கோலாலம்பூர், மார்ச்.30- வடகொரியாவுடனான அரச தந்திர மோதலைத் தொடர்ந்து அந்நாட்டில் தடுத்து வைக்கப்பட்டிருந்த ஒன்பது மலேசிய அதிகாரிகளும் தாயகம் திரும்ப அனுமதிக்கப்பட்டுள்ளனர். 

அவர்கள் வடகொரியாவின் தலைநகரான பியோங் யாங்கிருந்து மலேசிய நேரப்படி இன்று இரவு 7.30 அளவில் கோலாலம்பூருக்கு புறப்பட்டு விட்டனர். இவர்கள் நாளை அதிகாலை 5.00 மணிக்கு கோலாலாம்பூர் விமான நிலையத்தில் தரையிறங்குவர். 

ஒன்பது மலேசியர்களுக்கும் வட கொரியா அனுமதி அளித்ததைத் தொடர்ந்து கோலாலம்பூரில் இருந்து வந்த  வடகொரிய தூதரக அதிகாரிகள் நாட்டை விட்டு வெளியேற அனுமதிக்கப்பட்டுள்ளனர் என பிரதமர் நஜிப் அறிவித்தார். 

விமான நிலையத்தில் கொல்லப்பட்ட கிம் ஜோங் நாமின் உடலை வடகொரியாவிடம் ஒப்படைக்க அவரது குடும்பத்தினர் அனுமதி கடிதம் கொடுத்ததைத் தொடர்ந்து அவரது உடல் அந்நாட்டிடம் ஒப்படைக்கப்பட்டுள்ளது. 

இவ்விவகாரத்தில் வடகொரியாவுக்கும் மலேசியாவுக்கும் பேச்சுவார்த்தை நடத்தப்படுத்துவதற்கு பொறுப்பு ஏற்று இருந்த வெளியுறவு அமைச்சுக்கு பிரதமர் நன்றி தெரிவித்தார். 

அதே வேளையில் மலேசிய மண்ணில் கிம் ஜோங் நாம் படுகொலை செய்யப்பட்ட விவகாரத்தில் அதற்கு பொறுப்பானவர்களை நீதியின் முன் நிறுத்த அனைத்து நடவடிக்கைகளையும் மேற்கொள்ளும்படி தாம் உத்தரவிட்டிருப்பதாக பிரதமர் சொன்னார். 

கடந்த பிப்ரவரி மாதம் 13 ஆம் தேதி கேஎல்ஐஏ-2 விமான நிலையத்தில் கிம் ஜோங் நாம், இரசாயன தாக்குதலுக்கு உள்ளாகி உயிரிழந்தார். இரு பெண்கள் அவரது முகத்தில் நச்சு இரசாயனத்தை பூசி அவரை கொன்றது தெரிய வந்துள்ளது. இதில் கொல்லப்பட்ட கிம் ஜோங் நாம் வடகொரியாவின் தலைவர் கிம் ஜோங் யுன்னின் ஒன்று விட்ட சகோதரர் என்பது  குறிப்பிடத்தக்கது.

சென்னை, மார்ச் 30- இந்தியாவிற்கு ஐந்து நாள் அதிகாரத்துவ வருகை மேற்கொண்டுள்ள பிரதமர் நஜிப் இன்று சென்னை சென்றடைந்தார். மலேசிய நேரப்படி இன்று மாலை 4.25 மணிக்கு பிரதமருடன் அவரின் துணைவியார் டத்தின் ஶ்ரீ ரோஸ்மா மன்சோரும் சென்னை விமானத்தில் தரை இறங்கினர்.

இந்தியாவின் பிரதமர் நரேந்திர மோடியின் அழைப்பை ஏற்று பிரதமர் டத்தோ ஶ்ரீ நஜிப் துன் ரசாக் இன்று தொடங்கி ஏப்ரல் 4ம் தேதி வரை ஐந்து நாட்கள் இந்தியாவிற்கு அதிகாரப்பூர்வ வருகை மேற்கொண்டுள்ளார். 

சென்னை சென்றடைந்த பிரதமர் தம்பதியை, மலேசியாவிற்கான இந்திய தூதர் டத்தோ ஹிடாயாத் அப்துல் ஹமிட் விமான நிலையத்தில் வரவேற்றார். பின்னர் கிரேன்ட் சோழா தங்கும் விடுதியில் மலேசியாவிலிருந்து சென்னை சென்றுள்ள பேராளர் குழு பிரதமரை வரவேற்றது. பிரதமரோடு மலேசிய அரசாங்கத்திற்கான தலைமை செயலாளர் டான் ஶ்ரீ டாக்டர் அலி ஹம்சா, இந்தியா மற்றும் தென்கிழக்காசியாவிற்கான கட்டமைப்பு சிறப்பு தூதர் டத்தோ ஶ்ரீ உத்தாமா ச.சாமிவேலு, சுகாதார அமைச்சர் டத்தோ ஶ்ரீ ச.சுப்ரமணியம், இளைஞர் விளையாட்டுத்துறை துணையமைச்சர் டத்தோ எம்.சரவணன், கல்வி துணையமைச்சர் ப.கமலநாதன் ஆகியோரும் சென்னை சென்றுள்ளனர்.

முதல்கட்டமாக இன்று மாலை பிரதமர் நஜிப்பை தமிழக முதல்வர் எடப்பாடி பழனிசாமி சந்திக்கவுள்ளார். பின்னர், தமிழ்நாட்டுக்கான ஆளுனர் வித்யாசாகர் ராவ்வும் பிரதமரை மரியாதை நிமித்தம் சந்திக்கவுள்ளார். அதனைத் தொடர்ந்து பிரதமருக்கும் அவரின் துணைவியாருக்கும் ஆளுநர் மாளிகையில் இரவு உணவு பரிமாறப்படும். 

நாளை மாலை டெல்லிக்கு புறப்படும் முன், சென்னையில் உள்ள வர்த்தகர்களுடன் கருத்தரங்கில் கலந்து கொள்ளும் பிரதமர் பின்னர், சென்னையில் உள்ள மலேசிய மாணவர்களைச் சந்திப்பார் என தெரிவிக்கப்பட்டுள்ளது.

கோலாலம்பூர், மார்ச்.31– நாட்டின் நல்லிணக்கத்தை மனதில் நிலைநிறுத்தி பிரதமர் டத்தோஸ்ரீ நஜீப், ஷரியா நீதிமன்றச் சட்டத் திருத்தம் மீதான மசோதாவை தேசிய முன்னணி அரசு நாடாளுமன்றத்தில் தாக்கல் செய்யாது என்று அறிவித்திருப்பது  வரவேற்கத்தக்கது என மஇகாவின் தேசிய உதவித்தலைவர் டத்தோ டி.மோகன் கருத்துரைத்தார்.

இந்தச் சர்ச்சைக்குரிய சட்டத்திற்கு எதிரான அறிவிப்பானது நாட்டு மக்களின் நலனையும், தேசிய முன்னணியின் ஒற்றுமையையும், தோழமைக் கட்சிகளின் கருத்துக்கு மதிப்பளிக்கப் பட்டிருப்பதையும் காட்டுகின்றது என்று அவர் சொன்னார்.

ஷரியா நீதிமன்றங்களின் அதிகாரத்தை அதிகரிக்கும் நோக்கில் பாஸ் கட்சி கொண்டுவர முனைந்த இந்தச் சட்டத்திற்கு எதிராக மஇகா உட்பட தேசிய முன்னணியின் தோழமைக் கட்சிகள் ஆட்சேபம் தெரிவித்திருந்தன. 

அத்தகையை சூழலில் இந்த சட்டத்தினால் ஏற்படும் விளைவுகளையும், தேசிய முன்னணி அரசாங்கம் எதிர்நோக்கும் பிரச்சனைகளையும் மஇகாவின் தேசியத் தலைவரும், சுகாதார அமைச்சருமான டத்தோஸ்ரீ டாக்டர் சுப்ரமணியம் பிரதமரிடம் தெளிவுப்படுத்தினார்.

இந்தச் சட்ட வரைவில் இந்திய சமுதாயத்திற்கு வரும் பாதிப்பு குறித்த எதிர்கால சிந்தனையிலும், மற்ற இனங்களுக்கிடையிலான நிலைப்பாட்டிலும் பிரதமர் எடுத்த இந்த முடிவானது இந்திய சமுதாயத்தின் வரவேற்பைப் பெற்றுள்ளது என்று டி.மோகன் சொன்னார். 

அதேநேரத்தில் மூவின மக்களின் நலனிலும் அக்கறை கொண்டு செயல்படும் பிரதமரின் நடவடிக்கைகளுக்கு தமது ஆதரவு தெரிவித்துக் கொள்வதாக டத்தோ டி.மோகன் குறிப்பிட்டார்.

கோலாலம்பூர், மார்ச்.30- ஷரியா நீதிமன்றச் சட்டத் திருத்த மசோதாவை தேசிய முன்னணி நாடாளுமன்றத்தில் தாக்கல் செய்யாது. அந்த மசோதா தனிநபர் மசோதாவாக தாக்கல் செய்யப்படுமா? எனபது சபாநாயகரைப் பொறுத்தது என்று பிரதமர் டத்தோஶ்ரீ நஜிப் அறிவித்துள்ளார்.

தேசிய முன்னணி பங்காளிக் கட்சிகளுக்கு இடையேயான இணக்கப் போக்குக் கொள்கையின் அடிப்படையில் தாங்கள் இந்த முடிவை எடுத்திருப்பதாகவும் ஒருவேளை அந்த மசோதா தாக்கல் செய்யப்பட்டால், அது பாஸ் கட்சித் தலைவர் ஹாடி அவாங்கின் தனிநபர் மசோதாவாகவே அமையக்கூடும் என்றும் அவர் சொன்னார்.

அனைத்துப் பங்காளிக் கட்சிகளும் இணக்கத்தின் பேரிலேயே முக்கிய முடிவுகள் எடுக்கப்படும் என்ற தேசிய முன்னணியின் கோட்பாட்டிற்கு ஏற்ப இந்த முடிவு எடுக்கப்பட்டிருக்கும் நிலையில், இந்த மசோதா தாக்கல் செய்யப்படுவதை ஏற்பது பற்றிய முடிவு, இனி நாடாளுமன்ற சபாநாயகரைப் பொறுத்தது.

அப்படியானால், ஹாடி அவாங் அதனை தனிநபர் மசோதாவாக  தாக்கல் செய்தால், தேசிய முன்னணி ஆதரிக்குமா, ஆதரிக்காதா? என்று வினவப்பட்ட போது, சபாநாயகரின் முடிவைப் பொறுத்தது என்று பிரதமர் நஜிப் பதிலளித்தார்.

இந்த ஷரியா சட்டத் திருத்தத்தைப் பொறுத்தமட்டில் தேசிய முன்னணி ஒருமித்த இணக்கத்தை எட்டவில்லை என்பது தெளிவு என்று தேசிய முன்னணியின் உச்சமன்றக் கூட்டத்திற்கு தலைமையேற்ற பின்னர் பிரதமர் நஜிப் செய்தியாளர்களிடம் தெரிவித்தார்.

ஐந்த தனிநபர் மசோதா நாடாளுமன்றத்தில் தாக்கல் செய்யப்பட்டு வாக்கெடுப்புக்கு விடப்பட்டால், அப்போது இதை ஆதரிப்பதா அல்லது நிராகரிப்பதா? என்பது குறித்து தேசிய முன்னணி எம்.பி.க்கள் அவரவர் மனச்சாட்சிப்படி சுதந்திரமாக முடிவு எடுக்கலாம் என்று இதற்குப் பொருள்படுமா? என்று பிரதமரிடம் நிருபர்கள் வினவினர்.

இது சபாநாயகரின் முடிவைப் பொறுத்தது. வாக்கெடுப்பு நடக்குமா, நடக்காதா? என்பதெல்லாம் அவரது முடிவுக்கு உட்பட்டது என்று அவர் பதிலளித்தார்.

இந்த விவகாரத்தில் தேசிய முன்னணியில் இணக்கம் காண முடியாமல் போனது குறித்து அம்னோ ஏமாற்றம் அடைந்திருக்கிறதா? என்று கேட்கப்பட்ட போது அப்படியல்ல. நாங்கள் எப்போதுமே அனைத்துத் தரப்பு இணக்கத்தின் பேரில் முடிவெடுப்பதை கொள்கையாகக் கொண்டுள்ளோம். அந்த வகையில்தான் தேசிய முன்னணி செயல்பட்டு வருகிறது என்று பிரதமர் நஜிப் விளக்கினார்.

கோலாலம்பூர், மார்ச்.29- ஓரினப் புணர்ச்சி வழக்கில் சிறையிலிடப்பட்ட டத்தோஶ்ரீ அன்வார் இப்ராஹிமை விடுதலை செய்வதைப் பற்றி நாடாளுமன்றத்தில் விவாதிக்க தாம் செய்த பரிந்துரையை ஏன் சபாநாயகர் நிராகரித்தார் என அன்வாரின் மகளும் லெம்பா பந்தாய் நாடாளுமன்ற உறுப்பினருமான நூருல் இஷா கேள்வி எழுப்பினார். நேற்று நாடாளுமன்ற வளாகத்தில் நடைபெற்ற செய்தியாளர் கூட்டத்தில் அவர் பேசியபோது இதனைக் கூறினார்.

அன்வாரின் வழக்கு நீதிமன்றத்தில் விசாரிக்கப்பட்டு வரும் இவ்வேளையில் அதைப்பற்றி நாடாளுமன்றத்தில் விவாதிக்க முடியாது என்று சபாநாயகர் காரணம் கூறினார். ஆனால், அந்த காரணத்தை எங்களால் ஏற்கமுடியாது என்று அன்வாரின் வழக்கறிஞரும் பாடாங் செராய் நாடாளுமன்ற உறுப்பினருமான சுரேந்திரன் கோபத்துடன் கூறினார்.

‘நாடாளுமன்றத்தில் எதைப்பற்றி வேண்டுமானாலும் விவாதிக்க உறுப்பினர்களுக்கு உரிமை உண்டு, காரணம் நாடாளுமன்ற உறுப்பினர்கள் மக்களின் பிரச்சனைகளை விவாதித்து தீர்க்க, மக்களாலேயே தேர்ந்தெடுக்கப்பட்டவர்கள். அதனால் அன்வார் வழக்கைப் பற்றி கண்டிப்பாக விவாதிக்க சபாநாயகர் அனுமதி வழங்க வேண்டும்’ என்று சுரேந்திரன் கூறினார்.

‘சபாநாயகரின் இந்த முடிவு நாடாளுமன்ற உறுப்பினர்களின் உரிமையைப் பறிப்பதாக இருக்கிறது. அன்வாரை விடுவிக்க கோரி 2 லட்சம் பொதுமக்கள் கையெழுத்திட்ட மனு மற்றும் ஐக்கிய நாடுகள் (ஐநா) சபையின் பரிந்துரையயும் நாம் மதித்து அதைப் பற்றி விவாதிக்க வேண்டும். அந்த விவாதம் நடைபெற சபாநாயகர் தக்க நடவடிக்கை எடுக்கவேண்டும்’ என்று நூருல் இஷா செய்தியாளர்களிடம் கூறினார்.

ஆஸ்திரேலியா மற்றும் இங்கிலாந்து நாடாளுமன்றத்திலும் கூட அன்வார் வழக்கைப் பற்றி விவாதம் செய்திருக்கிறார்கள். அன்வார் சட்டவிரோதமாக கைது செய்யப்பட்டிருக்கிறார், அதனால் அவரை உடனடியாக விடுதலை செய்யவேண்டும் என்பதே அவர்களின் பரிந்துரையும் கூட என்றும் அவர் மேலும் கூறினார்.

‘சிறைச்சாலைகள் சட்டப்பிரிவு 43இன் கீழ் சிறைச்சாலைகள் இலாகாவின் தலைமை ஆணையர் அல்லது உள்துறை அமைச்சர் சிறையில் இருக்கும் அன்வாரை விடுதலை செய்யலாம். நாடாளுமன்ற கூட்ட விதிமுறை 18(1)இன் படி நாடாளுமன்ற உறுப்பினர் கூட்டத் தொடரில் கேள்வி கேட்கும் உரிமையின் கீழ் நான் இதைப் பற்றி விவாதிக்கப் பரிந்துரைத்தேன்’ என்றும் நூருல் இஷா தெரிவித்தார்.

‘இஸ்ரேல் அரசாங்கம், பாலஸ்தீன மக்களை துன்புறுத்தி, யூதர்களுக்கு சட்டவிரோத குடியிருப்புக்களை அமைத்தபோது மலேசியா ஐநா சபையில் மிகுந்த ஆர்வத்துடன் இஸ்ராயேல் மீது பல குற்றச்சாட்டுக்களை வைத்தோம். ஆனால் மலேசியர் ஒருவர் சட்டவிரோதமாக கைது செய்யப்பட்டதைத் தொடர்ந்து ஐநா வெளியிட்ட அறிக்கையை மதிக்க மறுக்கிறோம். இது குற்றமில்லையா’ என்று நூருல் இஷா மேலும் கேள்வி எழுப்பினார்.

கோலாலம்பூர், மார்ச்.28- நாடாளுமன்றத்தில் இன்று தாக்கல் செய்யப்பட்ட சிறார்களுக்கு எதிரான பாலியல் குற்றங்கள் மீதான உத்தேச சட்டத்திற்கு ஆளுங்கட்சிகள் மற்றும் எதிர்க்கட்சிகள் என்ற பாகுபாடு இல்லாமல் எல்லாக் கட்சிகளும் தங்களின் ஆதரவை ஒருசேரப் புலப்படுத்தின.

நாடாளுமன்றத்தில் இருதரப்புக்களும் இப்படியொரு ஒருமித்த கருத்தில் இருப்பது மிக அபூர்வமான சம்பவம் என்று வர்ணிக்கப்பட்டது.

சிறார்களுக்கு எதிரான பாலியல் குற்றங்களைத் தடுப்பதற்கு வகை செய்யும் இந்த உத்தேசச் சட்டத்தை பிரதமர் துறை அமைச்சர்  டத்தோஶ்ரீ அஸ்லினா தாக்கல் செய்தார். 

இந்த மசோதா தாக்கல் செய்யப்பட்ட பின்னர் நாடாளுமன்றத்தின் ஊடகத்துறை மையத்தில் அஸ்லினா உள்பட 20க்கும் மேற்பட்ட  எம்பிக்கள் ஒன்றுதிரண்டு தங்களின் ஆதரவை புலப்படுத்தினர். இவர்களில் ஆளுங்கூட்டணி மற்றும் எதிர்க்கட்சி அணியினர் என்று எம்பிக்கள் கலந்து இருந்தனர்.

இம்முறை சிறார்களைப் பாதுகாக்கக்கூடிய இந்தச் சட்டம், நன்கு முழுமையாக ஆராயப்பட்டுள்ளது. பாலியல் குற்றவாளிகள் ஒருபோதும் தப்ப முடியாத வகையில் இது வடிவமைக்கப் பட்டிருக்கிறது என்று அமைச்சர் அஸ்லினா சொன்னார்.

இந்த உத்தேசச் சட்டம் போதுமானதாக இல்லையென்று கருதினால், தங்களின் ஆலோசனைகளை விவாதத்தின் போது இருதரப்பு எம்.பி.க்களும் முன்வைக்கலாம் என்றார் அவர்.

இந்த மசோதாவுக்கு ஆதரவாக 222 எம்பிக்களும் வாக்களிக்கவேண்டும். அப்படி எவரும் ஆதரிக்கத் தவறினால், அவர் வக்கிரப் புத்திக்காராகவே கருதப்படுவார் என அவர் சுட்டிக்காட்டினார்.

நமக்குள் கருத்து வேறுபாடுகள் இருக்கலாம். ஆனால், பாலியல் குற்றப் பேர்வழிகளிடமிருந்து குழந்தைகளைத் தற்காப்பதில் நமக்குள்ள பொறுப்பினைக் காட்டுவதில் நாம் ஒன்றுபடுவோம் என்றார் அவர். 

 

 

கோலாலம்பூர், மார்ச்.28- அடுத்தப் பொதுத்தேர்தலில் ‘பக்காத்தான் ஹராப்பான்’ எதிர்க்கட்சி கூட்டணியுடன் பெர்சத்து கட்சி இணைவது மிக முக்கியம் எனவும் எதிர்க்கட்சி கூட்டணிகளிடையே தொகுதி பங்கீட்டில் உள்ள பிரச்சனைகளை எளிதில் கையாள முடியும் எனவும் பெர்சத்து கட்சியின் தலைவர் டான்ஶ்ரீ முகிதின் யாசின் கூறினார்.

இனி எதிர்க்கட்சி கூட்டணியில் வெளிப்படையான விவாதங்கள் மேற்கொள்ளப்படும். 14ஆவது பொதுத்தேர்தலுக்கு வேட்பாளர்கள், தொகுதிப் பிரிவு மற்றும் பிரதமர் பதவிக்கான வேட்பாளர் போன்றவற்றை சுமூகமாகப் பேசி தீர்த்துக் கொள்ள முடியும் என்று தனக்கு நம்பிக்கை இருப்பதாக அவர் மேலும் கூறினார்.

‘கருத்து வேறுபாடுகள் இருப்பது இயற்கையான ஒன்றுதான். ஆனால், அதனைப் பேசிக் களைவதே சிறந்தத் தலைவர்களின் திறமை. பக்காத்தான் எதிர்க்கட்சி கூட்டணியில் சிறந்தத் தலைவர்கள் இருக்கிறார்கள், நாம் அனைவரும் ஒற்றுமையாக இருப்பது முக்கியம் என அவர்களுக்குப் புரியும். அதனால் எந்த உட்கட்சி பிரச்சனைகள் எழுந்தாலும் விரைவில் தீர்க்கப்படும்’ என்றும் அவர் கருத்துரைத்தார்.

கூட்டணியில் இருக்கும் கட்சிகளின் பலத்தைக் கொண்டே தொகுதிப் பிரிவு செய்யப்படும். எந்த தொகுதியில் எந்த கட்சி வேட்பாளர் நின்றால் தேர்தலில் வாக்குகளை அதிகளவில் அள்ள முடியும் என்று ஆராய்ந்து செயல்படுவோம் எனவும் அவர் தெரிவித்தார்.

‘பக்காத்தான் ஹராப்பான்’ கூட்டணி கட்சி, ஒரே கட்சியாக சங்கங்கள் பதிவு இலாகாவில் அதிகாரப்பூர்வமாக  பதியப்படும். அதில் பெர்சத்து கட்சியும் அங்கம் வகிக்கும் என்று ‘பக்காத்தான் ஹராப்பான்’ நேற்று அறிக்கை விடுத்தது.

‘பக்காத்தான் ஹரப்பான்’ கூட்டணியில் உள்ள எல்லாக் கட்சிகளும் சம நிலையாகவே இருக்கும் எனவும் எந்த கட்சியும் தலைமை வகிக்காது எனவும் சிரம்பான் நாடாளுமன்ற உறுப்பினரும் ஜசெகவின் உறுப்பினருமான அந்தோணி லோக் கூறினார்.

More Articles ...