ஜோர்ஜ்டவுன், ஜூன் 22- கும்பலால் கடுமையாக தாக்கப்பட்டு மரணமடைந்த தி.நவின் குடும்பத்தினருக்கு வாழ்நாள் முழுதும் பென்ஷன் வழங்கப்படும் என சொக்சோ அறிவித்துள்ளது. நவின் அப்பா, அம்மா மற்றும் தங்கை ஆகியோர் இந்த பென்ஷனைப் பெறுவர் என பினாங்கு சொக்சோ இயக்குனர் அந்தோணி அருள் டாஸ் கூறினார்.

ஜூன் 9ம் தேதி வேலை முடிந்து உணவு வாங்க சென்றபோது ஐவர் அடங்கிய கும்பலால் தி.நவின் தாக்கப்பட்டு பின்னர் மருத்துவமனையில் மரணமடைந்தார். நவின் பேரங்காடி ஒன்றில் கடந்த மே மாதம் முதல் பகுதி நேரமாக பொருட்களை விளம்பரப்படுத்தும் வேலை செய்து வந்தார். மேலும் வேலை முடிந்து வீடு திரும்பும்போது அவர் தாக்கப்பட்டதால் அவர் சொக்சோ பெறுவதற்கு தகுதி பெற்றதாக அந்தோணி கூறினார். 

நவின் சார்பாக அவரின் குடும்பத்தினருக்கு பென்ஷன் பணமாக மாதந்தோறும் ரிம.672 வழங்கப்படும். இதனை அவரின் அப்பா, அம்மா மற்றும் தங்கை ஆகியோர் சமமாக பிரித்துக் கொள்ளலாம் என அவர் மேலும் கூறினார். தற்போது 15 வயதாகும் நவின் தங்கைக்கு 21 வயது வரை அல்லது திருமணமாகும் வரை பென்ஷன் பணத்தைப் பெறுவார் என்றும் அவர் கூறினார்.

முன்னதாக, சொக்சோ சார்பாக ரிம.2000 தொகையை நவினின் தாயார் சாந்தி (43) அந்தோணியிடமிருந்து இன்று பெற்றுக் கொண்டார். 

கோலாலம்பூர், ஜூன் 22- மக்கள் சந்தேகப்படும்படி சாப் ரம்புத்தான் அரிசியில் பிளாஸ்டிக் கலக்கப்படவில்லை என மலேசிய விவசாயத்துறை அமைச்சு (MOA) உறுதிப்படுத்தியது. அலோர் ஸ்டாரில் இருக்கும் சாப் ரம்புத்தான் ஆலையிலிருந்து எடுக்கப்பட்ட மாதிரிகளை ஆய்வு செய்த வேதியல் துறையினர் அதில் பிளாஸ்டிக் சேர்க்கப்படவில்லை என அறிவித்தனர்.

மேலும், பேராக்கிலும் பகாங்கிலும் இருக்கும் சில அரிசி ஆலைகளிலிருந்தும் சிலாங்கூரில் உள்ள சில பேரங்காடிகளிலிருந்தும் சாப் ரம்புத்தான் அரிசி மாதிரிகள் ஆய்வுக் கூடத்திற்கு அனுப்பப்படுள்ளன. இதன் முடிவுகளும் கூடிய விரைவில் அறிவிக்கப்படும் என்றும் அவர்கள் கூறினர்.

கடந்த ஜூன் 6ஆம் தேதி, ஜொகூரில் கிடைத்த பிளாஸ்டிக் அரிசி தொடர்பான புகாரின் பேரில் இந்த ஆய்வுகள் மேற்கொள்ளப்படுகின்றன என்று (MOA) அரிசி கட்டுபாட்டு இயக்குனர் ஜெனரல் சம்சுடின் இஸ்மாயில் கூறினார்.  

இதனிடையே, பிளாஸ்டிக் அரிசியைப் பற்றி சமூக வலைத்தளங்களில் வெளியாகும் வதந்திகளை அப்படியே நம்ப வேண்டாம் எனவும் அதன் தொடர்பான தகவல்கள் ஏதும் கிடைத்தால் மாநில அரிசி கட்டுப்பாட்டு அலுவலகத்தைத் தொடர்பு கொள்ளுமாறும் அவர் மக்களைக் கேட்டுக் கொண்டார். இதனால், முறையான விசாரணையை மேற்கொண்டு மக்களிடையே ஏற்படும் குழப்பத்தைத் தவிர்க்க முடியும் என அவர் கூறினார்.

அலோர்ஸ்டார், ஜூன் 22- இன்று காலையில் நெடுஞ்சாலை பணிக்காக சாலை ஓரத்தில் மெதுவாக சென்று கொண்டிருந்த பராமரிப்பு லாரியை வேகமாக வந்து கொண்டிருந்த சுற்றுலா பேருந்து ஒன்று மோதியது. இச்சம்பவத்தில் லாரியில் அமர்ந்திருந்த ஆடவர் ஒருவர் பரிதாபமாக மாண்டார்.

இன்று காலை 6.15 மணிக்கு வடக்கு தெற்கு நெடுஞ்சாலையில் பெண்டாங் அருகே 65.5 கி.மீட்டரில் இச்சம்பவம் நடந்தது என பெண்டாங் போலீஸ் தலைவர் துணை சூப்ரிடெண்டன் பட்ஷில் ஹசீம் கூறினார். சம்பவத்தின்போது சம்பந்தப்பட்ட லாரி இடதுபுறத்தில் மெதுவாக நகர்ந்து கொண்டிருந்ததாகவும் பின்னால் வந்த பேருந்து வந்து மோதியதாக கூறப்படுகிறது.

இதில் லாரியின் பின்பக்கத்தில் அமர்ந்திருந்த தொழிலாளி ஒருவர் சம்பவ இடத்திலேயே மாண்டார். லாரி ஓட்டுனரும் மேலும் ஒருவரும் கடுமையாக காயங்களுக்கு ஆளாகி சுல்தானா பாஹியா மருத்துவமனையில் சேர்க்கப்பட்டுள்ளனர். பேருந்தில் பயணித்த 28 பேரும் ஓட்டுனரும் காயங்கள் இன்றி உயிர் தப்பினர்.   

புத்ராஜெயா, ஜூன்.23- இங்குள்ள இஸ்தானா கெஹகிமான் (Istana Kehakiman) சிறார் பாலியல் குற்றத்திற்கான சிறப்பு நீதிமன்றத்தைப் பிரதமர் டத்தோஸ்ரீ நஜிப் துன் ரசாக் இன்று காலை அதிகாரப்பூர்வமாக திறந்து வைத்தார்.

கடந்த மார்ச் மாதம் நடைபெற்ற சிறார் பாலியல் குற்றம் தொடர்பான கருத்தரங்கில் இப்படியொரு சிறப்பு நீதிமன்றத்தை அமைப்பது தொடர்பான யோசனையை பிரதமர் நஜிப்  முன்வைத்திருந்தார் என்பது குறிப்பிடத்தக்கது.

இதனிடையே, தென் கிழக்கு ஆசியாவிலேயே சிறார் பாலியல் குற்றத்திற்கான முதலாவது சிறப்பு நீதிமன்றம் என்ற பெருமையும் இந்த நீதிமன்றத்தைப் பெறுகிறது.

நடப்பில் இருந்து வரும் சிறார் நீதிமன்றத்திற்கும் இப்பொழுது தொடங்கப்பட்டுள்ள சிறார் பாலியல் குற்றத்திற்கான இந்தச் சிறப்பு நீதிமன்றத்திற்கும் இடையே வேறுபாடு உள்ளது. 

அதாவது, நடப்பில் இருக்கும் சிறார் நீதிமன்றத்தில் சிறார்கள் தொடர்பான குற்றங்களுக்கான வழக்குகள் நடத்தப்படும். ஆனால், இந்தப் புதிய நீதிமன்றத்தில் பாலியல் துஷ்பிரயோகத்தில்  பாதிக்கப்பட்ட சிறார்களைப் பற்றிய வழக்குகள் நடத்தப்படும் என்று பிரதமர் கூறினார்.

தொடக்கமாக, சிலாங்கூர், கோலாலம்பூர் மற்றும் புத்ரா ஜெயாவில் உள்ள வழக்குகள் இங்கு செவிமடுக்கப்படும். இதனிடையே, கூடிய விரைவில் இந்த சிறார் பாலியல் குற்றத்திற்கான சிறப்பு நீதிமன்றங்கள் நாட்டிலுள்ள 13 மாநிலத்திலும் திறக்கப்படும் என அவர் உறுதியளித்தார்.

 

சித்தியவான், ஜூன் 22- ஹைட்ரோகிளொரிக் ஆசிட் வகை அமிலத்தை ஏற்றி வந்த லாரி கொள்கலனில் ஓட்டை ஏற்பட்டதால் அதிலிருந்து வெளியேறிய அமிலம் தரையில் பட்டவுடன் புகை கிளம்பியது. பெட்ரோல் நிலையத்தில் இச்சம்பவம் நடந்ததால் பரபரப்பு ஏற்பட்டது.

லெகிர் எனும் பகுதியில் பத்து 6 அருகே அமைந்துள்ள தீயணைப்பு நிலையத்திற்கு எரிவாயு நிரப்புவதற்காக அதிகாலை 3 மணிக்கு லாரி ஒன்று வந்தது. அதில் அமில கொள்கல ன் இருந்தது. எரிவாயு நிரப்புவதற்காக காத்திருந்தப்போது கொள்கலன் ஓட்டையாகி அமிலம் வெளியே சிதற ஆரம்பித்தது. 

இதனால் புகை கிளம்ப, பணியாளர்கள் உடனடியாக தீயணைப்பு படைக்கு தகவல் கொடுத்தனர். தகவல் கிடைத்தவுடன் ஹஷ்மாட் எனும் அபாயகர பொருளைக் கையாளும் பிரிவினர் சம்பவ இடத்திற்கு விரைந்து பராமரிப்பு பணிகளை மேற்கொண்டதாக தெரிவிக்கப்பட்டுள்ளது. 

பெட்ரோல் நிலையத்தில் இச்சம்பவம் நிகழ்ந்ததால் பரபரப்பு உண்டானது. சம்பவம் தொடர்பில் யாரும் காயமடையவில்லை என போலீசார் தெரிவித்தனர். 

கோத்தா கினபாலு, ஜுன் 22- மாலை நேரம் வானத்தில் வானவில் தோன்றினால் சந்தோசப்படும் நாம், நான்கு வண்ணத்தில் தூண்கள் போன்று காட்சியளிக்கும் வெளிச்சத்தைக் கண்டால் எப்படி இருக்கும்? இதே ஆனந்தம் தான் இரவு நேரத்தில் புகைப்படம் எடுத்துக் கொண்டிருந்த புகைப்படக்காரர்களுக்கு ஏற்பட்டது. 

சபாவில் உள்ள கூடாத் எனும் வட்டாரத்திலிருந்து 31 கிமீ தூரத்தில் இருக்கிறது கெலாம்பு தீவு. ஆள் நடமாட்டம் இல்லாத அழகிய தீவு இது. கெலாம்பு என்றால் மலாய் மொழியில் கொசு வலை என்று அர்த்தம். இந்த தீவும் அப்படி தான். தீவிற்கும் கடலுக்கும் நடுவில் நடந்து மணல் பாதை ஒன்று இயற்கையாகவே அமைந்திருக்கும்.

இங்கு புகைப்படக்காரர்கள் படங்களை எடுக்க அடிக்கடி இங்கு வருவதுண்டு. அப்படி சில புகைப்படக்காரர்களின் காமிரா கண்ணில் சிக்கியது தான் இந்த ஒளித்தூண்கள். அது என்ன ஒளித்தூண்கள்? குளிர்காலத்திலோ அல்லது வட துருவங்களிலோ நடக்கும் ஒளியியல் மாயை தான் இந்த வெளிச்சம். 

அதாவது கரைக்கு அருகில் கிடக்கும் ஐஸ் கட்டிகள் மீது இயற்கையாகவோ செயற்கையாகவோ வெளிச்சம் படும்போது வெளிச்சத்தின் வண்ணத்தை இந்த கட்டிகள் பிரதிபலிக்கும். இது நீள் வடிவில் தெரிவதால் இதற்கு ஒளித்தூண் என்று பெயர் வழங்கப்பட்டது.

கெலாம்பு தீவுக்கு அருகில் நேற்று இரவு இந்த காட்சி உருவாகியுள்ளது. அதில் ஆரஞ்சு, சிவப்பு, பச்சை, மஞ்சள் மற்றும் வெள்ளை நிற ஒளி அழகாக தெரிந்துள்ளது. 

இதனை ஆண்ட்ரூ ஜேகே டான் என்பவர் இரவு 9 மணிக்கு இந்த ஒளித்தூண்களைப் பார்த்துள்ளனர். பின்னர் பின்னிரவு 1 மணியளவில் இந்த வெளிச்சம் மறைந்ததாக அவர் கூறியுள்ளனர். இந்த காட்சியைத் தான் வாழ்நாள் முழுதும் காத்திருந்தாலும் பார்க்க முடியாத அபூர்வ நிகழ்வு. இதனை நான் மறக்கவே மாட்டேன் என்று ஆண்ட்ரூ கூறியுள்ளார்.

இதற்கு முன்பு,  இரண்டு ஆண்டுகளுக்கு முன்பு கோத்தா கினபாலுவில் இந்த ஒளித்தூண்கள் காணப்பட்டன என்பது குறிப்பிடத்தக்கது. 

பெட்டாலிங் ஜெயா, ஜூன்.22- மாணவர் பரிமாற்றத் திட்டத்தின் கீழ் படிக்க வந்த ஜப்பானிய மாணவரை, சக மாணவர் ஒருவர் பாலியல் தொந்தரவு செய்ததாக கிடைத்த புகாரைத் தொடர்ந்து மலாயா பல்கலைக்கழக நிர்வாகம் விசாரணையைத் தொடங்கியுள்ளது.

இச்சம்பவத்தைப் பற்றி முறையான புகார் தங்களுக்கு கிடைத்துள்ளதாகவும் விசாரணை தொடர்ந்து நடந்து கொண்டிருப்பதால் இது பற்றி இப்போது எந்தக் கருத்தையும் வெளியிட முடியாது எனவும் மலாயா பல்கலைக்கழக அனைத்துலக பொது உறவுத் துறை அலுவலகம் கூறியது.

மூன்றாம் ஆண்டு சட்டத்துறையில் படித்த அந்த மாணவரை கடந்த 30ஆம் தேதி ஏப்ரல் மாதம் பாலியல் தொல்லைக்கு உள்ளானதாக கூறப்பட்டது. இதனைத் தொடர்ந்து அந்த ஜப்பானிய மாணவன் தனது சமூக வலைத்தளத்தில் இந்தச் சம்பவம் குறித்து அந்த விவரித்து இருக்கிறார். 

எனினும், தான் போலிசில் புகார் செய்யப்போவதாக மிரட்டியதும் அந்த மாணவர் அங்கிருந்து தப்பி ஓடி விட்டதாகவும் அவர் முநூலில் கூறியுள்ளார்.

இதனிடையே, இந்தச் சம்பவத்தைப் பற்றி தாம் கொடுத்த புகார் குறித்து பல்கலைக்கழக நிர்வாகமும், அனைத்துலக பொது உறவுத் துறை அலுவலகமும் அக்கரைக் காட்டவில்லை என அந்த மாணவர் குறிப்பிட்டுள்ளார்.

மேலும், தனக்கு பாலியல் தொந்தரவு செய்த அதே மாணவர், இதே போன்று மற்றொரு தைவான் மாணவரையும் தொல்லைப் படுத்திருக்கிறார் என்று அந்த ஜப்பானிய மாணவர் கூறினார்.

“எது எப்படி இருப்பினும், நாங்கள் மிக கவனமாக இந்தப் புகாரை விசாரித்து வருகிறோம்” என்று பல்கலைக்கழக நிர்வாகம் உறுதிப்படுத்தியது.

More Articles ...