ஷாஆலாம், அக்.14- சிலாங்கூர் மாநிலத்தில் ஒவ்வொரு ஆண்டும், டிங்கி காய்ச்சலால் பாதிக்கப்படுவோரின் எண்ணிக்கை அதிகரித்து வருவது குறித்து தாம் ஆச்சரியப்படவில்லை என்று பிரதமர்    டத்தோஶ்ரீ நஜிப் ரசாக் தெரிவித்தார். 

ஒவ்வொரு வருடமும் அம்மாநிலத்தில் குறைந்தது 40 ஆயிரம் மக்கள் அந்நோயால் பாதிப்படைவதாகவும், ஒரு நாளுக்கு 100 பேர் டிங்கி காய்ச்சலால் பாதிக்கப்படுகின்றனர் என்றும் அவர் சொன்னார். 

இவ்வருடம் ஜனவரி மாதம் தொடங்கி அக்டோபர் 9-ஆம் தேதி வரை சிலாங்கூரில், 39,158 பேர் டிங்கி காய்ச்சலுக்கு  உள்ளாகியுள்ளனர். அவர்களில் 59 பேர் மரணமடைந்துள்ளதாக பதிவாகியுள்ளது என்று புள்ளி விவரம் தெரிவிப்பதாக பிரதமர் கூறினார். 

"இது பெருமைக்குரிய விஷயம் அல்ல. கொசுக்கள் இனப்பெருக்கம் செய்யும் இடங்கள், சட்டவிரோத குப்பைத் தளங்கள் மற்றும் வடிகால்கள், ஆகியவற்றை சுத்தம் செய்யும் பொறுப்பு மாநில அரசாங்கத்துடையது. அலட்சியமே இதற்குக் காரணம்" என்றார் அவர்.

சவ்ஜானா உத்தாமா என்ற இடத்தில் தேசிய நீல பெருங்கடல் வியூகம்-'என் அழகிய சுற்றுப்புறம்' என்ற ஒன்றுகூடி சுத்தம் செய்யும் நிகழ்ச்சியை அதிகாரப்பூர்வமாக தொடக்கியப் பின்னர் பிரதமர்  தெரிவித்தார்.

சிலாங்கூர் மாநிலத்தில்தான் அதிகமானோர் இந்த டெங்கி காய்ச்சலுக்குள்ளவதாக தெரிவித்த அவர், இந்த எண்ணிக்கையை குறைக்கும் பொருட்டு, கூட்டரசு அரசாங்கம் மற்றும் அம்மாநில அரசாங்கம் ஒன்றுகூடி சுத்தம் செய்யும் பணிகளைத் தொடங்கியுள்ளது. 

இந்த முயற்சி 98 நாடாளுமன்றத் தொகுதிகளில் தொடங்கப்பட்டுள்ளது என்று நஜிப் கூறினார். 

இதனிடையில், 42 வகுப்பறைகள் மற்றும் இதர வசதிகளுடன் கூடிய இரண்டாவது சவ்ஜானா உத்தாமா இடைநிலைப்பள்ளி கட்டுமானத்திற்கு 57.6 மில்லியன் ரிங்கிட் வழங்கப்பட்டுள்ளதாக நஜிப் அறிவித்தார்.  

 

 

கோலாலம்பூர், அக்.9-  பல் மருத்துவச் சேவை வழங்கிய போலி பல் மருத்துவருக்கும் சுகாதார அமைச்சுக்கும் எவ்வித சம்பந்தமும் இல்லை என்று துணை அமைச்சரின் அலுவலகம் நேற்றுச் செய்தி அறிக்கையை வெளியிட்டது. 

சட்டத்திற்கு எதிராக செயல்படும் யாருக்கும் சுகாதார அமைச்சு எவ்வித ஆதரவையும் வழங்காது என அதில் தெரிவிக்கப்பட்டது. இப்படிப்பட்ட ஒருவருக்கு எவ்வித ஆதரவையும் வழங்கவில்லை என்பதை இங்கு தெரிவிக்கின்றோம்" என துணையமைச்சர் டாக்டர் ஹில்மி யாஹ்யாவின் செயலாளர் அசியான் அரிப்பின் கூறினார். 

உரிமம் பெறாத பல் மருத்துவ கிளினிக்கை நடத்தி வந்த போலி பல் மருத்துவர் நூர் ஃபராஹனிஸ் எசாத்தி என்ற இளம்பெண்ணுக்கு எதிரான வழக்கில் அவர் குற்றவாளி என்று தீர்ப்பளிக்கப்பட்ட வேளையில், அவருக்கு ஆதரவாக சுகாதார அமைச்சும் அதன் துணை அமைச்சரும் செயல்படுகின்றனர் என சமூக வலைத்தளங்களில் பேசப்பட்டு வரும் புரளிக்கு முற்றுப்புள்ளி வைப்பதற்காக இந்த அறிக்கை விடப்பட்டுள்ளது. 

தனது 'இன்ஸ்டாகிராம்' வலைத்தளத்தில் தனக்கு ஆதரவு அளித்தமைக்கு சுகாதார அமைச்சு மற்றும் டாக்டர் ஹில்மிக்கு ஃபராஹனிஸ் நன்றித் தெரிவித்துள்ளார். 

கடந்த செப்டம்பர் 29-ஆம் தேதியன்று, தனியார் சுகாதார வசதிகள் மற்றும் சேவைகள் சட்டம் 1998-யின் கீழ், ஃபராஹனிஸ் குற்றவாளி என்று தீர்ப்பு வழங்கிய மலாக்கா நீதிமன்றம், அவருக்கு ரிம.70,000 அபராதமும் அதைக் கட்டத் தவறினால் 6 மாதச் சிறைத் தண்டனையும் விதித்தது.

அபராதத் தொகையைக் கட்ட முடியாமல் 6 நாட்கள் சிறையில் இருந்த ஃபராஹனிஸ்க்கு அபராதத் தொகையைப் பொது மக்களிடமிருந்து நிதி திரட்டித் தந்து, அவரை சிறையிலிருந்து சில அரசுசாரா இயக்கங்கள் விடுவித்தன என்பது குறிப்பிடத்தக்கது. 

)

 

புத்ராஜெயா, அக்.5- தற்போதைய பொருளாதார சூழ்நிலையில், மருந்து மற்றும் மருத்துவச் சிகிச்சைகளுக்காக அதிகமாக செலவிடும் நிலை ஏற்பட்டுள்ளது. அதிகரித்து வரும் இந்த மருந்து மற்றும் மருத்துவ செலவுகளை சீராக நிலைநிறுத்துவது சுலபமான காரியம் அல்ல. இதனை எவ்வாறு நிலைநிறுத்துவது? என்பது குறித்து சுகாதார அமைச்சு ஆராய்ந்து வருகிறது. 

அரசாங்கம் கடந்த ஆண்டு, பொதுச் சுகாதார பராமரிப்பிற்கு ரிம. 2,500 கோடி செலவிட்டதாக சுகாதார அமைச்சர் டத்தோஶ்ரீ டாக்டர் சுப்பிரமணியம் தெரிவித்தார். ஆனால், வழங்கப்பட்ட சேவைகளுக்கு குறைந்தபட்ச கட்டணமாக ரிம. 60 கோடி மட்டுமே வசூலிக்கப்பட்டதாகவும் அவர் சொன்னார்.

"மருந்து மற்றும் மருத்துவ செலவுகளுக்கு அரசாங்கம் கிட்டத்தட்ட 95% மானியத்தை வழங்கியுள்ளது என்பது இதன் வாயிலாக தெரியவந்துள்ளது," என்று புத்ராஜெயா மருத்துவமனையின் புதிய சிகிச்சை மையத்தின் அடிக்கல் நாட்டு நிகழ்வின் போது அவர் தெரிவித்தார். 

இதனிடையே, இச்செலவுகளை நிலைநிறுத்தும் வழிமுறைகளை அரசாங்கம் ஆராய்ந்து வருகிறது. பொது மற்றும் தனியார் துறைகள் ஒன்றாக இணைந்து செயல்படுவதன் வாயிலாக, சுகாதார துறைக்கு ஏற்படக்கூடிய சிரமமான சூழ்நிலைகளுக்கு தீர்வு காணலாம் என்றார் அவர்.

மருத்துவச் சிகிச்சைகளுக்கான செலவுகளையும், சுகாதார பரமாரிப்புக்கான செலவுகளையும் இதன் வாயிலாக நிலைநிறுத்தலாம். இது ஒரு நீண்ட காலத் திட்டம். முதல் கட்ட நடவடிக்கைகள் எடுக்கப்பட்டுள்ளது," என்று கூறிய அவர், மேலும் விவரிக்க மறுத்து விட்டார். 

அந்தப் புதிய சிகிச்சை மையம், ரிம.365 மில்லியன் செலவில் கட்டப்பட்டு வருகிறது. இச்சிகிச்சை மையம் 2020-ஆம் ஆண்டில் முழுமைப் பெறும் என்று எதிர்ப்பார்க்கப்படுகிறது. 

 

 கோலாலம்பூர், செப்.26-  நோயாளிகளுக்கு மருந்து வழங்கும் உரிமை மருந்தக அதிகாரிகளுக்கும் மருத்துவர்களுக்கும் கொடுக்கப்படவிருக்கும் மருந்தகச் சட்ட மசோதா குறித்து இறுதிக்கட்ட முடிவு எடுக்கப்பட்டு அட்டர்னி ஜெனரலின் அனுமதிக்காக காத்திருப்பதாக சுகாதார அமைச்சர் டத்தோஸ்ரீ டாக்டர் எஸ்.சுப்ரமணியம் கூறினார். 

இது குறித்து சம்பந்தப்பட்ட தரப்பினரிடம் விவாதித்து விட்டோம். அட்டர்னி ஜெனரலின் அனுமதி கிடைக்கப் பெற்ற பின்னர் இந்தச் சட்ட மசோதாவை நாடாளுமன்றத்தில் தாக்கல் செய்யப் போவதாக அவர் தெரிவித்தார்.

ஈராண்டுகளுக்கும் முன்னர் நோயாளிகளுக்கு மருத்து வழங்கும் உரிமை குறித்து முன்மொழியப்பட்ட புதிய மசோதாவை மலேசிய மருந்துவ சங்கம் நிராகரித்தது. அதனைத் தொடர்ந்து, சுகாதார அமைச்சு இந்த மசோதாவை அமல்படுத்த சில தரப்பினருடன் பேச்சுவார்த்தை நடத்தி வந்தது. 

பின்னர், இந்த மசோதாவில் குறிப்பிட்டப் பட்டிருந்ததைப் போல் மருத்துவ அதிகாரிகள் மற்றும் மருத்துவர்களுக்கும் மருந்து வழங்கும் உரிமை கொடுக்கப்பட வேண்டும் என்று முடிவு செய்யப்பட்டது என்று டாக்டர் சுப்ரமணியம் கூறினார். 

இதனால், நோயாளிகள் யாரிடமிருந்து எங்கு மருந்து வாங்கிக் கொள்ளலாம் என்று முடிவு செய்யலாம் என்றார் அவர். மருந்தகங்களில் மருந்தக அதிகாரிகளிடம் இருந்து மருந்து வாங்கி கொள்ளும் சட்டம் தான் இப்போது நடைமுறையில் உள்ளது என்பது குறிப்பிடத்தக்கது.

 

More Articles ...