காஜாங், செப்.25- மெர்டேக்கா தினத்திற்கு முதல் நாள் நடத்தப்பட்ட அதிரடி நடவடிக்கையில் கைது செய்யப்பட்ட 4 கட்டுமான பணியாளர்கள், அபு சயாப் பயங்கரவாதக் கும்பலுடன் தொடர்பு வைத்திருந்தனர் என இன்று செசன்ஸ் நீதிமன்றத்தில் குற்றஞ்சாட்டப்பட்டது.

இவர்களில் கடந்த 2010ஆம் ஆண்டு முதல் அபு சயாப் கும்பலில் ஈடுபட்டுவரும் 25 வயதான ஹஜார் அப்துல் முபினும் அடங்குவார். அபு சயாப் கும்பலின் முக்கிய புள்ளியான இவர் மீது குற்றவியல் சட்டம் பிரிவு 130-கே.ஏ.-இன் கீழ் குற்றம் சுமத்தப்பட்டது. குற்றம் நிருபிக்கப்பட்டால் ஆயுள் தண்டனையும் அபராதமும் விதிக்கப்படலாம்.

அவருடன் 52 வயதான அமாட் ஒமார், 26 வயதான ஜபார் அமாட் மற்றும் 25 வயதான அப்துல் ஷமிர் டப்லின் என்ற பிலிப்பைன்ஸ் பிரஜையும் கைது செய்யப்பட்டனர். 

பயங்கரவாதச் செயல் மீதான தகவல்கள் பிரசாரத்தில் ஈடுபட்டதாக குற்றவியல் சட்டப் பிரிவு 130-எம், கீழ் இவர்கள் குற்றஞ்சாட்டப்பட்டனர். இக்குற்றச்சாட்டு நிருபிக்கப்பட்டால் 7 ஆண்டுகளுக்கு மேல் சிறைத்தண்டனையும் அபராதமும் விதிக்கப்படலாம்.

அவர்கள் நால்வரும் குற்றவியல் சொஸ்மா சிறப்புச் சட்டத்தின் கீழ் கைது செய்யப்பட்டதால் ஜாமீன் அனுமதிக்கப் படவில்லை. வரும் அக்டோபர் மாதம் 16ஆம் தேதி உயர்நீதிமன்றத்தில் இந்த வழக்கு தொடர்ந்து விசாரணைக்கு வருகிறது.

 கோலாலம்பூர், செப்.25- பொதுத் தேர்தலுக்காக தேர்ந்தெடுக்கப்பட்ட மசீச வேட்பாளர்களில் 50 விழுக்காடு வேட்பாளர்கள் புதிய முகங்கள் என்று என்று மசீச தலைவர் டத்தோஸ்ரீ லியோவ் தியோங் லாய் கூறினார்.

தேசிய முன்னணி தலைவர் டத்தோஸ்ரீ நஜிப் துன் ரசாக்கின் ஒப்புதலுக்காக கட்சி வேட்பாளர்களின் பட்டியல் அனுப்பட்டுள்ளது என்று அவர் தெரிவித்தார். 

புதிய வேட்பாளர்களால் மக்கள் மகிழ்ச்சி அடைந்திருப்பதால் அடுத்த பொதுத் தேர்தலைச் சந்திக்க மசீச முழுமையாக ஆயுத்தமாகிவிட்டது என்று லியோவ் சொன்னார்.

தேசிய முன்னணி கட்சிகளுக்கு இடையில் ஏற்கனவே ஒப்புக்கொள்ளப்பட்ட தொகுதி ஒதுக்கீடுகளை மசீச தொடர்ந்து கடைப்பிடிக்கும் என்றார் அவர். மேலும், தொகுதி ஒதுக்கீடுகளில் ஏதேனும் மாற்றம் ஏற்பட்டால் தனிப்பட்ட முறையில் பேச்சுவார்த்தை நடத்தப்படும். 

தொகுதி ஒதுக்கீடு சம்பந்தப்பட்ட விவகாரங்கள் உயர்மட்ட நிலையில் விவாதிக்கப்படும் என்று அவர் சுட்டிக்காட்டினார்.

இதனிடையே, கோலாலம்பூர் மாநகரின் வளர்ச்சிக்குப் பக்கபலமாக இருக்கும் மசீசக்கும் இதர தேசிய முன்னணிக் கட்சிகளுக்கும் ஆதரவு அளிக்கும்படி தலைநகரைச் சேர்ந்த சீன வாக்காளர்களை லியோவ் கேட்டுக் கொண்டார்.

2017ஆம் ஆண்டின் மசீச கூட்டரசு பிரேதேச மசீச மாநாட்டை திறந்து வைத்த நிகழ்ச்சியில் கலந்து கொண்ட போது லியோவ் இதனைச் செய்தியாளர்களிடம் தெரிவித்தார்.

கோலாலம்பூர், செப்.24- மலேசியா முழுமையிலும் எந்தவொரு தொகுதியிலும் இந்திய வாக்காளர்கள் பெரும்பான்மையைக் கொண்டிருக்க வில்லை. எனவே, எல்லா இன மக்களின் ஆதரவையும் பெறக்கூடிய வகையிலான வேட்பாளர்களை மஇகா அடுத்த பொதுத் தேர்தலில் நிறுத்தவேண்டும் என்று பிரதமர் டத்தோஶ்ரீ நஜிப் கேட்டுக் கொண்டார்.

ஜெயிக்கிற வேட்பாளர்களை மஇகா கண்டறிந்து நிறுத்த முன்வரவேண்டும். தகுதியும் அனைத்து இனத்தவர்களும் ஏற்றுக்கொள்ளத் தக்கவர்க ளாகவும் விளங்கக்கூடிய வேட்பாளர்களை அது முன்மொழியவேண்டும் என்று தேசிய முன்னணியின் தலைவருமான நஜிப் வலியுறுத்தினார். 

இங்கு புத்ரா உலக வாணிப மையத்தில் மஇகாவின் 71ஆவது தேசிய பேராளர்கள் மாநாட்டை தொடக்கிவைத்து உரையாற்றிய போது பிரதமர் நஜிப் மேற்கண்டவாறு வலியுறுத்தினார்.

சுமார் 4,000 பேராளர்கள் கலந்து கொண்ட இந்த மாநாட்டில், பிரதமருக்கு மஇகாவின் தேசிய தலைவர் டத்தோஶ்ரீ டாக்டர் சுப்பிரமணியம் மாலை அணிவித்துச் சிறப்புச் செய்தார். தேசிய முன்னணி பங்காளிக் கட்சிகளின் தலைவர்கள் இந்த மாநாட்டில் கலந்து கொண்டனர். அண்மையில் துன் விருது பெற்ற மஇகாவின் முன்னாள் தேசியத் தலைவர் துன் சாமிவேலுவும் இந்த மாநாட்டில கலந்து கொண்டு சிறப்பித்தார்.

கடந்த தேர்தல்களில் போட்டியிட்ட தொகுதிகளில் மீண்டும் போட்டியிடவேண்டும் என மஇகா விரும்பினால், பல இன மக்களையும் கவரக்கூடிய வேட்பாளர்களை மட்டுமே நிறுத்தவேண்டும் என்ற எனது இந்தக் கோரிக்கையே இறுதியான முடிவாகும் இருக்கும் என்று அவர் சொன்னார்.

மேற்கண்ட அம்சத்தை வலியுறுத்திப் பேசிய பிரதமர் நஜிப், தெலுக் கெமாங் தொகுதியை உதாரணமாகச் சுட்டிக்காட்டினார். இங்குள்ள வாக்காளர்கள் குறிப்பிட்ட கட்சிகளைச் சேர்ந்தவர்கள் மட்டுமில்லை. மாறாக, இராணுவ வீரர்களும் கணிசமாக உள்ளனர். எனவே தான் அனைத்து மக்களாலும் ஏற்றுக்கொள்ளக் கூடிய வேட்பாளர்களை மஇகா நிறுத்த வேண்டும் என்று கேட்டுக் கொள்கிறேன் என்று பிரதமர் சொன்னார்.

இதனிடையே அண்மையில் சமயப் பள்ளியில் நடந்த தீ விபத்தில் 23 பேர் உயிரிழந்த துயரச் சம்பவத்தின் போது மஇகா தேசியத்தலைவர் டாக்டர் சுப்பிரமணியம் காட்டிய அக்கறையையும் மனிதாபிமானத்தையும் கண்டு தாம் வியந்து போனதாக குறிப்பிட்டார் பிரதமர் நஜிப்.

மஇகாவின் மூத்த தலைவரான துன் சம்பந்தனுக்கு பிறகு 'துன்' விருதுக்கு டத்தோஶ்ரீ சாமிவேலுவின் பெயரை தாம் பேரரசருக்கு முன்மொழிந்ததாகவும் பிரதமர் சுட்டிக்காட்டிய போது பேராளர்கள் கரவொலி எழுப்பி வரவேற்றனர்.

ஜார்ஜ்டவுன், செப்.24- அடுத்த ஓரிரு மாதங்களில் பொதுத்தேர்தலை நடத்தத் திட்டமிட்டிருந்த பிரதமர் நஜிப், இப்போது அந்தத் திட்டத்தைக் கைவிட்டார் என்றும் அடுத்த ஆண்டில்தான் தேர்தல் நடத்தப்படும் என்றும் முன்னாள் பிரதமர் துன் மகாதீர் கூறினார்.

மக்களிடையே எதிர்க்கட்சிகளுக்கு ஆதரவு அதிகரித்து வருவதை நஜிப் அறிந்து கொண்டதால் இந்த மாற்றம் நடந்துள்ளது. தேசிய முன்னணி தனது வாக்கு வங்கியாக நம்பிக்கொண்டிருந்த சபா மற்றும் சரவாவில் நிலைமை ஆட்டம் கண்டுள்ளது அங்குள்ள வாக்காளர்களின் ஆதரவு எதிர்க்கட்சி கூட்டணியின் பக்கம் திரும்பி வருகிறது என்றார் அவர்.

'முன்பெல்லாம் நாங்கள் நிச்சயமாக ஜெயிப்போம். சபாவிலும் சரவாவிலும் வெற்றி எங்களுக்குத்தான்' என்று கூறி வந்த நஜிப், இப்போது அப்படியெல்லாம் பேசும் துணிவுடன் இல்லை என்று 92 வயதுடைய முன்னாள் பிரதமரான துன் மகாதீர் சொன்னார்.

இதனால்தான் இப்போதைக்கு பொதுத்தேர்தலை அவர் நடத்தமாட்டார். அப்படிப்பட்ட திட்டத்தை அவர் கைவிட்டு விட்டார். அடுத்த ஆண்டில்தான் தேர்தல் நடக்கக்கூடும் என்று இங்கு நடந்த கூட்டம் ஒன்றில் பக்காத்தான் ஹராப்பான் கூட்டணியின் அவைத் தலைவருமான மகாதீர் கூறினார்.

 கோலாலம்பூர், செப் 23- ம.இ.கா ஒரு முக்கிய காலக்கட்டத்தில் இருக்கிறது. 14 ஆவது பொதுத்தேர்தலை நாம் சந்திக்கப் போகிறோம். கட்சியின் எதிர்காலத்தை நிர்ணயிக்கக்கூடிய சவால்மிக்க பொதுத்தேர்தலாக இது இருக்கப் போகிறது  என்று ம.இ.காவின் தேசிய தலைவர் டத்தோஶ்ரீ டாக்டர் சுப்பிரமணியம் அறிவுறுத்தினார். 

கட்சிக்குள் போட்டி பொறாமைக்கும், உட்பூசலுக்கும், முற்றுப்புள்ளி வைக்கா விட்டால் எதிர்க்கட்சிகள் நம்மை தோற்றடிக்க வேண்டியதில்லை. நம்மை நாமே தோற்றடித்துக் கொள்வோம் என்று எச்சரிக்கை விடுத்தார்.

இன்று புத்ரா உலக வாணிப மையத்தின் அருகிலுள்ள டேவான் துன் ரசாக்கில் நடந்த ம.இ.கா தேசிய பேராளர் மாநாட்டில் கொள்கை உரை நிகழ்த்திய போது சுகாதார அமைச்சரான டத்தோஶ்ரீ சுப்பிரமணியம் மேற்கண்ட எச்சரிக்கையை விடுத்தார். சுமார் 4 ஆயிரம் பேராளர்களுடன் இந்த இரண்டு நாள் மாநாடு இங்கு தொடங்கியது.

2008-ஆம் ஆண்டுப் பொதுத் தேர்தலிலும் 2013ஆம்ஆண்டு பொதுத் தேர்தலிலும் தேசிய முன்னணி சரிவைக் கண்டுள்ளது. மூன்றில் இருபங்கு பெரும்பான்மையை இழந்தது என்று சுட்டிக்காட்டினார். தம்முடைய உரையில் அவர் மேலும் கூறியதாவது: 

கடந்த பொதுத் தேர்தலில் ஒன்பது நாடளுமன்றத் தொகுதிகளில் போட்டியிட்டு 4 தொகுதிகளில் மட்டுமே ம.இ.கா வென்றது. 18 சட்டமன்றத் தொகுதிகளில் ஐந்தில் மட்டுமே வென்றது.

அடுத்து வரவிருக்கும் 14-ஆவது பொதுத்தேர்தலில் ம.இ.கா கூடுதலான தொகுதிகளில் வெற்றியை ஈட்ட வேண்டிய கட்டாயத்தில் இருக்கிறது. இல்லையேல், நமது எதிர்காலம் கேள்விக்குறியாகி விடும். 

நாம் கூடுதலான தொகுதிகளில் வெற்றிப் பெறத் தவறினால், தேசிய முன்னணியில் நம்முடைய பிரதிநிதித்துவம் இல்லாமல் போகலாம். அதற்கு மாற்றாக, பிற இந்திய கட்சிகள் தேசிய முன்னணியில் பிரதிநிதித்துவம் பெற நேரலாம். இத்தகைய சூழ்நிலையை ம.இ.காவிலுள்ள அனைவரும் உணர்ந்து செயல்பட வேண்டும். முழுமையான ஆதரவைத் திரட்ட வேண்டும்.

ஆளுக்கு ஆள் வேட்பாளர்களை பிரகடனம் செய்வது நிறுத்தப் படவேண்டும். ஒரு தொகுதியில் மூன்று வேட்பாளர்களை எல்லாம் நிறுத்தமுடியாது. ஒரு தொகுதிக்கு, கட்சி ஒரு வேட்பாளரைதான் நிறுத்த முடியும் என்பதை கவனத்தில் வையுங்கள். எனவே, ஆளுக்கு ஆள் வேட்பாளரை அறிவிப்பதை நிறுத்துங்கள். இது நமக்கு நாமே குழிப்பறித்துக் கொள்வதற்கு சமமாகிறது.

எனவே, ம.இ.கா ஒன்றுபட்டு மக்களின் ஆதரவைத் திரட்டும் பணிகளில் ஈடுபடுவது அவசியம். போட்டி, பொறாமைகளை கைவிடாவிட்டால் நம்முடைய தோல்வியை நாமே தேடிக் கொண்டது போல ஆகிவிடும். அம்னோவுக்கு அடுத்து அதிகமான வாக்காளர்களைப் பதிவு செய்த கட்சியாக ம.இ.கா விளங்குகிறது. இந்தப் பணி தொடரவேண்டும். 

மேற்கண்டவாறு ம.இ.கா பேராளர் மாநாட்டில் டத்தோஶ்ரீ டாக்டர். சுப்பிரமணியம் தமது உரையில் வலியுறுத்தினார்.  

 

 

கோலாலம்பூர், செப்.22- மஇகாவின் 71ஆவது ஆண்டுப் பேரவைக் கூட்டம் நாளை தொடங்கி இரண்டு நாள்களுக்கு நடைபெறவிருக்கும் நிலையில், இம்முறை மாநாட்டில் அடுத்த பொதுத் தேர்தலுக்கான விவரங்கள் அதிக விவாதத்திற்கு உள்ளாகும் என்ற எதிர்பார்ப்பு நிலவுகிறது. 

தேசிய அளவில் கிளைத் தலைவர்கள் உள்பட 4 ஆயிரம் பேராளர்கள் இந்த மாநாட்டில் பங்கேற்கும் இந்த மாநாட்டில், பொதுத்தேர்தலை எதிர் கொள்வதற்கான ம.இ.காவின் தயார்நிலை குறித்து பல கேள்விகள் எழக்கூடும்.

மேலும், கட்சியின் அமைப்பு விதிகளில் திருத்தங்கள் செய்யப்படவும் வாய்ப்புகள் இருப்பதாக கூறப்படுகிறது. 

அடுத்த ஆண்டு ஜூன் மாதத்திற்குள் நடைபெறவிருக்கும் பொதுத் தேர்தலில் மிகச் சிறந்த வெற்றிகளைக் குவிக்கும் வியூகங்களை ம.இ.கா ஆராய்வதற்கு இந்த மாநாட்டை சிறந்த அடித்தளமாக பயன்படுத்திக் கொள்ளும்படி பேராளர்களுக்கு ம.இ.கா. தலைமைச் செயலாளர் டத்தோ சக்திவேல் ஆலோசனை கூறினார்.

ம.இ.கா. மீது இந்திய சமுதாயத்தின் நம்பிக்கையை மீட்டெடுப்பதற்கான வியூகங்களை பேராளர்கள் விவாதிக்க வேண்டும். இதன் வழி, கடந்த பொதுத்தேர்தலில் இழந்த தொகுதிகளைக் கட்சி மீண்டும் கைப்பற்ற முடியும் என்றார் அவர்.

சமூகநலம், பொருளாதாரம், கல்வி ஆகியவை குறித்தும் இந்திய சமுதாயம் ஆதிக்கம் பெறுவதற்கான வியூகங்கள் குறித்து இரண்டு நாள் மாநாடு விவாதிக்கும் என்று அவர் சொன்னார்.

கோலாலம்பூர், செப்.17- அம்னோவின் முன்னாள் உதவித் தலைவரும் சிலாங்கூரின் முன்னாள் மந்திரிபுசாருமான டான்ஶ்ரீ முகம்மட் தாய்ப் மீண்டும் அம்னோவில் சேர்ந்துள்ளார் என இன்று பிரதமர் டத்தோஶ்ரீ நஜிப் அறிவித்தார்.

அவர் பிகேஆர் கட்சியை விட்டு வெளியேற முடிவு செய்து விட்டார். எதிர்க்கட்சிகளின் போராட்டம் அர்த்தமற்றது என்பதை அவர் உணர்ந்து கொண்டதால் அம்னோவுக்கே திரும்ப அவர் முடிவு செய்ததாக நஜிப் சுட்டிக்காட்டினார்.

இன்று அம்னோ தலைமையகத்தில் பிரதமரும் அம்னோ தேசியத் தலைவருமான நஜிப்பின் தலைமையில் நடந்த செய்தியாளர்கள் கூட்டத்தில் இந்த அறிவிப்புச் செய்யப்பட்டது. அப்போது அந்தக் கூட்டத்தில் டான்ஶ்ரீ முகம்மட் தாய்ப்பும் உடனிருந்தார்.

அவர் அம்னோவுக்கு திரும்பி இருப்பதானது, கட்சியை மேலும் வலுப்படுத்த உதவும். எதிர்க்கட்சிகளின் போராட்டம் என்பது முகம்மட் தாய்ப்பின் தனிப்பட்ட நம்பிக்கைகளுக்கு மாறானதாக இருக்கிறது என்று நஜிப் விளக்கினார்.

கடந்த 2013-ஆம் ஆண்டில் அம்னோவை விட்டு பாஸ் கட்சியில் சேர்ந்த முகம்மட் தாய்ப் பின்னர் பிகேஆர் கட்சியில் இணைந்தார் என்பது குறிப்பிடத்தக்கது.

More Articles ...