புதுடில்லி, மார்ச்.22- பத்தாம் வகுப்பு மாணவர்கள் எழுதும் தேர்வுக்கு த்மது பெயரையும் பதிவு செய்து விரைவில் தஏர்வு எழுதவிருக்கும் 70 வயது இளம் மாணவர் பர்பாத் மக்வானா,   அவ்வட்டார மக்களுக்கு இன்ப அதிர்ச்சியை கொடுத்துள்ளார்.

ஜுனாகாட் மாவட்ட காங்கிரஸ் துணைத் தலைவரான இவர், படிப்பு இருந்தால்தான் மக்களுக்கு இன்னும் நல்ல சேவையை வழங்க முடியும் என்பதால் இந்த தேர்வுத் எழுத முடிவெடுத்ததாக கூறினார்.

எனக்கு 7 பிள்ளைகள் இருக்கிறார்கள். இந்தத் தேர்வு முடிந்தபின் நானும் அவர்களுக்கு சமமாக படித்தவனாக இருப்பேன். இதில் எனக்கு ஊக்கமளிப்பது என்னுடைய 101 வயதான தாய்தான். அவர் படித்தவர் இல்லையென்றாலும், அவருடைய ஞானமும் திறனும் என்னை வியப்பில் ஆழ்த்தியதுஎன்று பர்பாத் மக்வானா கூறினார்.

’55 வருடத்திற்கு முன் நான் படித்ததை விட இப்பொழுது உள்ள பாடம் மிகவும் கடினமாக உள்ளது. தினமும் இரண்டிலிருந்து மூன்று மணி நேரம் நான் படிப்பேன். இதற்காக பிரத்தியேக வகுப்பு ஏதும் எடுக்கவில்லை. நான் மாணவர் விடுதி நடத்துவதால் அங்கிருக்கும் பத்தாம் வகுப்பு மாணவர்கள் எனக்கு புத்தகங்களைக் கொடுப்பார்கள்என்றும் அவர் கூறினார்.

பர்பாத் பள்ளி மாணவர்களுக்கு ஒரு நல்ல எடுத்துக்காட்டு. கல்வி கற்க வயது ஒரு தடையல்ல என அவர் நிரூபித்துள்ளார். பள்ளியை விட்டு நின்றுவிட யோசிப்பவர்களுக்கு இவர் ஒரு சிறந்த பாடமாக இருப்பார்என குஜாராத் மாநில கல்வி வாரியத்தின் பத்தாம் வகுப்பு தேர்வு துறை செயலாளர் பி.எஸ். பஞ்சால் கூறினார்.

லக்னோ, மார்ச் 22- அண்மையில் நடந்த தேர்தலில் வெற்றி பெற்று உத்திரபிரதேசத்தின் புதிய முதல்வராக பொறுப்பேற்ற யோகி ஆதித்யநாத் பல அதிரடி உத்தரவுகளை பிறப்பித்து வருகிறார். அதில், கல்லூரி முன்பு நின்று கொண்டு பெண்களைக் கேலி செய்பவர்களைக் கைதுச் செய்யும் உத்தரவு பெண்களிடையே வரவேற்பைப் பெற்றுள்ளது.

சாமியார் போல் காட்சியளிக்கும் யோகி, உத்தரவு கொடுப்பதிலும் சாந்தமாக தான் இருப்பார் என்று பலர் முன்பு கருத்துத் தெரிவித்திருந்த நிலையில், இவரின் அதிரடி உத்தரவுகளால் மக்கள் மட்டுமல்ல அரசு அதிகாரிகளும் அலறியுள்ளதாக கூறப்பட்டுள்ளது. முதல்வரான உடனே யோகி போட்ட முதல் உத்தரவே பசுவதைச் செய்யும் இடங்களை மூடவேண்டும் என்பது தான். இதற்கு தொழில் ரீதி அமைப்புகள் எதிர்ப்பு தெரிவித்துள்ள நிலையில், அதிரடியாக மற்றொரு உத்தரவையும் பிறப்பித்துள்ளார் அவர்.

பள்ளி மற்றும் கல்லூரிகள் முன் நின்று மாணவிகளையும் மற்ற பெண்களையும் கேலி செய்து தொந்தரவு தருவோரைப் பிடிக்க தனிப்படை ஒன்றை அமைக்கும்படி முதல்வர் உத்தரவிட்டார். உடனடியாக அமைக்கப்பட்ட இந்த படை கடந்த இரண்டு நாட்களில் மட்டும் கேலி செய்த ஏராளமான இளைஞர்களைக் கைதுச் செய்துள்ளது. பெண்களுக்கு முறையான பாதுகாப்பு சட்டத்தை அமைக்கவேண்டும் என்ற எண்ணத்தோடு இந்த உத்தரவு பிறப்பிக்கப்பட்டதாக முதல்வர் அலுவலகம் தெரிவித்துள்ளது. முதல்வரின் இந்த உத்தரவு, பெண்களிடமும் பொதுமக்களிடமும் நல்ல வரவேற்பை பெற்றுள்ளது.

மேலும், அரசு அலுவலகங்களில் இனி நெகிழி எனும் பிளாஸ்டிக் பைகளைப் பயன்படுத்தக்கூடாது எனவும், வேலை நேரத்தின்போது குட்கா, பான் மசாலாக்கள் போன்றவற்றைப் பயன்படுத்தக்கூடாது எனவும் முதல்வர் உத்தரவிட்டுள்ள்ளார். 

திருவனந்தபுரம், மார்ச் 20- கேரளாவில் பெண்களுக்கு எதிரான பாலியல் வன்முறைகள் வேகமாக அதிகரித்து வருவதாக அதிர்ச்சி தகவல் வெளியாகியுள்ளது. இது கடந்த 9 ஆண்டுகளில் மூன்று மடங்காகியுள்ளதாக கூறப்பட்டுள்ளது.

கேரள போலீசார் வெளியிட்ட தகவல்படி, கடந்த கடந்த 2007ம் ஆண்டு 500 பாலியல் துன்புறுத்தல் வழக்குகள் பதிவாகியுள்ளன. கடந்த 2016ம் ஆண்டு அது 1,644 ஆக உயர்ந்துள்ளதாக தெரியவந்துள்ளது.

அதே நேரத்தில் சிறுவர்களுக்கு எதிரான பாலியல் குற்றங்கள் 2013ம் ஆண்டில் 1,002 ஆக இருந்த நிலையில், 2016ம் ஆண்டு அது 2,093 ஆக உயர்ந்துள்ளது. மூன்று ஆண்டுகளில் மட்டும் இரு மடங்காகியுள்ள சிறார்களின் பாலியல் கொடுமை கேரளாவில் உள்ள பெற்றோர்கள் மத்தியில் பெரும் பதற்றத்தை உண்டாக்கியுள்ளது.

எனினும், இது தொடர்பான வழக்குகளில், வெறும் 53 பேர் மட்டுமே தண்டனை பெற்றுள்ளதும் தெரியவந்துள்ளது. பலர் தைரியமாக புகார் செய்வது குறைவாக இருப்பது ஒருப்பக்கம், தொடரப்படும் வழக்குகள் விசாரணைக்கு வருவதில் தாமதம் ஏற்படுவது ஒருப்பக்கம் என குற்றவாளிகளுக்கு தண்டனை கிடைப்பது அரிதாகி வருவதாக போலீசார் கூறியுள்ளனர்.

ராய்ப்பூர், மார்ச் 20- பிரதமர் மோடி தனது கனவு திட்டமான தூய்மை இந்தியா திட்டத்திற்கு முக்கிய பங்காற்றிய மூதாட்டி ஒருவரின் காரில் விழுந்து ஆசிர்வாதம் வாங்கினார். இதன் காணொளி தற்போது சமூக வலைத்தளத்தில் பகிரப்பட்டு வருகிறது. 

மோடியின் கனவு திட்டம் தூய்மை இந்தியா. இத்திட்டத்தில் பெரும் பங்காற்றியவர்களுக்கு பாராட்டு விழா நடத்தி வருகிறார் பிரதமர் நரேந்திர மோடி. அவ்வகையில், சத்தீஸ்கர் மாநிலத்தில் இத்திட்டத்திற்கு உதவியவர்கள் மற்றும் தானாக முன்வந்து தூய்மை செய்தவர்களுக்கு பாராட்டு விழா நடத்தினார்.

காணொளி: நன்றி அனி நியூஸ்

அதில், 104 வயதான மூதாட்டி குன்வர் பாய் என்பவர் தனது சொந்த ஆடுகளை விற்று அந்த பணத்தில் கழிப்பறை கட்டியுள்ளார். இதனால், அவரைப் பாராட்டி சால்வை அணிவித்தார் மோடி. அப்போது அந்த மூதாட்டியின் காலைத் தொட்டு மோடி வணங்கி ஆசிர்வாதம் வாங்கினார்.

புதுடில்லி, மார்ச் 20- விவசாயக் கடனைத் தள்ளுபடி செய்யும்படி கோரிக்கை விடுத்த தமிழக விவசாயிகள் தொடர்ந்து ஏழாவது நாளாக தொடர் போராட்டத்தில் ஈடுப்பட்டு வருகின்றனர். அரசு மற்றும் மக்களின் கவனத்தை ஈர்க்கும் வகையில் இவர்கள் அரை நிர்வாணப் போராட்டத்தில் இறங்கியுள்ளனர்.

தங்களின் விவசாயக் கடன்களைத் தள்ளுபடி செய்யவேண்டும் என்றும் காவிரி மேலாண்மை வாரியம் அமைக்கவேண்டும் என்றும் வலியுறுத்தி, தென்னிந்திய நதிகள் இணைப்பு விவசாயிகள் சார்பில் டில்லியில் இந்த போராட்டம் நடந்து வருகிறது.

தொடர் பட்டினி போராட்டமாக நடக்கும் இதில் தமிழக விவசாயிகள் ஆதிவாசிகளைப் போல் உடலில் செடிக் கொடிகளைக் கட்டிக் கொண்டும் மண்டை ஓடுகளை கழுத்தில் அணிந்துக் கொண்டும் நூதன முறையில் போராட்டம் நடத்தி வருகின்றனர். 

இன்றுடன் ஏழாவது நாளாக தொடரும் இந்த போராட்டத்திற்கு எப்போது தீர்வு பிறக்கும் என இவர்கள் காத்திருக்கின்றனர்.

பெங்களூர், மார்ச் 18 – சட்டீஸ்கர் மாநிலத்தில் தீவிரவாதிகளின் தாக்குதலுக்கு இலக்காகி உயிரிழந்த 12 இராணுவ வீரர்களின் குடும்பத்தினருக்கு இந்திய பேட்பிண்டன் வீராங்கனை சாய்னா நேவால் நிதி உதவி வழங்கினார்.

பேஜா என்ற பகுதியில் மத்திய பாதுகாப்பு படையினர் பயிற்சி செய்து கொண்டிருந்த போது அங்கு வந்த தீவிரவாத கம்யூனிஸ்டுகள் பாதுகாப்புப் படை மீது திடீர்த் தாக்குதல் நடத்தினர். இத்தாக்குதலில் பாதுகாப்புப் படையைச் சேர்ந்த 12 வீரர்கள் உயிரிழந்தனர். மேலும் 4 வீரர்கள் படுகாயம் அடைந்தனர்.

இந்தத் தாக்குதலில் உயிரிழந்த 12 பாதுகாப்புப் படை வீரர்களின் குடும்பத்திற்குப் இந்திய பேட்பிண்டன் விளையாட்டு வீராங்கணை சாய்னா நேவால் ரூபாய் 6 லட்சம் நிதியுதவி வழங்குவதாக அறிவித்துள்ளார். உயிரிழந்த 12 வீரர்களின் குடும்பத்திற்குத் தலா ரூ.50,000 வழங்கியுள்ளார்.

நமது பாதுகாப்புக்காக அவர்களது வாழ்க்கையைத் தியாகம் செய்த அவ்வீரர்களின் இழப்பு தனக்கு மிகவும் வேதனை அளிப்பதாக 27 வயதுடைய சாய்னா தெரிவித்துள்ளார்.

இத்தாக்குதலில் உயிரிழந்த 12 வீரர்களின் குடும்பத்திற்கு இந்தி திரைப்பட நடிகர் அக்சய் குமாரும் ஒரு கோடியே 8 லட்சம் ரூபாய் நிதிஉதவி வழங்கியுள்ளார் என்பது குறிப்பிடத்தக்கது.

ஆமதாபாத், மார்ச் 17- கள்ளத்தனமாக மது விற்றதைப் போலீசில் புகார் செய்த ஆடவரைப் பழிவாங்க அவர் கண் முன்னே இரு மகள்களையும் கற்பழித்த காமுகர்களைப் போலீசார் கைதுச் செய்தனர். இவர்கள் மீது கூட்டு கற்பழிப்பு வழக்கு போடப்பட்டுள்ளது.

குஜராத்தில் மதுவிலக்கு அமல்ப்படுத்தப்பட்டுள்ள நிலையில் குமாத் என்பவன் சட்டவிரோதமாக மது விற்றதாக ஆடவர் ஒருவர் போலீசில் புகார் கொடுத்தார். இதனால் ஆத்திரமடைந்த மது விற்ற ஆடவன் அவரைப் பழிவாங்க எண்ணினான்.

இதனால் தனது 6 நண்பர்களுடன் சேர்ந்து குமாத் என்பவன், ஆடவரையும் அவரின் இரு குழந்தைகளையும் ஆடம்பர காரில் கடத்தியுள்ளான். அதோடு, காரிலேயே தந்தையின் கண்முன்னே அந்த இரு சிறுமிகளையும் அவர்கள் கற்பழித்துள்ளனர். 

பின்னர் அவர்களைக் காரிலிருந்து கீழே தள்ளி விட்டு அவர்கள் காரில் தப்பி சென்றுள்ளனர்.

தகவலறிந்த போலீசார் தப்பி ஓடியவர்களைக் கண்டுப்பிடித்து கைதுச் செய்தது. மேலும் அவர்கள் மீது கூட்டு பலாத்காரம், கடத்தல் மற்றும் குழந்தை பாதுகாப்பு சட்ட வழக்குகளைப் பதிவு செய்தனர்.  

புதுடில்லி, மார்ச் 17- பாகிஸ்தானில் உள்ள புகழ்ப்பெற்ற புனித தலத்திற்கு பயணம் மேற்கொண்ட இரு முஸ்லீம் மதகுருக்கள் காணாமல் போயுள்ளனர்.. இது தொடர்பாக மத்திய அரசு பாகிஸ்தானின் அமைச்சகத்தைத் தொடர்பு கொண்டுள்ளதாக கூறப்படுகிறது. 

டில்லியில் உள்ள ஹசரத் நிஜாமுதீன் பள்ளிவாசலின் தலைமை மதகுரு சையத் ஆசிப் நிசாமி (வயது 80) என்பவரும் அவரது உறவினருமான மற்றொரு மத குருவும் கடந்த 8ம் தேதி, பாகிஸ்தானில் உள்ள லாகூர் பள்ளிவாசலுக்கு சென்றுள்ளனர். 

லாகூர் விமான நிலையத்தில் இறங்கிய அவர்களைக் குடும்பத்தினர் தொடர்பு கொள்ள முயன்றபோது தொடர்பு கிடைக்கவில்லை. இது தொடர்பாக அவரின் குடும்பத்தினர் அங்குள்ள பத்திரிகையில் விளம்பரம் கொடுத்துள்ளதாக கூறியுள்ளனர். இதுவரை எந்த பதிலும் கிடைக்காத நிலையில், மத்திய அரசிடம் இதைப் பற்றி தெரிவித்துள்ளனர்.

ஒருவேளை போதுமான பயண ஆவணங்கள் இல்லாததால் அவர்கள் விமான நிலையத்தில் தடுத்து வைக்கப்பட்டிருக்கலாம் என கூறப்பட்டுள்ளது. இது தொடர்பாக, பாகிஸ்தான் அமைச்சகத்துடன் தொடர்பு கொண்டுள்ளதாக வெளியுறவு அமைச்சர் சுஷ்மா சுவராஜ் தெரிவித்துள்ளார்.

புதுடில்லி, மார்ச் 17- தனது உரைகளின் வழி தீவிரவாதத்தைத் தூண்டுவதாக கூறி, சர்ச்சைக்குரிய மத போதகர் ஜாகிர் நாயக்கின் அமைப்பிற்கு மத்திய அரசு தடை விதிக்கப்பட்டது சரி தான் என்று உறுதி செய்தது டில்லியின் உயர்நீதிமன்றம். 

மதபோதகர் ஜாகிர் நாயக்கின் ஐ.ஆர்.எப் எனப்படும் இஸ்லாமிய ஆராய்ச்சி மையத்தை முடக்குமாறு மத்திய அரசு உத்தரவிட்டது. அந்த அமைப்பின் வழி பயங்கரவாதத்தை தூண்டும் வகையில் போதனைகள் நடத்தப்படுவதாக குற்றஞ்சாட்டு எழுந்தது. அந்த அமைப்பு மத்திய அரசு தடை விதித்தது. 

இந்நிலையில் ஜாகிர் நாயக்கின் அமைப்புக்கு விதிக்கப்பட்ட தடையை எதிர்த்து டில்லி உயர்நீதிமன்றத்தில் வழக்கு தொடரப்பட்டது. வழக்கு நேற்று விசாரணைக்கு வந்த நிலையில், வழக்கை விசாரித்த நீதிபதி சஞ்சீவ் சச்தேவ் தீர்ப்பளித்தார்.

அதில், 'நாட்டின் நலன் கருதியே ஜாகிர் நாயக்கின் அமைப்புக்கு மத்திய அரசு தடை விதித்துள்ளது. அரசு அளித்துள்ள ஆதாரங்களில் நாயக்கின் கருத்துகள் இளைஞர்களின் மனதில் பயங்கரவாத எண்ணத்தை ஏற்படுத்தியுள்ளது நிரூபிக்கப்பட்டுள்ளது. எனவே நாயக்கின் அமைப்புக்கு விதிக்கப்பட்ட தடை சரியே" என தீர்ப்பு வழங்கப்பட்டுள்ளது.

 

போர்ட் பிளேர், மார்ச் 14- அந்தமான் மற்றும் நிக்கோபார் தீவுகளில் பயங்கர நிலநடுக்கம் ஏற்பட்டுள்ளது. ரிக்டர் கருவியில் 5.9-ஆக இந்நிலநடுக்கம் பதிவாகியது. எனினும், இந்நிலநடுக்கத்தால் உயிருடற்சேதங்கள் எதுவும் ஏற்பட்டதா, என்பது குறித்த தகவல்கள் இன்னமும் கிடைக்கவில்லை. 

அந்தமான், நிக்கோபார் ஆகிய கடற்பகுதிகளில் இயற்கை சீற்றங்கள் நிகழ்வது வழக்கமாகும். கடந்த 2004-ஆம் ஆண்டு இங்கு நிகழ்ந்த அந்தமானில் நிகழ்ந்த சுனாமியால் 2000க்கும் மேற்பட்டோர் உயிரிழந்தனர் என்பது குறிப்பிடத்தக்கது.

அதனையடுத்து, கடந்த 2015-ஆம் ஆண்டு அந்தமானில் அடுத்தடுத்து 8 முறை நிலநடுக்கம் ஏற்பட்டன. 

புதுடில்லி, மார்ச் 11- லண்டன் நோக்கி பறந்து கொண்டிருந்த ஏர் இந்தியாவிற்கு சொந்தமான விமானம் ஒன்று ராடார் கருவியிலிருந்து காணாமல் போனது. ஆனாலும், ஜெட் விமானங்கள் சம்பந்தப்பட்ட விமானத்தை வழிகாட்டி 'அழைத்து' சென்றதால் அவ்விமானம் லண்டனில் பாதுகாப்பாக தரையிறங்கியது.

சீனாவின் ஜின்ஹுவா செய்தி நிறுவனம் வெளியிட்ட செய்தியில், ஏர் இந்தியாவின் ஏஐ 171 எனும் விமானம் 231 பயணிகளுடனும் 18 ஊழியர்களுடனும் ஹங்கரி வான் பகுதியில் பறந்து கொண்டிருந்தபோது திடீரென அதன் ராடார் தொடர்பு துண்டிக்கப்பட்டது. தொடர்பு இணைப்பில் ஏற்பட்ட கோளாறினால் இந்த துண்டிப்பு ஏற்பட்டதாக நிறுவனத்தின் பேச்சாளர் கூறினார்.

தொடர்பு துண்டிக்கப்பட்டவுடன் உடனடியாக இரு ஜெட் விமானங்கள் அந்த விமானத்துக்கு அருகில் சென்று விமானத்தை அழைத்துச் சென்றன. பின்னர் துண்டிக்கப்பட்ட விமானத்தின் தொடர்பு மீண்டும் இணைக்கப்பட்டு லண்டன் விமான நிலையத்தில் பத்திரமாக தரையிறக்கப்பட்டது என பேச்சாளர் கூறினார்.

கடந்த ஒரு மாதத்திற்குள் வானில் பறந்து கொண்டிருக்கும்போதே விமானத்தின் தொடர்பு துண்டிக்கப்பட்ட இரண்டாவது சம்பவம் இதுவாகும். முன்னதாக கடந்த மாதம், போயிங் 777 ரக விமானம் ஒன்று மும்பையிலிருந்து லண்டனுக்கு பறந்து கொண்டிருந்தபோது ராடார் தொடர்பு துண்டிக்கப்பட்டது குறிப்பிடத்தக்கது. 

 

 

More Articles ...