வைகுண்ட ஏகாதசி: ஸ்ரீரங்கம் ரெங்கநாதர் கோவிலில் இன்று சொர்க்கவாசல் திறந்தது!

ஆன்மீகம்
Typography

திருச்சி, டிச.29- வைகுண்ட ஏகாதசி விழாவையொட்டி ஸ்ரீரங்கம் ரெங்கநாதர் கோவிலில் இன்று அதிகாலை சொர்க்கவாசல் திறக்கப்பட்டது. பக்தர்கள் கடவுள் தரிசனம் செய்வதற்கு வசதியாக சிறப்பு ஏற்பாடுகளும் அங்குச் செய்யப்பட்டுள்ளன. 

ஸ்ரீரங்க ரெங்கநாதர் கோவில், பூலோகத்தின் வைகுண்டம் என்று போற்றப்படுகிறது. இந்த கோவிலில் வைகுண்ட ஏகாதசி விழா கடந்த 18-ம் தேதி தொடங்கியது. அன்று முதல் ஒவ்வொரு நாளும் காலை ரெங்கநாதர் மூலஸ்தானத்தில் இருந்து புறப்பாடாகி அர்ச்சனை மண்டபத்தில் எழுந்தருளி வருகிறார்.  

வைகுண்ட ஏகாதசி விழாவின் முக்கிய நிகழ்ச்சியான பரமபத வாசல் எனப்படும் சொர்க்கவாசல் திறப்பு இன்று அதிகாலை 5 மணிக்கு நடைபெற்றது. 

இதனிடையில், நேற்று அர்ச்சுன மண்டபத்தில் நாச்சியார் திருக்கோலம் எனப்படும் மோகினி அலங்காரத்தில் பெருமாள் அலங்கரிக்கப்பட்டு காட்சியளித்தார் என்பது குறிப்பிடத்தக்கது.  

இன்று நடைபெற்ற சொர்க்கவாசல் திறப்பு நிகழ்ச்சியில் பக்தர்கள் கூட்டம் அலைமோதியது. கூட்ட நெரிசலை சமாளிக்கவும், பக்தர்கள் அமைதியாக தரிசனம் செய்வதற்கு வசதியாகவும் கோவில் நிர்வாகம் சார்பில் சிறப்பு ஏற்பாடுகள் செய்யப்பட்டிருந்தன. 

சொர்க்கவாசல் திறப்பின்போது, கடவுள் தரிசனத்திற்காக வரிசையில் நிற்கும் பக்தர்கள் அமர்ந்து செல்லும் வகையில் ஸ்ரீரங்கம் கோவிலின் வளாகத்திற்குள் ஆரியபடாள் வாசல் அருகில் இரும்பினால் ஆன சாய்வு இருக்கைகள் அமைக்கப்பட்டுள்ளன என்பது குறிப்பிடத்தக்கது. 

இதேபோல், சென்னை திருவல்லிக்கேணி பார்த்தசாரதி மற்றும் ஸ்ரீவில்லிப்புத்தூரில் உள்ள ஆண்டாள் கோவிலிலும் சொர்க்க வாசல் திறப்பு நிகழ்ச்சிகள் வெகு விமர்சையாக நடைபெற்றன. 

BLOG COMMENTS POWERED BY DISQUS