கொல்கத்தா, ஜூலை.14- பேருந்து நிலையத்தில் பிச்சை எடுத்த திருநங்கை ஒருவர் இன்று ‘லோக் அதாலத் நீதிபதி’யாக நியமிக்கப்பட்டிருக்கிறார். மேற்கு வங்கத்தைச் சேர்ந்தவர் ‘ஜோயிதா’, இவர் பள்ளியில் நன்றாக படிக்கும் மாணவியாக இருந்துள்ளார். 

காலப்போக்கில் இவரது உடல் அமைப்பில் மாற்றங்கள் ஏற்பட்டதால், இவரை சக மாணவ, மாணவிகள் கல்லூரியில் கேலி செய்துள்ளனர். இதனால் இவர் தனது கல்லூரி படிப்பை பாதியிலே நிறுத்தி விட்டார்.

திருநங்கை என்று தெரிந்தவுடன் பெற்றோரும், அவமானம் காரணமாக  அவரை வீட்டை விட்டு துரத்திவிட்ட நிலையில், கொல்கத்தாவில் உள்ள ஒரு கால் சென்டரில் வேலை செய்தார். அங்கும் இவரை கேலி செய்து புறக்கணித்ததால், அங்கிருந்தும் வெளியேறினார்.

அதன் பின் பல்வேறு இடங்களுக்கு சென்று வேலை கேட்ட போதும் திருநங்கை என்பதால், வேலை மறுக்கப்பட்டது. வாழ்க்கையில் விரக்தி அடைந்த ஜோயிதா, தெருவில் மற்றவர்களிடம் கையேந்தி பிச்சை எடுக்கும்  நிலைக்கு ஆளானார்.

இந்நிலையில், தினாஜ்பூர் மாவட்ட நீதிமன்றத்திற்கு அருகே உள்ள பேருந்து நிலையத்தில் தங்கி இருந்தபோது, ஒருநாள் ஒரு சமூக சேவகரின் அறிமுகம் கிடைத்தது. இவரின் நிலையை அறிந்த அவர், இவரையும் மக்களுக்கு உதவும் ஒரு  சமூக சேவகராக மாறினார். அதன் பின்னர் சமூகத்தில் ஒடுக்கப்பட்ட திருநங்கைகளுக்காக குரல் கொடுக்க ஆரம்பித்தார்.

அதுமட்டுமின்றி ‘எல்.ஜி.பி.டி.’ எனப்படும் மாற்றுப் பாலினம் கொண்டவர்களுக்காக ‘அமைப்பு’ ஒன்றை துவங்கினார். இந்த அமைப்பின் மூலம் அரசாங்கத்திலிருந்து மாற்றுப்பாலினத்தவர்களுக்கு கிடைக்க வேண்டிய தேவைகளை நிறைவேற்றினார். பாலியல் தொழிலாளிகளாக இருந்து தற்போது எந்தவித ஆதரவும் இல்லாதவர்களுக்கான முதியோர் இல்லத்தையும் உருவாக்கி உள்ளார்.

அவருடைய இந்த சமூக பணிகளுக்காக தினாஜ்பூர் மாவட்டத்தில் உள்ள ‘லோக் அதாலத்’ நீதிமன்றத்தில் நீதிபதி’யாக நியமிக்கப்பட்டிருக்கிறார். நாட்டிலேயே திருநங்கை ஒருவர் இப்பணியில் அமர்த்தப்படுவது இதுவே முதல்முறையாகும்.

திஸ்பூர், ஜூலை.14- இந்தியாவின் வடகிழக்கு மாநிலங்களில் பெய்து வரும் கனமழையால் உயிரிழந்தோர் எண்ணிக்கை 85 ஆக உயர்ந்துள்ளது. மிருகக்காட்சி சாலையில் வெள்ளம் புகுந்ததால் பெரும் சேதம் ஏற்பட்டுள்ளது.

இந்தியாவின் வடகிழக்கு மாநிலங்களான அசாம், அருணாச்சலப்பிரதேசத்தில் பெய்து வரும் வரலாறு காணாத மழையால், பிரம்மபுத்ரா ஆற்றில் கடும் வெள்ளப்பெருக்கு ஏற்பட்டுள்ளது. அசாம் மாநிலத்தின் பல்வேறு இடங்களில் வெள்ளநீர் சூழ்ந்துள்ளதால் பொதுமக்களின் இயல்பு வாழ்க்கை கடுமையாக பாதிக்கப்பட்டுள்ளது. வீடுகள் முழுவதுமாக தண்ணிரில் மூழ்கியுள்ளதால் மக்கள் தங்கள் உடமைகளை முழுவதுமாக இழந்துள்ளனர்.

இந்நிலையில் உயிரிழந்தோர் எண்ணிக்கை 85 பேர் என கணக்கிடப்பட்டுள்ளது. எண்ணிக்கை மேலும் அதிகரிக்கும் எனவும் தெரியவந்துள்ளது. இதனிடையே ‘காசிரங்கா’ தேசிய பூங்காவில் சிக்கித் தவிக்கும் வன விலங்குகளை மீட்கும் பணியும் தொடங்கப்பட்டுள்ளது.

அரியவகை ‘ஒற்றைகொம்பு காண்டாமிருகங்கள்’ இங்கு மட்டுமே பாதுகாக்கப்பட்டு வந்த நிலையில், அவற்றின் நிலை என்ன என்பது தெரியவில்லை. சில மிருகங்கள் மட்டுமே இதுவரை காப்பாற்றப்பட்டிருப்பதாக கூறப்படுகிறது. பூங்கா முழுவதும் தண்ணிர் சூழ்ந்துள்ளதால் மீட்பு பணியில் தாமதம் ஏற்படுவதாக அதிகாரிகள் கூறினர். வெள்ளத்தின் காரணமாக ‘டெங்கு’ உள்ளிட்ட நோய்களும் வேகமாக பரவுவதால் உயிரிழப்புமேலும் அதிகரித்து வருகின்றது. 

இந்நிலையில் அசாம் மற்றும் அருணாச்சலப் பிரதேசம் மாநிலங்களில் வெள்ளம் பாதித்த பகுதிகளை மத்திய உள்துறை இணை அமைச்சர் கிரண் ரஜ்ஜூ ஹெலிகாப்டர் மூலம் பார்வையிட்டார். மேலும் வெள்ள நிவாரணப் பணிகளை விரைந்து மேற்கொள்ள அதிகாரிகளுக்கு அறிவுறுத்தினார்.

 

 திருவனந்தபுரம், ஜூலை.14- தாம் கடத்தப்பட்ட வழக்கு தொடர்பில் நடிகர் திலீப் கைதான விவகாரம் குறித்து நடிகை பாவனா கூறும்போது, சட்டத்தின் முன் அனைவரும் சமம். இந்த வழக்கில் திலீப் குறித்த உண்மைகள் விரைவில் வெளிவரவேண்டும் மற்றும் குற்றவாளிகள் தண்டிக்கப்படவேண்டும் என்று தெரிவித்துள்ளார். 

பாவனாவை கடத்தி பாலியல் தொல்லை கொடுக்கப்பட்ட வழக்கில் நடிகர் திலீப் கைது செய்யப்பட்டார். இந்த வழக்கில் கைதான ரவுடி பல்சர் சுனிலுக்கும் நடிகர் திலீப்புக்கும் இடையே, ஏற்கனவே இருந்த தொடர்பு குறித்து போலீசார் நடத்திய விசாரணையில் பல்வேறு திடுக்கிடும் தகவல் வெளியாகி கேரள மாநிலத்தையே அதிரவைத்துள்ளது.

இந்நிலையில் நடிகை பாவனா, நடிகர் திலீப் கைது குறித்தும் வழக்கு குறித்தும் பரபரப்பு அறிக்கை ஒன்றை வெளியிட்டுள்ளார். அதில் அவர் கூறியிப்பதாவது:

கடந்த சில தினங்களாக இந்த வழக்கில் வெளியிடப்பட்டு வரும் விவரங்களை பார்த்து, உங்களைப் போலவே நானும் அதிர்ச்சி அடைந்தேன். அந்த நடிகருடன் கடந்த காலங்களில் சில படங்களில் நான் இணைந்து நடித்து இருக்கிறேன். 

ஆனால், தனிப்பட்ட பிரச்சினைகள் காரணமாக எங்களுக்கு இடையேயான நட்பு பாதிக்கப்பட்டது. தனிப்பட்ட காரணங்களுக்கான இந்த வழக்கில் நான் யாரையும் குற்றவாளியாக்க விரும்பவில்லை. அவருக்கு எதிராக அனைத்து ஆதாரங்களும் இருப்பதாக நான் ஊடகங்கள் வாயிலாகவே தெரிந்து கொண்டேன். 

அவரது சகோதரர் ‘அனுப்’ கூறியது போல அவர் குற்றமற்றவர், இந்த வழக்கில் சிக்க வைக்கப்பட்டு இருக்கிறார் என்றால் உண்மை விரைவாக வெளி வரவேண்டும். அப்படி இல்லையென்றால் அவரது தவறுகள் விரைவில் வெளியே வரவேண்டும் என விரும்புகிறேன்.

சட்டத்தின் முன் அனைவரும் சமம். குற்றவாளிகள்  யாரும் தப்பித்துவிடக் கூடாது. அந்தக் குறிப்பிட்ட நடிகருடன், நான் ‘ரியல் எஸ்டேட்’ மற்றும் பிற முதலீடுகளில் கூட்டு வைத்திருப்பதாக சில தகவல்கள் வருகின்றன. அவை அனைத்தும் பொய்யாகும். அத்தகைய உண்மையற்ற செய்திகள் விரைவில் மறைந்துவிடும் என நினைத்தேன். ஆனால், அவை மீண்டும் மீண்டும் ஊடகங்களில் வருகின்றன. 

அதனால்தான் அதுபற்றி நான் தெளிவுபடுத்த விரும்புகிறேன். வேண்டுமென்றால், தேவைப்படும் எல்லா ஆவணங்களையும் விசாரணை அதிகாரிகளிடம் வழங்கவும் தயாராக உள்ளேன். இவ்வாறு நடிகை பாவனா அந்த அறிக்கையில் கூறியுள்ளார்.

டில்லி, ஜூலை.13- லண்டன் சர்வதேச ஏல மையத்தில், பென்சிலால் வரையப்பட்ட மகாத்மா காந்தியின் “பென்சில் ஓவியம்” ரூ.27 லட்சத்துக்கு ஏலம் போனது. 

இந்தியாவின் விடுதலைக்காக ‘அகிம்சை’ முறையில் ஆங்கிலேயரை எதிர்த்து போராடிய காலம் அது. அப்போது இந்திய தேசம் மட்டுமல்லாது, இங்கிலாந்திலும் காந்தி பிரபலமாகி இருந்தார். அவரின் சுதந்திர போராட்ட அணுகுமுறை அனைவராலும் கவரப்பட்டிருந்தது.

இந்நிலையில் 1931 ஆம் ஆண்டு பிரிட்டனில் நடைபெற்ற ‘வட்டமேசை’ மாநாட்டில் கலந்து கொள்ள காந்தி அழைக்கப்பட்டிருந்தார். அப்போது அங்கு சென்றிருந்த காந்தியை சந்தித்த ஜான் ஹென்றி என்பவர், ‛உண்மையின் கடவுள்' என்ற தலைப்பில் வரைந்த இந்த வரலாற்று சிறப்பு மிக்க ஓவியம் தான், ரூபாய் 27 லட்சத்திற்கு ஏலம் போனது.

தற்போது நடந்த லண்டன் சர்வதேச ஏல மையத்தில் காந்தியின் ‘பென்சில்  ஓவியம்’ ஏலத்துக்கு வந்தது. காந்தி மீது பற்று கொண்ட ஒருவர் இந்த ஓவியத்தை 32 ஆயிரத்து 500 பவுண்டுக்கு ஏலம் எடுத்தார். இதன் மதிப்பு சுமார் ரிம.2 லட்சம் ஆகும்.

லக்னோ, ஜூலை.12- திருமணம் செய்து கொள்ள இருந்த இருவர் பிரதமர் மோடியின் பொருளாதார கொள்கை குறித்து பேச போக இறுதியில் கருத்து வேறுபாடு காரணமாக அவர்களின் திருமணம் நின்றது. 

உத்தரபிரதேசத்தில் இளம் தொழிலதிபருக்கும், அரசு பணியாளருக்கும் குடும்பத்தாரால் திருமணம் நிச்சயம் செய்யப்பட்டிருந்தது. திருமண ஏற்பாடுகள் குறித்து முடிவு செய்ய இரு குடும்பத்தினரும் கலந்து பேச விரும்பினர். அதன்படி ஒரு கோவிலில் சந்தித்தனர். பொருளாதார மந்த நிலை குறித்த விவாதம் எழும் வரை, திருமணம் குறித்த பேச்சுவார்த்தை சுமூகமாகவே நடந்தது.

நாட்டில் நிலவும் பொருளாதார மந்த நிலைக்கு பிரதமர் மோடிதான் காரணம் என்று மணமகள் காட்டமாக விமர்சனம் செய்ததும், அதை ஒப்புக்கொள்ளாத மணமகன், மோடி இதற்கு காரணமில்லை, உலக பொருளாதார மந்த நிலையே காரணம் என்று பதில் கருத்து சொன்னதில் இருந்து விவாதம் சூடேறியது. 

இதனால் குடும்பத்தினர் பதறிபோயினர். சமாதானம் செய்ய முயற்சித்தனர். ஆனால் சமாதானம் ஆகாததால் இருவரும் திருமணத்தை நிறுத்தச்சொல்ல, குடும்பத்தினர் அதிர்ந்து போயினர். வேறு வழியில்லாமல் குடும்பத்தினர் திருமணத்தை நிறுத்தியதாகவும் செய்தி வெளியாகியுள்ளது.

இளைஞர்களுக்கு அரசியல் தெரியாது. அரசியல் புரியாது என்றெல்லாம் பொது தளத்தில் கருத்து சொல்லப்படுகிறது. ஆனால் அதையெல்லாம் பொய்யாக்கும் வகையில் உத்தரபிரதேசத்தில் திருமணம் நிறுத்தப்பட்ட சம்பவம், அரசியல் அறிவு பெற்ற விவாதத்தினாலேயே நடந்துள்ளது என்பது முக்கியமாக கவனிக்கப்பட வேண்டிய ஒன்றாகும். 

திருவனந்தபுரம், ஜூலை.12- நடிகை பாவனா கடத்தல் வழக்கில் நடிகர் திலீப் கைது செய்யப்பட்டுள்ள நிலையில், அவரது மனைவி நடிகை காவ்யா மாதவனும் அதற்கு உடந்தையாக இருந்துள்ளார் தெரிகிறது. அவரை கைது செய்ய நடவடிக்கை எடுக்கப்பட்டுள்ள நிலையில் அவர் தலைமறைவாகி விட்டார்.       

பிரபல மலையாள நடிகை பாவனா, கடந்த பிப்ரவரி மாதம் படப்பிடிப்பு முடிந்து கொச்சிக்கு காரில் சென்ற போது அவரை ஒரு கும்பல் கடத்தி பாலியல் வன்கொடுமை செய்ததுடன், செல்போனிலும் படம் பிடித்தது.

இந்த சம்பவத்தில் பிரபல ரவுடி பல்சர் சுனில், பாவனாவின் கார் ஓட்டுனர் மார்ட்டின் உட்பட 7 பேரைப் போலீசார் கைது செய்தனர். அவர்களிடம் தொடர்ந்து நடத்தப்பட்ட விசாரணையில், இந்த சம்பவத்தில் நடிகர் திலீப்புக்கு தொடர்பு இருப்பது கண்டுபிடிக்கப்பட்டது.

இதனை அடுத்து, திலீப்பை நேற்று போலீசார் கைது செய்யப்பட்டு, சிறையில் அடைக்கப்பட்டார்.

மேலும் பல்சர் சுனில் சிறையிருந்து செல்போனில் பேசியபோது, பாவனாவின் மானபங்க வீடியோ காவ்யா மாதவன் நிறுவனத்தில் பணியாற்றும் நபரிடம் ஒப்படைக்கப்பட்டதை உறுதி செய்திருந்தார். இதைத் தொடர்ந்து அங்கே போலீசார் சோதனை நடத்தியதில் பல ஆதாரங்கள், ஆவணங்கள் கைப்பற்றப்பட்டன.

இந்நிலையில், இச்சம்பவத்துக்கு உடந்தையாக இருந்த குற்றச்சாட்டில், திலீப்பின் இரண்டாவது மனைவியும், நடிகையுமான காவ்யா மாதவைனையும் கைது செய்ய போலீசார் முடிவு செய்துள்ளனர். ஆனால், போலீசார் தேடுவதை அறிந்ததும் காவ்யா தலைமறைவாகி விட்டார். 

ஹைதராபாத், ஜூலை.4- நான்கு வயது சிறுத்தை ஒன்று மின்சார கம்பத்தில் ஏறியபோது மின்சாரம் தாக்கி உயிரிழந்த சம்பவம் பெரும் இங்கு பெரும் பரபரப்பை ஏற்படுத்தியுள்ளது.    

தெலுங்கானா மாநிலம் மல்லாரம் கிராமத்தில் மின்கம்பத்தில் தொங்கிய படி இறந்து கிடந்த சிறுத்தையைப் பார்த்த பொது மக்கள் வனத்துறை அதிகாரிகளுக்கு தகவல் தெரிவித்தனர். சம்பவ இடத்திற்கு விரைந்து வந்த அதிகாரிகள் சிறுத்தையை மீட்டு பிரேத பரிசோதனைக்கு அனுப்பி வைத்தனர்.

வனத்துறை அதிகாரிகள் கூறும்போது, சிறுத்தை மின் கம்பத்தில் ஏறியதால் தான் மின்சாரம் தாக்கி  இறந்துள்ளது எனவும் ஆனால் ஏறியதற்கான காரணத்தை தெளிவாக கண்டறிய முடியவில்லை என்றும் கூறியுள்ளார். மேலும் சிறுத்தையிடம் மரம் ஏறி தனக்கான உணவை நோட்டம் விடும் பழக்கம் உள்ளதாகவும் அதுபோல மின் கம்பத்ததில் ஏறி இருக்கலாம் எனவும் கூறினர்.

சிறுத்தையை பிரேத பரிசோதனை செய்த மருத்துவர்கள் கூறும்போது, சிறுத்தை வேட்டையாடப்பட்டு கொல்லப்பட்டதற்கான அடையாளங்கள் எதுவும் இல்லை எனவும் மின் கம்பத்தை தவறுதலாக சிறுத்தை கடித்ததால் மின்சாரம் தாக்கி உயிரிழந்ததாகவும் கூறியுள்ளனர். 

ஜெய்ப்பூர், ஜூலை.3- ராஜஸ்தானில் உள்ள டோல்பூர் என்ற கிராமத்தில் பெண்கள் ஜீன்ஸ் அணியவும் கைப்பேசி பயன்படுத்தவும் தடை விதித்து ஊர் பெரியவர்கள் பஞ்சாயத்தில் முடிவெடுத்துள்ளனர். இது தற்போது சர்ச்சையாக உருவெடுத்துள்ளது.

பெண்கள் அணியும் இறுக்கமான ஜீன்ஸ் போன்ற உடைகள் ஆண்களை ஈர்ப்பதாகவும் அதனால் பாலியல் குற்றங்கள் அதிகரித்து வருவதாகவும் குற்றஞ்சாட்டி இனி கிராமத்து பெண்கள் ஜீன்ஸ் அணிய பஞ்சாயத்து தலைவர்கள் தடை விதித்துள்ளனர்.

முன்னதாக, கஷ்வாஷ் இனத்தைச் சேர்ந்த 2000 பேர் வசிக்கும் இந்த கிராமத்தில் மதுப்பழக்கத்தை ஒழிப்பதற்காகவும் தீர்மானம் போடப்பட்டுள்ளது. கிராமத்தில் யாரேனும் மது அருந்தினால் ரூ.1,100 அபராதமும் மது அருந்துவோர் பற்றி யாரேனும் புகார் கொடுத்தால் அவர்களுக்கு ரூ.500 சன்மானம் வழங்கப்படும் என்றும் அறிவிக்கப்பட்டுள்ளது. மேலும் அனைத்து கடையிலும் புகையிலைப் பொருட்கள் விற்பனைச் செய்ய தடை விதிக்கப்பட்டுள்ளது.

உயிருக்கு ஆபத்து விளைவிக்கும் மதுக்கும் புகைக்கும் தடை விதித்தது சரி.. ஆனால்.. பெண்களின் உரிமையான ஆடை விசயத்தில் ஏன் கை வைத்தீர்கள் என்று இவர்களுக்கு எதிராக கருத்துகள் வெளிவர துவங்கியுள்ளன.

டெல்லி, ஜூலை.3- ஏர் இந்தியா விமானத்தில் குளிர்சாதனம் சரியாக இயங்காததால் சுவாசிக்க முடியாமல் பயணிகள் கடும் அவஸ்தைக்கு ஆளாகினர். சம்பவம் தொடர்பில் ஏர் இந்தியா ஊழியர்கள் ஒன்றும் தெரியாதது போல் நடந்து கொண்டதாக அவர்கள் குற்றம் சாட்டினர்.

மேற்கு வங்கத்திலிருந்து ஏர் இந்தியா விமானம் ஒன்று டெல்லி நோக்கி நேற்று புறப்பட்டது. அதில் 168 பயணிகள் பயணித்தனர். விமானம் புறப்படுவதற்கு முன்னமே குளிர்சாதனம் சரியாக இயங்காதது குறித்து பயணிகள் பணிப்பெண்களிடம் கூறியுள்ளனர். 

   ### காணொளி: நன்றி ETV Andhra Pradesh 

இருப்பினும், சற்று நேரத்தில் அது சரியாகிவிடும் என்று பணிப்பெண்கள் கூறியுள்ளனர். ஆனாலும், ஏசி சரி செய்யப்படவில்லை. இதனால் பயணிகள் சுவாசிக்க மிகவும் சிரமப்பட்டனர். சில பயணிகளுக்கு பிராணவாயு கருவிகளும் பொருத்தப்பட்டன. 

விமானத்தில் உள்ளே வெப்பத்தினால் வியர்வை சொட்ட சொட்ட பயணித்த பயணிகள் ஒரு கட்டத்தில் இருக்கையில் இருந்த நாளிதழ்களைக் கொண்டு விசிறியபடியே பயணம் செய்தனர். இதனை பயணி ஒருவர் காணொளியாக எடுத்து ஊடகத்தில் வெளியிட்டார். 

ஐதராபாத், ஜூன் 23- தெலுங்கானாவில் 2 வயது குழந்தை ஒன்று ஆழ்துளை கிணற்றில் தவறி விழுந்தது.அக்குழந்தையை உயிருடன் மீட்க, மீட்பு குழுவினர் போராடி வருகின்றனர்.

தெலுங்கானாவில் உள்ள ரெங்காரெட்டி என்ற இடத்தில் குடி தண்ணிர் இல்லாமல் வறட்சி நிலவுகிறது. அங்கு பெரும்பாலும் 100 அடி வரைக்கும் சிறிய அளவிலான ஒரு துளை இட்டு, அதன் மூலம் குழாய் வழியாக தண்ணிரை வெளியே எடுத்து குடிநீராக பயன்படுத்துவது வழக்கம்.

அப்படி அமைக்கப்பட்ட 60 அடி ஆழ்துளை கிணறு ஒன்று பயன்படுத்தாத நிலையில், மூடப்படாமல் இருந்தது. அப்போது அங்கு விளையாடிக் கொண்டிருந்த 2 வயது குழந்தை, அந்த ஆழ்துளை கிணற்றுக்குள் தவறி விழுந்துவிட்டது. தகவல் அறிந்து சம்பவ இடத்திற்கு வந்த மீட்பு படையினர் குழந்தையை உயருடன் மீட்க போராடி வருகின்றனர். 

இதுபோல ஒரு சம்பவம் கடந்த ஆண்டு உத்திரபிரதேச மாநிலம் லக்னோவிலும் நடந்துள்ளது. அதில் 110 அடி ஆள்துளை கிணற்றில் கவுஷி என்ற 1 வயது குழந்தை தவறி விழுந்தார். சம்பவம் அறித்த மீட்பு படையினர் குழந்தையை போராடி மீட்டு மருத்துவமனைக்கு கொண்டு சென்றனர். ஆனால், அக்குழுந்தை மருத்துவமனைக்கு கொண்டு வருவதற்கு முன்னரே இறந்துவிட்டதாக டாக்டர்கள் கூறினர். இதில், குழந்தை பலிக்கு காரணமான ஆள்துளை கிணற்றின் உரிமையாளர் மீது வழக்கு தொடரப்பட்டது என்பது குறிப்பிடத்தக்கது.

 புதுச்சேரி, ஜூன்.21 - புதுச்சேரி முதல்வர் நாராயணசாமியின் காரில் தேசியக்கொடி தலைகீழாக பறந்த விவகாரம் தொடர்பாக அவரது கார் ஓட்டுனர்  பணி இடைநீக்கம் செய்யப்பட்டுள்ளார்

புதுச்சேரி முதல்வராக காங்கிரஸ் கட்சியைச் சேர்ந்த நாராயணசாமி பணியாற்றி வருகிறார். இந்நிலையில் இவர் சென்னை விமான நிலையத்துக்கு நேற்று வந்திருந்தார். அவரது காரைத் தொடர்ந்து பாதுகாப்பு படையினர், அரசு அதிகாரிகள் மற்றும் காங்கிரஸ் கட்சி நிர்வாகிகளின் வாகனங்களும் பின் தொடர்ந்து வந்தன.

 பின்னர் காரில் இருந்து இறங்கிய நாராயணசாமி அங்கிருந்த புறப்பட்டுவிட்டார். அப்போது அவரின் காரின் முன் பக்கத்தில் தேசியக் கொடி தலைகீழாகப் பறந்து கொண்டிருந்தது. இதைப்பார்த்த அங்கிருந்தவர்கள் அதிர்ச்சி அடைந்தனர். 

சிலர் இக்காட்சியை புகைப்படம் எடுத்து சமூக வலைதளங்களுக்கு அனுப்பினர். பின் சமூக வலைதளங்களில் மிகவும் வைரலாக பரவி மக்களிடையே சர்ச்சையை ஏற்படுத்தியது. இதனால், புதுச்சேரி முதல்வர் நாராயணசாமியின் கார் ஓட்டுனரான தற்காலிகமாக பணிநீக்கம் செய்யப்பட்டார். 

More Articles ...