புந்தோங், ஏப்ரல்.7- 'கேமரன்மலை தொகுதிக்குள் நான் நுழையக்கூடாது என்கிறார்கள். மக்களைச் சந்திக்கக்கூடாது என்கிறார்கள் மஇகாகாரர்கள். அவர்களுக்கு நான் ஒன்றைச் சொல்லிக் கொள்கிறேன். அந்தத் தொகுதியில், அடுத்து வரும் பொதுத்தேர்தலில் நான்தான் போட்டியிடப் போகிறேன். முடிந்ததை பார்த்துக் கொள்ளுங்கள்' என்று மைபிபிபி கட்சியின் தேசியத் தலைவர் டான்ஶ்ரீ கேவியஸ் சவால்விடுத்தார்.
மக்களுக்குச் சேவை செய்வதில்தான் மைபிபிபி ஆர்வம் கொண்டுள்ளது வெற்று அறிக்கைகள் விடுப்பதை அல்ல என்றார் அவர். புந்தோங்கில் மைபிபிபி சேவை மையப் பணிகளை பார்வையிட்ட பின்னர் ஆதரவாளர்கள் மத்தியில் பேசிய போது அவர் மேற்கண்டவாறு சொன்னார்.
அவர் அப்போது மேலும் கூறியதாவது:
இந்திய சமுதாயத்திற்காக சேவை செய்யவேண்டும் என்று பணியில் ஈடுபடுகின்ற இந்தியத் தலைவர்களைத் தடுப்பதில் மஇகா ஈடுபடக்கூடாது. சேவை செய்பவர்களைத் தடுக்காதீர்கள்.
கேமரன் மலையைப் பொறுத்தவரை அது சுயேட்சை தொகுதி என்று ஏற்கெனவே மஇகா அறிவித்து விட்டது. டத்தோஶ்ரீ பழனிவேல் மீது கொண்ட விரோதத்தினால் கேமரன்மலை மக்களுக்குச் எந்தச் சேவையையும் செய்யாமல் தொகுதியை மஇகா ஒதுக்கிவைத்து விட்டது.
இந்நிலையில், கடந்த இரண்டு ஆண்டுகளாக அந்தத் தொகுதியிலுள்ள மக்களுக்கு நான் முடிந்தவரையில் இடைவிடாது சேவையாற்றி வருகிறேன். இப்போது நான் அங்கே வரக்கூடாது மக்களைச் சந்திக்கக்கூடாது என்றெல்லாம் அறிக்கை விடுக்கிறார்கள்.
இப்போது பகிரங்கமாக அவர்களுக்கு ஒன்றைச் சொல்லிக் கொள்கிறேன். அந்தத் தொகுதிக்கு நான் வருவேன். அந்தத் தொகுதியில் நான் போட்டி போடுவேன் முடிந்தால தடுக்கப் பாருங்கள்.
அந்தத் தொகுதியையும் புந்தோங் தொகுதியையும் மைபிபிபி கோரும். பிரதமரிடம் கோருவோம். முடிந்தால் தேசிய முன்னணிக் கூட்டத்தில் பிரதமர் முன்னனிலையில் அவர்கள் என்னிடம் பேசட்டும் பார்க்கலாம்.
புந்தோங் தொகுதியை பொறுத்தவரை இங்கு சேவை மையம் அமைத்து நாங்கள் பணிசெய்து வருகிறோம். அந்தச் சேவை மையம் இதுவரையில் சிறப்பான பணிகளைச் செய்துள்ளது. அந்தப் பணி தொடரவேண்டும்.
மைபிபிபி சேவை மையத்திற்கு முடிந்தால் ஒரு லட்சம் ரிங்கிட் வரை ஒதுக்க முனைவேன். அதைக் கொண்டு சேவை மையம் தனது பணியைச் சிறபாகத் தொடரட்டும். மேற்கண்டவாறு மைபிபிபியின் தேசியத் தலைவர் டான்ஶ்ரீ கேவியஸ் உரையாற்றிய போது தெரிவித்தார்.
