கோலாலம்பூர், ஜூலை 21- இஸ்லாம் மதத்தை அவமதித்த குற்றத்திற்காக வேலையில்லா ஆடவனுக்கு மஜுஸ்திரேட் நீதிமன்றம் ஆறு மாத சிறைத்தண்டனை வழங்கி தீர்ப்பளித்தது. அவ்வாடவன் எந்தவொரு அடையாள அட்டையினையும் வைத்திருக்கவில்லை.

ஃபெபியன் லுத்ரசாமி எனும் அவ்வாடவன் கடந்த ஜூலை 18ம் தேதி ஜாலான் செமுரில் இஸ்லாமியர்களின் புனித நூலான குரானை சாலையில் வீசியதாக குற்றஞ்சாட்டப்பட்டான். 42 வயதான அந்த ஆடவனுக்கு இக்குற்றத்திற்காக நான்கு மாத சிறை தண்டனை வழங்கப்பட்டது. 

அதோடு, விசாரணையின் போது அவன் அடையாள அட்டையைக் காட்ட தவறியதால் இரண்டு மாத சிறைத் தண்டனையும் வழங்கப்பட்டது.

மஜிஸ்திரேட் முகமட்ஃபைசால் இஸ்மாயில் முன்னிலையில் நடந்த இந்த வழக்கில் ஃபெபியன் குற்றத்தை ஒப்புக்கொண்டான்.

ஃபெபியன் லுத்ரசாமி கடந்த 2006ம் ஆண்டு இஸ்லாத்திற்கு மாறிவிட்டதாகவும் ஆனால் இன்னமும் தனது இந்து பெயரையே பயன்படுத்தி வருவதாகவும் போலீஸார் கூறினர்.

கோலாலம்பூர், ஜூலை 21- கோலாலம்பூரிலுள்ள கனடா தூதரகத்துடன் இணைந்து 'அவாம்' (AWAM) எனப்படும் அனைத்து மகளிர் நடவடிக்கை  இயக்கம், 'ஒய்ட் ரிப்பன் ஓட்டம்' (white ribbon run) என்ற விழிப்புணர்வு நிகழ்ச்சியை ஆண்டுதோறும் நடத்தி வருகிறது. இம்முறை 4 ஆவது ஆண்டாக இந்நிகழ்ச்சி டேசா பார்க் சிட்டியில் எதிர்வரும் நவம்பர் மாதம் 27ஆம் தேதி அதிகாலை 6.30 மணியளவில் நடைபெறவிருக்கிறது. 

'வன்முறைகள் மீதான மவுனத்தைக் களைவோம்' என்ற கோட்பாட்டின் அடிப்படையில் முன்பு இந்நிகழ்வில், கிட்டத்தட்ட 6,000 ஆண்கள் பங்கேற்றனர். 

'ஒய்ட் ரிப்பன்' இயக்கம் என்பது உலகளலான மிகப் பெரிய இயக்கமாக திகழ்கிறது. பெண்களுக்கு எதிரான வன்முறைகளுக்கு முடிவு கட்டவும், ஆண்-பெண் சமவுரிமையை வளர்க்கவும் ஆரோக்கியமான உறவுகளைப் பேணவும் இந்த இயக்கம் பங்களிப்பைச் செய்து வருகிறது.

மலேசியப் போலீஸ் படை, கடந்த 2014ஆண்டில் வெளியிட்ட பெண்களுக்கு எதிரான வன்முறை புள்ளி விபரங்களின்படி பார்த்தால், அந்த ஆண்டில் தேசிய அளவில் 2,349 பாலியல் பலாத்காரங்கள் நடந்துள்ளன. 4,807 குடும்ப வன்முறைகள் நடந்துள்ளன. 2015-இல் குடும்ப வன்முறைகள் 5,000ஐ தாண்டிவிட்டன. ஆனால், இந்த வன்முறைகள் தொடர்பாக நீதிமன்றத்திற்குக் கொண்டுவரப்பட்டு, தண்டிக்கப்பட்ட சம்பவங்களின் எண்ணிக்கை 2014ஆம் ஆண்டில் 358 ஆக இருந்தது. 2015-இல் அது 145 ஆகக் குறைந்துவிட்டது. பெண்களுக்கு எதிரான வன்முறைகளில் 10க்கு 8 சம்பவங்கள் புகார்கள் இன்றியே போய்விடுகின்றன.

பெண்களுக்கு எதிரான வன்முறைகளை எதிர்த்து கனடாவில் 1990ஆம் ஆண்டில் ஆண்கள் தொடங்கிய இயக்கம் தான் 'ஒய்ட் ரிப்பன் இயக்கம்'. தற்போது உலகம் முழுவதும் 60 நாடுகளில் அந்த இயக்கம் காலூன்றி இருக்கிறது. 

அந்த வகையில், மலேசியாவில் 'அவாம்' அமைப்பு, பெண்கள் மீதான வன்முறை பிரச்சனைகளையும் ஆண்-பெண் சமத்துவத்தையும் முன்நிறுத்தி, அவர்களுக்கு ஒரு பாதுகாப்பான சூழலை ஏற்படுத்த அனைத்து சமூகங்களுடன் சேர்ந்து பணிபுரிந்து வருகிறது.

இந்நிலையில், 'அவாம்' இயக்கத்துடன் சேர்ந்து செயல்பட முன்வந்துள்ள டேசா பார்க் சிட்டி 2016ஆம் ஆண்டுக்கான ஒய்ட் ரிப்பன் ஓட்ட நிகழ்ச்சியை நடத்த இடம் வழங்கி இருக்கிறது. பெண்கள், சிறுமிகள் உள்பட அனைவருக்கும் ஒரு பாதுகாப்பான சூழலை உருவாக்கித் தர அனைவரும் ஒன்றுசேர்ந்து செயல்படவேண்டும். இதுவொரு சமூகப் பிரச்சனை. இதனை பெண்களின் பிரச்சனை என்ற கோணத்தில் மட்டுமே பார்க்கக்கூடாது.

ஒய்ட் ரிப்பன் இயக்கத்தின் மூலம் பொதுமக்களிடையே விழிப்புணர்வை ஏற்படுத்தும் பணியில் ஈடுபடும் அதேவேளையில், 'அவாம்' அமைப்பு  பாலின ரீயிலான வன்முறைகள் மீது கருத்தரங்கு மற்றும் பயிலரங்கு ஆகியவற்றையும் நடத்துகிறது. இலவசமான ஆலோசனைகள் சட்டம் தொடர்பான தகவல்கள் ஆகியவற்றையும் அது வழங்குகிறது.

அதன் அடிப்படையில் நடத்தப்படும் ஒய்ட் ரிப்பன் ஓட்டம், அவாம் அமைப்பின் மிகப் பெரிய நிதிதிரட்டும் நிகழ்ச்சி என்பதோடு பொதுமக்களிடையே விழிப்பை ஏற்படுத்தும் முயற்சியுமாகும். பெண்களுக்கு எதிரான வன்முறை முடிவுக்குக் கொண்டுவர ஆண்கள் ஆதரவு தந்து உதவ ஆண்டுதோறும் இந்த நிகழ்ச்சி நடத்தப்படுகிறது.

ஒய்ட் ரிப்பன் ஓட்டத்திற்கான பதிவுத் தளத்தை அண்மையில் 'அவாம்' தொடங்கி இருக்கிறது. https://tinyurl.com/whiteribbon2016 உங்களை வரவேற்கிறது.

 

 

 

கோலாலம்பூர், ஜூலை 21- 1எம்டிபி விவகாரம் தொடர்பில் அமெரிக்க நீதித்துறை வழக்குத் தொடுத்திருப்பது குறித்து  பிரதமரின் டத்தோஶ்ரீ நஜிப்பின் பத்திரிகைத் துறைச் செயலாளர் டத்தோஶ்ரீ துங்கு ஷரிஃபுடின் அறிக்கை ஒன்றை விடுத்திருக்கிறார். 1எம்டிபி சம்பந்தமான 100 கோடி அமெரிக்க டாலர் மதிப்புடைய சொத்துக்களை கையகப்படுத்துவதற்கு அமெரிக்க நீதித் துறை முயல்வதாக தெரிய வந்துள்ளது.

இது தொடர்பாக, டத்தோஶ்ரீ துங்கு ஷரிஃபுடின் விடுத்திருக்கும் அறிக்கை விபரம் வருமாறு:

1எம்டிபி தொடர்பான புலன் விசாரணைகளைப் பொறுத்தவரை, மலேசிய அதிகாரிகள் முன்னோடியாகச் செயல்பட்டு வருகின்ற னர். மலேசியாவுக்கு உள்ளேயே 1எம்டிபி நிறுவனம் தொடர்பாக, மலேசிய ஊழல் தடுப்பு ஆணையம், ஆடிட்டர் ஜெனரல், அரசியல் கட்சிப் பிரதிநிகள் அடங்கிய பொதுக் கணக்குக் குழு ஆகியவை பல கோணங்களில் விரிவாக விசாரணகளை நடத்தின. இந்த விசாரணைகள் குறித்து ஆழமாக ஆராய்ந்த பின்னர், இதில் குற்றம் எதுவும் இழைக்கப்படவில்லை என்பதை அட்டர்னி ஜெனரல் கண்டறிந்துள்ளார். அரச மலேசியப் போலீஸ் படை இன்னமும் அது குறித்த விசாரணையை நடத்தி வருகிறது.

இந்நிலையில், அமெரிக்காவின் நீதித் துறை, பல்வேறு சொத்துக்களுக்கு எதிராக சிவில் வழக்கை தொடுத்திருப்பது பற்றி நாம் கவனத்தில் எடுத்துக் கொண்டுள்ளோம். ஏற்கெனவே குறிப்பிடப்பட்டதைப் போல, அனைத்துலக நடைமுறைகளுக்கு ஏற்ப, மலேசிய நிறுவனங்கள் அல்லது பிரஜைகள் மீது மேற்கொள்ளப்படும் எந்தவொரு சட்டப்பூர்வமான விசாரணைகளுக்கும் மலேசிய அரசாங்கம் ஒத்துழைப்பைத் தரும்.

பிரதமர் எப்போதுமே குறிப்பிட்டு வருவது போல, எந்தவொரு நேர்மைக் குறைவான தவறும் நிருபணமானால், எத்தகைய விதி விலக்குமின்றி சட்டம் நடவடிக்கையில் இறங்கும்.

இவ்வாறு அந்த அறிக்கையில் பிரதமரின் பத்திரிகைத் துறைச் செயலாளர் டத்தோஶ்ரீ துங்கு ஷரிஃபுடின் தெரிவித்துள்ளார்.

 

 

கோலாலம்பூர், ஜுலை 21- மலேசியாவில் இயங்கும் செவன் இலெவன் நிறுவனம் தனது 2000வது கடையை (ஸ்டோர்) நேற்று திறந்தது. இந்த 2000வது செவன் இலெவன் பழைய கிள்ளான் சாலையில் அமைந்துள்ள தே ஸ்கோர்ட் கார்டனில் திறப்பு விழா கண்டது.

கடந்த 2013ம் ஆண்டு முதல் நாட்டில் உள்ள செவன் இலெவன் கடைகள் மறுசீரமைப்பு செய்யப்பட்டு வருகின்றன. அவ்வகையில் தற்போது புதிதாக திறக்கப்பட்டுள்ள ஸ்கோர்ட் கார்டன் கடை இந்த மறுசீரமைப்பைப் பிரதிப்பலிப்பதாய் அமையும் என முதன்மை செயல்முறை அதிகாரி கேரி பிராவ்ன் கூறினார். 

"2014ம் ஆண்டு முதல் 2016 வரை புதிதாக 600 கடைகளைத் திறக்கவேண்டும் என திட்டமிட்டிருந்தோம். அவ்வகையில் அது நிறைவேறி இன்று மொத்தமாக 2000 கடைகளை செவன் இலெவன் மலேசிய நிறுவனம் கொண்டிருப்பது மகிழ்ச்சி அளிக்கிறது" என அவர் மேலும் கூறினார்.

ஜொகூர், 21 ஜூலை-   21 ஜப்பான் எனும் குண்டர் கும்பலில் இணைந்து திட்டமிடப்பட்ட குற்றச்செயலில் ஈடுபட்ட குற்றத்திற்காக டத்தோ ஏழுமலை உட்பட 8 பேர் இன்று மாஜிஸ்திரேட் நீதிமன்றத்தில் குற்றஞ்சாட்டப்பட்டனர். 

டத்தோ கே. ஏழுமலை (வயது 42), பூவேந்திரன் (வயது 28), கே.எம் கிஷோக் (வயது 25), ஆர்.கணபதி (வயது 30), ஆர்.ஷண்முகநாதன் (வயது 37), எஸ்.ஜீவா (வயது 26), எஸ்.ராஜேந்திரன் (வயது 39), எம்.சுரேஷ் (வயது 39 )  ஆகியோர் தங்களுக்கு எதிரான குற்றச்சாட்டு வாசிக்கப்பட்ட போது,  அதனை ஆமோதிப்பதாகப் பதிலளித்தனர். 

கடந்த 2015-ஆம் ஆண்டு ஜனவரி 18-ஆம் தேதி முதல்  அதே ஆண்டு ஆகஸ்டு 19-ஆம் தேதி  வரை இஸ்கண்டார் மலேசியா பெருந்திட்ட பகுதியில் "21 ஜப்பான்" எனும் குண்டர் கும்பலில் இணைந்ததற்காகக் குற்றஞ்சாட்டப்பட்டனர். 

இவர்கள் அனைவரும்,  செக்‌ஷன் 130V சித்ரவதை சட்டத்தின் கீழ் குற்றஞ்சாட்டப்பட்டுள்ளனர்.  

இவர்கள் மீதான குற்றம் நிரூபிக்கப்பட்டால், 20 ஆண்டுகள் வரை சிறைதண்டனை விதிக்கப்படும் என்பது குறிப்பிடத்தக்கது. 

கங்கார், ஜூலை 21- மலேசிய தம்பதிகள் தென் தாய்லாந்தில் திருமணம் செய்வது அதிகரித்து வருகிறது. இது தவறல்ல, ஆனால் அத்திருமணம் நம் நாட்டில் முறையாக பதிவு பெற்றதாக இருக்கவேண்டும் என்பது மிக முக்கியமானது.

"தென் தாய்லாந்தில் அதிகரிக்கும் மலேசிய திருமணங்களின் எண்ணிக்கை ஆபத்தானது அல்ல. ஆனால், அத்திருமணங்களைச் சட்டப்பூர்வமாக்க பதிவு செய்யும் முயற்சிகளை மேற்கொள்ளவேண்டும்" என பிரதமர் துறை அமைச்சர் டத்தோ ஶ்ரீ ஜாலில் கிர் பஹாரோம் கூறினார்.

அங்கே நடைபெறும் திருமணங்கள் இங்கே சட்டப்பூர்வமாக பதிவு செய்யாவிட்டால் பிரச்சனைகள் எழலாம். குறிப்பாக இது மனைவிக்கும் பிள்ளைகளுக்கும் பெரிய பாதிப்பை உண்டாக்கும் என அவர் மேலும் கூறினார். 

இதனால் தென் தாய்லாந்தில் உள்ள யாலா, நராதிவாத், பட்டாணி, சத்தூன், சொங்க்லா ஆகிய இடங்களில் திருமணம் மற்றும் விவாகரத்து தொடர்பான நெறிமுறைகள் உருவாக்கப்படவுள்ளன.

"தென் தாய்லாந்தில் மலேசியர்களின் திருமணங்கள் அதிகரித்து வரும் நிலையில் இந்த நெறிமுறைகள் அவசியமான ஒன்று. இதன்வழி எதிர்காலத்தில் பிரச்சனைகள் எழாமல் தடுக்கலாம்" என அவர் மேலும் கூறினார்.

திருமணங்கள் பதிவு செய்யப்படவில்லையெனில், பிறப்பு பத்திரம் எடுப்பதில் சிரமம் ஏற்படும். அதைவிட, விவாகரத்து அல்லது இறப்பின்போது சொத்துகளைப் பங்கீடும் போது பெரிய சிக்கல்கள் உருவாகும் என்றார்.

2015ம் ஆண்டு வெளியான தகவலின்படி, 2013ம் ஆண்டு தென் தாய்லாந்தில் 3,485 மலேசிய திருமணங்கள் நடந்தவேளை, இந்த எண்ணிக்கை 2014ம் ஆண்டு 3,831 ஆக அதிகரித்துள்ளது. அதேவேளையில் 2015ம் ஆண்டு, ஜனவரி மற்றும் பிப்ரவரி மாதத்தில் மட்டும் 675 மலேசிய திருமணங்கள் நடந்துள்ளன.

இதில் 80 விழுக்காடு திருமணங்கள் மலேசியாவைச் சேர்ந்த தம்பதிகள் ஆவர். எஞ்சியவர்கள் வெளிநாட்டு பிரஜையை மணந்த மலேசியர்களாவர்.

இதில் பெரும்பாலோர் மறுமணம் புரிந்தவர்கள் என்பது குறிப்பிடத்தக்கது.

அலோர் ஸ்டார்,  21 ஜூலை-   கெடாவில் வெள்ளம் ஏற்பட்டுள்ளதைத் தொடர்ந்து,    வெள்ள நிவாரண மையங்களுக்கு மாற்றப்பட்டோரின் எண்ணிக்கை  476-ஆக அதிகரித்துள்ளது.   இதுவரை 4 மாவட்டங்களில்  6 வெள்ள நிவாரண மையங்கள் திறக்கப்பட்டுள்ளன. 

யான், கோல மூடா, பாலிங் மற்றும் பெண்டாங் மாவட்டத்தில்  132  குடும்பங்கள்  வெள்ளத்தால் பாதிக்கப்பட்டுள்ளனர். 

பெண்டாங் மாவட்டத்தில் மட்டும் சென்ட்ராவாசே  மண்டபத்தில் 31 குடும்பங்களைச் சேர்ந்த 107 பேர் தங்க வைக்கப்பட்டுள்ளனர். 

More Articles ...