கோலாலம்பூர், டிச.7- எதை எல்லாம் செய்யக்கூடாது, யாருடன் உறவுக் கொண்டாடக் கூடாது என்று பிறருக்கு முன்னாள் பிரதமர் துன் டாக்டர் மகாதீர் முகமட் அறிவுறுத்தினாரோ, அதையெல்லாம் அவர் இப்போது செய்து கொண்டிருக்கிறார் என்று பிரதமர் டத்தோஶ்ரீ நஜிப் ரசாக் கூறினார். 

"மலாய்க்காரர்கள் எப்போதும் பழையதை மறந்து விடுவார்கள் என்று இதே மேடையில் நின்று அவர் பேசினார். இப்போது அவரே முன்பு சொன்னது எதையும் பின்பற்றாமல், அனைத்தையும் மறந்து செயல்படுகிறார்" என்று நஜிப் கூறினார். 

"எந்த எதிர்க்கட்சியை பிரதமராக இருந்த போது தாக்கி வந்தாரோ, அந்த எதிர்க்கட்சியுடன் இப்போது இணைந்து விட்டார். தனக்கும் தன் குடும்பத்திற்கும் லாபம் கிடைக்க வேண்டும் என்பதே அவரின் நோக்கம். அவர், அவர் தனது எல்லைக் கோட்டினை கடந்து விட்டார்" என்று அவர் மேலும் தெரிவித்தார்.

நாட்டில் 32 மில்லியன் மக்கள் உள்ளனர். அவர்களின் இன, மத, பேதம் பாராமல், அனைவரும் மலேசியர்களே என்ற அடிப்படையில் அரசாங்கம் பல உதவிகளை வழங்கி வருகிறது.  "ஆனால், ஒரு முன்னாள் பிரதமர், இன்னும் அதே பழைய பஞ்சாங்கத்தையே புரட்டிக் கொண்டிருக்கிறார். அண்மையில் கூட, புகிஸ் வம்சாவளியினர் குறித்து அவர் தவறான கருத்து தெரிவித்திருந்தார்" என்று நஜிப் சுட்டிக் காட்டினார். 

கடந்த அக்டோபர் மாதம் 14-ஆம் தேதியன்று, பேரணி ஒன்றில் கலந்து கொண்ட டாக்டர் மகாதீர், புகிஸ் கடற்கொள்ளையர்கள் வம்சாவளியைச் சேர்ந்த ஒருவர் மலேசியத் தலைவராக இருக்கிறார் என்று கருத்துரைத்திருந்தார். 

அதனைத் தொடர்ந்து, பல புகிஸ் வம்சாவளியினர், குறிப்பாக, சிலாங்கூர் சுல்தான், மற்றும் புகிஸ் அமைப்பினர்கள், மகாதீரை சாடினர் என்பது குறிப்பிடத்தக்கது. அம்னோ மலேசியர்கள் அனைவரையும் அரவணைக்கும் கட்சியாகும் என்று பிரதமர் நஜிப் அம்னோ சிறப்பு பேரவையில் உரையாற்றுகையில் கூறினார். 

 

கோலாலம்பூர், டிசம்.7- ஒரு குறிப்பிட்ட சிறிய எண்ணிக்கையிலான சீனர்களும் இந்தியர்களும் எதிர்க்கட்சிகளின் பொய்களில் சிக்கி பலியாகிக் கொண்டிருக்கிறார்கள் என்று பிரதமர் நஜிப் கூறினார்.

அம்னோ எல்லா இனங்களுக்குமான ஒரு கட்சியாக விளங்குவதில் அம்னோ நேர்மையாக இருந்து வருகிறது. எதிர்க்கட்சிகள் குற்றஞ்சாட்டுவது போல அம்னோ ஓர் இனவாதக் கட்சியல்ல என்று அம்னோ சிறப்புப் பேரவைக் கூட்டத்தில் அவர் சொன்னார்.

அம்னோ ஓர் இனவாதக் கட்சியாக இருந்திருக்குமானால், பல ஆண்டுகளாக பல்வேறு இனங்களைப் பிரதிநிதிக்கும் தேசிய முன்னணி பங்காளிக் கட்சிகளுக்கு தலைமை ஏற்று வழிநடத்தும் நம்பிக்கையை அது பெற்றிருக்க முடியும் என்று பிரதமர் நஜிப் கேள்வி எழுப்பினார்.

இதற்கெல்லாம் அப்பாற்பட்ட கட்சி அம்னோ. வேற்றுமையில் ஒற்றுமையை எப்போதும் அது கொண்டாடி வந்துள்ளது. நல்லலெண்ணம், புரிந்துணர்வுடன் ஒன்றுபட்டு வாழ்தல், ஒருவரை ஒருவர் சார்ந்து இருத்தல், ஒருவரை ஒருவர் பாராட்டுதல் போன்றவற்றை கடைபிடித்து வருகிறோம். நான் மீண்டும் மீண்டும் ஒரு விஷயத்தை சொல்லிக்கொள்ள விரும்புகிறேன். அம்னோ சீனர்களுக்கு எதிரானது அல்லது என்று அவர் வலியுறுத்தினார்.

 

 

 

 

 

 

கோலாலம்பூர், டிசம்.7- இஸ்ரேலின் தலைநகராக ஜெருசலத்தை அங்கீகரிக்கும் அமெரிக்க அதிபர் டிரம்ப்பின் முடிவைக் கண்டித்து நாளை வெள்ளிக்கிழமை கோலாலம்பூரிலுள்ள அமெரிக்கத் தூதரகத்தின் முன்னால் பாஸ் கட்சி நடத்தும் ஆட்சேப மறியல் கூட்டத்தில் அம்னோவும் கலந்து கொள்ளும் என்று டத்தோஶ்ரீ அகமட் ஸாஹிட் ஹமிடி கூறினார்.

தற்போது அம்னோ பொதுப்பேரவை கூட்டம் நடந்து வருவதால், இடைவிட்டுப் போவதைத் தவிர்க்க பெரிய அளவில் அம்னோவினர் இந்த மறியலில் கலந்து கொள்ள மாட்டார்கள் என்று அவர் சொன்னார்.

அதேவேளையில் ஒன்றுபட்ட போராட்டத்தை நடத்தும் வகையில் இதர அரசியல் கட்சிகளுடனும் அரசுசாரா அமைப்புக்களுடனும் அம்னோ பேச்சு நடத்தும் என்று அவர் கூறினார்.

மிகப்பெரிய சவாலை எதிர்நோக்கி இருக்கும் பாலஸ்தீன மக்களுக்கு ஆதரவாக நம்முடைய ஒருமைப்பட்டை காட்டும் நோக்கத்தில் இந்த மறியல் அமையும் என்றார் அவர்.

டெல் அவிவிற்கு பதிலாக ஜெருசலத்தைத் தலைநகராக்கும் அமெரிக்காவின் இந்த நடவடிக்கையினால் மத்திய கிழக்கில் சண்டைகளும் தீவிரவாதமும் தலைதூக்கும் என்ற அச்சம் நிலவுவதாக துணைப் பிரதமர் ஸாஹிட் ஹமிடி தெரிவித்தார்.

 

 

புத்ராஜெயா, டிசம்.7- கூட்டரசு அரசாங்கத்தை பக்காத்தான் ஹராப்பான் எனப்படும் எதிர்க்கட்சி கூட்டணி கைப்பற்றுமேயானால், பிரதமர் பதவிக்கான முதல்நிலை வேட்பாளராக டத்தோஶ்ரீ அன்வார் இப்ராகிமை ஜசெக கருதும் என்று அக்கட்சியின் அமைப்பு செயலாளர் அந்தோனி லோக் குறிப்பிட்டார்.

எனினும் அதேவேளையில் இடைக்கால பிரதமராகவும் துணைப் பிரதமராகவும் துன் மகாதீர் மற்றும் டத்தோஶ்ரீ டாக்டர் அன்வார் இப்ராகிம் ஆகியோர் கருதப்படுவார்களா? என்று கேட்கப்பட்ட போது அது குறித்து கருத்துரைக்க அந்தோனி லோக் மறுத்து விட்டார்.

இப்படியெல்லாம் பல தகவல்கள் ஊடகங்களில் வலம் வருகின்றன. அது பற்றி கருத்துரைக்க நான் விரும்பவில்லை. ஜசெகவைப் பொறுத்தவரை பிரதமர் பதவிக்கான முதல்நிலைத் தேர்வு அன்வார் இப்ராகிம் தான் என்று அவர் சொன்னார்.

இந்தப் பொதுத்தேர்தலுக்குப் பின்னர் (பக்காத்தான் ஹராப்பான் வென்றாலும் கூட) அவர் பிரதமராக முடியாது என்பது எங்களுக்குத்தெரியும். அவருக்கு அரச மன்னிப்புக் கிடைத்து, இடைத்தேர்தலில் போட்டியிட்டு வென்றால் தான் அவர் பிரதமராக முடியும் அன்று அந்தோனி லோக் கூறினார்.

 

கோலாலம்பூர், டிச.6- தேசிய முன்னணி மற்றும் மஇகாவின் நலன் கருதி, ஆர்.ஓ.எஸ் மற்றும் ம.இ.காவிற்கு எதிராகத் தாங்கள் உயர்நீதி மன்றத்தில் தொடுத்த வழக்கை வாபஸ் பெற்றிருப்பதாக ம.இ.கா.வின் முன்னாள் வியூக இயக்குநர் ஏ.கே.ராமலிங்கம் அறிக்கை ஒன்றில் கூறியுள்ளார்.

அவர் அந்த அறிக்கையில் மேலும் கூறியிருப்பதாவது:

"என்னுடன் இணைந்து, டத்தோ ஹென்ரி பெனடிக் ஆசிர்வதம், மற்றும் டத்தோ வி.ராஜு ஆகியோரும் மஇகா மற்றும் ஆர்.ஓ.எஸ் மீதான தங்களின் வழக்குகளை வாபஸ் பெற்றுக் கொண்டனர். இதன் தொடர்பாக, டத்தோஶ்ரீ டாக்டர் எஸ்.சுப்பிரமணியத்துடன் பலமுறை நாங்கள் கலந்துரையாடலில் ஈடுபட்டோம். அதனைத் தொடர்ந்து, நாங்கள் அதிகம் நேசிக்கும் எங்களின் கட்சியின் எதிர்கால நலன் கருதி இந்த முடிவினை நாங்கள் எடுத்துள்ளோம். 

"இந்த வழக்கு கடந்த மூன்று ஆண்டுகளாக நீதிமன்றத்தில் விசாரிக்கப்பட்டு வருகிறது. மீண்டும் கட்சியை வலுப்படுத்தும் காலம் இப்போது மலர்ந்துள்ளதாக நான் கருதுகிறேன். மூன்று வருடங்களுக்கு முன்பு, கட்சியிலிருந்து பிரிந்துச் சென்ற அனைவரும், மீண்டும் கட்சிக்குள் இணைத்துக் கொள்ளப்பட வேண்டும் என்று நாங்கள் டாக்டர் சுப்ரமணியத்திடம் கேட்டுக் கொண்டோம். 

அதற்கிணங்க, கட்சியிலிருந்து தனித்திருந்த அனைவரும் மீண்டும் சேர்த்துக் கொள்ளப்படுவர். இந்திய சமுதாய நலனுக்காக, நமது சொந்த விருப்பு வெறுப்பைத் தள்ளி வைத்து விட்டு, அனைவரும் ஒன்றாக இணைந்து செயல்பட வேண்டும் என்று நான் விரும்புகிறேன்.

இந்நாட்டின் மிகவும் பழைமை வாய்ந்த இந்தியர்களை பிரதிநிதிக்கும் கட்சியான ம.இ.கா, இந்திய மக்களுடன் வரலாறு கொண்டிருக்கிறது. கட்சியின் மீதான வழக்கு தொடரப்பட்டால், அது எதிர்வரும் 14-ஆவது பொதுத் தேர்தலில், கட்சிக்கு எதிர்மறையான தாக்கத்தை ஏற்படுத்தும். 

"பிரதமர் டத்தோஶ்ரீ நஜிப்பின் அறிவுரையின் பேரில், மஇகாவின் முன்னாள் தேசியத் தலைவர் டத்தோஶ்ரீ ஜி.பழனிவேலின் ஆதரவாளர்களாகிய நாங்கள், தற்போதைய மஇகாவின் தேசியத் தலைவர் டத்தோஶ்ரீ டாக்டர் எஸ்.சுப்ரமணியத்துடன் இணைந்து செயலாற்றி, கட்சி முன்பு பெற்ற வெற்றிகளை மீண்டும் கொண்டு வருவதற்கு பாடுபடுவோம்." 

"கடந்த மூன்று ஆண்டுகளாக, இந்த வழக்கிற்கு ஆதரவு தெரிவித்து, எங்களுடன் இணைந்து பங்காற்றிய அனைவருக்கும் என் மனமார்ந்த நன்றியை இங்குத் தெரிவித்துக் கொள்கிறேன். இந்தப் பிரச்சனை இத்துடன் ஒரு முடிவுக்கு வருகிறது. அடுத்தப் பொதுத் தேர்தலில், மஇகாவின் வெற்றிக்காக நாம் அனைவரும் இணைந்து போராடுவோம்." 

இவ்வாறு ஏ.கே.ராமலிங்கம் தம்முடைய அறிக்கையில் கூறியுள்ளார்.

 

 

 

 

கோலாலம்பூர், டிச.5- கேமரன் மலைத் தொகுதியில் தேசிய முன்னணியின் வேட்பாளராக யார் நியமிக்கப்படுவார் என்பதை பிரதமர் டத்தோஶ்ரீ நஜிப் ரசாக்கே முடிவு செய்வார் என்று துணைப் பிரதமர் டத்தோஶ்ரீ டாக்டர் அகமட் ஸாஹிட் ஹமீடி கூறினார்.

"தேசிய முன்னணியின் தலைவர் என்ற அடிப்படையில், யாரை வேட்பாளராக தேர்ந்தெடுக்க வேண்டும் என்பதை பிரதமரே முடிவு செய்வார்" என்று செய்தியாளர்களின் கேமரன் மலைத் தொகுதி வேட்பாளர் யார் என்ற கேள்விக்கு ஸாஹிட் அவ்வாறு பதிலளித்தார். 

எதிர்வரும் 14ஆவது பொதுத் தேர்தலில், கேமரன் மலைத் தொகுதியில் போட்டியிடுவதற்கு தேசிய முன்னணியின் பங்காளிக் கட்சிகளான மஇகா மற்றும் மைபிபிபி ஆகிய இரு கட்சிகளும் ஆர்வம் தெரிவித்துள்ளன. அத்தொகுதியில், கடந்த 2004-ஆம் ஆண்டிலிருந்து மஇகா கட்சி வேட்பாளரே போட்டியிட்டு வருகிறார் என்பது குறிப்பிடத்தக்கது. 

இதனிடையில், அடுத்த ஆண்டு நடைப்பெறவிருக்கும் பொதுத் தேர்தலில், அத்தொகுதியை வேறு எந்தக் கட்சிக்கும் விட்டுக் கொடுக்கும் எண்ணம் மஇகாவிற்கு இல்லை என்று மஇகாவின் தேசியத் தலைவர் டத்தோஶ்ரீ டாக்டர் எஸ்.சுப்ரமணியம் அண்மையில் தெரிவித்திருந்தார்.  

அத்தொகுதியில் நேரடி வேட்பாளர் நியமிப்பு முறை நிகழ்த்தப்படுமா என்ற கேள்விக்கு அவசியம் ஏற்பட்டால், அந்த முறை செயல்படுத்தப்படும் என்று ஸாஹிட் கூறினார்.  

"சரவாக்கில் இந்த முறை கடந்த தேர்தலில் பயன்படுத்தப்பட்ட்து. ஆனால், அங்குள்ள அரசியல் நிலவரம் வேறு. இருப்பினும், அந்த முறைக்கு அவசியம் ஏற்பட்டால், தேசிய முன்னணி அதனைப் பயன்படுத்தும்" என்று அவர் தெரிவித்தார். 

கோலாலம்பூர், டிச.4- எதிர்வரும் பொதுத் தேர்தலில், தேசிய முன்னணி கட்சி மிகச் சிறப்பான வெற்றியை அடைந்தால், அடுத்த முறை வழங்கப்படவிருக்கும் நாடாளுமன்ற செனட்டர் பதவிகளில், குறைந்தது 30 விழுக்காடாவது பெண்களுக்கு வழங்கப்பட வேண்டும் என்று அரசாங்கம் பரிந்துரைக்கிறது என்று பிரதமர் டத்தோஶ்ரீ நஜிப் துன் ரசாக் தெரிவித்தார்.  

"இந்தப் பரிந்துரை ஏற்றுக் கொள்ளப்பட்டு அமல்படுத்தப்பட வேண்டும். அதனைச் செயல்படுத்தும் பொருட்டு, அடுத்த பொதுத் தேர்தலில் தேசிய முன்னணி அதிகமான தொகுதிகளை வெல்ல வேண்டும்" என்று 2017-ஆம் ஆண்டின் அரசியலில் பெண்களின் ஈடுபாடு என்ற அனைத்துலக மாநாட்டில் கலந்து கொண்டு பேசுகையில் அவர் அவ்வாறு சொன்னார். 

"பெண்களை முதலில் நாடாளுமன்றத்தில் செனட்டர் பதவிகளில் தேர்ந்தெடுத்து, அவர்களின் தலைமைத்துவ திறனை நாம் வெளிக்கொணரலாம்" என்று அவர் கருத்து தெரிவித்தார்.  

இந்த 2017-ஆம் ஆண்டின் அரசியலில் பெண்களின் ஈடுபாடு என்ற அனைத்துலக மாநாட்டில் அம்னோவின் மகளிர் பிரிவுத் தலைவர் டான்ஶ்ரீ ஷாரிசாட் அப்துல் ஜாலில், பிரதமர் நஜிப்பின் துணைவியார் டத்தின்ஶ்ரீ ரோஸ்மா மன்சோர், கூட்டரசுப் பிரதேச அமைச்சர் டத்தோஶ்ரீ தெங்கு அட்னான், மகளிர், குடும்பம் மற்றும் சமுதாய அபிவிருத்தி அமைச்சர் டத்தோஶ்ரீ ரொஹானி அப்துல் காரிம் மற்றும் கல்வி அமைச்சர் டத்தோஶ்ரீ மட்ஸீர் காலீட் ஆகியோர் கலந்து கொண்டனர். 

"அரசியலில் பெண்களின் ஈடுபாடு அதிகரிக்கப்பட வேண்டும். இதன் வாயிலாக, ஜனநாயகம் மேலும் வலுவடையும். சாமன்ய மக்களிடத்தில் மிகவும் பண்பாகவும், பொறுமையுடன் நடந்துக் கொண்டு, தேசிய முன்னணிக்கு பலரின் ஆதரவுகளை திரட்டுவதில் அம்னோவின் மகளிர் அணியினர் பலமுறை உதவியுள்ளனர். அவர்கள்தான் அம்னோவின் முதுகெலும்பு" என்று நஜிப் தெரிவித்தார்.   

பெண்கள் மேலும் பல வெற்றிகளை குவிக்க வேண்டும். தலைமைத்துவத்தில் அவர்கள் சிறக்க வேண்டும் என்று நஜிப் கூறினார்.

 

More Articles ...