கோலாலம்பூர், ஜூலை.27- 'மலேசியாவின் சீர்காழி' என்று போற்றப்பட்ட, பாடகர் ராஜராஜ சோழனுக்கு இன்று இறுதிச் சடங்கு நடந்தேறியது. இத்தனைக் காலம் தனது கானக் குரலால் தங்களைச் சந்தோசப்படுத்திய பாடகனுக்கு கலைஞர்களும் பொதுமக்களும் இறுதி அஞ்சலி நடத்தினர். 

நேற்று முன்தினம் மாலை, மாரடைப்பால் மரணமடைந்த அன்னாருக்கு இன்று ஷா ஆலாமில் உள்ள அவரது இல்லத்தில் இறுதிச் சடங்கு நடந்தது. காலை 10 மணிக்கு நடந்த இறுதிச் சடங்கில் உறவினர்கள், பொதுமக்கள் உட்பட நம் நாட்டு கலைஞர்களும் கலந்து கொண்டு தங்களின் மூத்த கலைஞருக்கு இறுதி மரியாதைச் செலுத்தினர். 

தனது பெயருக்கு ஏற்பவே கம்பீரமான தோற்றம் கொண்ட இவர், பிரபல தமிழகப் பாடகர் இறவா புகழ்மிக்க சீர்காழி கோவிந்தராஜனின் குரலில் அச்சு அசலாக கடந்த 30 ஆண்டுகளுக்கு மேலாக மேடைகள்தோறும் பாடி வந்தார்.

கேட்போர் கண்களில் கண்ணீர் ததும்ப செய்யும்,  இவரின் குரலில் நாடெங்கும் ஒலித்த, "நல்லத்தில் நல்ல உள்ளம் உறங்காது என்பது" எனும் பாடல் அன்னாருக்கே சமர்ப்பணமாகும். 

 

கோலாலம்பூர், ஜூலை.27- விஐபி 2 திரைப்படத்தினை விளம்பரப்படுத்துவதற்காக அதில் நடித்த முன்னணி நடிகர்களாகிய தனுஷ், கஜோல் ஆகியோர் மலேசியாவிற்கு வருகைப் புரிந்துள்ளனர். அவர்கள் இருவரும் இன்று மாலை மஸ்ஜிட் இந்தியாவில் ரசிகர்களைச் சந்திக்கவிருக்கின்றனர்.

இன்று மாலை 6 மணிக்குக் கோலாலம்பூர், ஜாலான் மஸ்ஜிட் இந்தியாவில் உள்ள ஜேக்கல் பேரங்காடிக்கு முன் ரசிகர்கள் மத்தியில் தனுசும் கஜோலும் தோன்றுவர் என மாலிக் ஸ்ட்ரீம்ஸ் நிறுவனம் தெரிவித்துள்ளது.

இந்நிகழ்ச்சியில் மலேசிய ரசிகர்கள் கலந்து கொண்டு VIP 2- இன் நட்சத்திரங்களுடன் நேரடியாக பேசலாம் என மாலிக் ஸ்ட்ரீம்ஸ் புரோடக்‌ஷன்ஸ் தனது முகநூலில் குறிப்பிட்டுள்ளது.

 

கோலாலம்பூர், ஜூன் 5- கடந்த சனிக்கிழமை நீச்சல் குளத்தில் மூழ்கி மரணமடைந்த மலேசிய நடிகர் சதிஸ் ராவ்க்கு இன்று ஷா ஆலமில் உள்ள அவரின் தாயார் வீட்டில் இறுதிச் சடங்கு நடைபெறுகிறது.

கடந்த சனிக்கிழமை தன் குடும்பத்தாருடன் குவாங்கில் உள்ள வில்லா ஒன்றுக்கு சென்ற நடிகர் சதிஸ் ராவ் (வயது 37), நீச்சல் குளத்தில் மூழ்கி மரணமடைந்தார். வில்லாவில் இருந்த 3.7 மீட்டர் ஆழம் கொண்ட நீச்சல் குளத்தில் பாய்ந்த சதிஷ், சில வினாடிகள் வரை மேலே வராததால் அங்கிருந்த அவரின் தம்பி கூச்சலிட்டு அம்மாவை அழைத்துள்ளார். 

சதிஸின் அம்மா உடனே குளத்தில் குதித்தபோது சதிஸ் குளத்தில் அசைவற்று கிடந்ததைக் கண்டு அவரை மேலே இழுக்க முயன்றுள்ளார். பெரிய குளம் என்பதால் அவரை நீருக்கு வெளியே கொண்டு வர அவர்களுக்கு 10 நிமிடங்களுக்கு மேல் ஆனதாக கூறப்படுகிறது. பின்னர் அவரை சுங்கை பூலோ மருத்துவமனைக்கு கொண்டு சென்றபோது அவரைப் பரிசோதித்த மருத்துவர்கள் அவர் இறந்து விட்டதாக கூறியுள்ளனர்.

சம்பவம் நடப்பதற்கு முன்னதாக நடிகர் சதிஸ் ராவ் தனது முகநூலில் நேரலை செய்தது குறிப்பிடத்தக்கது. அதில், அவ்விடம் அழகாக இருப்பதாகவும் மற்றவர்களும் அங்கு வரவேண்டும் என்றும், வாய்ப்பு கிடைத்தால் அவ்விடத்தில் படப்பிடிப்பு நடத்தவேண்டும் என்றும் கூறினார்.

தமிழ், தெலுங்கு, மலாய், ஆங்கிலம், மாண்டரின் மற்றும் கந்தோனிஸ் என குறைந்தது ஆறு மொழிகளில் பேசக்கூடிய திறன் கொண்ட சதிஸ் ராவ், தமிழ் மட்டுமின்றி, மலாய், சீன, ஆங்கில படங்களிலும் நடித்துள்ளார். கெராக் ஹாஸ், தேவடத்தா, இரவன் ஆகிய படங்களிலும் அதிகமான தமிழ் தொலைக்காட்சி நாடக, படங்களிலும் மேடை நாடகத்திலும் சதிஸ் நடித்துள்ளார். பாலகணபதி வில்லியம் இயக்கத்தில் இவர் நடித்த நீயும் நானும் படம் இன்னும் வெளிவரவில்லை என்பது குறிப்பிடத்தக்கது.

இறுதி சடங்கு நடக்கும் இடம்: No.8, Jalan 25/32, Taman Sri Muda, Shah Alam.

கோலாலம்பூர், மே.27- நாட்டின் புகழ்பெற்ற மேடை நாடகம் மற்றும் திரைப்பட இயக்குனர் எஸ்.டி.பாலாவின் ‘ஆர்.ஐ.பி? (R.I.P?)’ திரைப்படத்தின் சிறப்புக் காட்சி தலைநகரில் உள்ள திரையரங்கத்தில் இன்று திரையிடப்பட்டது. இந்த சிறப்புக் காட்சியைக் காண பத்திரிக்கையாளர்களும் சிறப்பு பிரமுகர்களும் அழைக்கபட்டிருந்தனர்.

ஒன்றரை மணி நேரம் உள்ள இத்திரைப்படம் ஒரு மனிதனின் வாழ்க்கைப் பிண்ணனியை மையமாக கொண்டது. ஒருவர் உயிருடன் இருக்கும்போதும், இறந்த பின்னரும், குடும்ப உறுப்பினர்களும் நண்பர்களும் அவர் மீது வைத்திருக்கும் நம்பிக்கை மற்றும் அபிப்ராயம் எப்படி மாறுகிறது. அந்த மாற்றத்தை அவரின் ஆத்மா எப்படி எதிர்கொள்கிறது என்பதே இப்படத்தின் கதைக்களம்.

மனிதர்களின் வாழ்வியலை அழகாக சித்தரித்ததாக இயக்குனரை பாராட்டினர் இத்திரைப்பட சிறப்புக் காட்சியைக் கண்டு களித்த பிரமுகர்களும் பத்திரிக்கையாளர்களும்.

ஜூன் மாதம் 8ஆம் தேதி முதல் மலேசிய திரையரங்குகளில் திரையிடப்படும் இந்த ‘ஆர்.ஐ.பி? (R.I.P?)’ படத்தை அனைவரும் திரையரங்குகளில் சென்று கண்டு களித்து, அதில் உள்ள நல்ல கருத்துக்களை உள்வாங்கிக் கொள்ளும்படி இயக்குனர் எஸ்.டி.பாலா பொதுமக்களுக்கு அழைப்பு விடுத்தார்.

 

More Articles ...