பருவநிலை மாற்றம்: இந்தியாவில் கடும் பஞ்சம் வரும்! -பகீர் தகவல்

பிற மாநிலங்கள்
Typography

புதுடில்லி, ஆக.19- இந்தியாவில் மாறிவரும் பருவநிலை மாற்றத்தால் விவசாயம் மிக வேகமாக அழிந்து வருகிறது எனவும் அதனால் பல ஆயிரம் கோடி ரூபாய் நஷ்டம் உண்டாவதாகவும் நாடாளுமன்ற நிலைக் குழுவுக்கு, மத்திய வேளாண்மை துறை அறிக்கை சமர்ப்பித்துள்ளது. 

இந்தியாவில் மற்ற நாடுகளை விட பருவநிலையில் மிகப் பெரிய மாற்றம் உண்டாகி வருகிறது. குறிப்பாக, பருவநிலை மாற்றத்தால் பருவம் தப்பி மழை பெய்தல், அதீத கோடை வெயில், வறட்சி, வெள்ளம் என பல்வேறு பேரிடர்களும் உருவாகி வருகின்றன.

இந்நிலையில், மத்திய வேளாண்துறை நாடாளுமன்ற நிலைக்குழுவுக்கு அளித்துள்ள அறிக்கையில் 2100-ஆம் ஆண்டுக்குள் விவசாய உற்பத்தி தற்போது உள்ளதை விட 40 விழுக்காடு குறைந்துவிடும் என கூறியுள்ளது.

தற்போது ஏற்படும் பருவநிலை மாற்றத்தால், பத்து பில்லியன் டாலர் நஷ்டம் உண்டாவதாகவும் தெரிவித்துள்ளது. மேலும், பருவநிலை மாற்றத்தாலும் மாறிவரும் தொழில்நுட்பத்தை மெதுவாக உள்வாங்குவதால் விவசாயமே அழிந்துவிடும் நிலையும் அதனால் மிகப் பெரிய பஞ்சத்தை இந்தியா எதிர்கொள்ளவேண்டிய சூழல் உருவாகும் எனவும் எச்சரித்துள்ளது.

டெல்லியில் உள்ள இந்திய வேளாண்மை ஆராய்ச்சிக் கழக விஞ்ஞானிகள் இது குறித்து கூறுகையில், இந்தியா விவசாயத்தில் இதேபோன்ற அணுகுமுறைக் கையாண்டால் தற்போது உணவு உற்பத்தியில் தன்னிறைவை அடைந்துள்ள நிலைக்கு ஆபத்து உண்டாகும். மேலும் பருவ நிலை மாற்றத்தினால் அதிகம் பாதிக்கப்படுவது இந்தியாதான் எனவும் கூறியுள்ளனர். 

பருவநிலை மாற்றத்தால் உருளை, சோயாபீன்ஸ், வேர்க்கடலை உள்ளிட்ட சில பயிர்களின் உற்பத்தி அதிகரிக்கும் என்றும், மற்ற பயிர்களின் உற்பத்தி மிக சரிவடையும் என்றும் அவ்வறிக்கை கூறுகிறது. 

பருவநிலை மாற்றத்தால் விவசாய விளைபொருட்களின் உற்பத்தி குறையும். அதேபோல் உறபத்தி குறைவைத் தொடர்ந்து அது அனைவருக்கும் எளிதில் கிடைப்பதும் சிரமமாகும். அதனால் வருமானம் அதிகம் இல்லாத ஏழைகள் அதிகமாக பாதிக்கப்படுவர் எனவும் அவ்வறிக்கை எச்சரிக்கிறது. 

BLOG COMMENTS POWERED BY DISQUS