சென்னை, பிப்.23- நடிகர் கமலஹாசன் நேற்று முன்தினம் மக்கள் நீதி மய்யம் எனும் புதிய கட்சியைத் தொடங்கிய வேளை, நேற்று தனது ரசிகர்களைச் சந்தித்த ரஜினி 'சத்தம் போடுபவர்கள் சத்தம் போடட்டும், நாம் நம் வேலையைச் செய்வோம்' என்று கூறியுள்ளார்.

கமலின் கட்சி துவக்கம் குறித்து நடிகர் ரஜினியிடம் கேட்டபோது , அவரது கூட்டத்தை முழுவதுமாக பார்த்தேன். இதற்கு பின்னர் மீண்டும் அவருக்கு நான் வாழ்த்து தெரிவித்து கொள்கிறேன். 

கமல் ஒரு திறமைசாலி அவர் சிறப்பாக செயல்படுவார் என்ற நம்பிக்கை எனக்கு தெரிகிறது. மக்கள் நலனுக்காக ஒவ்வொருவரும் வேறுபாட்டு வழியில் சென்றாலும் போய்ச்சேரும் இடமும் நோக்கமும் ஒன்றுதான் என்றார்.

முன்னதாக சென்னை ராகவேந்திரா திருமண மண்டபத்தில் நெல்லை மாவட்ட ரசிகர்கள் மத்தியில் நடிகர் ரஜினி பேசியதாவது: அனைத்து ரசிகர்களையும் ஒரே நேரத்தில் சந்திப்பதற்கு இன்னும் சில நாட்கள் ஆகும். ரஜினி மக்கள் இயக்கம் 32 ஆண்டுகளாக கவனத்துடன் திட்டமிட்டு கட்டமைக்கப்பட்டது; இதனை மேலும் பலப்படுத்துவதே நோக்கம். 

எனது ரசிகர்களுக்கு யாரும் அரசியல் பாடம் கற்றுத்தர தேவையில்லை; அவர்கள்தான் மற்றவர்களுக்கு கற்றுத்தருவார்கள். மிகப்பெரிய கட்சிகளின் வெற்றிக்கு, அக்கட்சிகளின் கட்டமைப்பே காரணம். அதனால் தான். அவை வெற்றி பெற்றன. மற்றவர்கள் சத்தம் போட்டால் போடட்டும்; நாம் நமது வேலையை அமைதியாக பார்ப்போம். அரசியலில் கட்டமைப்பு தான் மிக மிக முக்கியம் என நடிகர் ரஜினி கூறினார்.

சென்னை, பிப். 22-  கிட்டத்தட்ட 5 ஆண்டு கால அஞ்ஞாத வாசத்துக்குப் பிறகு நடிக்க வந்த வடிவேலு, கொடுத்த 'கால்ஷீ'ட் படி நடித்துத் தராமல் சொதப்பியதால் இயக்குநர் ஷங்கர் உள்பட 3 தயாரிப்பாளர்கள் அவருக்கு எதிராக தயாரிப்பாளர் சங்கம் மற்றும் நடிகர் சங்கத்தில்  புகார்  செய்துள்ளனர்.

இயக்குநர் ஷங்கர் ‘இம்சை அரசன் 23-ஆம் புலிகேசி' படத்தின் இரண்டாம் பாகத்தை ‘இம்சை அரசன் 24 ஆம் புலிகேசி' என்ற பெயரில் தயாரிக்கத் திட்டமிட்டார். இதில் கதாநாயகனாக நடிக்க வடிவேலுவை ஒப்பந்தம் செய்தனர். சிம்பு தேவன் இயக்குவதாக இருந்தது. இதற்காக சென்னையில் பல கோடி ரூபாய் செலவில் அரங்கமெல்லாம் அமைத்தனர்.

ஆனால் படக் குழுவினருடன் கருத்து வேறுபாடு ஏற்பட்டு வடிவேலு நடிக்க மறுத்துவிட்டார். இதனால், படம் நின்று போனது. வடிவேலு மீது ஷங்கர் தயாரிப்பாளர்கள் சங்கத்தில் புகார் அளித்தார். இதுகுறித்து நடிகர் சங்கம் மூலம் வடிவேலுவிடம் விளக்கம் பெறப்பட்டது.

இந்த நிலையில் வடிவேலு மீது தயாரிப்பாளர்கள் ஆர்.கே. மற்றும் ஸ்டீபன் ஆகியோரும் புகார் அளித்துள்ளனர். ஆர்.கே. ‘எல்லாம் அவன் செயல்', ‘அழகர்மலை', ‘புலிவேஷம்', ‘என்வழி தனி வழி', ‘வைகை எக்ஸ்பிரஸ்' ஆகிய படங்களில் கதாநாயகனாக நடித்தவர். அழகர் மலையில் வடிவேலுதான் முக்கிய காமெடியன்.

இவர் புதிதாக ‘நீயும் நானும் நடுவுல பேயும்' என்ற படத்தை தயாரிக்க இருந்தார். இந்தப் படத்தில் நகைச்சுவை கதாபாத்திரத்தில் நடிக்க வடிவேலுவை ஒப்பந்தம் செய்து இருந்தார். இதற்காக அவருக்கு ரூ.75 லட்சம் சம்பளம் பேசப்பட்டதாக கூறப்படுகிறது. ஆனால் திட்டமிட்டபடி படப்பிடிப்புக்கு வடிவேலு வரவில்லை என்று ஆர்.கே. புகார் கூறியுள்ளார்.

இதுபோல் ஜி.வி.பிரகாஷ் கதாநாயகனாக நடிக்கும் புதிய படத்துக்கும் வடிவேலுவை ஒப்பந்தம் செய்து இருந்தனர். 'தில்லுக்கு துட்டு' படத்தை இயக்கிய ராம்பாலா இயக்குவதாகவும், ஸ்டீபன் தயாரிப்பதாகவும் அறிவிக்கப்பட்டது. ஆனால் இந்த படத்தின் கதையையே வடிவேலு மாற்றச் சொன்னதால் படப்பிடிப்பு நின்றுபோனதாக குற்றம்சாட்டப்பட்டு உள்ளது.

இந்த 2 புகார்கள் குறித்து தயாரிப்பாளர்கள் சங்கம் விசாரித்து வருகிறது. நடிகர் சங்கம் மூலம் வடிவேலுக்கு விளக்கம் கேட்டு மீண்டும் நோட்டீஸ் அனுப்பவும் நடவடிக்கை எடுக்கப்பட்டு வருகிறது. தயாரிப்பாளர் சங்கம் சார்பாகவும் வடிவேலுவுக்கு நோட்டீஸ் அனுப்பப்பட்டுள்ளது.

 

 

 

 

 

 

 

 

 

 

 

மதுரை, பிப். 22-  மதுரையில் தமது கட்சி பெயரை அறிவித்த பின்னர், கிராமங்களைத் தத்தெடுப்பது பற்றி கலந்து ஆலோசித்து  மீண்டும் பயணம் செய்யப் போவதாக 'மக்கள் நீதி மய்யம்' என்ற புதிய கட்சியின்  நிறுவனர் கமல்ஹாசன் கூறினார். 

நடிகர் கமல்ஹாசன்  நேற்று அரசியல் பயணத்தை ராமேஸ்வரத்தில் தொடங்கினார். மதுரையில் பிரம்மாண்ட பொதுக்கூட்டத்தில் கட்சிக் கொடியை ஏற்றி வைத்து கட்சியின் பெயரை அறிவித்தார்.

 செய்தியாளர்களிடம் பேசிய கமல்ஹாசன், தனது கட்சியில் உள்ள கொடியை விளக்கினார். முதல் கட்டமாக தமிழகத்தில் அடிப்படை வசதிகள் இல்லாத 8 கிராமங்களை தத்தெடுக்க உள்ளதாகவும் கட்சி நிர்வாகிகளுடன் ஆலோசனை நடத்திய பின்னர் மீண்டும் பயணம் செய்ய உள்ளதாகவும் கூறினார் கமல்ஹாசன்.

கட்சி கொடியில் உள்ள ஆறு கைகள் ஆறு மாநிலங்கள் என்றும், நட்சத்திரத்தின் எட்டு முனைகள் மக்களை குறிக்கும் என்றும் கூறினார்.

கமல்   சென்னை திரும்பியதும் கிராமங்களைத் தத்தெடுப்பதற்கான ஆரம்ப கட்டப்பணிகள் தொடங்க உள்ளன. இது தொடர்பாக மக்கள் நீதி மய்யம் கட்சி நிர்வாகிகளுடன் ஆலோசனை நடத்துகிறார்.

தமிழகம் முழுவதும் உள்ள தனது கட்சியின் நிர்வாகிகள் மற்றும் புதிதாக நியமிக்கப்பட்டுள்ள 16 உயர் மட்ட குழு உறுப்பினர்களுடன் கலந்து ஆலோசித்த பின்னர் இந்த 8 கிராமங்களும் தேர்வு செய்யப்பட உள்ளன. 

இந்தக் கிராமங்களுக்கு தேவையான அடிப்படை வசதிகளை தனது கட்சி சார்பில் முழுமையாக செய்து கொடுக்கவும் கமல் திட்டமிட்டுள்ளார்.

கிராமங்களை மேம்படுத்தினால் நகரங்கள் மேம்பாடு அடையும் என்பது கமலின் நம்பிக்கை. எனவே தான் கிராமங்களை மேம்படுத்துவதற்கு செய்ய வேண்டிய வி‌ஷயங்கள் என்னென்ன? என்பது பற்றியும் கமல் ஆலோசனை நடத்தவுள்ளார் எனக் கூறப்பட்டது.

 

 

 

 

 

 

 

 

 

 

 

 

 

 

 

 

 

சென்னை, பிப் 22: மறைந்த நடிகையர் திலகம் சாவித்திரியின் வாழ்க்கை வரலாற்றை கொண்ட  கதாபாத்திரத்திற்கு நடிகை  கீர்த்தி சுரேஷ் தகுதியற்றவர் என்று நடிகை ஜமுனா கூறியுள்ளார்.

மறைந்த நடிகை சாவித்திரி வாழ்க்கை தமிழில் 'நடிகையர் திலகம்' என்ற பெயரிலும், தெலுங்கில் 'மகாநதி' என்றும் சினிமா படமாக தயாராகிறது. இதில் சாவித்திரி வேடத்தில் கீர்த்தி சுரேசும், ஜெமினி கணேசனாக துல்கர் சல்மானும் நடிக்க, நாக் அஸ்வின் இயக்குகிறார்.

இந்நிலையில்,  சாவித்திரியாக கீர்த்தி சுரேஷ் நடிப்பதற்கு பழம்பெரும் நடிகை ஜமுனா எதிர்ப்பு தெரிவித்து உள்ளார். அவர் கூறியிருப்ப தாவது:

“நான் 200 படங்களுக்கு மேல் நடித்து இருக்கிறேன். சாவித்திரியோடு நடித்தவர்களில் நான் மட்டும்தான் உயிருடன் இருக்கிறேன். சாவித்திரி யைப் பற்றி எனக்குத் தான் நிறைய விஷயங்கள் தெரியும்.  ஆனால் என்னிடம் எதுவும் கேட்காமல் அவரது வாழ்க்கையை படமாக்குவது வேதனையாக இருக்கிறது.

இந்த படத்தில் சாவித்திரியாக நடிப்பவருக்கு (கீர்த்தி சுரேஷ்) தெலுங்கு தெரியாது. மொழி தெரியாத அவரால் சாவித்திரி கதாபாத்திரத்துக்கு திரையில் எப்படி உயிர் கொடுக்க முடியும்? இப்போதுள்ள நடிகைகள் அரைகுறை ஆடைகளில் நடிக்கிறார்கள். ஆனால் எங்கள் காலத்தில் அப்படி இல்லை.

நானும், சாவித்திரியும் சேர்ந்து நடித்து இருக்கிறோம். எனக்கு மகன் பிறந்தபோது தொட்டிலில் போடும் நிகழ்ச்சிக்கு அவர் வந்து இருந்தார். அப்போது கணவர் அமைவது அவரவர் புண்ணியம். உனக்கு நல்ல கணவர் அமைந்து இருக்கிறார். ஆனால் ஜெமினி கணேசன் என்னை மோசம் செய்துவிட்டார் என்று சொல்லி என்னை கட்டிப்பிடித்து அழுதார்.

நாங்கள் தடுத்தும் கேட்காமல் நீ தானே விரும்பி அவரை மணந்தாய் என்று நான் ஆறுதல் சொன்னேன். சாவித்திரிக்கு சென்னையில் 3 பங்களா வீடுகள் இருந்தன. அவரை மாதிரி சினிமாவில் எந்த நடிகையும் சம்பாதிக்கவில்லை. வீட்டில் நீச்சல் குளம் கட்டி  வாழ்ந்தவர் அவர்  மைசூரில் இருந்து சந்தன கட்டைகளை வரவழைத்து பூஜை அறையை உருவாக்கி இருந்தார்.

கொடைக்கானலிலும் வீடு இருந்தது. அந்தக் காலத்திலேயே சென்னையில் உள்ள அவரது ஒரு வீடு ரூ.1 கோடி விலைக்கு போகும்.  ஆனால் அந்தச் சொத்துகள் அனைத்தும் எப்படியோ கரைந்து போனது. கடைசி காலத்தில் மதுவுக்கு அடிமையாகி உடல் மெலிந்து துரும்பாகி 'கோமா'விலேயே இறந்துபோனார். இப்படி அவரைப் பற்றி நிறைய விஷயங்கள் எனக்கு தெரியும். என்னிடம் கேட்காமல் எப்படி படத்தை சிறப்பாக எடுக்க முடியும்?” -இவ்வாறு ஜமுனா கூறினார்.

 

 

 

 

 

 

 

 

 

 

 

மதுரை, பிப்.22- ராமேஸ்வரத்தில் முன்னாள் அதிபர் அப்துல் கலாம் இல்லத்திலிருந்து அவருடைய மூத்த சகோதரர் முகம்மது முத்து மீரான் ஆசியுடன் தமது அரசியல் பிரவேசத்தை இன்று காலை அதிகாரப்பூர்வமாகத் தொடங்கிய நடிகர் கமல்ஹசானுக்கு மலேசியா உள்பட பல்வேறு நாடுகளைச் சேர்ந்த அவரது ரசிகர் நற்பணி மன்றங்கள் ஆதரவு தெரிவித்துள்ளன.

தற்போது மதுரையை நோக்கிப் பயணப் பட்டிருக்கும் கமல், மாலையில் இங்கு நடைபெறும் மாபெரும் கூட்டத்தில் கட்சியின் பெயர், கொடி மற்றும் கொள்கைத் திட்டங்களை அறிவிக்கவிருக்கிறார்.

அவரது அரசியல் பயணத்திற்கு வெளிநாடுகளிலுள்ள கமல்ஹசான் நற்பணி மன்றங்களான அவரது ரசிகர்களின் மன்றங்கள் முழு ஆதரவை வழங்கும் பேனர்களை ஆங்காங்கே வைத்திருந்தன.

மலேசிய கமல்ஹசான் நற்பணி மன்றத் தலைவர் டத்தோ ஏ. இந்திரன் சாகரன், சிங்கப்பூர் நற்பணி மன்றத் தலைவர் சரவணன், மற்றும் ஆஸ்திரேலியா (வி.ஜே.மோகன்ராஜ்), பிரான்ஸ் (எம்.பிரான்சுவா கேசிடன்), இங்கிலாந்து (கண்ணன் சுவாமி), துபாய் (கமல் சண்முகம்), அயர்லாந்து  (பா.சீனிவாசன்) ஆகிய நாடுகளின் கமல்ஹசான் நற்பணி மன்றத் தலைவர்களும் கமலின் அரசியல் பிரவேசத்திற்கு தங்களின் ஆதரவைப் புலப்படுத்தி உள்ளனர்.

 

 

 

 

 

 

 

 

 

 

 

 

 

 

 

மதுரை,பிப்.21- நடிகர் கமல்ஹாசன் இன்று தமது அரசியல் பயணத்தை ராமேஸ்வரத்தில் மறைந்த மக்கள் அதிபர் அப்துல் கலாம் இல்லத்தில் இருந்து தொடங்கினார். அவருக்கு கலாமின் மூத்த சகோதரர் தமது ஆசியை வழங்கினார். மதுரையில் இன்று மாலை நடைபெறும் பொதுக்கூட்டத்தில் கட்சி பெயர், கொள்கைகள், நிர்வாகிகளை கமல்ஹாசன் அறிவிக்க இருக்கிறார். 

தமிழக அரசியலில் நடிகர்கள் கமல்ஹாசன், ரஜினிகாந்த் இருவரும் திடீரென அரசியலில் குதித்துள்ளனர். இதில் நடிகர் கமல்ஹாசன் இன்று முதல் அரசியல் பயணத்தைத் தொடங்குகிறார். 

இதையொட்டி மூத்த இடதுசாரித் தலைவர் நல்லகண்ணு, திமுக தலைவர் கருணாநிதி, நடிகர் ரஜினிகாந்த், தேமுதிக பொதுச்செயலாளர் விஜயகாந்த் உள்ளிட்டோரை சென்னையில் சந்தித்து வாழ்த்து பெற்றார். 

தமிழகத்தின் அரசியல் கட்சிகள் உருவெடுத்த இடமான மதுரையில் மாலையில் நடைபெறும் பொதுக் கூட்டத்தில் கட்சியின் பெயர், கொள்கைகள் மற்றும் நிர்வாகிகளை கமல்ஹாசன் அறிவிக்கிறார். 

இப்பொதுக் கூட்டத்தில் டில்லி முதல்வர் அரவிந்த் கெஜ்ரிவால், மேற்கு வங்க முதல்வர் மம்தா பானர்ஜி உள்ளிட்டோர் பங்கேற்கலாம் எனக் கூறப்படுகிறது. இப்பொதுக் கூட்டத்தைத் தொடர்ந்து மக்களைச் சந்திக்கும் சுற்றுப் பயணத்தை கமல்ஹாசன் மேற்கொள்கிறார்.

 

 

 

 

 

 

 

 

 

 

 

 

 

 

 

 

 

 

 

 

 சென்னை, பிப்.20 :- நாளை புதிய அரசியல் கட்சியைத் தொடங்கவிருக்கும் நடிகர்  கமல்ஹாசனை நான் ஏன்  சந்தித்தேன் என்று 'நாம் தமிழர்' கட்சித் தலைமை ஒருங்கிணைப்பாளர் சீமான் தெரிவித்தார். ஆழ்வார்பேட்டை இல்லத்தில், நடிகர் கமல்ஹாசனை சீமான் இன்று சந்தித்தார். 

பிறகு நிருபர்களிடம் அவர் கூறுகையில், தமிழகத்தில் மிக மோசமான சூழ்நிலைக்கு ஆட்சி போய்க்கொண்டுள்ளது. எப்படியாவது ஒரு மாற்றம் ஏற்பட்டுவிடாதா? என்று நினைத்து எங்களால் முடிந்ததை செய்து வருகிறோம். இந்த மண்ணின் மக்களால் நேசிக்கப்படும் அண்ணன், கமல்ஹாசனும் 21ஆம் தேதி கட்சி துவங்குவதாக அறிவித்தார்.

நான் நேசித்து வளர்ந்த ஒரு கலைஞர் என்பதால் அவர் என்னை வந்து பார்ப்பது சரியாக இருக்காது எனக் கருதி நாங்கள் தேடி வந்தோம். அவரது அரசியல் பயணம் புரட்சிகர, வெற்றிகர அரசியல் பயணமாக இருக்க வேண்டும் என்பதலென் வாழ்த்து. ஒரு நல்ல தொடக்கம் பாதி வெற்றிக்கு சமம், என்று சீமான் சொன்னார்.

'ரஜினிகாந்த் அரசியல் பிரவேசத்திற்கு எதிர்ப்பு தெரிவித்தீர்களே,கமலை வாழ்த்துகிறீர்களே' என்ற நிருபர்கள் கேள்விக்கு இது எங்கள் மண்,  இங்கே நெசவாளர் பிரச்சனை என்ன, பேருந்து ஓட்டுனர் பிரச்சனை என்ன என்பதெல்லாம்  தெரியும் போதுதான் அதை சரி செய்ய முடியும், அதனால்தான் நாங்கள் சொல்கிறோம், நீங்கள் இருங்க, நாங்கள்  பார்த்துக் கொள்கிறோம் என்கிறோம். 

ஊழல் மட்டுமே பிரச்சினை கிடையாது. பல்வேறு பிரச்சினைகள் தமிழகத்தில் உள்ளன. ஓட்டுக்கு காசு கொடுக்கும் நிலை இருக்கும்வரை ஊழல் இருக்கத்தான் செய்யும். ஓட்டுக்கு காசு கொடுப்பவன் பாவி, அதை வாங்கி ஓட்டுப் போடுபவன் தேசத் துரோகி என்று பசும்பொன் முத்துராமலிங்க தேவர் கூறியுள்ளார். 

அரசியல் என்பது யாரோ ஒருவர்  செய்வது என்று நினைக்கிறீர்கள். ஒவ்வொரு வார்த்தையிலும் அரசியல் உள்ளது. ஒரு மனிதன் பிறப்பு முதல் இறப்பு வரை அதை தீர்மானிப்பது அரசியல். அந்த அரசியலைவிட்டு விலகி நின்று என்ன செய்ய முடியும்? அரசியலில் மாற்றம் கொண்டு வர கமல் கட்சி தொடங்குகிறார். கமல் என்னை பார்க்க வருவதாக கூறினார். பண்பாட்டு ரீதியாக, கமல் என்னை பார்க்க வருவது சரியாக இருக்காது என்பதால் நானே சந்திக்க வந்தேன்.

நான் இப்போது வாழ்த்து தெரிவிக்கவே வந்தேன். கூட்டணி குறித்தெல்லாம் காலம்தான் முடிவு செய்யும். நீங்கள் ஆசைப்பட்டால் கூட்டணியும் வைப்போம். இவ்வாறு சீமான் தெரிவித்தார்.

சென்னை, பிப்.20-  பிக் பாஸ் நிகழ்ச்சிக்கு பிறகு, வேண்டும் என்ற என்னைப் பற்றிப் தப்புத் தப்பாகப் பேசுகிறார்கள், எழுதுகிறார்கள் என்று நடிகை  ஓவியா வேதனை தெரிவித்துள்ளார்.

 பிக் பாஸ்  புகழின் விளைவாக, சம்பளத்தை கண்ட மேனிக்கு உயர்த்திவிட்டதாக அவதூறு பரப்படுவது குறித்து விளக்கம் அளித்துள்ளார் ஓவியா. பிக் பாஸ் நிகழ்ச்சிக்கு பிறகு ஓவியாவுக்கு கோலிவுட்டில் மவுசு அதிகரித்தது.  பிக் பாஸ் நிகழ்ச்சியால் அவருக்கு தமிழகத்தில் ஏகப்பட்ட ரசிகர்கள் கிடைத்தார்கள்.

இதையடுத்தே கோலிவுட்காரர்கள் ஓவியா பக்கம் திரும்பினார்கள். பிக் பாஸ் நிகழ்ச்சிக்கு பிறகு தனக்கு மவுசு அதிகரித்துள்ளதை உணர்ந்த ஓவியா சம்பளத்தை ஒரேயடியாக உயர்த்திவிட்டார் என்று செய்திகள் வெளியாகின. 

"யாரோ வேண்டும் என்றே என்னை பற்றி வதந்தி பரப்புகிறார்கள் . பிக் பாஸ் நிகழ்ச்சிக்கு பிறகு நான் என் சம்பளத்தம உயர்த்தவில்லை. நான் எந்த தயாரிப்பாளரிடமும் எனக்கு இவ்வளவு சம்பளம் தான் வேண்டும் என்று கேட்பது இல்லை' என்கிறார் ஓவியா.

'நான் 'களவாணி 2' படத்தில் நடிக்க அதிக சம்பளம் கேட்டதால்  வேறு ஒரு நடிகையை  கதா நாயகி ஆக்கிவிட்டார்கள் என்று வதந்தி பரப்புகிறார்கள். ஆனால் களவாணி 2 படத்தின் நாயகி நான் தான்' என்று ஓவியா தெரிவித்துள்ளார்.

"என்னை பற்றி பல வதந்திகளை பரப்புகிறார்கள் ; அதில் உண்மை இல்லை. நான் நல்ல கதையை தான் எதிர்பார்க்கிறேன். அதிக சம்பளம் எல்லாம் கேட்பது இல்லை' என்று ஓவியா கூறியுள்ளார்.

சென்னை, பிப்.19- நாளை மறுநாள் புதிய அரசியல் கட்சியின் தொடக்கத்தை அறிவிக்கவிருக்கும் நடிகர் கமல்ஹசான், அரசியலில்ல் தனக்கு மூத்தவர் என்பதால் இன்று நடிகர் விஜயகாந்தை சந்தித்து வாழ்த்துப் பெற்றதாக தெரிவித்தார்.

நடிகர் ரஜினி, திமுக தலைவர் கருணாநிதி ஆகியோரைச் சந்தித்த  கமல், தொடர்ந்து இன்று தேமுதிக தலைவர் விஜயகாந்தை அவரது கோயம்பேடு கட்சி அலுவலகத்தில்  சந்தித்தார். 

ரஜினியை சந்தித்த போது, அது பற்றிக் கருத்துரைத்த கமல்,  அரசியல் பயணம் தொடங்குவதற்கு முன்னர் எனக்கு பிடித்தவர்களிடம் சென்று சொல்லிவிட்டு வருவதாக தெரிவித்திருந்தார். 

இந்நிலையில் விஜயகாந்துடனான சந்திப்பு குறித்து கமல் செய்தியாளர்களிடம் கூறுகையில், சகோதரர் விஜயகாந்த்தை பார்க்க வந்தேன்.அவரை சந்தித்து ரொம்ப காலம் ஆகி விட்டதால், நலம் விசாரிக்க வேண்டிய கடமை உள்ளது என்று குறிப்பிட்டார்.   

"நான் அரசியல் பயணம் துவங்க உள்ளதால் அவரை சந்தித்து அதற்கான அழைப்பை விடுத்தேன். அவர் ஏற்கனவே கூறி உள்ளார், சினிமாவில் வேண்டுமானால் நாங்கள் மூத்தவர்களாக இருக்கலாம். ஆனால் அரசியலில் இருவரும் எனக்கு ஜூனியர்தான் என்று. நீங்களெல்லாம் அரசியலுக்கு வர வேண்டும் என என்னை வாழ்த்தினார்  என்று கமல்ஹசான் சொன்னார்.

 

சென்னை, பிப்.19- அரசியலுக்கு வந்துள்ள நடிகர்கள் ரஜினி, கமல் ஆகிய இருவரையும் மக்கள் நம்ப வேண்டாம் என்று நடிகர் சத்யராஜ் பேசியதற்கு பார்த்திபன் பதிலடி கொடுத்துள்ளார்.

சென்னை சைதாப்பேட்டையில் நடந்த விழாவில் நடிகர் சத்யராஜ் கலந்து கொண்டார். அப்போது அவர் பேசும் போது நடிகர்கள் அரசியலுக்கு வருவது அன்றாட செய்தியாகிவிட்டது. பிரபல நடிகர்கள் என்பதால் அவர்கள் எல்லாம் தெரிந்தவர்கள் என்று மக்கள் நம்பிவிட வேண்டாம். அவ்வாறு நினைப்பது தவறு. அவர்களை யாரும் நம்ப வேண்டாம் என்று கூறினார்.

சத்யராஜின் பேச்சுக்கு பதிலடி கொடுத்து நடிகர் பார்த்திபன் பேட்டி அளித்துள்ளார்.அப்போது அவர் நிருபர்களிடம் கூறியதாவது:-

சென்னையில் ரஜினியும், கமலும் நேரில் சந்தித்துப் பேசி இருப்பது அவர்களின் ஆரோக்கிய அரசியலைக் காட்டுகிறது. அவர்களைச் சினிமாக்காரர்கள் என்று யாரும் எண்ணி ஒதுக்கி விடக்கூடாது.

அவர்கள் நடித்து சம்பாதித்து சேர்த்த பணம் எல்லாம் மக்கள் கொடுத்தது. அந்த பணத்தை வைத்து மக்களுக்கு நல்லது செய்ய நினைக்கிறார்கள். இதனால் அவர்கள் அரசியலுக்கு வந்துள்ளார்கள்.

அவர்களை நம்பலாம். அதற்காக இவருக்கு ஓட்டு போடுங்கள் என்று நான் சொல்லமாட்டேன். நான் யாருக்கு ஆதரவு எனவும் இப்போது சொல்ல மாட்டேன். தேர்தல் வரும் சமயத்தில் அதை தெரிவிப்பேன்.

தமிழகத்தில் ஒவ்வொரு நாளும் மக்கள் பிரச்சனையைச் சந்தித்து கொண்டே இருக்கிறார்கள். தமிழகத்துக்கு உண்டான காவிரி தண்ணீரை குறைத்து விட்டார்கள். மனிதாபிமானத்தோடு தமிழகத்துக்குத் தண்ணீர் தாருங்கள். 

தமிழ்நாட்டில் கொலை- கொள்ளை அதிகரித்து கொண்டே வருகிறது. இதை தடுக்க வேண்டும். தமிழக மக்களின் பிரச்சனைகளைத் தீர்க்காத அரசியல் கட்சியினர் அரசியல் நடத்தி வருவது எதற்கு? இவ்வாறு நடிகர் பார்த்திபன் கூறினார்.

 

 

 

 

 

 

 

 

 

 

 

 

 

 

 

சென்னை,பிப்.18- அரசியல் கட்சி தொடங்கவுள்ள நிலையில் திடீரென ரஜினிகாந்தை நடிகர் கமலஹாசன் சந்தித்திருப்பது பரபரப்பை ஏற்படுத்தியுள்ளது. 

சினிமாவில் கோலோச்சும் ரஜினிகாந்தும் கமலஹாசனும் திடீரென அரசியல் களத்தில் குதித்துள்ளனர். கமல்ஹாசன் வரும் 21ஆம் தேதியன்று கட்சி பெயரை அறிவிக்கிறார். அத்துடன் அடுத்தடுத்து பொதுக்கூட்டங்களையும் கமலஹாசன் நடத்துகிறார். 

அதே போல் ரஜினிகாந்தும் அரசியல் கட்சி தொடங்குவதற்காக ஆயத்த பணிகளில் ஈடுபட்டு வருகிறார். வரும் 20 ஆம் தேதி ரசிகர்களைச் சந்திக்க இருக்கிறார் ரஜினிகாந்த். 

இந்நிலையில் திடீரென ரஜினிகாந்தை கமலஹாசன் இன்று சந்தித்துப் பேசினார். தனித்தனியே பயணிக்கும் ரஜினிகாந்தையும் கமலஹாசனையும் இணைக்கும் முயற்சிகளிலும்  சிலர் ஈடுபட்டுள்ளனர். ஆனால் இருவரும் தனித்தனியே அரசியல் பயணம் செய்யவே இதுவரை விரும்புகின்றனர். 

இந்நிலையில், திடீரென ரஜினிகாந்தை கமலஹாசன் சந்தித்திருக்கிறார். இச்சந்திப்பு மூலம் இருவரும் அரசியல் கூட்டணி அமைக்க வாய்ப்பிருப்பதாக கூறப்படுகிறது. ஆனால் இதை இருவரது ரசிகர்கள் ஏற்பார்களா? என்கிற கேள்வியும் எழுந்துள்ளது.

 

 

 

 

More Articles ...