ஈப்போ, ஏப்ரல் 21- மலேசியாவில் இனவாதம் உருவாக பன்மொழி கல்வி முறைத் திட்டமே காரணம் என்று கூறுவது சரியல்ல என்று ஈப்போ பாராட் நாடாளுமன்ற உறுப்பினரும் ஜசெகவின் தேசிய உதவித் தலைவருமான எம்.குலசேகரன் வலியுறுத்தினார்.

மலேசியாவில் இனவாதத்தை ஒழிக்க ஒரே மொழிக் கல்வித் திட்டம் அமல் படுத்தப்படவேண்டும் என்று யூகேஎம் எனப்படும் மலேசிய தேசியப் பல்கலைக் கழகத்தின் நன்னெறிக் கல்வித் துறையின்  பேராசிரியர் தியோ கொக் சியோன் என்பவர் கோரிக்கை விடுத்திருந்தார். 

இந்தக் கருத்து தவறானது. ஏற்கமுடியாதது என்று குலசேகரன் குறிப்பிட்டார். 

பன்மொழிக் கல்வி முறையே மலேசியாவில் நிலவும் இனவாதத்திற்கு காரணம் என்ற கருத்து, ஒட்டுமொத்தமாகவே தவறானது. எனவே, இப்பிரச்சனைக்கு, ஒரே மொழிக் கல்வி முறை ஒரு தீர்வாக அமையாது என்று பத்திரிகை அறிக்கை ஒன்றில் குலசேகரன் அறிவுறுத்தினார்.

யதார்த்தங்களுக்கு அப்பால் இருந்து கொண்டு சிந்திப்பதை நிறுத்தவேண்டும். மாறாக, இந்நாட்டில் உண்மையில் இனவாதம் அதிகரித்தற்கான காரணத்தை துணிச்சலாக ஆராயவேண்டும் என்று பேராசிரியர் தியோவுக்கு நான் ஆலோசனை கூறுவேன் என்றார் குலசேகரன்.

அவர் விடுத்துள்ள பத்திரிகை அறிக்கையில் மேலும் கூறியிருப்பதாவது: இந்நாட்டில் இனவாதம் தலைதூக்கியதற்கு மிகப் பெரிய காரணங்களாக, இனவாத அரசியல், இனவாதக் கொள்கை, மற்றும் இனவாதப் பேச்சுகள் விளங்கிவருவது அவருக்குத் தெரியவில்லையா?

முக்கியமான- உண்மையான காரணங்களைக் குறிவைப்பதை விடுத்து, தாய்மொழிப் பள்ளிகள் மற்றும் சமயப் பள்ளிகள் மீது ஏன் அவர் குறி வைக்க வேண்டும்? 

கடந்தகால மற்றும் தற்போதைய அரசாங்கத் தலைவர்கள், எதிர்க்கட்சித் தலைவர்கள் பலர், தாய்மொழிப் பள்ளிகளில் படித்தவர்கள் என்பது பேராசிரியர் தியோவுக்கு தெரிந்திருக்கவேண்டும். இந்தக் கல்விப் பின்னணியைக் கொண்டு, இந்த தலைவர்களிடையே யார் யார் இனவாதி என்பதை அவரால் சுட்டிக்காட்ட முடியுமா? என்று நான் அவருக்கு சவால் விடுகிறேன்.

மொழி, ஒருவரை இனவாதியாக ஆக்குவதில்லை. மொழி, மக்களைப் பிரிப்பது இல்லை. பேராசிரியர் தியோவைப் போன்று ஒரே மொழிப் பள்ளிகளுக்காக வக்காலத்து வாங்குகிறவர்கள், நாட்டில் இனவாதத்தையும் ஒற்றுமை இன்மையையும் ஏற்படுத்துவது தாய்மொழிப் பள்ளிகள் தான் என்று பழிபோடுவதை நிறுத்திக் கொள்ளவேண்டும்.

மலாய்க்காரர்கள் அல்லாத பெற்றோர்கள் தங்களின் பிள்ளைகளைத் தாய்மொழிப் பள்ளிகளுக்கு அனுப்புவதற்கு பல காரணங்கள் உள்ளன. அதேபோன்று, இந்தப் பெற்றோர்களில் பலர் தங்களின் பிள்ளைகளை தேசியப் பள்ளிகளுக்கு அனுப்பாதற்கும் பல காரணங்கள் உள்ளன.    

மலேசிய அரசியல் சாசனத்தினால், கல்வி கற்கும் உரிமையும் தாய்மொழிக் கல்வி உரிமையும் பாதுகாக்கப்பட்டிருக்கிறது என்பதை பேராசிரியர் தியோ உணரவேண்டும். மக்களின் உரிமையை அவர் மதிக்க வேண்டும். தாய் மொழிப் பள்ளிகள் அகற்றப்பட்டால், அது நாட்டில் இன்னும் அதிகமான ஒற்றுமை இன்மையையே ஏற்படுத்தும் என்பதை பேராசிரியர் தியோ புரிந்து கொள்ளவேண்டும். 

மேற்கண்டவாறு ஈப்போ பாராட் எம்.பி.யான எம்.குலசேகரன்,  பத்திரிகைகளுக்கு விடுத்த அறிக்கையில் கூறியுள்ளார்.

 

 

 

 

கோலாலம்பூர்,  20 ஏப்ரல்- இவ்வாண்டுக்கான முதல் காலாண்டில் பதிவு செய்த புதிய வாக்காளர்கள் மற்றும்  முகவரி மாற்றிய வாக்காளர்கள் 111,333  பேரின் பெயர்களை நாளை வெளியிட  உள்ளது.  

இந்த புதிய பட்டியல்  நாளை முதல் மே 4-ஆம் தேதி வரை  நாடு முழுவதிலும் 963 இடங்களில் ஒட்டி வைக்கப்படும்  என தேர்தல் ஆணையம் தெரிவித்துள்ளது.    

இதில் 88,078 பேர் புதிய வாக்காளர்கள் என்றும், 23,255 பேர்  முகவரியை மாற்ற கோரி விண்ணப்பம் செய்துள்ளதாகவும் தேர்தல் ஆணையத்தின் தலைவர் டத்தோ கானி சாலே  தெரிவித்தார். 

கோலாலம்பூர்,ஏப்ரல் 20 - எதிர்வரும் சரவாக் பொதுத்தேர்தலுக்குப் பின்  நாட்டின் முன்னாள் பிரதமர்  டத்தோ துன் டாக்டர் மகாதீர் முகமது   கைது செய்யப்படலாம் என  முன்னாள் சட்டத்துறை அமைச்சர்  சாயிட் இப்ராஹிம் தெரிவித்துள்ளார். 

 கிளந்தானில் பார்ட்டி அமானா நெகாராவைச் சேர்ந்த   சுமார்  300   தன்னார்வலர்களுடனான கேள்வி பதில் அங்கத்தில் கலந்துகொண்ட   சாயிட் இப்ராஹிம் இவ்வாறு தெரிவித்தார்.

பிரதமர் நஜிப் துன் ரசாக்கை ஆட்சியிலிருந்து கவிழ்ப்பதற்காகப் பல்வேறு முயற்சிகள் மேற்கொள்ளப்பட்டுவருவதாக நடப்பு அரசாங்கம் கூறி வரும் போதிலும்,  துன் டாக்டர் மகாதீர் நஜீப் மீதான கடும்  விமர்சனங்களைத் தொடர்ந்து  வெளியிட்டு வருகிறார். 

 முன்னதாக, துன் டாக்டர்    மகாதீர்  முகமது மீது 4  விசாரணைகள் முடுக்கிவிடப்பட்டுள்ளதாக அரச மலேசிய காவல்படைத் தலைவர் டான் ஶ்ரீ காலிட் அபு பாக்கார் தெரிவித்தார். 

  எனினும்,  90 வயதான துன் டாக்டர் மகாதீர் கைது செய்யப்படுவாரேயானால், ஆளுங்கட்சிக்கு மலாய்க்காரர்களிடையே செல்வாக்கு குறையும் என அரசியல் பார்வையாளர்கள் கருதுகின்றனர். 

இதனிடையே இந்த கேள்வி பதில் அங்கத்தில், மகாதீரை நம்பலாமா என கேள்வி எழுப்பப்பட்டது. இக்கேள்விக்குப் பதிலளித்த சாயிட்,  "அவர் எங்களோடு இருக்கும் வரை அவரை நம்பலாம். துன் அப்துல்லா அஹ்மாட் படாவியைப் போல் அல்லாமல் நடப்பு பிரதமரை அவர் காரசாரமாக விமர்சித்து வருகிறார். எதிர்வரும் சரவாக் தேர்தலுக்குப் பிறகு துன் டாக்டர் மகாதீர்  கைது செய்யப்பட்டாலும் ஆச்சர்யப்படுவதற்கில்லை" என சாயிட் இப்ராஹிம் தெரிவித்தார். 

கோலாலம்பூர்,   19 ஏப்ரல்-    பிரதமர் டத்தோ ஶ்ரீ நஜீப் துன் ரசாக்கின்  2.6 பில்லியன் ரிங்கிட் மதிப்பிலான சொத்துக்களை முடக்குவது  தொடர்பில் நாட்டின் முன்னாள் பிரதமர் துன் டாக்டர்  வழக்கு தொடர்ந்துள்ளார்.  

91 வயதான துன் டாக்டர் மகாதீர், பத்து காவான் அம்னோ துணைத் தலைவர் அபு ஹசான்  மற்றும் லங்காவி அம்னோ   உறுப்பினர் அனினா சாவுடின் ஆகியோரோடு   இணைந்து, பிரதமர் டத்தோ ஶ்ரீ நஜிப் துன் ரசாக்கின் சொத்துக்கள்,  கிரெடிட்டுகள், அவர் வங்கியில் வைத்திருக்கும்  பணம் மற்றும் சொத்துக்கள்,  மற்றும் நிறுவன பங்குகள் ஆகியவற்றை  முடக்க வேண்டும் என தமது வழக்கு மனுவில் குறிப்பிட்டுள்ளார். 

கோலாலம்பூர், ஏப்ரல் 18- 70 லட்சம் அமெரிக்கா டாலர் தொடர்பான நிதி விவகாரத்தில், விசாரணை சுதந்திரமாக நடைபெறுவதை அனுமதிக்கும் பொருட்டு சி.ஐ.எம்.பி. வங்கியின் தலைவரான நஸிர் துன் அப்துல் ரசாக் விடுப்பு எடுத்துக் கொண்டுள்ளார்.

இந்தத் தகவலை, தமது 'இன்ஸ்டாகிராம்' பதிவில் ஏர்ஆசியா தலைமை நிர்வாகச்செயல் அதிகாரி டான்ஶ்ரீ டோனி பெர்ணான்டஸ் தெரிவித் திருக்கிறார். இவர், நஸிர் துன் ரசாக்கின் நெருங்கிய நண்பர் என்பது குறிப்பிடத்தக்கது. 

இந்த நிதி குறித்து விவரமாக எதனையும் டோனி பெர்ணான்டஸ் தெரிவிக்கவில்லை. எனினும், நஸிரின் சகோதரரான பிரதமர் நஜிப் துன் ரசாக்கின் சார்பில் நஸிர் பரிமாற்றம் செய்த தொகையைப் பற்றித் தான் டோனி பெர்ணான்டஸ் குறிப்பிட்டுள்ளார் என்று கருதப்படுகிறது.

சி.ஐ.எ.ம்பி. ஹோல்டிங்ஸ் குழுமத்தின் 59ஆவது ஆண்டுக் கூட்டப் படத்தை வெளியிட்டு, அதனுடன் கீழ்கண்ட விளக்கக் குறிப்பை டோனி பெர்ணான்டஸ் இணைத்துள்ளார். 

அந்தக் குறிப்பு இப்படி விவரிக்கிறது; "7 மில்லியன் (70லட்சம்) அமெரிக்க டாலர் பணம் பரிமாற்றம் தொடர்பிலான விசாரணை, சுதந்திரமாக நடப்பதை அனுமதிக்கும் நோக்கில், சி.ஐ.எம்.பி. வங்கித் தலைவர் நஸிர் ரசாக் சுயமாகவே இன்று முதல் விடுப்பில் செல்வதானது ஓர் உயர்வான செயல்" என்று டோனி பெர்ணான்டஸ் குறிப்பிட்டிருக்கிறார்.

தம்முடைய சகோதரர் நஜிப்பிடமிருந்து அந்தப் பணத்தை நஸிர் பெற்றுள்ளார் என்று வால் ஸ்த்ரீட் ஜெர்னல் என்ற பத்திரிகை கூறியிருந்தது. இந்தப் பணம் கட்சித் தலைவர்களின் உத்தரவின் பேரில் ஆளும் கட்சித் தலைவர்களுக்கு பரிமாற்றம் செய்யப்பட்டது.

ஆனால், தேர்தலுக்காக மலேசிய நிறுவனங்களிடமிருந்தும் தனிநபர்களிடமிருந்தும் திரட்டப்பட்ட நன்கொடை மூலம் கிடைத்ததே இந்தப் பணம் என்று தாம் நம்பியதாக வால் ஸ்த்ரீட் ஜெர்னலிடம் நஸிர் கூறினார். 

இருப்பினும், இந்த விஷயத்தில் நஜிப்பிற்கு உதவியிருக்கக் கூடாது என்று தாம் இப்போது நினைப்பதாகவும் பின்னர் நஸிர் சொல்லியிருந்தார்.   

சட்டப்பூர்வமாக திரட்டப்பட்ட அரசியல் நிதியிலிருந்தே அந்தப் பணம் வந்தது என்று தான் நினைப்பதாகவும் என்றும் அந்தப் பணம் முழுவதும், குறிப்பிட்டபடி வினியோகிக்கப்பட்டு விட்டது என்றும் நஸிர் முன்பு கூறியிருந்தார்.

மூவார், ஏப்ரல் 16- பிரதமர் பதவியிலிருந்து டத்தோஶ்ரீ நஜிப் விலகும் வரையில் தாம் நெருக்குதல் கொடுப்பதை நிறுத்தப் போவதில்லை என்று முன்னாள் துணைப் பிரதமர் டான்ஶ்ரீ மொகிதின் யாசின் கூறினார்.

தொடர்ந்து சுமைகளுக்கு உள்ளாவதில் இருந்து நாட்டைக் காப்பாற்ற வேண்டும். குறிப்பாக 1எம்டிபி நிறுவனத்தால் ஏற்பட்ட இழப்பில் இருந்து நாட்டைக் காப்பாற்ற நஜிப்பின் வெளியேற்றம் அவசியம் என்று அவர் தெரிவித்துள்ளார்.

'என்னுடைய முயற்சியில் நான் வெற்றி பெறுவேனா? என்று சிலர் என்னிடம் கேட்கிறார்கள். நான் வெற்றி பெறுவேனா, இல்லையா? என்பது முக்கியமல்ல. ஆனால், மக்கள் நஜிப்பை அப்படியே விடுவிடக் கூடாது. 

அப்படி விட்டுவிட்டால், அவர் கடைசி வரையில் அந்தப் பதவியில் நீடிப்பார் என்று மூவாரில் நடந்த பொதுக் கூட்டத்தில் பேசிய போது மொகிதின் குறிப்பிட்டார்.

மேலும், நஜிப் பதவியிலிருந்து வெளியேற வேண்டும் என்று எதற்காக நெருக்குதல் அளிக்கப்படுகிறது என்பதை மக்கள் தெரிந்து வைத்திருக்க வேண்டியது முக்கியம் என்றும் அவர் வலியுறுத்தினார்.

 

 

கோலாலம்பூர், ஏப்ரல் 16- முன்னாள் பிரதமர் டாக்டர் மகாதீருக்கும் பிரதமர் நஜிப்புக்குமிடையிலான சர்ச்சையில் நடைபெறும் தகராற்றில் தாம் எத்தரப்பையும் ஆதரிவிக்கவில்லை என்பதை குவா மூசாங் எம்பி துங்கு ரசாலி ஹம்சா மீண்டும் வலியுறுத்தினார்.

ஆனால், தாம் எப்போதும் ‘கட்சி ஆள்’என்றும் அம்னோ சட்டத்தை மீறாதவரை தம் ஆதரவு அம்னோவுக்குத்தான் என்றும் அவர்  சொன்னார்.

“நான் யாரையும் ஆதரிக்கவில்லை. நான் அம்னோ உறுப்பினர். என் ஆதரவு கட்சிக்குத்தான். மகாதீருக்கும் நஜிப்புக்கும் இடையே கருத்து வேறுபாடு இருக்கலாம், அதற்காக இப்போது கட்சியில் இல்லாத ஒருவரை எப்படி நான் ஆதரிக்க முடியும்? 

“அம்னோ என்ன தீர்மானம் செய்கிறது என்று பார்ப்பேன். நான் ஒரு எம்பி, கூட்டரசு அரசியலமைபைக் காப்பதாக சத்திய பிரமாணம் செய்திருக்கிறேன், உண்மைக்கு எதிரானவர்களையும், எதிரான தீர்மானங்களையும் ஆதரிக்க மாட்டேன்”, என்று துங்கு ரசாலி கூறினார்.

More Articles ...