மும்பை, நவ.20- நடிகை தீபிகா படுகோனே நடிப்பில் அடுத்து வெளிவரவிருக்கும் படமான பத்மாவதிக்கு நாளுக்கு நாள் எதிர்ப்புகள் அதிகரித்து வரும் நிலையில், தீபிகாவினை உயிருடன் கொளுத்துபவர்களுக்கு ரூ.1 கோடி பரிசு வழங்கப்படும் என மதவாத அமைப்பு ஒன்று அறிவித்ததை அடுத்து இந்தி திரையுலகத்தில் பெரும் அதிர்ச்சி நிலை உண்டாகியுள்ளது. 

நடிகை தீபிகா இயக்குனர் சஞ்சய் லீலா பன்சாலி இயக்கத்தில் பத்மாவதி எனும் படத்தில் நடித்தார். இப்படம் வரும் டிசம்பர் 1ஆம் தேதி வெளிவரும் என அறிவிக்கப்பட்ட நிலையில் இதற்கு நாடு முழுவதும் கடும் எதிர்ப்பு கிளம்பி உள்ளது. குறிப்பாக, உத்திரபிரதேசம் மற்றும் ராஜஸ்தான் ஆகிய மாநிலங்களில் பெரிய எதிர்ப்பு உருவாகியது.

இந்த நிலையில், உ.பியில், பரேலி உள்ள அகில இந்திய பாரதீய சத்ரிய மகாசபா என்ற அமைப்பினர் பத்மாவதி படத்திற்கு எதிராக பெரிய ஊர்வலத்தை நடத்தினர். மேலும் தீபிகா மற்றும் இயக்குனரின் உருவ பொம்மைகளை எரித்தனர்.

அதன் பின் கூட்டத்தில் பேசிய அமைப்பின் இளைஞர் பிரிவு தலைவர் புவனேஸ்வர் சிங், "நடிகை தீபிகாவை உயிருடன் கொளுத்துபவர்களுக்கு ஒரு கோடி ரூபாய் பரிசு வழங்கப்படும்" என அறிவித்தார். இதனால் இந்தி திரையுலகமே அதிர்ச்சியில் மூழ்கியுள்ளது.

சென்னை, நவ.17- ஜெர்மனியைச் சேர்ந்த பெண் ரசிகை ஒருவர் தனது முதுகில் பிரபாஸின் படத்தினை பச்சைக் குத்தியுள்ளார். ராஜமெளலி இயக்கத்தில் பாகுபலி எனும் திரைப்படம் இரண்டு பாகங்களாக வெளியானது. இந்த படம் உலகம் முழுவதும் பெரும் வெற்றி பெற்றதுடன், வசூல் சாதனையையும் படைத்தது.  

பாகுபலியாக நடித்த பிரபாஸ் இந்த படத்தின் மூலமாக உலகம் முழுவதும் பிரபலமடைந்தார். தெலுங்கு சினிமாவில் "டார்லிங்" என்று அழைக்கப்படும் பிரபாஸிற்கு, இந்த படத்தின் மூலமாக பெண் ரசிகைகளின் எண்ணிக்கையும் அதிகரித்துள்ளது.   

   ###காணொளி: நன்றி Subhadra Mukherjee

இந்நிலையில், ஜெர்மனியைச் சேர்ந்த பெண் ஒருவர், பிரபாஸின் படத்தின் தனது முதுகில் பச்சைக் குத்தியுள்ளார். இது தொடர்பான வீடியோ ஒன்றையும் அவர் வெளியிட்டுள்ளார். மேலும், இது பிரபாஸுக்கு அர்பணிக்கப்பட்டது எனவும் அவர் அந்த வீடியோவில் குறிப்பிட்டுள்ளார்.  

இந்த காணொளி ஜூலை மாதம் வெளியிடப்பட்டாலும் தற்போது மீண்டும் சமூக வலைத்தளங்களில் வைரலாகி வருகிறது.

மும்பை, நவ.17- பிரபல ஹிந்தி திரைப்பட இயக்குநர் சஞ்சய் லீலா பன்சாலி இயக்கத்தில் உருவாகும் 'பத்மாவதி' திரைப்படம், எதிர்வரும் டிசம்பர் மாதம் 1-ம் தேதியன்று திரையீடு காணவிருக்கிறது. இது ராஜ்புத் சமூகத்தினரைப் பற்றிய வரலாற்றுப் படம் என்று கூறப்படுகிறது. நடிகை தீபிகா படுகோன், இப்படத்தில் ராணி பத்மாவதி என்ற பாத்திரத்தில் நடிக்கிறார்.

இந்தப் படத்துக்கு,  ராஜ்புத் சமூகத்தினர் கடும் எதிர்ப்புத் தெரிவித்துள்ளனர். 'பத்மாவதி' படத்துக்குத் தடை விதிக்க வேண்டும். தீபிகா படுகோன் உடனடியாக நாட்டைவிட்டு வெளியேற வேண்டும். இல்லையெனில், அவரது தலையை வெட்டி எடுத்து வருபவர்களுக்கு 5 கோடி ரூபாய் பரிசு தரப்படும் என்று உத்தரப் பிரதேசத்தைச் சேர்ந்த சாத்ரிய சமாஜ் அமைப்பைச் சேர்ந்த தாக்கூர் அபிஷேக் சாம் அறிவித்துள்ளார். 

"இந்தப் படத்தை வெளியிடுவதை இயக்குநர் சஞ்சய் லீலா பன்சாலி நிறுத்திவைக்க வேண்டும். மீறி படத்தை வெளியிட்டால், கடும் விளைவுகளைச் சந்திக்க நேரிடும். ராஜ்புத் பெண்ணாக நடித்திருக்கும் தீபிகா, எங்களின் உணர்வுகளைக் காயப்படுத்தியிருக்கிறார். ராஜ்புத் சமூகத்தைச் சேர்ந்த எந்த ஒரு பெண்ணும் பொதுவெளியில் நடனம் ஆட மாட்டார். இயக்குநர் சஞ்சய்க்கு, ராஜ்புத்களின் வரலாறு தெரியவில்லை. வரலாற்று உண்மையைச் சிதைத்த அவர் தண்டிக்கப்பட வேண்டும்" என்றும் அவர் எச்சரிக்கை விடுத்துள்ளார்.

'சர்வ் பிராமின் மகாசபா' என்ற அமைப்பைச் சேர்ந்த உறுப்பினர்கள், ரத்தத்தால் எழுதிய கடிதம் ஒன்றை மத்திய திரைப்படத் தணிக்கைக் குழுவுக்கு அனுப்பி, தங்கள் எதிர்ப்பைப் பதிவுச் செய்துள்ளனர். கார்னி சேனா என்ற அமைப்பு, டிசம்பர் 1-ம் தேதி, இந்த படத்தை எதிர்க்கும் வகையல் மறியல் ஒன்றில் ஈடுபடும் என்று அறிவித்துள்ளது.

சில மாதங்களுக்கு முன்பு ஜெய்ப்பூரில் நடந்த படப்பிடிப்பின் போது, எதிர்ப்பாளர்கள் பலர் ஷூட்டிங் தளத்தில் போடப்பட்டிருந்த செட்டுகளை உடைத்து, அங்கு பணியில் இருந்த பணியாளர்களையும் தாக்கினர். மேலும் படப்பிடிப்பு உபகரணங்களையும் சேதப்படுத்தினர். அத்தாக்குதலில் இயக்குநர் சஞ்சய் லீலா பன்சாலியும் காயம் அடைந்தார். 

இப்படத்தின் போஸ்டர் வெளியீட்டின் போதும் அதனை தீ வைத்துக்கொளுத்தி அவர்கள் தங்கள் எதிர்ப்புகளைக் காட்டினர் என்பது குறிப்பிடத்தக்கது. இப்படத்திற்கு தடை விதிக்க வேண்டும் என்றும் நீதிமன்றத்தில் வழக்குத்தொடரப்பட்டது. ஆனால், அந்த வழக்கை உச்சநீதிமன்றம் தள்ளுபடி செய்தது.  

சென்னை, நவ.16- இயக்குனர் பாலாவின் படங்கள் என்றாலே சர்ச்சைகளுக்கு பஞ்சமே இருக்காது. பொதுவாக படம் வெளிவந்த பிறகு தான் பாலாவின் படங்களுக்கு எதிர்ப்பு வரும். ஆனால் ஜோதிகா நடிப்பில் பாலா இயக்கிய புதிய படமான நாச்சியார் படத்தின் டீசர் நேற்று வெளியிடப்பட்ட உடனே சர்ச்சையும் தொடங்கி விட்டது.

பாலாவின் புதிய படம் நாச்சியார். இதில் ஜோதிகா போலீஸ் அதிகாரியாக நடிக்கிறார். இதில் கதாநாயகனாக ஜி.வி.பிரகாஷ் நடிக்கிறார். படத்தின் மொத்த படப்பிடிப்பும் முடிந்து பின் ஆக்கப்பணி வேலைகள் நடந்து வருகின்றன.

இந்நிலையில், நேற்று இயக்குனர் பாலா இப்படத்தின் டீசரை யூடியூப்பில் வெளியிட்டார். டீசர் வெளியான உடனே சர்ச்சைகள் எழுந்தன. இதற்கு காரணம் டீசரின் இறுதியில் 'தே' என்று தொடங்கும் தகாத வார்த்தையை ஒரு இளைஞனை நோக்கி ஜோதிகா பேசுவது போல் காட்சி அமைந்திருப்பதே.

பொதுவாக படங்களின் கெட்ட வார்த்தைகள் சென்சார் போர்ட்டினால் நீக்கப்படும் அல்லது பீப் சத்தம் இணைக்கப்படும். ஆனால் இந்த டீசரில் ஜோதிகா கெட்ட வார்த்தை பேசுவது பலருக்கு அதிருப்தியை ஏற்படுத்தியுள்ளது.

More Articles ...