பினாங்கு, நவ.20- அண்மைய காலமாக, செய்தி ஊடகங்கள் தம்மைப் பற்றி யூகங்களை வெளியிடுவதில் அதிக அக்கறை காட்டுவதை நிறுத்திக் கொள்ள வேண்டும் என்று பினாங்கு மாநில 2-ஆவது துணை முதல்வர் பேராசிரியர் டாக்டர் இராமசாமி வலியுறுத்தினார். 

நடந்து முடிந்த ஜ.செ.க-வின் கட்சித் தேர்தலில், மத்திய ஆட்சிக் குழுவுக்கு போட்டியிட்டு தாம் 356 வாக்குகள் பெற்றதைச் சுட்டிக்காட்டிய டாக்டர் இராமசாமி, ஆட்சிக் குழுவுக்கு தாம் தேர்ந்தெடுக்கப்படவில்லை என்பது குறித்து வெவ்வேறு காரணங்களை அவரவர் விருப்பத்திற்கு ஏற்ப யூகம் செய்து, செய்தி வெளியிடுவதை சம்பந்தப்பட்ட ஊடகங்கள் கைவிட வேண்டும் என்றார். 

"கட்சித் தேர்தலில் வெற்றி-தோல்வி என்பதெல்லாம் ஜனநாயகத்தின் அடிப்படைக் கூறுகள் என்பதை நான் அறிவேன். நான் இதுவரை, தோல்வியைக் கண்டு சோர்ந்து போனது கிடையாது. தோல்விகள் என்னுடைய வெற்றிக்கான வழிகாட்டிகளாகவேகருதி வந்துள்ளேன்" என்று அவர் கூறினார். 

"சங்கப் பதிவகத்தின் கட்டாயத்தின் பேரில் ஜ.செ.க தேர்தல் நடந்தது என்பது அனைவரும் அறிந்த விஷயம். பொதுவாக கட்சித் தேர்தலின் போது போட்டியிடும் இதர வேட்பாளர்களைச் சார்ந்து இருப்பது என் வழக்கமல்ல. அத்தகைய சூழ்நிலை கூட எனக்கு வாக்குகள் குறைந்ததற்கு காரணமாக இருக்கலாம். ஆனால், இதுபற்றி நான் அதிகம் கவலைப்பட்டதில்லை. எனது குரல் எப்போதும் போலவே ஒலித்துக் கொண்டிருக்கும்" என்று டாக்டர் இராமசாமி அறிவுறுத்தினார். 

கட்சித் தேர்தலுக்குப் பின்னர், மத்திய ஆட்சிக் குழுவுக்கு ஒரு நியமன உறுப்பினராக கட்சி என்னை நியமித்து, சமான்ய மக்கள் சார்ந்த சேவைக் குழுவுக்கும் தலைவராகவும் ஆக்கியது. எனவே, எனது பணியோ அல்லது சேவையோ ஒருபோதும் தடைபடாது என்று அவர் தெரிவித்தார்.

இந்நிலையில், தமிழ் ஊடகங்கள் சில, அடிப்படை ஆதாரமற்ற முறையில் வெறும் யூகங்களை செய்திகளாக வெளியிடுகின்றன. ஜசெகவில் இராமசாமி ஓரங்கட்டப் படுவார் என்றும், நியமனப் பதவி எதுவும் அவருக்கு தரப்படவில்லை என்றும், கேமரன் மலைத் தொகுதியில் அவர் போட்டியிடக் கட்டாயப் படுத்தப்படுகிறார் என்றும் துணை முதல்வர் பதவி பறிக்கப்படும் என்றும் ஏகப்பட்ட யூகங்களை செய்திகளாக வெளியிடுகிறார்கள்.  

"நான் ஒன்றை குறிப்பிட்டுச் சொல்ல விரும்புகிறேன். தொடர்ந்து ஊடகங்கள் அடிப்படையற்ற யூகங்களை வெளியிட்டு வந்தால், வாசகர்கள் அந்த ஊடகங்களின் செய்திகள் மீது நம்பிக்கை இழந்து விடுவார்கள். நம்பகத்தன்மையை பத்திரிக்கைகள் இழந்து விடும் என்று அவர் சொன்னார்.

"நான் துணை முதல்வர் பதவியில் நீடித்து இருப்பேனா, இல்லையா? என்பதெல்லாம் கட்சித் தலைமைத்துவத்தின் முடிவைப் பொறுத்தது. பதவி எனக்கு முக்கியமல்ல. சாமன்ய மக்களுக்காக, இந்தியர்களுக்காக நான் உரக்கக் குரல் கொடுத்துக் கொண்டே இருப்பேன்" என்று டாக்டர் இராமசாமி குறிப்பிட்டார்.

 

 

 

 

 

 

 

கோலாலம்பூர், நவ.16- ம.இ.கா உதவித் தலைவர் டத்தோ டி.மோகன் இன்று டேவான் நெகாராவில் செனட்டராக பதவியேற்றார். மூன்று ஆண்டுக் காலம் அவர் இப்பதவியை வகிப்பார். 

டேவான் நெகாரா சபாநாயகர் டான்ஶ்ரீ எஸ்.விக்னேஸ்வரன் முன்னிலையில் அவர் இப்பதவியை ஏற்றுக் கொண்டார். 2009-ஆம் ஆண்டிலிருந்து 2013-ஆம் ஆண்டு வரை மஇகா தேசிய இளைஞர் பிரிவின் தலைவராக மோகன் பொறுப்பேற்றிருந்தார் என்பது குறிப்பிடத்தக்கது.

பதவியேற்றப் பின்னர், பிரதமர் டத்தோஶ்ரீ நஜிப்பின் தலைமைத்துவத்திற்கும் மஇகா தேசியத் தலைவர் டத்தோஶ்ரீ டாக்டர் எஸ்.சுப்ரமணியத்தின் ஆதரவுக்கும் மோகன் நன்றியைத் தெரிவித்துக் கொண்டார். 

"நாட்டு மக்களுக்கும் இந்தியச் சமுதாயத்திற்கும் என்னால் முடிந்த அனைத்து உதவிகளையும் வழங்கும் முயற்சியில் நான் ஈடுபடுவேன்" என்று அவர் உறுதியாகக் கூறினார். 

இதனிடையே, செனட்டர் டத்தோ ஷாஹானிம் முகமட்டும் இரண்டாவது முறையாக செனட்டராக பதவிப்பிரமானம் எடுத்துக் கொண்டார் என்பது குறிப்பிடத்தக்கது.  

 

 

கோலாலம்பூர், நவ.11- 'மீரா' என்றழைக்கப்படும் சிறுபான்மையினரின் உரிமை நடவடிக்கைக் கட்சியை ஹராப்பான் கூட்டணியில் ஏற்றுக் கொண்டு அந்தக் கூட்டணியை விரிவுபடுத்துவதில் தமக்கு எவ்வித பிரச்சினையும் இல்லை என்று பக்காத்தான் ஹராப்பான் தலைவர் துன் டாக்டர் மகாதீர் முகமட் கூறினார். 

நேற்று முன்தினம், நாட்டின் முன்னாள் பிரதமரான மகாதீரை நேரில் சந்தித்து, ஹராப்பான் கூட்டணியில் இணைவதற்கான விண்ணப்பத்தை மீரா கட்சியினர் அவரிடத்தில் சமர்ப்பித்ததாக மீராவின் துணைப் பொதுச் செயலாளர் கே.கார்த்திகேசு தகவல் தெரிவித்தார். 

இந்தியர்கள் மற்றும் இதர சிறுபான்மையினரின் வாக்குகள் தங்களுக்கு கிடைக்கும் பொருட்டு, பக்காத்தான் ஹராப்பான் கட்சி என்னென்ன யுக்திகளை எதிர்வரும் பொதுத் தேர்தலின் போது கையாள வேண்டும் என்பது குறித்தான பகுப்பாய்வு அடங்கிய பட்டியலை புத்ராஜெயாவிலுள்ள பெர்டானா தலைமைத்துவ அறவாரியத்தில் மகாதீரிடம் மீரா கட்சியினர் வழங்கினர் என்பது குறிப்பிடத்தக்கது. 

"தேசிய முன்னணிக்கு வாக்களிக்கும் இந்தியர்களில், 16 விழுக்காட்டினர் தங்களின் வாக்குகளை எதிர்கட்சிக்கு அளித்தால், 16 முக்கிய நாடாளுமன்ற தொகுதிகளையும், 14 மாநில இடங்களையும் இழக்கும் வாய்ப்பு நேரலாம் என்று எங்களின் ஆய்வு தெரியப்படுத்துள்ளது" என்று கார்த்திகேசு சொன்னார். 

நியூஜென் கட்சி என்றழைக்கப்பட்ட மீரா, ஏ.ராஜரெத்தினம் தலைமையில் புதிய கட்சியாக உருவெடுத்துள்ளது. 

இந்தியர்கள் மற்றும் சிறுபான்மையினரின் தேவைகளைப் பூர்த்தி செய்யக் கூடிய ஒரு கட்சி, பக்காத்தான் ஹராப்பானில் இடம் பெற வேண்டும் என்று தாங்கள் கருதுவதாக கார்த்திகேசு சொன்னார். மீரா இப்போதே இந்தியர்களின் நலனுக்காக பாடுபட தொடங்கிவிட்டதாகவும் அவர் கூறினார். 

 

கோலாலம்பூர், நவ.9- இலங்கையின் வடகிழக்கு பகுதியின் நிலைமை இயல்புக்கு திரும்பி விட்டதாக மலேசிய சிலோனிஸ் காங்கிரஸ் (எம்.சி.சி.) கருதினால், அவர்களுக்கு ஞாபக மறதி ஏற்பட்டு விட்டது. 

இலங்கையில் நடந்த அனைத்தையும் மறந்துவிட்டு நாடகத் தனமாக அவர்கள் நடந்துக் கொள்கின்றனர் என்று பினாங்கின் இரண்டாவது முதலமைச்சர் பி.ராமசாமி சாடினார்.

சிங்கள அரசாங்கமும், அந்நாட்டின் இராணுவத்தினரும், இலங்கையின் வடகிழக்குப் பகுதிகளைச் சேர்ந்த பொதுமக்களை எவ்வாறான கொடுமைகளுக்கு உட்படுத்தினர் என்பதை எம்.சி.சி எப்படி மறக்கலாம் என்று அவர் கேள்வி எழுப்பினார். 

இரண்டு ஆண்டுகளுக்கு ஒருமுறை எம்.சி.சி.யால் நடத்தப்படும் விருந்து நிகழ்ச்சி ஒன்றில் கலந்துக் கொள்ளுமாறு இலங்கை தூதருக்கு அழைப்பு விடுக்கப்பட்டதைத் தொடர்ந்து, ராமசாமி அவ்வாறு கருத்துரைத்தார். 

இந்நிகழ்வில் கலந்துக் கொண்டு சிறப்பு உரையாற்றும்படி பினாங்கு மாநில முதலமைச்சரும் கேட்டுக் கொள்ளப்பட்டுள்ளார் என்பது குறிப்பிடத்தக்கது.

இலங்கைத் தூதரை இந்த நிகழ்வுக்கு அழைப்பதன் வாயிலாக அந்நாட்டு அரசாங்கம், வடகிழக்கு பகுதிகளில் அமைதியான சூழ்நிலையை ஏற்படுத்திக் கொடுத்துள்ளதாக பொருள்படும். அதை நாம் எப்படி ஏற்றுக் கொள்ள முடியும்? என்று ராமசாமி கேள்வி கணைகளைத் தொடுத்தார்.

அப்பகுதியில் வாழ்ந்த பல மக்கள், இதுவரை தங்களின் வீடுகளுக்கு திருப்பி அனுப்பப் படவில்லை. வடக்கு பகுதிகளில், ஈழத் தமிழர்களின் வீடுகளை இராணுவத்தினர் ஆக்கிரமிது உள்ளனர். அங்கு நடந்த போரில், எத்தனை மக்கள் கொடூரமாக கொள்ளப்பட்டனர் என்பது எம்.சி.சி.க்கு ஞாபகம் இருக்கிறதா, இல்லையா? என்று அவர் கேள்வி எழுப்பினார். 

இதுவரை அங்கு நடந்த கொடுமைகள் மற்றும் மனித உரிமை மீறல்கள் குறித்து எவ்வித விசாரணையும் மேற்கொள்ளப்படவில்லை. இதையெல்லாம் நினைவு கூறாமல் எம்.சி.சி எப்படி அந்த இலங்கை தூதரை விருந்து நிகழ்விற்கு அழைக்கலாம் என்று அவர் சாடினார். 

இந்த நிகழ்வில், பினாங்கு முதலமைச்சர் கலந்துக் கொள்ள மாட்டார் என்று தாம் கருதுவதாக ராமசாமி தெரிவித்துக் கொண்டார். இலங்கைத் தமிழர்களின் வாழ்க்கையை கேள்வி குறியாக்கிய இலங்கை அரசாங்கத்தின் கொடூரச் செயலை பினாங்கு மாநிலம் சாடியது என்பதையும் அவர் சுட்டிக் காட்டினார். 

தம்மின மக்களின் உணர்வுகளை சிலோனிஸ் காங்கிரஸ்காரர்கள் மதிக்க வேண்டும் என்றும் அவர் அறிவுறுத்தினார். 

 

 

கோலாலம்பூர், நவ.6- 'மை-டப்தார்' எனப்படும் ஆவணப் பதிவு திட்டத்தின் கீழ் 2,500 இந்தியர்கள் மட்டுமே குடியுரிமை இல்லாமல் இருப்பதாக பதிவு செய்யப்பட்டிருக்கின்றது என்று பிரதமர் டத்தோஶ்ரீ நஜிப் ரசாக் கூறியதை பாடாங் செராய் நாடாளுமன்ற உறுப்பினர் என்.சுரேந்திரன் சாடினார்

அந்தத் திட்டத்தின் கீழ் பதிவு செய்தவர்கள் மட்டும்தான் நாட்டில் குடியுரிமை இல்லாமல் இருக்கும் இந்தியர்கள் என்ற நஜிப்பின் கருத்து, தமக்கு அதிர்ச்சி அளிப்பதாக சுரேந்திரன் கூறினார்

மலேசியாவில் கிட்டத்தட்ட 300,000 இந்தியர்கள் குடியுரிமை இல்லாமல் தவிக்கின்றனர் என்று எதிர்கட்சியினர் கூறியிருப்பதை 'கட்டுக்கதை' என்று கடந்த அக்டோபர் 31-ஆம் தேதியன்று 177 இந்தியர்களுக்கு குடியுரிமை ஆவணங்கள் வழங்கிய நிகழ்வில் நஜிப் தெரிவித்தார் என்பது குறிப்பிடத்தக்கது

இதனிடையே, மை-டப்தாரின் கீழ் பதிவு செய்துக் கொண்ட இந்தியர்கள் மட்டும்தான் நாட்டில் குடியுரிமை இல்லாமல் இருக்கின்றார்கள் என்று பொருட்படாது என்று சுரேந்திரன் கூறினார்

"மை-டப்தார் திட்டத்திற்கு வரையறுக்கப்பட்ட குறுகிய கால அவகாசம் மற்றும் வசதிகள் கொண்டு, நாட்டிலுள்ள அனைத்து இந்தியர்களின் குடியுரிமை குறித்த நிலவரங்களை அவர்கள் பதிவு செய்து விட முடியாது. அதுமட்டுமல்லாது, இந்தியர்கள் மத்தியில் தொடர்ந்து இந்தக் குடியுரிமை பிரச்சினை நீடித்ததால்தான், அதன் தீவிரத்தன்மையை உணர்ந்துக் கொண்டு அரசாங்கம் இந்த மை-டப்தார் திட்டத்தை அமல்படுத்தியது" என்றார் அவர்

"இந்தியர்கள் மத்தியில் நிலவும் இப்பிரச்சினையை கட்டுப்படுத்த முடியும் என்றால், தேசிய பதிவு இலாகா அதனைக் கட்டுப்படுத்தி இருக்கும், அல்லவா?" என்று அவர் கேள்வி எழுப்பினார்

 

நாட்டில் குடியுரிமை இல்லாமல் பரிதவிக்கும் இந்தியர்களின் (நிஜமான) எண்ணிக்கையை அறியும் பொருட்டு, ஒரு விரிவான கணக்கெடுப்பு மேற்கொள்ளப்பட வேண்டும் சுரேந்திரன் கருத்து தெரிவித்தார்

கோலாலம்பூர், நவ.2- புகிஸ் சமூகத்தினர் குறித்த முன்னாள் பிரதமர் டாக்டர் துன் மகாதீரின் பேச்சுக்கு சிலாங்கூர் மாநில சுல்தான் சுல்தான் ஷாராஃபுடின் இட்ரீஸ் ஷா கண்டனம் தெரிவித்துள்ளார். 

புகீஸ் சமூகத்தினரை கடற்கொள்ளையர்களோடு மகாதீர் ஒப்பிட்டு பேசியது தேச குற்றமாகும். அவரின் அச்செயல் கண்டிக்கத்தக்கது என்று சிலாங்கூர் அரச செயலாளர் ஹனாஃபிசா ஜாயிஸ் ஒர் அறிக்கையில் சாடினார்.  

இது தொடர்பாக, சுல்தான் ஷாராஃபுடின் இன்று அரச மன்ற உறுப்பினர்களை சந்தித்து பேசியதாக ஹனாஃபிசா அந்த அறிக்கையில் தெரிவித்துக் கொண்டார். 

கடந்த அக்டோபர் 14-ஆம் தேதியன்று நடைப்பெற்ற, மலேசியாவை நேசிப்போம் என்ற ஒன்றுகூடும் நிகழ்வில் கலந்துக் கொண்டு பேசிய மகாதீர், மலேசியாவை புகீஸ் சமூகத்தைச் சேர்ந்த ஒருவர் 'ஆண்டார்' என்று கேலியாக பேசினார். 

புகீஸ் சமூகத்தினருக்கு எதிராக, மக்களை தூண்டிவிடும் வகையில் மகாதீரின் அப்பேச்சு அமைந்துள்ளதாக சிலாங்கூர் அரசக் குடும்பம் கருதுவதாக ஹனாஃபிசா ஜாயிஸ் தெரிவித்துள்ளார். 

"மகாதீரின் அப்பேச்சு, ஒரு வகையில் சிலாங்கூர் சுல்தானையும் தாக்கும் வகையில் அமைந்துள்ளது. சிலாங்கூர் சுல்தான் புகீஸ் வம்சாவளியைச் சேர்ந்தவர்."

"மலாய் தீவுகளில் வீரத்துடன் போரிட்டு, மத்த்தையும் அதன் அமைதியையும் நிலைநாட்டிய சமூகம், புகீஸ் சமூகம். இது வரலாற்றில் இடம் பெற்றுள்ள கூற்றாகும். 

"22 வருடங்களாக மலேசியாவின் பிரதமர் என்ற முக்கியப் பதவி வகித்த, மகாதீர், தனது கருத்துகளை பகிர்ந்துக் கொள்வதில் சற்று கவனம் காட்டுதல் அவசியம்" என்று அந்த அறிக்கை அறிவுறுத்தியது.   

புகீஸ் சமூகத்தின் வரலாற்று உண்மைகள் குறித்து மகாதீர் அறிந்திருக்க வேண்டும். 

இதனிடையே, நாட்டின் தலைவர்கள், முக்கியமாக அரசியல்வாதிகள் இன மற்றும் குறிப்பிட்ட மதத்தின் உரிமைகள் குறித்து கருத்து தெரிவிப்பதை நிறுத்த வேண்டும் என்று சிலாங்கூர் சுல்தான் அவ்வறிக்கையில் அறிவுறுத்தினார். இது மக்களிடையே உள்ள ஒற்றுமைக்கு அச்சுறுத்தலாக விளங்குகிறது என்று அவர் சொன்னார்.  

கோலாலம்பூர், நவ.1- சர்ச்சைக்குரிய இஸ்லாமிய பிரசாரகர் ஸாகிர் நாயக்கிற்கு மலேசியாவின் நிரந்தர குடியுரிமை வழங்கப்பட்ட போதிலும், அவருக்கு சிறப்புச் சலுகைகள் ஏதும் வழங்கப்படவில்லை என்று உள்துறை அமைச்சு தெரிவித்துள்ளது. 

பல நாடுகளில் ஸாகிர் நாயக் நுழைவதற்கு அனுமதி வழங்கப்படாத நிலையில்,   மலேசியா தீவிரவாதத்தின் அடிப்படையில்  அவரை ஏன் கைது செய்யவில்லை என்ற செப்பூத்தே நாடாளுமன்ற உறுப்பினர் திரேசா கோக், எழுப்பிய கேள்விக்கு எழுத்து வடிவில் பதிலளிக்கையில், மலேசியாவின் விதிமுறை எதையும் ஏன் மீறவில்லை என்பதை உள்துறை அமைச்சு சுட்டிக் காட்டியது. 

"ஸாகிர் நாயக்கை தீவிரவாதத்தின் கீழ் கைது செய்யவேண்டும் என்று இந்தியாவிடமிருந்து எவ்வித அதிகாரப்பூர்வ வேண்டுகோளும் தங்களுக்கு விடுக்கப்படவில்லை" என்று அந்த அமைச்சு பதிலளித்துள்ளது. 

குடிநுழைவு துறையின் நடைமுறைகளுக்கு இணங்க, ஸாகிர் நாயக்கிற்கு நிரந்தர குடியுரிமை வழங்கப்பட்டதாகவும் அமைச்சு தெரிவித்துக் கொண்டது.  

More Articles ...