சிவராசா வரம்பு மீறி விட்டார்- சிலாங்கூர் சுல்தான் எச்சரிக்கை!

அரசியல்
Typography

ஷா ஆலம், ஜூன்.3- சுபாங் நாடாளுமன்ற உறுப்பினர் ஆர். சிவராசா மசூதியில் உரையாற்றியதை கண்டித்த சிலாங்கூர் சுல்தான் அவர் வரம்பு மீறி செயல்பட்டு விட்டார் என மீண்டும் சுட்டிக்காட்டினார்.

மசூதிகளில் அரசியல் தலைவர்கள் உரையாற்றுவதை விரும்பாத சிலாங்கூர் சுல்தான் அப்படி செய்வதை நிறுத்திகொள்ளுமாறு கடந்த காலங்களில் பலமுறை வேண்டுகோள் விடுத்தார். இருப்பினும் சுல்தானின் அறிவுறுத்தலையும் பொருட்படுத்தாமல் சிவராசா அன் நூர் மசூதியில் உரையாற்றியதை பலரும் கண்டித்து வருகின்றனர்.

“10 மணி நேரம் வேண்டுமானாலும் சிவராசா உறையாற்றலாம். ஆனால், அது மசூதிக்கு வெளியே இருக்க வேண்டும். என் அறிவுறுத்தலையும் பொருட்படுத்தாமல் நீங்கள் செய்தது வரம்பு மீறிய செயல்” என்று சிவராசாவை சுல்தான் சாடினார்.

இனிமேல் அரசியல் தலைவர்களுக்கு உரையாற்ற அனுமதி வழங்கும் மசூதி நிர்வாகிகள் மேல் தக்க நடவடிக்கை எடுக்கப்படும் என்றும் சுல்தான் எச்சரித்தார்.

அரசியல் கருத்துக்களால் இஸ்லாமிய மக்கள் பிளவுபட கூடாது என்பதால் தான் மசூதிகளில் அரசியல் உரையாற்றுவதை விரும்பவில்லை. மத போதனைக்கும், சமய அறிவை வளர்க்கவும், இஸ்லாமியர்கள் இடையே ஒற்றுமையை வளர்க்கவும் மசூதிகளை பயன்படுத்த வேண்டும் என்றும் சுல்தான் வலியுறுத்தினார்.

நேற்று நடந்த நோன்பு திறப்பு உபசரிப்பில் கலந்து கொண்டு சிலாங்கூர் சுல்தான் இதனைக் கூறினார். நிகழ்ச்சியில் சிலாங்கூர் மந்திரி புசாரும் கலந்து கொண்டு சிறப்பித்தார்.

BLOG COMMENTS POWERED BY DISQUS