கோலாலம்பூர், நவ.14- குழந்தைகளுக்கான தடுப்பூசியைப் போடுவதைச் சில பெற்றோர்கள் தடுத்து வருகின்றனர். இதனால், தடுக்ககூடிய நோய்களினால் பாதிக்கப்படும் பிள்ளைகளின் எண்ணிக்கை அதிகரித்து வருகிறது.

சுகாதாரத்துறை துணையமைச்சர் டத்தோஶ்ரீ டாக்டர் ஹில்மி யாஹயா இதனைப் பற்றி கூறுகையில், கடந்த ஆண்டு ஏறக்குறைய 1451 பெற்றோர்கள் தங்கள் பிள்ளைகளுக்கு தடுப்பூசி போடுவதைத் தடுத்துள்ளதாக கூறினார். இந்த எண்ணிக்கை 2014ம் ஆண்டு வெறும் 918 ஆக இருந்தது.

தடுப்பூசி போடுவதால் தடுக்கக்கூடிய சில நோய்களின் எண்ணிக்கை, இந்த சிக்கலால் கடந்த மூன்று முதல் ஐந்து ஆண்டுகள் வரையில் அதிகரித்து வருவதாக அவர் கூறினார். 

'உதாரணத்திற்கு, கடந்த 2015ம் ஆண்டு அம்மை நோயால் பாதிக்கப்பட்டவர்கள் 1,318 பேராக இருந்த நிலையில் இவ்வாண்டு, ஜூன் மாதம் வரை மட்டுமே 1009 சம்பவங்கள் பதிவாகியுள்ளன.

"தடுப்பூசிகள் குறித்து சில ஊடகங்களில் பரப்பப்படும் தவறான செய்திகளால் பல பெற்றோர்கள் பிள்ளைகளுக்குத் தடுப்பூசி போடுவதை எதிர்க்கின்றனர். அது தவறு. இவர்களுக்கு முறையான விளக்கங்கள் தேவை" என டாக்டர் ஹில்மி கூறினார்.

இதற்காகவே அமைச்சின் மைஹெல்த் அகப்பக்கத்தில் தடுப்பூசி மற்றும் நோய் தடுப்பு அவசியம் குறித்த விளக்கங்கள் சொல்லப்பட்டுள்ளன. மேலும், மாநில அளவில் சுகாதார விழிப்புணர்வு வழங்க ஜாகிம் உடன் இணைந்து அமைச்சு வேலை செய்யும் என அவர் மேலும் கூறினார்.

'உங்களுக்கு ரத்தத்துல கொலஸ்ட்ரால்  அளவு கூடுதலா இருக்கு. அவசியம் குறைக்க வேண்டும் 'என மருத்துவர் சொல்லிவிட்டால்,  நம்மில் பலர்  மனமுடைந்து விடுவார்கள். நாளைக்கே மாரடைப்பு வந்து விடுவது போன்ற உணர்வு ஆட்டிப்படைக்கத் தொடங்கிவிடும். அப்படிப்பட்டவர்களில் நீங்களும் ஒருவரா?  இருக்கவே இருக்கிறது கறிவேப்பிலை. கறிவேப்பிலை முடிக்குதானே? என்கிறீர்களா.. 

மேற்கொண்டு படியுங்கள். 

கறிவேப்பிலை என்றதுமே நம் அனைவரது நினைவுக்கும் வருவது முடி நன்றாக வளரும் என்பதே. உணவுகளில் தினமும் பயன்படுத்தினால், பலரும் அதை சாப்பிடாமல் தூக்கி எறியத்தான் செய்வோம்.

ஆயுர்வேத மருத்துவத்தில் கூட கறிவேப்பிலையை பயன்படுத்த பரிந்துரைக்கப்படுகிறது. இதில் 63 சதவிகித நீரும், 6.1 சதவிகித புரதமும், ஒரு விழுக்காடு கொழுப்பும், 4 விழுக்காடு தாதுப்புகளும், 6.4 சதவிகித நார்ச்சத்தும், 18.7 சதவிகித மாவுச்சத்தும் இருக்கின்றன.

சுண்ணாம்பு சத்து, மக்னீசியம், இரும்பு சத்து, தாமிர சத்து, கந்தக சத்து மற்றும் குளோரின், ஆக்ஸாலிக் ஆஸிட் போன்றவையும் கறிவேப்பிலையில் உண்டு. இதனை பச்சையாகவோ அல்லது ஜூஸ் வடிவிலோ எடுத்துக் கொள்ளலாம்.

செரிமான பிரச்னைகளை தீர்க்கிறது கறிவேப்பிலை. உணவுகள் செரிமானம் ஆகாமல் இருந்தால் கொழுப்புகள் படிந்து தொப்பை ஏற்படும். எனவே கறிவேப்பிலையை தினமும் காலையில் சிறிதளவு உட்கொண்டு வந்தால் கொழுப்புகளை கரைப்பதுடன், உடலின் மெட்டாபாலிசத்தை அதிகரிக்கிறது.

அதுமட்டுமின்றி உடலில் உள்ள நச்சுகளையும் வெளியேற்றுகிறது, எனவே உடல் எடை அதிகரிப்பதை தடுக்கிறது.

குறிப்பாக கெட்ட கொழுப்புகளை எரிக்கும் பொருள் கறிவேப்பிலையில் அதிகம் உள்ளது. கொலஸ்ட்ரால் பிரச்சனையால் அவதிப்படும் நபர்கள் இதை தினமும் காலையில் உட்கொண்டு வரலாம்.

இதில் இரும்பு மற்றும் போலிக் ஆசிட் அதிகம் நிறைந்துள்ளதால், உடலின் அனைத்து பாகங்களுக்கும் ஆக்சிஜன் கிடைக்க வழிவகை செய்கிறது. இதன் மூலம் உடலில் இரத்த அணுக்கள் குறைந்துவிடாமல் பாதுகாக்கிறது.

இதில் ஆன்டிபாக்டீரியா மற்றும் ஆன்டி ஆக்ஸிடன்ட் நிறைந்துள்ளதால் சருமத்திற்கு பொலிவை கொடுக்கிறது. கறிவேப்பிலையை பேஸ்ட் செய்து, இதனுடன் மஞ்சள் சேர்த்து பருக்கள் இருந்த இடத்தில் தடவினால் பருக்கள் மறைந்துவிடும்.

குறிப்பாக சர்க்கரை நோயால் அவதிப்படும் நபர்கள் கறிவேப்பிலையை உட்கொள்ள வேண்டும். ஏனெனில் இது ரத்தத்தில் சர்க்கரையின் அளவை குறைக்கிறது.

அண்மைய காலமாக நம் நாட்டு மக்களிடையே சிறுநீரகக் கல்  பிரச்சனை உருவாகி வருகிறது.  இது சொல்லொண்ணா துன்பத்தையும், வலியையும் ஏற்படுத்தும் எந்த நேரத்தில் வலி ஏற்படும் என்றே சொல்ல முடியாது. 

உடலில் உள்ள ரத்தத்தைச் சுத்திகரித்து, கழிவை சிறுநீராக வெளியேற்றும் முக்கியமான பணியை நமது சிறுநீரகங்கள் செய்கின்றன.

பொதுவாக சிறுநீரில் பல வேதிப்பொருட்கள் அடங்கியுள்ளன. அவற்றுள் கால்சியம், ஆக்சலேட் போன்ற உப்புகள் வழக்கமாக ஒன்று சேர்ந்து திடப்பொருள் களாக மாறுவதில்லை.

சிலருக்கு ஏற்படும் வளர்சிதை மாற்றங்கள், இவற்றின் விகிதங்களை மாற்றி இவற்றைச் சிறு துகள்களாகவோ, கற்களாகவோ படிய வைக்கின்றன. இவையே நாளடைவில் கற்களாக உருவாகின்றன.

பொதுவாக இந்தக் கற்கள் சிறுநீர்ப் பாதையில் அடைப்பு ஏற்படுத்தாதவரை, அறிகுறிகள் வெளியில் தென்படாது.

சிறுநீரகத்தில் உற்பத்தியாகும் இந்தக் கல், உடலில் இருந்து வெளியேற முடியாமல் தடைபடும்போது கடுமையான வலி ஏற்படும்.

இதனால் சிறுநீர் வெளியேறுவதில் பிரச்சினை உண்டாகும். கற்களின் வெளிப்பரப்பு முட்கள் போல் இருந்தால் நீர்ப் பாதையின் சவ்வுப்படலத்தில் உராய்ந்து சிறுநீரில் ரத்தம் வெளி வரக்கூடும், மேலும் முதுகில் வலி ஆரம்பித்து, அது வயிற்றுப்பகுதிக்கு மாற்றம் ஆகும்.

அடிவயிற்றில் வலித்தல், தொடைகள், அந்தரங்க உறுப்புகளில் வலி, காய்ச்சல், சிறுநீரில் ரத்தம் வெளியேறுதல் ஆகியவை ஏற்பட்டால் அது சிறுநீரகக் கல்லாக இருப்பதற்கு வாய்ப்புள்ளது.

சிலருக்கு சிறுநீரகக் கல் ஏற்படுவதற்கு உணவுப் பழக்கம் ஒரு காரணமாக இருக்கலாம். பரம்பரையால் கூட சிறுநீரகக்கல் பிரச்சினை ஏற்படலாம்.

சில உணவு வகைகளை தவிர்ப்பதன் மூலமும், தினமும் 3 முதல் 4 லிட்டர் வரை தண்ணீர் அருந்துவதன் மூலமும் சிறுநீரகத்தில் கற்கள் ஏற்படாமல் ஓரளவு தடுக்கலாம்.

பழங்கள், காய்கறிகள் ஆகியவற்றை தினசரி உணவு களில் சேர்த்துக்கொள்ள வேண்டும்.

உப்பு, இனிப்பு வகைகள், இறைச்சி ஆகியவற்றைக் குறைத்துக்கொள்ள வேண்டும். வாழைத்தண்டை உணவில் சேர்த்துக் கொள்வது மிகவும் நல்லது.

ஆரஞ்சு போன்ற சிட்ரிக் அமிலப் பழங்களின் சாறைக் குடித்தால், அது சிறுநீரில் அமிலத் தன்மையைக் குறைத்து கல் உருவாவதைத் தடுக்கும்.

சிறுநீரகக் கல் பிரச்சினை பெரிதாகும்போது, உரிய சிகிச்சை எடுத்து அதற்கு தீர்வு பெற வேண்டும். 

லண்டன், செப்.28- உயிரியல் ரீதியில், மூன்று பெற்றோர்களைக் கொண்ட மரபணு தொழில்நுட்பத்தில் உலகின் முதலாவது குழந்தை பிறந்திருக்கிறது என மருத்துவர்கள் அறிவித்துள்ளனர். இப்போது அந்தக் குழந்தைக்கு இப்போது ஐந்து மாதம் நிறை வடைந்திருக்கிறது.

வழக்கம் போலவே அம்மா, அப்பா ஆகியோரின் மரபணுவுடன், மற்றொருவரிடமிருந்து தானமாகப் பெறப்பட்ட மிகச் சிறிய மரபணிக் குறிமுறையைப் பயன்படுத்தி இந்தப் பிரசவம் நடந்துள்ளது.

ஜோர்டானைச் சேர்ந்த ஒரு தாய்க்கு இயல்பிலேயே அவரிடமிருக்கும் மரபணு குறைபாட்டிலிருந்து, அவருக்குப் பிறக்கும் குழந்தை தப்பிக்க வேண்டும் என்பதற்காக இத்தகைய புதிய மகப்பேறு தொழில்நுட்பத்தை மருத்துவர்கள் கையாண்டுள்ளனர் என்பது முக்கிய அம்சமாகும்.

இதுபோன்ற மிக அபூர்வமான மரபியல் கோளாறு காரணமாக பாதிக்கப் பட்டிருப்போரின் இல்லங்களில் மழலைக் குரல் கேட்காதா? என ஏங்குவோருக்கு எதிர்காலத்தில் மிக உயரிய வழிமுறையாக அமையக் கூடிய மருத்துவ உலகின் புதிய சகாப்தம் இது என்று நிபுணர்கள் வர்ணிக்கின்றனர்.

எனினும், இந்தச் சர்ச்சைக்குரிய மருத்துவ தொழில்நுட்ப வழிமுறை குறித்து மிகக் கடுமையான கட்டுப்பாட்டு விதிமுறைகள் அவசியம் என்றும் அவர்கள் எச்சரித்துள்ளனர்.

மூன்று பெற்றோர்களின் மரபணுவைக் கொண்டு மகப் பேறை உருவாக்கும் இந்தத் தொழில்நுட்பம், 1990-களிலேயே தொடங்கி யது என்றாலும் அதிலிருந்து முற்றிலும் மாறுபட்ட, முக்கியத்துவம் வாய்ந்த புதிய முறை இப்போது கையாளப்பட்டு ள்ளது.

இந்த புதிய நுட்பத்தில் பிறந்துள்ள குழந்தையின் பெற்றோர்கள் ஜோர்டானைச் சேர்ந்தவர்கள். இந்தத் தாயின் மரபணு குறை பாடு காரணமாக, பிறந்த குழந்தைகள் மரபணு பாதிப்புள்ள குழந்தைகளாகப் பிறந்து ஒருவகை நோய்க்கு இலக்காகி இறந்தனர்.

ஏற்கெனவே இவருக்குப் பிறந்த இரண்டு பிள்ளைகள் 'லெய்க் சிண்ட்ரோம்' எனப்படும் நோய் காரணமாக சில காலத்திலேயே இறந்தனர். மேலும் சில முறை அவருக்கு கர்ப்பத்திலேயே கருக் கலைந்தும் போனது.

இந்தக் குடும்பத்திற்கு உதவுவதற்காக மருத்துவ நிபுணர்கள் பல்வேறு மகப்பேறு வழிமுறைகளைக் கையாண்டு பார்த்தனர். பின்னர் இந்தப் புதிய வழிமுறையைக் கடைபிடிக்க முடிவு செய்தனர். 

அமெரிக்காவில் இத்தகைய முறைக்கு ஆங்கீகாரம் இல்லாததால், அமெரிக்க நிபுணர்கள் இந்தத் தம்பதியுடன் மெக்சிகோ சென்றனர். அங்கு இத்தகைய மகப்பேறு தொழில்நுட்பத்தைத் தடுக்க எத்தகைய சட்ட விதிமுறைகளும் கிடையாது என்பதால் அந்த நாட்டைத் தேர்ந்தெடுத்தனர்.

தாயின் கரு முட்டையுடன் தானமாக மற்றொருவரிடமிருந்து பெற்றப்பட்ட கரு முட்டையின் வளமான உள்கட்டமைப்பு மற்றும் தந்தையின் விந்து உயிரணுவைக் கொண்டு கருவுறச் செய்யப்பட்டது.

இந்த அடிப்படையில் பார்த்தால் கருமுட்டையின் உள்கட்டமைப்பைத் தானமாகத் தந்தவரின் மரபணு தாக்கம் என்பது இந்தக் குழந்தையிடம் 0.1% அளவில் மட்டும்தான் இருக்கும் என்பது குறிப்பிடத்தக்கது. இதர அனைத்து மரபியல் கூறுகளும் தாய் மற்றும் தந்தைக்கு உரியவையாகவே இருக்கும். உதாரணமாக, தலைமுடி, கண்களின் நிறம் ஆகியவை கூட பெற்றோரின் மரபியலின் கூறாகவே அமைந்திருக்கும்.

அமெரிக்காவின் நியூயார்க் நகரில் அமைந்துள்ள நியூஹோப் எனப்படும் புகழ்பெற்ற மகப்பேறியியல் மையத்தின் மருத்துவ இயக்குனர் டாக்டர் ஜோன் ஷாங்கின் தலைமையிலான மருத்துவ நிணர்கள் குழு, இந்தப் புதிய தொழில் நுட்பத்தின் கீழ் ஐந்து கரு முளைகளை உருவாக்கினார். அதில் ஒன்றே ஒன்றுதான் முறையாக வளர்ச்சி பெற்றது.

இந்நிலையில், மூன்று பேரின் மரபணுவிலிருந்து மகப்பேற்றை உருவாக்கும் இந்தத் திட்டத்தை அனுமதிக்கும் சட்டம் இங்கி லாந்தில் நிறைவேற்றப்பட்டிருப்பதால் குழந்தையின் பேறுகாலம் இங்கிலாந்தில் இடம் பெற்றது.

இந்தக் குழந்தை, கடந்த ஏப்ரல் மாதத்திலேயே பிறந்து விட்டது என்றாலும் அது அறிவிக்கப்படாமலேயே இரகசியமாக வைக்கப்பட்டிருந்தது. ஏனெனில், இந்தப் பெற்றோர்களுக்கு இதற்கு முன்பு பிறந்த இரண்டு பிள்ளைகள் 'லெய்க் சிண்ட்ரோம்' குறைபாட்டினால் பாதிப்படைந்து சிறிது காலத்திலேயே இறந்து விட்டன. 

எனவே, புதிய தொழில்நுட்பத்தில் பிறந்த இந்த ஆண் குழந்தைக்கும் அத்தகைய நோயின் தாக்கம் இருக்கிறதா? என்பதை அறிந்து கொள்ளும் வரையில் இதனை வெளியிடாமல் இருக்க மருத்துவர்கள் முடிவு செய்தனர். ஐந்து மாதங்களுக்குப் பிறகும் அத்தகைய நோயின் அறிகுறி இல்லாதால் இப்போது அறிவிக்கப்பட்டது.

இந்த மருத்துவ முறை தொடர்பாக பல்வேறு சர்ச்சைகள் தொடங்கிவிட்டன. இருப்பினும், தங்களுடைய மருத்துவத் தொழில்நுட்பம் தொடர்பில் எழுப்பப்படும் பல கேள்விகளுக்கு டாக்டர் ஜோன் ஷாங் மற்றும் அவரது குழுவினர் அக்டோபர் மாதம் இதற்கெனக் கூட்டப்படவிருக்கும் செய்தியாளர்கள் கூட்டத்தில் விளக்கமளிக்க உள்ளனர்.

 

 

 

 

 

 

 

More Articles ...