ஜோர்ஜ் டவுன், ஏப்ரல்.18- இரண்டாவது பினாங்கு பாலத்திலிருந்து கீழே குதித்து தற்கொலை செய்து கொள்ள முயன்ற  பெண்ணை, அப்போது கடலில் படகில் சென்றுக் கொண்டிருந்த மீனவர்கள் காப்பாற்றினர்.  

இன்று காலை 11.13 மணியளவில், தனது டொயோட்டா அவான்ஸா காரை, பாலத்தின் ஓரத்தில் நிறுத்தி வைத்து விட்டு, அந்தப் பெண் பாலத்தின் சுவரின் மீது ஏறி நின்று கடலில் குதித்தார்.  

அப்பெண் கடலில் குதித்த சில நொடியில், அவர் கடலில் தத்தளித்துக் கொண்டிருந்ததைக் கண்ட மீனவர்கள்,  உடனடியாக கடலில் குதித்து அப்பெண்ணைக் காப்பாற்றினர். 

அந்தக் காப்பாற்றும் முயற்சியை மீனவர் ஒருவர் தனது கைத்தொலைபேசியில் வீடியோ எடுத்து, தனது சமூக வலைத்தளத்தில் பகிர்ந்ததைத் தொடர்ந்து, அந்த வீடியோ பரவலாகியது.

காப்பாற்றப்பட்ட அந்தப் பெண்ணை, அருகிலுள்ள படகுத்துறைக்கு அந்த மீனவர்கள் தூக்கி வந்தனர். தீயணைப்பு வீரர்கள் மற்றும் மீட்புப் படையினர், அந்தப் பெண்ணுக்கு முதலுதவி வழங்கினர். அந்தப் பெண் மருத்துவமனைக்குக் கொண்டுச் செல்லப்பட்டார் என்று பினாங்கு மாநில தீயணைப்பு இலாகா தகவல் தெரிவித்துள்ளது.

 

ஷா ஆலாம், ஏப்ரல்.18- இருபது நாட்களுக்கு முன்னர், சோஸ்மா சட்டத்தின் கீழ் கைது செய்யப்பட்ட 38  வயதான தனபாலன் சுப்ரமணியம் என்ற ஆடவர், போலீஸ் காவலில் மரணமடைந்தார். 

கடந்த மார்ச் மாதம் 29-ஆம் தேதியன்று, தனது பிள்ளைகளில் ஒருவரை ஆரம்பப்பள்ளியில் இறக்கி விட்ட தருணத்தில், தனபாலன் போலீசாரால் கைது செய்யப்பட்டதாக அவரின் உறவினர் தெரிவித்தார். 

கார் ஓட்டும் பயிற்சி நிலையத்தில் வேலை செய்து வந்த தனபாலன், கைது செய்யப்பட்டு போலீஸ் காவலில் அடைக்கப்பட்ட நாளிலிருந்து, தங்களால் அவரை சந்தித்து பேச முடியவில்லை என்றும் அந்த உறவினர் கூறினார். 

காவலில் வைக்கப்பட்ட தனபாலன் நேற்று மாரடைப்பால் மரணமடைந்து விட்டார் என்று போலீசார் தொலைப்பேசி வாயிலாக அவரின் குடும்பத்தாரிடம் தெரிவித்தனர் என்பது குறிப்பிடத்தக்கது.

'சோஸ்மா' சட்டத்தின்  கீழ் ஏன் தனபாலன் கைது செய்யப்பட்டார் என்று தங்களுக்கு தெரியவில்லை என்றும், அவரின் இளைய சகோதரர் ஒருவரும் அந்தச் சட்டத்தின் கீழ் மார்ச் 28-ஆம் தேதி கைது செய்யப்பட்டார் என்றும் தனபாலனின் உறவினர் சொன்னார்.

தனபாலன் மரணம் தொடர்பில்  இன்று பிரேதப் பரிசோதனை மேற்கொள்ளப்படும் என்று காப்பார் நாடாளுமன்ற முன்னாள் உறுப்பினர் ஜி.மணிவண்ணன் கூறினார். தனபாலனின் மரணம் குறித்து விசாரணை மேற்கொள்ளப்படுவதால், போலீசார் மற்ற தகவல்களை வெளியிட மறுத்து விட்டனர் என்றும் மணிவண்ணன் சொன்னார். 

“அவர் போலீஸ் காவலில் இறந்துள்ளார். எங்கள் சார்பில் மருத்துவ நிபுணர் ஒருவரை அந்தப் பிரேதப் பரிசோதனையை கண்காணிக்க எங்கள் அலுவலகம் முயற்சித்து வருகிறது” என்றார் அவர். 

இந்தப் பரிசோதனை குறித்து தங்களுக்கு சந்தேகம் ஏதும் எழும் பட்சத்தில், இரண்டாவது முறையாக பிரேதப் பரிசோதனை நடத்துமாறு தனபாலனின் குடும்பத்தார் கேட்டுக் கொள்வர் என்றும் அவர் சொன்னார். 

அந்த போலீஸ் காவல் நிலையத்தில் இதர கைதிகளோடு தனபாலன் அடைக்கப்பட்டார் என்றும், அங்கு சிசிடிவி காமிராக்கள் பொருத்தப்பட்டு உள்ளதாகவும் தெரிவிக்கப்பட்டுள்ளது.

 

 

 

 

 

 

 

கோலாலம்பூர்,ஏப்ரல்.18- முன்னாள் ஐஜிபி டான்ஶ்ரீ காலிட் அபு பக்கார் மற்றும் அமைச்சர் டத்தோஶ்ரீ இஸ்மாயில் சப்ரி யாக்கோப் ஆகியோர் லெம்பா பந்தாய் எம்.பி.யாக இருந்த நூருல் இஷா அன்வாருக்கு 10 லட்சம் ரிங்கிட்டை  இழப்பீடாக வழங்க வேண்டும் என்று இங்குள்ள உயர்நீதிமன்றம் உத்தரவிட்டது.

காலிட் அபு பக்கார் 4 லட்சம் ரிங்கிட்டும் இஸ்மாயில் சப்ரி 6  லட்சம் ரிங்கிட்டும் வழங்க வேண்டும் என்று நீதித்துறை ஆணையர் ஃபைஷா ஜமாலுடின் தீர்ப்பு அளித்தார்.

கடந்த 2013 ஆம் ஆண்டில் சாபாவுக்குள் ஊடுருவியவர்களுக்கு தலைமை ஏற்றிருந்ததாக கூறப்படும் ஜமாலுடின் கிராம் என்பவரின் மகள் ஜசெல் கிராம் என்பவருடன் புகைப்படத்தில் தோன்றியதன் வழி  நூருல் இஷா, தேசத் துரோகம் புரிந்து இருப்பதாக காலிட்டும் இஸ்மாயில் சப்ரியும் குற்றஞ்சாட்டி இருந்தனர்.

புக்கிட் அமானில் நடந்த செய்தியாளர்கள் கூட்டத்தில் காலிட் இவ்வாறு தம் மீது அவதூறு கூறும் வகையில் பேசியதாக அவர் வழக்குத் தொடுத்திருந்தார்.  அதே நாளில் அமைச்சர் இஸ்மாயில் சப்ரியும் இதே போன்ற அறிக்கை விடுத்திருந்ததாக அவர் மீதும் வழக்கு போட்டார் நூருல் இஷா. 

இத்தகைய அறிக்கையை விடுக்கும் முன்னர் அது குறித்து நூருல் இஷாவிடம் உண்மை நிலையை அறிந்து கொள்ளத் தவறியதோடு அவருக்கு எதிராக இவர்கள் இருவரும் அவதூறு புரிந்திருப்பது கண்டறியப் பட்டிருப்பதாக நீதித் துறை ஆணையர்  ஃபைஷா ஜமலுடின் தமது தீர்ப்பில் குறிப்பிட்டார். மேலும் வழக்கு செலவு தொகையாக 80 ஆயிரம் ரிங்கிட்டை இவர்கள் இருவரும் வழங்வேண்டும் என்றும் அவர் தீர்ப்பில் கூறினார்.

கோலாலம்பூர், ஏப்ரல். 16- விளம்பி புத்தாண்டை முன்னிட்டு மலேசிய இந்து சங்கம், ‘இந்து புத்தாண்டு 2018’ எனும் மாபெரும் விழாவினைத் தலைநகரில் உள்ள பிரிக்பீல்ட்ஸ் லிட்டல் இந்தியாவில் மிக விமரிசையாக நடத்தியது. இதில் இரண்டு ஆயிரத்திற்கும் அதிகமான பொதுமக்கள் கலந்து கொண்டு மகிழ்ச்சியுடன் கொண்டாடினர்.

பிரிக்பீல்ட்சிலுள்ள தாமரைக் குளம் அருகே பிரமாண்ட மேடை அமைப்புடன் இந்த புத்தாண்டு கொண்டாட்டம்  பிற்பகல் 2 மணிக்கு தொடங்கி,  இரவு 9 மணி வரை நடைபெற்றது.

இவ்விழாவில் நாதஸ்வர இசைக் கச்சேரி முதல் இசை படைப்பாக அரங்கேறியது. பின்னர் திருமுறை, தேவாரம் போன்ற படைப்புகள் ஏற்பாடு செய்யப்பட்டிருந்தன. சுவாரஸ்யமான வகையில் ஏற்பாடு செய்யப்பட்டிருந்த இந்த படைப்புகளை விழாவிற்கு வருகை தந்திருந்த பொதுமக்கள் மகிழ்ச்சியுடன் ரசித்தனர். 

ஒருபுறம் பிரதான மேடையில் சமய நிகழ்ச்சிகள் அரங்கேறி கொண்டிருக்க, அருகில் அமைக்கப் பட்டிருந்த மற்ற பந்தல்களில் பல்லாங்குழி மற்றும் உரி அடித்தல் போன்ற பாரம்பரிய விளையாட்டுக்கள் நடத்தப்பட்டன. போட்டிகளில் கலந்து வெற்றி பெற்ற பொதுமக்களுக்கு பரிசுகள் வழங்கப்பட்டன. 

மேலும், மலையாளம், தெலுங்கு, பெங்காலி மற்றும் மஹாராஷ்டிரா சங்கங்களிலிருந்து மோகினி ஆட்டம், குச்சிப்புடி, பரதநாட்டியம் போன்ற கண்கவர் நடனங்களும் கரகாட்டம், மயிலாட்டம், பொய்க்கால் குதிரை போன்ற கிராமிய நடனங்களும் விழாவில் இடம்பெற்றன.

அதோடு, விழாவில் கலந்து கொண்ட மக்களுக்கு இந்தியர்களின் பாரம்பரிய உணவுகள் வழங்கப்பட்டன. மேலும் அவற்றின் செய்முறைகளும் செய்து காட்டப்பட்டன.

விழாவில் தலைமையுரை ஆற்றிய மலேசிய இந்து சங்கத்தின் தேசியத் தலைவர் ஶ்ரீகாசி டத்தோ ஆர்.எஸ். மோகன் ஷான், வந்திருந்த மக்களுக்கு இந்து புத்தாண்டு கொண்டாடுவதன் நோக்கத்தினை எடுத்துரைத்தார். 

மேலும், முதல் முறையாக தமிழ், மலையாளம், தெலுங்கு, பெங்காலி, பஞ்சாபி, மராட்டி மற்றும் சிந்தி ஆகிய இனங்களைச் சேர்ந்தவர்களுடன் இணைந்து இந்து புத்தாண்டைக் கொண்டாடியது மகிழ்ச்சிக்குரியது என்று கூறினார். 

இந்தியர்களின் மேம்பாட்டிற்கு உருவாக்கப்பட்ட இந்தியன் புளூபிரிண்ட் எனும் இந்தியர்களுக்கான பெருந்திட்ட வியூக வரைவு திட்டத்தில் சமயம், மற்றும் கோயில் சார்ந்த விவகாரங்களுக்கு அதிக கவனம் செலுத்தப்பட வேண்டும் என்றும் டத்தோ மோகன் ஷான் தெரிவித்தார்.

விழாவின் முக்கிய அங்கமாக, சாதனை புரிந்த மற்றும் சமூக சேவையாற்றிய ஐவருக்கு மலேசிய இந்து சங்கம் விருதுகள் வழங்கி கௌரவித்தது. அதில் ஶ்ரீ அர்ஜுனா எனும் விருதை மலேசியச் சுங்கத் துறை இலாகாவின் தலைமை இயக்குனர் டத்தோஶ்ரீ து.சுப்ரமணியம், பினாங்கு மாநில போலீஸ் படைத் தலைவர் டத்தோ ஆ.தெய்வீகன் மற்றும் மலேசியச் சிறை இலாகாவின் பாதுகாப்பு மற்றும் புலனாய்வு பிரிவின் துணை இயக்குனர் டிசிபி கா.அண்ணாதுரை ஆகிய மூவரும் பெற்றனர்.

மேலும், மலேசிய சிறை இலாகாவின் கைதிகள் நிர்வாகப் பிரிவின் துணை இயக்குனர் டிசிபி ச.கௌசல்யா தேவி மற்றும் தன் பிள்ளைகளின் மதமாற்றத்திற்கு எதிராக எட்டு ஆண்டுகள் சட்டப் போராட்டம் நடத்திய பாலர் பள்ளி ஆசிரியையான மு.இந்திரா காந்தி ஆகிய இருவரும் மலேசிய இந்து சங்கத்தின் 'விவேக நாயகி' விருதினைப் பெற்றனர்.

சமயத்தையும் பாரம்பரியத்தையும் மக்கள் ஒருசேர ஒரே இடத்தில் அறிந்து கொள்ளும் வகையில் இரவு 9 மணி வரை பக்தி, நாட்டுப்புற மற்றும் தன்முனைப்பு பாடல்களும் நடனங்களும் அரங்கேறின. 

கோலாலம்பூர், ஏப்ரல்.17-  மலேசியாவில் 10க்கு  9 பேர் இரவு நேரத்தில் தூக்கமின்மையால் பாதிக்கப்பட்டுள்ளனர்., கைத்தொலைபேசியில் அதிக நேரத்தை செலவிடுவதால் அவர்கள் தூங்க முடியாமல் தவிக்கின்றனர் என்று நாடு தழுவிய நிலையில் நடத்தப்பட்ட ஆய்வறிக்கை ஒன்று கூறியுள்ளது.   

ஏம் லைஃப் இண்டர்நேஷனல் (AM Life Insurance Sdn.Bhd) நிறுவனத்தால் நடத்தப்பட்ட ‘தூக்க ஆய்வில்’ பதிலளித்த 31 விழுக்காட்டினர், தாங்கள் ஒவ்வொரு நாளும் தூக்கக் கலக்கத்திலேயே இருப்பதாக தெரிவித்துள்ளனர். மேலும் 46 விழுக்காட்டினர், இரவு நேரங்களில் திடீரென்று தாங்கள் விழித்துக் கொள்வதாக தெரிவித்துள்ளனர்.

32 விழுக்காட்டினர் தூக்கமின்மையால் தங்களுக்கு காலை நேரங்களில் அதிக சோர்வு ஏற்படுவதாகவும், அதனால் அமைதியற்ற நிலையில் தாங்கள் அன்றாடம் இருப்பதாகவும் தெரிவித்துள்ளனர். 

இந்த ஆய்வின் வாயிலாக, மலேசியர்களில் 66 விழுக்காட்டினர், ஒரு வாரத்தில் குறைந்தது ஒரு முறையாவது தூக்கமின்மையால் தவிக்கின்றனர் என்பது தெரிய வந்துள்ளது.  

ஒவ்வொரு நாள் இரவும், மக்கள் 7-லிருந்து 9 மணி நேரம் வரை தூங்க வேண்டும் என்றும், மலேசியர்களில் பெரும்பாலானோர் 6.3 மணி நேரம் தூங்குகின்றனர் என்று அந்த ஆய்வறிக்கை தகவல் வெளியிட்டுள்ளது. 

பத்திலிருந்து 20 நிமிடத்திற்குள் தூங்கச் செல்லும் மக்கள் தூங்கி விட வேண்டும் என்றும் அந்த ஆய்வறிக்கை பரிந்துரைத்துள்ளது. ஆனால், மலேசியர்கள் தூங்குவதற்கு சுமார் 30 நிமிடங்கள் எடுத்துக் கொள்கின்றனர் என்பது குறிப்பிடத்தக்கது.

“ஆரோக்கியமற்ற வாழ்க்கை முறையால், தங்களின் தூக்கம் பாதிப்படைகிறது என்று பத்தில் ஆறு மலேசியர்கள் தகவல் தெரிவித்துள்ளனர். மேலும் பலர் அதிக நேரம் கைத்தொலைபேசியில் நேரத்தை செலவிடுவதால், தங்களால் தூங்க முடியவில்லை என்றும் கூறியுள்ளனர்” என்று எ.எம் லைஃப் கூறியது.

மன அழுத்தம் மற்றும் கவலையினால் 52 விழுக்காட்டினரால் தூங்க முடியவில்லை. சுற்றுச்சூழல் பிரச்சனைகளால் 26 விழுக்காட்டினர் தூங்க இயலாமல் தவிக்கின்றனர் என்றும் அந்த ஆய்வறிக்கை வாயிலாக தெரிய வந்துள்ளது.

கோலாலம்பூர், ஏப்ரல்.17- ‘ராஜா போமோ’ என்று தன்னை அறிமுகப்படுத்திக் கொள்ளும் மலேசியாவின் ‘ராஜா போமோ’14-ஆவது பொதுத் தேர்தலில் போட்டியிட திட்டமிட்டிருப்பதாக ‘ஹரியான் மெட்ரோ’ நாளிதழ் தெரிவித்துள்ளது. 

இப்ராஹிம் மாட் ஸின் என்ற அந்த ஆடவர், பேரா மாநிலத்தின் நாடாளுமன்றம் மற்றும் சட்டமன்ற தொகுதிகளில் போட்டியிடும் தனது எண்ணத்தை இன்று பிற்பகல் 2 மணிக்கு நடைபெறவிருக்கும் செய்தியாளர் கூட்டத்தில் அறிவிப்பார் என்ற தகவல் வெளியாகியுள்ளது. 

கடந்த 2014-ஆம் ஆண்டு காணாமல் போன எம்.எச்.370 மலேசிய விமானத்தை தம்மால் கண்டுப் பிடிக்க முடியும் என்று கூறி, பறக்கும் கம்பளம் மற்றும் மூங்கில் தொலைநோக்கி கொண்டு தம்மால் கண்டுப் பிடிக்க முடியும் என்று கூறி, கோலாலம்பூர் விமான நிலையத்தில் கோமாளித்தனமாக இந்த ‘ராஜா போமோ’நடந்துக் கொண்டார் என்பது குறிப்பிடத்தக்கது.

அதுமட்டுமல்லாது, கடந்த ஆண்டு, வட கொரியா அதிபரின் சகோதரரான கிம் ஜோங் நாம் மலேசியாவில் கொலைச் செய்யப்பட்டதைத் தொடர்ந்து, மலேசியாவிற்கும் வட கொரியாவிற்கும் போர் எழக் கூடும் என்று கூறி, தனது ‘வித்தைகளை’ கொண்டு தம்மால் மலேசியாவிற்கு பாதுகாப்பு வழங்க முடியும் என்று கூறி, அவ்வித்தையை அவர் விமான நிலையத்தில் அரங்கேற்றி, மலேசியர்களை கடுப்பேற்றினார்.  

அவரின் செய்கையை பலர் சாடிய வேளையில், கடந்த ஏப்ரல் மாதம், ஷாரியா நீதிமன்றத்தில் அவர் மீது வழக்கு தொடங்கப்பட்டது. 

கோலாலம்பூர், ஏப்ரல்.17- பிறந்த நாளன்று சக மாணவனுக்கு பிறந்த நாள் வாழ்த்துப் பாடல் பாடிய பின்னர், அவரைத் துடைப்பத்தால் அடித்து துன்புறுத்திய 9 இடைநிலைப்பள்ளி மாணவர்கள் கைது செய்யப்பட்டுள்ளனர். 

கைது செய்யப்பட்டுள்ள அந்த 17 வயது மாணவர்கள், புக்கிட் ஜெலுத்தோங் இடைநிலைப்பள்ளியைச் சேர்ந்தவர்கள் என்று சிலாங்கூர் சிஐடி தலைவர் மூத்த துணை ஆணையர் ஃபாட்ஸீல் அகமட் சொன்னார்.   அந்த 9  மாணவர்களும் கைது செய்யப்பட்டு, அதன் பின்னர் போலீஸ் ஜாமீனில் விடுவிக்கப்பட்டனர் என்று அவர் கூறினார். 

“நேற்று காலை 11.30 மணிக்கு கைது செய்யப்பட்ட அவர்கள், பிற்பகல் 4.45 மணிக்கு போலீஸ் ஜாமீனில் விடுவிக்கப்பட்டனர்” என்று அவர் தெரிவித்தார்.  கடந்த ஞாயிற்றுக்கிழமையன்று, பாதிக்கப்பட்ட அந்த மாணவர் போலீஸில் புகார் கொடுத்த்தைத் தொடர்ந்து, அந்தக் கைது நடவடிக்கை மேற்கொள்ளப்பட்டது. 

“பிப்ரவரி மாதம் 8-ஆம் தேதியன்று அச்சம்பவம் நடைபெற்றுள்ளது. அதன் தொடர்பில் விசாரணை மேற்கொள்ளப்பட்டு வருகிறது” என்று ஃபாட்ஸீல் சொன்னார். 

அந்த மாணவனின் பிறந்த நாளன்று, அவனுக்கு வாழ்த்துக் கூறிய பின்னர், 8 மாணவர்கள் அவனை துடைப்பத்தால் அடித்து துன்புறுத்தும் வீடியோ சமூக வலைத்தளங்களில் அண்மையில் பரவலானது. மாணவர்களின் பிறந்த நாளை அவர்கள் அவ்வாறு தான் கொண்டாடுவார்கள் என்றும் தெரிவிக்கப்பட்டுள்ளது.

More Articles ...