கோலாலம்பூர், ஏப்ரல்.10-  அவமரியாதையான சொல்லைப் பயனபடுத்தியதாக துன் மகாதீர் மீது இந்திய சமுதாயத்தினர் குறை கூறிவரும் சூழலில், அந்தச் சொல்லை உச்சரித்ததற்காக இந்திய சமுதாயத்திடம் மன்னிப்புக் கேட்டுக் கொள்கிறேன் என்று துன் மகாதீர் அறிவித்தார்.

பக்காத்தான் ஹராப்பான் அலுவலகத்தில் நடந்த செய்தியாளர்கள் கூட்டத்தின் போது அவர் இந்த மன்னிப்பைக் கேட்டுக்கொண்டார். 

"எங்கள் காலத்தில் அந்தச் சொல் தப்பானதாக அர்த்தம் கொள்ளப்படவில்லை என்றாலும் அந்தச் சொல்லைப் பயன்படுத்தியதற்காக மன்னிப்புக் கேட்கிறேன் என்று அவர் சொன்னார். 

அண்மையில் ஜொகூரில் நடந்த பொதுக் கூட்டம் ஒன்றில் பேசிய போது துன் மகாதீர் 'கெலிங்' என்ற சொல்லைப் பயன்படுத்தியது கடும் ஆட்சேபத்தை ஏற்படுத்தி இருந்தது என்பது குறிப்பிடத்தக்கது.

அதேவேளை, சபா மற்றும் சரவாவைச் சேர்ந்தவர்களை சோம்பேறிகள் என நான் சொன்னதாக ஒரு சர்ச்சை எழுந்துள்ளது. நான் அப்படிச் சொல்லவில்லை. அப்படிச் சொன்னது உள்ளூரிலுள்ள ஒரு மலாய் தினசரி தான் என்று துன் மகாதீர் விளக்கம் அளித்தார்.

இந்த முறைதான் தேர்தல் வாக்களிப்பை, புதன் கிழமையில் (மே-9) வைக்கப்பட்டிருக்கிறது.  நம் நாட்டில் என்றைக்கு பொதுத் தேர்தலை புதன்கிழமையில் நடத்தி இருக்கிறார்கள். இதற்கு முன்னர் இப்படி வைக்கப்பட்டதில்லை. இன்னும் என்னென்ன வைத்திருக்கிறார்களோ தெரியவில்லை என்று மகாதீர் சிரித்துக் கொண்டே கூறினார்.

மேலும், மக்கள் வந்து வாக்களிப்பதை தடுக்கவே இவ்வாறு செய்திருக்கிறார்கள். ஆனாலும், இதற்கு அப்பால் அனைவரும் கண்டிப்பாக வாக்களிக்கச் செல்லவேண்டும் என்ற கோரிக்கையையும் அவர் முன்வைத்தார்.

மேலும் செய்தியாளர்கள் கூட்டத்தின் போது தன்னைப் படம் பிடித்த புகைப்படக்காரர்களைப் பார்த்து, 'என்னை படம் பிடிக்காதீர்கள், என் படத்தை போடுவது  சட்டவிரோதம் என்று கூறி விட்டார்களே..' என்று துன் மகாதீர் குறிப்பிட்ட போது அவருடன் அமர்ந்திருந்த பக்காத்தான் ஹராப்பன் தலைவர்கள் அனைவரும் சிரித்தனர்.

 பக்காத்தான் ஹராப்பான்  போஸ்டர்களில் துன் மகாதீர் படம் இடம் பெறக்கூடாது என்றும் ஏனெனில், அந்தக் கட்சியின்  பதிவு முறையானது அல்ல என்றும் தேர்தல் ஆணையம் அண்மையில் கூறியிருந்ததை மகாதீர் மறைமுகமாக சுட்டிக்காட்டியதால் இந்தச் சிரிப்பலை எழுந்தது.

 

 

 

 

 

 

 

 

 

 

 

புத்ராஜெயா, ஏப்ரல் 10 – பெரிதும் பரபரப்புடன் எதிர்ப்பார்க்கப்பட்ட 14 ஆவது பொதுத் தேர்தலுக்கான வாக்களிப்பு நாள் மே மாதம் 9 ஆம் தேதி புதன் கிழமை என்று தேர்தல் ஆணையத் தலைவர் டான்ஶ்ரீ முகம்மட் ஹாசிம் அப்துல்லா இன்று அறிவித்தார்.

பொதுத் தேர்தலுக்கான வேட்பாளர் மனுத் தாக்கல் நாள் ஏப்ரல் 28 ஆம் தேதி சனிக்கிழமை ஆகும். இன்று நண்பகல் 12 மணியளவில்  தேர்தல் ஆணைய அலுவலகத்தில் நடந்த செய்தியாளர்கள் கூட்டத்தில் டான்ஶ்ரீ முகம்மட் ஹாசிம் அப்துல்லா இந்த அறிவிப்பைச் செய்தார். 

முன்கூட்டியே வாக்களிப்பவர்களுக்கான தேதி மே மாதம் 5ஆம் தேதி சனிக்கிழமையாகும் என்று அது தெரிவித்தது. இவரது இந்தத் தேர்தல் தேதி அறிவிப்பு, டிவி –1 மற்றும் டிவி –3 ஆகிய தொலைக்காட்சிகளில் நேரடியாக ஒளிபரப்பப்பட்டது.

கடந்த ஏப்ரல் 7 ஆம் தேதி சனிக்கிழமை நாடாளுமன்றம் கலைக்கப்பட்டது. அதைத் தொடர்ந்து திங்கட்கிழமை பல்வேறு மாநில சட்டமன்றங்கள் கலைக்கப்பட்டன.

பினாங்கு மாநில சட்டமன்றம் மட்டும் இன்று காலையில் கலைக்கப்பட்டது. மொத்தம் 222 நாடாளுமன்றத் தொகுதிகளுக்கான தேர்தல் நடத்தப்படுகிறது.

கோலாலம்பூர், எப்ரல் 9 – நாட்டின் 14 ஆவது பொதுத் தேர்தலில் வேட்பு மனுத் தாக்கல் நாள் மற்றும் தேர்தல் வாக்காளிப்பு நாள் ஆகியவை குறித்து மலேசியா தேர்தல் ஆணையம் நாளை 10 ஆம் தேதி செவ்வாய்க்கிழமை அறிவிக்கும்.

பொதுத் தேர்தல் தொடர்பான முக்கிய கூட்டம் நாளை காலை 10 மணிக்கு தேர்தல் ஆணையத் தலைமையகத்தில் நடைபெறவிருக்கிறது. இந்தக் கூட்டத்தை அடுத்து நண்பகலில் தேர்தல் ஆணையத் தலைவர் டான்ஶ்ரீ முகம்மட் ஹாசிம் செய்தியாளர்களைச் சந்திக்கிறார்.

இந்தப் பத்திரிகையாளர்கள் சந்திப்பு டிவி -1 மற்றும் டிவி –3 ஆகியவற்றில் நேரடி ஒளிபரப்புச் செய்யப்படவுள்ளது.  நாடாளுமன்றம் ஏப்ரல் 7 ஆம் தேதி கலைக்கப்பட்டுள்ள நிலையில் அடுத்த 60 நாள்களுக்குள் தேர்தல் நடந்ததாக வேண்டும்.

இந்நிலையில் பினாங்கை தவிர, இதர மாநிலங்கள் அனைத்தும் தங்களுடைய சட்டமன்றங்களைக் கலைத்து மாநிலம் தேர்தல்களுக்கும் வழிகண்டுள்ளன. பினாங்கு மட்டும் நாளை செவ்வாயன்றுதான் சட்டமன்றத்தைக் கலைக்கும் என்று தெரிகிறது.

சரவாவைத் தவிர இதர மாநிலங்களில் சட்டமன்றத் தேர்தல் நடைபெறும். ஏனெனில் சரவாவில் 2016 ஆம் ஆண்டில்தான் சட்டமன்றத் தேர்தல் நடந்தது என்பது குறிப்பிடத்தக்கது.

கோலாலம்பூர், ஏப்ரல்.9- இந்திய மக்களை இழிவுப் படுத்தும் வகையிலான வார்த்தையை முன்னாள் பிரதமர் துன் மகாதீர் முகமட் பயன்படுத்தி விட்டார் என்று சிலர் சாடியுள்ள வேளையில், அவருக்கு சாதகமாக முன்னாள் தகவல் தொடர்பு அமைச்சர் டான்ஶ்ரீ ஸைனுடின் மைடின் குரல் கொடுத்துள்ளார். 

என் தந்தை மலபார் காரர்.. எனவே, பள்ளிகளில் என்னையும் ‘கெலிங்கின் மகன்' என்று  பலர் என்னை அழைப்பர். அதை நான் என்றுமே இழிவான வார்த்தையாக கருதியதில்லை” என்று டான்ஶ்ரீ ஸைனுடின் மைடின் தனது டுவிட்டர் அகப்பக்கத்தில் கருத்து தெரிவித்து  உள்ளார். 

'''அண்மையில் மகாதீர் அந்த வார்த்தையை பயன்படுத்தி விட்டார் என்று மஇகாவினர் வேண்டுமென்றே அதனைப் பெரிதுப் படுத்துகின்றனர். மகாதீரும் ‘கெலிங்’வர்க்கத்தைச் சேர்ந்தவர்” என்று அவர் மேலும் கூறியுள்ளார். 

மகாதீர் அத்தகைய சொல்லை இனிமேற்கொண்டு பயன்படுத்தக் கூடாது என்று  தேசிய மனித உரிமை சங்கத் தலைவர் டத்தோ அம்பிகா ஶ்ரீனிவாசன் அறிவுறுத்தி உள்ளார் என்பது குறிப்பிடத்தக்கது. 

முந்தைய காலங்களில் அந்த வார்த்தையானது இழிவுப் படுத்தும் நோக்கில் உபயோகிக்கப்படவில்லை என்ற போதிலும், இப்போதெல்லாம் இந்தியர்களை இழிவுப் படுத்தும் நோக்கில் சிலர் அந்த வார்த்தையைப் பயன்படுத்தி வருகின்றனர் என்று அம்பிகா தெளிவுப் படுத்தினார். 

மகாதீர் இனவாதியாக செயல்படுகின்றார் என்று  டத்தோஶ்ரீ வேள்பாரி சாடியுள்ளார்.  அந்த  வார்த்தையை பயன்படுத்தியதற்காக மகாதீர் மன்னிப்பு கோர வேண்டும் என்று மஇகாவினர் வலியுறுத்திய போதிலும், மகாதீர் அதற்கு மன்னிப்பு கேட்கவில்லை. 

“கெடா மாநிலத்தில் நாங்கள் இந்த வார்த்தையை அதிகமாக பயன்படுத்துவோம். என் சிறு வயது முதற்கொண்டே நான் அந்த வார்த்தையை பயன்படுத்தியுள்ளேன் அதை நான் இழிவான வார்த்தையாக கருதியதில்லை  மகாதீர்  சொன்னார்.

 

 

 

 

 

 

 

 

 

 

 

 

 

 

 

 

 

 

 

 

 

 

 

கோலாலம்பூர், ஏப்ரல் 9 –நாடாளுமன்றம் சனிக்கிழமையன்று லைக்கப்பட்டதைத் தொடர்ந்து, இன்று பல மாநில சட்டமன்றங்கள் அதிகாரப் பூர்வமாக கலைக்கப்பட்டன.

இன்று காலை 10.30 மணியளவில் இஸ்தானா ஆலம் ஷாவில் சிலாங்கூர் மாநில சட்டமன்றம் கலைக்கப்பட்டது. இதற்கான அதிகாரப்பூர்வ அறிவிப்பை மந்திரி புசார் டத்தோஶ்ரீ அஸ்மின் அலி வெளியிட்டார்.

அதே வேளையில் பேரா மாநில சட்டமன்றம், இன்று கலைக்கப்பட்டதை பேரா சுல்தான் நஷ்ரின் ஷா அறிவித்தார். எளிமையான சடங்கு நிகழ்ச்சிகளுக்குப் பின்னர் சுல்தான் நஷ்ரின் ஷா இந்த அறிவிப்பை விடுத்தார்.

மக்கள் தங்களின் அரசாங்கத்தை தேர்ந்தெடுப்பதற்கான உரிமையை மக்களுக்கு தேர்தல் வழங்குகிறது என்று அவர் சுட்டிக்காட்டினார். மக்களின் ஆதரவைப் பெறும் நோக்கத்தில் மக்களிடையே பிளவை ஏற்படுத்தி விடும் அளவுக்கு அரசியல் கட்சிகள் செயல் படக்கூடாது என்று அவர் கேட்டுக் கொண்டார்.

திரெங்கானு சுல்தான் மிஷான் ஜைனல் அபிடினின் இணக்கத்தைப் பெற்ற பின்னர் திரெங்கானு சட்டமன்றம் கலைக்கப்பட்டதை மாநில மந்திரி புசார் டத்தோ அகமட் ரஷிப் அப்துல் ரஹ்மான் அறிவித்தார்.

 

 கோலாலம்பூர், ஏப்ரல்.9- 14-ஆவது பொதுத் தேர்தலில் போட்டியிடவிருக்கும் வேட்பாளர்கள் பட்டியலை எதிர்க்கட்சி இதுவரை மலேசிய ஊழல் தடுப்பு ஆணையத்திடம் (எம்ஏசிசி) பகிர்ந்துக் கொள்ளவில்லை என்று அதன் தலைவர் டான்ஶ்ரீ ஜூல்கிப்ளி அகமட் கூறினார். 

தேசிய முன்னணி மட்டுமே தனது கூட்டணி சார்பில் போட்டியிடவிருக்கும் வேட்பாளர்களின் பட்டியலை வெளியிட்டுள்ளதாக அவர் தெரிவித்தார். 

''தங்களின் கட்சியின் சார்பில் போட்டியிடவிருக்கும் வேட்பாளர்கள் ஏதேனும் ஊழலில் சம்பந்தப்பட்டுள்ளனரா, அல்லது அவர்களின் பின்னணியை தெரிந்துக் கொள்வதற்காக கட்சிகள் மலேசிய ஊழல் தடுப்பு ஆணையத்திடம் அப்பட்டியலை பகிர்ந்துக் கொள்ளும்'' என்றார் அவர். 

''தேசிய முன்னணி வேட்பாளர்களின் பின்னணி ஆராயப்பட்டு, அதன் தொடர்பிலான குறிப்புகளை நாங்கள் அக்கூட்டணிக்கு அனுப்பி வைத்து விட்டோம். இதன் பின்னர், அந்த வேட்பாளர்கள் அக்கட்சி சார்பில் போட்டியிடலாமா, வேண்டாமா? என்பதை அக்கட்சியே முடிவெடுக்கும்'' என்று ஜூல்கிப்ளி கூறினார். 

''எதிர்க்கட்சியினரும் தங்களின் வேட்பாளர்கள் பட்டியலை எங்களிடம் கொடுத்து, அவர்களின் பின்னணி குறித்து தெரிந்துக் கொள்ளலாம்' என்று அவர் சொன்னார். 

இதனிடையே, தேசிய முன்னணி அந்த ஆணையத்திடம் பகிர்ந்துக் கொண்ட பட்டியல் குறித்த விவரங்களைச் செய்தியாளர்களிடம் பகிர்ந்துக் கொள்ள ஜூல்கிப்ளி மறுத்து விட்டார்.  

கோலாலம்பூர், எப்ரல் 9 – தேசிய முன்னணியின் கொடிகளை ஒன்றாக அகற்றி கீழே தூக்கியெறிந்த ஒரு நபர் பற்றிய பரபரப்பான வீடியோ, சமூக ஊடகங்களில் பரவலாகியதை அடுத்து, இந்தச் சம்பவம் குறித்து போலீசார் புலன் விசாரணையைத் தொடங்கியுள்ளனர்.

கோலாலம்பூர் துன் டாக்டர் இஸ்மாயிலுள்ள ஜாலான் பகாருடின் ஹெல்மியில் இந்தச் சம்பவம் நேற்று நடந்துள்ளது. இது தொடர்பாக போலீசில் புகார் செய்யப் பட்டிருப்பதாக தலைநகர் போலீஸ் படைத் தலைவர் டத்தோஶ்ரீ மஸ்லான் லாஷிம் சொன்னார்.

பாரிசான் கொடிகளை அந்த நபர் அகற்றிய காட்சிகளை வீடியோவில் பதிவு செய்தவர், அங்கு பாரிசான் கொடிகளை நாட்டியவர் மற்றும் அம்னோ இளைஞர் பிரிவைச் சேர்ந்தவர்கள் ஆகியோர் இது குறித்துப் போலீசில் புகார் செய்திருக்கிறார்.

கொடிகளை அகற்றிய நபர் பற்றி தெரிந்தவர்கள் போலீசுக்கு தகவல் தந்து உதவும்படி கேட்டுக் கொண்டனர். குற்றவியல் சட்டத்தின் 427 ஆவது பிரிவின் கீழ் தவறான நோக்கத்துடன் சேதம் ஏற்படுத்தியதாக இந்தச் சம்பவம் குறித்து விசாரணை நடத்தப்பட்டுள்ளது.

மிகவும் ஆத்திரத்துடன் பாரிசான் கொடிகளை பிடுங்கி, அந்த நபர் தூக்கி எறித்ததை வீடியோவில் காண முடிந்தது என்பது குறிப்பிடத்தக்கது.

More Articles ...