கோலாலம்பூர், டிசம்.7- புதிதாக அமல்படுத்தப்படும் வேலை காப்புறுதித் திட்டத்தைப் பயன்படுத்திக்கொண்டு சாக்குப் போக்குச் சொல்லி அதிக எண்ணிக்கையிலான தொழிலாளர்கள் ஆள்குறைப்புச் செய்யப்படும் அபாயம் உருவாகி இருப்பதாக மலேசிய தொழிற்சங்க காங்கிரஸ் (எம்டியூசி) இன்று எச்சரிக்கை விடுத்தது.

அடுத்த ஆண்டில் இந்த வேலை காப்புறுதித் திட்டத்தை அமல்படுத்துவதற்காக சொக்சோ நிறுவனத்திற்கு அரசாங்கம் 122 மில்லியன் ரிங்கிட் நிதியை ஒதுக்கி இருக்கிறது என்ற தகவலைத் தாங்கள் வரவேற்கும் வேளையில், சுமார் 57,000 தொழிலாளர்கள் வேலையிழக்கும் அபாயத்தில் உள்ளனர் என்ற தகவல் குறித்து மிகுந்த கவலை கொண்டிருப்பதாக எம்டியூசி தெரிவித்தது.

சுமார் 57,000 பேர் ஆள்குறைப்புச் செய்யப்படுவார்கள் என்று எதிர்பார்க்கப்படுவதாக சொக்சோ தலைமைச் செயல்நிலை அதிகாரி கூறி யிருப்பது கவலை தருகிறது. 

இந்தத் தகவல், நாட்டின் பொருளாதாரம் நல்ல நிலையில் இருக்கிறது என்றும் கிட்டத்தட்ட நமது ஒட்டுமொத்த உள்நாட்டு உற்பத்தித் திறன் 6.2 விழுக்காட்டினை எட்டும் என்றும் அரசாங்கம் செய்த அறிவிப்புக்கும் வேலை இழக்கப் போகும் தொழிலாளர்களின் எண்ணிக்கைக்கும் பொருத்தமில்லாமல் இருக்கிறது என்று எம்டியூசியின் பொதுச் செயலாளர் ஜே.சோலமன் தெரிவித்தார்.

வேலை இழப்போருக்கு மூன்று மாதங்களுக்கு தலா 600 ரிங்கிட் சிறப்பு அலவன்ஸ் வழங்கப்படுவதை அவர் கடுமையாகச் சாடினார். இந்தத் தொகை ஒருவர் தன்னைப் பராமரித்துக் கொள்வதற்கு போதுமானது அல்ல என்று சோலமன் சுட்டிக்காட்டினார்.

 

 

 

 

 

 

 

 

 கோலக் கங்சார், டிச.7- வடக்கு-தெற்கு விரைவு நெடுஞ்சாலையின் 246 ஆவது கிலோமீட்டரில் இரட்டை மாடி விரைவு பேருந்து ஒன்று டிரெய்லர் ஒன்றின் மீது மோதி விபத்துக்குள்ளானதில், அறுவர் காயம் அடைந்துள்ளனர். 

சுங்கை பேராக் ஓய்வு இடத்திலிருந்து வெளியேறிய பேருந்தின் ஓட்டுனர், சாலை ஓரத்தில் நிறுத்தி வைக்கப்பட்டிருந்த 25 டன்கள் எடைகொண்ட டிரெய்லரைக் கவனிக்கத் தவறி, அதன் மீது மோதியதால் அவ்விபத்து நடந்தது. 

இச்சம்பவம் இன்று அதிகாலை 3.40-க்கு நிகழ்ந்தது. கங்கார், பெர்லிசிலிருந்து கிள்ளானை நோக்கிச் சென்றுக் கொண்டிருந்த அப்பேருந்தில் 42 பயணிகள், மற்றும் 2 ஓட்டுனர்கள் பயணித்தனர் என்று தீயணைப்பு மற்றும் மீட்புப் படை பேச்சாளர் ஒருவர் தகவல் தெரிவித்தார். 

பேருந்தில் காயத்திற்கு உள்ளாகி சிக்கிக் கொண்ட ஐவரையும், அந்தப் பேருந்து ஓட்டுநரையும், அவர்களின் இருக்கையிலிருந்து வெளியேற்ற பொதுமக்கள் உதவியுனர். அவர்கள் அனைவரும் ராஜா பெர்மாய்சூரி பைனூன் மருத்துவமனைக்கு சிகிச்சைக்காக அனுப்பப் பட்டனர் என்று அவர் மேலும் கூறினார். 

இதனிடையில், அப்பேருந்தில் பயணித்த கண் பார்வையற்ற ஒருவர், அவ்விபத்தில் காயப்படாத போதிலும், பேருந்திலிருந்து வெளியேற முடியா மல் தவித்ததாகவும் அவர் சொன்னார். 

"ஏணியின் உதவிக் கொண்டு, அவரை அப்பேருந்திலிருந்து நாங்கள் வெளியேற்றினோம்" என்றார் அவர். இவ்விபத்தில், அந்த டிரெய்லர் ஓட்டுனருக்கும், அவரின் இணை ஓட்டுனருக்கு எவ்வித காயமும் ஏற்படவில்லை.  

 

 கம்பார், டிச.7- மம்பாங் தியாவாங் என்ற பகுதியிலுள்ள செம்பனைத் தோட்டத்தில் கொலையுண்டு கிடந்த லட்சுமி கொலையில் சில புதிய திருப்பங்கள் ஏற்பட்டுள்ளன.  

அந்த 28 வயது இளம் பெண் கொலை தொடர்பில் அவரது காதலனும் அவனின் மனைவியும் கைது செய்யப்பட்டுள்ள வேளையில், அந்தப் பெண், இதர இரு ஆடவர்களுடன் பாலியல் உறவில் ஈடுபட்டிருந்தார் என்றும், அந்த உறவு வைத்துக் கொள்வதற்கு அவ்விருவரிடமிருந்தும் அவர் பணம் வசூலித்துள்ளார் என்றும் தெரிய வந்திருப்பதாக போலீஸ் தரப்பு கூறியது. 

இதன் தொடர்பில், கடந்த 3-ஆம் தேதியன்று, அவ்வட்டார காவல் நிலையத்தில் 54 வயது ஆடவர் ஒருவர் சரணடைந்துள்ளார். மேலும் 45 வயது மீன் விற்பனையாளர் ஒருவரையும், தாமான் அமானிலுள்ள வீடு ஒன்றில், விசாரணைக்கு உதவும் பொருட்டு, போலீசார் கைது செய்துள்ளதாக ஓசிபிடி சூப்ரிண்ட். இங் கொங் சூன் கூறினார்.  

கடந்த நவம்பர் மாதம் 30-ஆம் தேதியன்று, காளான்களை பறிக்கச் சென்ற முதியவர் ஒருவர், செம்பனைத் தோட்டத்தில் கொலையுண்டு கிடந்த லட்சுமியின் உடலைக் கண்டார்.  

உடலில் பல்வேறு இடங்களில் காயங்கள் ஏற்பட்டு, கழுத்து நெறிக்கப்பட்டு, தலைப் பகுதியில் ஆயுதத்தால் தாக்கப்பட்டு லட்சுமி இறந்துக் கிடந்தார். தலைப் பகுதியில் ஆயுதத்தால் தாக்கப்பட்டதால் தான் அவர் மரணமடைந்து உள்ளார் என்று பிரேதப் பரிசோதனை அறிக்கை கூறியது. 

"பழி வாங்கும் நோக்கத்தில் லட்சுமி கொலை செய்யப்பட்டுள்ளார். அவர் இறந்துக் கிடந்த இடத்திலிருந்து சற்று தொலைவிலுள்ள புதர்களில், லட்சுமியின் உடமைகள் மறைத்து வைக்கப்பட்டிருந்தன" என்று இங் கொங் சூன் சொன்னார். 

 

 ஜார்ஜ்டவுன், டிச.6- பகடிவதை காரணமாக கொலை செய்யப்பட்ட டி.நவீன் சம்பந்தப்பட்ட வழக்கு, அடுத்த ஆண்டு ஜனவரி 11ஆம்தேதி நடைபெறும் என்று இங்குள்ள மாஜிஸ்திரேட் நீதிமன்றம் தேதி நிர்ணயித்துள்ளது.

இராசாயன அறிக்கைக்காக தாங்கள் இன்னும் காத்துக் கொண்டிருப்பதாக அரசு தரப்பு துணை பிராசிகியூட்டர் முகம்மட் ஷாஃபிக் நீதிமன்றத்தில் தெரிவித்ததைத் தொடர்ந்து மாஜிஸ்திரேட் முகம்மட் அமின் ஷாகுல் ஜனவரி 11ஆம் தேதியை நிர்ணயம் செய்தார்.

நீதிமன்றத்தினுள் நவீனின் பெற்றோர்கள் மற்றும்  குற்றஞ்சாட்டப்பட்டுள்ள நபர்களின் பெற்றோர்கள் மட்டுமே அனுமதிக்கப்பட்டனர். மற்றவர்கள் நீதிமன்றத்தை விட்டு வெளியேறும்படி உத்தரவிடப்பட்டனர்.

இந்தத் தருணத்தில் குற்றஞ்சாட்டப்பட்டுள்ள ஒருவரின் உறவினர் போலீஸ்காரர்களுடன் வாக்குவாதத்தில் ஈடுபட்டு நீதிமன்றத்தில் அமளியை ஏற்படுத்தினார்.

இராசாயன அறிக்கையைப் பெறுவதில் ஏற்பட்டு வரும் தாமதம் குறித்து தாங்கள் பெரிதும் அதிருப்தி அடைந்திருப்பதாக நவீனின் வழக்கறிஞரான டத்தோ பல்ஜிட் சிங் நீதிமன்றத்திற்கு வெளியே செய்தியாளர்களிடம் தெரிவித்தார்.

இந்த இராசாயன அறிக்கையைப் பெறுவதில் பிராசிகியூசன் தரப்புக்கு இவ்வளவு காலதாமதம் எதனால் ஏற்படுகிறது? என்று அவர் கேள்வி எழுப்பினார்.

நவீன் கொலை வழக்கில் ஜே.ராகேஸ்சுதன் (வயது 18),எஸ்.கோகுலன் (வயது 18), மற்றும் 16வயது 17 வயது சிறுவர்கள் இருவர் ஆகியோர் மீது குற்றஞ்சாட்டப்பட்டுள்ளது. இவர்களுக்கு எதிராக குற்றவியல் சட்டத்தின் 302ஆவது பிரிவின் கீழ் அதாவது கட்டாய மரண தண்டனை விதிக்க வகை செய்யும் சட்டத்தின் கீழ் குற்றஞ்சாட்டப்பட்டுள்ளது.

 

 

 

 

 

 

 

 

 

கோப்பெங், டிச.6- வடக்கு-தெற்கு விரைவு நெடுஞ்சாலையில் மூன்று வாகனங்கள் மோதிக் கொண்டதில், 14 பேர் படுகாயம் அடைந்தனர். காயமடைந்தவர்களில் 12 பேர், அந்த விபத்தில் சிக்கிய பேருந்தில் பயணித்த பயணிகளாவர். 

காகிதங்களை ஏற்றிச் செல்லும் ட்ரெய்லர் ஒன்றின் பின்புறத்தில், இரண்டு மாடி பேருந்து வேகமாக மோதியதால் இந்த விபத்து ஏற்பட்டது என்று தீயணைப்பு மற்றும் மீட்புப் படை பேச்சாளர் தெரிவித்தார். 

அதே சமயம், அந்தப் பேருந்தின் அருகில் பயணித்துக் கொண்டிருந்த லோரி ஓட்டுநர் ஒருவரால், உடனடியாக 'ப்ரேக்' போட இயலாமல், லோரியின் கட்டுப்பாட்டை இழந்து, அந்த பேருந்தின் ஓரத்தில் மோதி விட்டார் என்று அந்தப் பேச்சாளர் கூறினார். 

"இச்சம்பவம் தொடர்பில், அதிகாலை 5.40 மணிக்கு எங்களுக்கு அழைப்பு வந்தது. அதனைத் தொடர்ந்து, மீட்புப் படை வீரர்கள் அங்கு விரைந்தனர். விபத்தில் சிக்குண்டு பேருந்திலிருந்து வெளியேற முடியாமல், 3 ஆண்களும், 9 பெண்களும் மாட்டிக் கொண்டுள்ளனர் என்பது அப்போதுதான் தெரிய வந்தது. 

அந்தப் பேருந்து ஓட்டுநர், இடிபாடுகளிலிருந்து சொந்தமாக வெளியேறி விட்டார்" என்று அவர் மேலும் கூறினார். 

இவ்விபத்தில் காயமடைந்த அனைவரும் ஈப்போவிலுள்ள ராஜா பெர்மாய்சூரி பைனூன் மருத்துவமனையில் சேர்க்கப்பட்டுள்ளனர். 

காகிதங்களை ஏற்றி வந்த ட்ரெய்லர் ஓட்டுநரை மீட்புப் படை வீர்ர்கள் அவரின் ட்ரெய்லரிலிருந்து வெளியேற்றியதாகவும், அவருடன் பயணித்து இருவர், எவ்வித காயமும் இன்றி தப்பித்ததாக தெரிவிக்கப்பட்டது.

 

 

கோலாலம்பூர், டிச.6- இவ்வாரத்திற்கான புதிய பெட்ரோல் விலை அறிவிக்கப்பட்டிருக்கும் நிலையில், ரோன்-95 மற்றும் ரோன்-97 ஆகிய ரகப் பெட்ரோலின் விலை லிட்டருக்கு 1 காசு குறைக்கப்பட்டுள்ளது.

அதேவேளையில், டீசலின் விலை லிட்டருக்கு 4 காசுகள் குறைக்கப்பட்டு 2 ரிங்கிட் 21 காசுகளாக விற்கப்படும். ரோன்-95 லிட்டருக்கு 2 ரிங்கிட் 29 காசுகளாக விற்கப்படும். 

ரோன்-97 ரகப் பெட்ரோல் லிட்டருக்கு 2 ரிங்கிட் 57 காசுகளாக விற்கப்படும். இந்த புதிய எரிபொருள் விலை நிலவரம், இன்று நள்ளிரவு தொடங்கி டிசம்பர் 13-ஆம் தேதி வரையில் அமலில் இருக்கும். 

புத்ராஜெயா, டிச.6- முகநூல் மூலம் அறிமுகமான பதின்ம வயது பள்ளி மாணவியை தங்கும் விடுதி ஒன்றுக்கு அழைத்துச் சென்று கட்டாயப்படுத்தி கற்பழித்த பாதுகாவலாளி ஒருவனுக்கு 12 ஆண்டுகள் சிறைத் தண்டனை விதிக்கப்பட்டதோடு 2 பிரம்படித் தண்டனையும் விதித்து நீதிமன்றம் தீர்ப்பளித்தது.

சாத்தா நாசில் இப்ராகிம் (வயது 39) என்ற அந்தக் காவலாளி, செசன்ஸ் நீதிமன்ற நீதிபதி யோங் ஷரிதா சஷாலி முன்னிலையில் தனது குற்றத்தை ஒப்புக்கொண்டான்.

சுமார் 16 வயதுடைய அந்த மாணவி முகநூல் மூலம் அந்தக் காவலாளிக்கு அறிமுகமாகி உள்ளான். கிள்ளானில் தன்னுடைய வீட்டிற்கு அருகிலுள்ள பஸ் நிலையத்தில் பின்னர் ஒருநாள் அந்த மாணவியைச் சந்தித்துப் பேசிய பின்னர் அவரை அழைத்துக் கொண்டு கோலாலம்பூரிலுள்ள பேரங்காடி ஒன்றுக்கு வந்துள்ளான்.

பின்னர் ஜாலான் புடுவிலுள்ள தங்கும் விடுதி ஒன்றுக்கு அந்தச் சிறுமியை அழைத்துச் சென்ற அவன், சிறுமியின் ஆடைகளைக் களைந்த போது கடுமையாக எதிர்க்கவே,  சிறுமியை அடித்து பயமுறுத்திய பின்னர் கற்பழித்துள்ளான். பின்னர் மீண்டும் கிள்ளானிலுள்ள அதே பஸ் நிலையத்தில் சிறுமியை விட்டு விட்டுச் சென்று விட்டான் என்று நீதிமன்றத்தில் அரசு தரப்பில் தெரிவிக்கப்பட்டது.

More Articles ...