கோலாலம்பூர், ஜூலை.18- ஜசெகவின் மத்திய நிர்வாகக் குழு தேர்தலை நடத்த சங்கங்கள் பதிவு இலாகா வெளியிட்ட அதிகாரப்பூர்வ கடிதத்திற்கு இரண்டு வாரங்களில் பதிலளிக்க வேண்டும் என சங்கங்கள் பதிவு இலாகா திட்டவட்டமாக அறிவித்தது. 

கடந்த 7ஆம் தேதி ஜூலை மாதம் ஜசெக தனது மத்திய நிர்வாக குழு தேர்தலை நடத்த வேண்டும் என சங்கங்கள் பதிவு இலாகா கட்டளையிட்டது. அதனை அடுத்த 10 நாட்களுக்குப் பிறகு நேற்றைய தினம் அது அதிகாரப்பூர்வக் கடிதத்தையும் ஜசெகவிற்கு அனுப்பிவிட்டது. 

எனவே, இனியும் காலம் தாழ்த்தாமல் 14 நாட்களுக்குள் கொடுக்கப்பட்ட கடிதத்திற்குப் பதிலளிக்க கோரி பதிவுத் துறை தலைமை இயக்குனர் டத்தோ முகம்மட் ரஷின் அப்துல்லா கேட்டுக் கொண்டார். 

கடந்த 2013-ஆம் ஆண்டு  நடத்தப்பட்ட மத்திய நிர்வாகக் குழுத் தேர்தலும் முக்கிய கட்சி நியமனங்களும் சட்டத்திற்குப் புறம்பானவை என 4 ஆண்டுகளுக்குப் பிறகே சொல்வது அரசியல் சூழ்ச்சியென ஜசெக தலைவர்கள் சங்கங்கள் பதிவு இலாகாவின் மீது அதிருப்தியை தெரிவித்திருப்பது குறிப்பிடத்தக்கது.

 பெட்டாலிங் ஜெயா, ஜூலை.17- நாட்டின் 14-ஆவது பொதுத் தேர்தல் இன்னும் மூன்று மாதங்களில் நடைபெற உள்ளதாக பரப்பப்படும் வதந்தியை நம்ப வேண்டாம் என துணைப் பிரதமர் அமாட் ஸாஹிட் ஹமிடி கூறினார்.

கூடிய விரைவில் 14ஆவது பொதுத்தேர்தல் நடக்கும் என இம்மாத ஆரம்பத்தில் பிரதமர் கூறியதைத் தொடர்ந்து தான் இந்த வதந்திகள் வந்ததாக தெரியவருகிறது.

இதனிடையே, 14ஆவது பொதுத்தேர்தல் வரும் செப்டம்பர் தொடங்கி அடுத்த வருடம் மார்சுக்குள் நடைபெறும் என ஆய்வாளர்களின் கருத்துக் கணிப்பில் தெரிய வந்துள்ளது. அதுவும், நீண்ட பள்ளி விடுமுறை காலங்களான இவ்வருட டிசம்பர் அல்லது அடுத்த பிப்ரவரி சீனப் புத்தாண்டின் போது நடைபெறும் என ஆரூடம் கூறப்படுகிறது.

கடந்த  2013-ஆம் ஆண்டு ஜூன் 24ஆம் தேதி தொடங்கிய நடப்பில் உள்ள நாடாளுமன்றம் வரும் 2018- ஆம் ஆண்டு ஜூன் 24ஆம் தேதியோடு முடிவடைகிறது.

நாடாளுமன்றத்தைக் கலைத்த இரண்டு மாதங்களுக்குள் அடுத்த பொதுத்தேர்தல் நடத்தப்பட வேண்டும் என்பதால் தேர்தலை 2018ஆம் ஆண்டு ஆகஸ்ட் 24-ஆம் தேதிக்குள் நடத்திவிட வேண்டும்.

பத்துகாஜா, ஜூலை.17- மலேசியாவில் சுமார் 7 விழுக்காடாக இருக்கும் இந்தியர்கள் தங்களின் பலத்தைக் காட்டவும் உரிமையைப் பெறவும் முதலில் வாக்காளர்களாக தங்களைப் பதிந்து கொள்ளுதல் அவசியம் என மஇகா தேசியத் துணைத் தலைவரும், துணை அமைச்சருமான டத்தோஶ்ரீ தேவமணி வலியுறுத்தினார்.

கடந்த காலக் கட்டத்தில் கட்சியில் நிறைய குழப்பங்களும் பிரச்சனைகளும் சூழ்ந்து கட்சியின் செயல் திறனை குன்றச் செய்தன. எனினும், அவையாவும் இப்பொழுது சூரியனைக் கண்ட பனி போல மறைந்து விட்டன. டத்தோஶ்ரீ டாக்டர் சுப்பிரமணியத்தின் சிறப்பான தலைமையில் தற்போது மஇகா செழுமையாக இருப்பதாக அவர் சுட்டிக்காட்டினார்.

இதனிடைய, மலேசிய இந்திய மக்களுக்காக அறிமுகம் செய்யப்பட்ட இந்திய தூரநோக்கு திட்டத்தைப் பற்றியும் அவர் பேசினார். சுமார் 162 பக்கம் அடங்கிய அந்த திட்ட வரைவு மலேசிய இந்திய மக்களின் குடும்பம், சமூகம், கல்வி, பொருளாதாரம் என அனைத்து வகையிலும் ஒரு முழுமை பெற்ற சமூகமாக மாற்றும் என அவர் நம்பிக்கைத் தெரிவித்தார்.

இதில், குறிப்பாக வர்த்தகத் துறையில் இந்தியர்களை முன்னேற்ற புதிய திட்டங்கள் கொண்டு வரப்படும் என தேவமணி சொன்னார்.

மேலும், கிளாந்தான் மாநிலத்தில் அமல்படுத்தியுள்ள ஷாரியா  சட்டத்தின் கீழான பிரம்படித் தண்டனையைக் குறித்து அவரும் இதர மஇகா தலைவர்களும் பிரதமரிடம் பேசியிருப்பதையும் அவர் விளக்கினார்.

இதனிடையே, நாடுமுழுவதும் உள்ள மஇகா உறுப்பினர்களில் இதுவரையில் வெறும் 18 ஆயிரம் பேர்களே வாக்காளர்ளாக பதிவு செய்துள்ளனர். இன்னும், 1 லட்சத்து 20 ஆயிரம் உறுப்பினர்கள் வாக்களர்களாக பதிவு செய்யவில்லை என அவர் சுட்டிக்காட்டினார். மேலும், நமது இந்திய வாக்காளர்களின் எண்ணிக்கை தொடர்ந்து அதிகரிக்க வேண்டும் என பத்துகாஜா தொகுதி காங்கிரஸ் 24-ஆம் ஆண்டு மாநாட்டை தொடக்கி வைத்தபோது அவர் கூறினார்.

 

கேமரன்மலை, ஜூலை.18-  கேமரன்மலையிலுள்ள ஆலயம், பள்ளிக்கூடங்கள், ஆதரவற்றோர் இல்லம், உட்பட இதர மாநிலங்களைச் சேர்ந்த 23 பொது அமைப்புகளுக்கு அமலாக்க ஒருங்கிணைப்புப் பிரிவிடமிருந்து 5 லட்சம் வெள்ளி மானியத்தை மைபிபிபி கட்சியின் தேசியத் தலைவர் டான்ஶ்ரீ எம்.கேவியஸ் பெற்றுத் தந்துள்ளார். 

பிரதமர் துறையின் கீழ் இயங்கும் ஐசியு (ICU) எனப்படும் அமலாக்க ஒருங்கிணைப்புப் பிரிவிடம் விண்ணப்பம் செய்வதற்கும் அதனைப் பெற்றுத் தருவதற்கும் உறுதுணையாக இருந்த அவர் நேற்றுக் காலை இங்குள்ள கோல்ஃப் கோர்சில் சம்பந்தப்பட்ட அமைப்புகளுக்கு மானியத்தை எடுத்து வழங்கினார்.

கேமரன்மலை, நெகிரி செம்பிலான், சிலாங்கூர், பேரா, கோலாலம்பூர் ஆகிய மாநிலங்களில் சேவையாற்றி வருபவர்களுக்கு இம்மானியம் வழங்கப்பட்டது என்பதும் குறிப்பிடத்தக்கது. 

மானியத்தைப் பெற்றுக் கொண்ட பொது அமைப்புகள், தங்கள் பகுதிகளில் வசிக்கும் மக்களுக்கு உதவுவதோடு, சமூக ரீதியிலான முன்னேற்றத்திற்கும் வழிகாண வேண்டும். மேலும், பிரதமர் டத்தோஶ்ரீ நஜிப்பை போல எப்படிப்பட்ட சவாலான காலக்கட்டத்திலும் மக்களுக்கு உதவுவதை நிறுத்தக்கூடாது எனவும் ஆலோசனை கூறினார். 

பிரதமர் டத்தோஶ்ரீ நஜிப் எதிர்நோக்கி வரும் சவால்களை தகர்த்தெறிந்து மக்களுக்கு உதவி செய்வதை மட்டுமே தமது முதன்மை குறிக்கோளாகக் கொண்டுள்ளார் என்பதை அவரின் செயல்கள் வெளிப்படுத்துகின்றன. 

மீண்டும் கேமரன்மலையை வளமாக்குவோம் (Make Cameron Highlands Nice Again) என்ற திட்டம் மாபெரும் வரவேற்பைப் பெற்றுள்ளது. இதன்வழி, கிடைக்கப்பெற்றுள்ள கருத்துகளை வைத்து பார்க்கும்போது, இங்குள்ள மக்களுக்கு இன்னும் கூடுதலான சேவையை வழங்க வேண்டும் எனத் தாம் எண்ணம் கொண்டுள்ளதாக நேற்று நடந்த மானியம் வழங்கும் நிகழ்ச்சிக்குப் பின்னர் டான்ஶ்ரீ கேவியஸ் கூறினார். 

கோலாலம்பூர், ஜூலை 16-தேர்தல் ஆணையம் நடத்தவிருக்கும் விளக்கக் கூட்டத்தில் தனது ஊழியர்கள் அனைவரும் கலந்து கொள்ள வேண்டும் என்று கேட்டுக் கொள்ளும் சுற்றறிக்கையை சிலாங்கூரில் உள்ள பள்ளி ஒன்று அனுப்பி இருப்பதானது, அடுத்த பொதுத்தேர்தல் எந்த நேரத்திலும் நடக்கப் போகிறது என்ற பரபரப்பை ஏற்படுத்தி உள்ளது.

அடுத்த திங்கள்கிழமை இந்த விளக்கக் கூட்டம் தொடங்கவிருப்பதாக பண்டாமாரான் ஜெயா சமய ஆரம்பப் பள்ளியின் தலைமையாசிரியர் இந்த சுற்றறிக்கையை வெளியிட்டுள்ளார்.

தங்களுடைய பள்ளி தேர்தல் வாக்குச் சாவடியாக தேர்வு செய்யப்பட்டுள்ளது, எனவே ஆசிரியர்கள் மற்றும் பள்ளி பணியாளர்கள் அனைவரும் தேர்தல் ஆணையம் நடத்தவிருக்கும் விளக்கக் கூட்டத்தில் கலந்துகொள்ள வேண்டியது அவசியம் என்று பெற்றோர்களுக்கு அறிவிக்கும் சுற்றறிக்கையை பள்ளி நிர்வாகம் அனுப்பியுள்ளது. திங்கள் மற்றும் செவ்வாயில் இந்த விளக்கம் கூட்டம் நடைபெறவிருப்பதாக பள்ளி வகுப்புகள் ரத்து செய்யப்பட்டிருப்பதாக பள்ளி பணியாளர் உறுதிப்படுத்தினர்.

கோலாலம்பூர், ஜூலை.14- பக்காத்தான் கூட்டணியின் தலைமைத்துவத்தில் யாரும் ஓரங்கட்டப்படவில்லை, மாறாக கூட்டணியில் உள்ள கட்சிகள் ஒற்றுமையாகவும் சம அந்தஸ்திலும் இருப்பதாக முன்னாள் பிரதமர் துன் டாக்டர் மகாதீர் முகமட் கூறினார்.

இன்று காலையில் பக்காத்தான் ஹரப்பான் கூட்டணியின் தலைமைத்துவ கட்டமைப்பு அறிவிக்கப்பட்டது. அதில் கூட்டணியின் அவைத் தலைவராக டாக்டர் மகாதீரும் மற்றொரு தலைவராக டத்தோஶ்ரீ அன்வார் இப்ராஹிமும் தேர்ந்தெடுக்கப்பட்டுள்ளனர். பக்காத்தான் கூட்டணியின் தலைவராக பிகேஆர் கட்சியின் தலைவர் டத்தோஶ்ரீ டாக்டர் வான் அஸிஷா தேர்ந்தெடுக்கப்பட்டார்.

இந்நிலையில், கூட்டணியில் ஜசெக கட்சியின் நாடாளுமன்ற உறுப்பினர்கள் அதிகம் இருக்க, முக்கியமான பதவிகளுக்கு ஏன் ஜசெக தேர்ந்தெடுக்கப்படவில்லை என டத்தோஶ்ரீ டாக்டர் சாலே சைட் கெருவாக் கேள்வி எழுப்பியிருந்தார்.

இதற்கு பதிலளித்த மகாதீர் மேற்கண்டவாறு கூறினார். மேலும், முக்கிய பதவிகளுக்கான தேர்ந்தெடுப்பு ஏகமனதாக எடுக்கப்பட்டதா என செய்தியாளர்கள் கேட்டதற்கு "முடிவுகளை எப்போதும் ஏகமனதாக எடுக்க முடியாது. சில நேரம் பெரும்பான்மை கொண்டு தான் முடிவுகள் எடுக்கப்படும். நேற்றைய முடிவும் அவ்வாறு எடுக்கப்பட்டது தான்" என அவர் கூறினார்.

கோலாலம்பூர், ஜூலை.13- வாக்குத் திரட்ட வேண்டிய தருணம் வரும் போது மட்டும் தான் இந்தியர்களுக்கான வளர்ச்சி வியூகத் (புளூபிரிண்ட்) திட்டமா? எனக் கேள்வி எழுப்பியிருக்கும் ஈப்போ பாராட் தொகுதி எம்.பி.யான குலசேகரன், தம்முடைய  வழக்கமான கதை வசனத்தை மாற்றி எழுதுவாரா? அதற்கான தருணம் இது என்பதை புரிந்து கொள்வாரா? என்று ம.இ.கா. தேசிய இளைஞர் பிரிவுத் தலைவர் டத்தோ சிவராஜ் கேள்வி எழுப்பியுள்ளார். 

இந்தியர்கள் ஓரங்கட்டப்பட்டு, புறக்கணிக்கப்பட்டு விட்டனர் என்று கூறும் குலசேகரன், எப்படி அவர்கள் ஓரங்கட்டப்பட்டார்கள் என்பதை மறுஆய்வு செய்ய முன்வருவாரா? திட்டமிட்டு கட்டம் கட்டமாக இந்தியர்களை ஓரங்கட்டியது யார்? என்று ஆராய ஓர் அரச விசாரணைக் கமிஷனை அமைக்க முனைந்தால் என்ன..? என்று டத்தோ சிவராஜ் சுட்டிக் காட்டினார்.

இந்தியர்களின் புளூபிரிண்ட் திட்டம் குறித்து ஜ.செ.கவின் உதவித் தலைவருமான குலசேகரன் விமர்சித்து இருப்பது தொடர்பில் டத்தோ சிவராஜ் விடுத்துள்ள அறிக்கை விபரம் வருமாறு:

1970-ஆம் ஆண்டில் அரசாங்க வேலைகளில் 17 விழுக்காடாக இருந்த இந்தியர்கள், இப்போது 5 விழுக்காட்டுக்குக் குறைவாக உள்ளனர். அரசாங்கம் மற்றும் தனியார் துறைகளில் இந்தியர்கள் ஓரங்கட்டப்பட்டு விட்டார்கள் என்று குலசேகரன் கூறியுள்ளார். இது யாரால்? இந்தக் கேள்விகளைக் குலசேகரன் அவருடைய இப்போதைய 'தலைவராக' விளங்கும் துன் மகாதீரை நோக்கி அல்லவா கேட்க வேண்டும்?

இந்நாட்டில் இந்தியர்கள் ஓரங்கட்டப்பட்டது துன் மகாதீரினால் தான் என்பது மறுக்க முடியாத உண்மை. ஆனால், குலசேகரனைப் போன்றவர்கள் அந்தப் பழியை பிரதமர் டத்தோ நஜீப் மீது போட முயற்சிக்கிறார்கள். பிரதமர் பதவியேற்ற 8 ஆண்டுகளில் இந்தியர்களுக்கான பல திட்டங்களை பிரதமர் நஜிப்  மேற்கொண்டு வருகிறார். 

இந்தியர்களின் புளூபிரிண்ட் திட்டத்தை குலசேகரன் தொடர்ந்து வாரம் தவறாமல் குறைக் கூறிக் கொண்டிருக்கிறார். ஒவ்வொரு தேர்தலுக்கும் புதிய புளூபிரிண்ட் போட்டு விரயம் செய்கிறார்கள் என்கிறார். மேலும், எல்லா இன மக்களும் இது சமமானதாக இருக்க வேண்டும் என்றும் குலசேகரன் வலியுறுத்துகிறார். இந்தியர்களுக்கென தனியான  திட்டம் தேவையில்லை என்று இவரும் இவருடைய சகாக்களும் கூறுகிறார்கள்.

எதிர்க்கட்சிகள் ஆளும் மாநிலங்களில் ஏற்கனவே இந்தியர்களுக்கான உதவித் திட்டங்களை மேற்கொள்ளப்பட்டு வருகின்றன என்கிறார். ஆனால், இதுவரை யார் கண்ணுக்கும் அப்படிப்பட்ட திட்டங்கள் இருப்பதாக தெரியவில்லை. 

முதலில் குலசேகரன் தனது வழக்கமான கதை வசனத்தை மாற்றி எழுத வேண்டிய நேரம் வந்துவிட்டது. அவருடைய சிந்தனை ஆற்றலில் ஏமாற்றம் தரும் வகையில் 'வெற்றிடம்' விழுந்து விட்டது.

புளூபிரிண்ட் திட்டத்தைப் படித்துப் பார்த்தாலே தெரியும். இந்திய சமுதாயத்தைப் பாதிக்கும் அனைத்து அம்சங்கள் குறித்தும் விரிவாக ஆராயப்பட்டுள்ளது. 'செடிக்' அலுவலகத்தில் 50பேர் ஊழியர்கள் கொண்ட பிரிவு உருவாக்கப்பட்டுள்ளது. அடுத்த பத்து ஆண்டுகளுக்கான திட்டமாக இது வகுக்கப்பட்டுள்ளது. 

ஏப்ரல் மாதத்தில்தான் புளூபிரிண்ட் வியூகத் திட்டம் தொடங்கப்பட்டது என்றாலும் ‘செடிக்’ அமைப்பு திட்ட அமலாக்கத்தில் மிகத் துரிதமாக இயங்கியுள்ளது.

எந்தவொரு தீர்வுத் திட்டத்தையும் முன்வைக்காமல் வாரந்தோறும் குறை சொல்லிக் கொண்டிருப்பதே குலசேகரன் மற்றும் அவர்களது சகாக்களின் வேலையாகி விட்டது. இவர்கள் விருந்து நடத்தி வசூல் நடத்துவதில் காட்டும் தீவிரமான ஈடுபாட்டை வியூகம் திட்டங்கள் பட்டியலிடப்படும் சமுதாய வளர்ச்சித் திட்டங்களின் அமலாக்கத்தின் மீது காட்டலாம்

குறைந்தபட்சம் எதிர்க்கட்சிகள் கட்சிக்கு உட்பட உங்கள் மாநிலங்களில் இந்திய சமுதாயத்திற்கு நீங்கள் என்ன வைத்துருக்கிறீர்கள் என்பதையாவது எதிர்க்கட்சிகள் எங்களுக்குக் காட்டலாம் அல்லவா...! 

இவ்வாறு தம்முடைய அறிக்கையில் மஇகாவின் தேசிய இளைஞர் பிரிவுத் தலைவரான டத்தோ சிவராஜ் கூறியுள்ளார். 

More Articles ...