Top Stories

Grid List

கோலாலம்பூர், ஜூன் 5- கடந்த சனிக்கிழமை நீச்சல் குளத்தில் மூழ்கி மரணமடைந்த மலேசிய நடிகர் சதிஸ் ராவ்க்கு இன்று ஷா ஆலமில் உள்ள அவரின் தாயார் வீட்டில் இறுதிச் சடங்கு நடைபெறுகிறது.

கடந்த சனிக்கிழமை தன் குடும்பத்தாருடன் குவாங்கில் உள்ள வில்லா ஒன்றுக்கு சென்ற நடிகர் சதிஸ் ராவ் (வயது 37), நீச்சல் குளத்தில் மூழ்கி மரணமடைந்தார். வில்லாவில் இருந்த 3.7 மீட்டர் ஆழம் கொண்ட நீச்சல் குளத்தில் பாய்ந்த சதிஷ், சில வினாடிகள் வரை மேலே வராததால் அங்கிருந்த அவரின் தம்பி கூச்சலிட்டு அம்மாவை அழைத்துள்ளார். 

சதிஸின் அம்மா உடனே குளத்தில் குதித்தபோது சதிஸ் குளத்தில் அசைவற்று கிடந்ததைக் கண்டு அவரை மேலே இழுக்க முயன்றுள்ளார். பெரிய குளம் என்பதால் அவரை நீருக்கு வெளியே கொண்டு வர அவர்களுக்கு 10 நிமிடங்களுக்கு மேல் ஆனதாக கூறப்படுகிறது. பின்னர் அவரை சுங்கை பூலோ மருத்துவமனைக்கு கொண்டு சென்றபோது அவரைப் பரிசோதித்த மருத்துவர்கள் அவர் இறந்து விட்டதாக கூறியுள்ளனர்.

சம்பவம் நடப்பதற்கு முன்னதாக நடிகர் சதிஸ் ராவ் தனது முகநூலில் நேரலை செய்தது குறிப்பிடத்தக்கது. அதில், அவ்விடம் அழகாக இருப்பதாகவும் மற்றவர்களும் அங்கு வரவேண்டும் என்றும், வாய்ப்பு கிடைத்தால் அவ்விடத்தில் படப்பிடிப்பு நடத்தவேண்டும் என்றும் கூறினார்.

தமிழ், தெலுங்கு, மலாய், ஆங்கிலம், மாண்டரின் மற்றும் கந்தோனிஸ் என குறைந்தது ஆறு மொழிகளில் பேசக்கூடிய திறன் கொண்ட சதிஸ் ராவ், தமிழ் மட்டுமின்றி, மலாய், சீன, ஆங்கில படங்களிலும் நடித்துள்ளார். கெராக் ஹாஸ், தேவடத்தா, இரவன் ஆகிய படங்களிலும் அதிகமான தமிழ் தொலைக்காட்சி நாடக, படங்களிலும் மேடை நாடகத்திலும் சதிஸ் நடித்துள்ளார். பாலகணபதி வில்லியம் இயக்கத்தில் இவர் நடித்த நீயும் நானும் படம் இன்னும் வெளிவரவில்லை என்பது குறிப்பிடத்தக்கது.

இறுதி சடங்கு நடக்கும் இடம்: No.8, Jalan 25/32, Taman Sri Muda, Shah Alam.

கோலாலம்பூர், மே.27- நாட்டின் புகழ்பெற்ற மேடை நாடகம் மற்றும் திரைப்பட இயக்குனர் எஸ்.டி.பாலாவின் ‘ஆர்.ஐ.பி? (R.I.P?)’ திரைப்படத்தின் சிறப்புக் காட்சி தலைநகரில் உள்ள திரையரங்கத்தில் இன்று திரையிடப்பட்டது. இந்த சிறப்புக் காட்சியைக் காண பத்திரிக்கையாளர்களும் சிறப்பு பிரமுகர்களும் அழைக்கபட்டிருந்தனர்.

ஒன்றரை மணி நேரம் உள்ள இத்திரைப்படம் ஒரு மனிதனின் வாழ்க்கைப் பிண்ணனியை மையமாக கொண்டது. ஒருவர் உயிருடன் இருக்கும்போதும், இறந்த பின்னரும், குடும்ப உறுப்பினர்களும் நண்பர்களும் அவர் மீது வைத்திருக்கும் நம்பிக்கை மற்றும் அபிப்ராயம் எப்படி மாறுகிறது. அந்த மாற்றத்தை அவரின் ஆத்மா எப்படி எதிர்கொள்கிறது என்பதே இப்படத்தின் கதைக்களம்.

மனிதர்களின் வாழ்வியலை அழகாக சித்தரித்ததாக இயக்குனரை பாராட்டினர் இத்திரைப்பட சிறப்புக் காட்சியைக் கண்டு களித்த பிரமுகர்களும் பத்திரிக்கையாளர்களும்.

ஜூன் மாதம் 8ஆம் தேதி முதல் மலேசிய திரையரங்குகளில் திரையிடப்படும் இந்த ‘ஆர்.ஐ.பி? (R.I.P?)’ படத்தை அனைவரும் திரையரங்குகளில் சென்று கண்டு களித்து, அதில் உள்ள நல்ல கருத்துக்களை உள்வாங்கிக் கொள்ளும்படி இயக்குனர் எஸ்.டி.பாலா பொதுமக்களுக்கு அழைப்பு விடுத்தார்.

 

கோலாலம்பூர், மே 18- கலைஞர்களுடனான சந்திப்பின்போது பிரதமர் நஜிப் மேடையில் நின்று கொண்டிருந்த போது நடிகர் ஒருவர் தயாரிப்பாளரை திடீரென அறைந்த சம்பவம் பெரும் பரபரப்பை ஏற்படுத்தியுள்ளது.

நேற்று இரவு புத்ராஜெயாவில் நடந்த TN50 எனும் தேசிய உருமாற்ற திட்டத்தில் திரைப்படக் கலைஞர்களுடனான கலந்துரையாடலில் இச்சம்பவம் நிகழ்ந்தது. மலாய் படங்களைத் தயாரித்துள்ள டேவிட் தியோ மேடையில் பேசும்போது அரங்கத்தில் பின்பகுதியில் அமர்ந்திருக்கும் கலைஞர்களை நிகழ்ச்சியின் நெறியாளர் ரோஸ்யாம் நோர் கண்டுக்கொள்ளவில்லை என குற்றம் சாட்டினார்.

  ## காணொளி: நன்றி Amicom TV

பிரதமர் நஜிப் மேடையில் இருந்தபோது இந்த குறைக் கூறலை டேவிட் விடுத்தபோது கீழே அமர்ந்திருந்த மாட் ஓவர் என அழைக்கப்படும் நடிகர் சுலைமான் யாசின் சட்டென்று மேடை மீது ஏறி டேவிட்டை நோக்கி காரசாரமாக பேசினார். சில வினாடிகளில் யாரும் எதிர்பார்க்காத நிலையில் தயாரிப்பாளரை சுலைமான் அறைந்தார். அருகில் இருந்த பாதுகாவலர்கள் இருவரையும் தடுத்து மேடையிலிருந்து கீழே இறக்கினர்.

பிரதமர் முன்பு இச்சம்பவம் நிகழ்ந்ததால் அரங்கமே சிறிது நேரம் சலசலப்புக்கு ஆளானது. பின்னர் நிகழ்ச்சி நெறியாளர் ரோஸ்யாம் நோர் நடந்த சம்பவத்திற்காக நஜிப்பிடம் மன்னிப்பு கேட்டுக் கொண்டார். 

சென்னை, ஜூலை.20- "நம்ம ஓவியா புள்ள சினிமால நடிச்சப்ப கூட இவ்ளோ பிரபலம் ஆகல. ஆனா, பிக் பாஸ் கமல் கூட சேர்ந்து இப்போ அவங்க உலக பூரா பேமஸ்.." இது தான் ஓவியாவின் தற்போதைய புகழ். இவருக்கு திடீர் ரசிகர் மன்றங்களும் சமூக வலைத்தளங்களில் உருவாகி விட்டன என்பது ஹைலைட்.

பிக் பாஸ் நடிகர் நடிகைகளின் உண்மை முகத்தைக் காட்டி வருகிறது. தொடக்கத்தில் ஜூலிக்கும் ஆர்த்திக்கும் மக்கள் பெரும் ஆதரவு கொடுத்த நிலையில் ஓவியாவைப் பலர் திமிர் பிடித்தவர் என்று கூட திட்டி தீர்த்தனர். ஆனால் 15 நாட்களில் நிலைமை தலைக்கீழாக மாறிவிட்டது.

அன்று பாராட்டப்பட்ட ஜூலி இப்போது நெட்டிசன்களால் வறுத்தெடுக்கப்படும் நிலையில் ஓவியாவிற்கோ சமூக வலைத்தளங்களில் பல திடீர் ரசிகர் மன்றங்கள் உருவாகி விட்டன. அவற்றிற்கு 'ஓவியா ஆர்மி, ஓவியா புரட்சி படை, ஓவியா ஆதரவு படை' ஆகியவை தான் தற்போது பிரபலம்.

முன்பு யாரையாவது கலாய்க்கவே மீம்ஸ் போடப்பட்டது மாறி, தற்போது ஓவியாவை பெரிதும் பாராட்டியே மீம்ஸ்கள் வெளிவருகின்றன.

போகிற போக்கில் பிக் பாஸ் என்று கமலை கூப்பிடுவதை விடுத்து இனி ஓவியாவை தான் கூப்பிடுவார்கள் போல. 

மும்பை, ஜூலை.19- பிரபல நடிகை பிடிஷா பெஸ்புராக் தனது வீட்டில் தூக்கு போட்டு தற்கொலை செய்து கொண்டார். அஸ்ஸாம் மாநிலத்தை சேர்ந்தவர் பிதிஷா பெஸ்பருவா (வயது 30). 

இவர் டி.வி மற்றும் சினிமாவிலும் நடித்துள்ளார். மேலும் இவர் மேடை நிகழ்ச்சிகளிலும் கலந்து கொண்டு, பாடகியாகவும் வலம் வந்துள்ளார். ரன்பீர் கபூர், கத்ரீனா கைஃப் நடிப்பில் கடந்த வாரம் வெளியான ‘ஜக்கா ஜசூஸ்’ படத்திலும் நடித்திருந்தார். 

பிதிஷா, குஜராத்தை சேர்ந்த ஒருவரை காதலித்து கடந்த ஆண்டு திருமணம் செய்து கொண்டு, மும்பையில் கணவருடன் வசித்து வந்த பிதிஷா அண்மையில் தான் குருகிராமுக்கு மாறியுள்ளார்.

இந்நிலையில், பிதிஷாவின் தந்தை அவருக்கு போன் செய்தபோது அவர் எடுக்கவில்லை. பிதிஷா போனை எடுக்காததால் சந்தேகம் அடைந்த அவரின் தந்தை போலீசாருக்கு தகவல் கொடுத்தார். போலீசார் பிதிஷாவின் வீட்டிற்கு சென்றபோது கதவு உள்புறமாக பூட்டியிருந்தது.

போலீசார் கதவை உடைத்து உள்ளே சென்றபோது பிதிஷா மின்விசிறியில் தூக்கில் பிணமாகத் தொங்கியது கண்டுபிடிக்கப்பட்டது. அவர் தற்கொலை செய்யும் முன்பு கடிதம் எதுவும் எழுதி வைக்கவில்லை எனவும் தகவல் வந்துள்ளது. 

பிதிஷாவுக்கும் கணவருக்கும் இடையே அடிக்கடி சண்டை ஏற்பட்டுள்ளது. கணவரின் பெற்றோர் தன்னை கொடுமைப்படுத்துவதாக பிதிஷா கூறி வந்துள்ளார். கணவரை விவாகரத்து செய்ய விரும்பிய நிலையில் அவர் தற்கொலை செய்து கொண்டுள்ளார்.

இந்நிலையில், குடும்பத்தாரிடம் விசாரித்ததில், சில தினங்களாக அவர் நடவடிக்கை சரியில்லாமல் இருந்தது. உனக்கு எதாவது பிரச்சனையா என்று கேட்டோம், ஆனால் அவர் காரணம் எதுவும் சொல்லவில்லை என்றும் கூறினர்.

மேலும் நடிகை பிடிஷாவின் தற்கொலைக்கான காரணம் இன்னும் உறுதி செய்யப்படாத நிலையில், அவர் மன அழுத்தம் காரணமாக தற்கொலை செய்திருப்பார் எனவும் கூறப்படுகிறது.இருப்பினும் அவரின் இறப்பில் மார்மம் இருப்பதாக கூறிய குடும்பத்தார்  நீதி விசாரணை வேண்டும் என கேட்டுள்ளனர்.

சென்னை, ஜூலை.19 – இந்த உலகத்தில் ஒழிக்க முடியாதது லஞ்சம்தான் என்று சொல்லுவார்கள். லஞ்ச ஊழலை ஒழிக்கவே முடியாது என்று பலர் கூறினாலும் லஞ்சம் பற்றிய ஐந்து நிமிடப் படம் ஒன்று உலக மக்களை பெரிதும் ஈர்த்திருக்கிறது.

இந்தியாவைச் சேர்ந்த ஒருவரின் லஞ்சப் பின்னணியை வைத்து உருவாக்கப்பட்டிருக்கும் இந்த ‘மகா குட்டி’ படத்தை இயகியவர் 30 நிமிடத்தில் எடுத்து முடித்தார். லஞ்சம் என்பது வீட்டிலிருந்து தான் கற்றுக் கொடுக்கப்படுகிறது என்ற கருத்தை மையமிட்டு இந்த படம் தயாரிக்கப்பட்டுள்ளது.

    ### காணொளி: நன்றி Mango News

இந்தப் படம் பார்த்தோர் மனதில் பசுமையாக படிகின்ற வகையில் அமைந்து விட்டதுதான், உலக அளவில் ஈர்ப்பை ஏற்படுத்தியதற்குக் காரணம் எனலாம். 

கோலாலம்பூர், ஜூலை.12- கடந்த 2012ஆம் ஆண்டு ஒரு பாடல் உலகையே கலக்கியது என்றால் அது ஓப்பா கங்காம் ஸ்டைல் பாடல் தான். யூடிப்பில் அதிகம் பேர் பார்த்த பாடல் என்ற பெருமையை ஐந்து ஆண்டுகளாக தக்க வைத்துக் கொண்டிருந்த இப்பாடலை முந்தி புதிய சாதனை படைத்துள்ளது 'சீ யூ அகெய்ன்' எனும் கார் பந்தய படத்தின் பாடல்.

2012ஆம் ஆண்டு பட்டி தொட்டி தொடங்கி ஏன் இந்தியர்களின் திருமண நிகழ்ச்சிகளிலும் கூட தவறாமல் ஒலித்த பாடல் கங்காம் ஸ்டைல். பாட்டின் இசைக்கும் அதன் காட்சியமைப்பிற்கும் கிரங்கி போன ரசிகர்கள் யூடியூப்பில் மட்டும் ஏறக்குறைய 289 கோடி மக்கள் பார்த்துள்ளனர். யூடிப்பில் அதிகம் பார்க்கப்பட்ட காணொளி என்ற அந்தஸ்த்தையும் இந்த பாடல் பெற்றது. 

ஆனால், இந்த பாடலை முந்தி அதிகம் பேர் பார்த்த பாடலாக தனி முத்திரை பதித்துள்ளது 2015ம் ஆண்டில் வெளியான பார்ஸ்ட் அண்ட் ஃப்யூரியஸ் 7 எனும் படத்தின் சீ யூ அகெய்ன் பாடல். இந்த பாடலை மறைந்த நடிகர் பால் வாக்கருக்கு இசை அஞ்சலியாக வழங்கப்பட்டது என்பது குறிப்பிடத்தக்கது. இதுவரை இப்பாடலை 290 கோடி பேர் யூடியூப்பில் பார்த்துள்ளனர்.

குளுவாங், மார்ச் 18:- ஓரின சேர்க்கைக் காட்சியை நீக்கி விட்டு பியூட்டி அன் பீஸ்ட் படத்தைத் திரையிடலாம் என்று உள்துறை துணை அமைச்சர் வால்ட் டிஸ்னி நிறுவனத்திடம்அறிவுறுத்தியிள்ளார்.

டிஸ்னி, மலேசிய திரைப்பட தணிக்கை வாரியத்திற்கு ஏற்ப ஓரின சேர்க்கைக் காட்சியைநீக்கிவிட்டால் மட்டுமே இந்த படத்தைத் திரையிட டிஸ்னிக்கு அனுமதி வழங்கப்படும் என உள்துறை துணை அமைச்சர் டத்தோ நூர் ஜஸ்லான் முகமது கூறினார்.

டிஸ்னி படத்தில் ஒரு காட்சியை நீக்க வேண்டும் என உள்துறை அமைச்சு ஒரு முறையீட்டு தாக்கலை வியாழக்கிழமை அறிவித்தது. இந்தப் படத்தில் உள்ள ஓரின சேர்க்கைக் காட்சியைநீக்கினால் மட்டுமே மலேசியாவில் திரையிட முடியும் எனப் படத் தணிக்கை வாரிய தலைவர் டத்தோ அப்துல் ஹலிம் அப்துல் ஹமீத் மற்றும் அமைச்சரவையும் முடிவெடுத்துள்ளனர்

கோலாலம்பூர், மார்ச் 14- ஆங்கில பட விரும்பிகள் இவ்வாண்டு அதிகம் எதிர்ப்பார்த்த படம் பியூட்டி அண்ட் தே பீஸ்ட். இப்படத்தை மலேசியாவில் திரையிட தணிக்கை வாரியம் அனுமதி அளித்து விட்டாலும் படம் எப்போது திரைக்கு வரும் என்பது கேள்விக்குறியாகவே இருக்கிறது.

நடிகை எம்மா வாட்சன் நடிப்பில் வெளிவரவிருக்கும் இப்படம் முன்னதாக இம்மாதம் 16ம் தேதி திரைக் காணும் என அறிவிக்கப்பட்டிருந்தது. ஆனால், தணிக்கை வாரியத்திடம் சென்ற இப்படத்தை வாரியக் குழு மலேசியாவில் திரையிடுவதற்கு தடை விதித்தது. 

இதற்கு படத்தில் ஓரினக்காட்சிகள் இடம்பெற்றுள்ளதாக காரணம் கூறியது வாரியம். ஆயினும், வாரிய உறுப்பினர்கள் கலந்தாலோசித்து படத்தில் இடம்பெறும் சம்பந்தப்பட்ட சர்ச்சைகுரிய காட்சியினை நீக்கி விட்டு படத்தை திரையிடலாம் என நேற்று கூறியது. 

இந்நிலையில், வாரியம் பச்சை கொடி காட்டிவிட்டாலும் மலேசியாவில் படம் எப்போது வெளிவரும் என்ற கேள்வி குறி எழுந்துள்ளது. இது தொடர்பாக கருத்துரைத்த தணிக்கை வாரியத்தின் தலைவர் டத்தோ அப்துல் ஹலிம், "தணிக்கை செய்வது மட்டுமே எங்களின் பணி. படத்தின் கதையையும் அதன் காட்சிகளையும் கண்டு அந்த படம் மலேசியாவில் வெளியிடலாமா என்று முடிவு செய்வது மட்டுமே எங்களின் வேலை. வெளியீட்டு தேதியை நிர்ணயிப்பது நாங்கள் அல்ல" என்று கூறினார். 

மலேசியாவில் மட்டுமின்றி, சிங்கப்பூர், ரஷ்யா மற்றும் அமெரிக்காவில் உள்ள அலபாமாவிலும் ஓரினக் காட்சியினால் படத்திற்கு தடை விதிக்கப்பட்டுள்ளது.

Advertisement