கோலாலம்பூர், ஏப்ரல்.19- 14-ஆவது பொதுத் தேர்தலில் போட்டியிடவிருக்கும் பி.எஸ்.எம்  எனப்படும் மலேசிய சோசலிஸக் கட்சி வேட்பாளர்கள் இன்று கோலாலம்பூர் சிலாங்கூர் சீன மாநாட்டு மண்டபத்தில் தங்களின் சொத்துகளை அறிவித்ததோடு, இன வாதத்திற்கு எதிராக உறுதிமொழி எடுத்துக் கொண்டனர். 

அக்கட்சியால் தேர்ந்தெடுக்கப்பட்டுள்ள 16 வேட்பாளர்களின் சொத்துக்கள் ரிம.3,000-இல் தொடங்கி ரிம.3 மில்லியன் வரை என்று அறிவிக்கப்பட்டது. 

பொதுத் தேர்தலில் மக்களின் ஆதரவை தங்கள் பக்கம் திருப்பும் பொருட்டு, இனவாத அரசியலை தாங்கள் நடத்தப் போவதில்லை என்றும் அந்த 16 வேட்பாளர்களும் இன்று நடந்த கூட்டத்தில் உறுதிமொழி எடுத்துக் கொண்டனர். 

கடந்த 2008-ஆம் ஆண்டு தொடங்கி, பி.எஸ்.எம் கட்சி வேட்பாளர்கள் தங்களின் சொத்துகள் குறித்து வெளிப்படையாக அறிவித்து வருகின்றனர் என்றும், அவ்வாறு செய்யும் முதல் அரசியல் கட்சி பி.எஸ்.எம். கட்சிதான் என்றும் அதன் பொதுச் செயலாளர் ஏ.சிவராஜன் கூறினார். 

அக்கட்சியால் தேர்ந்தெடுக்கப்படும் வேட்பாளர்கள், கவுன்சிலர்கள் உட்பட, தங்களின் சொத்துகள் குறித்து ஒவ்வொரு ஆண்டும் அறிவித்து வருகின்றனர் என்று அவர் சொன்னார். 

“பொது அலுவலகங்களில் மக்களுக்காக சேவை செய்துக் கொண்டிருக்கும் வேளையில், அரசியல்வாதிகள், அதன் வாயிலாக சொத்துகளை சேர்த்துக் கொள்கின்றனரா? என்பதை மக்கள் அறிந்துக் கொள்ள விரும்புகிறார்கள்” என்று சிவராஜன் கூறினார். 

பணம் சம்பாதிக்கும் எண்ணத்தில் யாரும் அரசியலில் நுழையக் கூடாது என்று அவர் அறிவுறுத்தினார். அரசாங்கம் மற்றும் எதிர்க்கட்சி வேட்பாளர்களும் தங்களைப் போன்றே  சொத்து விபரங்களை அறிவிக்க வேண்டும் என்றும் அவர் கேட்டுக் கொண்டார். 

இம்முறை நடக்கவிருக்கும் பொதுத் தேர்தலில், 4 நாடாளுமன்றத் தொகுதிகள் மற்றும் 12 சட்ட மன்ற தொகுதிகளில், பி.எஸ்.எம் கட்சி போட்டியிடவிருக்கின்றது என்பது குறிப்பிடத்தக்கது.

 

 

 

 

 

 

 

 

 

 

 

 

 

 

கோலாலம்பூர், ஏப்ரல்.18- மைபிபிபி கட்சியில் தாம் ஓர் உறுப்பினராக இருந்ததாக அல்லது அக்கட்சியின் தேசிய தலைவர் டான்ஶ்ரீ கேவியசுக்காக தேர்தல் பணிபுரிந்ததாக கூறப்பட்டதை  மஇகா இளைஞர் பிரிவின் தலைவர் டத்தோ சிவராஜ் மறுத்துள்ளார். 

கடந்த 2003 ஆம் ஆண்டில் பிரிக்பீல்ஸ்  உத்தாமா கிளையில்  மைபிபிபி உறுப்பினராக சிவராஜ் சேர்ந்திருப்பதாக நேற்று கேவியஸ் அறிவித்திருந்தது குறித்து கருத்துத் தெரிவித்த போது மேற்கண்டவாறு சிவராஜ் மறுத்தார்.

'நான் மைபிபிபி தலைமையகத்திற்கு சென்றதே கிடையாது. 2001இல் என்னுடைய படிப்பை முடித்த பின்னர்  எனது பணியில் கவனம் செலுத்தி வந்தேன். எனக்கு அப்போது அரசியல்ல் ஈடுபாடு கிடையாது.  அந்தக் காலக்கட்டத்தில் எனக்குத் தெரிந்த ஒரே அரசியல்வாதி சாமிவேலுதான்' என்று சிவராஜ் கூறினார்.

2004 ஆம் ஆண்டில் நான் மஇகாவில்  சேர்ந்தேன்.  தைப்பிங் தொகுதியில் கேவியஸ் போட்டி போட்ட போது அவருக்காக அங்கு நான் தேர்தல் பணியாற்றியதாக கூறப்படுவதை  மறுக்கிறேன் என்று அவர் சொன்னார்.

தமக்கு தொகுதி வேண்டும் என்பதற்காக  கோரிக்கை விடுக்கும் உரிமை கேவியசிற்கு உண்டு. ஆனால், எல்லோரையும் சிரிக்க வைக்கிற மாதிரியான காரியங்களில் அவர் ஈடுடக் கூடாது என்று சிவராஜ் அறிவுறுத்தினார். இது தொடர்பாக கேவியசுக்கு வழக்கறிஞர் நோட்டிஸை அனுப்புவது குறித்தும் தாம் பரிசீலித்து வருவதாக  அவர் சொன்னார்.

கோலாலம்பூர், ஏப்ரல்.18- இம்முறை பொதுத்தேர்தலில்  மலாய், சீன மற்றும் இதர இனங்களை மிஞ்சும் வகையில் தேசிய முன்னணிக்கான இந்தியர்களின் ஆதரவு அமையும் என்று மஇகா தேசிய தலைவர் டத்தோஶ்ரீ டாக்டர் சுப்பிரமணியம் கணித்துள்ளார்.

தேர்தல் வாக்களிப்புக்கு இன்னும் ஒரு மாதத்திற்கும் குறைவான கால அவகாசமே இருக்கும் நிலையில்,  தேசிய முன்னணிக்கு  குறைந்த பட்சம் 65 விழுக்காடு வரை இந்தியர்களின் ஆதரவு கிடைக்கும் என்றார் அவர். 

சுமார்  80 விழுக்காடு வரை ஆதரவு கிட்டக்கூடிய  இடங்களும் இருக்கின்றன. சில இடங்களில் 75 விழுக்காடு, 60 விழுக்காடு மற்றும் 50 விழுக்காடு  ஆதரவு கிடைக்கும். எனினும், சராசரியாகப் பார்த்தால்  60 முதல் 65 விழுக்காடு வரை இந்தியர்கள் தேசிய முன்னணியை ஆதரிக்கிறார்கள் என்று டாக்டர் சுப்பிரமணியம் சொன்னார்.

 குறிப்பிட்டுச் சொன்னால், சிலாங்கூரிலும் கூட்டரசுப் பிரதேசத்திலும் தேசிய முன்னணிக்கான இந்தியர்களின் ஆதரவு அதிகபட்ச நிலையில் இருக்கிறது. கடந்த தேர்தலில்  தேசிய முன்னணிக்கு இந்தியர்களின் ஆதரவு 48 விழுக்காடு தான் என்று அவர் சுட்டிக்காட்டினார்.

8 லட்சம் இந்தியர்களிடம் அடிமட்டநிலையில் நடத்தப்பட்ட ஆய்வுகளின் அடிப்படையில் தேசிய முன்னணிக்கு இந்தியர்களின் ஆதரவு 65 விழுக்காடு வரை உள்ளது என்பதை தாங்கள் கணித்திருப்பதாக அவர் தெரிவித்தார். 

 

 ஷாஆலம், ஏப்ரல்.18- வழக்கமாக 9 நாடாளுமன்றத் தொகுதிகளில் போட்டியிட்டு வந்த ம இகா, 14ஆவது பொதுத் தேர்தலில்  6 நாடாளுமன்றத் தொகுதிகளில் போட்டியிடவிருக்கிறது என்று அதன் தேசிய தலைவர் டத்தோஶ்ரீ டாக்டர் சுப்பிரமணியம் தெரிவித்தார்.

சுங்கை சிப்புட், தாப்பா, சிகாமட், காப்பார், கோத்தாராஜா மற்றும் கேமரன் மலை ஆகிய தொகுதிகளில் போட்டியிடவிருக்கிறது என்று அவர் சுட்டிக்காட்டினார்.  இந்தப் பட்டியலில் உலு சிலாங்கூர், சுபாங் மற்றும் தெலுக் கெமாங் ஆகியவை விடுப்பட்டுள்ள என்பது குறிப்பிடத்தக்கது. 

எனினும், இந்தத் தொகுதி நிலவரம்  மாற்றங்களுக்கு உள்ளாகும் வாய்ப்பும் இருக்கிறது. இறுதி முடிவு  தேசிய முன்னணியின் தலைவர் டத்தோஶ்ரீ நஜிப்பின் கையில் உள்ளது என்றார் அவர்.

தேசிய முன்னணியின் தலைமைத்துவம் எடுக்கின்ற எந்த முடிவானாலும் அதற்கு நாங்கள் கட்டுப்படுவோம்.  இதுதான் இப்போது எங்களின் கோட்பாடாக இருந்து வருகிறது என்று அவர் சொன்னார்.

உதாரணமாக, மஇகாவுக்குரிய எந்தவொரு  தொகுதியிலும் அம்னோ போட்டியிட முடிவு செய்தால் அதற்கு நாங்கள் வழிவிடுவோம். முடிவாகச் சொன்னால், எங்களின் இலக்கு அடுத்த பொதுத்தேர்தலில் வெல்வதுதான் என்று டாக்டர் சுப்பிரமணியம் சொன்னார்.

கோத்தா ராஜாவிலுள்ள தாமான் செந்தோசா தமிழ்ப்பள்ளியின் புதிய கட்டடத்தை கையளிக்கும் சடங்கின் போது அவர் இதனைக் கூறினார்.

கடந்த 14ஆம் தேதி மஇகாவின் தொகுதி நிலவரங்கள் குறித்துக் கருத்துக் கூறிய போது, 'நாங்கள் 9 நாடாளுமன்றத் தொகுதிகளிலும் 18 சட்டமன்றத் தொகுதிகளிலும் போட்டியிடுவோம் என்று டாக்டர் சுப்பிரமணியம் உறுதிப்படக் கூறியிருந்தார்.

இதனிடையே தாமான் செந்தோசா தமிழ்ப்பள்ளி 1.78 ஹெக்டரில் கட்டப்பட்டிருப்பதாக கல்வித்துறை துணையமைச்சர் டத்தோ கமலநாதன் குறிப்பிட்டார்.

சுமார் 22.78 மில்லியன் ரிங்கிட் செலவில் இந்தப் பள்ளி கட்டப்பட்டிருக்கிறது. பக்கத்து பள்ளியில் இருந்து இங்கு மாற்றப்பட்ட 160 மாணவர்களும்  திங்கள் முதல் இங்கு படிப்பை தொடங்கவிருக்கின்றனர். சுமார் 700 மாணவர்கள் படிக்க போதுமான வசதிகள் உள்ளன என்றார் அவர்.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

கோலாலம்பூர், ஏப்ரல்.18- 14-ஆவது பொதுத் தேர்தலை முன்னிட்டு, மஇகா நான்கு பகுதிகளைக் கொண்ட  கொள்கை அறிக்கையை அதன் தேசிய தலைவர் டத்தோஶ்ரீ டாக்டர் சுப்பிரமணியம்  வெளியிட்டார்.

## இந்திய சமுதாயத்தின் அடிப்படை தேவைகளை பூர்த்தி செய்வது, குறிப்பாக, வீட்டு வசதியை ஏற்படுத்தி தருவது-

## குழந்தைகளின் கல்வித் திறனை உணர்ந்து, அவர்களின் திறமையை வெளிக்கொணர்வது-

## மதம் மற்றும் கலாச்சார நடவடிக்கைகளில் சமூகத்தின் பங்களிப்பை கூட்டுவது-

## இந்திய சமுதாயத்தின் வருவாய் மற்றும் சொத்துடமைகளை அதிகரிக்கும் முயற்சி எடுப்பது-

மேற்கண்ட நான்கு அம்சங்கள் இந்த நான்கு பகுதிகளில் விவரிக்கப்பட்டுள்ளன. 

அந்த கொள்கை அறிக்கையை மஇகாவின் தேசிய தலைவரும், சுகாதார அமைச்சருமான டத்தோஶ்ரீ டாக்டர் எஸ்.சுப்பிரமணியம் வெளியிட்டார். 

மாற்றங்கள் நிகழ்ந்து வருவதை கருத்தில் கொண்டு, அதற்கேற்றார் போல், சமுதாய நலனைக் கருத்தில் கொண்டு அந்த கொள்கை அறிக்கை தயாரிக்கப்பட்டதாக டாக்டர் சுப்பிரமணியம் கூறினார்.

“கால ஓட்டத்திற்கு ஏற்ப மாற்றங்களை நிகழும் என்பதை நாங்கள் நன்கு அறிந்துள்ளோம்” என்று அவர் தெரிவித்தார்.

 

ஜொகூர் பாரு, ஏப்ரல்.18- கடந்த பொதுத் தேர்தலில் அறிமுகமே இல்லாத நிலையில், வெறும் 999 வாக்குகளை மட்டுமே பெற்ற டத்தோஶ்ரீ எட்மண்ட் ஷந்தாரா, இம்முறை சிகாமாட் நாடாளுமன்ற தொகுதியில் போட்டியிட்டால், தம்மால் டத்தோஶ்ரீ டாக்டர் எஸ். சுப்ரமணியத்திற்கு கடுமையான போட்டியைக் கொடுத்து அவரை வெல்ல முடியும் என்று நம்பிக்கை கொண்டுள்ளார்.  

நான்காவது முறையாக சிகாமாட் தொகுதியில் போட்டியிடவிருக்கும் மஇகா தேசியத் தலைவரான டாக்டர் சுப்ரமணியத்தை, தோற்கடிப்பதே தனது லட்சியம் என்று பிகேஆர் கட்சியைச் சேர்ந்த தொழிலதிபர் எட்மண்ட் ஷந்தாரா தெரிவித்துள்ளார்.

கடந்த பொதுத் தேர்தலில் சுயேட்சை வேட்பாளாராக உலு சிலாங்கூர் தொகுதியில் போட்டியிட்டு 999 வாக்குகள் மட்டுமே பெற்ற எட்மண்ட்,  இம்முறை சிகாமாட் தொகுதியில் போட்டியிடும் வாய்ப்பு தனக்கு வழங்கப்பட்டால், அந்தத் தொகுதியை கைப்பற்ற தாம் போராடவிருப்பதாக சொன்னார்.  

“பிகேஆர் கட்சி என் மீது நம்பிக்கை வைத்துள்ளது” என்று அவர் கூறினார். வர்த்தக நிர்வாகத் துறையில் முனைவர் பட்டம் பெற்றுள்ள 47 வயதான எட்மண்ட் ஷந்தாரா, பிகேஆர் கட்சியின் தேசிய ஒருங்கிணைப்பு குழுவின் தலைவருமாவார்.

பக்காத்தான் கூட்டணியின் தலைவரான துன் மகாதீர் முகமட் மற்றும் முன்னாள் பக்காத்தான் ராக்யாட் தலைவருமான டத்தோஶ்ரீ அன்வார் இப்ராஹிம் இருவருக்கும் இடையிலாக பிரச்சனைகள் சுமூகமான தீர்வு கண்டிருப்பதால், கடந்த பொதுத் தேர்தலைக் காட்டிலும், 14-ஆவது பொதுத் தேர்தலில் பக்காத்தான் கூட்டணிக்கு மக்களின் ஆதரவு கூடியுள்ளதாக எட்மண்ட் கருதுகிறார். 

சிகாமாட் தொகுதி மக்களுக்குத் தேவையான வீட்டு வசதி மற்றும் இந்திய சமூதாய மேம்பாட்டிற்கு உதவும் வகையில் 25 முக்கியக் குறிக்கோள்களை எட்மண்ட் அடையாளம் கண்டுள்ளார்.  

“இத்தொகுதியில் 2,800 இந்தியர்கள் உள்ளனர். அவர்களில் பலர் வறுமைக் கோட்டிற்கு கீழ் உள்ளனர். வீட்டு வாடகையைச் செலுத்துவதில், நல்ல உணவை உண்பதிலும் அவர்கள் சிரமத்தை எதிர்கொள்கின்றனர்” என்று அவர் சொன்னார். 

எட்மண்ட் ஜொகூரைச் சேர்ந்தவர் அல்ல என்று தேசிய முன்னணி கூறுவதை மறுத்த எட்மண்ட், தனது பெற்றோர் குளுவாங்கில் ரப்பர் மரம் வெட்டும் தொழில் புரிந்தார்கள் என்று அவர் தெரிவித்தார்.  

“நான் குளுவாங்கில் தான் பிறந்தேன். அங்குதான் வளர்ந்தேன். ஜொகூர் மாநிலத்தின் சார்பில் சதுரங்கப் போட்டியில் மாநில ரீதியில் கலந்து கொண்டு, நான் வெற்றியும் பெற்றுள்ளேன்” என்றார் அவர்.

ஈப்போ, ஏப்ரல்.17- 'ராஜா போமோ' என்று தன்னைச் சுயமாகப் பிரகடனப்படுத்திக் கொண்ட இப்ராஹிம் மாட் ஜின் என்ற 68 வயதுடைய மந்திரவாதி, எதிர்வரும் பொதுத்தேர்லில் பாகான் டத்தோ தொகுதியில் துணைப்பிரதமர் டத்தோஶ்ரீ அகமட் ஸாஹிட் ஹமிடியை எதிர்த்துப் போட்டி போடப் போவதாக அறிவித்துள்ளார்.

கடந்த 2014-ஆம் ஆண்டு காணாமல் போன எம்.எச்.370  மலேசிய விமானத்தை, பறக்கும் கம்பளம் மற்றும் மூங்கில் தொலை நோக்கி கொண்டு தம்மால் கண்டுபிடிக்க முடியும் என்று கூறி, கோலாலம்பூர் விமான நிலையத்தில் மாந்திரீகத்தில் ஈடுபட்டு செய்தியின் வழி ஊடகங்களில்   பரபரப்பை ஏற்படுத்தியவர் இவர் என்பது குறிப்பிடத்தக்கது.

செனி சீலாட் காயுங் காய்ப் மலேசியா என்ற அமைப்பின் தலைவராகவும் இருந்து வரும் ராஜா போமோ, இன்று செய்தியாளர்கள் கூட்டத்தில் டத்தோஶ்ரீ ஸாஹிட்டை எதிர்த்துப் போட்டியிடப் போகும் தகவலை தெரிவித்தார். 

'இது ஏமாற்று வேலை என்று நினைக்க வேண்டாம்.  அவதிப்படுகின்ற மக்களுக்கு உதவவே நாங்கள் முயற்சிக்கின்றோம். நான் மட்டுமல்ல, என்னுடைய சங்கத்தைச் சேர்ந்த 27 பேர், நாடு தழுவிய அளவில் பல தொகுதிகளில் சுயேட்சை வேட்பாளர்களாகப் போட்டியிடுவார்கள் என்று அவர் கூறினார்.

சங்கத்தின் துணைத் தலைவரான லெமான் கனவுல்லா, பங்கோர் சட்ட மன்றத் தொகுதியில் போட்டியிடவிருக்கிறார் என்று அவர் தெரிவித்தார். பங்கோர் தொகுதி சட்டமன்ற உறுப்பினராக பேரா மந்திரி புசார் டத்தோஶ்ரீ டாக்டர் ஜம்ரி அப்துல் காதீர் உள்ளார் என்பது குறிப்பிடத்தக்கது.

More Articles ...