கூச்சிங், மார்ச்.28- சரவா மாநிலத்தில் ஹுடுட் சட்டத்திற்கு இடமில்லை என்பதில் தாங்கள் உறுதியாக இருக்கப் போவதாக சரவாவின் புதிய முதல்வர் அபாங் ஜொகாரி ஓபெங் தெரிவித்துள்ளார்.

சரவாவுக்கு ஹூடுட் பொருத்தமற்ற ஒன்று என்பதை தெளிவுப்படுத்திக் கொள்கிறேன். முன்னாள் முதல்வரான காலஞ்சென்ற அடெனான் சாத்தெமின் கொள்கையை தாங்கள் தொடர்ந்து கடைபிடிக்கப் போவதாக அவர் சொன்னார்.

தற்போதையா ஷரியா சட்டத் திருத்த மசோதாவானது, ஹுடுட் சட்டம் அல்ல. இருந்தாலும் அதே நிலைப்பாட்டைத்தான் இந்த விவகாரத்திலும் நாங்கள் எடுப்போம் என்று அபாங் ஜொகாரி கூறினார்.

இது ஷரியாவாக இருந்தாலும் கூட, கூட்டரசு அரசியல் சட்டத்தின் 8ஆவது ஷரத்தின் கீழ் பார்த்தால், இது முஸ்லிம்களுக்கும் முஸ்லிம் அல்லாதோருக்கும் இடையே பாராபட்சமானதாகவே கருதப்படுகிறது என்றார் அவர்.

இந்த ஷரியா சட்டத் திருத்த மசோதாவுக்கு சரவாவிலுள்ள தேசிய முன்னணி பங்காளிக் கட்சிகள் ஆதரவாக வாக்களிக்க வேண்டியிருக்குமா? என்று செய்தியாளர்கள் கேட்ட போது பிரதமர் நஜிப்புக்கும் பங்காளிக் கட்சிகளுக்கும் இடையே சந்திப்பின் முடிவைப் பொருத்தது என்று அவர் பதிலளித்தார்.

அலோர் ஸ்டார், மார்ச்.28- சிலாங்கூர் மந்திரி புசார், மற்ற மாநிலங்கள், குறிப்பாக கெடா மாநில அரசியல் விவகாரங்களில் தலையிடத் தேவையில்லை என்று கெடா மாநில அம்னோ தொடர்புத் துறை தலைவரும் கெடா மந்திரி புசாருமான டத்தோஶ்ரீ அகமட் பாட்ஷா எச்சரித்தார்.

கெடா மாநில மந்திரி புசார் பதவி சர்ச்சையில் டத்தோஶ்ரீ முக்ரிஸ் மகாதீரிடமிருந்து வலுகட்டாயமாக பதவியை பறித்தார் அகமட் பாட்ஷா. இதனால் கெடா மக்கள் அம்னோ மீது அதிருப்தியில் இருப்பதால், அடுத்தப் பொதுத்தேர்தலில் ‘பக்காத்தான் ஹராப்பான்’ எதிர்கட்சிக் கூட்டணி கண்டிப்பாக கெடா மாநிலத்தைக் கைப்பற்றும் என்று சிலாங்கூர் மந்திரி புசார் அறிக்கை விடுத்தார்.

‘மக்கள் கவனத்தைத் திசைத்திருப்பவே அவர் இப்படிப்பட்ட அறிக்கைகளை வெளியிடுகிறார். சிலாங்கூரில் கூட டான்ஶ்ரீ அப்துல் காலிட் மந்திரி புசாராக இருந்த போது அவரைப் பதவியிலிருந்து வெளியேற்றி அஸ்மின் அலியை மந்திரி புசாராக நியமித்தது சிலாங்கூரை ஆளும் ‘பக்காத்தான்’ எதிர்க்கட்சி கூட்டணி. ஒரு மாநிலத்தை ஆளும் மந்திரி புசார் கட்சியிலோ அல்லது மாநில பொறுப்புகளிலோ சரியாக இயங்கவில்லை என்றால் இப்படி அதிரடி முடிவு எடுப்பது வழக்கமான ஒன்று. இதனை அரசியலாக்கி மக்களை ஏமாற்ற முடியாது’ என்று டத்தோஶ்ரீ அகமட் பாட்ஷா அஸ்மினையும் எதிர்கட்சி கூட்டணியையும் எச்சரித்தார்.

இங்குள்ள மாநில அருங்காட்சியகத்தில் ஒரு நிகழ்ச்சியில் கலந்து கொண்ட அவர் செய்தியாளர்களிடம் இவ்வாறு கூறினார். ‘பக்காத்தான் ஹராப்பான்’ எதிர்க்கட்சி கூட்டணியில் இணைந்த பெர்சத்து கட்சியின் தலைவர் டான்ஶ்ரீ முகிதின் யாசின் அந்த கூட்டணியைத் தங்கள் கட்சியே தலைமைத்தாங்கி வழிநடத்தும் என்று கூறியதைச் சாடினார் அகமட் பாட்ஷா. 

எதிர்க்கட்சிக் கூட்டணியில் ஜசெக கட்சிதான் பலம் வாய்ந்த கட்சி. இப்போதே நாடாளுமன்றத்தில் 38 தொகுதிகளைப் பிரதிநிதிக்கும் அக்கட்சிதான் எதிர்கட்சி கூட்டணியின் முடிவெடுக்கும் அதிகாரத்தையும் தலைமை அங்கீகாரத்தையும் பெற்றிருக்கிறது. அப்படி பெர்சாத்து கட்சி தலைமைத்தாங்குமானால் கண்டிப்பாக ஜசெக உறுப்பினர்கள் அதிருப்தி அடைந்து கட்சியை விட்டு விலகுவர். இதனால் பெர்சத்து கட்சி எதிர்க்கட்சிக் கூட்டணியில் வெறும் அங்கத்தினராக மட்டுமே இருக்க சாத்தியமாகும் என்று அவர் கருத்துரைத்தார்.

கோலாலம்பூர், மார்ச் 28- பிகேஆர் எனும் நீதிக்கட்சியின் தலைவர் டத்தோ ஶ்ரீ டாக்டர் வான் அஸிஸா நேற்று மருத்துவமனையில் அனுமதிக்கப்பட்டார். அவர் நலமாக இருப்பதாக கூறப்பட்டுள்ளது.

நேற்று வெளியிடப்பட்ட அறிக்கையில், மருத்துவ சிகிச்சை பெறுவதற்காக வான் அஸிஸா மருத்துவமனையில் சேர்க்கப்பட்டுள்ளதாகவும் அதனால், சட்டமன்ற கூட்டத்திலும் சிலாங்கூர் மாநில கூட்டத்திலும் கலந்து கொள்ளமாட்டார். அதோடு, முன்னமே உறுதிச் செய்யப்பட்டிருந்த பிற நிகழ்ச்சிகளிலும் அவர் கலந்து கொள்ளமாட்டார் என அவரின் அரசியல் செயலாளர் ரோட்ஷியா இஸ்மாயில் தெரிவித்திருந்தார்.

வான் அஸிஸா எந்த மருத்துவமனையில் அனுமதிக்கப்பட்டுள்ளார் மற்றும் என்ன சிகிச்சை பெற அனுமதிக்கப்பட்டுள்ளார் என்ற தகவல்களை அவர் வெளியிடவில்லை. 

மேலும், வான் அஸிஸாக்கு போதுமான ஓய்வும் உறவினர்களுடன் இருக்க வாய்ப்பும் வழங்கும் வகையில் சில நெருங்கிய உறவுகள் மட்டுமே மருத்துவமனையில் அனுமதிக்குமாறு மருத்துவர்கள் அறிவுரை கூறியுள்ளதாக அறிக்கையில் தெரிவிக்கப்பட்டுள்ளது. 

கோலாலம்பூர், மார்ச்.25- ஷரியா நீதிமன்ற (குற்றத் தண்டனை) சட்டம் மீதான உத்தேச திருத்த மசோதா குறித்து மசீச தலைவர்களுடனும் சீன பொது அமைப்பின் தலைவர்களுடன் மசீச  சந்திப்புக் கூட்டத்தை மேற்கொண்டுள்ளது.

இந்தத் திருத்த மசோதா குறித்து தனிப்பட்ட சந்திப்பை மசீச நடத்தி வருகிறது என அதன் தேசியத் தலைவர் டத்தோஸ்ரீ லியோங் தியோங் லாய் தெரிவித்தார். 

நேற்று அமைச்சரவைக் கூட்டத்தில் இந்தச் சட்டத் திருத்தங்கள் குறித்து எதுவும் விவாதிக்கப்படவில்லை என்று அவர் விளக்கினார். 

இந்த மசோதாவை முன்பு பாஸ் கட்சித் தலைவர் டத்தோ அப்துல் ஹாடி அவாங் தமது தனிப்பட்ட மசோதாவாக நாடாளுமன்றத்தில் தாக்கல் செய்திருந்தார்.

எனினும், அந்த மசோதாவை சில புதிய மாற்றங்களுடன் அரசாங்கமே நாடாளுமன்றத்தில் தாக்கல் செய்யவிருப்பதாக அறிவிக்கப்பட்டிருந்தது. இப்பிரச்சினை தொடர்பாக மசீச தொடர்ந்து சீன சமுதாயத்தினருடன் கலந்தாலோசனைகளை நடத்தி வருகின்றது என்று போக்குவரத்துத் துறை அமைச்சருமான டத்தோஸ்ரீ லியோ தியோங் லாய் சொன்னார்.

ஜொகூர் பாரு, மார்ச் 25- எதிர்வரும் 14வது பொதுத்தேர்தலில் ஜொகூர், கேலாங் பாத்தாவில் போட்டியிடவே விரும்புவதாக ஜசெகவின் மூத்த தலைவர் லிம் கிட் சியாங் இன்று கூறினார். வரும் பொதுத்தேர்தலில் தாம் போட்டியிட முடிவு செய்தால் கேலாங் பாத்தா தனது முதல் தேர்வாக அமையும் என அவர் கூறினார்.

ஆனால், வரும் பொதுத்தேர்தலில் போட்டியிடுவதா இல்லையா என்று தாம் இன்னும் முடிவுச் செய்யவில்லை என அவர் மேலும் கூறினார்.

"நான் தேர்தலில் போட்டியிட முடிவு செய்தால் எனது முதல் தேர்வு கேலாங் பாத்தா தான். ஆனாலும், கட்சி வியூக அடிப்படையில் நான் வேறு இடத்தில் போட்டியிட வேண்டும் என்ற நிலை வந்தால் அதனைக் குறித்து தீவிரமாக ஆராய தயார் நிலையில் இருக்கிறேன்" என்று லிம் கிட் சியாங் கூறினார்.

ஜனநாயக செயல் கட்சி 1966ம் ஆண்டு தொடங்கப்பட்டது முதல் அதாவது 51 ஆண்டுகள் தாம் அரசியலில் இருந்து வருவதாக லிம் மேலும் கூறினார்.

கோலாலம்பூர், மார்ச்.24- அடுத்த பொதுத்தேர்தலில் அதிகமானப் பெண்களை வேட்பாளர்களாக நிறுத்த வேண்டும் என்று தேசிய முன்னனிக்கும் எதிர்கட்சியினருக்கும்  மசீச மகளிர் பிரிவு தலைவி டத்தோ ஹெங் சியாய் கீ அறைகூவல் விடுத்தார்.

நம் நாட்டின் அரசியலில் பெண்களின் ஈடுபாடு மிகவும் குறைவாக இருக்கிறது. சட்டமன்றம் மற்றும் நாடாளுமன்றத்திலும் கூட பெண்களின் பிரநிதித்துவம் மிகக் குறைவு என்று அவர் சுட்டிக்காட்டினார்.

பெண்களின் நலன் மற்றும் உரிமைகளைப் பாதுகாத்துப் போராட அரசியலில் பெண்கள் அதிகம் இருக்கவேண்டும். நாட்டின் சட்டத்தை வகுக்கும் வகையில் அரசியலில் இருந்தால்தான் பெண்கள் அவர்களுக்கு பாதகம் ஏற்படுத்தாத வகையில் சட்டங்களை அமல்படுத்துவதில் குரல் கொடுக்கமுடியும்.

‘நமது மசீச மகளிர் பிரிவின் முதல் தேசிய தலைவியான டான்ஶ்ரீ சோவ் போ கெங் நமக்கு ஒரு சிறந்த முன்னோடி. ஒன்றுக்கும் மேற்பட்ட திருமணங்களை (பொலிகாமி) முஸ்லிம் அல்லாதோர் புரிவது தவறு என்று பலருக்கு உணர்த்தியவர் அவர். 

இதற்காக அவர் பல முயற்சிகள் செய்து திருமணம் மற்றும் விவாகரத்து சட்டத்தில் ஒரு பெரிய மாற்றத்தை உருவாக்கி முஸ்லிம் அல்லாதோர், பல திருமணம் புரிவதைச் சட்டவிரோதமாக்கினார். நம் நாட்டு பெண்கள் அனைவரும் அவருக்கு நன்றிக் கூறவேண்டும்’ என்றும் அவர் குறிப்பிட்டார். 

கணவன்-மனைவி இருவருள் யாராகிலும் முஸ்லிம் மதத்திற்கு மாறிவிட்டால் அவர்களுக்கிடையிலான குழந்தைகள் பராமரிப்பு மற்றும் சொத்து விவகாரம் மீதான வழக்கை ஷரியா நீதிமன்றத்தில் நடத்தாமல் சிவில் நீதிமன்றத்தில் நடத்தவேண்டும். அப்போதுதான் இதில் நடுநிலையான தீர்ப்பு கிடைக்கும். இதனை விரைவில் அமைச்சரவையில் கலந்தாலோசித்து முடிவெடுக்கும்படி மத்திய அரசாங்கத்திடம் அவர் பரிந்துரைத்தார்.

கடந்த 2011ஆம் ஆண்டு பிரதமர் நஜீப் மலேசியாவில் உள்ள அனைத்து நிறுவனங்களிலும் உயரிய பதவிகளில் குறைந்தளவில் 30 விழுக்காடு பெண்கள் இருக்கவேண்டும் என்று ஒரு இலக்கை நிர்ணயித்தார்.

அந்த அறிவிப்பை விடுத்து 6 ஆண்டுகள் நிறைவேறிய நிலையில் அரசாங்கத்தில் உயரிய பதவிகளில் 35.8% பெண்கள் இப்போது பணிப் புரிகிறார்கள். ஆனால், தனியார் நிறுவனங்களில் வெறும் 12% பெண்கள் மட்டுமே உயரிய பதவிகளை வகிக்கிறார்கள். 

இந்தப் பாரபட்சத்தை அரசாங்கம் உடனுக்குடன் கவனித்து அந்த நிறுவனங்களின் மேல் தக்க நடவடிக்கை எடுக்கவேண்டும் என்றும் அவர் கேட்டுக்கொண்டார்.

நாட்டில் பல உயர்நிலை கல்விக்கூடங்களில் படிப்பை முடிக்கும் பட்டதாரிகளில் பெண்களே அதிகமாக இருப்பதால் நிறுவனங்களில் உயரிய பதவியை வகிக்க அவர்களுக்குத் திறன் இருக்கிறது என்று 

மலேசிய சீனப் பெண் தொழிலதிபர்கள் சங்கத்தின் விருந்துக் கூட்டத்தில் கலந்துக் கொண்ட உரையாற்றிய போது டத்தோ ஹெங் கூறினார். 

 கோலாலம்பூர், மார்ச்.22- இந்தியர்களின் உரிமைக்காக எனக் கூறி குறிப்பாக, ஷாரியா சட்டத் திருத்தம் தொடர்பான விஷயத்தில்  தொடர்ந்து நாடகமாடுவதை ஹிண்ட்ராப் தலைவர் வேதமூர்த்தி நிறுத்திக்கொள்ள வேண்டும் என்று மஇகா இளைஞர் பிரிவின் தேசியத் தலைவர் டத்தோ சிவராஜ் வலியுறுத்தினார்.

பிரச்சனைகளை அரசியலாக்குவதைத் தவிர வேறு எதற்கும் லாயக்கில்லை என்பதை ஏற்கெனவே நிருபித்தவர் வேதமூர்த்தி. மேலும், இந்நாட்டிலுள்ள இந்தியர்களை தவறாக வழிநடத்த முயற்சித்து வருவர் வேதமூர்த்தி என்று சிவராஜ் தமது பத்திரிகை அறிக்கையில் சாடினார்.

ஷரியா சட்டத்திருத்த விவகாரத்தில் மஇகாவை ஒரு நொண்டி வாத்து என்று முன்பு சாடியிருந்த வேதமூர்த்திக்கு பதிலளிக்கும் வகையில் இந்த அறிக்கையை சிவராஜ் விடுத்துள்ளார். அவர் மேலும் கூறியிருப்பதாவது:

பத்திரிக்கை அறிக்கைகள் விடுப்பதற்கு மட்டுமே வேதமூர்த்தி லாயக்கானவர். அதற்கு அப்பால் ஒரு குறிப்பிட்ட வரைமுறைக்குள் இருந்து இந்தியர்களைத் தற்காக்கும் பொறுப்பு என்று வரும் போது கைகழுவிட்டு ஓட்டம் பிடித்து விடுவார்.

நாட்டிலுள்ள இந்தியர்களின் சமூக, பொருளாதார மேம்பாட்டுக்கான அக்கறையை வேதமூர்த்தி நிருப்பிக்கவேண்டும் என்பதற்காக அவருக்கு பிரதமர் டத்தோஶ்ரீ நஜிப் ஒரு வாய்ப்பை வழங்கினார். ஆனால் என்ன நடந்தது? தன்னிடம் நம்பி ஒப்படைக்கப்பட்ட தமது அமைச்சுநிலை கடமைகளைச் சரிவரச் செய்யாமல் பாதியிலேயே உதறிவிட்டு போய்விட்டார்.

அரசு நிர்வாக வட்டத்தை விட்டு வெளியேறிவிட்ட பின்னர், இப்போது கண்மூடித்தனமாக தேசிய முன்னணியையும் அதன் பங்காளிக் கட்சிகளையும் சாடித் திரிகிறார். முதலில் அவர், அரசாங்கத்தின் வழிமுறைக்குள் உறுதியாக இருந்து, இதர பங்காளிக் கட்சிகளுடனும் சேர்ந்து பணிபுரிந்திருக்க வேண்டும். இந்திய சமுதாயத்தின் உரிமைகளுக்காக போராடி இருக்கவேண்டும்.

அவரது அறிக்கைகள் எதற்கும் உபயோகமில்லாதவை. இந்தியர்கள் தன்னை எப்போதுமே ஆதரிப்பார்கள் என்ற கனவில் அவர் சஞ்சரித்துக் கொண்டிருக்கிறார். இந்நாட்டில் நின்றுபிடித்து, எப்போதும் இந்திய சமுதாயத்தின் உரிமைகளுக்காக மஇகா போராடிக்கொண்டே இருக்கும். வேதமூர்த்தியைப் போல பயந்து ஓட்டம் பிடிப்பவர்கள் அல்லர் நாங்கள். 

இவ்வாறு தமது அறிக்கையில் மஇகா இளைஞர் பிரிவுத் தலைவர் சிவராஜ் குறிப்பிட்டுள்ளார்.

 

More Articles ...