Top Stories

Grid List

 

கோலாலம்பூர், நவ.21- முக்கிய முடிவுகளை ம.இ.கா எடுக்கப் போகிறது என்கிற பல்வேறு யூகங்களுக்கு இடையே இன்று பிற்பகலில் ம.இ.கா மத்திய செயலவைக் கூட்டம் நடந்தது என்றாலும், பொதுவாக அடுத்து வரும் பொதுத் தேர்தலுக்கான ஏற்பாடுகள் பற்றியே செயலவைக் கூட்டத்தில் விவாதிக்கப்பட்டது என்று ம.இ.காவின் தேசியத் தலைவர் டத்தோஶ்ரீ டாக்டர் எஸ்.சுப்பிரமணியம் தெரிவித்தார்.

நாட்டின் 14-ஆவது பொதுத் தேர்தல் எந்த நேரத்திலும் நடக்கலாம். எனவே, அதனை எதிர்கொள்ள கட்சித் தயார் நிலையில் இருக்க வேண்டியது கட்டாயமாகிறது என்று இன்று பிற்பகலில் நடந்த செய்தியாளர்கள் கூட்டத்தில் டாக்டர் சுப்ரமணியம் சொன்னார். 

கட்சித் தலைவர்களும், பொதுத் தேர்தலுக்குத் தயார் நிலையில் இருக்க வேண்டும் என்று வலியுறுத்தப்பட்டுள்ளனர் என்று அவர் மேலும் கூறினார். 

அதேவேளையில், இன்று ம.இ.கா தொகுதித் தலைவர்களுடனான சந்திப்புக் கூட்டம் தலைமையகத்தில் நடந்தது. தொகுதித் தலைவர்களுக்கான ஒதுக்கீடுகள் தொடர்பாக கட்சித் தலைமைத்துவம் விளக்கம் அளித்ததாக தெரிவிக்கப்பட்டது. 

இன்று அவசர மத்திய செயலவைக் கூட்டம் நடக்கப்போவதாக தகவல் வெளியானதும் பரபரப்பு ஏற்பட்டது. கட்சிக்கு வெளியே இருக்கின்ற சில முன்னாள் ம.இ.கா தலைவர்கள் உடனடியாகக் கட்சிக்குள் ஈர்க்கப்படும் சாத்தியம் இருப்பதாக ஆருடம் நிலவியது. 

குறிப்பாக, முன்னாள் மத்திய செயலவை உறுப்பினர் ஏ.கே.இராமலிங்கம், முன்னாள் பொருளாளர் டத்தோ ரமணன் ஆகியோர் ம.இ.காவில் மீண்டும் சேர்க்கப்படுவது தொடர்பில் இன்றைய செயலவைக் கூட்டத்தில் முடிவு எடுக்கப்படலாம் என்ற தகவல் பரவியதால், கட்சியின் மத்தியில் பரபரப்பு நிலவியது. 

கோலாலம்பூர், நவ.21- அமைச்சு ஒன்றுக்கு 2018-ஆம் ஆண்டின் பட்ஜெட்டில் வழங்கப்பட்ட நிதி ஒதுக்கீடை எதிர்க்கும் எதிர்கட்சியின் தீர்மானம், ஒரே வாக்கு வித்தியாசத்தில் தோல்வி அடைந்ததைத் தொடர்ந்து, நாடாளுமன்றத்தில் அமளி ஏற்பட்டது. 

அந்த ஒதுக்கீட்டுக்கு எதிரான வாக்களிப்பை நடத்த வேண்டும் என்று எதிர்கட்சியின் காப்பார் நாடாளுமன்ற உறுப்பினர் ஜி.மணிவண்ணன் முன்மொழிந்தார். அதனைத் தொடர்ந்து, அந்த வாக்கெடுப்பை நடத்த, துணை சபாநாயகர் டத்தோஶ்ரீ டாக்டர் ரோனல்டு கியான்டி அனுமதி வழங்கினார். 

நாடாளுமன்ற வளாகத்தில் உள்ள இதர நாடாளுமன்ற உறுப்பினர்கள், இரண்டு நிமிடங்களுக்குள் மக்களவைக்குள் வர வேண்டும் என்பதற்கான அறிகுறியாக, அந்த இரண்டு நிமிடங்களுக்கு மணி ஒன்று ஒலிக்கப்பட்டது. 

ஆனால், அந்த மணி ஒலி நிறுத்தப்பட்ட பின்னரும், பல தேசிய முன்னணி நாடாளுமன்ற உறுப்பினர்கள், மக்களவைக்குள் வந்ததாக எதிர்கட்சியினர் குற்றம் சாட்டினர். அந்த வாக்கெடுப்பு நடந்து முடிந்து, அதன் முடிவினை 'பெந்தாரா'விடம் கொடுத்து விட்டதாகவும், நேரம் தாழ்த்தி மக்களவையில் புகுந்த தேசிய முன்னணியின் நாடாளுமன்ற உறுப்பினர்கள் வாக்களிக்கும் பொருட்டு, அந்தப் பட்டியல் மீண்டும் அவர்களிடத்தில் கொடுக்கப்பட்டதாக எதிர்கட்சியினர் குறைக்கூறினர்.  

அதனைத் தொடந்து, எதிர்கட்சியினர் "பொய்..பொய்..பொய்.." என்று கூச்சலிட்டனர். தாமதமாக வந்தவர்களுக்கு வாக்களிக்கும் உரிமை வழங்கக்கூடாது என்று அவர்கள் ஆராவரம் செய்தனர். இந்த அமளி 15 நிமிடங்களுக்கு தொடர்ந்தது.

அதனைத் தொடர்ந்து, அந்தத் தீர்மானம் 51-52 என்ற வாக்கு வித்தியாசத்தில் தோல்வி கண்டதாக ரோனல்டு கியான்டி நாடாளுமன்றத்தில் தெரிவித்தார். அந்த முடிவினை மாற்றும் பொருட்டு, அந்த வாக்கெடுப்பு மீண்டும் தொடங்கப்பட வேண்டும் என்று எதிர்கட்சியினர் கேட்டுக் கொண்டனர். 

இந்த 51-52 என்ற எண்ணிக்கையில் அவர்களின் தீர்மானம் தோல்வி அடைவது நாடாளுமன்ற விதிமுறைகளுக்கு எதிரானது என்று பூச்சோங் நாடாளுமன்ற உறுப்பினர் கோபிந்த் சிங் தெரிவித்தார். "உங்களிடம் வாக்களிப்பு பட்டியல் கொடுத்தாகி விட்டது. ஏன் நீங்கள் மீண்டும் அதனை மற்றவர்களுக்காக மாற்றம் செய்தீர்கள்? இது நியாயமற்ற செயல்" என்று ரோனலிடம் கோபிந்த் தனது வருத்தத்தை தெரிவித்துக் கொண்டார். 

இதனிடையில், நாடாளுமன்ற உறுப்பினர்கள் குறிப்பிட்ட நேரத்திற்குள் உள்ளே வர வேண்டும் என்று எந்த விதிமுறையும் இல்லை என்று ரோனல்டு விளக்கினார். ஆனால், அவரின் விளக்கத்தை எதிர்கட்சியினர் ஏற்றுக் கொள்ளவில்லை. அந்த வாக்களிப்பு மீண்டும் நடத்தப்பட வேண்டும் என்று அவர்கள் கேட்டுக் கொண்டனர். அவர்களின் அந்த வேண்டுகோளைச் சட்டை செய்யாமல், மற்ற விவாதங்களை ரோனல்டு செவிமடுக்க தொடங்கினார்.. 

 

பினாங்கு, நவ.20- அண்மைய காலமாக, செய்தி ஊடகங்கள் தம்மைப் பற்றி யூகங்களை வெளியிடுவதில் அதிக அக்கறை காட்டுவதை நிறுத்திக் கொள்ள வேண்டும் என்று பினாங்கு மாநில 2-ஆவது துணை முதல்வர் பேராசிரியர் டாக்டர் இராமசாமி வலியுறுத்தினார். 

நடந்து முடிந்த ஜ.செ.க-வின் கட்சித் தேர்தலில், மத்திய ஆட்சிக் குழுவுக்கு போட்டியிட்டு தாம் 356 வாக்குகள் பெற்றதைச் சுட்டிக்காட்டிய டாக்டர் இராமசாமி, ஆட்சிக் குழுவுக்கு தாம் தேர்ந்தெடுக்கப்படவில்லை என்பது குறித்து வெவ்வேறு காரணங்களை அவரவர் விருப்பத்திற்கு ஏற்ப யூகம் செய்து, செய்தி வெளியிடுவதை சம்பந்தப்பட்ட ஊடகங்கள் கைவிட வேண்டும் என்றார். 

"கட்சித் தேர்தலில் வெற்றி-தோல்வி என்பதெல்லாம் ஜனநாயகத்தின் அடிப்படைக் கூறுகள் என்பதை நான் அறிவேன். நான் இதுவரை, தோல்வியைக் கண்டு சோர்ந்து போனது கிடையாது. தோல்விகள் என்னுடைய வெற்றிக்கான வழிகாட்டிகளாகவேகருதி வந்துள்ளேன்" என்று அவர் கூறினார். 

"சங்கப் பதிவகத்தின் கட்டாயத்தின் பேரில் ஜ.செ.க தேர்தல் நடந்தது என்பது அனைவரும் அறிந்த விஷயம். பொதுவாக கட்சித் தேர்தலின் போது போட்டியிடும் இதர வேட்பாளர்களைச் சார்ந்து இருப்பது என் வழக்கமல்ல. அத்தகைய சூழ்நிலை கூட எனக்கு வாக்குகள் குறைந்ததற்கு காரணமாக இருக்கலாம். ஆனால், இதுபற்றி நான் அதிகம் கவலைப்பட்டதில்லை. எனது குரல் எப்போதும் போலவே ஒலித்துக் கொண்டிருக்கும்" என்று டாக்டர் இராமசாமி அறிவுறுத்தினார். 

கட்சித் தேர்தலுக்குப் பின்னர், மத்திய ஆட்சிக் குழுவுக்கு ஒரு நியமன உறுப்பினராக கட்சி என்னை நியமித்து, சமான்ய மக்கள் சார்ந்த சேவைக் குழுவுக்கும் தலைவராகவும் ஆக்கியது. எனவே, எனது பணியோ அல்லது சேவையோ ஒருபோதும் தடைபடாது என்று அவர் தெரிவித்தார்.

இந்நிலையில், தமிழ் ஊடகங்கள் சில, அடிப்படை ஆதாரமற்ற முறையில் வெறும் யூகங்களை செய்திகளாக வெளியிடுகின்றன. ஜசெகவில் இராமசாமி ஓரங்கட்டப் படுவார் என்றும், நியமனப் பதவி எதுவும் அவருக்கு தரப்படவில்லை என்றும், கேமரன் மலைத் தொகுதியில் அவர் போட்டியிடக் கட்டாயப் படுத்தப்படுகிறார் என்றும் துணை முதல்வர் பதவி பறிக்கப்படும் என்றும் ஏகப்பட்ட யூகங்களை செய்திகளாக வெளியிடுகிறார்கள்.  

"நான் ஒன்றை குறிப்பிட்டுச் சொல்ல விரும்புகிறேன். தொடர்ந்து ஊடகங்கள் அடிப்படையற்ற யூகங்களை வெளியிட்டு வந்தால், வாசகர்கள் அந்த ஊடகங்களின் செய்திகள் மீது நம்பிக்கை இழந்து விடுவார்கள். நம்பகத்தன்மையை பத்திரிக்கைகள் இழந்து விடும் என்று அவர் சொன்னார்.

"நான் துணை முதல்வர் பதவியில் நீடித்து இருப்பேனா, இல்லையா? என்பதெல்லாம் கட்சித் தலைமைத்துவத்தின் முடிவைப் பொறுத்தது. பதவி எனக்கு முக்கியமல்ல. சாமன்ய மக்களுக்காக, இந்தியர்களுக்காக நான் உரக்கக் குரல் கொடுத்துக் கொண்டே இருப்பேன்" என்று டாக்டர் இராமசாமி குறிப்பிட்டார்.

 

 

 

 

 

 

 

 

சிங்கப்பூர், நவ.24- 'கிரேப்' காரில் பயணித்த பயணி ஒருவரிடம் தகாத முறையில் நடந்துக் கொண்ட 64 வயது கிரேப் கார் ஓட்டுநரான இங் செங் சீ என்ற நபருக்கு 16 மாதச் சிறைத் தண்டனையை நீதிமன்றம் விதித்தது. 

அந்தக் காரில் தன்னையறியாது தூங்கிய 21 வயது கல்லூரி மாணவி மானபங்கம் செய்ய முயன்ற அந்தக் கார் ஓட்டுநரின் செயல் கண்டிக்கத்தக்கது என்று அரசு தரப்பு வழக்கறிஞர் ஸ்ரூதி போப்பனா கூறினார். 

கல்லூரியில் நீண்ட நேரம் படிப்பில் நேரத்தை செலவிட்ட, பின்னர் காற்பந்து பயிற்சியில் ஈடுபட்டதால், களைப்பு அடைந்தார். பின்னர் அந்தப் பெண் பீர் அருந்தினார். 

அதன் பின்னர், 20 நிமிட தூரத்தில் இருக்கும் தனது வீட்டில் தன்னை இறக்கிவிடுமாறு கிரேப் கார் ஓட்டுனரான இங்-கிடம் கூறிவிட்டு, அசதியினால் அவர் அந்தக் காரிலேயே தூங்கி விட்டார். 

சுமார் 90 நிமிடங்கள் கழித்து யாரோ தன்னை உரசுவது அறிந்து திடுக்கிட்டு எழுந்த போது, அந்தக் கார் ஓட்டுநர் தம்மீது சாய்ந்துக் கொண்டு, தகாத முறையில் நடந்துக் கொண்டிருந்ததாக அந்த மாணவி நீதிமன்றத்தில் அழுதுக் கொண்டே கூறினார். 

அதிர்ச்சியுடன் விழித்தெழுந்தஅந்த மாணவி, அந்த ஓட்டுனருடன் 20 சிங்கப்பூர் டாலரை கொடுத்து விட்டு, தனது உடைமைகளைக் கூட எடுக்காமல், அங்கிருந்து தாம் வீட்டினுள் ஓடி விட்டதாக அவர் தெரிவித்தார். 

தனக்கு நடந்தது குறித்து தனது தாயாரிடம் தெரிவித்தப் பின்னர், அவர் இச்சம்பவம் குறித்து போலீசில் புகார் கொடுத்தார். 

அந்த மாணவி மன உளைச்சலுக்கு ஆளாகும் வண்ணம் நடந்துக் கொண்ட இங்கை எச்சரித்த நீதிபதி லூக் டான், 16 மாதம் சிறைத் தண்டனை விதித்துத் தீர்ப்புக் கூறினார்.

 

 

 

 

 

 

கோலாலம்பூர், நவ.24- வங்கிகளுக்கு பணத்தை ஏற்றிச் செல்லும் வேனைக் கொள்ளையடித்து 150,000 ரிங்கிட் பண மூட்டைகளுடன் இரு திருடர்கள், மோட்டார் சைக்கிளில் தப்பிச் சென்றனர். 

ஶ்ரீ செர்டாங் என்ற பகுதியுள்ள வங்கிக் கிளை ஒன்றின் முன், இன்று காலை மணி 10.30 அளவில் இந்தக் கொள்ளைச் சம்பவம் நிகழ்ந்தது. 

அந்த வங்கியின் முன்புறம் நிறுத்தி வைக்கப்பட்ட வேனிலிருந்த மூன்று பண மூட்டைகளை, தலைக்கவசம் அணிந்திருந்த இருவர் லாவகமாக தூக்கிக் கொண்டு, மோட்டார் சைக்கிளில் தப்பிச் சென்றனர் என்று செர்டாங் ஓசிபிடி துணை ஆணையர் மெகாட் முகமட் அமீனுடின் தெரிவித்தார். 

இக்கொள்ளைச் சம்பவம் தொடர்பில், அந்த வங்கியைச் சேர்ந்த நான்கு பாதுகாவலர்களை விசாரணைக்காக போலீசார் கைது செய்துள்ளதாக மெகாட் முகமட் கூறினார். மேலும், அருகிலுள்ள சிசிடிவி காமிராக்களையும் அவர்கள் சோதனை செய்து வருவதாக அவர் சொன்னார். 

இச்சம்பவத்தில், குறைந்த பட்சம் 150,000 ரிங்கிட் கொள்ளையடிக்கப் பட்டதாக தெரிவிக்கப்பட்டது. குற்றவியல் சட்டத்தின் 395-ஆவது பிரிவின் கீழ், இச்சம்பவம் விசாரிக்கப்படுகிறது. 

 

 

 

கோலாலம்பூர், நவ.24- பட்டறை ஒன்றுக்கு எதிராக பெட்ரோல் குண்டை வீசிய 30 வயது ஆடவன் ஒருவனுக்குஇங்குள்ள நீதிமன்றம்  6  ஆண்டு சிறைத் தண்டனை விதித்தது.

லியோங் குவான் ஒங் என்ற தண்ணீர் குழாயை பழுது பார்க்கும் தொழில் செய்து வந்த அந்த ஆடவனின் மீது சுமத்தப்பட்ட குற்றச்சாட்டு, மாண்ட்ரீன் மொழியில் வாசிக்கப்பட்டப் பின்னர், அவன் அந்தக் குற்றத்தை ஒப்புக்கொண்டான். 

கடந்த வாரம் அந்தப் பட்டறையைத் தீப்பிடிக்க வைத்து, அது முற்றாக அழிந்தது தொடர்பில், 20-ஆம் தேதியன்று அந்த ஆடவன் கைது செய்யப்பட்டான். 

இதனிடையே, சுபாங் ஜெயாவிலுள்ள வீடொன்றிலும் அந்த வெடிக் குண்டை வீசும் முயற்சியில் அவன் ஈடுபட்டான் என்றும் தெரிவிக்கப் பட்டுள்ளது. 

குற்றவியல் சட்டத்தின் 436ஆவது பிரிவின் கீழ் அந்த வழக்கு விசாரிக்கப்பட்டது. அந்தக் குற்றம் நிரூபிக்கப்பட்டால், 20 ஆண்டுச் சிறைத் தண்டனை மற்றும் அபராதம் விதிக்கப்படும் என்பது குறிப்பிடத்தக்கது. 

லியோங்கின் தரப்பில் வழக்கறிஞர் யாரும் ஆஜராகவில்லை. யாரையும் காயப்படுத்தும் எண்ணத்தில் தாம் அக்குற்றத்தைப் புரியவில்லை என்றும், நண்பர்களின் தூண்டுதலின் பேரில் தான் அந்தப் பெட்ரோல் குண்டை வீசியதாகவும் அவன் நீதிமன்றத்தில் தெரிவித்தான். மேலும், தமது செயலுக்கு அவன் மன்னிப்பும் கேட்டுக் கொண்டான்.  

 

Advertisement