‘மகாதீரின் பரம்பரை; துணைப்பிரதமர் பேச்சை பெரிதாக்காதீர்’- யாஹ்யா

அரசியல்
Typography

கோலாலம்பூர், ஆக.1 – முன்னாள் பிரதமர் துன் மகாதீர் பரம்பரையைப் பற்றி துணைப் பிரதமர் டத்தோ ஶ்ரீ ஸாஹிட் ஹமிடி பேசியிருந்ததைப் பரபரப்பான விஷயமாக ஆக்கப்பட்டது குறித்து தான் ஏமாற்றம் அடைந்திருப்பதாக அவருடைய பத்திரிக்கைத் துறைச் செயலாளர் இப்ராஹிம் யாஹ்யா கூறினார்.

அம்னோவைத் தங்களுடைய சொந்த நலனுக்குப் பயன்படுத்தக் கூடாது என்பதைத் தான் டத்தோ ஶ்ரீ ஸாஹிட் தமது உரையில் சுட்டிக்காட்ட முனைந்திருந்தார் என்று இப்ராஹிம் யஹ்யா விளக்கம் தெரிவித்துள்ளார்.

மகாதீர் அம்னோவை தம்முடைய சொந்த நலனுக்காகவும், தன்னுடைய குடும்பத்தின் நலனுக்காகவும் பயன்படுத்திக் கொண்டு அதன் பின்னர் அம்னோவை விட்டு வெளியேறி, எதிர்க்கட்சிகளுடன் சேர்ந்து கொண்டிருக்கிறார். குறிப்பாக, தன்னுடைய முன்னாள் எதிரியான ஜ.ஜ.க வுடன் கூட்டுச் சேர்ந்துள்ளார் என்றுதான் டத்தோ ஶ்ரீ ஸாஹிட் சொன்னார். 

மகாதீரின் இத்தகைய போக்கு ஆச்சரியமளிக்கக் கூடிய ஒன்றல்ல. ஏனெனில் 22 ஆண்டுகாலம் பிரதமராக இருந்துள்ள மகாதீர், உண்மையில் மலாய் வம்சாவளியைச் சேர்ந்தவர் அல்ல. அவருடைய பரம்பரை கேரளாவிலிருந்து வந்தது என்றுதான் டத்தோ ஶ்ரீ ஸாஹிட் குறிப்பிட்டார் என்று அவரது பத்திரிக்கைச் செயலாளர் இப்ராகிம் யஹ்யா விளக்கியுள்ளார்.

இந்த பிரச்சனையை மகாதீரின் ஆதரவாளர்கள் வேறுவிதமாக பயன்படுத்தி பெரிதுபடுத்தியுள்ளனர். இதனால் இப்பிரச்சனையை சமூக வலைத்தளங்களிலும் பெரும் பரபரப்பாகி விட்டது என்கிறார் அவர்.

இதனைப் பயன்படுத்தி இந்திய முஸ்லீம்களைத் துணைப்பிரதமர் ஸாஹிட் அவமதித்து விட்டதாக சில தரப்பினர் குற்றஞ்சாட்டத் தொடங்கி விட்டனர். இது தவறானது. மகாதீரின் போக்கைத் தான் ஸாஹிட் சுட்டிக்காட்டினார். குறிப்பாக, அம்னோ விஷயத்தில் மகாதீரின் இன்றைய போக்கையே அவர் குறிப்பிட்டு பேசினார் என்றார் இப்ராகிம் யஹ்யா.

 

BLOG COMMENTS POWERED BY DISQUS