கோலாலம்பூர், மே.27- நான்கு வயது சிறுமியை இரக்கமற்ற முறையில் அடித்துத் துன்புறுத்திக் கொடுமைகள் புரிந்த ஒரு தாயும் அவளுடைய காதலனும் கைது செய்யப்பட்டனர்.

இந்தச் சிறுமி மிக மோசமான முறையில் அடித்துத் துன்புறுத்தப் பட்டுள்ளாள். அவளுடைய பிறப்பு உறுப்பில் கூட காயங்கள் இருக்கின்றன. தலையில் கடுமையாக காயமடைந்து தையல் போடப்பட்டிருந்தது. உடல் முழுவதும் காயங்களுடன் அந்தச் சிறுமியின் புகைப்படங்கள் அண்மையில் சமூக ஊடகத்தில் வெளியாகி பெரும் அதிர்ச்சியை ஏற்படுத்தியது.

கடந்த 24 ஆம் தேதி அந்தப் படங்கள் வெளியாகியுள்ளன. மேலும், அதனை வெளியிட்டவர், இந்தச் சிறுமியின் தந்தை இது குறித்து மருத்துவமனையில் போலீசில் புகார் செய்ய முயன்ற போது அந்தப் புகாரை போலீசார் ஏற்க மறுத்ததாக சுட்டிக்காட்டி இருந்தார்.

இதனிடையே இந்த சிறிமியின் சித்ரவதை தொடர்பாக அவளுடைய தாயாரும் அவரின் காதலனும் கைது செய்யப்பட்டிருப்பதாக கோலாலம்பூர் போலீஸ் படைத் தலைவர் டத்தோ அமார் சிங் தெரிவித்தார்.

போலீசாரின் உத்தரவைத் தொடர்ந்து அவர்கள் இருவரும் உலுயாம் பாருவில் போலீசாரிடம் சரணடைந்திருக்கின்றனர்.

சிறார் சட்டத்தின் 31(1)(a) பிரிவின் கீழ் தற்போது இவர்கள் விசாரிக்கப்பட்டு வருகின்றனர் என்று டத்தோ அமார் சிங் சொன்னார்.

அதேவேளையில், போலீசார் புகாரை ஏற்க மறுத்ததாக வெளிவந்த தகவலை மறுத்தார் டத்தோ அமார் சிங்.

சிறுமியின் தந்தை முன்பு வழங்கிய புகாரை பின்னர் மீட்டுக் கொண்டதாகவும் தன்னுடைய முன்னாள் மனைவியான அந்தத் தாய், சிறுமியின் காயங்கள் தொடர்பில் மன்னிப்புக் கேட்டுக் கொண்டதால் அவர் புகாரை வாபஸ் பெற்றதாகவும் டத்தோ அமார் சிங் விளக்கினார்.

கோத்தா கினாபாலு, மே.27- மலாயா பல்கலைக் கழகத்தைச் சேர்ந்த முன்னாள் விரிவுரையாளரான டாக்டர் மஹ்முட் அகமட் இப்பிராந்திய ஐஎஸ் பயங்கரவாத இயக்கத்தின் தலைமைப் பொறுப்புக்கு நியமிக்கப்படவுள்ளார் உள்ளார் என்று தகவல்கள் வெளிவந்துள்ளன.

தென்பிலிப்பைஸ்சிலுள்ள மராவி பகுதியில் பதுங்கி இருப்பதாக கருதப்படும் டாக்டர் மஹ்முட், நடப்புத் தலைவரான இஸ்னிலோன் ஹபிலோன் படுகாயமடைந்திருப்பதால் அவருக்கு மரணம் நிகழ்ந்தால் அந்த இடதிற்கு வருவர் என்று கூறப்படுகிறது.

மராவி பகுதியில் பிலிப்பைன்ஸ் இராணுவத்துடன் ஐஎஸ் தீவிரவாதிகள் தற்போது சண்டையிட்டு வருகின்றனர். கடந்த சில தினங்களாக நடக்கும் இந்தச் சண்டையில் இரண்டு மலேசிய ஐஎஸ் தீவிரவாதிகளும் கொல்லப்பட்டுள்ளனர்.

கடந்த ஆண்டில் பிலிப்பைசுக்கான ஐஎஸ் இயக்கத்தின் தலைவனாக இஸ்னிலோன் அறிவிக்கப்பட்டிருந்தார். எனினும், கடந்த இரண்டு மாதங்களுக்கு முன்பு நடத்த ஒரு சண்டையில் இஸ்னிலோன் படுகாயமடைந்தார்.

தென்கிழக்காசிய ஐஎஸ் தீவிரவாதிகளிகளுக்கான தலைமைப் பதவிக்கு புதியவர் ஒருவரை நியமிப்பதில் அந்த இயக்கத்தின் உச்சத்தலைவரான அபு பக்கிர் அல் பாக்தாதி முயன்று வருவதாக கூறப்பட்டது.

அப்பொறுப்பில் இருந்த மலேசியாவைச் சேர்ந்த முகமட் வாண்டி முகமட் ஜெடி அண்மையில் சிரியாவிலுள்ள ரக்கா நகரில் ஆளில்லா இரகசிய விமானம் மூலம் நடத்தப்பட்ட ராக்கெட் தாக்குதலில் மாண்டார்.

தற்போது பாக்தாதியின் நம்பிக்கைக்குரிய ஓர் ஆளாக டாக்டர் மஹ்முட் இருந்துவருவதாக கூறப்படுகிறது. மலேசியா, சிங்கப்பூர் மற்றும் இந்தோனியாவில் செயல்பட்டு வரும் பல்வேறு இரகசிய ஐஎஸ் பிரிவுகளை ஒருங்கிணைத்து தென்கிழக்காசியாவின் அதிகாரப்பூர்வமான ஒரே ஐஎஸ் இயக்கமாக ஆக்குவதற்கு டாக்டர் மஹ்முட் திட்டமிட்டு வருவதாக கூறப்பட்டது.

கோலாலம்பூர், மே.27- சிங்கப்பூரில் நேற்றிரவு நடந்த எம்எம்ஏ  கலப்பு தற்காப்புக் கலை, ஒன் சாம்பியன்ஷிப் போட்டியில் மலேசியாவின் இளம் வீரரான அகிலன் தாணி அமெரிக்க வீரரிடம் தோல்வி கண்டார்.

வால்டர்வெய்ட் பிரிவுக்கான இந்த சாம்பியன் போட்டியின் இறுதிச் சுற்றுக்குத் தேர்வு பெற்றிருந்த செந்தூலைச் சேர்ந்த அகிலன், அமெரிக்காவின் பென் அஸ்க்ரேனுடன் மோதினார். 

முன்னாள் ஒலிம்பிக் மல்யுத்த வீரரான பென் அஸ்க்ரேனின் அனுபவம் அவருக்குக் கைகொடுத்தது. நடப்புச் சாம்பியனான பென் தொடக்கம் முதலே முன்னேறினார். 

அகிலனை மடக்கி கீழே சாய்த்த அவர், தொடர்ந்து அகிலனை மடக்க முடியவில்லை சிறிது நேரப் போராட்டத்திற்குப் பின்னர் அதிலிருந்து ஆவேசமாக தன்னை விடுவித்துக்கொண்டு அகிலன் வெளியேறினார். 

எனினும், அடுத கணமே மீண்டும் அகிலன் கீழே சாய்த்த பென், கடைசி வரை அகிலன் அதிலிருந்து மீளமுடியாத வகையில் கிட்டத்தட்ட 2 நிமிடம் 22 வினாடிகள் மடக்கி வைத்திருந்ததைத் தொடர்ந்து அகிலனின் தோல்வி உறுதியானது.

இந்த வெற்றியுடன் சேர்த்து இதுவரை 16 போட்டிகளில் தொடர்ச்சியாக பென் வென்றுள்ளார் என்பது குறிப்பிடத்தக்கது.

கோலாலம்பூர், மே.26- எம்.ஐ.இ.டி எனப்படும் மாஜு கல்வி மேம்பாட்டுக் கழகம், 2017ஆம் ஆண்டுக்கான யூ.பி.எஸ்.ஆர் மாணவர்களுக்குத் தேர்வு வழிகாட்டி நூல்களை அறிமுகப்படுத்தியது. இந்த நூல்களின் அறிமுக விழாவும், தமிழ்ப் பள்ளி மாணவர்களிடம் நூல்களை வழங்கும் நிகழ்ச்சியும் இன்று தலைநகரில் நடைபெற்றது.

இந்நிகழ்ச்சியில் சிறப்பு விருந்தினராகத் தென் கிழக்காசிய நாடுகளுக்கான கட்டமைப்பு சிறப்பு தூதர் டத்தோஶ்ரீ உத்தாமா ச.சாமிவேலு கலந்துக் கொண்டு சிறப்பித்தார்.

2003ஆம் ஆண்டில் முதன் முறையாக யூ.பி.எஸ்.ஆர் மாணவர்களுக்காக இந்த தேர்வு வழிகாட்டி நூல்களை இலவசமாக வழங்க தொடங்கியது எம்.ஐ.இ.டி. தமிழ்ப் பள்ளி மாணவர்கள் யூ.பி.எஸ்.ஆர் தேர்வில் சிறந்த தேர்ச்சிகளைப் பெற இந்தத் திட்டம் கடந்த 14 வருடங்களாக வெற்றிகரமாக மேற்கொள்ளப்பட்டு வருகிறது.

“தமிழ்ப் பள்ளி மாணவர்களும் மற்ற இன மாணவர்களைப் போலவே கல்வியில் சிறந்து விளங்க இந்தத் திட்டம் தொடங்கப்பட்டது. இந்தாண்டும் தொடர்ந்து வழிகாட்டி நூல்கள் வெளியிடப்படுவதை எண்ணுகையில் மிகவும் சந்தோசமாக இருக்கிறது. தமிழ்ப் பள்ளி மாணவர்களும் மிக உயர்ந்த நிலையை அடைவார்கள் என எனக்கு நம்பிக்கை இருக்கிறது” என்று டத்தோஶ்ரீ சாமிவேலு தமதுரையில் கூறினார்.

மலாய், ஆங்கிலம், தமிழ், அறிவியல் மற்றும் கணிதம் என 5 பாடங்களை உள்ளடக்கிய இந்த தேர்வு வழிகாட்டி நூல்கள் நாடு தழுவிய நிலையில் சுமார் 13 ஆயிரம் தமிழ்ப் பள்ளி மாணவர்களுக்கு வழங்கப்படும். இந்த நூல்களைக் கொண்டு மாணவர்களுக்கு பாடங்களைப் போதிக்கவும் ஆசிரியர்களுக்கு பயிற்சி பட்டறைகளும் நடத்தப்படும்.

இந்த நூல் அறிமுக விழாவில் கல்வி துறைத் துணையமைச்சர் டத்தோ கமலநாதன், தமிழ்ப் பள்ளிகளின் தலைமை கட்டமைப்பாளர் எஸ்.பாஸ்கரன், ம.இ.கா இளைஞர் பிரிவு தலைவர் டத்தோ சிவராஜா, முன்னாள் மேலவைத் தலைவர் டான்ஶ்ரீ வடிவேலு, தமிழ்ப் பள்ளி மேலாளர்கள், தலைமையாசிரியர்கள் மற்றும் மாணவர்கள் பலரும் கலந்து கொண்டனர்.

 கோலாலம்பூர், மே.26- இசையமைப்பாளர்கள், பாடகர்கள் மற்றும், பாடாலாசிரியர்கள் என 66 பேர் பங்கேற்ற 'ஹோம் மேட் மெலடிஸ்' (Homemade Melodies) என்ற இன்னிசை ஆல்பத்தை மலேசியாவின் பிரபல இசையமைப்பாளரான ஜெய் மற்றும் பாடகர் பிரித்தா பிரசாத் ஆகியோர் வெளியிட்டு சாதனை படைக்கவுள்ளனர்.

ஒடிசி பாட்டிசை பள்ளியைச் சேர்ந்த 66 மாணவர்கள் இந்தப் படைப்பில் தங்களின் பங்களிப்பைச் செய்துள்ளனர்.

ஒரே ஆல்பத்தில், இத்தனை இசைத் துறை மாணவர்களை ஒன்றுதிரட்டி மலேசிய இசையுலகிற்கு ஓர் உன்னதப் படைப்பை அளித்ததன் வழி இசையமைப்பாளர் ஜெய்யும் பாடகி பிரீத்தா பிரசாத்தும் ஒரு புதிய வரலாறு உருவாகக் காரணமாக அமைந்தனர்.

இந்த இசை ஆல்பம், மலேசியா சாதனைப் புத்தகத்தில் இடம்பெறச் செய்ய இவர்கள் முயன்றுள்ளனர். அதாவது, ஒரே ஆல்பத்தில் அதிக எண்ணிக்கையிலான இசைக் கலைஞர்கள் ஒன்றிணைந்திருக்கும் அடிப்படையில் இது மலேசிய சாதனைப் புத்தகத்தில் இடம்பெறும் என எதிர்பார்க்கப்படுகிறது.

வாழ்க்கையின் வெவ்வேறு நிலைகளைச் சேர்ந்தவர்கள் இந்த மாணவர்கள். இசையின்பால் கொண்ட மோகம் காரணமாக இந்த ஆல்பத்தில் இணைந்துள்ளனர். 

மேலும், மலேசியாவில் நவீன இசைப்பயிற்சிப் பள்ளி ஒன்று தனது மாணவர்கள் அனைவரையும் இந்த ஆல்பத்தில் இடம்பெறச் செய்து உள்ளூர் கலைத்திறன் பளிச்சிட செய்யப்பட்டிருப்பது இதுவே முதன் முறையாகும். 

இந்த ஆல்பத்தில் மொத்தம் 19 பாடல்கள் இடம்பெற்றுள்ளன. இதன் பாடகர்கள், இசையமைப்பாளர்கள் மற்றும் பாடலாசிரியர்கள் அனைவருமே இந்த மாணவர்கள் தான்.

நாளை 27.5.2017 சனிக்கிழமை பிற்பகல் 3 மணிக்கு பிஜே லைப் ஆர்ட் செண்டரில் இந்த இன்னிசை ஆல்பம் அதிகாரப்பூர்வமாக வெளியீடு காணவிருக்கிறது. இந்த நிகழ்ச்சி குறித்த கூடுதல் விபரங்களை அறிய Odyssey Vocal & Music Training முகநூலில் அறிந்து கொள்ளலாம்.

 கோலாலம்பூர், மே.26- மலேசியர்களில் பெரும்பாலோர், ஒருவரின் கலாசாரத்தை, மற்றொருவர் மதிப்பவர்களாகவே இருக்கின்றனர் என்று அண்மைய ஆய்வு ஒன்று கூறுகிறது.

டி.என்.50 குறித்து காஜிடாடா ஆய்வுத் துறை மேற்கொண்ட தேசிய ஆய்வு ஒன்றில் இது தெரிய வந்திருக்கிறது. மேலும் கிட்டத்தட்ட 72.3 விழுக்காட்டினர் தங்களின் அண்டை வீட்டுக்காரர்களாக பல இனத்தவர்கள் இருப்பதை விரும்புகின்றனர்.

கடந்த மார்ச் மாதம் 8ஆம் தேதிமுதல் 17ஆம் தேதிவரை இந்த ஆய்வு மேற்கொள்ளப்பட்டது. பெரும்பாலோர் ஒற்றுமை என்பதன் பொருளை அறிந்தே இருக்கின்றனர். ஒற்றுமை என்பது சமூகங்களுக்கு இடையேயான ஒத்துழைப்பு என்றும் பல இனங்கள் நல்லிணக்கத்துடன் வாழ்வது என்றும் ஒருவர் மற்றவரிடம் சகிப்புத்தன்மை பாராட்டுவது என்று கருதுகின்றனர்.

மற்றவர்களின் கலாசாரத்தை அவர்கள் மதிக்கவேண்டும் என்று 96.9 விழுக்காட்டினர் கருதுகின்றனர். சமயச் சுதந்திர உத்தரவாதம் கொண்ட, பல சமய நம்பிக்கை உள்ள நாடு மலேசியா என்பதை 80 விழுக்காட்டினர் ஏற்றுக் கொண்டனர்.

தங்களின் அண்டை விட்டுக்காரர்கள் பல இனங்களைச் சார்ந்தவர்களாக இருக்கவேண்டும் 72.6 விழுக்காட்டினர் விரும்புகின்றனர். மேலும் தங்களுடைய குடும்பத்தினரோ அல்லது பிள்ளைகளோ மற்ற இனத்தினருடன் நட்பு பாராட்டுவதை ஊக்குவிக்க 95.7 விழுக்காட்டினர் தயாராக இருக்கின்றனர்.

கோலாலம்பூர், மே.26- கோலாலம்பூரில் உள்ள அமெரிக்க தூதரகம் வரும் திங்கள் கிழமையன்று (தேதி: 29/05/2017) மூடப்படும் என்று அறிவிக்கப்பட்டுள்ளது.

ஆண்டுதோறும் மே மாதம் இறுதி திங்கள் கிழமை அமெரிக்காவில் ராணுவ நினைவு நாள் கொண்டாடப்படுவதால் அங்கு பொது விடுமுறை அளிக்கப்படுகிறது. அதனால் உலகளாவிய நிலையில் அமெரிக்க தூதரகத்திற்கும் விடுமுறை தினமாகும்.

அமெரிக்க ராணுவ வீரர்களின் தியாகங்களை மதிக்கும் வகையில் இந்த நாள் கொண்டாடப்படுகிறது. அந்த நாளன்று அமெரிக்காவில் பல இடங்களில் அணிவகுப்புகள் நடைபெறும்.

கோலாலம்பூர் அமெரிக்கத் தூதரகப் பணிகள் மீண்டும் செவ்வாய்கிழமை வழக்கம் போல் தொடரும். திங்கள் கிழமையில் அவசர பணி மேற்கொள்ள விரும்புவோர் 03-21685000 எண்ணை தொடர்புக் கொள்ளலாம்.

More Articles ...