கோலாலம்பூர், ஏப்ரல் 11 - இம்முறை பொதுத் தேர்தல் வாக்களிப்பு மே 9 ஆம் தேதி, புதன்கிழமையன்று நடைபெறும் என அறிவிக்கப் பட்டிருப்பதால் சிங்கப்பூரில் பணிபுரியும் 5 லட்சம் வாக்காளர்கள் குழப்பத்திற்கு உள்ளாகி இருக்கின்றனர்.

வேலை நாளில் வாக்களிப்பு வைக்கப்பட்டிருப்பது, அவர்கள் மலேசியாவுக்கு வந்து வாக்களித்து விட்டுச் செல்வதற்கான வாய்ப்பை பறித்து விட்டது என்று பக்காத்தான் ஹராப்பான் கூட்டணியின் தலைவரான துன் மகாதீர் கூறினார்.

இதன் காரணமாக வாக்களிக்க வருவோரின் விகிதாச்சாரம் குறையும். இது தேசிய முன்னணிக்குச் சாதகமாக அமையும் என்று அவர் சுட்டிக் காட்டினார்.

வீட்டில் கம்பத்தில் இருப்பவர்கள் வாக்களிக்க வந்து விடலாம். வேலை செய்பவர்கள் அந்த நாளில் வாக்களிக்க வருவது சிரமம். சிங்கப்பூரில் 5 லட்சம் வாக்காளர்கள் உள்ளனர். 

அவர்கள் வாக்களிக்க வேண்டும். ஆனால் அவர்களின் வாக்களிக்கும் உரிமை வேலை நாளில் தேர்தல் வைக்கப்பட்டதால் பறிபோய் உள்ளது என்று துன் மகாதீர் சொன்னார்.

 

கோலத் திரெங்கானு, ஏப்ரல்.10- 14-ஆவது பொதுத் தேர்தலின் போது தேவையற்ற பிரச்சனைகளை ஏற்படுத்தக் கூடிய 1,131 பேரை போலீசார் அடையாளம் கண்டுள்ளனர் என்று போலீஸ் படைத் தலைவர் டான்ஶ்ரீ முகமட் ஃபூஸி ஹரூண் கூறினார். 

அந்த அடிப்படையில், திரெங்கானு மாநிலத்தில் பிரச்சனை ஏற்படுத்தக்கூடிய 31 பேரை போலீசார் அடையாளம் கண்டுள்ளனர் என்று அவர் சொன்னார். 

அடையாளம் காணப்பட்டுள்ளவர்கள் பிரச்சனைகளில் ஈடுபட்டால் தான் அவர்கள் கைது செய்யப்படுவர் என்று அவர் தெரிவித்தார். 

''மக்கள் பயப்பட வேண்டும் என்ற எண்ணத்தில் நாங்கள் இதனை தெரிவிக்கவில்லை. ஆனால், தேர்தல் மையங்களில் பிரச்சனையை ஏற்படுத்தக் கூடியவர்களை போலீஸ் கண்காணித்து வருகிறது என்பதை அவர்கள் உணர வேண்டும்' என்றார் அவர். 

இதனிடையில், 14-ஆவது பொதுத் தேர்தலில் பிரச்சனைகள் எழும் இடங்களாக 171 பகுதிகள் அடையாளம் காணப்பட்டுள்ளன என்றும் ஃபூஸி கூறினார். அவ்விடங்களில் போலீஸ் பாதுகாப்பு வலுவாக்கப்படும் என்றும் அவர் சொன்னார். 

கோலாலம்பூர், ஏப்ரல்.10- அடுத்த மாதம் 9-ஆம் தேதியன்று 14-ஆவது பொதுத் தேர்தல் நடைபெறும் என்று தேர்தல் ஆணையத்தின் அறிவிப்பை பெர்சே சாடியுள்ளது. 

மே மாதம் 9-ஆம் தேதியானது வேலை நாளாக இருக்கும் பட்சத்தில், தங்களின் சொந்த ஊர்களுக்குச் சென்று வாக்களிக்க மக்கள் சிரமத்தை எதிர்கொள்வர் என்று பெர்சே கருத்து தெரிவித்துள்ளது. 

“இதனால், இவ்வாண்டு பொதுத் தேர்தலுக்கு வாக்களிப்போரின் எண்ணிக்கையில் சரிவு ஏற்படும்” என்று அந்த அமைப்பு கூறியது. 

மே 9-ஆம் தேதி புதன்கிழமையாக இருப்பதால், வாக்களிப்பு மையங்கள் சேவையில் ஈடுபட்டிருப்போரும் பல்வேறான சிரமங்களை எதிர் கொள்வர் என்றும் பெர்சே தனது அறிக்கையில் தெரிவித்துள்ளது. 

இதனைக் கருத்தில் கொண்டு, இவ்வாண்டு மே 9-ஆம் தேதியை பொது விடுமுறை நாளாக மத்திய அரசாங்கம் பிரகடனப் படுத்த வேண்டும் என்று பெர்சே வலியுறுத்தியுள்ளது. 

அப்படி நடக்கா பட்சத்தில், வாக்காளர்கள் தங்களின் சொந்த ஊர்களுக்கு சென்று வாக்களிக்கும் பொருட்டு, முதலாளி வர்கத்தினர் தங்களின் தொழிலாளர்களுக்கு இரு நாள் விடுமுறையை வழங்க வேண்டும் என்று அந்த அமைப்பு கேட்டுக் கொண்டுள்ளது.   

இதனிடையில், தேர்தல் பிரச்சார காலம் வெறும் 9 நாட்கள் தான் என்று தேர்தல் ஆணையம் அறிவித்துள்ளதையும் பெர்சே சாடியுள்ளது. கடந்த 10 ஆண்டுகளாக, பிரச்சார காலம் 21 நாட்களாக அதிகரிக்கப்பட வேண்டும் என்று பெர்சே வலியுறுத்தி வருகிறது என்பது குறிப்பிடத்தக்கது. 

“தேர்தல் ஆணையம் ஜனநாயக முறையை பின்பற்றவில்லை. இந்த மாதிரியான அதிகப் பிரசங்கித்தனமான முடிவுகளை எடுத்த தேர்தல் ஆணையம், மக்களுக்கு பதிலளிக்க வேண்டும்” என்று பெர்சே சாடியுள்ளது.  

கோலாலம்பூர், ஏப்ரல்.10- பொதுத் தேர்தலில் இம்முறை பக்காத்தான் ஹராப்பான் வென்று ஆட்சியைக் கைப்பற்றினால், இரண்டு நாள் பொது விடுமுறை வழங்க, அமானா நெகாரா கட்சியின் வியூக இயக்குனர் டத்தோ ஜுல்கிப்ளி அகமட் பரிந்துரை செய்துள்ளார்.

மலேசிய தேர்தல் ஆணையம் இம்முறை வாக்களிப்பை வேலை நாளான மே மாதம் 9 ஆம் தேதி புதன்கிழமை  வைத்துள்ளது.  இதனால், வாக்காளர்கள் விடுமுறை எடுக்கவேண்டிய அவசியம் ஏற்பட்டுள்ளது என்று அவர் சொன்னார்.

எனவே, வாக்களிப்பு தினமான புதன்கிழமைக்கு மறுநாள் வியாழனன்றும் அடுத்து வெள்ளியன்றும் பொது விடுமுறை அளிக்கப்பட்டால், மக்கள் வார இறுதி நாள்களான சனி மற்றும் ஞாயிறு ஆகிய விடுமுறைக்குப் பின்னர் அவசரமின்றி மக்கள் வேலைக்குத் திரும்ப வசதியாக இருக்கும் என்று அவர் கூறினார்.

கோலாலம்பூர், ஏப்ரல்.10-  எனக்குத் தெரிந்த வரையில் இந்திய சமுதாயத்தின் மேம்பாட்டிற்காக மஇகாவின் மூலமாக தம்முடைய ஆட்சி காலத்தில் முன்னாள் பிரதமர் துன் மகாதீர் பெரிதாக எதுவும் செய்தது கிடையாது என்று  கூட்டரசுப் பிரதேச  மஇகா தலைவர் டத்தோ எம். சரவணன் கூறினார்.

அப்படி ஏதேனும் ம இகாவுக்கு அவர் செய்திருந்தால் அதனை அவர் தெரிவிக்கலாம்.  நான் கடந்த 2008 ஆம் ஆண்டில் இருந்து எம்.பி.யாக இருக்கிறேன். அவர் பிரதமராக இருந்த காலத்தில் ஏய்ம்ஸ்ட் பல்கலைக் கழக கட்டுமானத்திற்காக சிறப்பு  லாட்டரி குலுக்கல்களின் வழி 50 மில்லியம் ரிங்கிட் மற்றும் 70 மில்லியன் ரிங்கிட்  என அவர் இருமுறை அளித்துள்ளார் என்று அறிக்கை ஒன்றில் சரவணன் கூறினார். அதில் அவர் மேலும் கூறியிருப்பதாவது:

அதன் பின்னர் துன் அப்துல்லா படாவி சிறப்புக் குலுக்கல்கு மூலம் 19 கோடியே 80 லட்சத்து 78ஆயிரத்து 583 ரிங்கிட் அளித்தார்.  ஆக,  மகாதீர் மற்றும்  படாவி ஆகியோர் வழங்கிய மொத்தத் தொகை 31 கோடியே 80 லட்சத்து 78 ஆயிரத்து 583 ரிங்கிட்டாகும்.

ஏய்ம்ஸ்டின் ஒட்டுமொத்த கட்டுமானச் செலவு 50 கோடியே 68 லட்சத்து 6,492 ரிங்கிட்டாகும்.   மஇகா 79 லட்சம் ரிங்கிட் கொடுத்து கெடா அரசாங்கத்திடமிருந்து நிலத்தை வாங்கியது.  அந்த நிலம் இலவசமாகப் கொடுக்கப்படவில்லை. எஞ்சிய 18 கோடியே 87 லட்சத்து 27 ஆயிரத்து 909 ரிங்கிட்டை துன் சாமிவேலு பல்வேறு நிதி நிகழ்ச்சிகளின் மூலம்  மற்றும் வங்கிக் கடன் மூலம்  திரட்டினார். இப்போது ஏய்ம்ஸ்டின் மதிப்பு 100 கோடி என்று நான் பெருமையாகச் சொல்வேன்.

இதற்கு அப்பால், துன் மகாதீரின் அலுவலகத்திலிருந்து மஇகாவுக்கு எந்தவொரு நிதியும் வந்ததாக எனக்கு  நினைவில்லை.  மகாதீர் காலத்தில் அமலாக்க ஒருங்கிணைப்பு பிரிவின் வழி அரசங்கத்தினால் கோயில்களுக்கு ஆண்டுக்கு 10 லட்சம் ரிங்கிட் வழங்கப்பட்டுள்ளது. இந்தப் பணத்திற்கு  கணக்காய்வு முறையாகச் செய்யப்பட்டுள்ளது.

இதற்கு அப்பால் மிகக் குறைந்தபட்ச நிதி தமிழ்ப்பள்ளிகளுக்கு ஜேகேஆர் அமைச்சின் வழி அளிக்கப்பட்டுள்ளது.  மேலும்  இதர தேசிய முன்னணி பங்காளிக் கட்சிகளுக்கு ஒதுக்கப் பட்டதைப் போலவே  மஇகாவுக்கும் டெலிகாம் மற்றும் தெனாகா நேஷனல்  பெர்ஹாட் பங்குகள் ஒதுக்கப்பட்டதை நான் மறுக்கவில்லை.

இந்தப் பங்குகள் மஇகாவுக்கு ஒதுக்கப்படுவதற்கான 'பிங்க்' பாரம் அளிக்கப்பட்டதை நான் ஏற்றுக் கொள்கிறேன்.  அவை இலவசமாக கொடுக்கப்படவல்லை . அப்போதைய மார்க்கெட் விலை மதிப்பில் அல்லது  பங்குச் சந்தைப் பதிவு விலையில் தரப்பட்டது.

டெலிகாம் பங்குகள்  விற்பனையின் வழி கிடைத்த பணம் மற்றும் கூடுதலாக அரசு வழங்கி 8 மில்லியன் மானியம் ஆகியவற்றைக் கொண்டு  சிரம்பானில் டேப் கல்லூரி உருவாக்கப்பட்டது. தெனகா நேஷனல் பங்குகள் விற்பனை வழி கிடைத்த பணம் எம் ஐ இ. டி.யின் கீழ் வைக்கப்பட்டது. 

அதேவேளையில் பிரதமர் டத்தோஶ்ரீ நஜிப் ஆட்சி காலத்தில் தான் இந்தியர்களுக்கு ஏராளமான நிதி ஒதுக்கப்பட்டது. ஒவ்வொரு ஆண்டும் 100 மில்லியன் ரிங்கிட்  அரசு சார்பற்ற அமைப்புக்களுக்கு ஒதுக்கப்பட்டு வருகிறது. இந்த நிதி கூட மஇகா மூலமாக அல்ல. பிரதமர் துறையின் கீழ்  பேராசிரியர் டத்தோ என்.எஸ். இராஜேந்திரன்   தலைமையில் செயல்படும் இந்தியர்களுக்கான மேம்பாட்டு அமைப்பான 'செடிக்' மூலம்  வழங்கப்படுகிறது.

இந்த நிதிகூட சில தரப்பினர் கூறுவது போல  மஇகாவின்  கட்டுப்பாட்டில் இல்லை.  செடிக்கிற்கு முன்பாக ஶ்ரீ முருகன் கல்வி மையம், மிஃபா மற்றும் நாம் போன்ற அரசு சாரா அமைப்புக்களுக்கும் நிதி அளிக்கப்பட்டது.

துன் மகாதீர் யானையைப் போன்ற கூர்மையான நினைவு சக்தியைக் கொண்டவர். மலேசிய இந்தியர்களுக்கு அவர் செய்த உதவிகள் பற்றி கூடுதலான தகவல் இருக்குமேயானால், அதனை பொதுமக்கள் அறிந்து கொள்ளும் வகையில் மக்கள் மத்தியில் எடுத்துச் சொல்லலாம்.   இவ்வாறு டத்தோ சரவணன் தமது அறிக்கை ஒன்றில் கூறியுள்ளார்.

கோலாலம்பூர், ஏப்ரல்.10- 14-ஆவது பொதுத் தேர்தலில் லங்காவி வேட்பாளராக முன்னாள் பிரதமரும் பக்காத்தான் ஹராப்பான் தலைவருமான துன் மகாதீர் முகமட் போட்டியிடக் கூடும் என்று சில தகவல்கள் வெளியாகி உள்ளன. 

மகாதீர் லங்காவியில் போட்டியிடுவது தொடர்பில் கட்சிக்குள் சில பேச்சு வார்த்தை நட்த்தப்பட்ட்தாகவும், இருந்த போதிலும் அது தொடர்பில் இறுதி முடிவு இன்னும் எடுக்கப்படவில்லை என்று பிரிபூமி கட்சி வட்டாரம் கூறியுள்ளது. 

“துன் மகாதீர் போட்டியிடுவதற்கு ஏதுவான தொகுதி லங்காவி தான் என்று அடையாளம் காணப்பட்டுள்ள வேளையில், அது தொடர்பில் இன்னும் முடிவெடுக்கப்படவில்லை. கட்சியின் தலைமைத்துவமும் மகாதீர் லங்காவியில் தான் போட்டியிட வேண்டும் என்று எதிர்பார்க்கிறது. அது குறித்து மகாதீர் விரைவில் அறிவிப்பார்” என்று தெரிவிக்கப்பட்டுள்ளது. 

இதனிடையில், பிரிபூமி கட்சியின் வேட்பாளர்கள் எந்தத் தொகுதிகளில் போட்டியிட விருக்கின்றனர் என்பது தொடர்பில் விரைவில் அறிவிப்பு செய்யப்பட்டும் என்ற தகவலும் வெளியாகி உள்ளது. 

மகாதீர் லங்காவி தீவிற்கு வருகை மேற்கொள்ளவிருப்பதாகவும், அந்த வருகையின் போது, தாம் அங்கு போட்டியிடவிருப்பது குறித்த விவரத்தை அவர் அறிவிப்பார் என்று மேலும் ஒருவர் கூறியுள்ளார். 

“புக்கிட் தங்கா மற்றும் குபாங் பாசு நாடாளுமன்ற தொகுதிகளுக்கு மகாதீர் செல்லவிருக்கின்றார். அப்போது அவர் அவ்விவரத்தை வெளியிடுவார்” என்று அந்த நபர் சொன்னார். 

கோலாலம்பூர், ஏப்ரல்.10- 14-ஆவது பொதுத் தேர்தலில் சிகாமாட் நாடாளுமன்ற தொகுதியில், மஇகா தேசியத் தலைவர் டத்தோஶ்ரீ டாக்டர் எஸ்.சுப்ரமணியத்தை எதிர்த்து தொழிலதிபர் எட்மண்ட் ஷந்தாரா போட்டியிடக் கூடும் என்று ஜொகூர் மாநில பிகேஆர் தலைவர் ஹசான் கரீம் தெரிவித்துள்ளார். 

பிகேஆர் தலைவர்களும், எட்மண்ட் ஷந்தாரா அந்தத் தொகுதியில் போட்டியிடுவதை ஆதரிக்கின்றனர் என்று ஹசான் சொன்னார். “கடந்த மூன்று ஆண்டுகளாக அத்தொகுதி மக்களுக்கு எட்மண்ட் சேவையாற்றி வருகிறார். அதனால், அத்தொகுதியில் சுப்ராவை தோற்கடிக்கும் திறன் எட்மணுக்கு உண்டு” என்று ஹசான் கூறினார். 

கடந்த 13-ஆவது பொதுத் தேர்தலில், சிகாமாட் தொகுதியில் பிகேஆர் சார்பில் போட்டியிட்ட சுவா ஜுய் மெங்கை 1,217 வாக்கு வித்தியாசத்தில் டாக்டர் சுப்ரா தோற்கடித்தார் என்பது குறிப்பிடத்தக்கது. 

இம்முறை, டாக்டர் சுப்ரா வேறு ஒரு தொகுதியில் போட்டியிடக் கூடும் என்று சில தரப்புகள் கூறிய வேளையில், கடந்த மாதம், தான் மீண்டும் சிகாமாட் நாடாளுமன்ற தொகுதியில் தான் போட்டியிடவிருப்பதாக சுப்ரா அறிவித்தார். 

கடந்த ஐந்து ஆண்டுகளாக, அத்தொகுதி வாழ் மக்களுக்காக அரசாங்கம் பல்வேறு உதவிகளைச் செய்து வருவதாகவும், அத்தொகுதியில் தாம் வெற்றிப் பெறும் வாய்ப்பு பிரகாசமாக இருக்கும் பட்சத்தில், தாம் வேறு தொகுதியில் போட்டியிடுவதற்கான அவசியம் ஏதும் இல்லை என்று சுப்ரா சொன்னார்.

சிகாமாட் தொகுதியில் மொத்தம் 47,000 பேர் வாக்காளர்களாக பதிவு செய்துள்ளனர். அவர்களில் 46 விழுக்காட்டினர் சீனர்கள், 44 விழுக்காட்டினர் மலாய்க்காரர்கள் மற்றும்  10 விழுக்காட்டினர் இந்தியர்கள் ஆவர். 

 

More Articles ...