ஜொகூர் பாரு, பிப்.22- போலியான குழந்தைகள் பால் மாவை வைத்திருந்து விற்பனை செய்த குற்றச்சாட்டை எதிர்நோக்கிய ஜொகூர் வியாபாரியும் அவரின் மகனும் குற்றத்தை மறுத்து விசாரணை கோரினர்.

ஸ்கூடாயில் உள்ள தாமான் நூசா பெஸ்தாரியில் உள்ள தனது கடையில் போலி பால் மாவு விற்கப்பட்டதாக யாப் கை சாய் (வயது 59), அவரின் மகன் யாப் செங் ஹொங் (வயது 26), மைத்துனி லிங் மெய் நார் (வயது 42) ஆகியோர் மீது வர்த்தக விளக்கம் சட்டம் 2011 கீழ் குற்றஞ்சாட்டப்பட்டனர். 

மேலும், விற்பனை செய்ததோடு பால் மாவின் உள்ளடக்க விளக்கத்தில் மாற்றம் செய்து வைத்திருந்த குற்றத்திற்காவும் அவர் மீது குற்றம் சாட்டப்பட்டது.

ஆனால், மூவரும் தன் மீதான குற்றத்தை மறுத்து விசாரணை கோரினர். இதனால் வழக்கை விசாரித்த செஷன்ஸ் நீதிமன்ற நீதிபதி ஜைலானி ரஹ்மான் அடுத்த விசாரணையை மார்ச் 27ஆம் தேதி நிர்ணயித்தார்.

 

கோலாலம்பூர், பிப்.21- மலேசியாவில் 2 நூற்றாண்டுகளுக்கு மேலாக கட்டிக் காக்கப்பட்டு வரும் தமிழைப் போற்றவும் அதன் வளர்ச்சிக்கு படிக்கல்லாக அமையும் வகையில் நாடு முழுவதும் தாய்மொழி தினத்தைத் தமிழர்கள் கொண்டாடி வருகின்றனர். 

தங்களின் இன அடிப்படையில் உலகத்தினர் உலக தாய்மொழி தினத்தைக் கொண்டாடும் நிலையில், தமிழ்மொழியின் மேன்மையைப் போற்றும் வகையில் மலேசியத் தமிழர்களும் இந்நாளைச் சிறப்பாக கொண்டாடி வருகின்றனர். 

நம் மூதாதையர் நமக்கு அளித்த வரமான தமிழை வளர்ந்து வரும் அடுத்த தலைமுறையினருக்கு முறையாக கொண்டு செல்லவேண்டும் என்பதில் தமிழர்கள் உறுதிப்பாட்டுடன் இருக்கின்றனர்.

தமிழ்ப்பள்ளியில் மட்டுமின்றி வீட்டிலும் தமிழிலே பேசவேண்டும் என்ற விழிப்புணர்வும் பெரும்பாலான தமிழ்க் குடும்பங்களில் ஓங்கி நிற்பது மகிழ்ச்சியை அளிக்கிறது. 

இளைய தலைமுறையினர் தாய்மொழியின் அவசியத்தை உணர்ந்து மற்றவர்களும் இந்த விழிப்புணர்வை பெறும் வகையில் இன்று காலை முதல் சமூக வலைத்தளங்களில் பல்வேறு காணொளிகளையும் தமிழ் கூறு புகைப்படங்களையும் பதிவேற்றம் செய்து வருவதும் வரவேற்கத்தக்கதே.

நாடு தழுவிய அளவில் மலேசிய பொது அமைப்புகளும் ஆரம்பத் தமிழ்ப்பள்ளிகளும் தாய்மொழி தினத்தை வெகு விமர்சையாக கொண்டாடும் ஏற்பாடுகளில் ஆர்வம் காட்டி வருகின்றனர்.

புக்கிட் மெர்டாஜாம், பிப்.22- தன்னிடம் பணிபுரிந்த இந்தோனிசியப் பணிப் பெண்ணான அடெலினா லிசாவ் (வயது 26)  என்பவரைக் கொலை செய்ததாக எம்.ஏ.எஸ். அம்பிகா (வயது 59) என்ற மாது மீது இங்குள்ள மாஜிஸ்திரேட் நீதிமன்றத்தில் இன்று குற்றஞ்சாட்டப்பட்டது.

அதேவேளையில், அம்பிகாவின் மகளான ஆர்.ஜெயவர்த்தினி (வயது 32) என்பவர் மீது சட்டவிரோதமான வெளிநாட்டவர் ஒருவரை வேலைக்கு அமர்த்தியதாக குற்றஞ்சாட்டப்பட்டது.

கடந்த ஆண்டு மார்ச் மாதத்திற்கும் இவ்வாண்டு பிப்ரவரி 10-ஆம் தேதிக்கும் இடையே இவர்கள் இருவரும்  புக்கிட் மெர்டாஜாம், தாமான் கோத்தா பெர்மாய் என்ற இடத்தில் இக்குற்றங்களைப் புரிந்ததாக நீதிமன்றத்தில் தெரிவிக்கப்பட்டது.

தம் மீதான குற்றச்சாட்டு வாசிக்கப்பட்ட போது அதன் விபரம்  என்ன என்பதை தாம் புரிந்து கொண்டதாக அம்பிகா தலையை அசைத்தார். அவரிடம் நீதிமன்றம் வாக்குமூலம் எதனையும் பதிவு செய்யவில்லை. 

கட்டாய மரண தண்டனை விதிக்க வகை செய்யும் குற்றவியல் சட்டத்தின் 302ஆவது பிரிவின் கீழ் அம்பிகா மீது குற்றச்சாட்டுச் சுமத்தப்பட்டது.

அதே போன்று தம் மீதான குற்றச்சாட்டை தாம் புரிந்து கொண்டதாக கோடிகாட்டிய ஜெயவர்த்தினி, நீதிமறத்தில் அந்தக் குற்றச்சாட்டை மறுத்து விசாரணை கோரினார்.

1959/63ஆம் ஆண்டின் குடிநுழைவுச் சட்டத்தின் 55பி(1) என்ற பிரிவின் கீழ் ஜெயவர்த்தினி மீது குற்றஞ்சாட்டப் பட்டிருப்பதால் அவர் குற்றவாளி என நிருபணமானால், 10,000 ரிங்கிட் முதல் 50,000 ரிங்கிட் வரை அபராதம் அல்லது கூடுதல் பட்சமாக 12 மாதச் சிறைத் தண்டனை அல்லது இரண்டுமே விதிக்கப்படலாம்.

அம்பிகாவின் மூத்த மகனான 39 வயதுடைய நபர், இந்த விவகாரம் தொடர்பில் முதலில்  கைது செய்யப்பட்டார்  என்ற போதிலும் தற்போது அவர் போலீஸ் ஜாமினில் விடுவிக்கப் பட்டுள்ளார். வழக்கு விசாரணையின் போது அவர் ஒரு சாட்சியாக இருப்பார்.

மேலும் தன்னையும் அவருடைய மகளையும் பத்திரிகையாளர்கள் புகைப்படம் எடுத்த போது  அவ்வாறு படம் எடுக்க வேண்டாம் என்று கண்கலங்க அம்பிகா கேட்டுக் கொண்டார். 

ஜெயவர்த்தினிக்கு ஒரு நபர் உத்தரவாதத்துடன்  ஜாமின் தொகையாக 15,000 ரிங்கிட்டை மாஜிஸ்திரேட் முகம்மட் அனாஸ் நிர்ணயித்தார். மேலும் இரசாயன அறிக்கை, தடவியல் மற்றும் பிரேத பரிசோதனை அறிக்கை  ஆகியவை சமர்ப்பிக்கப் படுவதற்காக ஏப்ரல் 19 ஆம் தேதியை மாஜிஸ்திரேட் நிர்ணயித்தார்.

தாமான் கோத்தா பெர்மாயிலுள்ள வீடு ஒன்றில் இருந்து பணிப்பெண்ணான அடெலினா போலீசாரால் மீட்கப்பட்டு, மருத்துவமனையில் சேர்க்கப்பட்டார். பின்னர் மறுநாள் அவர் உயிரிழந்தார். அவர் கொடுமைக்குள்ளானதால் தலை, கை கால்கள் ஆகியவற்றில் கடுமையான காயங்களுடன் இருந்ததாக கூறப்பட்டது.

 

 

 

 

 

 

 

கோலாலம்பூர், பிப். 21- இவ்வாரத்திற்கான பெட்ரோல் மற்றும் டீசலின் புதிய விலை மீண்டும் கணிசமாகச் சரிவு கண்டுள்ளது. ரோன் -97 ரகப் பெட்ரோலின் விலை 7 காசு குறைந்தது.

ரோன்-97 ரகப் பெட்ரோல் லிட்டருக்கு 2 ரிங்கிட் 50 காசுகளில் இருந்து 2 ரிங்கிட் 43 காசுகளாக குறைந்திருக்கிறது.

ரோன்-95 ரகப் பெட்ரோல் லிட்டருக்கு 6 காசு குறைந்து 2 ரிங்கிட் 23 காசுகளில் இருந்து 2 ரிங்கிட் 17 காசுகளாக குறைந்துள்ளது. 

டீசல் 6 காசுகள் குறைந்து லிட்டருக்கு 2 ரிங்கிட் 13 காசுகளாக விற்கப்படுகிறது.

பிப்ரவரி 22 ஆம் தேதியிலிருந்து பிப்ரவரி 28ஆம் தேதி  வரைக்குமான விலை நிலவரம் இதுவாகும்.

கோலாலம்பூர், பிப்.21- முன்னாள் பிரதமர் துன் மகாதீரின் கட்சிக்கு நன்கொடை வழங்குவதாக கூறி சிவப்பு சட்டை இயக்கத்தின் தலைவர் ஜமால் யுனோஸ் இன்று வங்கியில் ரிம.7 பில்லியன் மதிப்புள்ள காசோலையைச் செலுத்த சென்றார்.

முன்னதாக, மகாதீரின் பெரிபூமி பெர்சத்து கட்சி பொதுத்தேர்தலுக்காக மக்களிடம் நன்கொடை வாங்குவதாக கூறிய டத்தோஶ்ரீ ஜமால் பின் யுனோஸ், தான் அவருக்கு 1,800 அமெரிக்க டாலரை வழங்குவதாக சிஐஎம்பி இஸ்லாமிக் வங்கிக்கு வந்தார்.

பின்னர் செய்தியாளர்களிடம் பேசிய ஜமால், இன்னும் பதிவு செய்யப்படாத மகாதீரின் கட்சிக்கு எப்படி வங்கியில் கணக்கு திறக்கப்பட்டது என கேள்வி எழுப்பினார். மேலும், மகாதீர் பலரிடமிருந்து பணத்தை நன்கொடையாக பெறுவதாகவும் அதன் மூலம் பொதுத்தேர்தலின் போது வேட்பாளர்களை விலைக்கு வாங்கி விடுவார் என குற்றஞ்சாட்டினார்.

 

கோத்தா கினாபாலு, பிப்.22- தன்னுடைய முன்னாள் காதலியின் ஆபாசப் புகைப்படங்களை தனது முகநூலில் பதிவேற்றம் செய்த  குற்றச்சாட்டின் பேரில்  வழக்கை எதிர்நோக்கி இருக்கும் 27 வயதுடைய சீவசங்கர் விக்னேஸ்வரன் என்பவர் இந்த வழக்கு முடியும் வரையில் முகநூலைப் பயன்படுத்தக்கூடாது என நீதிமன்றம் உத்தரவிட்டுள்ளது.

தம் மீதான குற்றச்சாட்டை மறுத்து  சீவசங்கர் விசாரணை கோரியுள்ள நிலையில், சமூக ஊடகத் தளத்திலிருந்து ஒதுங்கி இருக்கவேண்டும் என்று செசன்ஸ் நீதிபதி ஐனுல் ஷாரின் முகம்மட் உத்தரவிட்டார்.

இவரது வழக்கு ஆகஸ்டு 1ஆம் தேதி மீண்டும் விசாரணைக்கு வரவிருக்கிறது. அது வரையில் பேரா, தம்புன் போலீஸ் நிலையத்தில் ஒவ்வொரு மாதமும் இவர் ஆஜராக வேண்டும். மேலும் தன்னுடைய மாவட்டத்தை விட்டு வெளியேற வேண்டுமானால் அதற்கு முன்பதாக மாவட்டப் போலீஸ் தலைவரின் முன் அனுமதியைப் பெற்றாக வேண்டும் என்று நீதிபதி உத்தரவு பிறப்பித்துள்ளார்.

கடந்த ஆண்டு ஆகஸ்௶உ 16ஆம் தேதி தன்னுடைய முகநூலில் முன்னாள் காதலியின் ஆபாசப்படங்களைப் பதிவேற்றம் செய்ததாக சீவசங்கர் மீது குற்றஞ்சாட்டப்பட்டுள்ளது.

1998ஆம் ஆண்டின் பல்லூடக மற்றும் தொலைத்தொடர்புச் சட்டத்தின் 233 (1)(ஏ) என்ற பிரிவின் கீழ்  ஜாலான் பண்டார் பாரு தம்புன் என்ற இடத்தில் அவர் இந்தக் குற்றத்தைப் புரிந்ததாக நீதிமன்றத்தில் கூறப்பட்டது.

இக்குற்றச்சாட்டு நிருபிக்கப்பட்டால் கூடுதல் பட்சமாக 50 ஆயிரம் ரிங்கிட் அபராதம் அல்லது ஓராண்டு சிறை அல்லது இரண்டுமே விதிக்கப்படும் வாய்ப்பு உள்ளது.தம்முடைய படங்கள்  பதிவேற்றம்  செய்யப்பட்டது தொடர்பாக அவருடைய முன்னாள் காதலி போலீசில் புகார் செய்திருந்தார்.  சீவசங்கருக்கு நீதிமன்றம் 5,000 ரிங்கிட்  ஜாமின் அனுமதித்தது.

 

 

 

 

 

 

 

 

 

 

 

 

 

கோலாலம்பூர், பிப்.21- 1960ஆம் ஆண்டு காலக்கட்டத்தில் மலேசியாவின் சிறந்த கோல்கீப்பராக விளங்கிய முன்னாள் தேசிய கால்பந்து விளையாட்டாளர் சவ் சீ கியோங் இன்று காலமானார். அவரின் குடும்பத்தினருக்கு பிரதமர் நஜிப் துன் ரசாக் தனது ஆழ்ந்த அனுதாபத்தைட்ன் தெரிவித்துக் கொண்டார்.

60ஆம் ஆண்டுகளில் மலேசியாவின் கால்பந்தாட்ட விளையாட்டில் மிக சிறந்த கோல்கீப்பராக விளங்கியவர் சவ் சீ கியோங். சிறுநீரக புற்றுநோயால் பாதிக்கப்பட்டிருந்த இவர், மலாயாப் பல்கலைக்கழக மருத்துவமனையில் இன்று மரணமடைந்தார்.

சீ கியோங் காலமானதை அடுத்து டிவிட்டர் பக்கத்தில் நஜிப் தனது அனுதாப செய்தியை வெளியிட்டிருந்தார். அதில், "முன்னாள் தேசிய கோல்கீப்பர் சவ் சீ கியோங் மரணமடைந்த செய்தி கிடைத்தது. அவர் மலேசியாவின் கால்பந்து துறையின் சகாப்தம் மட்டுமல்ல தொடர்ந்து ஐந்து வருடங்கள் ஆசியாவின் சிறந்த கோல்கீப்பராகவும் விளங்கியவர். அன்னாரின் குடும்பத்தினருக்கு எனது ஆழ்ந்த அனுதாபங்கள்" என தெரிவித்திருந்தார்.

சவ் சீ கியோங், ஆசியான் கால்பந்து கூட்டரசால் 1966 முதல் 1970ஆம் ஆண்டு வரை சிறந்த கோல்கீப்பராக தேர்ந்தெடுக்கபட்டவர். பின்னர் ஹாங்காங்கில் நிபுணத்துவ கால்பந்து விளையாட்டாளராகவும் வரலாறு படைத்தார் என்பது குறிப்பிடத்தக்கது.

More Articles ...