கோலாலம்பூர், ஏப்ரல் 19- கிளந்தானில் உள்ள முஸ்லீம் அல்லாதோரும் இனிமேல் மக்ரீப் தொழுகையின்போது தங்கள் கடைகளை மூட வேண்டும் என்று மாநில அரசாங்கம் விதித்தச் சட்டத்தை எதிர்த்து முன்னாள் அமைச்சர் டத்தோ ஸாயிட் இப்ராஹிம் நீதிமன்றத்தில் வழக்கு தொடுக்கப் போவதாக எச்சரித்தார்.

இஸ்லாமிய மதம் மலேசியாவின் அதிகாரபூர்வ மதமாக அங்கீகரிக்கப்பட்டாலும், மலேசியா ஒரு மதசார்பற்ற, ஜனநாயக நாடாகும். அதனால் கிளந்தான் அரசாங்கம் விதித்துள்ள இந்த சட்டம் செல்லாது என்றார் அவர்.

“பொதுமக்களின் அறியாமையையும் அச்சத்தையும் பாஸ் துஷ்பிரயோகம் செய்கிறது. கைது செய்யப்படுவதிலிருந்தும் ஷரியா குற்றச்சாட்டுகளிலிருந்தும் தப்பித்துக்கொள்ள பொதுமக்கள் கண்மூடித்தனமாக சட்டங்களைப் பின்பற்றி வருகின்றனர். அவர்கள் நல்வழிக்கு திருப்ப நான் இந்த வழக்கைத் தொடர்வேன்” என்று ஸாயிட் இப்ராஹிம் எச்சரித்தார்.

பொதுமக்களுக்கு உண்டான சட்டங்களையும் தனிமனித நம்பிக்கைகளையும் கிளந்தான் அரசாங்கம் வேறுபடுத்தி பார்க்க வேண்டும். பாஸ் கட்சியின் மத கொள்கைகளை பொதுமக்கள், குறிப்பாக முஸ்லீம் அல்லாதோர் மீது திணிக்கக் கூடாது. மலேசிய கூட்டரசு சாசனத்தில் உள்ள கோட்பாடுகளுக்கு ஏற்ற சட்டங்களை அமைத்தால் பொதுமக்களுக்கு நன்மை அளிக்கும் என்று அவர் மேலும் அறிவுறுத்தினார்.

கோலாலம்பூர், ஏப்ரல் 19- டான்ஶ்ரீ மொகிதின் யாசின் தலைமையில் இயங்கி வரும் பெர்சத்து கட்சியின் மூத்த தலைவர் கமாருல்ஸமான் கட்சியிலிருந்து விலகுவதாக அறிவித்துள்ளார். 

பதவிக்காகவும் அரசியல் அதிகாரத்திற்காகவுமே அக்கட்சி போராடி வருவதால் அக்கட்சி தலைவர்கள் மேல் இருந்த நம்பிக்கையை இழந்துவிட்டதாக அவர் தெரிவித்தார்.

இதற்கு முன், ரெம்பாவ் தொகுதியிலிருந்து 500 பேர் பெர்சத்து கட்சியிலிருந்து ஒரே நேரத்தில் விலகியது குறிப்பிடத்தக்கது. அவர்களும் கட்சியின் தலைவர்கள் மீது இருந்த நம்பிக்கை இழந்துவிட்டதால் விலகுவதாக காரணம் கூறினர்.

இதனிடையே, பெர்சத்துக் கட்சியை விட்டு விலகும் அந்த உறுப்பினர்கள் தங்கள் சொந்த ஆசைகளை நிறைவேற்றிக் கொள்வதற்காக கட்சியைப் பயன்படுத்த நினைத்தவர்கள். ஆனால், மக்களின் நன்மைக்காக போராடும் இக்கட்சியிலிருந்து அவர்கள் விலகுவதால் தங்களுக்கும் கட்சிக்கும் எந்தவொரு பாதகமும் இல்லை என்று பெர்சத்து கட்சியின் தலைவர் டான்ஶ்ரீ மொகிதின் யாசின் கருத்துரைத்தார்.

 கோலாலம்பூர், ஏப்ரல்.18- அடுத்த பொதுத்தேர்தலில் தனித்தே போட்டியிடுவது என பாஸ் கட்சி எடுத்திருக்கும் முடிவு அக்கட்சி தன்னைத் தானே கீழறுத்துக் கொள்ளும் விதமாக இருப்பதோடு எதிர்க்கட்சிகளையும் கீழே பிடித்துத் தள்ளுவதாக அமைந்துவிடும் என்று முன்னாள் பிரதமர் துன் மகாதீர் தெரிவித்தார்.

இதன் விளைவாக, தேர்தலில் மும்முனைப் போட்டி உருவெடுக்கும். இறுதியில் தேசிய முன்னணி வெற்றி பெற்றுவிடும் என்று அவர் சுட்டிக்காட்டினார். கடந்த காலத் தேர்தல் முடிவுகளை வைத்துப் பார்க்கும் போது, பாஸ் கட்சி கூறியிருப்பதைப் போல அக்கட்சி 80 தொகுதிகளில் தனித்துப் போட்டியிடுமேயானால் 15 தொகுதிகளுக்கு மேல் ஜெயிக்க முடியாது என்றார் அவர்.

அது போட்டியிட முனையும் 80 தொகுதிகளில் பெரும்பாலானவை தோற்கக்கூடிய தொகுதிகள் என்பது அக்கட்சிக்கே தெரியும். ஆனால் கட்சியின் வழக்கப்படி அதற்கு வெற்றி வாய்ப்பு இல்லாத தொகுதிகளில் கூட அது போட்டியிடும். பாஸ் தனித்தே போட்டியிடுமானால், அது அடையப் போகும் வெற்றி மிகக் குறைவானதாகவே இருக்கும் என்று துன் மகாதீர் சொன்னார்.

1999ஆம் ஆண்டு பொதுத்தேர்தலிலும் அதற்கு பிந்திய பொதுத் தேர்தல்களிலும் பிகேஆர், ஜசெக ஆகிய கட்சிகளின் கூட்டணியில் இணைந்து போட்டியிட்ட போதெல்லாம் பாஸ் கட்சி கணிசமான தொகுதிகளை வென்றுள்ளது. இடையில் 2004 ஆம் ஆண்டில் அது தனித்துப் போட்டியிட்ட போது 5 தொகுதிகளில் மட்டுமே அது வெற்றிபெற முடிந்ததை என்பதை அவர் சுட்டிக்காட்டினார்.

 

 

கோலாலம்பூர், ஏப்ரல்.17- ‘நியூ ஜெனரேஸன் பார்ட்டி’ எனும் அரசியல் கட்சியை, திடீரென்று ‘பார்ட்டி பேபாஸ் ராசுவா’ என்று பெயர் மாற்றம் செய்து ‘பாக்காத்தான் ஹராப்பான்’ எதிர்க்கட்சி கூட்டணிக்கு ஆதரவு தெரிவித்ததால் தற்போது அக்கட்சியினர் இடையே பரபரப்பு ஏற்பட்டுள்ளது.

பெயர் மாற்றம் கண்ட அக்கட்சியின் தலைவராக டத்தோ முகமட் இஸாம் நியமிக்கப்பட்டு, கோபி கிருஷ்ணன் பொதுச் செயலாளராக பொறுப்பேற்றார். கோபி கிருஷ்ணனின் இந்தச் செயலுக்கு கண்டனம் தெரிவித்துள்ளார். நியூ ஜெனரேஸன் கட்சித் தலைவர் குமார் அம்மானும் பொதுச் செயலாளர் முகமட் சாய்னியும் இது தொடர்பாக செய்தியாளர் கூட்டத்தில் விளக்கம் அளித்தனர்.

கடந்த 2013ஆம் ஆண்டு துவங்கப்பட்ட நியூ ஜெனரேஸன் பார்ட்டி இன்றுவரை அதே பெயரில்தான் இயங்கி வருகிறது. அன்று முதல் இன்று வரை தேசிய முன்னனிக்கும் பிரதமர் டத்தோஶ்ரீ நஜீப்பிற்குமே தங்களது ஆதரவு இருந்து வருகிறது என்று குமார் அம்மான் கூறினார்.

கோபி கிருஷ்ணன் மீதும் அவரின் நண்பர்கள் மீதும் போலீசிலும் ஆர்.ஓ.எஸ் எனப்படும் சங்கங்கள் பதிவகத்திலும் புகார் அளித்துள்ளதாக குமார் அம்மான் தெரிவித்தார்.. நியூ ஜெனரேஸன் பார்ட்டி என்பதே இக்கட்சியின் அதிகாரப்பூர்வ பெயர் என்றும் தாமே இன்னும் தலைவராக இருப்பதாகவும் அவர் சுட்டிக் காட்டினார்.

எந்தவொரு பொதுக் குழு கூட்டமும் இல்லாமல் இந்த முடிவை அவர்கள் எடுத்தது சட்டப்பூர்வமாக செல்லாது. அதனால், சங்கங்களின் பதிவகம் இந்த விவகாரத்திற்கு விரைவில் தீர்க்கவேண்டும் என்று முகமட் சாய்னி கோரிக்கை விடுத்துள்ளார்.

சில வாரங்களுக்கு முன், கோபி கிருஷ்ணனும் டத்தோ முகமட் இஸாமும் தங்களுடைய கட்சியின் பெயர் மாற்றத்தையும் புதிய செயற்குழு உறுப்பினர்களின் பெயரையும் அறிவித்தனர். அதோடு 'பக்காத்தான் ஹரப்பானுக்கு தங்களது ஆதரவைத் தெரிவித்தனர். இதனால் நியூ ஜெனரேஸன் கட்சி உயர்மட்ட உறுப்பினர்களிடையே குழப்பதையும்  ஏற்படுத்தி உள்ளது.

கோலாலம்பூர், ஏப்ரல்.16- மலேசிய இந்தியர்களின் மேம்பாட்டிற்கென சிறப்புப் பிரிவை அமைப்பதற்கு உடன்பாடு காணப்பட்டது என்றாலும் பிரதமர் டத்தோஶ்ரீ நஜிப் தம்முடைய தரப்பு வாக்குறுதிகளை நிறைவேற்றவே இல்லை என்று ஹிண்ட்ராப் இயக்கம் கூறியது.

பிரதமர் துறையில் இருந்து அளிக்கப்படும் நிதியைக் கொண்டு ஹிண்ட்ராப் தலைமையில் அத்தகைய சிறப்புப் பிரிவை  அமைக்கும் உடன்பாட்டை நிறைவு செய்ய, தேசிய முன்னணியின் தலைவரான பிரதமர் நஜிப் தயக்கம் காட்டினார் என்று ஹிண்ட்ராப் தலைவர் வேதமூர்த்தி சாடினார்.

தேசிய முன்னணிக்கு என்றுமே விசுவாசமாக இருந்து வரும் கட்சி மஇகா. எனவே, அக்கட்சியின் நிலை பற்றி தாம் கவலைப்படுவதாக அவர் ஒரு கட்டத்தில் தெரிவித்தார். ஹிண்ட்ராப் தலைமையில் சிறப்புப் பிரிவு அமையும் போது அது மஇகா ஓரங்கட்டுவதாக அமைந்து விடக்கூடும் என்ற அச்சமே இதற்குக் காராணமாகும் என்று வேதமூர்த்தி விளக்கினார்.

தேசிய முன்னணிக்கும் ஹிண்ட்ராப்பிற்கும் இடையே ஏற்பட்ட இந்தப் புரிந்துணர்வு உடன்பாட்டை அம்னோவிலுள்ள பல அமைச்சர்களும் எதிர்ப்பதாகவும் 2007ஆம் ஆண்டில் நடந்த ஹிண்ட்ராப் எழுச்சினால் ஏற்பட்ட பாதிப்புக்களை அவர்கள் மறக்க முடியாத நிலையில் இருக்கின்றனர் என்று தம்மிடம் கூறப்பட்டதாக அவர் குறிப்பிட்டார்.

இந்தியர்களுக்கான செயல் வரைவுத் திட்டக் கோரிக்கையை நிறைவேற்ற ஹிண்டராப்பிற்கு பிரதமர் நஜிப் வாக்குறுதி அளித்ததை அடுத்து அந்தப் புரிந்துணர்வு உடன்பாடு கையெழுத்தானது. 

இதனிடையே இந்தியர்களுக்கான மேம்பாட்டு செயல் வரைவுத் திட்டத்தை பிரதமர் ஏப்ரல் 23ஆம் தேதி அறிவிக்கப் போவதாக அறிவிப்பு வந்துள்ளது. இது ஒரு ஏமாற்று வித்தை. பொதுத் தேர்தல் அடுத்த ஆண்டில் வரவிருக்கும் நிலையில், இந்தியர்களின் மீது தங்களுக்கு அக்கரை இருப்பது போல் ஒரு போலித் தோற்றத்தை ஏற்படுத்த இவர்கள் முயற்சிக்கிறார்கள் என்றார் அவர்.

"நீங்கள் இந்தப் புதிய செயல் வரைவுத்திட்ட தந்திரத்தைக் கொண்டு உங்களின் அதிர்ஷ்டத்தை நீங்கள் பரிசோதித்துக் கொள்ளுங்கள். அடுத்த பொதுத்தேர்தலின் போது தேசிய முன்னணிக்கு எதிராக அதன் இனிப்பான வாக்குறுதிகள் எப்படி வெற்று வாக்குறுதிகளாக மாறின என்பது பற்றி ஹிண்ட்ராப் பகிரங்கமாகப் பேசும் என்று வேதமூர்த்தி சொன்னார்.

'நம்பிக்கை' என்ற சுலோகத்தை வைத்துக் கொண்டு அம்னோ மற்றும் மஇகா அமைச்சர்களுடன் சேர்ந்து இந்தியர்களை நஜிப் ஏமாற்றினார் என்று அவர் சாடினார்.

 

 

 கேமரன்மலை, ஏப்ரல்.15- கேமரன்மலை நாடாளுமன்றத் தொகுதியில் மஇகா மீண்டும் தனது வேட்பாளரை நிறுத்தும் என்று அதன் தேசியத் தலைவர் டத்தோஶ்ரீ டாக்டர் சுப்ரமணியம் திட்டவட்டமாகத் தெரிவித்தார்.

கேமரன்மலைக்கு இரண்டுநாள் வருகை மேற்கொண்டிருக்கும் டத்தோஶ்ரீ சுப்ரமணியம், தமிழ்ப்பள்ளி ஆசிரியர்களுடனான சந்திப்புக் கூட்டம் உள்ளிட்ட சில நிகழ்ச்சிகளில் கலந்து கொண்டார். மஇகா கிளைத் தலைவர்களையும் அவர் சந்தித்துப் பேசினார்.

கேமரன்மலை தொகுதியில் மீண்டும் மஇகா தான் போட்டியிட இருக்கிறது. யார் என்ன வேண்டுமானாலும் பேசலாம், என்ன வேண்டுமானாலும் செய்யலாம். ஆனாலும், அடுத்த பொதுத்தேர்தலின் போது இங்கு மஇகாதான் போட்டியிடும். இதில் எந்த மாற்றமும் இல்லை என்று அவர் சொன்னார்.

தொகுதிகள் விஷயத்தில் தேசிய முன்னணிக்கு என ஒரு கொள்கையுண்டு. அந்தக் கொள்கையின்படி அங்கு நாங்கள் எங்கள் வேட்பாளரை அங்கு நிறுத்துவோம்.  சரியான தருணத்தில், பொருத்தமான வேட்பாளரை மஇகா அறிவிக்கும் என்று சுகாதார அமைச்சருமான டத்தோஶ்ரீ சுப்ரமணியம் தெரிவித்தார்.

கோலாலம்பூர், ஏப்ரல்.14- 1எம்டிபி நிறுவனம் தொடர்பில் பிரதமர் டத்தோஶ்ரீ நஜிப், மலேசிய அரசாங்கம் மற்றும் இதர 13 பேர் மீது முன்னாள் செனட்டரான டத்தோ முகமட் இஷாம் வழக்குத் தொடுத்துள்ளார்.

இந்த வழக்கைத் தாக்கல் செய்த பின்னர் செய்தியாளர்களிடம் பேசிய முகமட் இஷாம், குடிமகன் என்ற முறையிலும் வரிச் செலுத்துகிற இதர மலேசியர்களின் சார்பிலும் இந்த சிவில் வழக்கைத் தாம் தொடுத்திருப்பதாக சொன்னார்.

மலேசியாவின் முதலீட்டு அமைப்பான 1எம்டிபியில் ஏற்பட்ட இழப்புக்கு யார் காரணம்? அத்தகைய இழப்புக்கு யார் பொறுப்பாவது? மற்றும் முறையான சட்ட வழிகளில் அந்தப் பணத்தை எப்படி மீட்பது? என்பது குறித்து நீதிமன்றம் தீர்மானிக்க வேண்டும் என இந்த வழக்கில் கோரப்பட்டுள்ளது.

முன்பு அம்னோ, பிகேஆர் மற்றும் பிரிபூமி பெர்சத்து ஆகியவற்றில் அங்கம் வகித்துள்ள முகமட் இஷாம், இப்போது 'பார்ட்டி பெபாஸ் ரசுவா' என்ற கட்சியின் தேசியத் தலைவராக பொறுப்பு வகிக்கிறார். இந்தக் கட்சி முன்பு 'நியூ ஜெனரேசன் பார்ட்டி' என்றழைக்கப்பட்டது என்பது குறிப்பிடத்தக்கது.

 

More Articles ...