கோலாலம்பூர், பிப்.22- 2017 ஆம் ஆண்டுக்கான எஸ்பிஎம் தேர்வு எழுதியவர்களில் 17,000  மாணவர்கள் வரலாற்றுப் பாடத்தில் தோல்வி கண்டு விட்டதாக வெளியான தகவலை  கல்வி அமைச்சு நிராகரித்தது.

சமூக வலைத் தளங்களில் இந்த வதந்தி மிக வேகமாகப் பரவி வருகிறது. 2017ஆம் ஆண்டுக்கான எஸ்பி எம் தேர்வு குறித்து தேர்வு வாரியம் இதுவரை எத்தகைய அறிவிப்பையும் செய்யவில்லை. இத்தகைய வதந்திகளை மக்கள் நம்பவேண்டாம் என்று கல்வி அமைச்சின் அறிக்கை ஒன்று கேட்டுக்கொண்டது.

தேர்வு முடிவுகள் தயாராகி விட்டால் பின்னர் எப்போது அது வெளியிடப்படும் என்பதை அமைச்சு அறிவிக்கும். இவ்விகாரம் குறித்து ஏதேனும் சந்தேகங்கள் இருந்தால் அமைச்சுடன் தொடர்பு கொண்டு தெளிவு பெறலாம் என்று அது குறிப்பிட்டது.

 

 

 

 

கோலாலம்பூர், பிப்.21- இன்று காலையில் பிரதமர் முக்கியமான அறிவிப்பு ஒன்றை அறிவிக்கப்போவதாக கூறி சமூக வலைத்தளங்களில் பகிரப்படும் தகவலில் உண்மை இல்லை என தெரிவிக்கப்பட்டுள்ளது.

சில நாட்களாக பிரதமர் டத்தோஶ்ரீ நஜிப் துன் ரசாக் ஆஸ்ட்ரோ அவானி அலைவரிசையில் முக்கிய அறிவிப்பு ஒன்று செய்யவிருப்பதாக செய்தி ஒன்று பகிரப்பட்டு வந்தது. அதில் தெளிவான விவரம் இல்லை என்றாலும் எதிர்வரும் பொதுத்தேர்தல் பற்றிய முக்கிய அறிவிப்பு என்று மேற்கோள் காட்டி அந்த செய்தி பகிரப்பட்டு வந்தது. 

ஆனால் அந்த செய்தியில் உண்மை இல்லை என பிரதமர் துறை சேர்ந்தவர்கள் கூறியதாக தெரிவிக்கப்பட்டுள்ளது. மேலும் அவானி அலைவரிசையின் தொகுப்பாளர் மற்றும் நிருபரான அஸ்வார்ட் இஸ்மாயில், பகிரப்பட்டு வரும் படம் 2013ஆம் ஆண்டின் புகைப்படம் என தனது டிவிட்டர் பக்கத்தில் தெரிவித்துள்ளார்.

ஜொகூர் பாரு, பிப்.22- 'ஐந்தே நிமிடங்கள் தான்... முற்றாக எல்லாம் அழிந்து போய் விட்டது' என்று இங்கு கம்போங் மலாயு பாண்டான் என்ற இடத்தில் வீடுகள் தீக்கிரையானதால் பாதிக்கப்பட்ட மக்கள் வேதனையுடன் கூறினர்.

VIDEO SOURCE: YOUTUBE

மாலை 6.45 மணியளவில் தாம் வீட்டை விட்டு வெளியே செல்லக் கிளம்பிக் கொண்டிருந்த தருணத்தில்  வீட்டின் கூரைப் பகுதியில் கரும்புகை கிளம்புவதாக கண்டதாக வீட்டை இழந்தவர்களில் ஒருவரான  நோர் ஹபிபி என்பவர் தெரிவித்தார்.

இந்தத் தீவிபத்தில் ஆறு வீடுகள் தீக்கிரையாயின.  17 குடும்பங்கள் இருப்பிடங்களையும் உடமைகளையும் இழந்து தவிப்புக்கு உள்ளாயின. தீயைக் கட்டுப்படுத்த மக்கள் போராடினர் என்றாலும் அது கொஞ்ச நேரத்தில் கட்டுப்படுத்த முடியாத அளவுக்குப் பரவி விட்டது.

பின்னர் சம்பவம் நடந்த பகுதிக்கு விரைந்த நான்கு தீயணைப்பு வாகனங்கள் தீயைக் கட்டுப்பாட்டுக்குள் கொண்டுவந்தன.

 

கோலாலம்பூர், பிப்.21- வாகனமோட்டிகளுக்கு குழப்பத்தை ஏற்படுத்தி விபத்துகள் ஏற்பட காரணமாக இருந்த ஷா ஆலம் பத்து தீகா டோல் சாவடியை இடிக்கும் பணிகள் நேற்று இரவு தொடங்கின.

கடந்த ஜனவரி தொடங்கி மூடப்பட்டதாக அறிவிக்கப்பட்டிருக்கும் பத்து தீகா சாலைக் கட்டண டோல் சாவடியில் மூன்றாவது முறையாக நேற்று முன்தினம் நடந்த கோரமான  வாகன விபத்தில் இருவர் மாண்டனர். இதற்கு முன்னர் ஜனவரியிலும் இங்கு கடுமையான சாலை விபத்துகள் ஏற்பட்டுள்ளன.

வழக்கமாக இந்த சாலையினைப் பயன்படுத்துவோர் டோல் இல்லை என்பதால் வேகமாக செல்லும் நிலையில், புதிதாக இங்கு வரும் வாகனமோட்டிகள் இங்கு டோல் இருப்பதாக எண்ணி குழம்பி வேகத்தைக் குறைக்கும்போது சாலை விபத்துகள் ஏற்படுகின்றன.

சில நேரங்களில், சாலையில் செல்லும் அதே வேகத்தில் டோல் சாவடியைக் கடந்து செல்லும்போதும் வாகனமோட்டிகள் டோல் தூண்களில் மோதி மரணமடைந்து வரும் சம்பவங்கள் தொடர்ந்து கொண்டிருக்கின்றன. 

இதனால் உயிருக்கு ஆபத்தாக விளங்கும் இந்த டோல் சாவடியை அகற்றும் பணி நேற்று இரவு தொடங்கியது. கோலாலம்பூரிலிருந்து ஷா ஆலம் செல்லும் வழித்தடத்தில் இடது பக்கம் உள்ள இரு முகப்புகள் இடிக்கப்பட்டன. 

ஜோர்ஜ்டவுன், பிப்.21- போர் காலத்தில் பயன்படுத்தப்பட்டதாக நம்பப்படும் இரு பீரங்கிகள் இங்குள்ள ஃபோர்ட் கோர்ன்வல்லீஸ் பகுதியில் மண்ணுக்கு அடியில் கண்டெடுக்கப்பட்டது. இது 200 ஆண்டு கால பீரங்கிகளாக இருக்கலாம் என கூறப்படுகிறது.

கோட்டை அருகே கால்வாய் தோண்டும் பணியில் ஈடுப்பட்டிருந்தபோது இந்த பீரங்கிகள் பூமியில் 1.2 மீட்டர் ஆழத்தில் கண்டுப்பிடிக்கப்பட்டன என பினாங்கு மாநில தலைமை அகழ்வாராய்ச்சியாளர் டத்தோ டாக்டர் மொக்தார் சைடின் கூறினார்.

மேலும், இதுநாள் வரை 'அமைதியான கோட்டை' என்று வர்ணிக்கப்பட்ட இந்த ஃபோர்ட் கோர்ன்வல்லீஸ் (Fort Cornwallis) பகுதியின் வரலாறு மாறும் நிலை வரலாம் எனவும் அவர் கூறினார்.

நேற்று மாலை 2 மணியளவில் கோட்டையில் கால்வாய் அமைப்பதற்காக தோண்டும் பணிகள் மேற்கொள்ளப்பட்டன. அப்போது 2.2 மீட்டர் மற்றும் 2.35 மீட்டர் நீள இரு பீரங்கிகள் கண்டெடுக்கப்பட்டன. இவை 200 ஆண்டுகள் பழமையானவையாக இருக்கக்கூடும் என அவர் தெரிவித்தார். 

இந்த பீரங்கிகள் மீது ஆய்வுகள் நடத்த பினாங்கு முதல்வர் லிம் குவான் எங் ஒப்புதல் வழங்கியுள்ள நிலையில், பெருநாள் காலத்தில் பீரங்கிகள் கிடைத்திருப்பது 'இரு அங் பாவ்' கிடைத்திருப்பதற்கு சமம் என தெரிவித்தார். 

கோலாலம்பூர், பிப்.20- சயாம் மரண ரயில் பாதை அமைக்க, ஜப்பானியர்களால் கொண்டு செல்லப்பட்டு கொடுமைக்குள்ளாகி   உயிர்நீத்த மலேசியத் தமிழர்களின் 75 ஆண்டுகால வரலாற்றில், முதன் முறையாக, உயிர் நீத்தவர்களுக்கு இறுதி அஞ்சலி செலுத்த 20 பேர் கொண்ட குழு ரயிலில் இன்று  தாய்லாந்து புறப்பட்டது.

இவர்களில் , அந்த மரண ரயில் பாதைக்காக கொண்டு செல்லப்பட்டு மீண்டு வந்து விட்ட இரு முதியவர்களும் அடங்குவர். 91 வயதுடைய ஆறுமுகம் கந்தசாமி மற்றும் 84 வயதுடைய பொன்னம்பலம் வீச்சான் ஆகிய இருவரும் அந்த மரணக் கொடுமையில் உயிர்ப் பிழைத்திருப்ப வர்கள். 

அது மட்டுமல்ல, அன்று அவர்கள் எந்தக் கோலாலம்பூர் ரயில் நிலையத்திலிருந்து ஜப்பானிய ஆக்கிரமிப்பாளர்களால் மரண ரயில் அமைக்க கொண்டு செல்லப்பட்டார்களே, அதே ரயில் நிலையத்திலிருந்து  இன்று தங்களது மறுபயணத்தைத் தொடங்கியுள்ளனர் என்பது குறிப்பி டத்தக்கது.

1943 ஆம் ஆண்டு இதே ரயில் நிலையத்தில் இருந்து 8 வயது சிறுவனாக பொன்னம்பலமும் அவருடைய தந்தை மற்றும் நூற்றுக்கணக்கான தமிழர்கள் ஜப்பானியர்களால் திறந்த வெளி சரக்கு ரயிலில் கொண்டு செல்லப்பட்டார்கள் என்பதை 84 வயது பொன்னம்பலம் வேதனையுடன் இன்று நினைவு கூர்ந்தார்.

சயாமிற்கு கொண்டு செல்லப்பட்ட நமது மக்கள், சென்ற அதே பாதையில் சென்று  மரண ரயில் பகுதிகளுக்கு மறு வருகை மேற்கொண்டு, பர்மா எல்லை வரையில், அப்போது அமைக்கப்பட்ட மரண ரயில் பாதையின் சுவட்டில், தாங்கள் பயணம் செய்து  பல இடங்களில் இறந்து போன நம்மவர்களுக்கான காரியங்களையும்  பிரார்த்தனைகளையும் செய்யவிருப்பதாக மரண ரயில் நல ஆர்வக்குழு  என்ற அமைப்பின் ஏற்பாட்டாளரான பி.சந்திரசேகரன் தெரிவித்தார்.

இந்த மறு பயணத்தை நாங்கள் அவசர அவசரமாக மேற்கொள்ள வேண்டிய அவசியம் ஏற்பட்டு விட்டது மரண ரயில் பாதை மறு பயணத்திற்கு திட்டமிட்ட போது அதில் சிக்கி மீண்டு வந்த 5 பேர் எங்களுடன் இணைந்திருந்தனர். 

ஆனால், அவர்களில் மூவர் அடுத்தடுத்து முதுமை காரணமக இறக்க நேர்ந்தது. இப்போது எஞ்சியிருப்பது 91 வயது ஆறுமுகமும் 84 வயது பொன்னம்பலமும் மட்டுமே. எனவே நாங்கள் உடனடியாக இந்தப் பிரார்த்தனைப் பயணத்தை மேற்கொள்ள வேண்டியதாயிற்று என்று சந்திர சேகரன் விளக்கினார்.

கோலாலம்பூர் பழைய ரயில் நிலையத்திலிருந்து இன்று காலை 10 மணியளவில் மரண ரயில் பாதையில் தங்களது குடும்ப முன்னோர்களை இழந்த 20 பேர் கொண்ட குழு  பயணத்தைத் தொடங்கியது.

காராக், பிப்.20-  பல முயற்சிகளுக்குப் பின்னர் தம்முடைய 70ஆவது வயதில் பச்சையம்மா என்ற பாட்டி மலேசியக் குடியுரிமை யைப் பெற்றார். தமக்கு குடியுரிமை வழங்கியதற்காக அவர் அரசுக்கு நன்றி தெரிவித்துக் கொண்டார். அதேவேளையில் தமக்கு குடியுரிமை கிடைத்த மகிழ்ச்சியைப் பகிர்ந்து கொள்ள தம்முடன் தற்போது தமது கணவர் மற்றும் இரண்டு மகன்கள் இல்லையே என நினைத்து வருந்துவதாக பச்சையம்மா சொன்னார்.

 மலேசியாவிலேயே பிறந்து வளர்ந்தவரான பச்சையம்மா,  பலமுறை குடியுரிமைக்காக விண்ணப்பித்து உள்ளார் என்றும் இப்போது அது கிடைத்து விட்டது என்றும்  தி ஸ்டார் தினசரி செய்தி ஒன்று கூறுகிறது.  பத்துகாஜாவில் பிறந்து வளர்ந்தவரான பச்சையம்மா இப்போது பகாங்கில்  பெந்தோங், சுங்கை கபோய் என்ற இடத்தில் வாழ்ந்து வருகிறார்.

இந்தியர்களின் மேம்பாட்டுக்கான சிறப்பு அமலாக்கப் பணிப் படை  (SITF) அமைப்பின் அலுவலகத்தில் மஇகா தேசியத்தலைவர் டத்தோஶ்ரீ டாக்டர் சுப்பிரமணியத்திடமிருந்து மை கார்டைப் பெற்றுக் கொண்ட பின்னர், செய்தியாளர்களிடம் பேசிய பச்சையம்மா, "எனக்கு இப்போதுள்ள ஒரே வருத்தம், எனக்கு குடியுரிமை கிடைத்திருப்பதைக் காண எனது கணவரும் எனது இரு மகன்களும் உயிரோடு இல்லை என்பதுதான்" என்று சொன்னார்.

தம்முடைய பெற்றோர்கள் வறுமையில் மிகவும் கஷ்டப்பட்டு வந்ததால்  தனது பிறப்பைப் பதிவு செய்வது எவ்வளவு முக்கியம் என்பதை  உணராமல் போய்விட்டனர் என்று பச்சையம்மா சொன்னார்.

கடந்த காலங்களில் 10க்கும் மேற்பட்ட முறைகள் தாம் குடியுரிமைக்கு விண்ணப்பித்து இருப்பதாக கூறிய அவர், அந்த விண்ணப்பங்கள், போதுமான ஆதார ஆவணங்கள் இல்லாதாதால் நிராகரிக்கப்பட்டதாக  குறிப்பிட்டார்.

 

 

 

 

More Articles ...