கோலாலம்பூர், மார்ச், 28- பிரதமர் நஜீப்புக்கும் முன்னாள் பிரதமர் துன் மகாதீர்க்கும் இடையேயான சச்சரவின் காரணமாக புரோட்டோன் தேசிய கார் நிறுவனம் ஆட்டங்காண தொடங்கியுள்ளது.

 

இதில் பணி புரியும் ஏராளமான ஊழியர்கள் தங்களின் வாழ்வாதாரத்தை இழக்கும் அபாயத்தில் உள்ளனர். அதேபோன்று கார் விற்பனை உரிமம் பெற்றவர்களும் கடும் பாதிப்பை எதிர் கொள்கின்றனர்.

 

புரோட்டன் கார் நிறுவனத்தை உருவாக்கியவர் முன்னாள் பிரதமர் துன் மகாதீர் ஆவார். தற்போது அதன் தலைவராக அவர் பொறுப்பு வகித்து வருகிறார்.

 

நஜீப்புக்கும் மகாதீருக்கும் இடையே வெடித்திருக்கும் கருத்து வேறுபாடு, காரணமாக புரோட்டோன் நிறுவனம் சிக்கலுக்கு உள்ளாகி இருக்கிறது.

 

அதன் கடன் சுமை பெருகி விற்பனை குன்றியுள்ள வேளையில், அந்நிறுவனம் தனக்கு ஏற்படுள்ள பிரச்சனையை தீர்க்க, அரசாங்கத்திடமிருந்து 1.47 பில்லியன் ரிங்கிட் நிதியுதவி கேட்டுள்ளது.

 

துன் மகாதீர்- நஜீப் சச்சரவினால் நிதியுதவி தடைபடலாம் என்ற அச்சம் தோன்றியுள்ளது. அரசு நிதியுதவி கிடைக்காத நிலையில், ஊழியர்கள் வேலை இழக்கலாம், அதற்குப் பொருள் விற்பனை செய்தவர்களுக்குப் பணம் கொடுக்க முடியாமல் போகலாம் எனச் செய்திகள் வெளியாகியுள்ளன.

 

ஊழியர்களிடமும் பொருள் விற்பனையாளர்களிடமும், மகாதீரா அல்லது நஜீப்பா? என்பதை முடிவு செய்து கொள்ளுங்கள் என்று கூறப்பட்டிருப்பதாக என்று உயர் அதிகாரி ஒருவர் தெரிவித்தார். அவர் தனது பெயரை தெரிவிக்க விரும்பவில்லை.

  

மகாதீரைப்  பலரும்  மதித்தாலும்  அவர் “இப்போது  அவர் ஒரு  தடங்கல்  என்ற  எண்ணம்  புரோட்டோனில் பெருகி  வருகிறது”  என்று  அந்த  உயர்  அதிகாரி ஒருவர் கூறினார்.

ஷா ஆலம், மார்ச் 28- ஷா ஆலமில் நடந்த 'மலேசியாவைக் காப்பாற்றுவோம்' என்ற கூட்டத்தில் தாம் கலந்து கொண்டதை வைத்து மஇகாவிலுள்ள இரண்டு அணிகளும் அரசியல் நடத்தவேண்டடாம் என்று  மஇகாவின் முன்னாள் தலைமைச் செயலாளர் டத்தோ எஸ்.முருகேசன் வலியுறுத்தினார்.

இது குறித்து அவர் வெளியிட்டுள்ள அறிக்கையில் கூறியிருப்பதாவது; 

நான் என் மனச்சாட்சிக்கு ஏற்ப, நாட்டின் நலனுக்கு எது நல்லது என்று நினைத்தேனோ, அதன்படியே நடந்து கொண்டேன். 

என்னுடைய இந்த நடவடிக்கைகளை டத்தோஶ்ரீ பழனிவேலின் தரப்பினருடன் தொடர்பு படுத்தி, அதன்வழி டாக்டர் சுப்ரமணியம் தரப்பு நாட்டின் எதிர் காலத்துடன் மீண்டும் ஓர் அரசியலை நடத்தியுள்ளது. அதேவேளையில், பழனியின் தரப்பினரும் என்னைச் சாடியிருக்கின்றனர்.

இரு தரப்புக்களுமே சச்சரவுகளை நிறுத்திக் கொண்டு நமது நாடு எதிர்நோக்கும் நெருக்கடி மற்றும் இந்திய சமுதாயத்தின் நலன்கள் ஆகியவற்றின் மீது கவனம் செலுத்தவேண்டும்.

மஇகாவின் அமைப்புச் சட்டத்தின் 91ஆவது பிரிவின்படி, நான் மஇகா உறுப்பினர் தகுதியிலிருந்து நீக்கப்படுவதாக டத்தோஶ்ரீ தேவமணி உடனடியாக அறிவித்திருக்கிறார். இதே விதியின் படிதான் பழனி மஇகா உறுப்பினரே அல்ல என்று அறிவித்தார்கள்.

எப்படிப் பார்த்தாலும், நான் மஇகா உறுப்பினராக இல்லை. டாக்டர் சுப்ரமணியம் தரப்பு நடத்திய கட்சித் தேர்தலின் போது என்னுடைய கிளை சார்பில் எனது வேட்புமனுவை நான் தாக்கல் செய்யவே இல்லை. அதேசமயம், பழனி தரப்பு நடத்திய கட்சித் தேர்தலை சங்கங்கள் பதிவகம் அங்கீகரிக்கவில்லை.

எனவே, நாட்டை நேசிக்கிற ஒரு பிரஜையாக நான் இருந்துவிடவே விரும்புகிறேன். மேற்கண்டவாறு டத்தோ முருகேசன் தெரிவித்தார்.

கோலாலம்பூர், மார்ச் 28- தேவையில்லாத அரசியல் சித்து விளையாட்டுக்களை டத்தோஶ்ரீ தேவமணி நிறுத்திக் கொள்ளவேண்டும் என்று பழனி தரப்பு தகவல் பிரிவுத் தலைவர் சிவசுப்பிரமணீயம் வலியுறுத்தினார். 

எதிர்க்கட்சியினர் ஷாஆலமில் நடத்திய பிரதமருக்கு எதிர்ப்பான கூட்டத்தில் முன்னாள் தலைமைச் செயலாளர் டத்தோ முருகேசன் கலந்து கொண் டிருப்பது குறித்து தேவமணி அறிக்கை வெளியிட்டிருப்பது பற்றி சிவ சுப்பிரமணியம் கருத்துரைத்தார்.

அவர் மேலும் கூறியிருப்பதாவது:

மஇகா தேசியத் தலைவர் டத்தோஶ்ரீ பழனிவேலின் ஏஜெண்டு போலவும் தூதுவர் போலவும் அந்தக் கூட்டத்தில், முருகேசன் கலந்து கொண்டார் என்பதாக, உண்மைக்குப் புறம்பான செய்தியை தேவமணி சொல்லியிருக்கிறார். உண்மையில் என்ன நடக்கிறது? என்று தேவமணிக்குத் தெரியாதா? தெரியாதது போல அவர் நாடகமாடக் கூடாது.  

டத்தோஶ்ரீ டாக்டர் சுப்பிரமணியமும் முருகேசனும் தனிப்பட்ட முறையில் பல இரகசியச் சந்திப்புக்களை நடத்துகின்றனர் என்பது  தேவமணிக்கு தெரியாமலா இருக்கும்?

ஒரு பேச்சுவார்த்தைக் கூட்டத்தைக் கூட சரிவர நடத்தி, ஒரு முடிவை எடுக்கத் தெரியாத தேவமணி, எதிர்த் தரப்பினரின் கூட்டத்திற்கு முருகேசன் சென்றதையும் எங்களையும் சேர்த்து வைத்துப் பேசுவதை நிறுத்திக் கொள்ள வேண்டும்.

அதுமட்டுல்ல, எங்களைப் பொறுத்தவரை எப்போதுமே நாங்கள் திட்டவட்டமாக பழனிவேலின் அணியினர் தான். அதே போன்று எங்களின் முழு மையான ஆதரவு பிரதமர் டத்தோஶ்ரீ நஜிப்புக்குத் தான். எனவே, முருகேசனின் விவகாரத்தை வைத்து அரசியல் குளிர் காய்வதை தேவமணி நிறுத்திக் கொள்ளவேண்டும். இவ்வாறு சிவசுப்பிரமணியம் தெரிவித்தார்.

கோலாலம்பூர், மார்ச் 28- ஷா ஆலமில் பிரதமர் டத்தோஶ்ரீ நஜிப்பிற்கு எதிராக நடந்த எதிர்க்கட்சித் தலைவர்களின் கூட்டத்தில் முன்னாள் மஇகா தலைமைச் செயலாளர் டத்தோ எஸ்.முருகேசன் கலந்து கொண்டதை மஇகாவின் தேசியத் துணைத் தலைவர் டத்தோஶ்ரீ எஸ்.கே.தேவமணி கண்டித்துள்ளார்.

டத்தோஶ்ரீ ஜி.பழனிவேலின் முக்கிய ஆதரவாளர்களில் ஒருவராகக் கருதப்படும் முருகேசன், இந்தக் கூட்டத்தில் கலந்து கொண்டிருப்பதானது, பழனிவேல் தரப்பு எதிர்க்கட்சிகளுடன் இரசிய உறவுகளை வைத்திருக்கிறது என்பதை மறு உறுதிப்படுத்துவதாக அமைந்துள்ளது என்று தேவமணி கூறியுள்ளார்.

அண்மைய காலமாகவே பழனிவேலின் அணியில் ஒரு முக்கிய உறுப்பினராக முருகேசன் திகழ்ந்து வருகிறார். ஜசெக தலைமைத்துவத்துடன் பழனிவேலின் தொடர்பு என்பது இரகசியமான ஒன்றல்ல என்று அவர் சொன்னார்.

பிரதமர் டத்தோஶ்ரீ நஜிப்புக்கு தாங்கள் வழங்கி வரும் ஆதரவு உண்மையானது என்றால், பழனிவேலுடனான தங்களின் தொடர்புகளை மைபிபிபியும் தேசிய முன்னணியின் இதர நண்பர்களும் நிறுத்திக் கொள்ளவேண்டும் என்று தேவமணி கேட்டுக் கொண்டார்.

பிரதமர் நஜிப்பின் தலைமைத்துவத்தின் கீழ் சிறந்த எதிர்காலத்தை நோக்கி இந்திய சமுதாயத்தை வழிநடத்துவதில் மஇகா மேற்கொள்ளும் முயற்சிகளை, பழனிவேலின் அரசியல் திசை திருப்பி விடக்கூடாது என்று தேவமணி குறிப்பிட்டார்.

ஷா ஆலம், மார்ச் 28- பின் விளைவுகள் பற்றிய அச்சம் ஏதுமின்றி, பிரதமர் நஜீப்பை பதவி விலக வலியுறுத்தும் பிரஜைகள் பிரகடனத்தில் கையொப்பமிட வேண்டும் என்று முன்னாள் பிரதமர் மகாதீர் முகமட் மலேசியர்களைக் கேட்டுக்கொண்டார்.

உண்மையான மக்கள் இயக்கத்திற்கான தேவை இப்போது ஏற்பட்டுள்ளது. குடிமக்கள் பிரகடனத்திற்கு இப்போது தேவைப்படுவது தைரியமிக்க மக்களை ஒன்றிணைத்து அதில் கையொப்பமிட வைப்பது தான் என்றார் அவர்.

மக்கள் அச்சம் கொண்டுள்ளனர் என்பதை ஒப்புக்கொண்ட மகாதீர், இதற்கான காரணம் தற்போதைய அரசாங்கம் மக்களை அச்சுறுத்துகிறது என்றார்.

“ஆக, மக்கள் இந்த அரசாங்கத்தைக் கண்டு பயப்படுகின்றனர். பிரகடனத்தில் கையொப்பமிடுவதற்கு மக்களைத் திரட்டுவது சிரமமாக இருக்கிறது”, என்று நேற்று அவர் செய்தியாளர் கூட்டத்தில் கூறினார்.

ஒரு மில்லியன் மக்களை அரசு கைது செய்வது என்பது சாத்தியமில்லாத ஒன்று என்றார் அவர்.

இவ்வாண்டின் இறுதிக்குள் ஒரு மில்லியன் கையொப்பங்கள் பெறப்படும் என்று அவர் நம்பிக்கை தெரிவித்தார்.

அதற்கு முன்னதாக கூட அந்த இலக்கை அடைய முடியும் என்று அவர் மேலும் கூறினார்.

கோல நெராங், மார்ச் 27- எதிர்க்கட்சித் தலைவர்களுடன் சேர்ந்து 'மலேசியாவைக் காப்பாற்றுங்கள்' இயக்கத்தின் கூட்டத்தில் கலந்து கொண்ட தற்காக டான்ஶ்ரீ முகைதீனுக்கும் டத்தோஶ்ரீ முக்ரிஷ் மகாதீருக்கும் எதிராக நடவடிக்கை எடுக்க வேண்டும் என்று தேசிய முன்னணிக்கும் அம்னோ வுக்கும் கோரிக்கை விடுக்கப்பட்டது.

பாகோ அம்னோ டிவிசன் தலைவரான முகைதீன் மற்றும் ஜெர்லுன் அம்னோ டிவிசன் தலைவரான முக்ரிஷ் ஆகியோரின் நடவடிக்கைகள், அவர் களை எதிர்க்கட்சியின் ஒருபகுதி என்றே கருத வேண்டியுள்ளது என்று அம்னோ உச்சமன்ற உறுப்பினரான டத்தோஶ்ரீ மட்ஷிர் காலிட் கூறினார்.

அவர்கள் கட்சியில் நீடிப்பதில் அர்த்தமில்லை. அம்னோவை நேசிப்பதாகக் கூறிக் கொள்ளும் அவர்களின் செயல்பாடுகள் அதற்கு நேர்மாறாக இருக் கின்றன என்று உயர்கல்வி அமைச்சருமான மட்ஷிர் காலிட் சொன்னார்.

அவர்கள் மீது தேசிய முன்னணி நடவடிக்கை எடுக்க வேண்டும். இந்த அளவுக்கு அவர்கள் போய்விட்ட பின்னர், அவர்கள் இனிமேலும் கட்சியில் இருக்கக் கூடாது என்றார் அவர்.

ஷாஆலம், மார்ச் 27- பிரதமரைப் பதவியிலிருந்து நீக்குவதற்கு கூட்டரசு அரசியல் அமைப்புச் சட்டத்தில் விதிகள் எதுமில்லை என்ற போதிலும், மக் களின் பிரகடனத்தின் அடிப்படையில் சுல்தான்கள் செயல்படமுடியும் என்று முன்னாள் பிரதமர் துன் மகாதீர் கூறினார்.

மக்களின் உணர்வுகள் என்ன என்பது அவர்களுக்குத் தெரிவிக்கப்பட வேண்டும். எனவே, தான் மக்கள், அந்தப் பிரகடனத்தில் கையெழுத்திட வேண் டும் என்று 'மலேசியாவை காப்பாற்றுவோம்' என்ற இயக்கத்தின் சார்பில் நடத்தப்பட்ட ஷா ஆலம் கூட்டத்தில் உரையாற்றிய போது துன் மகாதீர் கேட்டுக் கொண்டார்.

"சுல்தான்களின் அரண்மனைகளுக்கு நானே ஓட்டுகிற அளவில் ஒரு லோரி இருக்குமானால், மக்கள் பிரகடனங்களை லோரியில் ஏற்றிக் கொண்டு அரண்மனைக்கு கொண்டு செல்வேன்" என்று துன் மகாதீர் நகைச் சுவையாகக் குறிப்பிட்டார்.

இந்தப் பிரகடனத்திற்கு ஆதரவைத் திரட்டும் வகையில், மக்களை கையெழுத்திடச் செய்வதில் மிகச் சிரமம் இருக்கும் என்றும் ஏனெனில், தங்களின் அடையாளம் வெளிப்பட்டு விடுமோ என்று சிலர் அச்சம் கொள்ளக்கூடும் என்றும் அவர் சொன்னார்.

மக்களின் கையெழுத்தைப் பெறுவது கடினம் தான். நான் அவர்களுக்கு இருக்கும் அச்சத்தைப் புரிந்து கொள்கிறேன். ஆனால், அத்தகைய அச்சம் அடிப்படையற்றது என்றார் அவர்.

அண்மையில் துன் மகாதீர் தலைமையில் பிரதமர் நஜிப்பை பதவியிலிருந்து அகற்றுவதற்காக மக்கள் பிரகடனம் என்ற கொள்கைத் திட்டம் அறிவிக்கப்பட்டது என்பது குறிப்பிடத்தக்கது.

 

More Articles ...