நியூயார்க், மே.5- எய்ட்ஸ் நோயை முற்றிலுமாகக் கட்டுப்படுத்தும் புதிய சிகிச்சை முறையை கண்டறிந்துள்ள விஞ்ஞானிகள், அதனை எலியின் மூலம் பரிசோதனை செய்து வெற்றி கண்டுள்ளனர். 

அமெரிக்காவில் உள்ள டெம்பிள் பல்கலைக்கழகம் மற்றும் பீட்டர் பல்கலைக்கழகத்தின் விஞ்ஞானிகள், எய்ட்ஸைக் கட்டுப்படுத்துவதற்கான ஆய்வுகளை மேற்கொண்டுள்ளனர். எலியின் உடலில் எய்ட்ஸ் கிருமிகளைச் செலுத்தி, அதைக் குணப்படுத்தும் சிகிச்சை முறையைப் பரிசோதித்துப்  பார்த்தனர்.

மனிதனின் மரபணுவில் செய்யப்பட்ட சில மாற்றங்களுக்கான அணுவை எலியின் உடலில் செலுத்தி எலியின் உடலில் பல மாற்றங்களை விஞ்ஞானிகள் ஏற்படுத்தினர். அப்போது, நோய் எதிர்ப்பு சக்தி அதிகரித்து எலியின் உடலில் இருந்த எய்ட்ஸ் கிருமிகளை, அவை முற்றாக அழித்துவிட்டன.

மனிதனின் உடலில் புகும் எய்ட்ஸ் கிருமிகள் முதலில் எச்.ஐ.வி. கிருமியாக இருந்து பின்னர் அவை வளர்ந்து எய்ட்ஸ் நோயை உருவாக்குகின்றன. இந்த மரபணுச் சிகிச்சை மூலம் எச்.ஐ.வி. கிருமி உடலில் வளரும் போதே அவற்றை அழித்து விடலாம். எனவே, எய்ட்ஸ் நோய் உருவாவதற்கே வாய்ப்பு இல்லாமல் போய்விடும். இதனால் உயிர் இழப்புகளை தடுத்து விடலாம்.

விரைவில் இந்த மருத்துவ முறை மீதான பரிசோதனை மனிதர்களிடம் நடத்தப்படும் என்று அறிவிக்கப்பட்டுள்ளது. தற்போது உலகம் முழுவதும் மில்லியன் கணக்கான மக்கள் எய்ட்ஸ் நோயினால் பாதிப்படைந்து உள்ளனர் என்பது குறிப்பிடத்தக்கது. 

 லண்டன், ஏப்ரல்,5- ஒரு மனிதனை மாரடைப்பின் தாக்கத்திலிருந்து உடனுக்குடன் காப்பாற்றும் நோக்கில், பிரிட்டனின் இருதய ஆய்வுக் கழகம், இரத்தப் பரிசோதனை மூலம் முன்னறிந்து தடுப்பதற்கான புதிய வழிமுறை ஒன்றைக் கண்டறிந்துள்ளது.

உலகில் அதிகமானோரின் உயிரைப் பறிப்பது மாரடைப்புத்தான். இதன் தாக்கம் நாளுக்கு அதிகரித்து வருகிறது. இருதயத்தின் தசைகளில் ஏற்படும் பிரச்சனை தான் மாரடைப்பை உண்டாக்குகிறது.

ஒருவருக்கு தசையில் பாதிப்பு ஏற்பட்டிருக்கிறது என்பதையும் அவருக்கு முன்கூட்டியே மிதமான அளவில் மாரடைப்பு வந்துள்ளது என்பதையும் இரத்தப் பரிசோதனை வழி கண்டுபிடிக்கும் புதிய மருத்துவ முறையை பிரிட்டீஷ் மருத்துவ நிபுணர்கள் கண்டுபிடித்துள்ளனர்.

நெஞ்சு வலியோடு அல்லது இரு தோள்பட்டைகளிலும் கடுமையான வலியோடு மருத்துவமனைக்கு வருகின்ற ஒருவருக்கு மாரடைப்பு ஏற்பட்டிருக்கிறதா? என்பதை உறுதியாக கண்டறிய குறைந்தபட்சம் 24 மணிநேரம் தேவைப்படுகிறது.

ஆனால், தற்போதைய புதிய இரத்தப் பரிசோதனையின் வழி 12 நிமிடங்களுக்குள் கண்டுபிடித்து அதற்கான சிகிச்சைகளை அளிக்க முடியும் என்று பிரிட்டனின் இருதய பராமரிப்பு அறவாரியத்தின் தலைவர் சர் நீலேஷ் சமானி என்பவர் தெரிவித்தார்.

இவ்வாறு 12 நிமிடங்களுக்குள் கண்டுபிடித்து உடனடியாக சிகிச்சை அளித்தால் உயிரைக் காப்பாற்றலாம். இதன்வழி பல்லாயிரக்கணக்கான மக்களை காப்பாற்ற முடியும் என்றார் அவர்.

பல உயிர்கள் பலியாவதற்கு காரணமே, "அது மாரடைப்புத் தானா?" என்பதைக் கண்டறிவதற்கு ஏற்படும் தாமதம் என்று டாக்டர் நீலேஷ் சொன்னார்.

இருதயத்தின் தசையில் கடுமையான சேதம் ஏற்பட்டிருப்பதை மிகத் துல்லியமாக காட்டக்கூடிய மிக முக்கியமான புரோட்டினை தாங்கள் அடையாளம் கண்டு இருப்பதாகவும் இந்த வகை புரோட்டின் அதிகம் தென்படும் போது அது மாரடைப்பை சுட்டிக்காட்டி விடும் என்றும் அவர் குறிப்பிட்டார்.

தற்போது முழுமையாக சோதனைக்கு உட்படுத்தப்பட்டிருக்கும் இந்த இரத்தப் பரிசோதனை முறை சில மாதங்களுக்குள் நடைமுறைக்குக் கொண்டு வந்துவிடும் என்று அவர் கூறினார்.

ஈப்போ, மார்ச் 10- சளி, காய்ச்சல் நோய்களுக்கு ஆளான மூன்று பள்ளிகளைச் சேர்ந்த 216 மாணவர்கள் தனிமைப்படுத்தப்பட்டுள்ளனர். இவர்களுக்கு பருவ மாற்றத்தினால் உண்டான சாதாரண சளி, காய்ச்சல் மட்டுமே ஏற்பட்டுள்ளதாக கூறப்பட்டுள்ளது. 

முன்னதாக இவர்களுக்கு பன்றி காய்ச்சலான எச்1என்1 எனும் தொற்றுநோய் ஏற்பட்டதாக செய்திகள் பரவியதை மறுத்தார் பேரா சுகாதார ஆட்சிக்குழு உறுப்பினர் டத்தோ மா ஹங் சூன். 

பெண்கள் பள்ளியான ராஜா பெரெம்புவான் தாயாவைச் சேர்ந்த 129 மாணவர்களும் துங்கு அப்துல் ரஹ்மான் பள்ளியைச் சேர்ந்த 84 மாணவர்களும் கிளேபாங் தேசிய பள்ளியைச் சேர்ந்த 3 மாணவர்களும் தற்காலிகமாக தடுத்து வைக்கப்பட்டுள்ளனர். 

அனைத்து மாணவர்களும் தத்தம் ஆசிரமங்களில் தங்க வைக்கப்பட்டுள்ள நிலையில், கிளேபாங் மாணவர்கள் தங்களின் வீட்டில் தனிமைப்படுத்தப்பட்டுள்ளனர்.

பேரா சுகாதார இலாகா தொடர்ந்து மாணவர்களைக் கண்காணித்து வருவதாகவும் பருவ மாற்றத்தினால் ஏற்பட்ட சாதாரண சளி காய்ச்சல் இது எனவும் டத்தோ மா கூறினார். ஆசிரமத்தில் தங்கியிருக்கும் மாணவர்களைக் காண அவர்களின் பெற்றோர்கள் கூட அனுமதிக்கப்படவில்லை எனவும் அவர் கூறினார். 

தனிமைப்படுத்தப்பட்ட மாணவர்கள் பன்றி காய்ச்சலால் பாதிக்கப்பட்டுள்ளனர் என செய்தி வெளியானதைப் பற்றி கருத்துரைத்த டத்தோ மா, இதுபோன்ற வதந்திகளைப் பொதுமக்கள் நம்பக்கூடாது என்றும் அதிகாரப்பூர்வ தகவல்களை மட்டுமே பகிரவேண்டும் எனவும் கூறினார்.

சிங்கப்பூர், மார்ச்.9- தற்போது நடப்பில் இருக்கும் புகைப் பிடிப்பதற்கான வயது வரம்பை 18-இல் இருந்து 21 வயதாக அதிகரிக்கப்படும் என்று சிங்கப்பூர் அறிவித்திருக்கிறது.

அடுத்த ஆண்டுக்குள் இதற்கான சட்டத் திருத்த மசோதா நாடாளுமன்றத்தில் தாக்கல் செய்யப்படும். அதன் பின்னர் 21 வயதை எட்டியவர்களால் மட்டுமே சிகரெட் குடிக்க முடியும். சிகரெட் பாக்கெட்டுகளை வாங்க முடியும், சிகரெட்டுகளை வைத்துக்கொள்ள முடியும். 

அடுத்த ஆண்டு இந்தச் சட்டம் நடப்புக்கு வந்தாலும் கட்டம் கட்டமாக அது அமல்படுத்தப்படும். 21 வயதை எட்டுவதற்கு முன்பாகவே சிகரெட் புகைக்கும் பழக்கத்திற்குள் நுழைய ஆசைப்படுவோரை கட்டுப்படுத்தும் நோக்கிலேயே இந்த சட்டத் திருத்தம் கொண்டு வரப்படுவதாக சுகாதார அமைச்சர் அமி கோர் நாடாளுமன்றத்தில் தெரிவித்தார்.

சிகரெட் குடிப்பதற்கான வயது வரம்பை 18-இல் இருந்து 21க்கு அதிகரிக்க அரசாங்கம் திட்டமிடுவதற்குக் காரணம், சிகரெட் குடிப்பவர்களில் பெரும்பாலோர், 21 வயதுக்கு முன்பே இந்தப் பழக்கத்தை தொடங்கி விடுகிறார்கள். 18 வயதில் இருந்து 20 வயதுக்கு உள்ளாகவே அவர்கள் இந்தப் பழக்கத்திற்கு முற்றாக அடிமையாகி விடுகிறார்கள்.

கடந்த 2013ஆம் ஆண்டில் நடத்தப்பட்ட ஆய்வின்படி பார்த்தால், புகைப் பழக்கம் உள்ள 20 பேரில் 19 பேர் 21 வயதை எட்டும் முன்பே சிகரெட் பிடிக்கத் தொடங்கியவர்கள் எனத் தெரிய வந்திருப்பதாக சிங்கப்பூரின் சுகாதார அமைச்சு கூறுகிறது.

சட்டப்பூர்வமாக ஒருவர் சிகரெட் புகைப்பதற்கான வயது வரம்பு 18 என்பது கடந்த 1993-ஆம் ஆண்டிலிருந்து இங்கு நடப்பில் இருந்து வருகிறது என்பது குறிப்பிடத்தக்கது.

 

 

More Articles ...