பெங்களூரு, நவ.7- பெங்களூரு அனைத்துலக விமான நிலையம் தற்காலிகமாக மூடப்படவுள்ளது. பராமரிப்பு பணிகள் காரணமாக இரண்டரை மாதங்கள் இந்த விமான நிலையம் மூடப்படவுள்ளது.

விமான நிலையத்தின் ஓடுபாதையில் பராமரிப்பு பணிகளை மேற்கொள்ள திட்டமிடப்பட்டுள்ளதால் அடுத்த வருடம் பிப்ரவரி தொடங்கி ஏப்ரல் வரை விமான நிலையத்தை தற்காலிகமாக மூடப்படவுள்ளதாக விமான நிலைய அதிகாரிகள் கூறினர்.

அதேநேரத்தில், காலை முதல் மாலை 5 மணி பராமரிப்பு பணிகளை மேற்கொண்டு விட்டு, மற்ற நேரங்களின் மக்களின் பயன்பாட்டிற்கு விமானங்களை இயக்கவும் திட்டமிடப்பட்டுள்ளது. 

பெங்களூரு விமான நிலையம் இதுவரை ஒரு மணிநேரத்திற்கு 38 வான்வழி போக்குவரத்து சேவையை வழங்கி வந்த நிலையில் இதனை 48-ஆக உயர்த்தவே இந்த பராமரிப்பு பணிகள் மேற்கொள்ளப்பட விருக்கின்றன.

திருப்பதி, நவம்பர் 5-  உலகப் பிரசித்தி பெற்ற திருப்பதி ஏழுமலையான் கோயிலில் மூலவருக்கு அணிவிக்கப்படும்  நாமத்தின் வடிவத்தை மாற்றிய அர்ச்சகர்களுக்கும், ஜீயர்களுக்கும்  இடையே மோதல் ஏற்பட்டது. இதனால்  திருப்பதியில் பரபரப்பு ஏற்பட்டது. 

திருப்பதி ஏழுமலையான் கோயிலில் வாரந்தோறும் வெள்ளிக்கிழமைகளில் மூலவருக்கு சிறப்பு அபிஷேகம் செய்யப்படுவது வழக்கம்.   

இவ்வாறு அபிஷேகம் செய்யப்பட்ட போது, தோல்மாலை சேவைக்காக வந்த ஜீயர்கள் மூலவருக்கு அணிவிக்கப்பட்ட நாமம்  வழக்கத்திற்கு மாறாக  தமிழ் எழுத்தான  "ப " வடிவத்திற்குப் பதில்,  'யூ " வடிவில்  இருந்ததாகக் கூறி அர்ச்சகர்களிடம் வாக்குவாதத்தில் ஈடுபட்டனர். 

மேலும், இவ்விவகாரம் தொடர்பில், தேவஸ்தான அதிகாரிகளிடமும் புகார் அளித்தனர். 

ஶ்ரீநிவாச பெருமாளுக்கு நாமம் அணிவிப்பதில் இரு தரப்பினருக்கும் இடையே பல ஆண்டுகளாக கருத்து வேறுபாடுகள் நிலவி வரும் நிலையில், வேண்டுமென்றே இந்த நாமம் அணிவிக்கப்பட்டுள்ளதாக ஜீயர்கள் குற்றம் சாட்டியுள்ளனர். 

 இவ்விவகாரம் தொடர்பில் அர்ச்சகர்களிடம் விசாரணை செய்ய  அதிகாரிகள் முடிவு செய்துள்ளனர். 

டெல்லி,  4 நவம்பர் -   தங்கள் நாட்டிலுள்ள 8 இந்திய தூதரக அதிகாரிகளையும் திருப்பி அனுப்புவதில் பாகிஸ்தான் அரசு குறியாக உள்ளது. தூதரக  விதிமுறைகள் அனைத்தையும் காற்றில் பறக்கவிட்டுள்ளது மூலம், இந்தியா மற்றும் பாகிஸ்தான் ஆகிய இருநாடு களுக்குள்ளும் சிக்கல் உருவாகியுள்ளது. 

இந்தியா -பாகிஸ்தான் ஆகிய இரு நாடுகளுக்கிடையேயான ஒப்பந்த படி  இரு நாடுகளும் 110 தூதரக அதிகாரிகளை நியமித்து க்கொள்ள முடியும். 

இந்திய  நாடாளுமன்றத்தின் மீதான தீவிரவாத தாக்குதலைத் தொடர்ந்து இந்த எண்ணிக்கை 50-ஆகக் குறைக்கப்பட்டது. இரு நாடுகளு க்குமிடையே பதற்றம்  தொடர்வதால், இந்த எண்ணிக்கை 20-ஆக, மேலும் குறைக்கப்பட்டது. 

எனினும் தற்போது இந்த எண்ணிக்கை 18-ஆகக் குறைந்துள்ளது . பாகிஸ்தான் தூதரக விதிமுறைகள் அனைத்தையும் தகர்த்து எறிந்து திருப்பியனுப்ப தொடங்கியுள்ளது.  

முன்னதாக, டெல்லியில் இருந்த பாகிஸ்தான் தூதரக அதிகாரியான மெகபூப் அக்தர் ஊழல் புகார் காரணமாக  திருப்பி அனுப்ப ப்பட்டதால், பழிவாங்கும் நடவடிக்கையாக இவ்வாறு இந்திய தூதரக  அதிகாரிகளைத் திருப்பியனுப்பி வருகிறது பாகிஸ்தான்.  இந்நிலையில் தான், 8 இந்திய அதிகாரிகளை உளவு புகாரின் பேரில்  திருப்பியனுப்ப பாகிஸ்தான் நெருக்க டியளித்து வருகிறது. 

திருவனந்தபுரம், நவம்பர் 4- கேரளாவில் இஸ்லாமியர் ஒருவர்  பிறந்த குழந்தைக்குத் தாய்ப்பால் கொடுக்கவிடாமல் தடுத்ததுடன், அது தமது மதத்திற்கு எதிரானது எனக் கூறியுள்ளது, பரபரப்பை ஏற்படுத்தியுள்ளது. 

கேரள மாநிலத்தில் கோழிக்கோட்டைச் சேர்ந்த அபுபக்கர் என்பவரின் மனைவிக்கு இரண்டாவது முறையாக  குழந்தை பிறந்தது. பிறந்த குழந்தைக்குத் தாய்ப்பால் கொடுக்குமாறு  மருத்துவர்கள் அவரது மனைவியிடம் அறிவுறுத்தியுள்ளனர்.  

ஆனால், அபு பக்கரோ, தனது குழந்தைக்குத் தாய்ப்பால் கொடுக்க விட மாட்டேன்.  குழந்தைக்குத் தாய்ப்பால் கொடுப்பது என் மதத்திற்கு எதிரானது. அதற்குப் பதிலாக மெக்காவிலிருந்து வரவழைக்கப்பட்ட  நீரும் தேனும் கொடுத்தால் போதுமானது என இஸ்லாமிய மத போதகர் ஒருவர் தெரிவித்துள்ளார் என  மருத்துவர்களிடம் விவாதம் புரிந்துள்ளார். 

மேலும், தனது முதல் குழந்தைக்கும் அவர் தாய்ப்பால் கொடுக்கவில்லையாம். அதே போல், இந்த குழந்தைக்கும் தாய்ப்பால் கொடுக்க விட மாட்டேன் எனக்கூறி  மனைவி மற்றும் பிறந்த குழந்தையை அழைத்துச் சென்று விட்டார். 

இதனையடுத்து, ஒரு குழந்தையின் உரிமையை மறுப்பதாகக் கூறி, மருத்துவமனை அதிகாரிகல் அபுபக்கர் மீது காவல்நிலையத்தில் புகார் செய்தனர். 

ஓடிசா,  நவம்பர் 3- ஒடிசாவில்  அண்மையக் காலமாக JE எனும் ஜப்பானிய மூளைக்காய்ச்சல்  நோய் வேகமாகப் பரவி வருகிறது. இதுவரை, அங்கு 73 குழந்தைகள் மூளைக்காச்சலுக்குப் பலியாகியுள்ளனர்.   

காய்ச்சல், தலைவலி, வாந்தி, உடல் சோர்வு ஆகியவற்றின் மூலம் இந்த ஜப்பானிஸ் என்சிபாலிட்டிஸ் மூளைக்காய்ச்சல் நோய் பரவி வருகிறது. 

இந்நிலையில், மூளைக்காய்ச்சலைத் தடுத்து உயிர்களைக் காக்குமாறு 10 வயது சிறுவன் ஒருவன் பிரதமர் மோடிக்குக் கடிதம் எழுதியுள்ளான். 

நான்காம் ஆண்டு பயிலும் அந்த மாணவன் தனது கடிதத்தில்  "ஜப்பானிய மூளைக் காய்ச்சலால் எனது நண்பர்கள் பலர் உயிரிழந்துள்ளனர்.  பல நாடுகளுக்குச் சுற்றுப்பயணம் மேற்கொள்ளும் நீங்கள், எங்கள் ஊருக்கும் வந்து, இங்குள்ள குழந்தைகளின் நிலையை நேரில் கண்டறிய வேண்டும் ' என உருக்கமாகக் குறிப்பிட்டுள்ளார். 

ஜம்மு, நவம்பர் 2- காஷ்மீர் எல்லையோர கிராமங்கள் மீது பாகிஸ்தான் இராணுவம், சரமாரியாக குண்டுகள் வீசியதுடன், துப்பாக்கிச் சூடும் நடத்தியது . இச்சம்பவத்தில் அப்பாவி மக்கள் 8 பேர் பலியாகினர். மேலும் 22 பேர் படுகாயமடைந்தனர்.  இதனையடுத்து அங்குள்ள 174 பள்ளிகளை மூட அரசு உத்தரவிட்டுள்ளது. 

உரி தாக்குதலைத் தொடர்ந்து, இந்திய இராணுவம்  சர்ஜிக்கல் ஸ்டிரைக்  தாக்குதலை பாகிஸ்தானுக்குள் ஊடுருவி தாக்கியது. இதனால் ஆத்திரமடைந்த பாகிஸ்தான்  பாகிஸ்தான் எல்லையில் தொடர்ந்து அத்துமீறி துப்பாக்கிச் சூடு நடத்தி வருகிறது.  

இதன் தொடர்ச்சியாக  நேற்றும் சம்பா, ஜம்மு, பூஞ்ச் மற்றும்  ரஜோரி மாவட்ட எல்லைகளில் பாகிஸ்தான் ரேஞ்சர்கள் துப்பாக்கிச்சூடு நடத்தினர். 82 எம்.எம், 120 எம்.எம் அளவுள்ள சிறிய ரக குண்டுகளையும் வீசினர். இதில் 2  பெண்கள் பலியாயினர், 13 பேர் காயமடைந்தனர். 

சம்பா மாவட்டம், ராம்கர் பகுதியில் குடியிருப்புக்களை குறிவைத்து நடத்தப்பட்ட தாக்குதலில் அப்பாவி மக்கள் 5 பேர் பலியானார்கள். 9 பேர் காயமடைந்தனர். மேலும்  குண்டு வீச்சால் அதிர்ச்சி அடைந்த நபர் ஒருவரும் உயிரிழந்தார். மொத்தம் ஒரே நாளில் 8 அப்பாவிகள் கொல்லப்பட்டுள்ளனர்.

போபால், அக்டோபர் 31-  சிமி இயக்கத்தைச் சேர்ந்த 8 தீவிரவாதிகள் இன்று அதிகாலையில் சிறைக்காவலரைக் கொன்றுவிட்டு தப்பியோடினர். சட்டவிரோத சிமி இயக்கத்தைச் சேர்ந்த 8 தீவிரவாதிகள் மத்திய சிறைச்சாலையில் அடைக்கப்பட்டிருந்தனர். 

தீபாவளியை முன்னிட்டு, அனைவரும் ஓய்வெடுத்துக்கொண்டிருந்த திங்கட்கிழமை அதிகாலை நேரத்தைப் பயன்படுத்தி சிமி தீவிரவாதிகள் தப்பியுள்ளனர்.

தப்பிச் செல்லும் போது, தடுத்த சிறைக் காவலாளியின் கழுத்தை அறுத்து கொன்றுவிட்டு, படுக்கை விரிப்புகளைப் பயன்படுத்தி சுவர் மீது ஏறி அவர்கள் தப்பியோடியுள்ளனர்.

 

இதனையடுத்து, தீவிரவாதிகள் தப்பியது தொடர்பில் விசாரணைக்கு உத்தரவிடப்பட்டுள்ளது.  கடந்த மூன்று ஆண்டுகளுக்கு முன்னர் இதேபோல்  7 சிமி சிறைக்கைதிகள் தப்பியோடினர் என்பது குறிப்பிடத்தக்கது. 

அனந்த்நாக், அக்டோபர் 31- ஜம்மு காஷ்மீரின் அனந்த்நாக் என்ற இடத்தில் அடையாளர் தெரியாத சிலர் ஒரே நாளில் 3 பள்ளிகளுக்கு தீ வைத்த சம்பவம் பரபரப்பை ஏற்படுத்தியுள்ளது.  

கடந்த ஜூலை 8-ஆம் தேதி, ஹில்புல் முஜாஹிதீன் இயக்கத்தின் தலைவரான  புர்ஹான் வானி கொல்லப்பட்டது முதல் ஜம்மு காஷ்மீரில் பதட்டம் நிலவி வருகிறது. 

இந்நிலையில் பிரிவினைவாத அமைப்புகள் முழு அடைப்புக்கு அழைப்பு விடுத்துள்ளன. இதனால் பள்ளிகள்  மூடப்பட்டுள்ளன. மாநிலத்தில்  நிலவும் பதட்டத்தைத் தணிக்க வந்துள்ள பாதுகாப்பு படையினர் பல பள்ளிகளில் தங்கியுள்ளனர். 

இந்நிலையில், கடந்த சனிக்கிழமை இரவு  அடையாளம் தெரியாத சிலர் ஜவஹர் நவோதயா வித்யாலயா பள்ளிக்குத் தீ வைத்தனர்.  இதனைத் தொடர்ந்து நேற்று மதியம் அங்குள்ள உயர் நிலை பள்ளிக்கும் தீ வைத்தனர். இதுதவிர அனந்த்நாக் பகுதியில் உள்ள பள்ளி ஒன்றிக்கும் தீ வைத்துள்ளனர்.  கடந்த 24 மணி நேரத்தில் மட்டும் 3 பள்ளிகளுக்கு அவர்கள் தீ வைத்துள்ளனர். 

புவனேஸ்வர், அக்டோபர் 24-  ஒடிசா மாநிலத்தில் மூளைக்காய்ச்சலால்  நோய் காரணமாக உயிரிழந்த குழந்தைகளின் எண்ணி க்கை 60-ஆக அதிகரித்துள்ளது. 

ஒடிசா மாநிலம், மல்காங்கிரி மாவட்டத்தில் உள்ள கிராமங்களில்  கடந்த ஒரு மாதத்தில் மட்டும் 60 குழந்தைகள் இறந்துள்ளனர். மேலும் பல குழந்தைகள் ஆபத்தான நிலையில் மருத்துவமனையில் அனுமதிக்கப்பட்டுள்ளனர்.  ஜப்பானிய மூளைக்காய்ச்சலால் அம்மாவட்ட சுகாதாரத் துறை பல்வேறு நடவடிக்கை எடுத்தும், அதனால் தங்களுக்கு எந்த பயனும் இல்லை என பாதிக்கப்ப ட்டவர்கள் தெரிவித்தனர். 

இவ்விவகாரம் தொடர்பில் இன்னும் ஒரு மாதத்திற்குள்  அறிக்கை வழங்கும்படி மனித உரிமைகள் ஆணையம் ஒடிஷா அரசுக்கு உத்தரவிட்டுள்ளது. 

ஶ்ரீநகர், அக்.21- இந்திய எல்லையில் பாகிஸ்தான் ராணுவம் அத்துமீறி தாக்குதல் நடத்தியது. காஷ்மீர் ஹிராநகரில் நடந்த இத்தாக்குதலில் இந்திய ராணுவ வீரர் ஒருவர் காயமடைந்தார்.

போபியா போஸ்ட் பகுதியில் அத்துமீறி நடந்த இத்தாக்குதலுக்கு இந்திய எல்லை பாதுகாப்பு படையும் பதிலடி கொடுத்தது. இதில் பாகிஸ்தான் இராணுவ அதிகாரி ஒருவர் பலியானதாக இந்திய ராணுவம் அறிவித்துள்ளது. 

காஷ்மீரில் இந்திய ராணுவம் நடத்திய அதிரடி தாக்குதலுக்கு பின்னர் பாகிஸ்தான் 32ஆவது முறையாக அத்துமீறி தாக்குதல் நடத்துவது குறிப்பிடத்தக்கது. 

 

புதுடெல்லி, அக்.20- பாகிஸ்தானில் எந்த இலக்கையும் குறிவைத்து தாக்கும் நவீன பிரமோஸ் ஏவுகணையை ரஷ்யாவின் உதவியுடன் இந்தியா தயாரிக்கவிருக்கிறது. கோவாவில் நடந்த பிரிக்ஸ் மாநாட்டில் இதற்கான ஒப்பந்தங்கள் போடப்பட்டதாக இந்திய செய்திகள் கூறுகின்றன.

பிரிக்ஸ் மாநாட்டில் ராணுவ தளவாடங்கள் வாங்குவது தொடர்பான பல்வேறு ஒப்பந்தங்கள் கையெழுத்திடப்பட்டன. அதில் நீர்மூழ்கி கப்பல், எஸ்.400 வான் பாதுகாப்பு முறை கொள்முதல் திட்டங்கள் பற்றி மட்டுமே வெளிப்படையாக அறிவிக்கப்பட்ட வேளை, ஏவுகணை தொழிட்நுட்பம் பற்றி தெரிவிக்கப்படவில்லை.

ஆனால், ரஷ்ய அதிபர் புடின் அந்நாட்டு செய்தியாளர்களிடம் பேசும்போது, பிரமோஸ் ஏவுகணை தொழிட்நுட்பத்தை மேம்படுத்த இந்தியாவிற்கு ரஷ்யா உதவ உள்ளதாக தெரிவித்தார். தரை, கடல், ஆகாயத்திலிருந்து ஏவப்படும் பிரமோஸ் ஏவுகணையின் இலக்கு தூரத்தை அதிகரிக்க இந்தியாவும் ரஷ்யாவும் இணைந்து செயல்படும் எனவும் அவர் தெரிவித்தார்.

தற்போது இந்தியாவில் இருக்கும் பிரமோஸ் ஏவுகணை 300 கிலோ மீட்டர் தூரம் வரை பாயும். அதனை இரண்டு மடங்காக அதாவது 600 கிலோ மீட்டர் தூரம் வரை பாயக்கூடிய வகையில் தயார் செய்யப்பட உள்ளது. 

இதன் வழி, பாகிஸ்தானின் எந்த ஓர் இடத்தினையும் குறிவைத்து தகர்த்தெறிய முடியும். அதோடு, எந்த இலக்கையும் எந்த திசையிலும் எதிரிநாட்டு கண்காணிப்பில் சிக்காமல் சென்று தாக்கும் வல்லமை பெற்றது இந்த ஏவுகணை. 

More Articles ...