சென்னை, ஏப்ரல் 25- இந்தியாவின் முதல் விண்வெளி வீராங்கனை கல்பனா சாவ்லா வாழ்க்கை வரலாறு படமாக்கப்படுகிறது. இப்படத்தில் பிரியங்கா சோப்ரா நடிக்கவிருக்கிறார்.

இந்தியாவின் முதல் விண்வெளி வீராங்கனை கல்பனா சாவ்லா. கொலம்பியா விண்கலத்தில் 7 பேர் கொண்ட குழுவுடன் விண்வெளிக்கு பயணம் செய்த கல்பனா சாவ்லா அங்கு 31 நாட்கள், 14 மணிநேரம், 54 நிமிடங்கள் விண்வெளியில் தங்கியிருந்து ஆய்வுகளை மேற்கொண்டிருந்தார். பின்னர் தனது ஆராய்ச்சிகளை முடித்த பின்னர் விண்வெளியில் இருந்து பூமிக்குத் திரும்பிக்கொண்டிருந்த போது, விண்கலம் வெடித்துச் சிதறியதில் கடந்த 2003ம் ஆண்டு உயிரிழந்தார்.

அவரது வாழ்க்கை வரலாற்றை படமாக்க உள்ளார் பாலிவுட் இயக்குநர் பிரியா மிஷ்ரா. அதற்கான கதையையும் தயார் நிலையில் உள்ளது. கடந்த 7 வருடங்களாக முயற்சி செய்து இப்போது தான் அதற்கான நேரம் வந்துள்ளது எனவும் இப்படம் உலக தரத்தில் பிரம்மாண்டமானதாக இருக்கும் எனவும் பிரியா கூறினார். 

மேலும் கல்பனா சாவ்லா கதாபாத்திரத்தில் பாலிவுட்டின் முன்னணி நடிகையாக வலம் வரும் பிரியங்கா சோப்ரா நடிக்க உள்ளதாகவும் கூறினார். இதற்கு முன் பிரியங்கா, பிரபல குத்துச்சண்டை வீராங்கனையான `மேரி கோம்' வாழ்க்கை வரலாற்றுப் படத்தில் மேரி கோமாக நடித்திருந்தது குறிப்பிடத்தக்கது.

சென்னை, ஏப்ரல் 25- சலங்கை ஒலி, சங்கராபரணம் ஆகிய படங்களை இயக்கிய இயக்குனரும் நடிகருமான கே.விஸ்வநாத்திற்கு திரையுலகின் உயரிய விருந்தான தாதா சாகேப் பால்கே விருது அறிவிக்கப்பட்டுள்ளது. தனுசின் 'யாரடி நீ மோகினி' படத்திலும் ரஜினியின் 'லிங்கா' படத்திலும் இவர் தாத்தா கதாபாத்திரத்தில் நடித்தவர் என்பது குறிப்பிடத்தக்கது.

சினிமாவில் 'சவுண்டு டிசைனராக' அறிமுகமான கே.விஸ்வநாத் பின்னர் இயக்குனராக அறிமுகமானார். இவர் இயக்கிய சலங்கை ஒலி, சிப்பிக்குள் முத்து, சங்கராபரணம் ஆகிய படங்கள் மிக பெரிய வெற்றி பெற்ற படங்களாகும். தெலுங்கு மட்டுமின்றி ஹிந்தி, தமிழ் ஆகிய மொழிகளிலும் இவர் பிரபலம் தான். 

கமலஹாசனின் குருதிபுனல், உத்தம வில்லன் மற்றும் யாரடி நீ மோகனி, லிங்கா, ராஜ்பாட்டை ஆகிய படங்களில் கூட அவர் நடிந்திருந்தார். 

5 முறை தேசிய விருது பெற்ற இவருக்கு ஏற்கனவே பத்மஶ்ரீ விருது வழங்கப்பட்டுள்ளது. இந்நிலையில், இப்போது விஸ்வநாத்திற்கு சினிமா துறையின் மிக உயரிய விருதாக கருதப்படும் தாதா சாகேப் பால்கே விருது அறிவிக்கப்பட்டுள்ளது.

சென்னை, ஏப்ரல் 24- பெயரிடப்படாத விஜய்யின் அடுத்த படமான 'விஜய் 61'-இன் முதல் பார்வை போஸ்டர் விஜய்யின் பிறந்தநாளில் வெளியிடப்படும் என அறிவிக்கப்பட்டுள்ளது. ஆகஸ்டில் படத்தின் பாடல்கள் வெளியிடப்படுகிறது.

இயக்குனர் அட்லி இயக்கத்தில் இளைய தளபதி விஜய் நடித்துள்ள அடுத்த படத்திற்கு இன்னும் பெயரிடவில்லை. படத்தின் பெயரினை முதல் பார்வை போஸ்டரை வெளியிடும்போது படத்தின் பெயரும் அறிவிக்கப்படும் என தெரிவிக்கப்பட்டது. 

எப்போது அறிவிக்கப்படும் என ரசிகர்கள் காத்துக் கொண்டிருக்க, விஜய்யின் பிறந்தநாளான ஜூன் 22ம் தேதி வெளியிடப்படும் என நேற்று அறிவிக்கப்பட்டது.மேலும், தேனாண்டாள் ஸ்டுடியோஸ் நிறுவனத்தின் 100வது படமான இதற்கு இசைப்புயல் ஏ.ஆர்.ரஹ்மான் இசையமைப்பது குறிப்பிடத்தக்கது.

விஜய்யுடன் ஏ.ஆர்.ரஹ்மான் மீண்டும் இணைவதால் படத்தின் பாடலுக்கும் அதிக எதிர்பார்ப்பு உருவாகியுள்ளது. எனவே வரும் ஆகஸ்டு மாதம் இப்படத்தின் இசை வெளியீட்டு விழாவை மிக பிரமாண்டமாக வழிநடத்த ஆயத்த வேலைகள் நடந்து வருகின்றன.

சென்னை, ஏப்ரல் 19- வித்தியாசம் வேண்டும் என கூறி கூறியே எது வித்தியாசம் என்பதே தெரியாமல் போய்விட்டது தமிழ்ப்பட தலைப்புகளில். விஜய் நடித்த புதிய கீதை படத்தின் இயக்குனரின் புதிய படத்தின் தலைப்பு என்ன தெரியுமா? என் ஆளோட செருப்பக் காணோம்..!

அண்மைய காலமாக தமிழ்ப்படங்களின் தலைப்புகளுக்கு பஞ்சம் ஏற்பட்டு விட்டதோ என தோன்றுகிறது. அல்லது வித்தியாசம் என்ற பெயரில் எதையாவது வைத்தால் அதை ரசிகர்கள் ரசிப்பார்கள் என்று நினைத்தார்களோ என்னவோ.

கயல் படத்தில் நடித்த ஆனந்தி புதுமுக நடிகருடன் நடிக்கும் புதுப்படத்திற்கு தான் இந்த தலைப்பு வைக்கப்பட்டுள்ளது. 

ரசிகர்களைக் கவர வேண்டும் என்ற எண்ணத்தில் பெயர் வைத்தாலும், ரசிகர்கள் என்னவோ படத்தின் தலைப்பினை வஞ்சகமே இல்லாமல் திட்டி தீர்த்துள்ளனர் தனது சமூக வலைத்தளங்களில். படத்தின் போஸ்டரை சமூக வலைத்தளங்களில் பகிர்ந்துள்ள ரசிகர்கள் அதில், 'நல்லா வைக்கிறாய்ங்கய்யா டைட்டிலை' எனவும் 'தமிழ் சினிமாவுக்கு வந்த சோதனை' எனவும் குறிப்பிட்டுள்ளனர்.

இன்னும் என்ன என்ன தலைப்புகள் வைக்கப்படுமோ..! அந்த ஆண்டவனுக்கே வெளிச்சம்!

More Articles ...