கோலாலம்பூர், 9 ஆகஸ்டு-  இன்று கூடிய பேரா சட்டமன்றக் கூட்டத்தில்  தேசிய முன்னணி சார்பில் முன்மொழியப் பட்ட  முன்னாள் பேரா மாநில ம.இ.கா  மகளிர் பிரிவு தலைவியும், வழக்கறிஞருமான  திருமதி. தங்கேஸ்வரி சட்டமன்ற சபாநாயகராகத் தேர்ந்தெடுக்கப்பட்டார்.   

அண்மையில் நடைபெற்ற அமைச்சரவை மாற்றத்தின் போது,  பேரா மாநில சட்டமன்ற சபாநாயகராகத் திகழ்ந்த  டத்தோ ஶ்ரீ எஸ்.கே தேவமணி துணையமைச்சராக நியமிக்கப்பட்டதையடுத்து,  அப்பதவி திரும்பவும் ம.இ.கா உறுப்பினர் ஒருவருக்கே அளிக்கப்பட்டுள்ளது, குறிப்பிடத்தக்கது. 

இந்த நியமனம்  குறித்து ம.இ.கா துணைத்தலைவர் டத்தோ ஶ்ரீ  எஸ்.கே தேவமணியும், தேசிய மகளிர் பிரிவு தலைவி மோகனா முனியாண்டியும்  திருமதி தங்கேஸ்வரிக்கு வாழ்த்துக்களைத் தெரிவித்துக்கொண்டனர். 

பெட்டாலிங் ஜெயா,  9 ஆகஸ்டு- முன்னாள் துணைப்பிரதமரான டான் ஶ்ரீ முகிதின் யாசின்  பார்ட்டி பெரிபூமி பெர்சத்து எனும் பெயரில் புதிய கட்சியை இன்று பதிவு செய்கிறார். 

 "பெர்சத்து" எனும் சுருக்கமான பெயரில் அழைக்கப்படும் அந்த கட்சிப் பதிவுக்கான ஆவணங்கள் அனைத்தும், இன்று பிற்பகல் 3.30 மணிக்கு  புத்ராஜெயாவிலுள்ள சங்கங்களின் பதிவிலாகாவில் சமர்ப்பிக்கப்படும் என அக்கட்சியின் உயர்மட்ட உறுப்பினர்களுள் ஒருவரான ஷேட் சாடிக் ஷேட் அப்துல் ரஹ்மான் தெரிவித்தார்.  

மேலும் செய்திகள் விரைவில்..

கோலாலம்பூர், ஆக.8- 'கிளிங்' என்ற வார்த்தையைப் பயன்படுத்தியதற்காக முன்னாள் பிரதமர் துன் மகாதீர் மன்னிப்புக் கேட்க வேண்டுமென்று மஇகா மகளிர் பகுதி வலியுறுத்தியது. பிரதமராக இருந்த காலத்தில் இந்திய சமுதாயத்தின் சமூகப் பொருளாதார மேம்பாட்டினை புறக்கணித்தவர் டாகடர் மகாதீர் என அது சாடியது.

நியாயமற்ற முறையில் துன் மகாதீர் நடத்தியதன் விளைவாக, நாட்டின் மேம்பாட்டு நீரோட்டத்தில் இளம் மலேசிய இந்திய இளைஞர்கள் பின் தங்க நேர்ந்து விட்டது என்று மஇகா மகளிர் பிரிவின் தேசியத் தலைவி மோகனா முனியாண்டி அறிக்கை ஒன்றில் கூறியுள்ளார்.

இருப்பினும், பிரதமர் நஜிப், இந்திய சமுதாயத்திற்கு உதவிகள் புரிந்து, ஆக்கரமான சமூகப் பொருளாதார மேம்பாட்டைக் கொண்டு வந்துள்ளார் என்றார் அவர்.

இரண்டு மாதங்களுக்கு முந்தைய வீடியோ ஒன்றில், 'கிளிங்' என்ற வார்த்தையைப் பயன்படுத்தி இருக்கும் டாக்டர் மகாதீர் மன்னிப்புக் கேட்கவேண்டும். அதற்காக மட்டுமின்றி, பிரதமராக தாம் பொறுப்பு வகித்த காலக்கட்டத்தில், ஒட்டுமொத்த இந்திய சமுதாயத்தையும் நியாயமற்ற முறையில் நடத்தியதற்காகவும் அவர் மன்னிப்புக் கேட்கவேண்டும் என்று மோகனா முனியாண்டி வலியுறுத்தினார்.

டாக்டர் மகாதீர் மிகவும் மந்தமாகி விட்டார். அவர் என்ன சொல்கிறார் என்பது அவருக்கே தெரிவதில்லை. அவரது அறிக்கைகள் வேடிக்கையாக இருக்கின்றன. மகாதீரின் உண்மையான குணம் என்ன என இந்திய சமுதாயம் கண்டு கொண்டு விட்டது. எனவே அவரால் இந்திய சமுதாயத்தின் ஆதரவைப் பெறவே முடியாது என்று மோகனா முனியாண்டி தெரிவித்தார்.

 

 

 

கோலாலம்பூர், ஆகஸ்டு 8- முன்னாள் பிரதமர் துன் டாக்டர் மகாதீர் முகமட்டின் புதிய கட்சியினால் நன்மை விளையாது. மாறாக நாட்டில் பிரிவினை தான் உண்டாகும் என மசீச கூறியுள்ளது. 

மசீசவின் சமய நல்லிணக்க பிரிவின் செயலாளர் கிரீஸ் டேனியல் வோங் கூறுகையில், மலேசியாவின் பொருளாதார வளர்ச்சிக்கு மகாதீரின் பங்களிப்பு பெரியது என்பதை நாங்கள் அறிவோம். ஆனால், அவரின் லட்சியத்தை அடைய அவர் பிரித்தாளும் கொள்கையைப் பயன்படுத்தினார். இதனை சீன சமூகம் துல்லியமாக கண்டுள்ளது" என அவர் கூறினார். 

"மகாதீரின் ஒரே இனத்தைச் சார்ந்த கட்சி நாட்டைக் கூறுப்போட்டு விடும். அதோடு, இளம் வாக்காளர்கள் இனம் சார்ந்த கட்சியை விரும்பாத காலகட்டத்தில் மகாதீர் கட்சி அமையவிருக்கிறது" என்று அவர் மேலும் கூறினார்.

நாட்டு மக்களிடையே ஒற்றுமையை வளர்க்காமல் பிரிவினையை உண்டாக்கும் கட்சியைக் கண்டு மக்கள் ஏமாறக்கூடாது என மேலும் கூறினார். இனவாதம் புதிய வடிவில் உருவாகியுள்ளது. மக்கள் விழிப்புணர்வு கொண்டு தொடக்கத்திலேயே அதனை நிராகரிக்க வேண்டும் என அவர் மேலும் கூறினார். 

கோத்தா பாரு,  ஆகஸ்டு 8- ஹுடுட் சட்டத்தின் படி கையை வெட்டுவது   குரூரமான தண்டனை அல்ல. மாறாக சமுதாயத்தைக் காப்பாற்றவே  இத்தண்டனை வழங்கப்படுகிறது என   கிளந்தான் மாநிலத்தின்  துணை மந்திரி புசார்   டத்தோ முகமது அமார் அப்துல்லா தெரிவித்தார்.   

"நீரிழிவால் பாதிக்கப்பட்ட ஒருவரது மணிக்கட்டை வெட்டுவது ஒரு மருத்துவரைப் பொறுத்தவரை சரியான செயலே. நோயாளியின் உயிரைக் காப்பாற்ற  மருத்துவர் செய்யும் அந்த செயலுக்காக யாரும் அவரை குற்றஞ்சாட்ட முடியாது.   அதேபோல் தான் ஷரியா குற்றவியல் சட்டத்தின் படி, சமுதாயத்தைக் காப்பதற்காக இந்த தியாகத்தை நாம் செய்ய வேண்டியுள்ளது" என அவர் தமது முகநூல் பக்கத்தில் பதிவு செய்துள்ளார். 

"இஸ்லாம், மனிதநேயமற்ற   தண்டனை முறைகளை வழங்குவதாக மேற்கத்திய நாடுகள் தொடர்ந்து குற்றஞ்சாட்டி வருவதைச் சுட்டிக்காட்டிய அவர்,  ஆனால்  இஸ்லாமிய முறைப்படி இது நியாயமான தண்டனை தான் என அவர் கூறினார். 

கிளந்தானில்,  தமது தலைமையிலான அரசாங்கத்தில் ஹுடுட் சட்டத்தை அமல்படுத்துவதில் பாஸ் கட்சி தொடர்ந்து தீவிரம் காட்டி வருகிறது என்பது குறிப்பிடத்தக்கது.  

ஈப்போ, ஆக.8- பேரா சபாநாயகர் பதவிக்கு தேசிய முன்னணி சார்பில் யாரை முன்மொழியப் போகிறோம் என்பதை நாளை சட்டமன்றம் கூடும் போது தான் அறிவிப்போம் என்று மந்திரிபுசார் டத்தோஶ்ரீ ஜம்ரி தெரிவித்தார்.

யார் சபாநாயகர் பதவிக்கான வேட்பாளர் என்பதை பேரா தேசிய முன்னணி இன்னமும் அறிவிக்காமல் இருக்கிறது என்பது தொடர்பாக அம்மாநில ஜசெக அண்மையில் போலீசில் புகார் ஒன்றைச் செய்திருக்கிறது. 

இது தொடர்பாக நிருபர்கள் கேள்வி எழுப்பிய போது, அதற்குப் பதிலளித்த மந்திரிபுசார் டாக்டர் ஜம்ரி, அவ்வாறு முன்கூட்டியே அறிவிக்க வேண்டிய கட்டாயம் கிடையாது, சட்டமும் கிடையாது என்று கூறினார்.

சட்டமன்றம் கூடுவதற்கு 7 நாள்களுக்கு முன்பே சபாநாயகர் யார் என்பதற்கான பெயரைத் தாங்கள் சட்டமன்றச் செயலாளரிடம் வழங்கி விட்டதாகவும் அவர் யார் என்பதை நாங்கள் தான் அறிவிக்கவேண்டும் என்பதில்லை என்றும் அவர் சொன்னார்.

நாளை சட்டமன்றம் கூடுகிறது.. அப்போது அறிவிப்பு வரும். அதுவரை பொறுத்திருங்கள். அந்தப் பதவி மீண்டும் மஇகா பிரதிநிதிக்குத்தான் வழங்கப்படும் என்று அவர் தெளிவுப்படுத்தினார்.

எதிர்க்கட்சிகளின் சார்பில் முன்னாள் சபாநாயகர் சிவக்குமார் முன்மொழியப்பட்டுள்ளார் என்று ஜசெக அறிவித்திருப்பதோடு, அவ்வாறு தங்களின் வேட்பாளர் பெயரை தேசிய முன்னணி அறிவிக்காமல் தாமதிப்பதை எதிர்த்துப் போலீஸ் புகாரையும் செய்துள்ளனர் என்பது குறிப்பிடத்தக்கது.

ஈப்போ, ஆக.8- பேரா மாநில வரலாற்றில் முதன் முறையாக 7 கிராமங்களுக்கு இந்தியர்கள் கிராமத் தலைவர்களாக நியமிக்கப் பட்டுள்ளனர். அதிகமான இந்தியர்களைக் கொண்ட இந்தக் கிராமங்களுக்கான தலைவர் பதவிகளுக்கு நியமிக்கப்பட்டுள்ள எழுவருக்கும் பதவி நியமங்களுக்கான கடிதங்களை மந்திரிபுசார் டத்தோஶ்ரீ டாக்டர் ஜம்ரி பின் அப்துல் காதிர் வழங்கினார்.

இதற்கான வைபவம் மந்திரிபுசாரின் அலுவலகத்தில் இன்று காலையில் நடந்தது. கிராமத் தலைவர்களாக நியமிக்கப்பட்டுள்ள அந்த எழுவரின் விபரம் வருமாறு;

1) ராஜசேகரன் சதாசிவம் (வயது 60)

  தலைவர், கம்போங் ஹெண்ட்ரா.

2) சற்குணம் சுப்பையா (வயது 37)

  தலைவர், கம்போங் சூன் லீ

3) ஜகநாதன் ஆறுமுகம் (வயது 50)

  தலைவர், கம்போங் துன் சம்பந்தன்.

4) ராஜேந்திரா சுப்ரமணியம் (வயது 60)

  தலைவர், கம்போங் காமாட்சி.

5) கண்ணையா சாமிக்கண்ணு (வயது 62)

  தலைவர், கம்போங் சுங்கை சாமுன்.

6) ராஜமாணிக்கம் மகாமுனி (வயது 65)

  தலைவர், கம்போங் கிந்தா வேலி.

7) தினகரன் பொன்னுசாமி (வயது 53)

  தலைவர், கம்போங் புன்டூட்.

மேற்கண்ட எழுவரும் மந்திரிபுசார் டாக்டர் ஜம்ரியிடம் இருந்து பதவி நியமனக் கடிதங்களைப் பெற்றுக் கொண்டனர்.

இந்தியர்கள் அதிகமாக வாழும் கிராமங்களை அடையாளம் கண்டு அங்கீகரித்து, அந்தந்தக் கிராமங்களின் தலைவர்களாக இந்தியர்களை நியமித்துள்ளோம் என்று செய்தியாளர்களிடம் பேசிய போது டாக்டர் ஜம்ரி தெரிவித்தார்.

பேராவைப் பொறுத்தவரை இதுவொரு புதிய வரலாறு என வர்ணித்த அவர், மேலும் சில கிராமங்களைக் கண்டறிந்து அங்கீகரி க்கும் முயற்சிகள் தொடரும் என்றார்.

கிராமத் தலைவர்களாகப் பொறுப்பேற்றுள்ளவர்கள் தங்களுக்கு வழங்கப்பட்டுள்ள பொறுப்புக்களின் தன்மையை அறிந்து செயலாற்றக் கூடியவர்களாகவும் எல்லோருக்கும் பொதுவானவர்களாகவும் திகழவேண்டும் என்று அவர் கேட்டுக்கொண்டார்.

குறிப்பாக, கிராம மக்களின் பிரச்சனைகளைக் கண்டறிவதிலும் களைவதிலும் பாராபட்சமின்றி அவர்கள் சேவையாற்ற வேண்டும். அவர்களின் சேவையின் தரம் தொடர்ந்து கண்காணிக்கப்படும். அரசு திருப்தி அடையாவிட்டால், அடுத்தடுத்து அவர்கள் மாற்றப்பட்டு புதியவர்கள் அந்தப் பதவிகளுக்கு அமர்த்தப்படுவார்கள் என்று டாக்டர் ஜம்ரி சொன்னார்.

இதனிடையே இந்நிகழ்வில் கலந்து கொண்ட பேரா மஇகா தலைவர் டத்தோ இளங்கோ, கிராமத் தலைவர்களாக இந்தியர்க ளை நியமனம் செய்ததற்காக மந்திரிபுசாருக்கு நன்றி தெரிவித்துக் கொண்டார். மேலும், டாக்டர் ஜம்ரி வைத்திருக்கும் நம்பிக்கைக்கு ஏற்ப இவர்கள் சேவையாற்றுவார்கள் என்று அவர் குறிப்பிட்டார். சில கிராமங்களை அடையாளம் காண அரசு மேற்கொள்ளும் முயற்சிகளுக்கு மஇகா உதவும் என்றும் டத்தோ இளங்கோ சொன்னார்.

More Articles ...