பாலிக் புலாவ், அக்.5– அம்னோ மற்றும் பாஸ் கட்சிகள் ஒன்றாக இணைந்து செயல்படும் நாட்கள் வெகுதொலைவில் இல்லை என அம்னோ தகவல் தொடர்புத் தலைவர் டான்ஶ்ரீ அனுவார் மூசா கருத்துரைத்தார். 

அவ்விரு கட்சிகளின் சித்தாநங்கள் வேறுபட்டிருந்த போதிலும், அவர்களின் குறிக்கோள் ஒன்று. இவ்விரு கட்சிகளும் மலாய்க்காரர்கள் மற்றும் இஸ்லாத்தின் நலனில் அக்கறை காட்டும் இருவேறு கட்சிகள் என்று அவர் சுட்டிக்காட்டினார். 

"இவ்வளவு காலமாக, பாஸ் தன்னை வேறுமாதிரியாக காட்டிக் கொண்டிருந்தது. ஆனால், அக்கட்சியின் தலைமைத்துவத்தில் மாற்றங்கள் ஏற்பட்ட பிறகு, அம்னோ மற்றும் பாஸ் கட்சிகள் இடையிலான ஒற்றுமை மேலோங்கித் தெரிகிறது. ஒரே எண்ணத்துடன் செயல்படுவதால், அவ்விரு கட்சிகளும் ஒன்று செயல்படலாம்" என்றார் அவர். 

"அவ்விரு கட்சிகளும் ஒரே கட்சியாக என்றும் செயல்படாது. இருந்த போதிலும்,  இவற்றுக்கு இடையிலான கூட்டணியின் வாயிலாக பலருக்கு நன்மைகள் கிடைக்கலாம்," என்றார் அவர். 

அம்னோவில் பாஸ் இணையாது. அதேபோன்று, பாஸ் உடன் அம்னோ இணையாது. ஆனால் அவ்விரு கட்சிகளுக்கும் பெரிய வித்தியாசம் இல்லை. என்வே இவற்றுக்கு இடையே கூட்டணி ஏற்படலாம் என்று அவர் கருத்துத் தெரிவித்தார். 

"பொதுத்தேர்தல் வெகுதொலைவில் இல்லை. கூடிய விரைவில், இக்கட்சிகளுக்கு இடையில் கூட்டணி ஏற்படுமா, இல்லையா? என்பதை பொறுத்திருந்து பார்ப்போம்," என்றார் அவர். 

"முஸ்லிம் மற்றும் மலாய்க்காரர்கள் சந்தோஷம் அடையம் வகையில், கூடிய விரைவில் அம்னோ மற்றும் பாஸ் கட்சிகள் அறிவிப்பு ஒன்றை வெளியிடும்," என்று அவர் சொன்னார்.

 

 

 

கோலாலம்பூர், அக்.4- மியன்மாரில் இஸ்லாமிய சிறுபான்மை ரொகின்யா மக்களுக்கு எதிரான அடக்குமுறை கொடுமைகள் மீது விரிவான செயல் நடவடிக்கை திட்டங்களை வகுக்க 70க்கும் மேற்பட்ட அரசு சாரா அமைப்புகள் இன்று இங்கு ஒன்றுகூடின. 

இந்தோனிசியா, துருக்கி, பிரான்ஸ் மற்றும் மலேசியா உள்ளிட்ட நாடுகளைச் சேர்ந்த இந்த அமைப்புகள், இராணுவ அராஜகத்தில் ஈடுபட்டுள்ள மியன்மார் அரசாங்கத்திற்கு கடும் நெருக்கடி அளிக்கும் திட்டங்கள் குறித்து ஆராய்ந்தன.

இந்த அரசு சாரா அமைப்புகள், சொந்த நாட்டு அரசாங்கங்களின் ஆதரவைத் திரட்டும் முயற்சியிலும் ஊடகங்களின் ஆதரவைத் திரட்டும் முயற்சியிலும் ஈடுபடவுள்ளன. 

இதன் மூலம் மியன்மாருக்கு நெருக்குதல் அளிக்கக் கூடிய வழிகளை ஆராய்ந்து, செயல் திட்டங்களை அவை வகுத்துள்ளன என்று இந்த அமைப்புகளின் இணைத் தலைவர் மூவாமர் கடாபி ஜமால் தெரிவித்தார். 

சிறுபான்மை ரொகின்யா மக்களைக் காக்க, அனைத்துலகப் பொருளாதாரத் தடை உட்பட பல்வேறு வழிகளில் நடவடிக்கை எடுக்கப்படுவதற்கு அதிக நாடுகளுக்கு கோரிக்கை விடுக்கப்பட்டிருக்கின்றது என்றார் அவர்.

ரொகின்யா மக்களின் பிரச்சனைக்கு சாத்தியமான விரைவில் தீர்வு காண பல்வேறு நிலைகளில் நெருக்குதல் அளிப்பதே இந்தச் சந்திப்பின் நோக்கம் என்று முவமார் கடாபி சொன்னார்.           

 

 

 

கோலாலம்பூர், அக்.4- இரண்டு ஆண்டுகளுக்கு முன்பு வீதி ஆர்ப்பாட்டத்தில் கலந்து கொண்டதற்காக பெர்செ 2.0 தலைவர் மரியா சின், பெர்செ செயலாளர் மண்டீப் சிங் மற்றும் பாயான் பத்து நாடாளுமன்ற உறுப்பினர் சிம் சி சின் ஆகிய மூவரின் மீதும் மீண்டும் குற்றஞ்சாட்டப் பட்டுள்ளது. 

இம்மூவரும் வீதி போராட்டத்தில் ஈடுபட்டதற்காக கடந்த ஆகஸ்டு மாதம், விசாரணைக்கு உட்படுத்தப்பட்டு, அதன் பின்னர் வேறொரு மாஜிஸ்திரேட் நீதிமன்றத்தில் விடுவிக்கப்பட்டனர். 

இதனைத் தொடர்ந்து இவர்கள் மூவரின் மீதும் மீண்டும் குற்றச்சாட்டு சுமத்தப்பட்டுள்ளதை தொடர்ந்து, அக்குற்றச்சாட்டை மறுபரிசீலனை செய்யுமாறு இவர்கள் நேற்று கேட்டுக் கொண்டனர். 

பொருள் சேவை வரியை எதிர்த்தும், டத்தோஶ்ரீ அன்வார் இப்ராஹிமின் விடுதலைக்கு ஆதரவாகவும், 2015-ஆம் ஆண்டு மார்சு 28-ஆம் தேதியன்று வீதி ஆர்ப்பாட்டத்தில் ஈடுபட்டனர். 2012 அமைதியாக ஒன்றுகூடல் சட்டம் 4(2)(சி) பிரிவின் கீழ் இவர்கள் மீது இந்தக் குற்றச்சாட்டு கொண்டுவரப்பட்டுள்ளது.

 

 

கோலாலம்பூர், அக்.1- அடுத்து வரவிருக்கும் பொதுத்தேர்தலுக்கான தனது வேட்பாளர்களின் பட்டியலை பிரதமர் டத்தோஶ்ரீ நஜிப்பிடம் மஇகா சமர்ப்பித்துள்ளது என்று அதன் தேசியத் தலைவர் டத்தோஶ்ரீ டாக்டர் சுப்ரமணியம் அறிவித்தார்.

தேசிய முன்னணியின் தலைவருமான நஜிப், தாங்கள் சமர்ப்பித்திருக்கும் வேட்பாளர் பட்டியலை அங்கீகரிப்பார் என்று தாம் எதிர்பார்ப்பதாகவும் அதன் பின்னர் இந்தப் பட்டியல் மலேசிய லஞ்சத் தடுப்பு ஆணையத்திடம் சமர்ப்பிக்கப்பட்டு, வேட்பாளர்களின் பின்னணிகள் குறித்து அது ஆராயும் என்றும் டாக்டர் சுப்ரமணியம் தெரிவித்தார்.

ஒவ்வொரு தொகுதிக்கும் சில வேட்பாளர்களின் பெயர்கள் பிரதமரின் தேர்வுக்காக சமர்ப்பிக்கப் பட்டுள்ளன. இம்முறை இளம் வாக்காளர்களைக் கவரும் வகையில் புதுமுக வேட்பாளர்கள் இந்தப் பட்டியலில் இடம்பெற்றுள்ளனர்.

மேலும், சுங்கை சிப்புட் தொகுதி தொடர்பில் மஇகா முழு கவனத்தையும் செலுத்தும். பிரதமரின் வேட்பாளர் தேர்வானது, தேசிய முன்னணி சார்பில் ஒரே சீரான வேட்பாளர்கள் இடம்பெற வகைகாணும் என்று அவர் சொன்னார்.

வேட்பாளர்களின் பின்னணி குறித்து ஆராய்வதில் உதவும் வகையில் வேட்பாளர்கள் பட்டியல் தங்களிடம் சமர்ப்பிக்கப்பட்டால் அது பற்றி ஆராய்வோம் என அணமையில் லஞ்சத் தடுப்பு ஆணையத்தின் தலைவர் டான்ஶ்ரீ ஷுல்கிப்ளி அறிவித்திருந்தார். ஆனால், இதனை எதிர்க்கட்சிகள் ஏற்றுக்கொள்ளவில்லை என்பது குறிப்பிடத்தக்கது.

கோலாலம்பூர், அக்.1- 'நியூஜெனரேசன்' எனப்படும் புதிய தலைமுறை கட்சியும் 70க்கும் மேற்பட்ட அரசு சாரா இயக்கங்களும் சேர்ந்து நடத்திய மலேசிய சிறுபான்மையினரின் மேம்பாட்டு திட்டம் மீதான கலந்துரையாடலின் போது 14 அம்சப் பரிந்துரைகள் முன்மொழியப்பட்டன.

எதிர்க்கட்சி கூட்டணியான பக்கத்தான் ஹராப்பானிடம் இந்த 14 அம்ச பட்டியல் முன் வைக்கப்பட்டிருப்பதாக நியூஜென். கட்சியின் தலைவர் இராஜரத்னம் தெரிவித்தார்.

மேலும் அண்மையில் நடந்த அதன் நிர்வாக மன்றக் கூட்டத்தில் நியூஜென் கட்சியின் பெயர் மாற்றம் தொடர்பில் முடிவு எடுக்கப்பட்டது.சிறுபான்மை உரிமை செயல் கட்சி (மிரா) எனப் பெயர் மாற்றப்பட்டதோடு சிறுபான்மை மக்களின் உரிமைகளை மீட்டெடுக்க இக்கட்சி போராடும் என்று அவர் சொன்னார். 

அரசாங்க சார்பற்ற இயக்கங்களுடன் சிறுபான்மை உரிமை செயல் கட்சி இன்று காலை 10.00 மணி தொடங்கி மாலை 5.00 மணி வரைக்கும் கலந்துரையாடலை நடத்தியது.இந்நிகழ்வில் பல்வேறு பொது இயக்கங்களின் தலைவர்கள் கலந்து கருத்துப் பரிமாற்றம் செய்தனர்.

பின்னர் நடந்த நிகழ்ச்சியில் பி.கே.ஆர் கட்சியின் லெம்பா பந்தாய் தொகுதி எம்.பி.யான நூருல் இஷா, காப்பார் தொகுதி எம்.பி மணிவண்ணன், ஜசெகவைச் சேர்ந்த எம்.பி.குலசேகரன், பேரா சட்டமன்ற உறுப்பினர் சிவநேசன் ஆகியோர் கலந்து கொண்டு உரையாற்றினர். 

எதிர்வரும் பொதுத்தேர்தலில் தாங்கள், எதிர்க்கட்சி கூட்டணியான பக்காத்தான் ஹராப்பானுக்கு முழு ஆதரவு தெரிவிப்பதாக கூறிய கட்சியின் தலைவர் இராஜரத்னம், புத்ரா ஜெயாவின் ஆட்சி மாற்றமே தங்களின் முதன்மை இலக்காக இருக்கும் என்றார்.

அடுத்து வரும் தேர்தலில் தொகுதி ஒதுக்கீட்டை எதிர் பார்க்கிறீர்களா? என்று கேட்கப்பட்ட போது பிரசார ரீதியில் பக்காத்தான் ஹரப்பானுக்கு உதவுவது தான் எங்களின் நோக்கம் என்று அவர் சொன்னார். 

எங்களுக்குத் தொகுதி தரப்பட்டாலும், தரப்படாவிட்டாலும் எங்கள் ஆதரவைத் தருவோம். எதிர்க்கட்சி கூட்டணியில் ஐந்தாவது கட்சியாக எங்களைச் சேர்த்துக் கொள்ள வேண்டும் என்ற கோரிக்கை நாங்கள் முன்வைத்துள்ளோம். 

இந்தக் கோரிக்கை ஏற்கப்பட்டாலும் ஏற்படாவிட்டாலும் நாங்கள் ஆதரவு தருவதில் எந்த மாற்றமும் இல்லை. அதே வேளையில் எங்களை எதிர்க்கட்சி கூட்டணியில் இணைத்துக் கொண்டு என்களுக்கு தேர்தலில் போட்டியிடும் வாய்ப்பைத் தந்தால் அதனை ஏற்றுக் கொள்வோம் என்று இராஜரத்னம் சொன்னார்.

இந்தக் கலந்துரையாடல் கூட்டத்தில் உரையாற்றிய நூருல் இஷா, அடுத்த தேர்தலில் நாம் வெற்றி பெற வேண்டுமானால், கிராமங்கள்தோறும்- தோட்டங்கள்தோறும் கீழே இறங்கிச் சென்று மக்களைச் சந்திக்க வேண்டும். சாமான்ய மக்களின் நம்பிக்கையைப் பெறவேண்டும் என்றார். 

தட்டிக் கேட்க வேண்டிய நேரத்தில் தட்டிக் கேட்காமல் போனதால் தான் மலேசியா இந்தியர்கள் ஏராளமானவற்றை இழந்து விட்டனர். இழந்தவற்றை மீட்க தேசிய முன்னணியை ஆட்சியிலிருந்து இறக்குவது அவசியம் என ஜசெக சட்டமன்ற உறுப்பினர் சிவநேசன் சொன்னார். 

இன்றைய சூழலில் ஒவ்வொரு ஓட்டும் எங்களுக்கு முக்கியம். இராஜரத்னம் தலைமையிலான புதிய கட்சியை நாங்கள் வரவேற்கிறோம் என்று ஜசெக எம்.பி.குலசேகரன் குறிப்பிட்டார்.

பக்காத்தான் ஹராப்பானில் இந்தப் புதிய கட்சி அங்கம் வகிப்பது குறித்து கட்சித் தலைமையுடன் தாம் பேசப் போவதாகவும் அவர் சொன்னார். இந்தப் புதிய கட்சி பல்வேறு இடங்களில் பிரசாரக் கூட்டங்களை நடத்த வேண்டும். அதிகமான பெண்கள் குறிப்பாக, இந்தியப் பெண்கள் அரசியல் பங்கேற்பதற்கு ஒரு வாய்ப்பை இந்தப் புதிய கட்சி அடையாளம் காண வேண்டும் என்று குலசேகரன் வலியுறுத்தினார். 

கோலாலம்பூர், செப்.28- வடகொரியாவிற்குச் செல்ல மலேசியர்களுக்குத் தடை விதிக்கப்பட்டுள்ளது என்று வெளியுறவு அமைச்சு இன்று அறிவித்தது.

மறு அறிவிப்பு வரும் வரையில் கொரியக் குடியரசிற்கு மலேசியர்கள் பயணம் செய்வதற்கான தடை அமலில் இருக்கும் என்று வெளியுறவு அமைச்சு அறிக்கை தெரிவித்தது.

வட கொரியாவின் ஏவுகணை சோதனைகள் குறித்து நிலவி வரும் சர்ச்சைகள் காரணமாக இந்த முடிவு எடுக்கப்பட்டது என அமைச்சு தெரிவித்தது.

வடகொரியாவில் நிலைமை சீரான பின்னர், இந்தப் பயண தடை நீக்கப்படும் என்று விஸ்மா புத்ரா அறிவித்தது.

இந்த மாதத் தொடக்கத்தில் ஐ.நா. பொதுப் பேரவையில் தொடர்ச்சியாக விதித்த தடைகளை மீறி, வட கொரியா சமீப வாரங்களில், அணுவாயுத ஏவுகணைச் சோதனைகளைத் தொடர்ந்து நடத்தி வருகிறது.

கடந்த சனிக்கிழமை அமெரிக்க அதிபர் டொனால்ட் டிரம்ப், வடகொரியாவுக்கு எதிராக போர்ப் பிரகடனம் செய்திருப்பதாகக் குற்றஞ்சாட்டியுள்ள வட கொரியா, அமெரிக்க குண்டு வீச்சு விமானங்களைச் சுட்டுத்தள்ள தங்களுக்கு உரிமை உள்ளது என்று தெரிவித்துள்ளது.

 

காஜாங், செப்.25- மெர்டேக்கா தினத்திற்கு முதல் நாள் நடத்தப்பட்ட அதிரடி நடவடிக்கையில் கைது செய்யப்பட்ட 4 கட்டுமான பணியாளர்கள், அபு சயாப் பயங்கரவாதக் கும்பலுடன் தொடர்பு வைத்திருந்தனர் என இன்று செசன்ஸ் நீதிமன்றத்தில் குற்றஞ்சாட்டப்பட்டது.

இவர்களில் கடந்த 2010ஆம் ஆண்டு முதல் அபு சயாப் கும்பலில் ஈடுபட்டுவரும் 25 வயதான ஹஜார் அப்துல் முபினும் அடங்குவார். அபு சயாப் கும்பலின் முக்கிய புள்ளியான இவர் மீது குற்றவியல் சட்டம் பிரிவு 130-கே.ஏ.-இன் கீழ் குற்றம் சுமத்தப்பட்டது. குற்றம் நிருபிக்கப்பட்டால் ஆயுள் தண்டனையும் அபராதமும் விதிக்கப்படலாம்.

அவருடன் 52 வயதான அமாட் ஒமார், 26 வயதான ஜபார் அமாட் மற்றும் 25 வயதான அப்துல் ஷமிர் டப்லின் என்ற பிலிப்பைன்ஸ் பிரஜையும் கைது செய்யப்பட்டனர். 

பயங்கரவாதச் செயல் மீதான தகவல்கள் பிரசாரத்தில் ஈடுபட்டதாக குற்றவியல் சட்டப் பிரிவு 130-எம், கீழ் இவர்கள் குற்றஞ்சாட்டப்பட்டனர். இக்குற்றச்சாட்டு நிருபிக்கப்பட்டால் 7 ஆண்டுகளுக்கு மேல் சிறைத்தண்டனையும் அபராதமும் விதிக்கப்படலாம்.

அவர்கள் நால்வரும் குற்றவியல் சொஸ்மா சிறப்புச் சட்டத்தின் கீழ் கைது செய்யப்பட்டதால் ஜாமீன் அனுமதிக்கப் படவில்லை. வரும் அக்டோபர் மாதம் 16ஆம் தேதி உயர்நீதிமன்றத்தில் இந்த வழக்கு தொடர்ந்து விசாரணைக்கு வருகிறது.

More Articles ...