புத்ராஜெயா, ஜன.24- மூத்த சுங்கத் துறை அதிகாரி ஒருவரின் வீட்டில் ஏற்பட்ட தீச்சம்பவத்தில் அவரின் நான்கு கார்களில் இரு கார்கள் முற்றாக சேதமடைந்தன. மேலும் இரு கார்கள் சேதத்திற்கு உள்ளாகியுள்ள பட்சத்தில், அச்சம்பவம் ஒரு சதிநாச வேலை என்று போலீசார் கண்டறிந்துள்ளனர். 

நேற்று அதிகாலை புத்ராஜெயா அரசாங்க அதிகாரிகள் தங்கும் வீடமைப்பு பகுதியில், அந்த அதிகாரியின் வீட்டின் முன்புறத்தில் திடீரென்று தீப்பற்றியது. சம்பவம் நிகழ்ந்த போது, நோர் அஸ்மான் மாட் ஜீன் என்ற அந்த அதிகாரி தனது குடும்பத்தினருடன் தூங்கிக் கொண்டிருந்ததாக தெரிவிக்கப்பட்டது. 

அச்சம்பவம் தொடர்பில் நடத்தப்பட்ட விசாரணை வாயிலாக, அந்தத் தீயை யாரோ வேண்டுமென்றே மூட்டி இருக்கிறார் என்பது தெரிய வந்துள்ளது என்று போலீசார் தகவல் தெரிவித்துள்ளனர்.  

"தீயில் முற்றாக சேதமடைந்த காரின் இயந்திர மூடி (bonnet) மீது சுத்தியல் ஒன்றையும், கீழே தீ வரவழைக்கும் லைட்டர் (lighter) எனப்படும் கருவியையும் நாங்கள் கண்டெடுத்துள்ளோம்" என்று புத்ராஜெயா ஓசிபிடி துணை ஆணையர் ரொஸ்லி ஹசான் கூறினார். 

குற்றவியல் சட்டத்தின் 435-ஆவது பிரிவின் கீழ், அச்சம்பவம் விசாரணைக்கு உட்படுத்தப்பட்டுள்ளது. 

"அதிகாலை 3.30 மணிக்கு நேர்ந்த அந்தத் தீச்சம்பவத்தில், அந்த அதிகாரியின் வீட்டின் முன்புறம் மற்றும் அங்கு நிறுத்தி வைக்கப்பட்டிருந்த நான்கு கார்களில், தீ  வேகமாக பரவியுள்ளது" என்று ரொஸ்லி ஹசான் சொன்னார். 

தீயில் முற்றாக சேதமடைந்த கார்கள், தனது மனைவி மற்றும் மகளுக்குச் சொந்தமானவை என்று அந்த அதிகாரி தெரிவித்தார். 

கோலாலம்பூர், ஜன.24- எதிர்வரும் பிப்ரவரி மாதம் 16-ஆம் தேதியன்று கொண்டாடப்படும் சீனப் புத்தாண்டை முன்னிட்டு 'ஆ ஜிப் கோர்' என்ற முகநூல் பக்கத்தில் தன்னைப் பின்தொடரும் ரசிகர்களுக்கு, தனது சித்திரம் கொண்ட 'ஆங் பாவ்' உறைகளை பிரதமர் டத்தோஶ்ரீ நஜிப் ரசாக் வழங்கி வருகிறார். 

கடந்த 2013-ஆம் ஆண்டு முதற்கொண்டு, ஒவ்வொரு வருடமும், சீனப் புத்தாண்டின் போது தனது 'ஆ ஜிப் கோர்' முகநூல் பக்கத்தின் ரசிகர்களுக்கு, பிரதமர் நஜிப் இந்த ஆங் பாவ் உறைகளை வழங்கி வருகிறார் என்பது குறிப்பிடத்தக்கது.  

"இவ்வருட சீனப் புத்தாண்டிற்கு நான் 'லாவ் சாங்' உணவு வகையை கருப்பொருளாக பயன்படுத்துகிறேன். இதனிடையில், எனக்கு மிகவும் பிடித்த உணவான 'யீ சாங்', தேசிய பாரம்பரிய உணவுகளில் ஒன்றாக தேர்ந்தெடுக்கப்பட்டுள்ளது" என்று மண்டரீன் மொழியில், நஜிப் அந்த முகநூல் பக்கத்தில் தெரிவித்துள்ளார். 

'லாவ் சாங்' உணவு வகையை நஜிப் ருசிப் பார்த்துக் கொண்டிருக்கும் வகையில், இவ்வாண்டிற்கான ஆங் பாவ் பாக்கெட்டுகள் வடிவமைக்கப்பட்டுள்ளன. இந்த ஆங் பாவ் பாக்கெட்டுகளை நஜிப் தனது முகநூல் ரசிகர்களுக்கு இலவசமாக வழங்கி வருகிறார் என்பது குறிப்பிடத்தக்கது. 

கோலாலம்பூர், ஜன.24- ரேபிட் கே.எல்-யின் நான்கு பெட்டி மோனோரயில்களில் சோதனைகள் மேற்கொள்ளப்படுவதால், அவற்றின் சேவைகள் தற்காலிகமாக நிறுத்தப்பட்டுள்ளன. 

"அந்த ரயில்களின் பாதுகாப்பு அம்சங்களை கருத்தில் கொண்டு, அவற்றின் மீது சோதனைகள் மேற்கொள்ளப்படுகின்றன" என்று ரேபில் கே.எல்-யின் தலைமைச் செயல் அதிகாரி முகமட் அரிஃபீன் இட்ரீஸ் கூறினார். 

இதுநாள் வரை, மோனோரயில்களை பயன்படுத்தி வந்த பயணிகளுக்கு எவ்வித சிரமமும் நேர்ந்துவிடாமலிருக்கும் பொருட்டு, மோனோரயில் பாதைகளுக்கான பேருந்து சேவைகள் ஏற்பாடு செய்துத் தரப்பட்டுள்ளதாக முகமட் அரிஃபீன் மேலும் கூறினார். 

"அந்தப் பயணச் சேவைக்கான கட்டணம், 1 ரிங்கிட் மட்டுமே. 15 நிமிடங்களில் மக்கள் தங்களின் இலக்குகளை அடைந்து விடலாம் என்று கணித்துள்ளோம். ஆனால், போக்குவரத்தையும் நாம் கருத்தில் கொள்ள வேண்டும்" என்று அவர் சொன்னார். 

ரேபிட் கே.எல்லின் இரண்டு பெட்டி மோனோரயில்களில் சேவை தொடர்ந்து வழங்கப்படும் என்று அவர் தெரிவித்தார். இந்தத் தடங்களுக்காக தாங்கள் வருந்துவதாகவும் ரேபிட் கே.எல் நிறுவனம் தெரிவித்துக் கொண்டது.

கோலாலம்பூர், ஜன.24- உடல் உறுப்பு தானம் செய்வதற்காக தங்களைப் பதிந்துக் கொண்ட 220,000 பொதுமக்களின் தனிநபர் விவரங்கள் மற்றும் அவர்களின் குடும்ப உறுப்பினர்கள் குறித்த விவரங்கள், 'ஆன்லைனி'ல் வெளியிடப்பட்டுள்ளதாக Lowyat.net என்ற அகப்பக்கம் தகவல் வெளியிட்டுள்ளது. 

பொதுமக்களின் தனிநபர் விவரங்களை அவர்களின் அனுமதியின்றி வெளியிடுவதாக சந்தேகிக்கபடும் அரசாங்க நிறுவனங்கள் மற்றும் ஏஜென்சிகள் மீது பொதுச் சேவை இலாகா விசாரணை நடத்த வேண்டும் என்று மலேசிய டிஜிட்டல் பொருளாதார நுகர்வோர் சங்கத்தின் பொதுச் செயலாளர் முகமட் ஷா'ஹானி அப்துல்லா வலியுறுத்தியுள்ளார். 

கடந்த 2016-ஆம் ஆண்டு ஆகஸ்டு மாதம் 31-ஆம் தேதியன்று, 220,000 மக்களின் தனிநபர் விவரங்கள் அடங்கிய கோப்பு ஒன்று ஆன்லைனில் பதிவேற்றம் செய்யப்பட்டுள்ளது. உடல் உறுப்பு தானம் செய்துக் கொள்ள தங்களைப் பதிந்துக் கொண்ட மக்களின் மை-கார்டு எண்கள், வீட்டு முகவரி, கைத்தொலைப்பேசி எண்கள் மற்றும் அவர்களின் உறவினர்களின் கைத்தொலைப்பேசி எண்கள் போன்ற விவரங்கள் அதில் வெளியிடப்பட்டுள்ளதாக Lowyat.net என்ற அகப்பக்கம் கூறியுள்ளது.  

"நாடு தழுவிய நிலையில் உள்ள பொது மருத்துவமனைகள் மற்றும் உடல் உறுப்பு மாற்றம் வள மையங்களால் கையெழுத்திடப்பட்ட குறிப்புகளும் அந்தக் கோப்பில் இடம் பெற்றுள்ளன. அதனைக் கருத்தில் கொள்ளுகையில், இவ்விவரங்கள் அனைத்தும் மத்திய தரவுத் தளத்திடமிருந்து (central database) பெறப்பட்டுள்ளன என்பது தெரிய வருகிறது" என்று Lowyat.net கூறியுள்ளது.  

பொதுமக்களின் தனிநபர் விவரங்கள் வெளியிடப்படுவதால், அவர்களின் பாதுகாப்பிற்கு அச்சுறுத்தல் நேரலாம் என்பதை சம்பந்தப்பட்ட நிறுவன்ங்கள் அறிந்திருக்க வேண்டும் என்று ஷா'ஹானி அப்துல்லா சொன்னார். 2010-ஆம் ஆண்டின் தனிநபர் விவரங்கள் பாதுகாப்புச் சட்டத்திற்கு புறம்பாக இந்தச் செயல்கள் அமைந்துள்ளன என்று அவர் கருத்து தெரிவித்தார். 

 

 

 

 

 

சுங்கைப் பட்டாணி, ஜன.24- கடந்த ஞாயிற்றுக்கிழமையன்று, கேளிக்கைச் சந்தை ஒன்றில், ஒரு ஆடவனால் மானபங்கம் செய்யப்பட்ட சிறுமியை முறையாக வளர்க்கும் ஆற்றல் அந்தச் சிறுமியின் தாயாருக்கு இருக்கின்றதா என்பதை கெடா மாநில சமூகநல இலாகா ஆராய்ந்துள்ளது. 

தங்களுக்கு அறிமுகமான ஆடவன் தானே என்ற அடிப்படையில், அந்தச் சிறுமியை கேளிக்கைச் சந்தைக்கு அவனுடன் அனுப்பி வைத்த அச்சிறுமியின் தாயாருக்கு அவளை பராமரிக்கும் ஆற்றல் இருக்கிறதா என்று சமூக வலைத்தளவாசிகள் பலர் கடிந்துக் கொண்ட நிலையில், அத்தாயாரின் ஆற்றல் குறித்து தாங்கள் அறிந்துக் கொள்ள முனைந்ததாக கெடா மாநில சமூகநல இலாகா இயக்குநர் அஸ்மி அப்துல் கரீம் கூறினார். 

"இத்தகைய காமூகனிடமிருந்து அந்தச் சிறுமியை எவ்வாறு பாதுகாக்க வேண்டும் என்பது குறித்து நாங்கள் அந்தத் தாயாரிடம் விளக்கினோம். அச்சிறுமியின் எதிர்காலத்திற்கு எவ்வித தீங்கும் நேர்ந்து விடக் கூடாது என்பதையும் நாங்கள் அவருக்கு அறிவுறுத்தினோம்" என்று அஸ்மி அப்துல் கரீம் சொன்னார். 

"அச்சிறுமி அவளின் தாயாருடன் ஒன்றாக இருப்பதே நல்லது என்று நாங்கள் தெரிந்துக் கொண்டோம். அவளின் தாயார் அவளை நன்றாகவே பாதுகாப்பார் என்ற நம்பிக்கை எங்களுக்கு உண்டு. வேறேதும் விபரீதம் நேர்ந்தால் மட்டுமே சமூக நல இலாகா அவ்விவகாரத்தில் தலையிடும்" என்று அவர் தெரிவித்தார். 

இதனிடையில், அச்சம்பத்தில் பாதிக்கப்பட்ட அச்சிறுமியை மருத்துவ பரிசோதனைக்கு சமூகநல இலாகா உட்படுத்தியதாகவும், அவளுக்கு எவ்வித பாதிப்பும் இல்லை என்று உறுதிப்படுத்தப்பட்டதாகவும் அஸ்மி அப்துல் கரீம் கூறினார். 

இச்சம்பவம் குறித்த ஆய்வறிக்கை ஒன்று தயாரிக்கப்பட்டு, அதன் முடிவு கூடிய விரைவில் மகளிர், குடும்பம் மற்றும் சமூக அபிவிருத்தி அமைச்சர் டத்தோஶ்ரீ ரொஹானி அப்துல் கரீமிடம் அனுப்பி வைக்கப்படும்.  

கடந்த ஞாயிற்றுக்கிழமையன்று, கேளிக்கை சந்தையில், பலர் சூழ்ந்து இருக்கையில், அந்த ஆடவன் அச்சிறுமியை மானபங்கம் செய்தான். அவனின் அச்சேட்டைகளை, சமூக வலைதளவாசி ஒருவர் வீடியோவாக பதிவு செய்து அதனை தனது முகநூல் பக்கத்தில் பகிர்ந்தார்.

அன்றை நாள் இரவு, அந்த ஆடவன், மீண்டும் அந்தச் சிறுமியைத் தேடி அவளின் வீட்டிற்கு சென்றான். வலைத்தளங்களில் பகிரப் பட்ட அந்த வீடியோவை கண்டு அதிர்ச்சியடைந்த அச்சிறுமியின் தாயார், அந்த ஆடவனை சராமாரியாக திட்டி விட்டு, அச்சம்பவம் குறித்து போலீஸ் புகார் செய்தார் என்பது குறிப்பிடத்தக்கது.  

 

கோலாலம்பூர், ஜன.23- பத்துமலை வளாகத்தில் நேற்று பிற்பகலில் கடும் மழையுடன் கூடிய காற்று வீசியதால் அங்கு அமைக்கப்பட்டிருந்த டைகளின் கூரைகள் பறந்தன. கூடாரங்கள் சரிந்தன. இதனால் சிறிது நேரம் அங்கு கடும் பரபரப்பு நிலவியது.

எதிர்வரும் 31ஆம் தேதி பத்துமலையில் தைப்பூச விழா வெகு சிறப்பாக கொண்டாடப் படவிருக்கிறது. தைப்பூச விழாவுக்கான கடைகள் மிகத் துரிதமாக அமைக்கப்பட்டு வருகின்றன.

இந்நிலையில், நேற்று பிற்பகலில் கடுமையான மழை பெய்யத்தொடங்கியதோடு பலத்த காற்றும் வீசியது. இந்தக் காற்றில், அங்கு அமைக்கப்பட்டு வந்த தைப்பூசக் கடைகள் சிலவற்றின் கூடாரங்கள் சாய்ந்தன.  மேற்கூரைகளும் சரிந்து விழுந்தன. இதனால் கடைக்காரர்கள் கடும் சிரமங்களுக்கு உள்ளாயினர்.

 

 

 

 

 

 

 

 

 

 

 

 

 

சிபு, ஜன.23- தனது காதலனால், அவனின் வீட்டின் அறையில் ஒன்பது நாட்களுக்கு அடைத்து வைக்கப்பட்டு தொடர்ச்சியாக ஒவ்வொரு நாளும் மூன்று முறை கற்பழிக்கப்பட்ட 23 வயது பெண், அவனிடமிருந்து தப்பித்து, சிபுவிலுள்ள காவல் நிலையத்தில் அடைக்கலம் புகுந்துள்ளார். 

அந்த 30 வயது ஆடவனுடன் கடந்த சில ஆண்டுகளாக காதல் வயப்பட்டிருந்த அந்தப் பெண், தனது காதலனுக்கு மற்றுமொரு முகம் இருப்பது குறித்து தாம் கடந்த 15-ஆம் தேதி வரை அறிந்திருக்கவில்லை என்று போலீஸ் புகாரில் கூறியுள்ளார். 

கடந்த 15-ஆம் தேதியன்று, ஜாலான் எம்பெலாம் என்ற பகுதியில் உள்ள தனது வீட்டின் அறையில், அந்த 23 வயது பெண்ணை அடைத்து வைத்து, தன்னுடன் பாலியல் உறவு வைத்துக் கொள்ளுமாறு அவன் வற்புறுத்தியுள்ளான். அந்தப் பெண் அதற்கு ஒத்துழைக்காததால், அவரை அடித்து உதைத்து, அவரின் விருப்பத்திற்கு மாறாக அவரை அவன் பாலியல் வன்முறைக்கு உட்படுத்தியுள்ளான். 

ஒவ்வொரு நாளும் குறைந்தது 3 முறையாவது தன்னுடன் உறவு வைத்துக் கொள்ளுமாறு அந்த ஆடவன் தன்னை வற்புறுத்தியதாகவும், அதற்கு மறுப்பு தெரிவித்தால், அப்பெண்ணின் குடும்பத்தினரை தாம் தாக்க வேண்டிய அவசியம் ஏற்படும் என்று அவன் மிரட்டியதாக அந்தப் பெண், தனது போலீஸ் புகாரில் தெரிவித்துள்ளார். 

அந்த 9 நாட்களும், அந்த ஆடவன் போதை மருந்துக்கு ஆளாகியிருந்தான் என்று தாம் சந்தேகிப்பதாக அந்தப் பெண் கூறினார். பாவாங் அஸ்ஸான் என்ற பகுதியிலுள்ள அந்தப் பெண்ணின் உறவுக்காரர் வீட்டிற்கு சென்று, கடன் வாங்கி வருமாறு அவன் பணித்ததாகவும், அதனைச் சாக்காக உபயோகித்து, தாம் அங்கிருந்து தப்பி போலீஸ் நிலையத்திற்கு வந்ததாக அந்தப் பெண் சொன்னார். 

அந்தப் பெண்ணின் புகாரைத் தொடர்ந்து, அந்தச் சந்தேக நபர், இன்று அதிகாலை 1.30 மணிக்கு கைது செய்யப்பட்டதாக சிபு மாவட்ட போலீஸ் துணை ஆணையர் ஸ்டேன்லீ ஜோனதன் கூறினார். 

கற்பழிக்கப்பட்டு மன உளைச்சலுக்கு ஆளாகியுள்ள அந்தப் பெண், சிபு மருத்துவமனையில் சிகிச்சைப் பெற்று வருவதாக அவர் தெரிவித்தார். 

 

More Articles ...