கோலாலம்பூர், ஜூலை.13- தேர்தல் தொகுதி எல்லை மறுஅமைப்புக்கு எதிரான வழக்கு நீதிமன்றத்தில் இருப்பதால் தேர்தல் ஆணையம் தனது இரண்டாவது சுற்று ஆய்வு விசாரணைகளை மேற்கொள்ளக் கூடாது என பெர்சே 2.0 இயக்கம் கோரிக்கை விடுத்திருக்கிறது. 

அந்தந்தத் தொகுதிகளில் ஆய்வு விசாரணைகளை இரண்டாம் கட்டமாக நடத்தவிருக்கும் தேர்தல் ஆணையம் அவ்வாறு செய்யக் கூடாது என்று அது கேட்டுக்கொண்டது.

சிலாங்கூரை சேர்க்காமல் இத்தகைய தொகுதி எல்லை சீரமைப்பு திட்டத்தை தேர்தல் ஆணையம் பூர்த்தி செய்யக் கூடாது எனக் கோலாலம்பூர் உயர்நீதிமன்றம் இடைக்காலத் தடை விதிக்கப்பட்டுள்ளது. 

மேலும், சிலாங்கூர் மற்றும் மலாக்கா ஆசிய இரு மாநிலங்களிலும் அந்தந்தத் தொகுதிகளில் ஆய்வு விசாரணைகளை நடத்தக்கூடாது என நீதிமன்றம் தற்காலிகத் தடை கூறியுள்ளது என பெர்சே சுட்டிக் காட்டியது. 

ஆனால், அதே வேளையில் பேரா, ஜொகூர், பினாங்கு, கோலாலம்பூர் மற்றும் கிளாந்தான் ஆகிய பகுதிகளில் ஆய்வு விசாரணைகளை 2- ஆவது கட்டமாக தேர்தல் ஆணையம் நடத்த முயற்சிக்கிறது. இதனையும் உடனடியாக நிறுத்தவேண்டும் என்று பெர்சே கோரிக்கை விடுத்தது. 

இந்த வழக்கில், மிக முக்கியமான அரசியல் அமைப்புச் சட்ட பிரச்சனைகள் எழுப்பப்பட்டுள்ளன. எனவே, நீதிமன்ற வழக்கு விசாரணை முற்றாக முடியும் வரையில், தேர்தல் ஆணையம் பொறுமையுடன் இருக்கவேண்டும். 2-ஆவது கட்டத் தொகுதி மறுசீரமைப்பு ஆய்வு விசாரணைகளை நடத்தக்கூடாது என்று பெர்சே ஒருங்கிணைப்புக் குழு அறிக்கை ஒன்றில் கோரியுள்ளது.

 

கோலாலம்பூர், ஜூலை.13– சட்ட நிபுணர்கள் குழுவை லண்டலுக்கு அனுப்பத் தாம் எடுத்த முடிவானது, மலேசியக் கூட்டரசிலிருந்து சரவா மாநிலம் பிரிந்து போவதற்கான ஒரு முன்னோட்டம் அல்ல என்று சரவா முதல்வர் டத்தோ அமார் அபாங் ஜொஹாரி ஓபெங் தெரிவித்தார்.

தம்முடைய முன்னோடியான காலஞ்சென்ற டான்ஶ்ரீ அடெனான் சாத்தேம் முன்னெடுத்த சுயாட்சி திட்டத்தைத் தாம் தொடர்ந்து செயல்படுத்துவது மட்டும் தான் தம்முடைய அரசு நிர்வாகத்தின் நோக்கம் என்று அவர் சொன்னார்.

1963-ஆம் ஆண்டின் (எம்.ஏ.63) மலேசிய உடன்பாட்டின் அடிப்படையில் சரவாக்கிற்கான சுயாட்சியை அடைவதற்குக் காலஞ்சென்ற டான்ஶ்ரீ அடெனான் தொடக்க முனைப்புகளை எடுத்தார். அவரது மரபைப் பின்பற்றுவதைத் தாம் தொடர்ந்து மேற்கொண்டு இருப்பதாக டத்தோ அமார் அபாங் ஜொஹாரி குறிப்பிட்டார்.  

“நம்முடைய மக்களுக்கும் நம்முடைய மாநிலத்திற்கும் முக்கியத்துவம் வாய்ந்த இப்பிரச்சனை குறித்து பேச்சுவார்த்தை நடத்தப்படுவதற்கு நமக்கு ஆதார ஆவணங்கள் தேவைப்படுகின்றன. இது குறித்து பேச்சுவார்த்தை நடத்த அமரும்போது, நமது பிரதமர் திறந்த மனதுடன் அணுகுவார் என நான் நம்புகிறேன்” என்றார் அவர்.

இது தொடர்பில் சட்ட நிபுணர்கள் குழுவை லண்டனுக்கு அனுப்ப முதல்வர் டத்தோ அமார் அபாங் ஜொஹாரி எடுத்த முடிவு குறித்து கேள்விகளும் சந்தேகங்களும் எழுப்பட்டுள்ளன. மேலும், இதனால் தேவையற்ற செலவுகள்தான் ஏற்படும் என்று சிலர் கூறியுள்ளனர்.

எனினும், லண்டனுக்குச் சட்ட நிபுணர்கள் குழுவை அனுப்பும் நோக்கம் தெளிவானது. மலேசியாவுடனான உடன்பாட்டில் இருக்கும் சரவாவின் உரிமைகள் மீதான அம்சங்கள் குறித்து அறிந்திருப்பது சட்ட அடிப்படையை வலுப்படுத்தி மாநில அரசு பேச்சுவார்த்தை நடத்த உதவியாக இருக்கும் என்றார் அவர். 

சட்ட குழுவை அனுப்பும் விவகாரம் குறித்து ஏன் இவர் அச்சம் தெரிவிக்கிறார்கள்? இதில் அச்சப்படுவதற்கு என்ன இருக்கிறது? நாங்கள் தொடர்ந்து மலேசியாவுடன்தான் இணைந்திருப்போம். இதுதான் உண்மை" என்றார் அமார் அபாங் ஜொஹாரி. 

 

 

 

 

கோலாலம்பூர், ஜூலை.12- கட்சியின் மத்திய நிர்வாகக் குழு தேர்தலை மறுபடியும் நடத்தவேண்டும் என்று கோரும் சங்கங்கள் பதிவு இலாகா, இன்னும் அதற்கான அதிகாரப்பூர்வகக் கடிதத்தை தராத நிலையில், அடுத்த 48 மணி நேரத்திற்குள் அந்தக் கடிதத்தை தங்களுக்குத் தரவேண்டும் என்று கெடு விதித்திருக்கிறது ஜசெக. 

ஜசெக தந்து மத்திய நிர்வாகக் குழு தேதலை மீண்டும் நடத்த வேண்டும் என்று கடந்த புதன்கிழமை விடுத்த அறிக்கை ஒன்றில் சங்கங்கள் பதிவு இலாகாவின் தலைமைச் செயலாளர் டத்தோ ரசின் அப்துல்லா குறிப்பிட்டிருந்தார்.

ஆனால், இதுவரையிலும் சங்கங்கள் பதிவு இலாகா அதிகாரப்பூர்வ கடிதம் எதனையும் ஜசெகவுக்கு அனுப்பவில்லை என ஜசெகவின் தேசிய சட்டப்பிரிவு தலைவர் கோபிந்த் சிங் டியோ இன்று தெரிவித்தார்.

"நான் சங்கப் பதிவகத்தாருக்கு 48 மணி நேர அவகாசம் தருகிறேன். நாளை மறுநாள் வெள்ளிக் கிழமை அலுவலக நேரம் முடிவதற்கு முன்னர் சங்கங்கள் பதிவு இலாகா எங்களுக்குக் கடிதம் மூலமாகவோ அல்லது இதர வழிகளிலோ கடிதத்தைத் தர வேண்டும். இல்லையேல் நாங்கள் மாற்று வழிகள் ஏதெனும் தேட வேண்டியிருக்கும்" என்று பூச்சோங் நாடாளுமன்ற உறுப்பினர் தனது அறிக்கையில் குறிப்பிட்டார்.

சங்கங்கள் பதிவு இலாகாவிடம் தொடர்பு கொள்ளாமல் நாங்கள் தேர்தலை நடத்த முடியாது. ஏனெனில், அவர்கள் தான் ஜசெக எத்தகைய உத்தரவுகளை ஏற்று நடக்கவேண்டும் என்பதை உறுதி செய்து கூற வேண்டும். காலம் விலைமதிப்பற்றது. இவர்கள் தாமதப்படுத்தும் ஒவ்வொரு மணித்துளியும் கட்சிக்கு பாதிப்பை  ஏற்படுத்தும் என கோபிந்த் சிங் கூறினார்.

 

 

 

கோலாலம்பூர், ஜூலை.11- வாக்காளர்களின் சிந்தனைகளில் ஏற்பட்டுள்ள மாற்றங்கள் காரணமாக அடுத்த பொதுத் தேர்தலில் ஜொகூர் மாநிலத்தைக் கைப்பற்ற, பக்காத்தான் ஹராப்பான் இலக்கு கொண்டுள்ளது. எதிர்க்கட்சி கூட்டணி நியாயமான வழியில் வெற்றிக்காக போராடுமே தவிர கள்ளத்தனமான தந்திரங்களை ஒருபோதும் கடைபிடிக்காது என்று ஜசெக கூறியது. 

வெற்றி பெறுவதற்காக சட்ட விரோதமான முறையில் வாக்காளர்களை இடம் மாற்றிக் கொண்டுவருவது போன்ற காரியங்களில் அது ஈடுபட  மாட்டொன் என்று ஜசெகவின் வியூகத் நிபுணர் லியூ சின் டோங் தெரிவித்தார். 

பக்காத்தான் ஹராப்பான் 14-ஆவது பொதுத் தேர்தலில் வெற்றிப் பெற ஜொகூரை இலக்காக கொண்டு வாக்காளர்களை ஜொகூர் மாநிலத்திற்கு கூட்டம் கூட்டமாக அனுப்புகின்றது என துணைப் பிரதமரும் உள்துறை அமைச்சருமாகிய டத்தோஸ்ரீ அகமட் ஸாஹியிட் ஹமிடி குற்றஞ்சாட்டி இருந்தார்.

இது குறித்துக் கருத்துத் தெரிவித்த ஜசெகவின் லியூ சின் டோங் இந்தக் குற்றச்சாட்டை நிராகரித்துள்ளார். ஜொகூரில் சில தொகுதிகளில் வெற்றிப் பெற பக்காத்தான் நம்பிக்கை கொண்டுள்ளது. அடுத்த தேர்தலில் ஜொகூர் ஒரு முக்கியமான போராட்ட களம் என்பதை ஜசெக உணந்துள்ளது. கள நிலவரம் மாறிவருகிறது. இந்த மாற்றம் ஜொகூரிலும் புத்ராஜெயாவிலும் மாற்றத்தைக் கொண்டுவரும் என்றார் அவர்.

எதிர்க்கட்சிகள் தங்களால் முடிந்தவரை நியாமாகவே போராடும். சட்ட விரொத வழிகளைக் கையாளாது. ஆனால் தேசிய முண்ணன்ணி யைப் பொறுத்தவரை அப்பட்டிபட்ட சட்ட விரோதமான வழிமுரைகளதான் அவர்களின் அன்றாடச் செயல் முரையாகி விட்டது என்று அவர் சாடினார்.

ஜொகூர், கெடா மற்றும் சபா ஆகிய ஒவ்வொரு மாநிலத்திலும் முறையே 10 நாடாளுமன்றத் தொகுதிகளில் எதிர்க்கட்சிகள் கைப்பற்றும் என்று அவர் சொன்னார். அவற்றில் ஜொகூரில் லாபிஸ், சிகாமாட், லெடாங், செக்கிஜாங், மூவார், பாசீர் கூடாங், பூலாய், தெப்ராவ் ஜொகூர் பாரு உள்ளிட்டதொகுதிகளில் குறுகிய வாக்குகளினால் வெற்றிப் பெற வாய்ப்புகள் அதிகமாக உள்ளது என அவர் சுட்டிக்காட்டினார்.

 

புத்ராஜெயா, ஜூலை.10- கோலாகுபு பாருவிலிருந்து வாக்காளர்களை குறுக்கு வழியில் வேறொரு தொகுதிக்கு மாற்றும் வேலையை தேர்தல் ஆணையம் செய்கிறது எனத் தேர்தல் கண்காணிப்பு இயக்கமான பெர்சே 2.0 குற்றஞ்சாட்டியது.

தேர்தல் ஆணையம் மிக அமைதியாக இந்த கொல்லைப் புற வழியாக அந்த மாற்றத்தைச் செய்கிறது என்று பெர்சே தலைவர் மரியா சின் அப்துல்லா கூறினார். தொகுதிச் சீரமைப்பு செய்வதாகச் சொல்லி 

தேர்தல் ஆணையம் கோலகுபு பாரு வாக்காளர்களை மற்றொரு தொகுதிக்கு மாற்றியுள்ளது. 

அது பற்றிக் கேள்வி எழுப்பிய போது அதுவொரு 'நிர்வாகப் பிழை' என்று மிக சாமர்த்தியமாக பதில் சொல்கிறது என மரியா சின் மேலும் கூறினார். தேர்தல் ஆணையம் அதிகாரத்தை தன் கையில் எடுத்துக் கொண்டு கொண்டு தன்மூப்பாகச் செயல்படுகிறது என்று அவர் சாடினார்.

இதனிடையே, தேர்தல் ஆணையத்தின் இந்த கொல்லைப் புற வேலையை எதிர்த்து மரியா சின், துந்த் தலைவர் ஷாருல் அமான், பெர்சே பணியாளர் சான் சோங் ஆகியோர் பிரதமர் துறை அமைச்சர் பால் லாவைச் சந்தித்து, தேர்தல் ஆணையத்தின் மேல் புகார் மனுவைக் கொடுத்தனர். அவரும் சம்பந்தப்பட்ட தரப்புக்கு அதனை அனுப்புவதாக உறுதியளித்தார் என மரியா சின் கூறினார்.

கடந்த மே மாதம் 16-ஆம் தேதி பெர்சேவும் இதர சமூக அமைப்பினரும் தேர்தல் ஆணையத்தின் தலைவரைச் சந்தித்து அடுத்த 14-ஆவது பொதுத் தேர்தலில் செயல்படுத்த வேண்டிய சீர்திருத்தங்களைப் பற்றி பேச அதன் தலைமையகத்திற்குச் சென்றனர். எனினும், அவர்கள் தேர்தல் ஆணைய தலைவரைச் சந்திக்க முடியவில்லை என்பது குறிப்பிடத்தக்கது.

 

ஜார்ஜ்டவுன், ஜூலை,8- தனது மத்திய நிர்வாகக் குழுவுக்கான தேர்தலை இரண்டாவது முறையாக மீண்டும் நடத்தவேண்டும் என்று ஆர்.ஓ.எஸ் எனப்படும் சங்கங்களுக்கான பதிவுத்துறை உத்தரவிட்டிருப்பது குறித்து விவாதிக்க கட்சியின் சிறப்புக் கூட்டம் இன்று நடத்தப்படும் என்று ஜசெகவின் தலைமைச் செயலாளர் லிம் குவான் எங் தெரிவித்தார்.

மறுதேர்தலை நடத்தவேண்டும் கோரும் கடிதம் இதுவரை தங்களுக்கு வந்து கிடைக்கவில்லை. அது கிடைத்த பின்னர், அதில் கூறப்பட்டிருக்கும் அம்சங்கள் பற்றி முழுமையாகத் தெரிந்து கொண்ட பின்னர் அது பற்றி விவாதிக்கப்பட்டு அதன் பின்னரே எந்தவொரு முடிவும் எடுக்கப்படும் என்று அவர் சொன்னார்.

கடந்த 2013ஆம் ஆண்டில் இருந்து நீடித்து வரும் இப்பிரச்சனையில், இதுவரையில் மவுனமாக இருந்த பதிவுத்துறை இப்போது மறுதேர்தலை நடத்த வேண்டும் என்று கோருவதன் உள்நோக்கம் என்ன? என்று அவர் கேள்வி எழுப்பினார்.

கடந்த 2012ஆம் ஆண்டிலேயே மறுதேர்தல் நடத்தப்பட்டு விட்டது. கிட்டத்தட்ட நான்கு ஆண்டுகாலம் சும்மா இருந்து விட்டு இப்போது மறுதேர்தலை நடத்த வேண்டும் என்று பதிவுத்துறை ஏன் உத்தரவிடவேண்டும் என்று லிம் குவான் எங் வினவினார்.

 

புத்ராஜெயா, ஜூலை,8- ஜசெக தனது மத்திய நிர்வாகக் குழு (சி.இ.சி) தேர்தலை மீண்டும் நடத்தவேண்டும் என்று சங்கங்களின் பதிவகம் உத்தரவிட்டுள்ளது.

கடந்த 2013ஆம் ஆண்டு செப்டம்பர் மாதம் 29ஆம் தேதி நடத்தப்பட்ட மத்திய நிர்வாகக் குழுத் தேர்தல் மற்றும் முக்கிய கட்சி நியமனங்கள் சட்டத்திற்குப் புறம்பானவை என்பதால் ஜசெக மீண்டும் கட்சித் தேர்தலை நடத்துவது அவசியமானது என்று பதிவுத் துறை தலைமை இயக்குனர் டத்தோ முகம்மட் ரஷின் அப்துல்லா சொன்னார்.

இந்த உத்தரவின் அடிப்படையில் ஜசெக மீண்டும் மத்திய நிர்வாகக் குழு தேர்தலை நடத்துமானால், 2013ஆம் ஆண்டுக்கும் 2016ஆம் ஆண்டுக்கும் இடையே மூன்றாவது தடவையாக ஜசெக தலைமைத்துவத் தேர்தலை நடத்துகிறது எனப் பொருள்படும்.

2012ஆம் ஆண்டில் நடந்த தேர்தலில் முறைகேடுகள் நடந்திருப்பதால் 2013இல் புதிய தேர்தலை நடத்த சங்கங்களின் பதிவுத் துறை உத்தரவிட்டிருந்தது. பின்னர் 2013ஆம் ஆண்டில் ஜசெக சுயமாக மறு தேர்தலை நடத்தியது. இந்தத் தேர்தலுக்கு எதிராகவும் சில உறுப்பினர்கள் புகார் செய்ததாக கூறி அதனை சங்கங்கள் பதிவுத்துறை நிராகரித்தது என்பது குறிப்பிடத்தக்கது.

இந்நிலையில் பொதுத்தேர்தல் நடைபெறவிருப்பதை காரணமாக வைத்து  கட்சியின் விதிமுறைக்கு ஏற்ப கடந்த 2016ஆம் ஆண்டில் 18 மாதங்களுக்கு கட்சித் தேர்தலை ஜசெக ஒத்திவைத்துள்ளது.

 

 

More Articles ...