சென்னை, ஜன.10- சமீபத்தில் மலேசியாவில் நடந்த நட்சத்திர கலை விழாவில் நடிகர் அஜீத்குமார் பங்கேற்கவில்லை. நடிகர் சங்கத்திற்கு கட்டிடம் கட்ட நடிகர்கள் தான் பணம் போட வேண்டும். நாம் தான் நிறைய சம்பாதிக்கிறோமே நாமே செலவு செய்து கட்டிடம் கட்டலாமே என்று அஜீத்குமார் கூறியதாகவும், அதனை நடிகர் சங்கப் பொறுப்புகளில் உள்ளவர்கள் சட்டை செய்யாததால், அஜீத் அவ்விழாவை புறக்கணித்த்தாக தகவல் வெளியாகியுள்ளது. 

தென்னிந்திய நடிகர் சங்கத்திற்கு கட்டிடம் கட்டுவதற்காக நிதி திரட்டும் நோக்கில் இந்த நட்சத்திர விழா, மலேசியாவில் நடத்தப்பட்டது.  நடிகர்கள் பெருமளவில் சம்பாதிக்கிறார்கள். அவர்களிடம் இல்லாத பணமா நம்மிடத்தில் இருக்கிறது? அவர்கள் கட்டிடம் கட்ட நாம் பணம் தர வேண்டுமா என்று மலேசிய மக்கள் கேள்வி எழுப்பியதாகவும் தெரிவிக்கப்பட்டுள்ளது. 

பல காலமாக நடிகர் சங்கத்திற்கு கட்டிடம் கட்டுகிறேன் என்று கூறி பல நிகழ்ச்சிகள் நடத்தப்பட்டு வருகின்றன. அந்தக் கட்டிடம் இன்னும் கட்டப்படாமல் இழுவையில் இருக்கிறது.  அந்தக் கட்டிடத்தை உருவாக்குவதற்கு ஏன் அவ்வளவு பணம் தேவைப்படுகிறது என்று இந்திய மக்களும் கேள்வி எழுப்பியுள்ளனர்.  

நட்சத்திர கலைவிழாவில் சூப்பர் ஸ்டார் ரஜினிகாந்த், உலக நாயகன் கமல்ஹாசன் மற்றும் இதர பிரபலங்கள் கலந்து கொண்டனர். ரஜினியின் மருமகன் தனுஷ் இவ்விழாவில் பங்கேற்கவில்லை. நடிகர்கள் விஜய், சிம்பு, அரவிந்த்சாமி, சந்தானம், சிபிராஜ் உள்ளிட்டோரும் அவ்விழாவில் கலந்து கொள்ளவில்லை என்பது குறிப்பிட்த்தக்கது.

மும்பை, ஜன.10: பாலிவுட் நடிகை ஐஸ்வர்யா ராய் பச்சன் தனது மாமியார் வீட்டில் இருந்து வெளியேறப் போவதாக பல தகவல்கள் கசிந்து வருகின்றன.  

உலக அழகியும், பாலிவுட்டின் பிரபல நடிகையுமான ஐஸ்வர்யா ராய், அமிதாப் பச்சன் மற்றும் ஜெயாவின் மகனான நடிகர் அபிஷேக் பச்சனை திருமணம் செய்ததில் இருந்து தனது மாமனார் மாமியாருடன் கூட்டுக் குடும்பமாக வசித்து வருகிறார். அமிதாப்பிற்கு சொந்தமான 'ஜல்சா' என்றழைக்கப்படும் பங்களாவில்தான் அவர்கள் வசித்து வருகிறார்கள். 

இதனிடையில், ஐஸ்வர்யா ராய் மற்றும் அவரின் மாமியார் ஜெயா பச்சனுக்கும் இடையில் சுமூகமான உறவு இல்லை என்று சில காலமாக செய்திகள் வெளியாகி வருகின்றன. அதே வேளையில், ஐஸ்வர்யாவுக்கும் அபிஷேக்கின் சகோதரியான ஸ்வேதாவுக்கும் பிரச்சனை எழும்பி உள்ளதாக சில ஊடகங்கள் தகவல் தெரிவித்துள்ளன. 

இவ்வாறான தகவல்கள் வெளியாகியுள்ள வேளையில், ஐஸ்வர்யாவும், அபிஷேக்கும் சேர்ந்து மும்பையில் ரூ. 21 கோடிக்கு அபார்ட்மென்ட் ஒன்றை வாங்கியுள்ளனர். ஐஸ் தனது கணவர் மற்றும் மகள் ஆராத்யாவுடன் அந்த வீட்டில் தனிக்குடித்தனம் போகப் போவதாக செய்திகள் பரவலாகி வருகின்றன. 

அபிஷேக் பச்சனுக்கு தனது பெற்றோர் மீது அதிகப் பாசம் இருக்கின்றது என்பது அனைவரும் அறிந்ததே. அவர்களை விட்டு அவர் கண்டிப்பாக தன் மனைவியுடன் தனிக்குடித்தனம் போக மாட்டார் என்று அவரின் நண்பர்கள் வட்டாரம் கருத்து தெரிவித்துள்ளனர். 

அபிஷேக் தனது பெற்றோரை விட்டு தனிக்குடித்தனம் செல்ல மாட்டார் என்பதை ஐஸ்வர்யாவும் நன்கு அறிந்துள்ளார். அந்த வீடு, ஒரு முதலீட்டுக்காகவே வாங்கப்பட்டிருக்கும். சிறு பிரச்சனையை ஊடகங்கள் பெரிதாக்குகின்றன என்று அந்த வட்டாரம் கூறியுள்ளது. 

ஐஸ்வர்யாவை திருமணம் செய்வதற்கு முன்னர், அபிஷேக் பச்சனுக்கும், பாலிவுட் நடிகை கரிஷ்மா கபூருக்கும் திருமணம் நிச்சயிக்கப்பட்டது. ஆனால் கரிஷ்மா திருமணத்திற்கு பிறகு தனிக்குடித்தனம் போக விரும்பியதால் அபிஷேக், நடக்கவிருந்த தங்களின் திருமணத்தை நிறுத்தி, அவர்களின் உறவையும் முறித்துக் கொண்டார் என்பது குறிப்பிடத்தக்கது.

 

 

சென்னை, ஜன.9- தென்னிந்திய நடிகர் சங்க டிரஸ்ட்டி பதவியில் இருந்து நடிகர் எஸ்வி சேகர் விலகுவதாக அறிவித்துள்ளார். மலேசியர்களிடம் சம்பாதித்த பணத்தில் ரூ.1 கோடியாவது நலிந்த மலேசிய குழந்தைகளிடம் கொடுத்தால் நடிகர்கள் என்ன குறைந்தா போய்விடுவார்கள் என்று கேள்வி எழுப்பியுள்ளார்.

தென்னிந்திய நடிகர் சங்க தேர்தலில் விஷால் அணி வெற்றி பெற்ற பிறகு சங்கத்தின் அறங்காவலராக நியமிக்கப்பட்டவர் நடிகர் எஸ்.வி.சேகர். அவர் தனது பதவியிலிருந்து விலகுவதாக கடிதம் ஒன்றின் வழி அறிவித்தார். அதில் நடிகர் சங்கத்திலும் மலேசியாவில் நடந்த கலை நிகழ்ச்சியிலும் நிறைய குளறுபடிகள் இருந்ததாக இவர் காரணம் தெரிவித்துள்ளார். 

கடிதத்ததில், "நம் சங்க தேர்தல் முடிந்தபின் என்னை நடிகர் சங்க டிரஸ்டிக்களில் ஒருவனாக நியமித்து என்னுடைய அறிவுரை,ஆலோசனைகள்,வழி நடத்துதல் தேவை என கேட்டுக்கொண்டீர்கள். ஆனால் ஒரு வருடத்தில் பல மாற்றங்கள். கையெழுத்திடுவதற்கு மட்டும் டிரஸ்டி என்ற நிலை வந்த போது நான் பல மெயில்கள் அனுப்பியதற்கு எந்த பதிலும் அளிக்காமல் எனக்கு விளக்கம் கேட்டு கடிதம் அனுப்பினீர்கள். என் பதில் கடிதத்தில் கேட்ட எந்த கேள்விகளுக்கும் பதில் அளிக்கவில்லை.

அதே போல் சமீபத்தில் மலேசியாவில் நடந்த நட்சத்திர கலை விழாவிலும் பல குளறுபடிகள்.பல கலைஞர்கள் மரியாதைக்குறைவாக நடத்தப்பட்டு அவமானப்படுத்தப்பட்டார்கள் என தெரிந்து கொண்டேன் . குறிப்பாக இயக்குனர் சங்கதலைவர் விக்ரமன்,R சுந்தரர்ராஜன், பார்த்திபன் ,இயக்குனர் இமயம் பாரதிராஜாவின் மகன் நடிகர் மனோஜ் போன்ற பலர். இதன் பெயர்தான் நிர்வாக கோளாறு" என்று கூறியுள்ளார்.

மேலும், "ரஜினி கமலுக்கு மரியாதை கொடுப்பதில் தவறில்லை ஆனால் அதே மரியாதையை அனைத்து மூத்த கலைஞனர்களுக்கும் கொடுக்கத் தெரிய வேண்டும். அதை  எப்படி என்று நம் முன்னாள் தலைவர் திரு.விஜயகாந்த் அவர்களிடம் பாடம் கற்றுக்கொள்ளுங்கள். ஆனால் நீங்கள் திருந்த வாய்ப்பில்லை.மலேசியாவில் பிச்சை எடுக்க வந்த தமிழ் நடிகர்கள் தலைப்பிட்டு வந்த பத்திரிகை பார்க்கவில்லையா? இத்தனை பணம் மலேசிய தமிழர்கள் மூலம் சம்பாதிக்கும் நாம் நலிந்த மலேசிய தமிழ்  குழந்தைகள் கல்விக்கு ஒரு கோடி ரூபாய் கொடுத்தால் குறைந்து போய் விடுவோமா?பணம் தேவைதான் ,அது சுய மரியாதையை விற்று சம்​பாதிப்பதை  என்னால் ஏற்றுக்கொள்ள முடியாது" என்றும் அவர் தெரிவித்துள்ளார். 

"என் மனசாட்சிக்கு எதிராக நம் சங்கத்தின் பக்கம் ஏற்படும் தவறுகளுக்கு  நான் உடன்பட முடியாது என்பதாலும் டிரஸ்டி என்ற பதவி நடிகர் சங்கத்தை பொருத்த வரையில் ஒரு அலங்காரப்பதவியாக கருதப்படுவதாலும்,மற்ற சகா கலைஞர்களுக்கு உங்களால் ஏற்பட்ட அவமரியாதைக்காகவும் ​ எனக்களிக்கப்பட்ட டிரஸ்டி பதவியை ராஜினாமா செய்கிறேன்" என்று எஸ்.வி.சேகர் கடிதத்தில் தெரிவித்தார். 

சென்னை, டிசம். 30- அதிகப் பொருள் செலவில் உருவாக்கப்பட்டுள்ள சூப்பர் ஸ்டார் ரஜினிகாந்த்தின் 2.0 திரைப்படம் ஏப்ரல் 14ஆம் தேதி வெளிவரும் என்று அறிவிக்கப்பட்டுள்ளது.  வசூல் சாதனை நடத்திய 'எந்திரன்' திரைப்படத்தின் இரண்டாம் பாகமே 2.0 என்பது குறிப்பிடத்தக்கது.

இதுவரை ரஜினிகாந்த் நடித்த படங்களிலேயே இதுதான் அதிகச் செலவில் அதாவது 450 கோடி ரூபாய் பட்ஜெட்டில் தயாரிக்கப்பட்டுள்ளது. இதனை பிரபல இயக்குனர் ஷங்கர், தனது பிரமாண்ட பாணியில் தயாரித்துள்ளார்.

இந்த 2.0 படத்தில் நாயகியாக எமி ஜேக்சனும் பிரபல போலிவுட் நடிகர் அக்‌ஷாய் குமார் வில்லனாகவும் நடித்திருக்கின்றனர். படப்பிடிப்பு முடிந்து கடந்த தீபாவளிக்கே இப்படம் திரையிடப்படவிருந்தது. 

எனினும் திட்டமிட்டபடி வெள்யிட முடியாமல் போகவே, ஜனவரி 26ஆம் தேதி இந்திய குடியரசு தினத்தில் வெளியிட அறிவிப்புச் செய்யப்பட்டு அப்போதும் அது தள்ளிப்போனது. 

தற்போது ஏப்ரல் 14ஆம் தேதி 2.0 வெளியிடப்படும் என்று அறிவிக்கப் பட்டுள்ளது. சென்னையில் தமது ரசிகர்களுடனான சந்திப்பின் போது ஏப்ரல் 14 -இல் வெளிவரும் என்பதை ரஜினிகாந்த் அதிகாரப்பூர்வமாக அறிவித்தார்.

இந்தப் படத்திற்கு  அடுத்து 'காலா' படம் வெளிவரவிருக்கிறது என்று அறிவித்த ரஜினிகாந்த, அதன் பிறகு என்ன என்பது ஆண்டவன் கையில் இருக்கிறது என்றார்.

 

 

 

 

 

 

 

 

 

 

 

 

 

 

 

More Articles ...