கோலாலம்பூர், நவ.29- போலி பல் மருத்துவர்களுக்கு கடுமையான தண்டனை விதிக்க வகை செய்ய,  பல் மருத்துவம் மீதான  விதிமுறைகளைக் கொண்ட  புதிய மசோதா நாடாளுமன்றத்தில் தாக்கல் செய்யப்படுகிறது.

மலேசிய மருத்துவக் கழகமான எம்.டி.சி.யின் கடமைகள் மற்றும் அதிகாரங்கள் ஆகியவை தொடர்பான புதிய அம்சங்கள் இந்த மசோதாவில் இடம்பெற்றுள்ளன.  தகுதி நிர்ணயம், மற்றும் அங்கீகாரம், பதிவுகளை அங்கீகரிப்பது அல்லது நிராகரிப்பது, கட்டணம் விதிப்பது, பதிவுக்கான தேர்வு விதிமுறைகளை சீரமைப்பது ஆகியவை சம்பந்தப்பட்ட எம்.டி.சி.யின் அதிகாரங்களில் இனி மாற்றங்களை இந்த மசோதா கொண்டு வரவிருக்கிறது.

அதேவேளையில், மலேசிய பல் மருத்துவ தெரபிஸ்ட் வாரியம் ஒன்று பதிவு செய்யப்படுவதற்கு இந்த மசோதா வகை செய்கிறது.  இந்தப் புதிய மசோதா அமலுக்கு வரும் போது எம்.டி.சி. கலைக்கப்பட்டு புதிய வாரியம் அமைவதற்கு வழி ஏற்படுத்தப்படும்.

பல் மருத்துவம் தொடர்பான குற்றங்களுக்கு பல்வேறு கடுமையான அபராதங்களையும் தண்டனைகளையும் விதிப்பதற்கும் போலி பல் மருத்துவர்களைச் சமாளிப்பதற்கும் இந்த புதிய மசோதாவில் பல சட்டக் கூறுகள் ஏற்படுத்தப்பட்டுள்ளன.

பதிவு செய்யப்படாதவர்கள், பல் மருத்துவர்களாக செயல்படுவது மற்றும் பல் மருத்துவர் போல நடந்து கொள்வது ஆகிய குற்றங்களைப் புரிந்தால் ஒவ்வொரு குற்றத்திற்கும்  கூடுதல் பட்சமாக 3 லட்சம் ரிங்கிட் அபராதம் விதிக்கப்படும் அல்லது 6 ஆண்டுகளுக்கும் மேற்போகாத வகையில் சிறைத் தண்டனை விதிக்கப்படும் அல்லது இரண்டு தண்டனைகளையுமே விதிக்கப்படும்.

 

 

 

 

 

 

 

 

 

 

 

 

 

 

 

 

 

 

 கோலாலம்பூர், நவ.29- பயங்கரவாதத்திற்கு துணை போவதாக, சர்ச்சைகளை எதிர்நோக்கி வரும் இந்தியாவைச் சேர்ந்த இஸ்லாமிய மதப் போதகர் ஷாகிர் நாயக்கிற்கு ஆதரவாக அமானா நெகாரா கட்சி செயல்பட முடிவு செய்திருப்பது குறித்து மஇகா இளைஞர் பிரிவு கேள்வி எழுப்பியுள்ளது.

மத போதகர் ஷாகிருக்கு ஆதரவாக அமானா நெகாரா கட்சியின் தகவல் பிரிவுத் தலைவர் காலிட்  சமாட் பேசியிருப்பது குறித்து மஇகா இளைஞர் பிரிவின் தலைவர் டத்தோ சிவராஜ் கேள்வி எழுப்பினார்.

கடந்த ஆண்டு டாக்காவில் நடந்த பயங்கரவாதத் தாக்குதலில் அவருடைய ஆதரவாளர்கள் சம்பந்தப் பட்டுள்ளார்கள் என்பதற்காக ஷாகிர் நாய்க் மீது பழிபோடக்கூடாது என்று காலிட் சமாட் கூறியதாக இணையச் செய்தித் தளம் ஒன்று தெரிவித்துள்ளது. 

காலிட் சமாட் இவ்வாறு கூறியிருப்பது உண்மையாக இருக்குமேயானால், இது ஓர் அபாயகரமான  போக்குதான்.  பக்காத்தான் ஹராப்பான் இப்போது ஷாகிர் நாயக்கை ஆதரிக்கிறதா? என்று ம இகா இளைஞர் பிரிவின் தலைவர் டத்தோ சிவராஜ் வினவினார்.

அமானா கட்சி பக்காத்தான் ஹராப்பான்  கூட்டணியில் இடம்பெற்ரிருப்பதால் காலிட் சமாட்டின் எந்தவொரு கருத்தும்  அந்தக் கூட்டணியின் கருத்தாக அமையும் என்பதை சிவராஜ் சுட்டிக்காட்டினார்.

தம்முடைய  பிரசங்கங்களில் தொடர்ச்சியாக இந்துக்களையும் முஸ்லிம் அல்லாதவர்களையும் ஷாகிர் இழிவுபடுத்தி வருகிறார் என்பதற்கு போதுமான ஆதாரங்கள் உள்ளன. எனவே தான் இதர பல அரசு சாரா அமைப்புக்களுடன்  மஇகா இளைஞர் பிரிவும் சேர்ந்து ஷாகிரின் மலேசிய நிகழ்ச்சிகளுக்கு தனது எதிர்ப்பைத் தெரிவித்தது என்று சிவராஜ் சொன்னார்.

மேலும் காலிட் சமாட்டின் கருத்து, எதிர்க்கட்சி கூட்டணியின் கருத்தைப் பிரதிபலிக்கிறதா? என்பது குறித்து ஜசெகவிலுள்ள இந்திய தலைவர்களும் ஹிண்ட்ராப் தலைவர்களும் விளக்கம் கோர முன்வரவேண்டும் என்று  அவர் கேட்டுக்கொண்டார்.

ஷாகிர் விவகாரத்தில் பாஸ் கட்சியின் கொள்கையையே அமானா கட்சியும் கொண்டிருப்பது காலிட் சமாட்டின் கருத்தில் இருந்து தெரிய வருகிறது என்று சிவராஜ் கூறினார்.

 

 

 

 

 

 

 

 

 

 

 

 

 

 

 

 கோலாலம்பூர், நவ.28- கடந்த 2007-ஆம் ஆண்டில், மத்திய அரசாங்கத்திற்கு எதிராக வெகுண்டு எழுந்த இந்தியர்கள் பலர் ஹிண்ட்ராப் இயக்கத்தால் நடத்தப்பட்ட பேரணியில் கலந்து கொண்டு, 2008-ஆம் ஆண்டின் பொதுத் தேர்தலின் வாயிலாக நாட்டில் அரசியல் சுனாமியை ஏற்படுத்தினர் என மஇகாவின் முக்கிய புள்ளி ஒருவர் ஒப்புக்கொண்டுள்ளார்.

அந்த சுனாமியைத் தொடர்ந்து, பல இந்தியர்களுக்கு நன்மைகள் கிடைக்கப் பெற்றன என்பதை ஒப்புக் கொள்ள வேண்டும் என்று பெயர் குறிப்பிட விரும்பாத மஇகாவின் முக்கியத் தலைவர் கருத்துரைத்துள்ளார்.  

2008-ஆம் ஆண்டுப் பொதுத் தேர்தலுக்குப் பிறகுதான், அரசாங்கத்தின் முக்கியத் துறைகளில் இந்தியர்களுக்கு வேலை வாய்ப்பு வழங்கப்பட்டது., அதன் பின்னரே, பல இந்தியர்களுக்கு பதவி உயர்வுகள் வழங்கப்பட்டன என்று ஜ. செ.க.வின் அந்தோனி லோக் கூறியதைத் தொடர்ந்து, அந்த மஇகா தலைவர் அவ்வாறு சொன்னார். 

"அந்தோனி கூறியது உண்மையே. 2008-ஆம் ஆண்டிற்கு முன்பு, அரசாங்கத்தின் எந்த முக்கியப் பதவிகளும் இந்தியர்களுக்கு வழங்கப்பட்டதில்லை. எதிர்க்கட்சியினரின் ஆதரவில் நடத்தப்பட்ட அந்தப் பேரணி வாயிலாக பல இந்தியர்களுக்கு நன்மைகள் கிடைத்தன என்பதை மறுக்க முடியாது" என்று அவர் சொன்னார். 

ஒரு பொதுத் துறையைச் சேர்ந்த இந்தியர் ஒருவர் பதவியிலிருந்து வெளியேற்றப்பட்டாலோ, அல்லது பதவி விலகினாலோ, அவரின் இடத்தை நிரப்புவதற்கு வேறொரு இந்தியரை மட்டுமே நியமிக்க வேண்டும் என்ற சூழ்நிலை இப்போது அரசாங்கத்தில் நிலவி இருப்பதற்கு காரணமாகத் திகழ்வது 2007-ஆம் ஆண்டில் நடத்தப்பட்ட அந்த ஹிண்ட்ராப் பேரணியே, என்று அவர் கூறினார். 

1960 மற்றும் 1970-ஆம் ஆண்டுகளில், பொதுச் சேவைத் துறையில், இந்தியர்களின் எண்ணிக்கை குறைக்கப் பட்டு, அவர்களுக்கு முக்கியப் பதவிகள் வழங்கப்படவில்லை. ஒரு சிலருக்கே அந்த வாய்ப்புகள் வழங்கப்பட்டன. ஆனால், அவை வெறும் பெயரளவில் தான் தரப்பட்டதாக அவர் தெரிவித்தார். 

இந்தியர்களால் அரசாங்கத்தின் முக்கியப் பதவிகளை வகிக்க முடியும் என்பதை 2008-ஆம் ஆண்டு வரை ம.இ.கா அறிந்திருக்கவில்லை என்றும் அந்த முக்கியத் தலைவர் கூறினார். 

பினாங்கு மாநிலத்தை ஜ.செ.க ஆளத் தொடங்கியப் பின்னர், அந்த மாநிலத்தின் இரண்டாவது துணை முதலமைச்சர் பதவி இந்தியரான பேராசிரியர் பி.இராமசாமிக்கு வழங்கியதையும், பேரா மாநிலத்தின் சபாநாயகராக ஜ.செ.கவின் துரோனோ சட்டமன்ற உறுப்பினர் வி.சிவகுமார் நியமிக்கப்பட்டார் என்பதையும் அந்தத் தலைவர் சுட்டிக் காட்டினார்.  

 

 

 

பாகான் டத்தோ, நவ.26-அடுத்த ஆண்டில் சீனப் பெருநாள் கொண்டாட்டம் முடிந்த கையோடு  சில தினங்களுக் உள்ளாகவே நாட்டின் 14ஆவது பொதுத் தேர்தல் நடத்தப்படும் சாத்தியம் இருப்பதாக துணைப் பிரதமர் டத்தோஶ்ரீ சாஹிட் ஹமிடி கோடிகாட்டியுள்ளார்.

ஊத்தாங் மெலிந்தானில் தியோ ஃபு கியோங் கோயிலை திறந்து வைத்த பின்னர் உள்துறை அமைச்சரும் பாகான் டத்தோ தொகுதி எம்.பி.யுமான சாஹிட் மேற்கண்டவாறு  சுட்டிக்காட்டினார்.

நம்முடைய முக்கிய நாள் வரப்போகிறது. சீனப் பெருநாள் முடிந்து,  அந்த நாள் வரவிருக்கிறது. வாக்காளர்கள்  முன்பு தவறு செய்திருந்தால் பரவாயில்லை. மீண்டும் அதே தவறை அவர்கள் இப்போது செய்யக் கூடாது. அப்படிச் செய்தால் அதற்கு மன்னிப்பு இல்லை என்று அவர் சொன்னார்.

சீனப் பெருநாள் பிப்ரவரி 16ஆம் 17ஆம் நாள்களில்  இடம்பெறவுள்ளன. மலேசியா நாடாளுமன்றத்தின் தவணைக் காலம் அடுத்த ஆண்டு ஜூன் 26ஆம் தேதியோடு முடிவுக்கு வருகிறது. எனவே, இந்தத் தேதிக்கு 60 நாள்களுக்கு முன்பே தேர்தல் நடத்தப் படவேண்டும் என்பது குறிப்பிடத்தக்கது.

 

 கோலாலம்பூர், நவ.25- அடுத்துவரும் பொதுத்தேர்தலின் போது தேசிய முன்னணிக்கு எதிராக பக்காத்தான் ஹரப்பான் எனப்படும் எதிர்க்கட்சிக் கூட்டணியை ஹிண்ட்ராப் இயக்கம் ஆதரிக்கும் என்று அதன் தலைவர் வேதமூர்த்தி இன்று பகிரங்கமாக அறிவித்தார்.

பிரதமர் நஜிப்பின் தலைமையிலான தேசிய முன்னணி ஒரு நேர்மையற்ற அரசியலை நடத்திவருவது குறித்து ஹிண்ட்ராப் வெறுப்புக் கொண்டு    இருப்பதாக அவர் சொன்னார்.

தேசிய முன்னணியை நிராகரிக்கும் வண்ணம் கிராமப்புறங்கள் மற்றும் புறநகர்ப்பகுதிகளில் இருக்கும் இந்திய சமுதாயத்தைச் சேர்ந்த வாக்காளர்கள் பக்காத்தான் ஹராப்பான் கூட்டணிக்கு வாக்களிக்கும்படி செய்வதில் ஹிண்ட்ராப் முக்கிய பங்கு வகிக்கும் என்று வேதமூர்த்தி கூறினார்.

இந்திய வாக்காளர்களின் வாக்குகளை எதிர்க்கட்சி கூட்டணிக்கு பெற்றுத் தருவதற்காக சமுதாயத்தினர் மத்தியில் ஹிண்ட்ராப்  இறங்கிவேலை செய்யும். 'ஒரே மலேசியா' கோட்பாடு மற்றும் மத மிதவாதக் கொள்கை போன்ற பிரதமர் நஜிப்பின் திட்டங்களில் நேர்மையில்லை. தனிப்பட்ட சில நபர்களை பாதுகாப்பதோடு இனத் தீவிரவாதத்தையும் அவர் ஊக்குவிக்கிறார் என்று வேதமூர்த்தி குற்றஞ்சாட்டினார்.

மேலும், அரசாங்கத்தின் இந்தியர்களுக்கான வியூகப் பெருந்திட்டம் குறித்தும் வேதமூர்த்தி கடுமையாகச் சாடினார். இந்தியர்களின் சமூகப் பொருளாதார மேம்பாட்டு அமைப்பான 'செடிக்' மூலம் இந்தியர்களுக்கான வியூகப் பெருந்திட்டம் கொண்டு வரப்பட்டுள்ளது. இது இந்திய சமுதாயத்தை மயக்குவதற்கான நஜிப்பின் ஒரு முயற்சி என்றார் அவர்.

பிரதமர் துறை மூலமாகவும் செடிக் மூலமாகவும் இந்திய சமுதாயத்தைச் சென்றடைய வேண்டிய கோடிக்கணக்கான ரிங்கிட் பணத்தை மஇகாவும் அரசுசாரா அமைப்புக்களும் உறிஞ்சிக் கொண்டிருக்கிறன என்று வேதமூர்த்தி சாடினார்.

 

 

 

கோலாலம்பூர், நவ.21- முக்கிய முடிவுகளை ம.இ.கா எடுக்கப் போகிறது என்கிற பல்வேறு யூகங்களுக்கு இடையே இன்று பிற்பகலில் ம.இ.கா மத்திய செயலவைக் கூட்டம் நடந்தது என்றாலும், பொதுவாக அடுத்து வரும் பொதுத் தேர்தலுக்கான ஏற்பாடுகள் பற்றியே செயலவைக் கூட்டத்தில் விவாதிக்கப்பட்டது என்று ம.இ.காவின் தேசியத் தலைவர் டத்தோஶ்ரீ டாக்டர் எஸ்.சுப்பிரமணியம் தெரிவித்தார்.

நாட்டின் 14-ஆவது பொதுத் தேர்தல் எந்த நேரத்திலும் நடக்கலாம். எனவே, அதனை எதிர்கொள்ள கட்சித் தயார் நிலையில் இருக்க வேண்டியது கட்டாயமாகிறது என்று இன்று பிற்பகலில் நடந்த செய்தியாளர்கள் கூட்டத்தில் டாக்டர் சுப்ரமணியம் சொன்னார். 

கட்சித் தலைவர்களும், பொதுத் தேர்தலுக்குத் தயார் நிலையில் இருக்க வேண்டும் என்று வலியுறுத்தப்பட்டுள்ளனர் என்று அவர் மேலும் கூறினார். 

அதேவேளையில், இன்று ம.இ.கா தொகுதித் தலைவர்களுடனான சந்திப்புக் கூட்டம் தலைமையகத்தில் நடந்தது. தொகுதித் தலைவர்களுக்கான ஒதுக்கீடுகள் தொடர்பாக கட்சித் தலைமைத்துவம் விளக்கம் அளித்ததாக தெரிவிக்கப்பட்டது. 

இன்று அவசர மத்திய செயலவைக் கூட்டம் நடக்கப்போவதாக தகவல் வெளியானதும் பரபரப்பு ஏற்பட்டது. கட்சிக்கு வெளியே இருக்கின்ற சில முன்னாள் ம.இ.கா தலைவர்கள் உடனடியாகக் கட்சிக்குள் ஈர்க்கப்படும் சாத்தியம் இருப்பதாக ஆருடம் நிலவியது. 

குறிப்பாக, முன்னாள் மத்திய செயலவை உறுப்பினர் ஏ.கே.இராமலிங்கம், முன்னாள் பொருளாளர் டத்தோ ரமணன் ஆகியோர் ம.இ.காவில் மீண்டும் சேர்க்கப்படுவது தொடர்பில் இன்றைய செயலவைக் கூட்டத்தில் முடிவு எடுக்கப்படலாம் என்ற தகவல் பரவியதால், கட்சியின் மத்தியில் பரபரப்பு நிலவியது. 

கோலாலம்பூர், நவ.21- அமைச்சு ஒன்றுக்கு 2018-ஆம் ஆண்டின் பட்ஜெட்டில் வழங்கப்பட்ட நிதி ஒதுக்கீடை எதிர்க்கும் எதிர்கட்சியின் தீர்மானம், ஒரே வாக்கு வித்தியாசத்தில் தோல்வி அடைந்ததைத் தொடர்ந்து, நாடாளுமன்றத்தில் அமளி ஏற்பட்டது. 

அந்த ஒதுக்கீட்டுக்கு எதிரான வாக்களிப்பை நடத்த வேண்டும் என்று எதிர்கட்சியின் காப்பார் நாடாளுமன்ற உறுப்பினர் ஜி.மணிவண்ணன் முன்மொழிந்தார். அதனைத் தொடர்ந்து, அந்த வாக்கெடுப்பை நடத்த, துணை சபாநாயகர் டத்தோஶ்ரீ டாக்டர் ரோனல்டு கியான்டி அனுமதி வழங்கினார். 

நாடாளுமன்ற வளாகத்தில் உள்ள இதர நாடாளுமன்ற உறுப்பினர்கள், இரண்டு நிமிடங்களுக்குள் மக்களவைக்குள் வர வேண்டும் என்பதற்கான அறிகுறியாக, அந்த இரண்டு நிமிடங்களுக்கு மணி ஒன்று ஒலிக்கப்பட்டது. 

ஆனால், அந்த மணி ஒலி நிறுத்தப்பட்ட பின்னரும், பல தேசிய முன்னணி நாடாளுமன்ற உறுப்பினர்கள், மக்களவைக்குள் வந்ததாக எதிர்கட்சியினர் குற்றம் சாட்டினர். அந்த வாக்கெடுப்பு நடந்து முடிந்து, அதன் முடிவினை 'பெந்தாரா'விடம் கொடுத்து விட்டதாகவும், நேரம் தாழ்த்தி மக்களவையில் புகுந்த தேசிய முன்னணியின் நாடாளுமன்ற உறுப்பினர்கள் வாக்களிக்கும் பொருட்டு, அந்தப் பட்டியல் மீண்டும் அவர்களிடத்தில் கொடுக்கப்பட்டதாக எதிர்கட்சியினர் குறைக்கூறினர்.  

அதனைத் தொடந்து, எதிர்கட்சியினர் "பொய்..பொய்..பொய்.." என்று கூச்சலிட்டனர். தாமதமாக வந்தவர்களுக்கு வாக்களிக்கும் உரிமை வழங்கக்கூடாது என்று அவர்கள் ஆராவரம் செய்தனர். இந்த அமளி 15 நிமிடங்களுக்கு தொடர்ந்தது.

அதனைத் தொடர்ந்து, அந்தத் தீர்மானம் 51-52 என்ற வாக்கு வித்தியாசத்தில் தோல்வி கண்டதாக ரோனல்டு கியான்டி நாடாளுமன்றத்தில் தெரிவித்தார். அந்த முடிவினை மாற்றும் பொருட்டு, அந்த வாக்கெடுப்பு மீண்டும் தொடங்கப்பட வேண்டும் என்று எதிர்கட்சியினர் கேட்டுக் கொண்டனர். 

இந்த 51-52 என்ற எண்ணிக்கையில் அவர்களின் தீர்மானம் தோல்வி அடைவது நாடாளுமன்ற விதிமுறைகளுக்கு எதிரானது என்று பூச்சோங் நாடாளுமன்ற உறுப்பினர் கோபிந்த் சிங் தெரிவித்தார். "உங்களிடம் வாக்களிப்பு பட்டியல் கொடுத்தாகி விட்டது. ஏன் நீங்கள் மீண்டும் அதனை மற்றவர்களுக்காக மாற்றம் செய்தீர்கள்? இது நியாயமற்ற செயல்" என்று ரோனலிடம் கோபிந்த் தனது வருத்தத்தை தெரிவித்துக் கொண்டார். 

இதனிடையில், நாடாளுமன்ற உறுப்பினர்கள் குறிப்பிட்ட நேரத்திற்குள் உள்ளே வர வேண்டும் என்று எந்த விதிமுறையும் இல்லை என்று ரோனல்டு விளக்கினார். ஆனால், அவரின் விளக்கத்தை எதிர்கட்சியினர் ஏற்றுக் கொள்ளவில்லை. அந்த வாக்களிப்பு மீண்டும் நடத்தப்பட வேண்டும் என்று அவர்கள் கேட்டுக் கொண்டனர். அவர்களின் அந்த வேண்டுகோளைச் சட்டை செய்யாமல், மற்ற விவாதங்களை ரோனல்டு செவிமடுக்க தொடங்கினார்.. 

 

More Articles ...