ஜாசின், அக்.14- இலகு ரக விமானம் ஒன்று இங்குள்ள ஆற்றில் விழுந்து விபத்துக்கு உள்ளானதில் விமானி ஒருவர் மாண்டார். மற்றொருவர் கடுமையான காயங்களுடன் மீட்கப்பட்டார்.

இங்கு சுங்கை ரம்பாய் விமானத் தளத்திற்கு அருகிலுள்ள ஆற்றில் குய்க்சில்வர் ஜி.டி.-500 ரக விமானம் விபத்துக்கு உள்ளானது. உடனடியாக இந்த விமானத்தைத் தேடும்பணி தொடங்கியது. 

இந்நிலையில், இன்று காலை 11.50 மணியளவில் இந்த விமானத்தை மீட்புப் படையினர் கண்டுபிடித்தனர். விமானம் விபத்துக்கு உள்ளான அந்த ஆற்றில் 53 வயதுடைய விமானி நீரில் மூழ்கி இறந்துவிட்டார். கரையோரத்தில் படுகாயமடைந்த நிலையில் 35 வயதுடைய பயணியான முகம்மட் ஷாருள் என்பவர் கிட்டத்தட்ட சுயநினைவிழந்த நிலையில் மீட்கப்பட்டார்.

உடனடியாக அவரை மூவார் மருத்துமனைக்கு சிகிச்சைக்காக கொண்டு சென்றனர். இந்தச் சம்பவம் எப்படி நடந்தது என்ற விபரங்கள் ஆராயப்பட்டு வருகிறது. முழுமையான போலீஸ் விசாரணை அறிக்கைக்காக தாங்கள் காத்திருப்பதாக ஜாசின் ஓசிபிடி அர்ஷாத் அபு தெரிவித்தார்.

 

லங்காவி, அக்.14- குதூகலத்துடன் நீர்வீழ்ச்சியில் குளிக்கச் சென்ற தனது சகோதரிகள் மற்றும் உறவுக்கார சிறுமிகள் நீரில் அடித்துச் செல்லப்பட்ட கோரத்தை தன்னால் பார்க்க மட்டும்தான் முடிந்தது. காப்பாற்ற முடியவில்லை என்று நீரில் மூழ்கி இறந்த சித்தி அய்ஷாவின் அண்ணன் முகமட் ஹபீசி காசிம் கண்ணீர் மல்க கூறினார். 

குவாவிலுள்ள லூபுக் செமிலாங் பொழுதுபோக்கு இடத்திலுள்ள நீர்வீழ்ச்சியில் தனது சகோதரிகள் மற்றும் உறவுக்கார சிறுமிகளுடன் குதூகலமாகக் குளிக்கச் சென்ற ஹபீசி, இந்த கோரச் சம்பவம் நிகழ்வதற்கு முன், தாங்கள் அனைவரும் மிகவும் சந்தோஷமாக இருந்ததாகவும், கண் இமைக்கும் நொடியில், அந்த நீரோட்டம் அவரின் சகோதரிகளை இழுத்துச் சென்றதாகவும் சொன்னார்.  

நூர் ஷுஹாடா, நோர் ஹயாத்தி மற்றும் சித்தி அய்ஷா ஆகியோர் அந்த நீரில் அடித்துச் செல்லப்பட்டனர். நூர் ஷுஹாடா மற்றும் ஹயாத்தி காப்பாற்றப்பட்ட வேளையில், இச்சம்பவத்தில் சித்தி அய்ஷா உட்பட மேலும் மூவர் பரிதாபமாக மாண்டனர். 

இச்சம்பவத்தில் ஹபீசியும் நீரில் அடித்துச் செல்லப்பட்டார். ஆனால், அருகிலிருந்த பாறையை இறுக்கமாகக் கட்டிக் கொண்டதால் அவர் உயிர் பிழைத்தார். 

தனது சகோதரிகள் எங்கு இழுத்துச் செல்லப்பட்டார்கள் என்று தன்னால் காண முடியவில்லை. தங்களைக் காப்பாற்றும்படி அவர்கள் அலறியது இன்னும் காதில் கேட்கிறது என்று கூறி அவர் துக்கம் தாளாமல் ஹபீசி அழுதார்.

"இந்த நீர்வீழ்ச்சியை என் தங்கைக்கு நான்தான் அறிமுகப்படுத்தினேன். அவளின் இறப்புக்கு நானே காரணமாகி விட்டேன்," என்று அவர் கண்ணீருடன் தெரிவித்தார். 

"அவள் உயிருடன் வந்து விடவேண்டும் என்று கடவுளிடம் நான் பிரார்த்தனை செய்தேன். என் மூத்த சகோதரிகளுக்கு நீந்தத் தெரியும். என் தங்கைக்கு நீச்சல் தெரியாது," என்று அவர் கூறினார். 

இதனிடையில், தனது மகள்  வழக்கம்போல் அல்லாது அன்றைய தினத்தில் தன்னிடத்தில் மிகவும் பாசமாக நடந்துக் கொண்டதாக கண்ணீருடன் தெரிவித்த காசிம் அப்துல்லா, மகள் அய்ஷா இறந்தது இறைவனின் சித்தம் என்று சொன்னார். 

 

கிள்ளான், அக்.14- தீபாவளி கொண்டாட்டத்திற்கு இன்னும் சில தினங்களே உள்ள நிலையில், கிள்ளான் 'லிட்டல் இந்தியா' வியாபாரிகள், தீபாவளிச் சந்தையின் வாயிலாக தாங்கள் நஷ்டம் அடைந்துள்ளதாக வேதனையுடன் கூறினர்.

இரண்டு வருடங்களுக்கு முன்பு, தனது கடையை லிட்டல் இந்தியாவின் பின்புறம் மாற்றுமாறு கிள்ளான் நகராண்மைக் கழகம் உத்தரவிட்டதைத் தொடர்ந்து தான் பல இன்னல்களைச் சந்தித்து வருவதாக திருமதி தல்பீர் சொன்னார்.

"கடந்த சில தினங்களாக மக்களின் நடமாட்டம் இங்கு அறவே இல்லை. ஆரம்பத்திலிருந்தே வியாபாரத்தில் தொய்வு ஏற்பட்டு வருகின்றது. எங்கள் இடத்திலிருந்து அவர்கள் (கிள்ளான் நகராண்மைக் கழகம்) எங்களை துரத்திய நாளிலிருந்து எங்களின் நிலைமை இப்படிதான் உள்ளது," என இனிப்புப் பலகாரங்களை விற்பனைச் செய்து வரும் அவர் தெரிவித்தார். 

ஆரம்பக் காலத்தில் தான் வியாபாரம் செய்த இடத்திற்கே தனது கடையை மீண்டும் திறக்க நகராண்மைக் கழகம் வாய்ப்பளிக்கக வேண்டும் என்று அவர் கேட்டுக் கொண்டார். 

இதனிடையே, கடந்த வருடமாவது வெகு சிலரிடமாவது துணிமணிகளை விற்றதாகவும், இவ்வருடம் தனது வாங்க யாருமே வரவில்லை என்று ஆண்கள் மற்றும் பெண்களின் ஆடைகளை விற்பனைச் செய்யும் பி.லோகேஸ்வரி கூறினார். 

முந்தைய காலங்களைப் போன்று யாரும் இப்போது சேலைகளை அணிவதில்லை என்றும் அவர் தெரிவித்தார்.  

பொருட்கள் மற்றும் சேவை வரி அமலாக்கத்தைத் தொடர்ந்து வியாபாரத்தில் தொய்வு நிலை ஏற்பட்டதாகவும், அதனைத் தொடர்ந்த இந்தக் கடைகளின் இடமாற்றமும் தங்களுக்கு எந்த விதத்திலும்  உதவிகரமாக இல்லை என்றும் அவர் சொன்னார். 

இந்த இடமாற்றத்திற்கு முன்பு, அங்குப் பல கடைகள் அமைக்கப்பட்டிருந்ததாகவும், அந்தக் கடைகள் பலரை கவர்ந்ததாகவும் அவர் மேலும் சொன்னார். ஜாலான் தெங்கு கிளானாப் பகுதியிலுள்ள இதர கடைகளிலும் மக்களின் நடமாட்டம் குறைவாகவே உள்ளது என்று கண்டறியப்பட்டுள்ளது.  

 

 

 

 

 

 

 

 

 

 

 

 

   

ஜொகூர்பாரு, அக்.14- ஜொகூர் மாநில இளவரசர் துங்கு இஸ்மாயில் சுல்தான் இப்ராஹிமிற்கு ஆண் குழந்தை பிறந்துள்ளது. ஜொகூர் அரச நீதிமன்ற வாரியம் இந்த தகவலை இன்று வெளியிட்டுள்ளது.

இளவரசர் துங்கு இஸ்மாயிலுக்கும் அவரின் துணைவியார் சே புவான் கலீடா புஸ்தமானுக்கும் கடந்த வருடம் பெண் குழந்தை பிறந்தது. அண்மையில் இரண்டாவது குழந்தைகாக சே புவான் கலீடா கர்ப்பமுற்றிருந்தார். இந்நிலையில் அவருக்கு ஆண் குழந்தை பிறந்துள்ளது. 

புதிதாக பிறந்த இளவரசர், ஜொகூர் சுல்தான் இப்ராஹிம் இப்னி அல்மாரும் சுல்தான் இஸ்கண்டாருக்கு இரண்டாவது பேரப்பிள்ளை என்பது குறிப்பிடத்தக்கது. 

 

 

கோலாலம்பூர்,அக்.13- உள்நாட்டு வர்த்தக, கூட்டுறவு மற்றும் நுகர்வோர் அமைச்சகம் (KPDNKK), கெம்போங் மீன் விலையைக் கட்டுப்படுத்தும் சாத்தியக்கூறு பற்றி நிதி அமைச்சிடம் பேசவுள்ளது.

மீன்களின் விலை நாளுக்கு நாள் விலை ஏறிக் கொண்டு போவதுடன் அதன் விலை ஒரு நிலைப்பாட்டில் இல்லை. தட்பவெட்ப நிலைக்கேற்ப அதன் விலை நிர்ணயிக்கப்படுகிறது. 

மலை பெய்தால் மீன்களின் விலை அதிகளவில் இருக்கிறது என உள்நாட்டு வர்த்தக, கூட்டுறவு மற்றும் நுகர்வோர் அமைச்சகத்தின் நிர்வாகி டத்தோ முகமட் ரொஸ்லான் மஹயுடின் கூறினார்.

வியாபாரிகள் மழைக் காலங்களில் கொள்ளை லாபம் அடிக்க மீன்களின் விலையை அதிகமாக்குகின்றனர். இதனை நிதி அமைச்சு கண்காணிக்க வேண்டும் என ரொஸ்லான் சொன்னார்.

பொதுமக்கள் அதிக விலைப் போட்டு விற்கும் வர்த்தகர்களைப் பற்றி அமைச்சிடம் விவேக கைப்பேசி விண்ணப்பம் (ஆப்ஸ்) ‘Ez ADU’ அல்லது 03-8826088 என்ற எண்களுக்கு அழைத்து புகார் செய்யலாம்.

அவர்கள் விலைக் கட்டுப்பாடு மற்றும் 2011-ஆம் ஆண்டு கொள்ளை லாபத் தடுப்புச் சட்டம் மூலம் குறைந்தபட்சம் 100,000 ரிங்கிட் அபராதமும் 3 வருட சிறைத்தண்டனையும் விதிக்கப்படும் என ரொஸ்லான் சொன்னார்.

கட்டுப்படுத்தப்பட்ட பொருட்களின் மீது நிர்ணயிக்கப்பட்ட விலைக் குறிப்பை ஒட்டாதவர்களுக்கு 10,000 வெள்ளி அபராதம் விதிக்கப்படும்.

 

 

 

 

கோத்தா கினாபாலு, அக்.13- 2015-ஆம் ஆண்டு அக்டோபர் மாதம் தொடங்கி இன்று வரை, 5,044 அகப்பக்கங்கள் முடக்கப்பட்டுள்ளதாக மலேசிய தொலைத்தொடர்பு மற்றும் பல்லூடக ஆணையம் தெரிவித்துள்ளது. 

1988-ஆம் ஆண்டின் மலேசியத் தொலைத்தொடர்பு மற்றும் பல்லூடகச் சட்டத்தின் கோட்பாடுகளை மீறியதற்காக அந்த 5,044 அகப்பங்கள் முடக்கப்பட்டுள்ளதாக சபா மாநில மலேசிய தொலைத்தொடர்பு மற்றும் பல்லூடக ஆணையத்தின் நிர்வாக அதிகாரி டத்தோ சபாவி அகமட் கூறினார். 

முடக்கப்பட்ட அந்த அகப்பங்களில், 4,277 அகப்பங்கள் ஆபாச அகப் பக்கங்களாகும். விபச்சாரம், சூது, ஏமாற்று வேலைகளை விளம்பரப்படுத்தும் அகப் பக்கங்களும் சட்டவிரோதமாக திரைப்படங்களை பதிவிறக்கம் செய்யும் அகப் பக்கங்களும் முடக்கப்பட்டுள்ளன என்றார் அவர்.  

இன்றைய காலக்கட்டத்தில், தொழில்நுட்பம், சமூகப் பிரச்சினைகளை உருவாக்குவதாக அவர் கருத்து தெரிவித்தார். இளைய சமூகத்தினர் பலர் இந்த தொழில்நுட்பங்களை தவறாகப் பயன்படுத்துவதாக  சிபித்தாங் நாடாளுமன்ற உறுப்பினருமான டத்தோ சபாவி சொன்னார். 

15 வயதிலிருந்து 40 வயதிற்குட்பட்ட 77 விழுக்காட்டினர் இணையத்தை பயன்படுத்துவதாக புள்ளி விவரம் தெரிவிப்பதாக அவர் கூறினார். 

இதனிடையில், மலேசிய சமூக வலைத்தளங்களில் பல பொய்யான தகவல்களும் பகிரப்படுவதாகவும், அவற்றின் வாயிலாக பலருக்கு அவமானங்கள் ஏற்படுத்துவதாகவும் அவர் மேலும் கூறினார். 

 

 

 

 

கோலாலம்பூர், அக்.13- தீபாவளி பண்டிகைக் காலத்தில் பயணிகளின் பாதுகாப்பிற்கு முக்கியத்துவம் வழங்கும் பொருட்டு 10 நாட்கள் பாதுகாப்பு அமலாக்க சோதனை நடவடிக்கைகள் மேற்கொள்ளப்படும் என்று தரைவழி பொது போக்குவரத்து ஆணையம் அறிவித்துள்ளது.

இன்று தொடங்கி அக்டோபர் 22-ஆம் தேதி நடைபெறவிருக்கும் அந்த சோதனைகள், காவல்துறை, சாலைப் போக்குவரத்து துறை, சாலைப் பாதுகாப்புத் துறை, தேசிய போதைத் தடுப்பு நிறுவனம் மற்றும் நெடுஞ்சாலை அமலாக்க நடவடிக்கை அமைப்புக்களின் ஒத்துழைப்போடு மேற்கொள்ளப்படும் என்று தரை வழி பொது போக்குவரத்து ஆணையம் தெரிவித்துள்ளது. 

அக்டோபர் 12-ஆம் தேதியிலிருந்து அக்டோபர் 22-ஆம் தேதி வரை தரைவழி பொது போக்குவரத்தை உபயோகிக்கும் பயணிகளின் எண்ணிக்கை அதிகமாக இருக்கும் என்று நம்பப்படுகிறது. இக்காலக் கட்டத்தில், வேக வரம்புகளை மீறும் பேருந்து ஓட்டுநர்களை ஒடுக்கும் முயற்சிகள் எடுக்கப்படும். அவர்களின் வாகனங்களின் ஜி.பி.எஸ் பதிவுகளை கண்காணிக்க சிறப்புத் தணிக்கைக் குழு அமர்த்தப்பட்டுள்ளது.

விபத்துகள் அதிகம் நிகழும் ஆபத்தான இடங்களில், வேகப் பொறிகள் பொருத்தப்பட்டுள்ளன. நெடுஞ்சாலை நடவடிக்கை மையங்களில் உள்கண்காணிப்பு காமிராக்கள் பொருத்தப்பட்டு, வேக விதிகளை மீறும் பேருந்து ஓட்டுநர்கள் மீது உடனடி நடவடிக்கை எடுக்கப்படும் என்று அந்த ஆணையம் வெளியிட்ட அறிக்கை தெரிவித்திருந்தது. 

நகர மையங்கள் மற்றும் பேரங்காடிப் பகுதிகளில் டிக்கெட் மற்றும் வாடகைக்கார்களை ஏற்பாடு செய்பவர்களும் இத்தினங்களில் கண்காணிக்கப்படுவர். டிக்கெட் முகப்பிடங்களில் பயண ஆவணச் சோதனைகளும் மேற்கொள்ளப்படும். 

இதனிடையில் சாலை விதிமுறைகளைப் பின்பற்றும் பொருட்டு, விரவு பேருந்து ஓட்டுநர்களுடன் கலந்துரையாடல் மேற்கொள்ளப்பட்டது. பொறுப்பற்ற பேருந்து ஓட்டுநர்கள் மீது கடுமையான நடவடிக்கை எடுக்கப்படும் என்பது குறித்து அவர்களுக்கு தெரிவிக்கப்பட்ட்து என்று அந்த ஆணையம் தகவல் தெரிவித்துள்ளது. 

2017-ஆம் ஆண்டு ஹரிராயா பெருநாளின் போது, 407 சாலைப் போக்குவரத்து குற்றங்கள் பதிவு செய்யப்பட்டதாகவும், 2016-ஆம் ஆண்டில் இதன் எண்ணிக்கை 306-ஆக பதிவாகியுள்ளதாகவும் 'ஸ்பாட்' எனப்படும் தரைவழி பொதுப் போக்குவரத்து ஆணையம் கூறியது.

More Articles ...