா' ஆவார்கள். நானோ, குழந்தை பெற்றுக் கொள்ளாமலே ஆதரவற்ற 30 குழந்தைகளுக்கு தாயாகி இருக்கிறேன். 

இது பெரிய பாக்கியம். எனது வயிற்றில் பிறக்காவிட்டாலும் இவர்கள் என்னுடைய குழந்தைகள்தான். நான் தான் அவர்களுக்குத் தாய். அம்மாவையே காணாத அந்தக் குழந்தைகள் என்னைத் தான் தாயாகப் பார்க்கிறார்கள். 

அம்மா என்று  அவர்கள் அழைப்பதை பார்த்து  மனம் உருகிப் போகிறேன். அவர்களுடைய பராமரிப்புக்கு பணம் மட்டும் ஒதுக்கி விட்டு  இருப்பது இல்லை படப்படிப்பு இல்லாத நாட்களில் அவர்கள் பக்கத்தில் இருக்கிறேன்.

பெற்றோரை காணாத அந்தக் குழந்தைகளுக்கு இன்னும் நிறைய செய்ய வேண்டும். வயதான பெற்றோர்களை பிள்ளைகள் கைவிடும் போக்கு  அதிகம் சமூகத்தில் உள்ளது. ஆதரவற்ற அந்த முதியோர்களுக்காக புதிய இல்லம் ஒன்றை கட்டி வருகிறேன். அவர்களை அங்கே தங்க வைத்து பராமரிக்கவும் முடிவு செய்துள்ளேன் என்கிறார் ஹன்சிகா. 

 

லண்டன், ஏப்ரல்.20- இந்தியாவில் ரூ 9,000 கோடியை ஏமாற்றி வெளிநாடு சென்ற விஜய் மல்லையா, லண்டனிலும் தனது 'தில்லாலங்கடி' வேலையைக் காட்ட  துவங்கி விட்டார். அவர் மாறவே இல்லையாம்.., தனக்கு பெராரி கார் வாங்க, கடன் கோரி அங்குள்ள வங்கியில் விண்ணப்பித்து இருக்கிறர். ஆனால் கடன் மறுக்கப்பட்டது.  

இந்தியாவிலே மிகப் பெரிய பணக்காரர்களில் ஒருவராக இருந்த விஜய் மல்லையா, பல்வேறு வங்கிகளில் இருந்து சுமார் 9,000 கோடி ரூபாய் கடன் பெற்று வெளிநாடு தப்பித்து விட்டார் என்பது அனைவருக்கும் தெரிந்ததே. லண்டன் நீதிமன்றத்தில் இவரது வழக்கு நடந்து வருகிறது. இவர் குறித்து செய்திகள் ஊடகங்களில் மிகவும் பரபரப்பாய் அல்லோலப்படுகிறது. இந்நிலையில் லண்டனிலும் மல்லையா கடன் வாங்க முயற்சித்தது மீண்டும் பரபரப்பை ஏற்படுத்தியது.

ஏற்கனவே, மல்லையாவிடம் ம்திப்புமிக்க பழைய மாடல் கார்கள் மற்றும்  பந்தயக் கார்கள் பல இருந்தன. மல்லையாவிடம் இருந்த கார்கள் அவர் வெளிநாடு தப்பி சென்ற பின் பறிமுதல் செய்யப்பட்ட வீடியோ மூலம் வெளியுலகத்திற்கே அம்பலமானது. 

'கிங்பிஷ்ஷர்' விமான நிறுவனத்தின் அதிபராக விளங்கியவர் அவர். மல்லையாவிடம் இருந்த கார்கள்- விமானங்கள் தனி சொகுசு ஜெட் விமானங்கள் என்று மல்லையாவின் இந்தியா சொத்துக்கள் எல்லாம் பறிபோய் வருகின்றன. இவருக்கு லண்டனிலும் பல சொத்துகள் இருந்தாலும் அதை இந்திய அதிகாரிகளால் பறி முதல் செய்ய முடியாமல் திணறி வருகின்றனர். 

இந்நிலையில் மல்லையா  லண்டனில் புதிதாய் கார் வாங்க எண்ணியுள்ளார். லண்டனில் உள்ள ஒரு வங்கியில் ரூ 4.03 கோடி மதிப்பிலான பெராரி காரை வாங்க கடன் கேட்டுள்ளார். இவருடைய கதை தான் ஊருக்கு தெரிந்த விஷயமாகி விட்டதால் அவருடைய விண்ணப்பம் மறுக்கப்பட்டது.

அதையடுத்து அவருக்கு தெரிந்த ஒரு நபரின் பேரில்  கடன் விண்ணப்பித்து பெராரி காரை வாங்கி தற்போது தவணை முறையில் அத்தொகையை கட்டி வருவதாக கூறப்படுகிறது.  இந்தத் தகவல் லண்டன்நீதிமன்ற விசாரணையின்  போது அவரது வழக்கறிஞர் அறித்த தகவலால் வெளியுலகத்திற்கு தெரிய வந்தது. 

சென்னை, ஏப் 20-  கல்லூரிப் பேராசிரியை நிர்மலாதேவி மாணவிகளுடன் பேசிய ஆடியோ வெளியாகி தமிழக உயர்க்கல்வித் துறையைப் புரட்டிப் போட்டுள்ளது. இந்த நிலையில் நிர்மலாதேவி மாணவிகளுடன் வாட்ஸ் அப் மூலம் தொடர்புக்கொண்டு அவர்களை விடாமல் விரட்டி அடிபணிய வைத்தற்கான ஆதாரங்கள் தற்போது வெளியாகியுள்ளன.

அருப்புக் கோட்டை தனியார் கல்லூரி பேராசிரியை நிர்மலாதேவி, தனது கல்லூரி  மாணவிகளை உயர் அதிகாரிகளுடன் படுக்கையை பகிர்ந்து கொள்ள அழைத்த ஆடியோ வெளியாகி உயர் கல்வித் துறையில் பெரும் பரபரப்பை ஏற்படுத்தியது

இந்நிலையில் மாணவிகளுடன் தொலைபேசியில் பேசியதோடு மட்டுமல்லாமல் அவர்களை புலனத்தில் விடாமல் விரட்டி அடிபணிய வைக்க நினைத்ததற்கான ஆதாரங்கள் சிக்கியுள்ளன

தொடர்ந்து 16 நாட்கள் மாணவிகளை மூளைச் சலவை செய்தது தெரிய வந்துள்ளது. நாமெல்லாம் சேர்ந்து ஒரு குழுவாக செயல்படலாம். இதில் உங்களுக்கு தேவையான மார்க் மற்றும் பணம் கிடைக்கும். அதேபோல மிக இரகசியமாக பாதுகாப்பான செயல்பாடுகளை செய்தால் மிகப் பெரிய ஆளாக வரலாம் எனப் பேசியுள்ளார்

இதையெல்லாம் விட அதிகாரிகளுக்கு மனரீதியாகவும் உடல் ரீதியாகவும் ஒத்துழைக்க வேண்டும் என்று வெளிப்படையாகவே செய்தி அனுப்பி இருப்பது தான் அதிர்ச்சியின் உச்சம்.

பேராசிரியரின் தொல்லை தாங்க முடியாமல் கோபப்பட்ட ஒரு மாணவி,  ''நீங்கள் சொல்வதை கேட்கும் போதே உடம்பு கூசுகிறது. என்னிடம்  பேசியதைப் போல் வேறு யாரிடமும் பேசி விடாதீர்கள் உங்கள் வயதுக்கும் பதவிக்காகவும் பார்க்கிறேன். இல்லையென்றால், நடப்பதே வேறு'' என்றும் கூறியிருப்பது தெரிய வருகிறது

அந்நிலையிலும் அசிங்கப்படாத நிர்மலாதேவி விருப்பம்  'இல்லையென்றால் விட்டுவிடுங்கள் கண்ணா...,  வேறு யாருக்காவது பார்வேர்டு செய்யுங்கள்' என்றும் கேட்பதாகவும் தெரிய வருகிறது.

சென்னை, ஏப். 19-  அனைவரும் எதிர்பார்த்தபடியே எல்லோருக்கும் 'அல்வா' கொடுத்து  விட்டார் 'எங்க வீட்டு மாப்பிள்ளை' ஆர்யா. நடிகர்  ஆர்யாவுக்கு பெண் தேட நடந்த எங்க வீட்டு மாப்பிள்ளை என்ற  நிகழ்ச்சியின் பிரமாண்டமான இறுதிச் சுற்று  நடைபெற்றது. இதில் சூசானா, அகாதா, சீதாலெட்சுமி ஆகிய மூவரில் ஒருவரை மனைவி ஆக்கிக் கொள்வார்  என்று கூறப்பட்டது.

ஆனால், ஆர்யா  அதில் யாரையும் தேர்வு செய்யாமல் 'டிமிக்கி' கொடுத்து விடுவார் என்று பலரும் தெரிவித்து வந்தனர்.. மக்கள் எதிர்பார்த்தபடி ஆர்யா 3 பெண்களில் யாரையுமே தேர்வு செய்யவில்லை. பெண்ணைத் தேர்வு செய்ய இன்னும் கால அவகாசம் வேண்டும் என்று கூறி  தப்பித்து விட்டார்.

படங்கள் ஓடாமல் நிதி நெருக்கடியில் இருந்த ஆர்யாவுக்கு தொலைக்காட்சி சேனல் கோடிக்கணக்கில் கொட்டி கொடுத்ததால் வந்த பெண்களுடன் 'கடலை' போடுகிறார். அவர் நிச்சயம் யாரையும் திருமணம் செய்யமாடடார் என்று மக்கள் ஆரம்பத்தில் இருந்தே தெரிவித்து வந்தனர்.

அது போலவே நடந்தேறியது. நிகழ்ச்சியில் இவ்வளவு நெருக்கமாக-  அந்தப் பெண்களிடம் பழகி அவர் செய்த சேட்டைகளால் அந்தப் பெண்களின் வாழ்க்கை கேள்விக்குறியாகாதா? என்று மக்கள் பலர் கேள்வி எழுப்பியுள்ளனர்.

"நான் ஒருவரை தேர்வு செய்தால் அடுத்த இரு பெண்கள் ஏமாற்றம் அடைவார்கள்   என்பதால் யாருமே வேண்டாம்" என்று ஆர்யா முடிவு செய்து விட்டதாக தெரிவித்தார். 

ஒரு பெண்ணை தேர்வு செய்து  அவரது பெயரை இங்கே அறிவிப்பது நியாயம் இல்லை என்று  தெரிவித்தார். மூன்று பெண்களுக்கு  நேற்று ஆர்யா  டிமிக்கி கொடுத்தார் எங்க வீட்டு மாப்பிள்ளை மூலம் ஆர்யா, மக்களை 'மொக்கை'யாக ஏமாற்றிவிட்டார் என்று பலரும் கருதுகிறார்கள்

சென்னை, ஏப். 19-  "என் கன்னத்தில் தட்டியதற்கு தமிழக ஆளுநர் பன்வாரிலால் புரோகித்  மன்னிப்புக் கேட்டுக் கொண்டதை  ஏற்கிறேன். ஆனால் அவரது விளக்கத்தை ஏற்க முடியாது" என்று பெண் நிருபர் லட்சுமி சுப்ரமணியன் தெரிவித்துள்ளார்.

பேராசிரியை நிர்மலாதேவி விவகாரம் குறித்து ஆளுநர் மாளிகையில் செய்தியாளர்களை சந்தித்தார் ஆளுநர்.   அப்போது பெண் நிருபர் லட்சுமி சுப்ரமணியன் என்பவர் ஆளுநரிடம் கேள்வியொன்றை எழுப்பினார்.

அதற்கு பதிலளிக்கும் விதமாக அப்பெண்ணின் கன்னத்தில் தட்டிக் கொடுத்தார். இதனால் அந்தப் பெண் வருத்தப்பட்டதாக  டுவிட்டரில் தெரிவித்திருந்தார். இந்த சம்பவம்  சர்ச்சையானதைத் தொடர்ந்து  ஆளுனர் அந்தப் பெண்  நிருபரிடம் மன்னிப்பு கேட்டார்.

அந்தப் பெண் என் பேத்தியின் வயதை உடையவர். ட்தாம் அனபாக, அவருடைய கேள்வியை பாராட்டும் வைகையில் கன்னத்தில் தட்டிக் கொடுத்ததாக ஆளுனர் விளக்கம் அளித்திருந்தார்.

Advertisement

 

 

Top Stories

Grid List

லண்டன். ஏப்ரல்.20- "நீண்ட ஆலோசனைக்குப் பிறகு இந்த முடிவை எடுத்துள்ளேன். இவ்வாண்டுக்கான இங்கிலீஷ் பிரிமியர் லீக் போட்டி முடிவுக்கு வந்த கையோடு நான் விடைபெறுகிறேன்" என்று அர்சனல் கால்பந்து குழுவின் 22 ஆண்டுகால நிர்வாகியான அர்செனி வெங்கர் ஓர் அதிர்ச்சியான அறிவிப்பைச் செய்துள்ளார்.

இந்த சீசன் முடிந்த கையோடு நான் அர்சனல் குழுவை விட்டு வெளியேற உள்ளேன். கிளப் நிர்வாகத்துடன் இது குறித்து மிக விரிவாகக் கலந்து பேசி  இந்த முடிவை எடுத்துள்ளேன் என்றார் அவர்.

இந்தப் பிரிமியர் லீக் போட்டியில் முடிந்த வரை சிறந்த இடத்தைப் பிடிக்க அரசனலுக்கு ரசிகர்கள் பக்கபலமாக இருக்க வேண்டும். அர்சனலை நேசிப்பவர்கள் அந்தக் கிளப்பின் மதிப்பை போற்றிப் பாதுகாக்கவேண்டும். ஆதரிக்க வேண்டும் என்று   அர்செனி வெங்கர் கேட்டுக் கொண்டார்.

இதனிடையே அர்சனல் குழுவுக்காக 22 ஆண்டுகாலம் சேவையாற்றிய வெங்கர் போற்றுதலுக்கு உரியவர் என்று குறிப்பிட்ட கிளப்பின் தலைவர் கிரோயென்கே, அவருக்கு மாற்றாக சிறந்த நிர்வாகி ஒருவரை அர்சனல் விரைவில் கண்டறியும் என்று சொன்னார்.

அடுத்த சீசனில் ஐரோப்பிய சாம்பியன்ஸ் லீக் போட்டிக்கு அர்சனல் தேர்வு பெறவேண்டுமானால்,  தற்போது நடந்து வரும் ஐரோப்பா லீக் போட்டியில் அது சாம்பியன் பட்ட்டத்தை வென்றால் மட்டுமே அது சாத்தியமாகும். அடுத்த வாரம் நடை பெறவிருக்கும் ஐரோப்பிய லீக் அரையிறுதி ஆட்டத்தில் அத்லெட்டிக்கோ மாட்ரிட் குழுவை அர்சனல் வீழ்த்தி,  இறுதியாட்டத்திற்கு தகுதி பெறவேண்டிய கட்டாயத்தில் இருக்கிறது என்பது குறிப்பிடத்தக்கது.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

கோலாலம்பூர், மார்ச் 4- அன்புக்குத் தடை இல்லை: தொலைவில்லை, தொலை தூரத்துச் சூரியனின் விடியல் முகங்கண்டு மலர்கின்ற பூக்களைப் போலவே அன்பின் இதம் கண்டு மனிதர்களின் மனங்கள் மலர்கின்றன என்பதால்  தமது பக்தர்களை உலகெங்கும் அன்பால் அரவணைக்கும்  ‘அம்மா’ஶ்ரீ மாதா அமிர்தானந்தமயி மலேசியாவுக்கு வருகை புரிகிறார்.

தன்னை நாடிவரும் பக்தர்களை அன்போடு ஆரத் தழுவி ஆன்மீக ஆசி அளித்து, ஆறுதல் வழங்குவதன் மூலம் அம்மா அமிர்தானந்தமயி பக்தர்களின் அன்பைப் பெற்றுத் திகழ்கிறார்.

கேரளாவில் ஒரு சிறிய கிராமத்தில் பிறந்து, இன்றைக்கு உலகளாவிய ஆன்மீகச் சேவையால் மக்களின் மனங்களை கவர்ந்தவர்.  சிறுமியாக இருந்த காலந்தொட்டே சேவை செய்யும் உளப் பக்குவத்தில் ஊறித் திளைத்தவர்.

துயர்நிலையில் யாரும் வாழக்கூடாது, யாரும் ஆதரவற்று உழல்தல் கூடாது, உணவு, உடை, உறைவிடம், கல்வி, ஆரோக்கியக் குறைவால் அவதியுறக் கூடாது என்ற அம்மாவின் எண்ணத்தை நிறைவு செய்யும் நோக்கில் முதியோர், மாதர், குழந்தைகளை ஆதரித்து அரவணக்கும் இல்லங்களையும் கல்விக் கழங்களையும், சுகாரதார மையங்களையும் அர்ப்பணிப்பு உணர்வோடு நடத்தி வருகிறது அம்மா அமிர்தானந்தமயின் மடம்.

அம்மாவின் ஆசியுடன் மலேசியாவில் செயல்பட்டு வரும்  மலேசிய அமிர்தேஸ்வரி அறவாரியமும் பல்வேறு சமூகச் சேவைகளை மலேசிய மக்களுக்கு ஆற்றி வருகிறது. வசதி குறைந்தவர்களுக்கு இலவச பாலர் பள்ளி, உணவு உதவி, சுகாதாரச் சேவைகள் உள்ளிட்ட சேவைகளை அது வழங்கி வருகிறது.

அம்மா அமிர்தானந்தமயி, இம்மாதம்  மலேசியாவுக்கு வருகை புரியவிருக்கிறார். மலேசிய பக்தர்களுக்கு ஆரத்தழுவி ஆசி வழங்கவிருக்கிறார் என்று மலேசிய அமிதேஸ்வரி அறவாரியம் தெரிவித்தது.

அம்மா அமிர்தானந்தமயி தமது  பக்தர்களுக்கு ஆசி வழங்கும் நிகழ்ச்சி  கோலாலம்பூரில் மார்ச்  22 ஆம் தேதி பிற்பகல் 7.30 மணிக்குத் தொடங்கி, மைன்ஸ் இண்டர்நேஷனல் கன்வென்சன் சென்டரில் நடைபெறவிருக்கிறது.

கோலாலம்பூர் நிகழ்ச்சி குறித்த மேல் விபரங்களுக்கு  சசி பாலன்  -016- 222 9528,  ராஜேஸ்வரி  - 012 2922 494, சோங் செக் லீ  -012 390 9913 ஆகியோரை தொடர்பு கொள்ளலாம்

அடுத்து, மார்ச் 24 ஆம் தேதி பினாங்கில் நடக்கவிருக்கும் நிகழ்ச்சியிலும் அம்மா பக்தர்களுக்கு ஆசி வழங்கவிருக்கிறார். அன்றைய தினம் பிற்பகல் 6.30 மணி தொடங்கி  ஸ்பைஸ் அரினா அரினாவில் நடைபெறவுள்ளது. பினாங்கு நிகழ்ச்சி குறித்து கூடுதல் விபரம் அறிந்து கொள்ள விரும்புவோர், 012 4277 353 (காளிதாஸ்) என்ற தொலைபேசி எண்ணில் தொடர்பு கொள்ளலாம்.

லண்டன், ஜன.13- யார் என்ன சொன்னாலும் சரி, அது வேற்றுக் கிரகவாசிகளின் பயணக் கலம் தான் என்று யுஎப்ஓ எனப்படும் பறக்கும் தட்டுகள் மீது நம்பிக்கை வைத்துச் செயலல்பட்டு வரும் ஆராய்ச்சியாளர்கள் கூறுகின்றனர். அண்மையில் யூ-டியூப்பில் வெளியாகி  "நிலா மேற்பரப்பில், வேற்றுக் கிரகவாசிகளின் கலம்" (Alien Ship on the Lunar Surface) என்ற வீடியோ பரபரப்பை ஏற்படுத்தி இருக்கிறது.

இது குறித்து  பல மாதிரியான கருத்துகள் சமூக ஊடகங்களிலும் அறிவியல் அரங்கிலும் நிலவி வருகின்றன.  நிலாவில் வேற்றுக்கிரக பயணக் கலம் என்பது இட்டுக்கட்டிய விஷயம் என்று பலர் விமர்சித்துள்ளனர்.

எனினும், இதனை மறுத்துள்ள யுஎப்ஓ ஆதரவு இயக்கமான ஸ்த்ரீட் கேப், இந்த வீடியோ,  சீனாவின் சாங்'ஜி-3 என்ற நிலா விண் ஊர்தியினால் எடுக்கப்பட்ட ஒன்று எனக் கூறியுள்ளது. இந்த விண் ஊர்தியை சீனா கடந்த 2013 ஆம் ஆண்டில் நிலாவுக்கு அனுப்பியது.

இந்த விஷயத்தை நாம் சாதாரணமாக அலட்சியப்படுத்தி விடக்கூடாது. கண்டறிவதற்கு போதுமான அடிப்படையைக் கொண்ட ஓர் அம்சம் இது என்று அந்த இயக்கம்  வர்ணித்தது. 

யூ-டியூப்பில் வெளியான இந்த வீடியோவை பல ஆயிரம் பேர் பார்த்து வருகின்றானர். இவர்கள் வேற்றுக் கிரகவாசிகள் பற்றிய சிந்தனையை நிராகரித்து விடக்கூடாது என்று அது தெரிவித்தது.

வார்சா, ஏப்ரல் 21- போலாந்தில் சக தோழியையே பெண் ஒருவர் பேருந்தில் தள்ளி விட்டு கொலை செய்ய முயற்சித்தாக கூறும் காணொளி ஒன்று அதிர்ச்சியை ஏற்படுத்தியுள்ளது. எனினும், அது எதேச்சையாக நடந்த சமபவம் என்று பின்னர் தெரிய வந்துள்ளது.

போலாந்தின்  செக்கோவேய்ஸ் என்ற பிராந்தியத்திலுள்ள  ஷைஸைஸ்  இடத்தில் சாலையில்  இரண்டு பெண்கள் பேசிக் கொண்டு நடந்து செல்கின்றனர்.அப்போது அந்த பெண்களில் ஒருவர் திடீரென்று அந்தச் சாலையில் பேருந்து வந்த போது,  சக தோழியை தள்ளி விடுகிறார்.

 

இதில் அந்த பெண்ணின் தலை நூலிழையில்  பேருந்தின் டயரில் சிக்காமல் தப்பியது, இருப்பினும் உடலில் காயங்கள் ஏற்பட்டிருந்ததால் பின்னர் சிகிச்சை பெற்றார்.

இது தொடர்பான காட்சிகள் அங்கிருந்த சிசிடிவி கேமராவில் பதிவாகியதால்,சக தோழியையே பெண் ஒருவர் பேருந்தில் தள்ளி கொலை செய்ய முயற்சிக்கிறார் என்று பலரும் குற்றஞ்சாட்டினர்.

அதன் பின்னர் இந்தச் சம்பவம் குறித்து  அந்தப் பெண்  விளக்கம்  கூறினார்.

"நான் விளையாட்டிற்கு தள்ளியதாகவும், ஆனால் பேருந்து வரும் என்பதை நான் நினைத்து பார்க்கவே இல்லை" என்று கண்கலங்கக் கூறினார்.

இருப்பினும், இது தொடர்பாக அந்த பெண் மீது போலீசார் வழக்கு பதிவு செய்து அபராதம் விதித்ததாகவும், இனிமேல் இது போன்ற விபரீத விளையாட்டு விளையாடக் கூடாது என்று எச்சரித்து அனுப்பியதாகவும் கூறப்படுகிறது.

 

சென்னை, ஏப் 17- பொருளாதாரம் சூழ்நிலை மற்றும் மன உளைச்சல் போன்ற காரணங்களால் 'இம்சை அரசன் 24 ஆம் புலிகேசி' படத்தில் மேற்கொண்டு நடிக்க  நாட்கள் ஒதுக்க இயலாத நிலையில் உள்ளதாக நடிகர் வடிவேலு தெரிவித்துள்ளார்

இம்சை அரசன் 24ஆம் புலிகேசி படத்தில் நடிக்க நடிகர் வடிவேலு மறுத்து விட்டதாக அந்தப் படத்தின் தயாரிப்பாளரான இயக்குனர் சங்கர் தயாரிப்பாளர்கள் சங்கத்தில் முறைப்பாடு செய்திருந்தார். இதனைத் தொடர்ந்து நடிகர் சங்கம் வடிவேலுவிடம் கடிதங்கள் மூலம் விளக்கம் கோரியிருந்தது.

 இது குறித்து கடிதத்துக்கு பதிலளிக்கையில் வடிவேலு மேற்கண்டவாறு தெரிவித்துள்ளார்.இம்சை அரசன் 24 ஆம் புலிகேசி படத்தில் நடிக்க 2016 ஜூன் மாதம் 1ஆம் தேதி ஒப்புக் கொண்டிருந்ததாகவும் 2016 ஆம் ஆண்டு டிசம்பருக்குள் படத்தை முடித்து விடுவதாகவும் அதுவரை எந்தப் படத்திலும் நடிக்க ஒப்புக் கொள்ள வேண்டாம் என்றும் தன்னிடம் உறுதி அளித்ததால் வேறு படங்களில் நடிப்பதை தான் தவிர்த்ததாகவும் எனினும் 2016 டிசம்பர் வரை படப்பிடிப்பை தொடங்காமலேயே காலம் தாழ்த்தினார்கள் என தெரிவித்துள்ளார்.

 மேலும் தயாரிப்பாளர் மற்றும் சினிமா தொழிலின் நலன் கருதி அதன் பிறகும் பல்வேறு தேதிகளில்  அந்தப் படத்தில் நடித்து கொடுக்கும் நிலையில் தன்னுடைய பிரத்தியேக ஆடை வடிவமைப்பாளரை எஸ் பிக்சர்ஸ் நீக்கியது.

 அத்துடன் கெட்ட நோக்கத்தோடு தனது புகழுக்கும் பெயருக்கும் களங்கம் விளைவிக்கும் வகையில் தயாரிப்பாளர் சங்கத்தில் முறைப்பாடு கடிதத்தை கொடுத்து அந்தக் கடிதத்தில் ஏதோ தனக்கு இந்த ஒரு படத்தின் மூலம் தான் சினிமா உலகின் புகழ் ஏற்பட்டது போன்ற ஒரு மாய தோற்றத்தை உருவாக்கி உள்ளனர்.

 இதனால், தனக்கு பொருளாதார இழப்பும் மன உளைச்சலும் ஏற்பட்டது. இந்தப் படத்தில் நடிக்க வேண்டும் என்று நடிகர் சங்கம் தன்னை வற்புறுத்தியதோடு முன்பு தன்னை நேரில் அழைத்து கருத்து கேட்காதது விதிகளுக்கு முரணானது.

 இதனால், பொருளாதாரம், குடும்ப சூழ்நிலை மற்றும் மன உளைச்சல் காரணங்களால் இம்சை அரசன் 24 ஆம் புலிகேசி படத்தில் மேற்கொண்டு நடிக்க நாட்கள் ஒதுக்க இயலாத நிலையில் உள்ளேன் என்று வடிவேலு தெரிவித்துள்ளார்

கோலாலம்பூர், பிப்.3- கச்சா பொருள்களின் விலையேற்றம் மற்றும் பொருளாதார வளர்ச்சிநிலை ஆகியவை காரணமாக கடந்த ஆண்டில் மலேசியாவைச் சேர்ந்த 40 முன்னணி கோடீஸ்வர்களின் சொத்து மதிப்பு அவர்களை மேலும் ஒரு படி உயர்த்தி இருக்கிறது. 

ஒட்டுமொத்தமாக இந்த 40 பணக்காரர்களின் சொத்து மதிப்பு 6,362 கோடி ரிங்கிட்டுக்கு அதிகரித்து, அதாவது முந்தைய ஆண்டைக் காட்டிலும் கடந்த ஆண்டில் 28 விழுக்காடு சொத்து மதிப்பு கூடியிருக்கிறது எனத் தெரிய வந்துள்ளது.

சற்று தொய்வுற்றிருந்த உலகப் பொருளாதாரம், கடந்த ஆண்டில் குறிப்பிட்ட காலக் கட்டத்திற்குப் பின்னர் வழக்க நிலைக்குத் திரும்பியது. சீனாவின் பொருளாதார வளர்ச்சி வேகத்தில் ஏற்பட்ட சரிவு மற்றும் உலக அளவில் கச்சா எண்ணெய்யின் விலையேற்றம் ஆகியவற்றினால் சிறிது காலம் உலகப் பொருளாதாரத்தில் தடுமாற்றம் நிலவியது.

இந்த மலேசியக்  40 கோடீஸ்வரர்களில் அதிகளவில் தனது சொத்து மதிப்பில் உயர்வைக் கண்ட முதல் நபர் என்றால்  மலேசியாவின் முதல் நிலைக் கோடீஸ்வரரான  ரோபெர்ட் குவோக்  எனலாம்.

கடந்த ஆண்டில் மட்டும் இவருடைய சொத்து மதிப்பு 1,317 கோடி வரை அதிகரித்துள்ளது. அடுத்த இடத்தைப்  பிர்ஸ் மெட்டல் அலுமினியம் ஹோல்டிங்ஸ் பெர்ஹாட் நிறுவனத்தின்  நிறுவனர் டான்ஶ்ரீ கோன் போ கியோங் பிடித்துள்ளார்.

இதனால், கடந்த ஆண்டில் 14 ஆவது இடத்தில் இருந்த இவர், இப்போது 8ஆவது மிகப் பெரிய மலேசியக் கோடீஸ்வரராக ஆகியிருக்கிறார். இம்முறை இந்த 40 கோடீஸ்வரர்களின் பட்டியலில் புதிதாக எழுவர் இடம் பிடித்திருக்கின்றனர்.

ஏர் ஆசியா குழுமத்தைச் சேர்ந்த டான்ஶ்ரீ டோனி பெர்னாண்டஸ், டத்தோ  கமாருடின் மெரானுன் ஆகியோர் இந்த ஏழு புதுமுகங்களில் அடங்குவர். ஏர் ஆசிய நிறுவனப் பங்குகளின் மதிப்பு உயர்வு, இவர்களுக்கு கைகொடுத்துள்ளது. சுமார் 395 கோடி ரிங்கிட் வரை சொத்து மதிப்பு அதிகரித்து 17 ஆவது இடத்தை எட்டி இருக்கிறார்கள். ஏர் ஆசியா உள்கட்டமைப்பில் இவர்கள் செய்த பெரும் மாற்றங்கள் இவர்களின் வருமான பெருக்கத்திற்கு வழிவகுத்ததாக கருதப்படுகிறது.

முன்னணி 40 கோடீஸ்வரர்களின் பட்டியலில் இவர்களை அடுத்து செர்பா டைனமிக் ஹோல்டிங்ஸ் நிறுவன அதிபர்களான டத்தோ முகம்மட் அப்துல் கரிம், அப்துல் காதிர் ஷாகிப் மற்றும் டத்தோ அவாங் டாவுட் புத்ரா ஆகியோருடன் வேள்யூ பார்ட்டனர்ஸ் குழுமத்தின் தலைவர் டத்தோஶ்ரீ  சியா செங் ஹய் ஆகியோரும் இடம்பிடித்துள்ளனர்.

கடந்த ஆண்டில் தொழில் ரீதியில் ஏற்பட்ட சரிவு காரணமாக சொத்து மதிப்பில் பெரும் சரிவைக் கண்டவர்கள் இந்தப் பட்டியலில் இருந்து வெளியேறியுள்ளனர். அந்த வகையில் சபுரா எனர்ஜி சென். பெர்ஹாட் நிறுவனத் தலைவர் டான்ஶ்ரீ ஷாரில் சம்சுடின் முன்பு 29 ஆவது இடத்தில் இருந்த நிலையில், இப்போது இந்த 40 பேரின் பட்டியலில் இடம்பெறாமலேயே போயிருக்கிறார். இந்த 40 பேர் பட்டியலில் இருந்து வீழ்ச்சி கண்டவர்களில் குறிப்பிடத்தக்க மற்றொருவர் டான்ஶ்ரீ மொக்‌ஷானி மகாதீர் ஆவார்.

இந்த 40 மலேசியக் கோடீஸ்வரர்களின் பட்டியலில் டான்ஶ்ரீ ஆனந்த கிருஷ்ணன் தற்போது 5ஆவது இடத்திலும் டான்ஶ்ரீ ஞானலிங்கம் 12 ஆவது இடத்திலும் டான்ஶ்ரீ டோனி பெர்னாண்டஸ் 17 ஆவது இடத்திலும் இருந்து வருகின்றனர் என்பது குறிப்பிடத்தக்கது.

Advertisement

Upcoming Events