புதுடில்லி, மார்ச் 7- தான் அடிமைப்போல் நடத்தப்படுவதாக இராணுவ வீரர் ஒருவர் சமூக வலைத்தளத்தில் புகார் கூறியிருப்பது இராணுவ உயர் அதிகாரிகளை அதிர்ச்சியடைய செய்துள்ளது. இது தொடர்பாக அதிகாரிகள் விசாரணை மேற்கொண்டு வருகின்றனர்.

அண்மையில் இராணுவ வீரர்களுக்கு மோசமான உணவு வழங்கப்படுவதாக வீரர் ஒருவர் சமூக வலைத்தளத்தில் புகார் காணொளி செய்திருந்தார். அதன் பரபரப்பு அடங்கி இருக்கும் நிலையில், மற்றொரு இராணுவ வீரர் தற்போது புதிய காணொளியை வெளியிட்டுள்ளார். 

சிந்தவ் ஜோகிதாஸ் என்பவர் தனது சமூக நல வலைத்தளத்தில் வெளியிட்ட காணொளியில் தான் அடிமைப் போல நடத்தப்படுவதாக புகார் கூறியுள்ளார். "நான் எனது விடுமுறையை இரண்டு நாள் நீட்டிதற்காக எனக்கு கடுமையான தண்டனை அளிக்கப்பட்டது. என்னைக் காவலில் வைத்தனர். அடிமைப்போல நடத்தினர். போதிய உணவு வழங்கப்படவில்லை. உதவி கேட்டு பிரதமர் மற்றும் பாதுகாப்பு அமைச்சகத்திடம் கடிதம் அனுப்பினேன். ஆனாலும் எந்த உதவியும் கிடைக்கவில்லை" என அவர் கூறியுள்ளார்.

வீரரின் புகார் குறித்து விசாரணை நடத்தும்படி, ராணுவம் உத்தரவிட்டுள்ளது. இது குறித்து பேசிய இராணுவ அதிகாரிகள், ஜோகிதாஸ் தொடர்ச்சியாக தவறு செய்து வந்ததாகவும் அதற்காக அவர் பணியிலிருந்து இடைநீக்கம் செய்யப்பட்டவர் என்றும் கூறினர்.  

ஶ்ரீ நகர், மார்ச் 4- ஜம்மு, காஷ்மீர் மாநிலத்தின்  புல்வாமா மாவட்டத்தின் முரான் சவுக் எனும் பகுதியில் மத்திய ரிசர்வ் போலீஸ் படையினர் பாதுகாப்புப் பணியில் ஈடுபட்டிருந்தபோது,  அங்கு வந்த தீவிரவாதிகள், திடீரென பாதுகாப்புப் படையினர் மீது கையெறி குண்டுகளை வீசி தாக்குதல் நடத்தினர்.

இந்த தாக்குதல் சம்பவத்தில் அப்பகுதியைச் சேர்ந்த ஒருவர் பலத்த காயங்களுக்கு இலக்காகி சம்பவ இடத்திலேயே உயிரிழந்தார். அதே வேளையில், தல்ஜித் கிரண் என்பவர்  காயம் அடைந்தார். 

கொல்கத்தா, மார்ச் 3- துரித உணவு பிரியர்களே, வாங்கி சாப்பிடும் முன் கொஞ்சம் பார்த்து சாப்பிடுங்கள் என்கிறார் துரித உணவில் பொரித்த கிழங்கோடு 'பொரிந்து வந்த பல்லியைப்' பார்த்த கர்ப்பிணிப் பெண்.

"நான் நான்கு மாத கர்ப்பிணி. ஆசையாக இருக்கிறது என்று 'மெக்டோனால்ட்' சென்றேன். எனக்கு பிடித்த பொரித்த கிழங்கை சாப்பிட்டுக் கொண்டிருக்கும்போது அதில் கருகிய நிலையில் ஏதோ ஒன்று கிடந்தது. எடுத்து பார்த்தால் அது கிழங்கோடு பொரிந்து கிடந்த பல்லி" என்றார் பிரியங்கா மித்ரா. 

கடந்த செவ்வாய்க்கிழமை கொல்கத்தாவில் இஎம் பைபாஸ் என்ற இடத்தில் மெக்டி துரித உணவு சாப்பிட சென்ற நான்கு மாத கர்ப்பிணியான பிரியங்காவிற்கு ஏற்பட்ட நிலை தான் இது. 

"பல்லி என்றாலே அலர்ஜி. அது நான் சாப்பிடும் உணவில் உணவோடு உணவாக.. நினைக்கும்போதே குமட்டுகிறது" என்றார் அவர். பல்லி கிடப்பதைப் பார்த்த கையோடு கதறி எழுந்து கழிவறைக்கு ஓடியவர் சாப்பிட்டதை வாந்தி எடுக்க முயன்றார்.

"உணவில் பல்லி என்றதும் எனக்கு நினைவிற்கு வந்ததெல்லாம் என் கருவில் இருக்கும் குழந்தை தான். என் குழந்தைக்கு ஏதாவது ஆகிவிடுமோ என்று பயந்தேன். உடனே மகப்பேறு டாக்டரிடம் சென்று சோதனைச் செய்தேன்" என்றார் பிரியங்கா.

பல்லி இருந்த உணவினை தனது தொலைபேசியில் படம் பிடித்துக் கொண்ட பிரியங்கா, அது குறித்து போலீசில் புகார் செய்துள்ளார். துரித உணவகத்திலிருந்து தனக்கு அழைப்பு வந்ததாகவும் பிரச்சனை குறித்து நடவடிக்கை எடுப்பார்கள் என்று நினைத்தால், ஒருவேளை சாப்பாடு தருவதாகவும் குழந்தைக்கு பிறந்தநாள் கொண்டாட்டம் நடத்த இடம் தருவதாகவும் கூறி பிரச்சனையை இத்தோடு முடித்துக் கொள்ளும்படி பேசியதாக பிரியங்கா கூறினார். ஆனால், தாம் அதனை ஏற்காமல் போலீசில் புகார் செய்ததாக அம்மாது மேலும் கூறினார்.  

சாப்பாடு பிரியர்களே, கொஞ்சம் கண் விழித்து சாப்பிட்டு பிழைத்து கொள்ளுங்கள்... 

டெல்லி,  மார்ச் 3- டெல்லியில், 60 வயது மதிக்கத்தக்க பெண் ஒருவர் கடும் வயிற்று  வலியால் மருத்துவமனையில்  அனுமதிக்கப்பட்டார். கடுமையான வயிற்று வலி மற்றும் காய்ச்சலால் பாதிக்கப்பட்டிருந்த அவருக்கு புற்றுநோய் கட்டி ஏற்பட்டிருக்கலாம் என முதலில் மருத்துவர்கள் கருதினர்.  இதையடுத்து அந்தப் பெண்ணின் வயிற்றுப் பகுதியில் சி.டி ஸ்கேன் எடுத்து பார்க்கப்பட்டது.

அப்போது, அவரது பித்தப்பையில் சிறு சிறு கற்கள் தேங்கி இருப்பது கண்டுபிடிக்கப்பட்டது. 

இதனையடுத்து, லேப்ராஸ்கோப்பி முறையில் கற்களை அகற்ற மருத்துவர்கள் முடிவு செய்தனர் . அப்பெண்ணின் வயிற்றுப் பகுதியில் சிறு துளையிட்டு லேப்ராஸ்கோபிக் கருவி மூலம் பித்தப்பையில் இருந்த கற்கள் அகற்றப்பட்டன. 

இந்த சிகிச்சையின் போது, கருமை நிறத்திலான   838 கற்கள் அகற்றப்பட்டன.இந்த அறுவை சிகிச்சை மொத்தம் 2 மணி நேரம் நீடித்தது. 

இது குறித்து கருத்து தெரிவித்த மருத்துவர்கள்  "உணவில் கொழுப்புச் சத்து, மற்றும் கால்சியம் உப்பு அதிக அளவில் கலந்து அவைக் கரையால் கற்களாகத் தேங்குகின்றன. இந்த கற்கள் தான் கேன்சராக மாறுகின்றன. பித்தப்பையில் கற்கள் தேங்கினால் மஞ்சள் காமாலை, நோய் தொற்று, கணையம் பாதிப்பு போன்றவை ஏற்படலாம்" என தெரிவித்தனர். 

திருப்பதி, மார்ச் 3- ரூ.500 மற்றும் ரூ1000 செல்லாத நோட்டுகளை வைத்திருக்ககூடாது என மத்திய அரசு உத்தரவிட்டுள்ள நிலையில், திருப்பதி தேவஸ்தானத்திற்கு இக்கட்டான நிலை ஏற்பட்டுள்ளது. 

ஆளும் அரசு உத்தரவு போட்டால் என்ன எங்கள் பணத்தை ஆண்டவனிடன் தருகிறோம் என்பது போல பலே கில்லாடி பக்தர்கள் காணிக்கையாக செலுத்திய பணம் ஏறக்குறைய ரூ.4 கோடி என்கிறது தேவஸ்தானம்.

கடந்த ஆண்டு நவம்பர் மாதம் ரூ.500 மற்றும் 1000 நோட்டுகள் செல்லாது எனவும் அவற்றை டிசம்பர் 31ம் தேதிக்குள் மாற்றி விடவேண்டும் எனவும் பிரதமர் மோடி அறிவித்தார். இந்நிலையில், கடந்த இரண்டு மாதங்களில் மட்டும் திருப்பதி உண்டியலில் பக்தர்கள் போட்ட காணிக்கையில் ரூ.4 கோடி செல்லாத நோட்டுகள் என தேவஸ்தானம் கூறியுள்ளது.

இதனை எப்படி மாற்றுவது என தேவஸ்தானம் குழம்பி போயுள்ள நிலையில், அவற்றை புதிய நோட்டுகளாக மாற்றி தருமாறு ரிசர்வ் வங்கிடம் கடிதம் எழுதியுள்ளதாக கூறியுள்ளது. 

பெங்களூரு, மார்ச் 2- அரசியல் தலைவர்களும் பிரமுகர்களும் மட்டும் பயன்படுத்தும் வகையில் இரும்பு மேம்பாலம் கட்டப்படுவதைக் கண்டித்து பொதுமக்கள் நடத்தியதை அடுத்து கட்டுமான பணிகள் நிறுத்தப்பட்டதாக கர்நாடக அரசு அறிவித்துள்ளது.

பெல்லாரிலிருந்து கேம்பிகவுடா விமான நிலையம் வரை ரூபாய் 2100 கோடி செலவில் இரும்பு மேம்பால ஒன்று கட்டப்பட்டு வந்தது. இந்த மேம்பாலம் அரசியல் தலைவர்களும் முக்கிய தலைவர்கள் மட்டுமே போக்குவரத்து தடையின்றி பயணிக்க கட்டப்பட்டு வந்தது. 

இத்திட்டத்தில் பல கோடி அளவிற்கு ஊழல் நடந்ததாகவும் புகார்கள் எழுந்தன. மேலும், கட்டுமான பணிகளுக்காக வழிபாதையில் இருந்த ஏறக்குறைய 800 மரங்களையும் வெட்ட திட்டமிடப்பட்டிருந்தது. இந்நிலையில், இத்திட்டத்தை எதிர்த்து மொதுமக்கள் ஆட்சேபம் தெரிவித்தனர்.

இதற்கு மாநில அரசு மதிப்பளிக்காத நிலையில் பொதுமக்கள் தொடர் போராட்டங்களில் இறங்கினர். வீதி ஆர்பார்ட்டங்கள் தீவிரமடைந்தது. இதனால், மாநில அரசுக்கு அடுத்த தேர்தலில் பெரும் பாதிப்பு ஏற்படும் என காங்கிரஸ் தலைவர்கள் முதல்வர் சித்திராமையாவிடம் தெரிவித்துள்ளனர். 

இதனையடுத்து, இரும்பு மேம்பால பணிகள் நிறுத்தப்படுவதாக கர்நாடக அரசு அறிவித்தது. இது மக்களின் போராட்டத்திற்கு கிடைத்த வெற்றியாக ஊடகங்கள் தெரிவித்தன. 

புதுடில்லி, மார்ச்.1- டில்லியின் பல பகுதிகளில் வெடிகுண்டு வைக்கப்பட்டுள்ளதாக தொலைபேசி அழைப்பு வந்ததை அடுத்து நகர் முழுதும் பாதுகாப்பு பலப்படுத்தப்பட்டுள்ளது. டில்லி முழுதும் விழிப்பு நிலையில் போலீசார் பணியில் ஈடுப்பட்டுள்ளனர்.

வெடிகுண்டு வைக்கப்பட்டுள்ளதாக டில்லி போலீசாருக்கு அனாமதேய தொலைபேசி அழைப்பு ஒன்று வந்தது. அதில் பேசிய மர்ம நபர், டில்லி முழுதும் பல இடங்களில் சக்தி வாய்ந்த வெடிகுண்டுகள் வைக்கப்பட்டுள்ளதாக கூறியுள்ளான். போலீசார் மேல் விவரங்களைக் கேட்டப்போது அந்த மர்ம நபர் தொலைபேசி அழைப்பைத் துண்டித்து விட்டதாக போலீசார் கூறினர். 

இதனை அடுத்து, டில்லி முழுதும் போலீசார் விழிப்பு நிலையில் இருக்குமாறு உத்தரவிடப்பட்டது. பஸ் நிலையங்கள், பேரங்காடிகளில் வெடிகுண்டு சோதனை நடத்தப்பட்டது. பொது இடங்களில் போலீசார் பாதுகாப்பு பணியில் தீவிரமாக ஈடுப்பட்டனர். 

இந்நிலையில், சம்பந்தப்பட்ட தொலைபேசி அழைப்பு புரளியாக கூட இருக்கலாம் என போலீசார் கருதுகின்றனர். எனவே, அழைப்பு வந்த எண்ணைக் கொண்டு பேசிய நபர் யார் என்று குற்றப்பிரிவு போலீசார் விசாரணை மேற்கொண்டு வருகின்றனர். 

டெல்லி, பிப்ரவரி 27-  டெல்லியில் சனிக்கிழமை மதியம், அடுக்குமாடி குடியிருப்பு பகுதியில், சலவை இயந்திரத்தில் சிக்கி இரு இரட்டைக் குழந்தைகள் பலியான சம்பவம் பரபரப்பை ஏற்படுத்தியுள்ளது. 

அந்த அடுக்குமாடி குடியிருப்பில் ராக்கி மற்றும் ரவீந்திரன் தம்பதியர் தங்களின் 3 வயது இரட்டைக் குழந்தைகளுடன் வசித்து வந்தனர்.   சம்பவத்தின் போது இரட்டைக் குழந்தைகளான லஷ் மற்றும் நீஷா  இருவரும் குளியலறை பக்கம் விளையாடிக் கொண்டிருந்துள்ளனர். அப்போது ராக்கி சலவை இயந்திரத்தில் 15 லிட்டர் தண்ணீரை நிரப்பி விட்டு, சலவைத் தூள் வாங்குவதற்காகக் கடைக்குச் சென்றுள்ளார். 

மீண்டும் திரும்பியதும்  குழந்தைகள் வீட்டில் இல்லாததைக் கண்டு ராக்கி அதிர்ச்சியடைந்துள்ளார்.  உடனடியாக தமது கணவரைத் தொடர்பு கொண்டு விபரம் தெரிவித்ததும், உடனடியாக அடுத்த 10-வது நிமிடத்தில் வீட்டுக்கு வந்த அவரும் குழந்தைகளைத் தேடியுள்ளார். 

இந்நிலையில், இரவு 11 மணியளவில் சலவை இயந்திரத்தில் போட்ட துணிகளை எடுக்கும் போது, தலை தொங்கிய நிலையில் குழந்தைகள் கிடந்ததைப் பார்த்து பெற்றோர்கள் அதிர்ச்சியடைந்தனர்.  

உடனடியாக குழந்தைகளைப் பெற்றோர்கள் மருத்துவமனைக்குத் தூக்கிச் சென்றனர். ஆனால்  குழந்தைகள் நீரில் மூழ்கி ஏற்கெனவே இறந்துவிட்டதாக மருத்துவர்கள் தெரிவித்தனர். 

இச்சம்பவம் தொடர்பில், போலீசார் தீவிர விசாரணை மேற்கொண்டு வருகின்றனர். 

கர்நாடகா,  பிப்ரவரி 23-  கர்நாடக மாநிலத்தில் நாய் கடித்து உயிரிழந்த 16 வயது இளைஞர் ஒருவர்  மயானத்திற்குக் கொண்டு செல்லப்படும் வழியில்  திடிரென உயிர்ப்பிழைத்ததால் உறவினர்கள் அதிர்ச்சியாகினர். 

கர்நாடக மாநிலம், தர்வாட் மாவட்டத்தைச் சேர்ந்த குமார் மார்வாத் (வயது 17) என்பவரைக் கடந்த மாதம் நாய் ஒன்று கடித்துள்ளது. 

எனினும், அவர் நாய்க்கடிக்காக எந்தவொரு சிகிச்சையும் எடுத்துக்கொள்ளவில்லை. இந்நிலையில் அவருக்குத் திடீரென கடுமையான காய்ச்சல் ஏற்பட்டுள்ளது.  

மருத்துவமனையில் அனுமதிக்கப்பட்ட அவரது உடல்நிலை கவலைக்கிடமானது. இதற்கு மேல்,  குமாரைக் காப்பாற்ற முடியாது என பெற்றோர்கள் கைவிரித்து விட்டதால்,  அவரது குடும்பத்தினர் அவரை வீட்டில் வைத்து கவனித்து வந்துள்ளனர்.   திடீரென அவரது உடல் அசைவுகள் அனைத்தும் நின்று போய்விட்டதால், அவர் இறந்துவிட்டதாக, அவரது உறவினர்கள் கருதினர். 

இதனையடுத்து, அவருக்கு இறுதிச் சடங்குக்கான ஏற்பாடுகள் செய்யப்பட்டன.  மயானத்திற்குக் கொண்டு செல்லும் வழியில், குமார் திடீரென விழித்துக் கொண்டு மூச்சு விட்டுள்ளார்.  இதனால் அதிர்ச்சியடைந்த குடும்பத்தினர், அவரை உடனடியாக மருத்துவமனைக்குக் கொண்டு சென்றனர். அங்கு அவருக்குச் சிகிச்சை அளிக்கப்பட்டு வருகிறது. 

 

பெங்களூரு, பிப்ரவரி 21- சொத்துக்குவிப்பு வழக்கில் சிறை சென்றுள்ள சசிகலாவிற்கு நாற்காலி,  காற்றாடி, தொலைகாட்சி எனக் கூடுதல் வசதிகள் செய்து தரப்பட்டுள்ளன. 

சொத்துக்குவிப்பு வழக்கில் மறைந்த முதல்வர் ஜெயலலிதா, அவரது உறவினர்களான இளவரசி, சுதாகரன் ஆகியோருக்கு 4 ஆண்டுகள் சிறைதண்டனை விதிக்கப்பட்டது.  எனினும், ஜெயலலிதா மரணமடைந்ததால், அவரது பெயர் விடுவிக்கப்பட்டுவிட்டது. இந்நிலையில், கடந்த பிப்ரவரி 15-ஆம் தேதி மற்ற மூவரும் பெங்களூர் பரபரப்பன அக்ரஹாரா சிறையில் அடைக்கப்பட்டனர்.  

இங்கு மற்ற சிறை கைதிகளுக்கு என்னன்ன கொடுக்கப்படுகிறதோ அவைகள் மட்டுமே சசிகலாவிற்கு வழங்கப்பட்டுள்ளன. சசிகலா கேட்ட வேறு எந்த வசதிகளும் செய்து தரப்படவில்லை. 

இந்நிலையில், சசிகலா அளித்த மனுவிற்கு ஏற்ப அவருக்கு இன்று அவருக்குக் காற்றாடி, டிவி, நாற்காலி போன்ற கூடுதல் வசதிகள் செய்து தர ஏற்பாடு செய்துதரப்பட்டுள்ளது.

மும்பை, பிப்.21- இந்தியாவின் சர்ச்சைக்குரிய இஸ்லாமிய சமயப் போதகரான டாக்டர் ஜாகிர் நாயக்கிற்கு தாவுத் இப்ராஹிம் பண உதவி செய்திருப்பதாக விசாரணையில் தெரியவந்துள்ளது. மேலும் பல பயங்கரவாத அமைப்புகளும் நிதி வழங்கியுள்ளதும் கண்டுப்பிடிக்கப்பட்டுள்ளது.

மும்பையில் செயல்ப்பட்டுவருகிறது ஜாகிர் நாயக்கின் இஸ்லாமிக் ஆராய்ச்சி அமைப்பு. இந்த அமைப்பின் வழி உலகின் பல இடங்களில் சமய போதனை நடந்தி வந்தார் ஜாகிர். ஆனால், இவரின் பேச்சில் தீவிரவாத தன்மை அதிகம் இருந்ததாலும் தீவிரவாத செயலுக்கு இவரின் உரைகள் காரணமாக இருந்ததாகவும் கூறி இவரின் அமைப்புக்கு தடை விதிக்கப்பட்டது. அதனைத் தொடர்ந்து அவரின் அமைப்புக்கு கிடைத்து வந்த நிதியுதவி தொடர்பாக விசாரணையும் நடந்தது.

இந்நிலையில், பண மோசடிகள் நடந்துள்ளதாகவும் பல இயக்கங்களிடமிருந்து பணம் நன்கொடையாக கிடைத்ததாகவும் மத்திய அமலாக்கத் துறை கூறியுள்ளது. அதில், பாகிஸ்தானில் பதுங்கியுள்ள பிரபல நிழலுலக தாதா தாவுத் இப்ராஹிம் தனது நெருக்கமானவர்கள் மூலம் ஜாகிர் அமைப்புக்கு பணம் மாற்றியுள்ளதாக தகவல் வெளியாகியுள்ளது. 

மேலும், பாகிஸ்தானில் தன்னை மத அமைப்பு என கூறிக் கொள்ளும் பயங்கரவாத அமைப்பு ஒன்றும் நிதியுதவி வழங்கியுள்ளதாகவும் விசாரணையில் தெரியவந்துள்ளது. பாகிஸ்தான் தவிர்த்து சவூதி அரேபியா மற்றும் சில ஆப்பிரிக்க நாடுகளிலிருந்தும் கூட ஜாகிற்கு நன்கொடைகள் கிடைத்துள்ளது கண்டுப்பிடிக்கப்பட்டுள்ளது.

More Articles ...