சென்னை, ஏப்.20.  நேற்று முதல் நடிகை குஷ்பு தன்னுடைய பெயரை  "நஹ்கத் கான்" என  மாற்றிக் கொண்டுள்ளார். ஆனால், இந்தப் பெயர்  பாஜகவினருக்காக மட்டும் என்று பதிவு செய்துள்ளார்.

இஸ்லாமிய மதத்தைச் சேர்ந்த குஷ்பு,  தனது இயற்பெயரை மறைத்து வருகிறார் என பாஜகவினர் விமர்சனம் செய்தனர்.

இதற்கு பதிலடி கொடுக்கும் விதமாக தனது பெயரை உடனடியாக மாற்றி பதிவிட்டார். காங்கிரஸ் கட்சியின் தேசிய செய்தித் தொடர்பாளரான குஷ்பு,  இதுவரை குஷ்பு சுந்தர் என்றே தனது பெயரை பதிவு செய்திருந்தார். நேற்று முதல் தன்னுடைய டுவிட்டரில் நஹ்கத் கான் என்று பெயரை மாற்றி, இந்த பெயர் பாஜகவினர்களுக்கு மட்டுமே என்று பதில் கூறியுள்ளார்.

சென்னை, ஏப் 29- நடிகை ஹன்சிகா சினிமாவுக்கு நடுவே சமூக சேவை பணிகளிலும் ஈடுபட்டு வருகிறார். சம்பாதித்த பணத்தை ரியல் எஸ்டேட்டில் முதலீடு செய்வது- வீடுகள் வாங்குவது- தொழில் தொடங்குவது என்று இருப்பவர்களுக்கு மத்தியில் சம்பளத்தில் ஒரு பகுதியை ஆதரவற்றோருக்கு ஒதுக்கி உதவி செய்து வருகிறார். 

ஒவ்வொரு பிறந்த நாளிலும் ஓர் ஆதரவற்ற குழந்தையை தத்தெடுத்து வரும் அவரது குழந்தைகளின் எண்ணிக்கை தற்போது 30 ஆக உயர்ந்து உள்ளது. 

இது குறித்து ஹன்சிகா கூறியதாவது: இந்த உலகத்தில் குழந்தைகளை கஷ்டப்பட்டு பெற்று தான் 'அம்மா' ஆவார்கள். நானோ, குழந்தை பெற்றுக் கொள்ளாமலே ஆதரவற்ற 30 குழந்தைகளுக்கு தாயாகி இருக்கிறேன். 

இது பெரிய பாக்கியம். எனது வயிற்றில் பிறக்காவிட்டாலும் இவர்கள் என்னுடைய குழந்தைகள்தான். நான் தான் அவர்களுக்குத் தாய். அம்மாவையே காணாத அந்தக் குழந்தைகள் என்னைத் தான் தாயாகப் பார்க்கிறார்கள். 

அம்மா என்று  அவர்கள் அழைப்பதை பார்த்து  மனம் உருகிப் போகிறேன். அவர்களுடைய பராமரிப்புக்கு பணம் மட்டும் ஒதுக்கி விட்டு  இருப்பது இல்லை படப்படிப்பு இல்லாத நாட்களில் அவர்கள் பக்கத்தில் இருக்கிறேன்.

பெற்றோரை காணாத அந்தக் குழந்தைகளுக்கு இன்னும் நிறைய செய்ய வேண்டும். வயதான பெற்றோர்களை பிள்ளைகள் கைவிடும் போக்கு  அதிகம் சமூகத்தில் உள்ளது. ஆதரவற்ற அந்த முதியோர்களுக்காக புதிய இல்லம் ஒன்றை கட்டி வருகிறேன். அவர்களை அங்கே தங்க வைத்து பராமரிக்கவும் முடிவு செய்துள்ளேன் என்கிறார் ஹன்சிகா. 

 

சென்னை, ஏப்.17-  கல்லூரி மாணவிகளைப் பாலியல் தொழிலுக்கு அழைத்த பேராசிரியை நிர்மலா தேவியின் விவகாரம் அமபலமானதை அடுத்து அவர் மீதான உயர் மட்ட விசாரணைக்கு ஆளுநர் பன்வாரிலால் புரோஹித் உத்தரவிட்டார்

விருது நகர் மாவட்டம் அருப்புக் கோட்டையில் உள்ள தனியார் கல்லூரியில் கணிதப்பிரிவு பேராசிரியராக பணிபுரிந்தவர் நிர்மலா தேவி. இவர் கல்லூரி மாணவிகளிடம் பேசிய தொலைப்பேசி உரையாடல் சமூக வலைத்தளங்களில் வேகமாக பரவியது.

விருதுநகர் தனியார் கல்லூரியில் படிக்கும் மாணவிகளை மதுரை காமராஜர் பல்கலைக் கழகத்து உயரதிகாரிகளுடன் படுக்கையை பங்கிட்டு கொள்ளுமாறு வற்புறுத்தியுள்ளார்.

இதற்காக கல்லூரித் தேர்வுகளில் சலுகைகள் பெற்றுத் தருவதாக ஆசைவார்த்தை கூறியுள்ளார். இது தொடர்பான தொலைபேசி உரையாடல்கள் அம்பலத்திற்கு வந்து பெரும் அதிர்ச்சியை ஏற்படுத்தியது.

மாணவிகளை தவறாக வழி நடத்தியதாகக் மேற்கூறப்படும் பேராசிரியையை பணியிடை நீக்கம் செய்துள்ளனர்.அவர் மீது  காவல் நிலையத்தில் கல்லூரி நிர்வாகம் புகார் அளித்திருந்தது

அத்துடன் அவரை கைது செய்யக் கோரி மாணவர்களும்  பெற்றோர்களும் மகளிர் அமைப்பினரும் கல்லூரி முன் கூடி முழக்கமிட்டனர். இதையடுத்து நிர்மலாதேவி மீது அளிக்கப்பட்டுள்ள புகாரின் அடிப்படையில் காவல் துறையினர் வழக்குப்பதிவு செய்தனர்

நிர்மலா தேவியின் வீட்டிற்கு சென்று சோதனையிட்டனர்.அவர் வீட்டை பூட்டிக் கொண்டு உள்ளே இருப்பதாகவும் தகவல் வெளியானது.இந்நிலையில் பூட்டை அதிரடியாக உடைத்து அவரை காவல் துறையினர் கைது செய்துள்ளனர்

இதுகுறித்து ஆளுநர் மாளிகையில் இருந்து வந்த அறிக்கையில் கூறுகையில் குற்றவாளிகள் யாரும் தண்டனையிலிருந்து தப்ப முடியாது. ஓய்வு பெற்ற ஐஏஎஸ் அதிகாரி ஆர் சந்தானம் விசாரணை நடத்துவார் என ஆளுநர் தரப்பில் இருந்து அறிக்கை வெளியிடப்பட்டுள்ளது. சந்தானம் தமிழக அரசின் தலைமை செயலாளர் அந்தஸ்த்தில் இருந்து ஓய்வு பெற்றவர். மத்திய நிர்வாக தீர்ப்பாயத்தின் உறுப்பினராக உள்ளார்.

சென்னை, ஏப் 12- பிரதமர்  மோடிக்கு கறுப்புக் கொடி  போராட்டம் நடத்திய வந்த இயக்குநர்கள் பாராதிராஜா, அமீர் உள்ளிட்டோரை போலீசார் கைது செய்யததால் பரபரப்பு ஏற்பட்டது. காவிரி மேலாண்மை வாரியம் அமைக்கத் தவறிய பிரதமர் மோடிக்கு எதிராக தமிழகத்தில் போராட்டங்கள் வலுப்படுத்தப்பட்டு வருகின்றன. 

இந்நிலையில் ராணுவ தளவாட கண்காட்சியில் கலந்து கொள்ள பிரதமர் மோடி இன்று சென்னை வருகிறார். அவரது வருகைக்கு எதிர்ப்பு தெரிவித்து கறுப்புக்கொடி காட்டுவோம் என்று அரசியல் கட்சினரும் தமிழ் ஆர்வலர்களும் விவசாயிகளும் தெரிவித்தனர்.

அதன்படி தமிழக வாழ்வுரிமை கட்சியினர், விமான நிலையத்தை முற்றுகையிட்டு போராட்டம் நடத்தினர். அது போல் விமான நிலையப் பகுதியில், இயக்குநர்கள் பாராதிராஜா , அமீர், கௌதமன் , கரு. பழனியப்பன் உள்ளிட்டோர் தலைமையில் தொண்டர்கள் திரண்டு வந்தனர்.

அனைவரும் மோடிக்கு எதிராக உணர்ச்சிகரமாக கோஷமிட்டனர். மோடியே திரும்புப் போ என்று கோஷமிட்டனர். மேலும் தமிழக வாழ்வுரிகை கட்சியினர் விளம்பர பதாகைகள் மீது ஏறி அபாயகரமான வகையில் போராட்டம் நடத்திடவர்களிடம் பாரதிராஜா கீழே இறங்குமாறு கோரிக்கை விடுத்தார். 

அதை ஏற்று அவர்கள் கீழே இறங்கினர். அதையடுத்து அவர்களை போலீசார் கைது செய்தனர். தமிழகத்தின் கோரிக்கையை நிறைவேற்றாத மோடியே திரும்பிப் போ என்றும் அவர்களுக்கு பச்சைக் கொடி காட்டுவோம் என்று பேசிய தமிழக அரசுக்கு எதிர்ப்பு தெரிவித்தும் பாரதிராஜா உள்ளிட்டோர் கோஷமிட்டனர். 

இதையடுத்து பாரதிராஜா ,அமீர், வெற்றிமாறன் உள்ளிட்டோர் கைது செய்யப்பட்டு வேனில் ஏற்றப்பட்டனர். அப்போது பாரதிராஜா காவிரி மேலாண்மை வாரியம் அமைக்காத மோடி தமிழகத்திற்கு வரக்கூடாது ஆவேசமாக கோஷமிட்டார். இயக்குநர்கள் அமீர், கௌதமன் கரு பழயனியப்பன் சேர்ந்து கோஷமிட்டதால் பரபரப்பு ஏற்பட்டது.  பின் அனைவரும் அங்கிருந்து வேனில் அழைத்துச் செல்லப்பட்டு விட்டனர்.

இதே போல பரங்கி மலையில் கறுப்பு கொடி ஏந்தி போராட்டம் நடத்திய தமிழக வாழ்வுரிமை கட்சியின் தலைவர் வேல்முருகன் உள்ளிட்டோர் விமான நிலையத்தை முற்றுகையிட முயன்ற சீமான் உள்ளிட்டோரும் கைது செய்யப்பட்டனர்.  

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

திண்டிவனம் ,ஏப் 11-  காவிரி மேலாண்மை வாரியம் அமைக்கக் கோரி, திண்டிவனத்தில் ரயில்மீது ஏறி போராட்டத்தில் ஈடுபட்ட நபர் ஒருவர் மின்சாரம் தாக்கியதில் படுகாயமடைந்தார்.

காவிரி மேலாண்மை வாரியம் அமைக்காத மத்திய அரசைக் கண்டித்து  சில நாட்களாக பல்வேறு அரசியல் கட்சிகள் விவசாய அமைப்புகள் போராட்டத்தில் ஈடுபட்டு வருகின்றன. 

இந்நிலையில் காவிரி மேலாண்மை வாரியம் அமைக்க கோரி இன்று திண்டிவனம் ரயில் நிலையம் அருகே போராட்டத்தில் ஈடுபட்ட அரசியல் கட்சியினர்,  சென்னையில் இருந்த வந்த குருவாயூர் விரைவு ரயிலை  மறித்து போராட்டத்தில் ஈடுபட்டனர்.

அப்போது ரஞ்சித் என்பவர் ரயில் மீது ஏறி முழக்கமிட்டபடியே நடந்து சென்றுள்ளார். உணர்ச்சி மிகுதியில் மேலே இருந்த உயர் அழுத்த மின் கம்பியை உரசியதில் மின்சாரம் பாய்ந்து அவர் உடனடியாக தூக்கி வீசப்பட்டார். 

உடல் முழுவதும் கருகிய நிலை யில் மீட்கப்பட்ட ரஞ்சித்துக்கு புதுவை ஜிப்மர் மருத்துவமனையில் முதற் கட்ட சிகிச்சை அளிக்கப்பட்டது.  இந்நிலையில் மேல் சிகிச்சைக்காக சென்னையில் உள்ள மருத்துவமனையில் ரஞ்சித் அனுமதிக்கப்பட்டுள்ளார்.

ஐதராபாத், ஏப். 11- பிரபல தயாரிப்பாளரின் மகன்  தன்னை கட்டாயப்படுத்தி உறவு வைத்தார்.  அந்தப் புகைப்படங்களை வெளியிடுவேன்  என தெலுங்கு நடிகை ஸ்ரீரெட்டி  அறிவித்தார். அறிவித்ததோடு மட்டுமல்லாமல்,  ஒரு நடிகரின் சகோதரர் தன்னுடன் வைத்திருந்த உறவை அம்பலப்படுத்தும் வகையில் படத்தையும் வெளியிட்டு அதிர்ச்சியை ஏற்படுத்தினார்.

தெலுங்கு திரையுலகில் பட வாய்ப்புக்காக உல்லாசத்திற்கு  அழைக்கும் பழக்கம் தற்போது தான் அதிகமாக உள்ளது என்று அண்மையில் நடிகை ஸ்ரீரெட்டி அம்பலப்படுத்தி இருந்தார்.

தனக்கு நடிகர்கள் சங்க  உறுப்பினருக்கான அடையாள அட்டை வழங்கவில்லை என்று கூறி நடுரோட்டில் அவர் அரை நிர்வாணப் போராட்டம் நடத்தி பரபரப்பை ஏற்படுத்தியவர் இவர் என்பது குறிப்பிடத்தக்கது.

ஸ்டுடியோவுக்கு அழைத்துச் சென்ற பிரபல தயாரிப்பாளர் ஒருவரின் மகன் என்னை கட்டாயப்படுத்தி உறவு வைத்துக் கொண்டார். தெலுங்கு திரையுலகை ஆளும் தயாரிப்பாளர் அவர் என்று ஸ்ரீரெட்டி பேட்டி ஒன்றில் தெரிவித்துள்ளார். 

என்னை பலவந்தப்படுத்திய அந்த தயாரிப்பாளரின் மகன்   பெயரை விரைவில் வெளியிடுவேன் என்கிறார் ஸ்ரீரெட்டி.

என்னை ஸ்டுடியோவுக்கு அழைத்துச் சென்ற தயாரிப்பாளரின் மகனின் புகைப்படத்தை விரைவில் வெளியிடுவேன்.  அதுதான் என் பிரம்மாஸ்திரம் என்று அவர் தெரிவித்துள்ளார்.  

இந்நிலையில் நடிகர் ராணாவின் தம்பி அரசுக்கு சொந்தமான ஸ்டுடியோவில் தன்னுடன் உறவு வைத்துக் கொண்டதாக, நெருக்ககமாக இருக்கும் புகைப்படங்களை வெளியிட்டு இப்போது ஶ்ரீரெட்டி அதிர்ச்சியை ஏற்படுத்தி உள்ளார். 

அடுத்து தன் வாழ்க்கையில் விளையாடி பிரபல எழுத்தாளர் ஒருவர் பற்றிய அந்தரங்கங்களை தாம் வெளியிடப் போவதாக அவர் கூறியுள்ளார்.

 

சென்னை, ஏப்.11-காவிரி மேலாண்மை வாரியம் அமைப்பது மற்றும் ஸ்டெர்லைட் ஆலையை மூடக்கோரியும் தமிழகம் முழுவதும் ஆர்ப்பாட்டம் நடந்து வேளையில்,  சென்னை சேப்பாக்கம் மைதானத்தில் நடக்கவிருக்கும் ஐபிஎல் போட்டியை நடத்துவதற்கு அனுமதி வழங்கக்கூடாது என அரசியல் கட்சியினர் மற்றும் பல்வேறு அமைப்புகள் போராட்டங்களை முன்னெடுத்துள்ளனர்.

அண்ணாசாலை முழுவதும் தமிழ்க்கொடிகளைக் கையில் ஏந்தி கொண்டு "எங்கள் நாடு -தமிழ்நாடு விடமாட்டோம்"   எனவும் "தமிழன்டா" எனக் கோஷங்களை எழுப்பிவாறு போராட்டம் நடத்தி வருகின்றனர்.

போராட்டங்களில் ஈடுபட்டவர்கள் மீது போலிசார் தடியடி நடத்தினர். இந்நிலையில் சீமான் மற்றும் பாரதிராஜா ஆகியோர் கைது செய்யப் பட்டுள்ளனர். கிரிக்கெட் வீரர்கள் ஐபிஎல் மைதானத்திற்குள் நுழைந்து விட்ட நிலையில் ரசிகர்களுக்கு பலத்த சோதனைக்கு பின்னரே உள்ளே அனுமதிக்கப் படுகின்றனர்.

இதற்கிடையில் போராட்டத்தில்  ஈடுபட்ட சீமானின்  'நாம் தமிழர்' கட்சியினர், டோனி ரசிகனான சரவணன் என்பரை தாக்கியதாக அவர் புகார் அளித்துள்ளார். இந்தப் போராட்டத்தினை பயன்படுத்தி கள்ள டிக்கெட்டுகள் அதிக விலைக்கு விற்கப்படுவதாக எழுந்த புகாரில் நபர் ஒருவரை போலீசார் கைது செய்tதனர்.

பேங்காக், ஏப் 9- தாய்லாந்தில் நடைபெற்ற நீச்சல் போட்டியில் நடிகர் மாதவனின் மகன் வெண்கலப் பதக்கம் வென்று இந்தியாவுக்கு பெருமை சேர்த்தார்.

தாய்லாந்தில் குரூப்-1 (12  மற்றும் 13 வயது) குரூப்- 2 (14 மற்றும் 15வயது) , குரூப்- 3 (16-  வயது 18) என மூன்று பிரிவுகளாக நீச்சல் போட்டிக்கான சாம்பின்ஷிப் போட்டி கடந்த 7 ஆம் தேதி நடைபெற்று வருகிறது.

இப்போட்டியில் ஆண்களுக்கான 1,500 மீட்டர் பிரி ஸ்டைல் போட்டியில் நடிகர் மாதவனின் மகன் கலந்து கொண்டார். இதில் அவர் வெண்கலப்பதக்கம் வென்று அசத்தியுள்ளார். இது குறித்து மாதவன் தன்னுடைய டுவிட்டர் பக்கத்தில்   தனது மகன் வேடான்  தாய்லாந்தித்தில் நடைபெற்ற நீச்சல் போட்டியில் இந்தியாவுக்கு முதல் பதக்கத்தை பெற்றுத் தந்தார் எனக் குறிப்பிட்டுள்ளார்.

 ''இதை நான் பெருமையாக கருதுகிறேன் இது போல வேடான் பல வெற்றிகளை பெற்று இந்தியாவுக்கு பெருமை சேர்க்க வேண்டும் என அவனுக்கு வாழ்த்து கூறிய அனைத்து அன்பு உள்ளங்களுக்கும் நன்றி'' என்று அவர் தெரிவித்துக் கொண்டார்.

புனே, ஏப் 10-  கட்டுபாட்டை இழந்த 'டிரக்' லோரி ஒன்று சாலை தடுப்பில்,  மோதியதில் அதில் பயணம் செய்த 17 பேர் பலியாகி உள்ளனர். 15 பேர் காயமடைந்தனர்.

மகாராஷ்டிரா-புனே சதாரா தேசிய நெடுஞ்சாலையில் சென்று கொண்டிருந்த போது பிரக் கந்தலா என்ற இடத்தில்  லோரி கட்டுப்பாட்டை இழந்து சாலை தடுப்பில் மோதியது. 

இதில் பயணம் செய்த 17 பேர் உயிரிழந்தனர். 15 பேர் காயமடைந்து மருத்தவமனையில் சிகிச்சை பெற்று வருகின்றனர். தகவலறிந்த மீட்பு படையினர் சம்பவ நடந்த இடத்திற்கு விரைந்து சென்று மீட்பு பணியின் ஈடுபட்டனர்.

சென்னை. ஏப்.9- நடிகர் சங்கத்துக்கு நிதி திரட்ட வேணுமா? விருந்தா? கலைவிழாவா?   மூட்டை முடிச்சுகளுடன்  புறப்பட்டுப் போகும்  குஷ்பு, ராதிகா முதல் சுஹாசினி, சுகன்யா வரை பல நடிகைகள், காவிரி போராட்டத்தின் போது தலைகாட்டாதது ஏன்? என்ற கேள்வி தமிழக மக்களிடையே பரபரப்பை ஏற்படுத்தி உள்ளது. 

தமிழர்களின் ஆண்டாண்டு பிரச்சினையாக இருந்து வருவது காவிரி தான். விவசாயிகளின் துயரைத் துடைக்கும் காவிரி மேலாண்மை வாரியம் அமைக்க வேண்டும் என்ற கோரிக்கையை வலியுறுத்தி வருகிறது.

இளைஞர்கள், விவசாயிகள் தமிழக எதிர்க்கட்சிகள் உள்ளிட்டோர் போராட்டத்தில் ஈடுபட்டு வருகின்றனர். இந்நிலையில் நடிகர் சங்கத்தினரும்  போராட்டத்தில் 

கலந்து கொண்டனர். ரஜினி, கமல், விஜய், விக்ரம் .சத்யராஜ், பிரசாந்த்  மற்றும் நடிகைகள் சச்சு, தன்ஷிகா, ஸ்ரீபிரியா, அம்பிகா, ரேகா, லலிதாகுமாரி, ஆர்த்தி, சத்யா உள்ளிட்டோர் கலந்து கொண்டனர். 

டுவீட்டரிலும் கூட்டங்களிலும் மோடிக்கு எதிராக வாய் சவடால் விடும் குஷ்பு, சுகன்யா, ராதிகா. ராதா, நமீதா,  திரிஷா, நிரோஷா, சுஹாசினி, தமன்னா ஹன்சிகா பூர்ணிமா, மீனா, நளினி, சீதா உள்ளிட்ட பெரும்பாலான  நடிகைகள் ஏன் கலந்து கொள்ளவில்லை.  

பொதுவாக படப் பிடிப்புகள் எதுவும் இல்லாத அளவுக்கு திரையுலக வேலைநிறுத்தம் நிலவிக் கொண்டிருப்பதால் பெரும்பாலான நடிகைகள் ஓய்வாகத் தானே இருந்திருப்பார்கள்.  தமிழகத்தின் தலைவியாக அமைந்துள்ள காவேரி விவகாரத்தில் தமிழக ரசிகர்களைக் கருத்தில் கொண்டாவது இவர்களெல்லாம் கலந்து கொண்டிருக்கலாம் என்று பலதரப்பினரும் கேள்வி எழுப்பி வருகின்றனர்.

வேறு மாநிலங்களை சேர்ந்த நடிகைகளாக இருந்தாலும் தமிழகத்தில் புகழ் பெற்றமைக்காக காவிரி போராட்டத்தில் தமிழ் மக்களுக்காக- விவசாயிகளுக்காக பங்கேற்றிருக்கலாம் என்ற ஆதங்கம் ரசிகர்களிடையே எழுந்துள்ளது.   

சென்னை, ஏப்ரல்.8- காவேரி மேலாண்மை வாரியம் அமைக்கக் கோரியும் ஸ்டெர்லைட் ஆலைக்கு எதிர்ப்புத் தெரிவித்தும் திரையுலகத்தினர் ஒன்றுதிரண்டு நடத்தி வரும் போராட்டத்தில் சூப்பர் ஸ்டார் ரஜினிகாந்த் மற்றும் கமல்ஹசான் ஆகியோரும் பங்கேற்றனர்.

காவிரி மேலாண்மை வாரியம் அமைக்காவிட்டால் தமிழர்களின் கோபத்திற்கு மத்திய அரசாங்கம்  ஆளாக நேரிடும் என நடிகர் ரஜினிகாந்த்  போராட்டத்தின் போது குறிப்பிட்டார். 

காவேரி மேலாண்மை வாரியம் அமைக்கப்படவேண்டும் என்ற கோரிக்கையின் அடிப்படையிலும்   ஸ்டெர்லைட் ஆலைக்கு எதிர்ப்பைக் காட்டும் நோக்கிலும் தமிழகம் முழுவதும் அரசியல் கட்சிகள், விவசாயிகள், உள்பட பல்வேறு தரப்பினரும் போராட்டங்களில் குதித்துள்ளனர்.

இவ்விரு பிரச்னைகளின் அடிப்படையில் சென்னை வள்ளுவர் கோட்டத்தில் நடிகர் சங்கம் சார்பில் தமிழ்த் திரையுலகினர் எதிர்ப்பு  ஆர்ப்பட்டங்களில் இறங்கினர். இந்தப் போராட்டத்தை சங்கத் தலைவர் நாசர் தொடக்கிவைத்தார்.

நடிகர்கள் விஜய், சிவகார்த்திகேயன், கார்த்தி, விஷால், சிவக்குமார், உள்ளிட்டோர் இந்தப் போராடத்தில் கலந்து கொண்டனர். மேலும் பல்வேறு திரைக் கலைஞர்களும் இதில் கலந்து கொண்டு தங்களின் எதிர்ப்பைக் காட்டினர்.

இந்தப் போராட்டத்தில் கலந்து கொள்ளப் போவதாக ஏற்கெனவே கமல்ஹசான் அறிவித்திருந்தார். எனினும், இதில் ரஜினி பங்கேற்பாரா? என்பது கேள்விக்குறியாக இருந்தது.  ஆனால்,  கமல், ரஜினி ஆகிய இருவருமே இதில் கலந்து கொண்டது போராட்டத்திற்கு மேலும்  கூடுதல் வலுவைச் சேர்ப்பதாக அமைந்தது.    

 

 

 

 

More Articles ...