Top Stories

சென்னை, டிச.12- இங்கு பல்லாவரம் பம்மல் பகுதியில் உள்ள திருவள்ளூர்நகர் ரங்கநாதன் அடுக்குமாடி குடியிருப்பில் வசித்து வருபவர் தாமோதரன். இவருக்கு ரோஷன் மற்றும் மீனாட்சி என்று இரு பிள்ளைகள் உள்ளனர். இவரின் மனைவி தீபா.  

தாமோதரன் நடத்தி வந்த தொழிலில் நஷ்டம் ஏற்பட்டது. இதனால் அவருக்குப் பல இன்னல்கள் ஏற்பட்ட. ஆதலால், தன் குடும்பத்தினருடன் சேர்ந்து தனது உயிரை மாய்த்துக் கொள்ள அவர் தீர்மானித்தார். அதனைத் தொடர்ந்து, தனது தாயார், மனைவி தீபா மற்றும் இரண்டு குழந்தைகளின் கழுத்தை அறுத்து படுகொலை செய்தார். பின்னர் தனது சொந்தக் கழுத்தை அறுத்து தற்கொலைக்கு அவர் முயற்சித்துள்ளார். 

மற்ற நான்குபேரும் கொலை செய்யப்பட்ட நிலையில் தாமோதரம் உயிர் மட்டும் ஊசலாடிக்கொண்டிருந்தது. அதனைக் கண்ட அவரின் அண்டை வீட்டாளர்கள், அவரை மருத்துவமனையில் சேர்த்தனர். அங்கு தாமோதரனுக்கு தீவிர சிகிச்சை அளிக்கப்பட்டு வருகிறது.

குடும்பத்தில் உள்ள நான்கு பேரின் கழுத்தை அறுத்து படுகொலை செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

 

ஹைதராபாத், டிசம்.6- பிரபல திரைப்பட இசையமைப்பாளர் ஆதித்யன் (வயது 63) சிறுநீரகக் கோளாறு காரணமாக ஹைதராபாத்தில் ஒரு வாரமாக சிகிச்சைப் பெற்று வந்த நிலையில் நேற்று மதியம் 11-மணியளவில் சிகிச்சைப் பலனின்றி காலமானார். 

இவரது உடல் ஹைதராபாத்தில் இருந்து சென்னைக்கு எடுத்து வரப்படும் நாளை மதியம் இறுதி சடங்கு நடைபெறும். 

"அமரனை" தொடர்ந்து 'நாளைய செய்தி', 'சீவலப்பேரி பாண்டி', 'லக்கி மேன்', 'அசுரன்', 'மாமன் மகள்', 'சூப்பர் குடும்பம்' கடைசியாக  'கோவில்பட்டி வீரலட்சுமி' உள்ளிட்ட தமிழ்ப் படங்கள் மற்றும் தெலுங்கு, மலையாளம் உள்ளிட்ட மொழிகளிலும் இசையமைப்பாளராக ஆதித்தன் பணியாற்றி உள்ளார். இவரது இயற்பெயர் டைடஸ் (Titus) என்பதாகும். 

இவருக்கு ஷோபியா என்ற மனைவியுள்ளார். மற்றும் ஷரோன், பிரார்த்தனா என்ற இரண்டு மகள்கள் உள்ளனர். இருவரும் திருமணமாகி ஹைதராபாத்தில் வாழ்ந்து வருகிறார்கள்.

 

சென்னை, டிச.5- புதுக்கோட்டை மாவட்டம், ஆவுடையார் கோவிலைச் சேர்ந்த எம்.ஆர்.எம். எண்டர் பிரைசஸ் நிறுவனத்தின் நிர்வாக இயக்குநர் எம்.ஆர். எம். ராமையா மலேசியாவில் இருந்து தாம் இறக்குமதி செய்த மணலை விற்பனைக்கு உட்படுத்த அனுமதி அளிக்குமாறு மதுரை உயர்நீதிமன்றத்தில் மனுத்தாக்கல் செய்திருந்தார்.

இதன் தொடர்பில் வழக்கு விசாரிக்கப்பட்டு, உயர்நீதிமன்ற நீதிபதி மகாதேவன், இறக்குமதி செய்யப்பட்ட மணலை விற்பனைக்கு உட்படுத்த அனுமதி வழங்கி, தமிழகத்தில் உள்ள அனைத்து மணல் குவாரிகளையும் 6 மாதத்திற்குள் மூட வேண்டும் என்று உத்தரவிட்டார். 

சுற்றுச்சூழலை பாதுகாக்கும் வகையில் ஜல்லியைத் தவிர கிரானைட் குவாரி உள்ளிட்ட பிற கனிம குவாரிகளையும் மூட வேண்டும். வெளிநாட்டில் இருந்து மணலை இறக்குமதி செய்ய ஏதுவாக தமிழக அரசு தேவையான வழி முறைகளை பின்பற்ற வேண்டும். தேவைப்பட்டால் அரசே வெளிநாட்டில் இருந்து இறக்குமதி செய்து மணல் விற்பனை செய்யலாம் என்றும் நீதிபதி தனது உத்தரவில் குறிப்பிட்டிருந்தார்.

இந்த நிலையில் மணல் குவாரிகளை மூட வேண்டும் என்ற நீதிபதியின் உத்தரவை ரத்து செய்யக்கோரி நெல்லை, கன்னியாகுமாரி, தூத்துக்குடி மாவட்ட கலெக்டர்கள் சார்பில் மதுரை உயர் நீதிமன்றத்தில் அப்பீல் செய்யப்பட்டது. 

எம்.ஆர். எம். ராமையா, இறக்குமதி செய்துள்ள மணல் தொழிலக பயன்பாட்டிற்கான மணல் (தாதுமணல்) என்ற வரையறைக்குள் வருகிறது. அத்தகைய தாதுமணல் இறக்குமதி செய்வதற்கான உரிமம், விற்பனைக்கு கொண்டு செல்வற்கான போக்குவரத்து அனுமதி சீட்டு ஆகியவற்றை அதிகாரிகளிடம் அவர் பெறவில்லை. அதனால்தான், மணலை விற்பனைக்கு கொண்டு செல்ல அவருக்கு அனுமதி மறுக்கப்பட்டது. 

இதையெல்லாம் கருத்தில் கொள்ளாமல் நீதிபதி மகாதேவன், பொதுநல வழக்குகளை போல இந்த வழக்கையும் கையாண்டுள்ளார். வழக்கு தொடர்பான எதிர்மனுதாரர்கள் முறையான வாதங்கள் வைக்க வாய்ப்பு அளிக்கப்படவில்லை. எனவே, அந்த நீதிபதியின் உத்தரவை ரத்து செய்ய வேண்டும் என்று அப்பீல் மனுவில் தெரிவிக்கப்பட்டுள்ளது.

புதுடில்லி, டிச.12- இந்திய கிரிக்கெட் அணியின் கேப்டன் விராட் கோஹ்லியும், பாலிவுட் நடிகை அனுஷ்கா ஷர்மாவும் பல ஆண்டுகளாக காதலித்து வந்தனர். இந்த நிலையில், கடந்த சில வாரங்களாக இவர்களது திருமணம் குறித்து பல வதந்திகள் வெளியாகி வந்தன. ஆனால், அவ்விருவரும் அந்த வதந்திகள் தொடர்பாக எந்தத் தகவலும் தெரிவிக்காமல் அமைதி காத்து வந்தனர்.  

இதனிடையில், நேற்றிரவு அவ்விருவரும், இத்தாலியில் உள்ள மிலான் நகரில் தாங்கள் அதிகாரப்பூர்வமாக திருமணம் செய்து கொண்டுள்ளதாக தங்களின் டுவிட்டர் அகப்பக்கங்களில் புகைப்படங்களை வெளியிட்டு, அவர்களின் ரசிகர்களுக்கு இன்ப அதிர்ச்சியை தந்தனர். 

அவ்விருவரின் திருமணமும் பஞ்சாபி முறையில் நடந்து முடிந்துள்ளது. மிலான் நகரில் உள்ள 5 நட்சத்திர ஹோட்டலில் நடைப்பெற்ற அத்திருமணத்திற்கு, அழைப்பிதழ் கொண்டு வருபவர்களை மட்டும் ஹோட்டல் ஊழியர்கள் உள்ளே செல்ல அனுமதி அளித்தனர் என்று சில தகவல்கள் வெளியாக் உள்ளன.

இதையடுத்து, அழகான வரவேற்பு நிகழ்ச்சியில் மும்பையில் உள்ள 5 நட்சத்திர ஹோட்டலில் வரும் 21-ஆம் தேதி நடக்கவுள்ளது. இந்த வரவேற்பு நிகழ்ச்சியில் பாலிவுட் பிரபலங்கள், இந்திய கிரிக்கெட் வீரர்கள், அரசியல் பிரபலங்கள் உள்பட பலர் கலந்து கொள்வார்கள் என்று எதிர்பார்க்கப்படுகிறது. 

பாட்னா, நவ.17- உத்தரபிரதேசத்தில் ஜான்சி நகரில் கணவனின் தொல்லையால் பெண் ஒருவர் போலீசில் புகார் அளித்து இருக்கிறார். விசாரணைக்கு போலீஸ் ஸ்டேஷன் சென்ற கணவன் அங்கேயே காதல் பாடல் ஒன்றை பாடி மனைவியை சமாதானப்படுத்தி உள்ளார். இதன் காணொளி தற்போது இணையத்தில் பிரபலமாக வலம் வந்து கொண்டிருக்கிறது.

உத்திரபிரதேச மாநிலம் ஜான்சியில் இருந்த அந்த பேமஸ் கணவன் மனைவிக்கு இடையில் சில நாட்களுக்கு முன்பு சண்டை ஏற்பட்டு இருக்கிறது. இதனால் அவரது மனைவி தனது சொந்த வீட்டுக்கு கோபமாக சென்று இருக்கிறார். 

கணவன் எத்தனை முறை வந்து சமாதானம் செய்தும் அவர் திரும்ப வராமல் இருந்திருக்கிறார். அதுமட்டும் இல்லாமல் திடீர் என்று ஜான்சியில் இருக்கும் போலீஸ் நிலையத்திற்கு சென்று தன் கணவன் மீது புகாரும் அளித்து இருக்கிறார். இந்த நிலையில் போலீசார் இருவரையும் விசாரணைக்கு அழைத்தனர். போலீஸ் அந்த கணவனை திட்டிக் கொண்டு இருக்கும் போதே அவர் திடீர் என்று பாடல் ஒன்றை பாட ஆரம்பித்தார்.

"ஜீனா ஜீனா'' என்ற காதல் பாடலை அந்த கணவர் பாடினார். இதன் பொருள் ''என்னை உன்னை விட்டு வாழ முடியாது'' என்பதாகும். அவர் இந்த பாடலை தனது மனைவியை பார்த்து பாடினார். இந்த பாடலை கேட்டதும் அந்த பெண் அழ தொடங்கிவிட்டார். இதையடுத்து அந்த பெண் கணவன் மீது கொடுத்த புகாரை வாபஸ் வாங்கினார். தற்போது அந்த கணவர் 'ஜான்சி நகர் கணவர்' என சோஷியல் மீடியாவில் வைரல் ஆகியிருக்கிறார்.

புதுடில்லி, நவ.15- அடுத்த ஆண்டு ஜனவரி 1-ஆம் தேதி முதல் இந்தியர்களுக்கான விசா விதிமுறைகளை எளிமைப்படுத்துவதாகவும் குறுகிய நாட்களில் பல முறை செல்லக்கூடிய விசா வழங்க உள்ளதாகவும் ஜப்பான் தெரிவித்துள்ளது. 

ஜப்பான் அரசின் விசா எளிமைப்படுத்துதல், அடிக்கடி ஜப்பான் செல்லும் இந்தியர்கள் மற்றும், தொழிலபதிர்கள், சுற்றுலாப்பயணிகளுக்கு பயனளிக்கும் என்று  இந்தியாவில் உள்ள ஜப்பான் தூதரகம் தெரிவித்துள்ளது. 

இது குறித்து ஜப்பான் தூதரகம் வெளியிட்டுள்ள செய்தி குறிப்பில், “கடந்த ஒர் ஆண்டில் அதிகபட்சமாக இரண்டு முறை ஜப்பான் சென்றவர்களுக்கு 5 ஆண்டுகள் செல்லத்தக்க மற்றும் 90 நாட்கள் ஜப்பானில் தங்கி கொள்ளும் வகையிலான புதிய விசா எடுத்து கொள்ளலாம். இந்த புதிய விதிகள் சுற்றுலா பயணிகள் மற்றும் வணிகர்களுக்கு உதவியாக இருக்கும்” என தெரிவிக்கப்பட்டுள்ளது.

எளிமைப்படுத்தப்பட்ட விசா விதிமுறைகளின் படி, விசா விண்ணப்ப ஆவணங்களில், பலமுறை பயணிக்கும் விசாவுக்கு விண்ணப்பிக்கும் போது, வேலைவாய்ப்பு சான்றிதழ் மற்றும் விளக்க கடிதம் ஆகிய இரண்டுக்கும் விலக்கு அளிக்கப்பட்டுள்ளது.

பலமுறை நுழைவு விசாவுக்கு விண்ணப்பிக்கையில், பாஸ்போர்ட் விசா படிவம், நிதி திறன்(சுற்றுலா செல்பவர்களுக்கு), நிறுவனங்களுடன் தொடர்புடையதற்கான உறுதி ஆவணங்கள் (வணிக நோக்கில் செல்பவர்களுக்கு) ஆகியவற்றை வழங்கினால் போதும் என்று தெரிவிக்கப்பட்டுள்ளது. கடந்த பிப்ரவரியில், ஜப்பானுக்கு ஒருமுறை பயணிக்கும் இந்திய மாணவர்களுக்கு, விசா விண்ணப்ப விதிமுறைகளை எளிமைப்படுத்தப்பட்டது குறிப்பிடத்தக்கது.

Advertisement