Top Stories

Grid List

கோலாலம்பூர், ஜன.5- நாளை நடக்கவிருக்கும் நட்சத்திர கலை விழாவில் கலந்து கொள்வதற்காக நடிகர் ரஜினிகாந்த் இன்று கோலாலம்பூர் வந்தடைந்தார். அவருக்கு ஆரத்தி எடுக்கப்பட்டு உற்சாக வரவேற்பு வழங்கப்பட்டது.

தென்னிந்திய நடிகர் சங்க கட்டிட நிதிக்காக நாளை தலைநகர் புக்கிட் ஜாலில் நட்சத்திர கலை விழா நடைபெறுகிறது. இதில் கலந்து கொள்வதற்காக நடிகர் பட்டாளம் இன்று காலையில் மலேசியா வந்தடைந்தது.

   ####காணொளி: நன்றி facebook

கார்த்தி, ஆர்யா, சிவகார்த்திகேயன், ஜீவா, சுஹாசினி, கௌதம் கார்த்திக், பிக் பாஸ் புகழ் வையாபுரி, ஆர்த்தி, கணேஷ் ஆகியோர் உட்பட 50க்கும் மேற்பட்ட நடிகர்கள் இன்று காலையில் தங்கும் விடுதிக்கு வந்தடைந்தனர்.

முன்னதாக, அதிகாலையில் நடிகர் ரஜினி கோலாலம்பூர் வந்தடைந்தார். அவரை செனட்டர் டி.மோகன் மாலை அணிவித்து வரவேற்றார். அவருக்கு சில பெண்கள் ஆரத்தி எடுத்து வரவேற்றனர். 

ரஜினி வரும் தகவல் அறிந்து தங்கும் விடுதிக்கு வெளியே காத்திருந்த பொதுமக்கள், 'தலைவா' எனக் கோஷமிட்டு ஆராவாரம் செய்தனர்.  

கோலாலம்பூர், ஜன.4- இவ்வார சனிக்கிழமையன்று புக்கிட் ஜாலில் அரங்கத்தில் நடைபெறவிருக்கும் 'நட்சத்திர கலை இரவு 2018' நிகழ்ச்சியில் சூப்பர் ஸ்டார் ரஜினிகாந்த் கலந்துகொள்ளவிருக்கிறார் என்ற அறிவிப்பைத் தொடர்ந்து, இந்நிகழ்ச்சிக்கு ஏகோபித்த ஆதரவு கிடைக்கும் என்று பெருமளவில் எதிர்பார்க்கப்படுகிறது. 

அதுமட்டுமல்லாது, இந்நிகழ்ச்சியின் போது 'ரோபோ 2.0' திரைப்படம் குறித்த இன்ப அதிர்ச்சி தகவல் ஒன்றை அவர் தனது ரசிகர்களுடன் பகிரவிருக்கிறார் என்று தென் இந்திய நடிகர் சங்கப் பொருளாளரான நடிகர் கார்த்தி சிவக்குமார் கூறினார். 

"ரோபோ 2.0 திரைப்படம் குறித்து ரஜினி சார் ரசிகர்களுக்கு இன்ப அதிர்ச்சி ஒன்றை கொடுக்கவிருக்கிறார். இது குறித்து வேறு எந்தத் தகவலையும் என்னால் பகிர்ந்துக் கொள்ள முடியாது. அதுமட்டுமல்ல, இந்நிகழ்ச்சியின் போது மேலும் பல 'அதிர்ச்சிகள்' மலேசிய ரசிகர்களுக்கு காத்திருக்கின்றன" என்று கார்த்தி சொன்னார். 

இவரின் பேட்டியின்படி ரஜினியின் அடுத்த படமான எந்திரன் 2.0 படத்தின் டீசர் மலேசியாவில் வெளியிடப்படுமா என்ற எதிர்பார்ப்பு உருவாகியுள்ளது.

6-ஆம் தேதியன்று நடைப்பெறவிருக்கும் இந்த நட்சத்திர கலை இரவு நிகழ்ச்சியில், 300க்கும் மேற்பட்ட தென்னிந்திய நடிகர்கள் மற்றும் மலேசிய நடிகர்கள் பங்கெடுத்துக் கொள்ளவிருக்கின்றனர். சூப்பர் ஸ்டார் ரஜினிகாந்த், உலக நாயகன் கமல்ஹாசன், புகழ்பெற்ற இசையமைப்பாளர்கள், மற்றும் பாடகர்களும் இந்நிகழ்ச்சியில் கலந்து கொள்வர். 

மை-இவண்ட்ஸ் இண்டர்நேஷனல் மற்றும் தென்னிந்திய நடிகர் சங்கத்தின் ஏற்பாட்டில் இந்தக் கலை இரவு நடைபெறவிருக்கிறது. சனிக்கிழமை காலை 10 மணிக்கு தொடங்கி, இரவு 10 மணி வரை இந்த நிகழ்ச்சி நடைப்பெறும்.  

இந்நிகழ்ச்சியை நேரில் கண்டு களிக்க ரசிகர்கள் ரிம.10 தொடங்கி ரிம.30-க்குள் டிக்கெட்டுகளை பெற்றுக் கொள்ளலாம். கிட்டத்தட்ட 30,000 டிக்கெட்டுகள் இதுவரை விற்பனை செய்யப்பட்டிருப்பதாக மை-இவண்ட்ஸ் இண்டர்நேஷனல் குழுவின் (MyEvents International Group) தலைமை செயல்முறை அதிகாரி ஷாஹூல் ஹமீட் கூறினார். 

கோலாலம்பூர், டிச.23- பல மேடை நாடகங்களிலும் தொலைக்காட்சிப் படங்களிலும் நடித்த உள்ளூர் நடிகை நித்தியா மனோகரன் டெங்கி காய்ச்சல் காரணமாக நேற்று மரணமடைந்தார்.

நடிப்பின் மீதான ஆர்வத்தால் பல உள்ளூர் மேடை நாடகங்களிலும் தொலைக்காட்சி படங்களிலும் சிறப்பாக நடித்து வளர்ந்து வரும் இளம் கலைஞர் என புகழ்பெற்றவர் நித்தியா மனோகரன். அண்மையில் ஒளிப்பரப்பான தாமரை தொலைக்காட்சி படத்தில் அவர் நடித்த பாத்திரம் பலரால் பாராட்டப்பட்டது. 

மேலும், இயக்குனர் சூரியா ரவிகுமார் இயக்கத்தில் உருவான என்ன செய்ய போகிறாய் என்ற மேடை நாடகத்திலும் நித்தியா மனோகரன் சிறப்பாக நடித்திருந்தார் என்பது குறிப்பிடத்தக்கது.

டெங்கி காய்ச்சலால் பாதிக்கப்பட்ட நித்தியா அண்மையில் மருத்துவமனையில் அனுமதிக்கப்பட்டு சிகிச்சை பெற்று வந்தார். இந்நிலையில் நேற்று இரவு நித்தியா சிகிச்சை பலனளிக்காமல் இறந்து விட்டதாக தெரிவிக்கப்பட்டது.

இன்று பிற்பகல் 1 மணிக்கு கிள்ளான், தெலுக் பூலாய்யில் உள்ள அவரின் வீட்டில் அன்னாரில் உடலுக்கு இறுதி மரியாதை செய்யப்படும் என தெரிவிக்கப்பட்டுள்ளது.

வளர்ந்து வரும் நடிகையான நித்தியாவின் மரணம் மலேசிய கலைஞர்கள் மத்தியில் அதிர்ச்சியை ஏற்படுத்தியுள்ளது. பலர் சமூக வலைத்தளங்கள் வாயிலாக தங்களின் ஆழ்ந்த அனுதாபத்தைத் தெரிவித்து வருகின்றனர்.

சென்னை, பிப்.16- அதிஷ்டம் யாருக்கு எப்படி எந்த வகையில் வரும் என்று யாருக்கும் தெரியாது. அப்படி தான் புருவ அழகி பிரியா வாரியாருக்கும். இந்த புருவ அழகி மலையாள உலகின் இளம் நட்சத்திரம் துல்கர் சல்மானை கூட ஓரங்கட்டி விட்டது.

ஒரு ஆதார் லவ் என்ற படத்தின் பாடல் மூலம் பிரபலமான பிரியா தான் தற்போது சமூக வலைத்தளங்களில் டிரண்டிங்கில் முதல் நிலையில் இருக்கிறார். இவரின் கண்ணசைவில் மயங்கிய ரசிகர்கள் இவரை இன்ஸ்டாகிராமில் அதிகம் தேடி வருகின்றனர்.

எப்படி தெரியுமா? கடந்த ஒரு வாரத்தில் அதிகம் தேடப்பட்டவர் பட்டியலில் முதலிடத்தில் இருக்கும் பிரியாவை 30 லட்சத்திற்கும் மேற்பட்டோர் இன்ஸ்டாகிராமில் அவரின் ரசிகர்கள் ஆகியிருக்கின்றனர்.

இதில் என்ன? இதற்கு முன்னர் மலையாள திரையுலகை பொருத்தவரை இன்ஸ்டாகிராமில் அதிக பின்தொடர்பவர்களை வைத்திருந்தவர் துல்கர் தான். அதாவது 19 லட்சம் பேர். ஆனால் அவரின் சாதனை பிரியா தூக்கி சாப்பிட்டுவிட்டார். 

சென்னை, பிப்.15- பிக்பாஸ் நிகழ்ச்சிக்கு பிறகு ஓவியா 'வேற மாதிரி' மாறி பல மாதங்கள் ஆகிவிட்டன. கைவசம் நிறைய படங்கள் இருக்க, அடுத்ததாக சிம்புவுடன் ஓவியா இணைந்துள்ளார்.

தற்போது ராகவா லாரன்ஸ் உடன் காஞ்சனா 3 படத்தில் நடித்து வரும் ஓவியா, சீனி, சிலுக்குவார்பட்டி சிங்கம், ஓவியா விட்டா யாரு, களவாணி 2 ஆகிய படங்களில் ஒப்பந்தம் ஆகி நடித்து வருகிறார். 

இந்நிலையில், அவர் அடுத்ததாக நடிக்க ஒப்பந்தம் ஆகியுள்ள படம் '90 மில்லி'. படத்தலைப்பு ஒரு மாதிரியாக இருக்கிறது என்று நினைக்கிறீர்களா? இதனை உறுதி செய்ய காதலர் தினமான நேற்று முதல் பார்வை போஸ்டர் வெளியிடப்பட்டது. 

முதல் பார்வை போஸ்டரில் ஓவியா தேநீர் கடை ஒன்றில் ஒய்யாரமாக உட்கார்ந்து தேநீரும் ரொட்டியும் சாப்பிடுவது போலவும் அருகே ஒருவர் தேநீர் கலக்குவது போலவும் காட்சியமைக்கப்பட்டுள்ளது.இப்படத்தை 'குளிர் 100 டிகிரி' படத்தை இயக்கிய அனிதா உதீப் தயாரித்து இயக்கவிருப்பதாக தகவல்கள் வெளியாகியுள்ளன. 

படத்தின் பெயர் 90 மில்லி என்றும் இப்படத்திற்கு சிம்பு இசையமைக்கவிருப்பதாகவும் செய்தி வெளியாகியுள்ளது. அண்மையில் சிம்பு இசையமைத்த பாடலில் ஓவியா பாடியது நல்ல வரவேற்பைப் பெற்றதை அடுத்து இருவரும் மீண்டும் இணைந்துள்ளனர்.

இப்படம் கதாநாயகிக்கு முக்கியத்துவம் தரும் படம் என்பதால் நயன்தாரா போல ஓவியாவும் பெரிய அளவில் பேசப்படுவார் என ஓவியா ஆர்மியினர் முதல் பார்வை போஸ்டரைப் பகிர்ந்து வருகின்றனர்.

சென்னை, பிப்.9- கட்டப்பட்டு வரும் நடிகர் சங்க கட்டடத்தின் திருமண மண்டபத்தில் அடுத்த ஜனவரி மாதம் தனது திருமணம் தான் முதல் திருமணமாக நடக்கும் என நடிகர் விஷால் கூறியுள்ளார்.

தென்னிந்திய நடிகர் சங்க செயலாளரும் தயாரிப்பாளர் சங்கத் தலைவருமான விஷால் சென்னை விமான நிலையத்தில் நிருபர்களுக்குப் பேட்டி அளித்தார். அப்போது நடிகர் சங்க கட்டட பணி குறித்து நிருபர்கள் கேட்ட கேள்விக்கு விஷால் மேற்கண்டவாறு பதிலளித்தார்.

"நடிகர் சங்க கட்டட பணிகள் இந்த ஆண்டு டிசம்பர் மாதத்திற்குள் முடிந்து விடும். அடுத்தாண்டு ஜனவரி மாதம் கட்டட திறப்பு விழா கண்டிப்பாக நடக்கும். புதிய கட்டத்தில் அமைய இருக்கும் திருமண மண்டபத்தில் முதல் திருமணமாக எனது திருமணம் தான் முதல் திருமணமாக நடக்கும். அதற்காக இப்போதே முன்பதிவு செய்துவிட்டேன்" என்று கூறினார்.

திருமணம் ஜனவரி என்றாகி விட்டது அப்போது விஷாலுக்கு ஜோடி யார் என்று என்ற கேள்வியை ரசிகர்கள் எழுப்பியுள்ளனர்.

கோலாலம்பூர், ஜூலை.12- கடந்த 2012ஆம் ஆண்டு ஒரு பாடல் உலகையே கலக்கியது என்றால் அது ஓப்பா கங்காம் ஸ்டைல் பாடல் தான். யூடிப்பில் அதிகம் பேர் பார்த்த பாடல் என்ற பெருமையை ஐந்து ஆண்டுகளாக தக்க வைத்துக் கொண்டிருந்த இப்பாடலை முந்தி புதிய சாதனை படைத்துள்ளது 'சீ யூ அகெய்ன்' எனும் கார் பந்தய படத்தின் பாடல்.

2012ஆம் ஆண்டு பட்டி தொட்டி தொடங்கி ஏன் இந்தியர்களின் திருமண நிகழ்ச்சிகளிலும் கூட தவறாமல் ஒலித்த பாடல் கங்காம் ஸ்டைல். பாட்டின் இசைக்கும் அதன் காட்சியமைப்பிற்கும் கிரங்கி போன ரசிகர்கள் யூடியூப்பில் மட்டும் ஏறக்குறைய 289 கோடி மக்கள் பார்த்துள்ளனர். யூடிப்பில் அதிகம் பார்க்கப்பட்ட காணொளி என்ற அந்தஸ்த்தையும் இந்த பாடல் பெற்றது. 

ஆனால், இந்த பாடலை முந்தி அதிகம் பேர் பார்த்த பாடலாக தனி முத்திரை பதித்துள்ளது 2015ம் ஆண்டில் வெளியான பார்ஸ்ட் அண்ட் ஃப்யூரியஸ் 7 எனும் படத்தின் சீ யூ அகெய்ன் பாடல். இந்த பாடலை மறைந்த நடிகர் பால் வாக்கருக்கு இசை அஞ்சலியாக வழங்கப்பட்டது என்பது குறிப்பிடத்தக்கது. இதுவரை இப்பாடலை 290 கோடி பேர் யூடியூப்பில் பார்த்துள்ளனர்.

குளுவாங், மார்ச் 18:- ஓரின சேர்க்கைக் காட்சியை நீக்கி விட்டு பியூட்டி அன் பீஸ்ட் படத்தைத் திரையிடலாம் என்று உள்துறை துணை அமைச்சர் வால்ட் டிஸ்னி நிறுவனத்திடம்அறிவுறுத்தியிள்ளார்.

டிஸ்னி, மலேசிய திரைப்பட தணிக்கை வாரியத்திற்கு ஏற்ப ஓரின சேர்க்கைக் காட்சியைநீக்கிவிட்டால் மட்டுமே இந்த படத்தைத் திரையிட டிஸ்னிக்கு அனுமதி வழங்கப்படும் என உள்துறை துணை அமைச்சர் டத்தோ நூர் ஜஸ்லான் முகமது கூறினார்.

டிஸ்னி படத்தில் ஒரு காட்சியை நீக்க வேண்டும் என உள்துறை அமைச்சு ஒரு முறையீட்டு தாக்கலை வியாழக்கிழமை அறிவித்தது. இந்தப் படத்தில் உள்ள ஓரின சேர்க்கைக் காட்சியைநீக்கினால் மட்டுமே மலேசியாவில் திரையிட முடியும் எனப் படத் தணிக்கை வாரிய தலைவர் டத்தோ அப்துல் ஹலிம் அப்துல் ஹமீத் மற்றும் அமைச்சரவையும் முடிவெடுத்துள்ளனர்

கோலாலம்பூர், மார்ச் 14- ஆங்கில பட விரும்பிகள் இவ்வாண்டு அதிகம் எதிர்ப்பார்த்த படம் பியூட்டி அண்ட் தே பீஸ்ட். இப்படத்தை மலேசியாவில் திரையிட தணிக்கை வாரியம் அனுமதி அளித்து விட்டாலும் படம் எப்போது திரைக்கு வரும் என்பது கேள்விக்குறியாகவே இருக்கிறது.

நடிகை எம்மா வாட்சன் நடிப்பில் வெளிவரவிருக்கும் இப்படம் முன்னதாக இம்மாதம் 16ம் தேதி திரைக் காணும் என அறிவிக்கப்பட்டிருந்தது. ஆனால், தணிக்கை வாரியத்திடம் சென்ற இப்படத்தை வாரியக் குழு மலேசியாவில் திரையிடுவதற்கு தடை விதித்தது. 

இதற்கு படத்தில் ஓரினக்காட்சிகள் இடம்பெற்றுள்ளதாக காரணம் கூறியது வாரியம். ஆயினும், வாரிய உறுப்பினர்கள் கலந்தாலோசித்து படத்தில் இடம்பெறும் சம்பந்தப்பட்ட சர்ச்சைகுரிய காட்சியினை நீக்கி விட்டு படத்தை திரையிடலாம் என நேற்று கூறியது. 

இந்நிலையில், வாரியம் பச்சை கொடி காட்டிவிட்டாலும் மலேசியாவில் படம் எப்போது வெளிவரும் என்ற கேள்வி குறி எழுந்துள்ளது. இது தொடர்பாக கருத்துரைத்த தணிக்கை வாரியத்தின் தலைவர் டத்தோ அப்துல் ஹலிம், "தணிக்கை செய்வது மட்டுமே எங்களின் பணி. படத்தின் கதையையும் அதன் காட்சிகளையும் கண்டு அந்த படம் மலேசியாவில் வெளியிடலாமா என்று முடிவு செய்வது மட்டுமே எங்களின் வேலை. வெளியீட்டு தேதியை நிர்ணயிப்பது நாங்கள் அல்ல" என்று கூறினார். 

மலேசியாவில் மட்டுமின்றி, சிங்கப்பூர், ரஷ்யா மற்றும் அமெரிக்காவில் உள்ள அலபாமாவிலும் ஓரினக் காட்சியினால் படத்திற்கு தடை விதிக்கப்பட்டுள்ளது.

Advertisement