Top Stories

Grid List

கோலாலம்பூர், மே.25- பிரதமர் நஜீப்பிற்கு கிடைத்த 2.6 பில்லியன் ரிங்கிட் தேர்தல் நன்கொடை நிதியிலிருந்து தமக்கும் பணம் தரப்பட்டதாக கூறப்படுவதை மறுத்தார் முன்னாள் துணைப் பிரதமர் டான்ஶ்ரீ மொகிதீன் யாசின்.

அம்னோவில் இருந்த போது மொகிதீன் மற்றும் ஷாபி அப்டால் கீழ் இயங்கி வந்த கிளைகளுக்கு அந்த தேர்தல் நன்கொடையிலிருந்து நிதி தரப்பட்டது என்று சுற்றுலா துறை அமைச்சர் நஸ்ரி அஸீஸ் குற்றம் சாட்டியதை மறுத்து மொகிதீன் இதனைத் தெரிவித்தார்.

“எங்களைப் பற்றி அவதூறு பரப்பவே இப்படியான குற்றச்சாட்டுக்கள் பரப்பப்படுகின்றன. எங்கள் இருவருக்கும் அந்த 2.6 பில்லியன் ரிங்கிட்டிலிருந்து ஒரு காசும் தரப்படவில்லை” என்றும் மொகிதீன் கூறினார்.

அம்னோ முன்னாள் உதவித் தலைவராக இருந்த ஷாபி அப்டாலும், தம் மீது நஸ்ரி சுமத்திய குற்றச்சாட்டை மறுத்துள்ளார். தனக்கு கீழ் இயங்கி வந்த கிளைகளுக்காக தாம் எந்தவொரு நிதியுதவியும் பெறவில்லை என்றார் அவர். 

ஆனால், அந்த 2.6 பில்லியன் ரிங்கிட்டிலிருந்து உம்ரா யாத்திரை மேற்கொள்வோருக்கு உதவி செய்வதைப் பற்றி மட்டுமே தாமும் பிரதமர் நஜீப்பும் பேச்சுவார்த்தை நடத்தியதாக ஷாபி அப்டால் தெரிவித்தார்.

கோலாலம்பூர், மே 25- அடுத்த பொதுத்தேர்தலில் வெல்ல முடியாமல் போனால் பிரதமர் வேட்பாளராக யாரை நிறுத்தினாலும் அதில் புண்ணியமில்லை என முன்னாள் பிரதமர் துன் டாக்டர் மகாதீர் முகமட் கூறினார். பிரிபூமி பெர்சத்து கட்சியின் தலைவரான அவர், யார் பிரதமர் வேட்பாளர் என்பதை விட தேர்தலில் ஜெயிப்பதே மிக முக்கியமானது என்றார்.

பிகேஆர் கட்சி சார்ந்த கருத்துக்கணிப்பில் பிரதமர் வேட்பாளருக்கான மக்களின் முதன்மை தேர்வு டத்தோஶ்ரீ அன்வார் இப்ராஹிம் தான் என்று தெரிவிக்கப்பட்டது குறித்து துன் மகாதீரிடம் கேட்கப்பட்ட கேள்விக்கு அவர் பதிலளித்தார்.

"அவர் வேட்பாளர்களில் ஒருவரே. ஆனால் இன்னும் உறுதிச் செய்யப்படவில்லை. நாம் (தேர்தலில்) வெற்றி பெற்றால் பின்னர் வேட்பாளர் யார் என்று முடிவு செய்யலாம்" என அவர் தெரிவித்தார்.

"தேர்தலில் ஜெயிக்கவில்லை என்றால் வேட்பாளருக்கான பெயர் மட்டும் போட்டுக் கொள்வதில் என்ன இருக்கிறது? தன்னை திருப்திப்படுத்திக் கொள்ளவா?" என துன் மகாதீர் கேள்வி எழுப்பினார். 

கோலாலம்பூர், மே.22- பிரதமர் நஜீப்பிற்கு கிடைத்த ரிம. 2.6 பில்லியன் நன்கொடைத் தொகை ஏற்படுத்திய சர்ச்சை இன்னும் தீராத நிலையில், அத்தொகையிலிருந்து டான்ஶ்ரீ மொகிதீன் யாசினுக்கும் டத்தோஶ்ரீ ஷாப்பி அப்டாலுக்கும் பங்கு கிடைத்தது என சுற்றுலா துறை அமைச்சர் டத்தோஶ்ரீ நஸ்ரி அஸீஸ் கூறினார்.

அம்னோவில் உறுப்பினர்களாக இருந்தபோது அவர்களுக்கு இப்பணம் தரப்பட்டது என்று நேற்று நடந்த கேள்வி-பதில் நிகழ்ச்சியில் அவர் தெரிவித்தார். 

“எனக்கும் அந்த பணத்திலிருந்து பங்கு கிடைத்தது. தேர்தல் நன்கொடையான அப்பணம், அம்னோ கிளைகளின் தேர்தல் பிரச்சாரத்திற்காகவும் கிளை உறுப்பினர்களின் வீடு பழுதுபார்ப்பதற்காகவும்  தரப்பட்டது. ஒவ்வொரு கிளைக்கும் ரிம 5000 கிடைத்தது. எனக்கு கீழ் இயங்கிய கிளைகளுக்கான 10 லட்சம் ரிங்கிட் என்னிடம் தரப்பட்டது” என்றார் நஸ்ரி.

நஸ்ரியை விட, மொகிதீன் யாசின் மற்றும் ஷாப்பி அப்டால் கீழ் அதிக கிளைகள் இயங்கி வந்ததால் அவர்களுக்கு அதிக பணம் கிடைத்திருக்க வாய்ப்புள்ளது என்று அவர் மேலும் கூறினார். 

ஆனால், பணம் வாங்கியபோது கேள்வி ஏதும் அவர்கள் கேட்கவில்லை. அப்பணத்தின் மூலத்தையும் அவர்கள் விசாரிக்கவில்லை. ஆனால், அவர்களின் அரசியல் ஆசை நிறைவேறாத போது பல கேள்விகளை எழுப்புகின்றனர்.

தேர்தலுக்கு நன்கொடைப் பெறுவது தவறில்லை. மேலும், தேர்தல் நன்கொடையான அப்பணம் நஜீப்பின் சொந்த வங்கி கணக்கில் இருப்பதிலும் எந்தவித தவறும் இல்லை என்றும் நஸ்ரி கூறினார். 

“அவரது சொந்த கணக்கில் இருந்தால் தான் எவ்வளவு பணம் செலவு செய்யப்படுகிறது என்று நஜீப்பிற்கு தெரியும். இல்லையேல் செலவீனங்களை கணக்கு செய்வதில் கடினம் ஏற்படும்” என்றும் நஸ்ரி சொன்னார்.

கடந்த பொதுத் தேர்தலுக்கு அந்நன்கொடை பணத்திலிருந்து அம்னோ செய்த செலவு கிட்டத்தட்ட ரிம. 60 கோடி என்றும் நஸ்ரி விவரித்தார்.

கோலாலம்பூர், மே.27- நான்கு வயது சிறுமியை இரக்கமற்ற முறையில் அடித்துத் துன்புறுத்திக் கொடுமைகள் புரிந்த ஒரு தாயும் அவளுடைய காதலனும் கைது செய்யப்பட்டனர்.

இந்தச் சிறுமி மிக மோசமான முறையில் அடித்துத் துன்புறுத்தப் பட்டுள்ளாள். அவளுடைய பிறப்பு உறுப்பில் கூட காயங்கள் இருக்கின்றன. தலையில் கடுமையாக காயமடைந்து தையல் போடப்பட்டிருந்தது. உடல் முழுவதும் காயங்களுடன் அந்தச் சிறுமியின் புகைப்படங்கள் அண்மையில் சமூக ஊடகத்தில் வெளியாகி பெரும் அதிர்ச்சியை ஏற்படுத்தியது.

கடந்த 24 ஆம் தேதி அந்தப் படங்கள் வெளியாகியுள்ளன. மேலும், அதனை வெளியிட்டவர், இந்தச் சிறுமியின் தந்தை இது குறித்து மருத்துவமனையில் போலீசில் புகார் செய்ய முயன்ற போது அந்தப் புகாரை போலீசார் ஏற்க மறுத்ததாக சுட்டிக்காட்டி இருந்தார்.

இதனிடையே இந்த சிறிமியின் சித்ரவதை தொடர்பாக அவளுடைய தாயாரும் அவரின் காதலனும் கைது செய்யப்பட்டிருப்பதாக கோலாலம்பூர் போலீஸ் படைத் தலைவர் டத்தோ அமார் சிங் தெரிவித்தார்.

போலீசாரின் உத்தரவைத் தொடர்ந்து அவர்கள் இருவரும் உலுயாம் பாருவில் போலீசாரிடம் சரணடைந்திருக்கின்றனர்.

சிறார் சட்டத்தின் 31(1)(a) பிரிவின் கீழ் தற்போது இவர்கள் விசாரிக்கப்பட்டு வருகின்றனர் என்று டத்தோ அமார் சிங் சொன்னார்.

அதேவேளையில், போலீசார் புகாரை ஏற்க மறுத்ததாக வெளிவந்த தகவலை மறுத்தார் டத்தோ அமார் சிங்.

சிறுமியின் தந்தை முன்பு வழங்கிய புகாரை பின்னர் மீட்டுக் கொண்டதாகவும் தன்னுடைய முன்னாள் மனைவியான அந்தத் தாய், சிறுமியின் காயங்கள் தொடர்பில் மன்னிப்புக் கேட்டுக் கொண்டதால் அவர் புகாரை வாபஸ் பெற்றதாகவும் டத்தோ அமார் சிங் விளக்கினார்.

கோத்தா கினாபாலு, மே.27- மலாயா பல்கலைக் கழகத்தைச் சேர்ந்த முன்னாள் விரிவுரையாளரான டாக்டர் மஹ்முட் அகமட் இப்பிராந்திய ஐஎஸ் பயங்கரவாத இயக்கத்தின் தலைமைப் பொறுப்புக்கு நியமிக்கப்படவுள்ளார் உள்ளார் என்று தகவல்கள் வெளிவந்துள்ளன.

தென்பிலிப்பைஸ்சிலுள்ள மராவி பகுதியில் பதுங்கி இருப்பதாக கருதப்படும் டாக்டர் மஹ்முட், நடப்புத் தலைவரான இஸ்னிலோன் ஹபிலோன் படுகாயமடைந்திருப்பதால் அவருக்கு மரணம் நிகழ்ந்தால் அந்த இடதிற்கு வருவர் என்று கூறப்படுகிறது.

மராவி பகுதியில் பிலிப்பைன்ஸ் இராணுவத்துடன் ஐஎஸ் தீவிரவாதிகள் தற்போது சண்டையிட்டு வருகின்றனர். கடந்த சில தினங்களாக நடக்கும் இந்தச் சண்டையில் இரண்டு மலேசிய ஐஎஸ் தீவிரவாதிகளும் கொல்லப்பட்டுள்ளனர்.

கடந்த ஆண்டில் பிலிப்பைசுக்கான ஐஎஸ் இயக்கத்தின் தலைவனாக இஸ்னிலோன் அறிவிக்கப்பட்டிருந்தார். எனினும், கடந்த இரண்டு மாதங்களுக்கு முன்பு நடத்த ஒரு சண்டையில் இஸ்னிலோன் படுகாயமடைந்தார்.

தென்கிழக்காசிய ஐஎஸ் தீவிரவாதிகளிகளுக்கான தலைமைப் பதவிக்கு புதியவர் ஒருவரை நியமிப்பதில் அந்த இயக்கத்தின் உச்சத்தலைவரான அபு பக்கிர் அல் பாக்தாதி முயன்று வருவதாக கூறப்பட்டது.

அப்பொறுப்பில் இருந்த மலேசியாவைச் சேர்ந்த முகமட் வாண்டி முகமட் ஜெடி அண்மையில் சிரியாவிலுள்ள ரக்கா நகரில் ஆளில்லா இரகசிய விமானம் மூலம் நடத்தப்பட்ட ராக்கெட் தாக்குதலில் மாண்டார்.

தற்போது பாக்தாதியின் நம்பிக்கைக்குரிய ஓர் ஆளாக டாக்டர் மஹ்முட் இருந்துவருவதாக கூறப்படுகிறது. மலேசியா, சிங்கப்பூர் மற்றும் இந்தோனியாவில் செயல்பட்டு வரும் பல்வேறு இரகசிய ஐஎஸ் பிரிவுகளை ஒருங்கிணைத்து தென்கிழக்காசியாவின் அதிகாரப்பூர்வமான ஒரே ஐஎஸ் இயக்கமாக ஆக்குவதற்கு டாக்டர் மஹ்முட் திட்டமிட்டு வருவதாக கூறப்பட்டது.

கோலாலம்பூர், மே.27- சிங்கப்பூரில் நேற்றிரவு நடந்த எம்எம்ஏ  கலப்பு தற்காப்புக் கலை, ஒன் சாம்பியன்ஷிப் போட்டியில் மலேசியாவின் இளம் வீரரான அகிலன் தாணி அமெரிக்க வீரரிடம் தோல்வி கண்டார்.

வால்டர்வெய்ட் பிரிவுக்கான இந்த சாம்பியன் போட்டியின் இறுதிச் சுற்றுக்குத் தேர்வு பெற்றிருந்த செந்தூலைச் சேர்ந்த அகிலன், அமெரிக்காவின் பென் அஸ்க்ரேனுடன் மோதினார். 

முன்னாள் ஒலிம்பிக் மல்யுத்த வீரரான பென் அஸ்க்ரேனின் அனுபவம் அவருக்குக் கைகொடுத்தது. நடப்புச் சாம்பியனான பென் தொடக்கம் முதலே முன்னேறினார். 

அகிலனை மடக்கி கீழே சாய்த்த அவர், தொடர்ந்து அகிலனை மடக்க முடியவில்லை சிறிது நேரப் போராட்டத்திற்குப் பின்னர் அதிலிருந்து ஆவேசமாக தன்னை விடுவித்துக்கொண்டு அகிலன் வெளியேறினார். 

எனினும், அடுத கணமே மீண்டும் அகிலன் கீழே சாய்த்த பென், கடைசி வரை அகிலன் அதிலிருந்து மீளமுடியாத வகையில் கிட்டத்தட்ட 2 நிமிடம் 22 வினாடிகள் மடக்கி வைத்திருந்ததைத் தொடர்ந்து அகிலனின் தோல்வி உறுதியானது.

இந்த வெற்றியுடன் சேர்த்து இதுவரை 16 போட்டிகளில் தொடர்ச்சியாக பென் வென்றுள்ளார் என்பது குறிப்பிடத்தக்கது.

Advertisement