ஜொகூர் பாரு, ஜூலை.24- இம்மாதம் 22-ஆம் தேதி வரையில் ஜொகூரில்  டெங்கி காய்ச்சல் அதிகரித்து வரும் வேளையில், இதுவரை 14 பேர் உயிரிழந்துள்ளனர்.

சுமார் 8 முதல் 67 வயது வரையிலானவர்கள் இந்த டெங்கி காய்ச்சலால் பாதிக்கப்பட்டுள்ளனர் என்று மாநில சுகாதார, சுற்றுச்சூழல், கல்வி மற்றும் தகவல்  துறை ஆட்சிக்குழுத் தலைவர் டத்தோ அயூப் ரஹ்மாட் கூறினார்.

இந்த ஆண்டு தொடக்கம் முதல் ஜூலை 22-ஆம் தேதி வரை ஜொகூரில் மொத்தம் 4,526 டெங்கி காய்ச்சல் சம்பவங்கள் பதிவாகியுள்ளன. இதே காலக்கட்டத்தில் கடந்த ஆண்டு 7,949 சம்பவங்கள் பதிவாகினது. 

எனினும், கூலாய் (8.96 விழுக்காடு), கோத்தா திங்கி (4.7 விழுக்காடு), குளுவாங் (3.3 விழுக்காடு), மூவார் (1.9 விழுக்காடு), மெர்சிங் (0.94 விழுக்காடு) மற்றும் பத்து பகாட் (0.47 விழுக்காடு) ஆகிய பகுதிகளுடன் ஒப்பிடுகையில் ஜொகூர் பாருவில் டெங்கி காய்ச்சல் சம்பவங்கள்  79.7 விழுக்காடாக அதிகரித்துள்ளது.

மேலும், தங்காக், சிகாமாட் மற்றும் பொந்தியான் ஆகிய பகுதிகளில் எந்த டெங்கி காய்ச்சல் சம்பவங்களும் பதிவாகவில்லை.

ஜொகூரில் மொத்தம் 22 பகுதிகள் டெங்கி காய்ச்சல் பரவும் இடங்களாக  அடையாளம் காணப்பட்டுள்ளன. அவற்றும் 20 இடங்கள் ஜொகூர் பாருவிலும் மீதி இரு இடங்கள் மூவார் மற்றும் கூலாய் பகுதிகளிலும் அமைந்துள்ளன என்று அயூப் தெரிவித்தார்.

 

கோலாலம்பூர், ஜூலை.25-  ரேபிஸ் நோய்க் கிருமிகள்  பரவும் பகுதியாகப் பிரகடனப்படுத்தப்பட்ட பகுதிகளில் உள்ள நாய்கள் யாரையாவது கடித்தால் மட்டுமே அவருக்கு ரேபிஸ் தடுப்பூசி போடவேண்டியது அவசியம் என்று சுகாதார அமைச்சர் டத்தோஶ்ரீ டாக்டர் சுப்பிரமணியம் கூறினார்.

ரேபிஸ் நோய் பரவாமல் தடுக்க அரசாங்கம் இந்த நடவடிக்கை மேற்கொள்ளவதாக அவர் சொன்னார். அரசாங்கம் கையிருப்பில் வைத்திருந்த 8,000 ரேபிஸ் தடுப்பூசி மருந்துகளில் 2,000 தடுப்பூசி மருந்துகள் பயன்படுத்தப்பட்டு விட்டதாக அவர் தெரிவித்தார். இதுவரை தடுப்பூசி போடப்பட்ட சுமார் 17,800 விலங்குகளில் பெரும்பாலானவை உள்நாட்டு விலங்குகளே ஆகும். 

மேலும், ரேபிஸ் நோய்க் கிருமிகள் பரவும் பகுதியாகப் பிரகடனப்படுத்தப்படாத பகுதிகளில் உள்ள நாய்கள் கடித்தால், உடனே தடுப்பூசி போடப்படப் படமாட்டாது. மாறாக, மருத்துவரின் ஆலோசனைப் படி அதற்கு ஏற்றவாறுதான் சிகிச்சை வழங்கப்படும். அறிவியல் ஆதாரங்கள் மற்றும் பொது செயல்முறை திட்டத்தின் அடிப்படையில் இந்த முடிவு எடுக்கப்பட்டதாக அவர் குறிப்பிட்டார்.

சரவாக்கில் மொத்தம் 20 இடங்கள் ரேபிஸ் நோய்க் கிருமிகள் பரவும் பகுதியாகப் பிரகடனப்படுத்தப்பட்டுள்ளன. மற்ற பகுதிகளிலும், அதிலும் குறிப்பாக கூச்சிங்கில் ரேபிஸ் நோய்க் கிருமி பரவுவதற்கான வாய்ப்பு அதிகமாக உள்ளது என அவர் எச்சரித்தார்.

ரேபிஸ் நோய் பரவாமல் தடுக்க சரவாக் அரசாங்கம் அரசு சாரா அமைப்புகளுடன் இணைந்தும் செயல்பட்டு வருகின்றது. அது மட்டுமல்லாமல், அரசியல் பிரச்சனைகளை ஒதுக்கி வைத்து விட்டு எதிர்க்கட்சிகளும் ஒன்றிணைந்து செயல்பட்டால் இந்த பிரச்சனைக்குத் தீர்வு காணலாம் என்று டாக்டர் சுப்பிரமணியம் கூறினார். 

 

கோலாலம்பூர், ஜுலை 21- ரேபிஸ் நோய் கிருமியின் தாக்குதலைக் கட்டுப்படுத்தும் தடுப்பூசி மருந்துகள் ஏன் போதிய அளவில் இல்லை என சரவா அரசாங்கம், மலேசிய அரசாங்கத்திடம் கேள்வி எழுப்பியுள்ளது.

சுகாதார அமைச்சை நோக்கி தாங்கள் எழுப்பிய இந்தக் கேள்விக்கு சரியான பதில் கிடைக்காவிடில் இதனை நாடளுமன்றம் வரை எடுத்துச் செல்வேன் என சரவா உள்துறை அமைச்சர் டாக்டர் குய் ஹியான் எச்சரித்தார்.

இதுவரையில் ரேபிஸ் கிருமிகளின் தாக்குதலில் நால்வர் பலியாகியுள்ள வேளையில் ஒருவர் சரவா பொது மருத்துவமனையில் அனுமதிக்கப்பட்டுள்ளார்.

"ஒரு வேளை உங்களை நாய் கடித்தால் தயவு செய்து கடித்த பாகத்தை உடனடியாக தண்ணீரைக் கொண்டு கழுவி விட்டு மருத்துவரின் நாடுங்கள். இவ்வாறு செய்தால் ரேபிஸ் கிருமிகள் உடனடியாக மூளையைப் பாதிப்பதை தடுக்க முடியும்" என அவர் கூறினார்.

கடந்த ஏப்ரல் மாதம் தொடங்கி இன்று வரையில் சுமார் 516 ரேபிஸ் சம்பவங்கள் பதிவாகியுள்ளன.

 

புக்கிட் மெர்தாஜாம், ஜூலை.20- பினாங்கில் கடந்த 2015-ஆம் ஆண்டில் 'ரேபிஸ்' நோய் தாக்கிய போது முன்னெச்சரிக்கை இல்லாதால் ஏமாந்தது போலன்றி, இம்முறை வெறிநாய்க் நோய்க் கிருமி பரவாமல் தடுக்க கூடுதல் நடவடிக்கைகளில் பினாங்கு தீவிரமாக இறங்கியுள்ளது.   

குறிப்பாக, பினாங்கு மாநிலத்திற்குள் வரும் வாகனங்களில் நாய்கள் கொண்டு வரப்படுகின்றனவா? என்பதை உறுதி செய்ய சாலைத் தடுப்பு சோதனைகள் மேற்கொள்ளப்படுகின்றது. மேலும், தடுப்பூசிகள் போட கொண்டுவரப்படும் நாய்களுக்கு ‘மைக்ரோ-ஜிப்’ பொருத்தப்பட்டு வருகிறது. 

கால்நடை சேவைப் பிரிவு விழிப்பு நிலையில் இருப்பதாகவும் தடுப்பூசிகளுக்கு போதுமான அளவு மருந்து கையிருப்பு இருப்பதாகவும் மாநில சுகாதார பிரிவின் தலைவர் டாக்டர் அபிப் பகாருடின் கூறினார். இப்போதைக்குப் போதுமான அளவான 3,800 தடுப்பூசி மருந்துகள் போத்தல்கள் இருப்பதாக அவர் குறிப்பிட்டார்.

இதுவரை பினாங்கில் ரேபிஸ் நோய் சம்பவம் எதும் பதிவாகாத நிலையில், இனிமேல் வருவதற்கான வாய்ப்பை நாங்கள் ஏற்படுத்த மாட்டோம் என அவர் செய்தியாளர்களிடம் கூறினார்.

பினாங்கில் சுமார் 10 ஆயிரம் தெருநாய்கள் இருப்பதாக கணிக்கப்பட்டுள்ளதால் வெறிநாய்க் கடி நோய் கிருமி பரவாமல் பாதுகாக்கும் விஷயத்தில் சிரமத்தை எதிர்நோக்கியுள்ளதாகவும்  இருந்த போதிலும், சுமார் 7,000 நாய்களுக்கு நோய் தடுப்பூசி போட்டுவிட்டதாகவும் அவர் சுட்டிக் காட்டினார்.

கடந்த 2015-ஆம் ஆண்டில் பினாங்கில் இந்நோய் தாக்கிய போது தடுப்பூசிகளுக்குப் பற்றாக்குறைவு ஏற்பட்ட பட்சத்தில் நூற்றுக்கும் மேற்பட்ட நாய்கள் கொல்லப்பட்டன என்பது குறிப்பிடத்தக்கது.

இதனைத் தொடர்ந்து, கெடா மற்றும் பெர்லீஸ் மாநிலங்களிலும் வெறிநாய்க் கடி நோய் வராமல் தடுக்க இரு மாநில அரசாங்கமும் தீவிர முயற்சியில் இறங்கியுள்ளன.

இந்த இரு மாநிலங்களும் இணைந்து செயல்பட்டால் ரேபிஸ் நோய் வராமல் தவிர்க்கலாம் என கெடா மாநில சுகாதாரப் பிரிவு தலைவர் டத்தோ டாக்டர் லீயோங் யோங் கோங் தெரிவித்தார். மாநில எல்லைப் பகுதிகளில் சாலைத் தடுப்பு நடவடிக்கைகள் மேற்கொள்ளப்பட்டு வருவதாக பெர்லிஸ் மாநில சுகாதாரப் பிரிவு தலைவர் நூருல்ஹிஷாம் கூறினார்.

 

More Articles ...