கோலாலம்பூர், பிப்.22- மலேசியாவின் பிரபல ஆடை வடிவமைப்பாளரான டத்தோஶ்ரீ பெர்னார்டு சந்திரனின் புதுமைச் சிந்தனையில் உதித்த ஆடை வடிவமைப்புகள் பிரிட்டீஷ்  இளவரசி கேத் மிடில்டனை பெரிதும் ஈர்த்தன.

அண்மையில் பாக்கிங்ஹாம் அரண்மனையில் நடந்த ஆடை வடிவமைப்பு மீதான காமன்வெல்த் ஆடை வடிவமைப்பு பரிமாற்றக் கண்காட்சியில், தம்முடைய வடிவமைப்புகளை  இளவரசியின் பார்வைக்கு முன்வைக்க டத்தோஶ்ரீ பெர்னார்ட் சந்திரனுக்கு அழைப்பு விடுக்கப்பட்டிருந்தது.

மிகவும் கௌரவமிக்க இந்த நிகழ்வில் பங்கேற்க அழைக்கப்பட்ட ஒரேயொரு மலேசியர் இவர்தான் என்பது குறிப்பிடத்தக்கது. உலகின் மிகச் சிறந்த ஆடை வடிவமைப்பாளர்கள் இதில் பங்கேற்றனர். 

மலேசியாவின் 'ஃபாஷன்  கிங்" என அழைக்கப்படும் 50 வயதுடைய பெர்னார்டு சந்திரன், தமது வடிவமைப்புகளை இளவரசி கேத் கண்டு மகிழ்ந்த  அந்தச் சிறப்புமிக்க தருணங்களை தம்முடைய இன்ஸ்டாகிராமில் பதிவேற்றம் செய்துள்ளார். தம்முடைய வடிவமைப்பு  பற்றி மேலும் கூடுதலாக அறிந்து கொள்ள இளவரசி கேத் ஆசைப்பட்டார் என்றும் அவர் சுட்டிக்காட்டினார்.

கோலாலம்பூர், பிப்.22- சிவன் ஃபைன் ஆர்ட்ஸ் அகாடமி சார்பில் 'சங்கீத கலாநிதி' பாபனாசம் சிவனின் பாடல்களுக்கான  இசை, நடனப் போட்டிகள் எதிர்வரும் 24ஆம் தேதி சனிக்கிழமை பிரிக்பீல்ஸ் ஸ்காட் ரோடு கந்தய்யா மண்டபத்தில் நடைபெறுகிறது. 

காலை 8 மணி முதல் வாய்பாட்டு, வயலின், வீணை, புல்லாங்குழல், மிருதங்கம், பரத நாட்டியம் ஆகிய பிரிவுகளில் போட்டிகள் விமர்சையாக நடைபெறவுள்ளன.

இந்தியாவிலிருந்து பிரபலக் கலைஞர்களான பாபனாசம் அசோக் ரமணி, வசந்த குமார் (வீணை), நாகை ஶ்ரீராம் (வயலின்) மற்றும் ரஞ்சனி ரங்கன் (பரதநாட்டியம்) ஆகியோர் நடுவர்களாகவும் செயல்படும் அதேவேளையில் கலை நிகழ்ச்சிகள் நடத்தவும் உள்ளனர்.  இந்நிகழ்ச்சி கடந்த பத்து வருடங்களாக தொடர்ந்து நடந்து வருகிறது. 

போட்டிகளைத்  தொடர்ந்து, முக்கிய நிகழ்ச்சியாக, பல இசை நடனக் கலைஞர்கள்  கெளரவிக்கப்பட்டு, பரிசுகள் வழங்கி, சிறப்பு செய்யப்பட  உள்ளனர். மாலை 7 மணி அளவில் பல முக்கிய பிரமுகர்கள் இந்நிகழ்வில் கலந்து கொள்கிறார்கள். 

ஆஸ்ட்ரோ நிகழ்ச்சிகளின் குழும நிர்வாக இயக்குனர் டாக்டர் ராஜாமணி செல்லமுத்து, இந்திய நிகழ்ச்சிகளின் தலைவர் திரு.முருகையா வெள்ளை  ஆகியோர்  சிறப்பு விருந்தினர்களாக கலந்து கொள்கிறார்கள்.    மேலும் விவரங்களுக்கு 011 235 66921 என்ற தொலைபேசியில் அசோக் ரமணியை தொடர்பு கொள்ளலாம்.

 

கோலாலம்பூர், பிப்.22- மலாயா ஆக்கிரமிப்பு காலத்தில், குறிப்பாக 1943 ஆம் ஆண்டில் மலாயா தமிழர்கள் கொத்தடிமைகளாக ஜப்பானி யர்களால் பிடித்து செல்லப்பட்டு சயாமில்  மரண ரயில் பாதை அமைக்கும் பணியில் ஈடுபடுத்தப்பட்ட  கறுப்பு வரலாற்றில் தடம் அறியப் புறப்பட்ட மலேசியக் குழு  முதல் கட்டமாக பான் போங் என்ற இடத்திற்கு வந்து சேர்ந்தது. 

மரண ராயில் பாதை அமைப்புக்காக கொண்டு செல்லப் பட்ட தமிழர்கள், முதலில் இறக்கிவிடப்பட்ட இடமான டோம் டூம் பகுதிக்கு மலேசியக் குழுவினர் வருகை புரிந்தனர்.

பட விளக்கம் ## இரண்டாம் உலகப்போரின் போது , ஆயுதங்கள் வெடி மருந்துகள் கொண்டு செல்ல  ஜப்பானியர்கள் பயன்படுத்திய ரயிலின் முன்பு மலேசியக் குழுவினர்... ஜப்பானியர்கள் தங்களின் போரை பர்மா மற்றும் இந்தியா வரை நகர்த்த திட்டமிட்டிருந்ததால் அதற்காக ஆயுதங்களை இந்த ரயிலில்தான் கொண்டு சென்றனர். 

சயாம் மரண ரயில் பாதை அமைப்பதில்  உயிர்நீத்த மலேசியத் தமிழர்களின் 75 ஆண்டு கால வரலாற்றில், முதன் முறையாக, அவர்களுக்கு இறுதி அஞ்சலி செலுத்த 20 பேர் கொண்ட குழு ரயிலில் பிப்ரவரி 21ஆம் தேதி கோலாலம்பூர் ரயில் நிலையத்திலிருந்து  தாய்லாந்து சென்றது.

இந்தக் குழுவில்,   மரண ரயில் பாதைக்காக கொண்டு செல்லப்பட்டு மீண்டு வந்த  இரு முதியவர்களும் இடம் பெற்றனர். 91 வயதுடைய ஆறுமுகம் கந்தசாமி மற்றும் 84 வயதுடைய பொன்னம்பலம் வீச்சான் ஆகிய இருவரும் அந்த சயாம் மரணக் கொடுமையிலிருந்து   உயிருடன் மீண்டு எஞ்சியிருக்கும் மலேசியத் தமிழர்களாக கருதப்படுகின்றனர்.

பட விளக்கம் ## இரண்டாம் உலகப் போரின் போது ஜப்பானியர்கள் எழுப்பிய நினைவு சின்னம்.., சயாம் மரண ரயில் திட்டத்தில் இருந்து மீண்ட  84 வயதுடைய பொன்னம்பலம்  ( இடதுபுறம் நிற்பவர்) மற்றும் 91 வயது ஆறுமுகம் (வலது புறம் நிற்பவர்) மற்றும் மலேசியக் குழுவினர்.

1943-இல், அவர்கள் எந்தக் கோலாலம்பூர் ரயில் நிலையத்திலிருந்து ஜப்பானிய ஆக்கிரமிப்பாளர்களால் மரண ரயில் அமைக்க கொண்டு செல்லப்பட்டார்களோ, அதே ரயில் நிலையத்திலிருந்து   தங்களது மறுபயணத்தைத் தொடங்கினார்கள் என்பது குறிப்பி டத்தக்கது.

நமது மக்கள், சென்ற அதே பாதையில்   மரண ரயில் பகுதிகளுக்கு மறு வருகை மேற்கொண்டு, பர்மா எல்லை வரை சென்று  இறந்து போன நம்மவர்களுக்கான காரியங்களையும்  பிரார்த்தனைகளையும் செய்வோம் என்று  மரண ரயில் நல ஆர்வக்குழு  என்ற அமைப்பின் ஏற்பாட்டாளரான பி.சந்திரசேகரன் ஏற்கெனவே தெரிவித்திருந்தார்.

இந்த டோம் டூம் பகுதி தான் நம்மபவர்கள் அடிமைகளாக கொண்டு வரப்பட்டு ரயில் பாதை வேலைக்கு   இறக்கி விடப்பட்ட முதல்  இடம். என்று சந்திரசேகரன் வணக்கம் மலேசியாவிடம் தெரிவித்தார்.

எங்கள் குழுவை  இங்குள்ள தலைமை புத்த பிக்கு வரவேற்றார்.  இந்த முகாம் பகுதியில் அமைந்துள்ள கோயில் பற்றிய விபரத்தை அவர் எங்களுக்கு விளக்கினார் என்று   சந்திரசேகரன் 'வணக்கம் மலேசியா'விடம்  இன்று தெரிவித்தார்.

பட விளக்கம் ## ஜப்பானியர் நினைவுச் சின்னத்தில் பெரியவர் 91 வயதுடைய ஆறுமுகம்.. இங்கு உயிர்நீத்த நம்மவர்களின் நினவைச் சொல்லத் தான் எதுவுமே இல்லை என்ற ஏக்கத்தைப் புலப்படுத்தினார் ஆறுமுகம்

பின்னர் மலேசியக் குழு, குவாய் ஆற்றுப் பாலத்தை மாலையில்  சென்று கண்டது. ஜப்பானியர்களின் மரண ரயில் பாதையில் முக்கியத்துவம் வாய்ந்த பாலம் இதுவாகும். 

இந்த ரயில் பால அமைப்பில் நம்மவர்கள் உள்பட ஜப்பானியர்களால் போர்க் கைதிகளாக பிடிக்கப்பட்ட பிரிட்டீஷ் மற்றும் ஆஸ்திரேலியாக்கா ரர்களும் ஈடுபடுத்தப் பட்டு   பலர் மாண்டு போயினர்.  மேலும் கஞ்சனா புரியினுள்ள முக்கிய பிரமுகரான டாக்டர் சூரினுடன் மலேசியக் குழுவினர் சந்திப்பு நடத்தினர்.

இங்கு மலாயா தமிழர்களின் நினைவாக, நினைவிடம் ஒன்றையும் தகவல் மையம் ஒன்றையும்  அமைக்கும் தங்களின் ஆசையை குழுவினர் வெளியிட்டனர்.  இந்தக் கனவை நிறைவேற்றி வைக்க தன்னால் இயன்ற உதவியைச் செய்வதாக டாக்டர் சூரின் உறுதி அளித்தார் என்றார் சந்திரசேகரன்.

இன்று காலையில் இங்குள்ள ஜப்பானியர்களின் நினைவிடத்தை சென்று பார்த்த குழுவினர், பின்னர் மீண்டும் குவாய் பாலத்திற்கு வருகை மேற்கொண்டனர். மேலும் தாய்லாந்து- பர்மா ரயில் மற்றும் ஆய்வு மையத்திற்கும் அவர்கள் சென்று பார்த்தனர்.  இந்த மரண ரயில் தொடர்பான மற்றொரு காட்சியகத்திற்கும் மலேசியக் குழு சென்று பார்த்தது. 

மேலும் பிற்பகலில் இங்கிருந்து ரயில் பயணத்தை நாங்கள் தொடங்கவுள்ளோம். இன்றிரவு சாய் யோக் என்ற இடத்தில் இரவுத் தங்கல் அமையும் என்று சந்திரசேகரன் சொன்னார்.

 

 

 

 

 

 

 

 

 

 

ஜாவி, பிப்.22- ஆசிரியசியின் கைத்தொலைப் பேசி களவு தொடர்பில் தற்கொலை புரிந்து கொண்ட நிபோங்  திபால், தேசிய இடைநிலைப் பள்ளி மாணவியான வசந்த பிரியாவின்  மரண நீதி விசாரணைக்கு அட்டர்னி ஜெனரல் அலுவலகம் அனுமதி வழங்கி இருப்பதாக பினாங்கு மாநிலப் போலீஸ் படைத் தலைவர் டத்தோ ஏ. தெய்வீகன் தெரிவித்தார். 

இந்த அனுமதி தங்களுக்கு கடந்த வாரம் வந்து கிடைத்ததாக குறிப்பிட்ட அவர், இந்த மரண விசாரணையைத் தொடங்குவதற்கான தேதிக்காக காத்திருப்பதாக தெரிவித்தார்.

இந்த மரண விசாரணை பொதுவில் நடத்தப்படும். தற்போதைக்கு சாட்சியம் அளிக்க 30 சாட்சிகளைத் தாங்கள் அழைக்கவிருப்பதாக டத்தோ தெய்வீகன் சொன்னார்.

கடந்த மாதம் தன்னுடைய ஆசிரியையின் இ-போனை திருடியதாக சம்பந்தப்பட்ட ஆசிரியையினால் விசாரணைக்கு உட்படுத்தப்பட்ட இரண்டாம் படிவ மாணவியான 14 வயதுடைய வசந்த பிரியா தூக்கி மாட்டித் தற்கொலை முயற்சியில் ஈடுபட்டார்.

மேலும் தற்கொலை முயற்சிக்கு முன்னர், தான் அந்தக் கைத் தொலைபேசியை எடுக்கவில்லை என்று மறுத்ததோடு, தான் ஒரு நிராபராதி என்று கடிதத்தில் அவர் எழுதி வைத்திருந்தார். 

 வீட்டிலுள்ள அறையில் தற்கொலை முயற்சியில் ஈடுபட்ட வசந்த பிரியாவை அவருடைய தந்தை முனியாண்டி காப்பாற்றி மருத்துவமனையில் சேர்த்தார். எனினும், சில  நாள்களுக்குப் பிறகு சுய நினைவுத்  திரும்பாலேயே  அவர்  உயிர்நீத்தார்.

 

 

 

 

 

 

 

 

 

 

 

 

 

 

 

 

 

 

கூச்சிங், பிப்.22- கடந்த மூன்று ஆண்டுகளுக்கு முன்னர் தன்னுடைய சொந்த மகளைப்  பாலியல் வெறிக்குப் பலியாக்கிய குற்றத்தை ஒப்புக்கொண்ட  ஆசாமி ஒருவனுக்கு   இங்குள்ள செசன்ஸ் நீதிமன்றம் 80 ஆண்டு சிறைத் தண்டனை விதித்ததோடு 24 பிரம்படிகள் கொடுக்க வும் உத்தரவிட்டது.

குற்றவியல் சட்டத்தின் 376 (பி) பிரிவின் கீழ் 40 வயதுடைய அந்தக் காமுகன், நான்கு முறை அந்தத் தகாத காரியத்தைச் செய்ததாக நீதிமன்றத்தில் ஒப்புக்கொண்டான்.

இங்கிருந்து 65 கிலோ மீட்டர் தொலைவிலுள்ள படாவான் என்ற இடத்தில்  14 வயதுச் சிறுமியான மகளை கெடுத்ததோடு வலுக்கட்டாயமாக சிறுமியை பார்மசிக்கு இழுத்துச் சென்று கர்ப்பத் தடை மாத்திரைகலை வாங்கி உட்கொள்ளும் படி செய்ததாக நீதிமன்றத்தில் தெரிவிக்கப்பட்டது.

அவனது இத்தகைய கொடுமைகள் தொடர்ந்த போது அது குறித்து தன்னுடைய தாயாரிடம் அந்தச் சிறுமி புகார் செய்தார். இதைத் தொடர்ந்து அவர் போலீசில் புகார் செய்தார். 

தனக்கு பிள்ளைகள் இருப்பதால் கருணை காட்டுமாறு அந்த நபர் நீதிமன்றத்தில் மன்றாடிய போது, சொந்த மகளுக்கு அந்த ஆள் இழைத்த அநீதியானது சிறுமிக்கு மிகக் கடினமான  உளவியல் தாக்கத்தை ஏற்படுத்தியுள்ளதால் அதிக பட்சமாக தண்டனை விதிக்கவேண்டும் என்று பிராசிகியூசன் அதிகாரி ஹரிஸ் பிரகாஷ் நீதிபதியிடம் வலியுறுத்தினார்.

'இந்த நபரை   கொண்டு போய்  அடைத்து பூட்டி விட்டு, சாவியைத் தூக்கி எறிந்து விடவேண்டும் ' என்று ஹரிஸ் பிரகாஷ் நீதிபதியிடம் சுட்டிக்காட்டினார்.

 

 

 

 

 

 

 

 

 

 

 

 

 

 

 

 

 

 

 

 

 

 

ஈப்போ,, பிப்.22- கடந்த இரண்டு ஆண்டுகளாக 19  சிறார்களைக் கட்டாயப்படுத்தி பிச்சை எடுக்க வைத்ததாக இங்குள்ள செசன்ஸ் நீதிமன்றத்தில் குற்றஞ்சாட்டப்பட்ட ஒரு தம்பதியருக்கு 15 மாதச் சிறைத் தண்டனையும் 28,000 ரிங்கிட் அபராதமும் விதிக்க்கப்பட்டது.

கடந்த 2016 ஆம் ஆண்டிலிருந்து சிறார்களை வைத்து பிச்சை எடுக்க விட்டதாக   முஸ்லிம் அப்துல் கரீம் (வயது 63) மற்றும் ஷாலேகா முகம்மட் (வயது 55) என்ற தம்பதியருக்கு எதிராக நீதிமன்றம் தண்டனை விதித்தது. 

இவர்கள் இருவரும் கடந்த மேமாதம் 7ஆம் தேதி கைது செய்யப்பட்டனர். இவர்களுக்கு நீதிமன்றம் விதித்த அபராதத் தொகையைக் கட்டத் தவறினால் மேலும் ஒரு மாதம் கூடுதலான சிறை வாசத்தை இவர்கள் அனுபவிக்க வேண்டும் என்று நீதிமன்றம் உத்தரவிட்டது.

மேலும், இந்த இருவரும் 100 மணிநேரம் சமூகச் சேவை செய்யவேண்டும் என்றும் நீதிபதி முர்தாஜாடி அம்ரான் உத்தரவிட்டுள்ளார்.

இவர்கள் இருவருக்கும் விதிக்கப்பட்ட தண்டனையாவது  மற்றவர்களுக்கு ஒரு பாடமாக அமையும் என்றும் இது போன்ற குற்றங்களுக்கு கடுமையான தண்டனை விதிக்க நீதிமன்றம் தயங்காது என்றும் நீதிபதி முர்தாஜாடி குறிப்பிட்டார்.  பொருள் விற்கும் நிறுவனம் ஒன்றின் மூலம் வேலைக்குச் சேர்க்கப்பட்ட 11 வயது முதல் 17 வயது வரையிலான சிறார்களைக் கொண்டு, பொருள் விற்பனையோடு பிச்சை எடுக்கவும் வைத்ததாக இவர்கள் மீது குற்றஞ்சாட்டப்பட்டது.

 

ஈப்போ, பிப்.22- தாய்மொழி தினத்தில் தமிழைப் போற்றி கொண்டாடி மகிழ்ந்தனர் பேராக்கைச் சேர்ந்த கூலா தோட்டத் தமிழ்ப்பள்ளி மாணவர்கள். குறைந்த எண்ணிக்கையிலான மாணவர்கள் இருந்தாலும் நிறைவான கொண்டாட்டமாக இந்த நிகழ்ச்சி விளங்கியது.

நேற்று உலக தாய்மொழி தினம் கொண்டாடப்பட்ட நிலையில், தாய் தமிழைப் போற்றும் வகையில் ஆசிரியர்களும் மாணவர்களும் பெற்றோர்களுடன் இணைந்து இந்த நிகழ்ச்சியை ஏற்பாடு செய்ததாக பள்ளியின் தலைமையாசிரியர் பி.சோமசுந்தரம் தெரிவித்தார்.

நிகழ்ச்சியில் பள்ளி மாணவர்கள் தமிழின் சிறப்புக் குறித்து பல்வேறு படைப்புகளை வழங்கினர். உரை, கவிதை ஆகிய படைப்புகளும் அதில் அடங்கும். ஆசிரியரின் துணையுடன் மாணவர்கள் உருவாக்கி படைப்புகள் நிகழ்ச்சி வந்திருந்தவர்களின் கவனத்தை ஈர்த்தது.

நிகழ்ச்சிக்குச் சிறப்பு வருகையாக, இப்பள்ளியில் படித்து தற்போது இந்த தோட்டத்திற்கே மேலாளராக இருக்கும் பள்ளியின் முன்னாள் மாணவர் திரு.பிரபாகரன் வருகை புரிந்தார். 

More Articles ...