கோலாலம்பூர், டிச.6- இவ்வாண்டு மலேசியாவில் பொங்கல் திருநாள் மலேசியர்களின் வரலாற்றில் ஒரு புதிய முத்திரையைப் பதிக்கவிருக்கிறது. பொங்கலை முன்னிட்டு மலேசியாவில் முதன் முறையாக தமிழர்களின் வீரவிளையாட்டான ஜல்லிக்கட்டு போட்டியை நடத்துவதற்கு ஆஸ்ட்ரோ தொலைக்காட்சி நிறுவனம் ஏற்பாடு செய்துள்ளது.

நமது தொன்மைய காலம் தொட்டு நம்மைச் சுற்றி நிகழ்ந்துவரும் பாரம்பரிய வீர விளையாட்டு ஜல்லிக்கட்டு ஆகும். இன்னமும் தமிழகத்தில் ஜல்லிக்கட்டு புதிய எழுச்சியுடன் நடந்து வருகிறது.

அந்தப் பாரம்பரியத்தையும் கலாசாரத்தையும் தொடர்ந்து நிலைநிறுத்தி, பாதுகாத்துப் பேணும் நம்பிக்கையுடன் மலேசியாவில் ஜல்லிக்கட்டுப் போட்டியை நடத்துவதற்கு ஏற்பாடு செய்து வரலாறு படைக்கிறது ஆஸ்ட்ரோ தொலைக்காட்சி நிறுவனம்.

ஜனவரி மாதம் 7ஆம் தேதி பிற்பகல் 3 மணியளவில் சிலாங்கூர் டர்ப் கிளப்பில் (Selangor Turf Club) ‘மலேசியாவில் ஜல்லிக்கட்டு- 2018’ போட்டி நடத்தப்படுகிறது. இந்நிகழ்ச்சி ‘ஆஸ்ட்ரோ உலக’த்தில் நேரலை செய்யப்படவுள்ளது.

மலேசியாவில் ஜல்லிக் கட்டு நடத்துவது தொடர்பாக அதிகாரப்பூர்வ தொடக்க நிகழ்ச்சி ஒன்று நவம்பர் 30 ஆம் தேதி சென்னையில் சிறப்பாக நடந்தது. இந்நிகழ்ச்சியில் பல பிரமுகர்கள் கலந்து கொண்டனர்.

சென்னையில் நடந்த தொடக்கவிழாவின் போது தமிழக  தமிழ் மொழி, கலாசார மற்றும் தொல் ஆய்வுத்துறை அமைச்சர் பாண்டியராஜன்  ‘மலேசியாவில் ஜல்லிக்கட்டு-2018’ போட்டி நிகழ்வுக்கான சின்னத்தை திறந்து வைத்தார்.

தமிழ் மக்களின் அடிநாதமாக விளங்கும் கலைகளில் ஒன்று ஜல்லிக்கட்டு என்று அமைச்சர் சுட்டிக்காட்டினார்.

ஆஸ்ட்ரோ நிகழ்ச்சிகளின் நிர்வாகக் குழும இயக்குனர் டாக்டர் ராஜாமணி இந்நிகழ்வின் போது  ஜல்லிக்கட்டை  மலேசியாவில் முதன் முறையாக நடத்தும் திட்டம் குறித்து விளக்கினார்.

சென்னையில் நடக்கும் தொடக்க நிகழ்வுக்கு  தலைமை வகிக்க   அமைச்சர் பாண்டியராஜன் அவர்களை அழைக்க நாங்கள் முடிவு செய்ததற்கு காரணம், கிராமக் கலைகள் மீது அதிகப் பற்றுக் கொண்டு வளர்த்து வருபவர் என்பதால் இதற்கு பொருத்தமானவர் என்று கருதினோம் என்று டாக்டர் ராஜாமணி குறிப்பிட்டார்.   

உலகறிந்த பேச்சாளரும் பேராசிரியருமான முனைவர் ஞானசம்பந்தன் இந்நிகழ்ச்சியில் கலந்து கொண்டு பேசினார்.

தமிழகத்திலேயே ஜல்லிக்கட்டு நடக்குமா?நடக்காதா? என்ற கேள்வி எழுந்திருக்கும் நிலையில் ஜல்லிக்கட்டை கடல் தாண்டி கொண்டு செல்லும் பெருமையை ஆஸ்ட்ரோ இப்போது நமக்கு வழங்கி இருக்கிறது என்று ஞானசம்பந்தம் தெரிவித்தார்.

 

 

ஈப்போ, டிச.6- இங்கு பண்டார் பாரு புத்ராவிலுள்ள வீட்டில், தனது தாயாருடன் தரையில் படுத்து ஆழ்ந்த நித்திரையில் இருந்த 2 வயதுக் குழந்தையை நாகப்பாம்பு தீண்டியதில், அவனது கையில் விஷம் ஏறி அது நீலநிறரத்திற்கு மாறியது. 

காலை 7.15 மணியளவில் முகமட் இஸ் ஃபாயாட்  என்ற அந்தக் குழந்தையை நேற்று நீளமான நாகப்பாம்பு ஒன்று கொத்தியது. அந்தச் சம்பவம் நிகழ்வதற்கு சில நிமிடங்களுக்கு முன்புதான் அந்தக் குழந்தையின் தந்தை சுமார்டி செக், இரவு நேர வேலையை முடித்து விட்டு வீடு திரும்பி இருந்தார். 

கண்ணயர்ந்து தூங்கும் நிலைக்குச் சென்ற அவர், தனது மகனின் அலறல் சத்தம் கேட்டு, திடுக்கிட்டு எழுந்தார். 

"தூங்கிக் கொண்டிருந்த என் மகன் திடீரென்று அலறியபடி துடித்துக் கொண்டிருந்தான். அவன் அருகில் தூங்கிக் கொண்டிருந்த என் மனைவி, அவனின் அலறலுக்கான காரணம் தெரியாமல் தவித்துக் கொண்டிருந்தார். அவனின் கைகளைச் சோதனை செய்த போது, இரத்தம் வழிந்த நிலையில், பாம்பினால் கொத்தப்பட்ட அடையாளம் தென்பட்டது" என்றார் அவர்.

"பதறிப்போய், என் மகனை நான் மருத்துவமனைக்குக் கொண்டுச் சென்றேன். என் மகன் இடைவிடாது அழுதுக் கொண்டே இருந்தான். அதன் பின்னர் அவன் சோர்ந்து விட்டான். அவனின் இடது கை, நீல நிறத்திற்கு மாறியதைக் கண்டு நான் பயந்து விட்டேன்" என்று அவர் சொன்னார்.  

மருத்துவமனையில் சேர்க்கப்பட்டு, சிகிச்சை வழங்கப்பட்ட பின்னர்,  24 மணி நேரத்திற்கு கண்காணிக்கப் பட்டதாகவும் அடிக்கடி அவன் வலியால் துடித்ததாகவும் சுமார்டி தெரிவித்தார்.

"நல்ல வேளை, கடவுளின் அணுகிரகத்தால் என் மகனுக்கு எந்த ஆபத்தும் ஏற்படவில்லை. அவனது கைகளில் வீக்கம் உள்ளது. ஆனால், அது போகப் போகக் குறைந்து விடும் என்று மருத்துவர்கல் கூரியுள்ளனர்.

மேலும், அந்தப் பாம்பின் விஷத்தால், அவனின் நுரையீரல் மற்றும் சிறுநீரகங்களுக்கு எவ்வித பாதிப்பும் ஏற்படவில்லை என்று மருத்துவர் என்னிடத்தில் கூறினார்" என்றார் அவர். 

தங்களின் வீட்டினுள் புகுந்த அந்த நாகப் பாம்பை பிடித்துச் செல்லுமாறு, மலேசிய பொது பாதுகாப்புப் படைக்கு தாம் தகவல் தெரிவித்ததை அடுத்து வேட்டை நடத்திய மீட்புப் படையினர் முடிவில் அதைப் பிடித்துவிட்டனர் என்று சுமார்டி கூறினார். 

 

கோலாலம்பூர், டிச.6- அடுத்த ஆண்டு முதற்கொண்டு, வேலை இடங்களில் ஆட்குறைப்பு அடிப்படையில் பணிநீக்கம் செய்யப்படுவோருக்கு, வேலைக் காப்புறுதி திட்டத்தின் கீழ், மூன்று மாதங்களுக்கு 600 ரிங்கிட் அலவன்ஸ் வழங்கப்படும் என்று சொக்ஸோ தலைமை நிர்வாக செயல்நிலை அதிகாரி டத்தோ டாக்டர் முகமட் அஸ்மான் அஸிஸ் கூறினார்.   

இந்த வேலைக் காப்புறுதி திட்டத்தை அமல்படுத்தும் பொருட்டு, அதன் கீழ், சொக்ஸோவிற்கு அரசாங்கம் 122 மில்லியன் ரிங்கிட்டை ஒதுக்கியுள்ளது என்று டாக்டர் முகமட் அஸ்மான் சொன்னார்.

வேலையிழந்த 57,282 பேர், இந்தத் திட்டத்தின் கீழ் ஒதுக்கப்பட்டுள்ள நிதியிலிருந்து 103 மில்லியன் ரிங்கிட்டை அடுத்தாண்டு பெற்றுக் கொள்வர் என்று அவர் தகவல் தெரிவித்தார். 

சுய விருப்பத்தின் பேரில் வேலையிலிருந்து வெளியேறுபவர்களும் இத்திட்டத்தின் கீழ் ஒதுக்கப்படும் அலவன்ஸை பெற்றுக் கொள்ளலாம் என்று நேற்று செய்தியாளர்களிடம் அவர் கூறினார். 

இந்தப் புதிய திட்டம் குறித்து பொதுமக்களுக்கு விழிப்புணர்வை ஏற்படுத்தும் பொருட்டு, நாட்டிலுள்ள 17 இடங்களில் விழிப்புணர்வு இயக்கத்தை சொக்ஸோ நாளை தொடங்கி மேற்கொள்ளவிருக்கிறது என்று டாக்டர் முகமட் அஸ்மான் சொன்னார். 

இதனிடையே, நாட்டிலுள்ள 6.4 மில்லியன் தனியார் தொழிலாளர்களைப் பாதுகாக்கும் பொருட்டு, இந்த வேலைக் காப்புறுதித் திட்டத்திற்கு தனியார் நிறுவனங்களில் வேலைப் பார்க்கும் தொழிலாளர்கள் மற்றும் அந்நிறுவனங்கள், 470 மில்லியன் ரிங்கிட்டை ஒதுக்கும் என்று தாங்கள் எதிர்பார்ப்பதாக மனிதவள அமைச்சின் பொதுச் செயலாளர் டத்தோ டாக்டர் முகமட் கசாலி அபாஸ் குறிப்பிட்டார். 

 

சிபு, டிச.6- தனக்கு பிறந்த குழந்தையை அலமாரியிலுள்ள இழுப்பறைக்குள் ஒளித்து வைத்த 12 வயதுச் சிறுமியின் அந்த நிலைமைக்கு காரணமான அவளின் 15 வயது காதலனை போலீசார் கைது செய்தனர்.  

தனக்கு பிறந்த குழந்தையின் தந்தை அந்த 15 வயதுச் சிறுவன் தான் என்று அந்தச் சிறுமி கூறியதைத் தொடர்ந்து, அவன் கைது செய்யப்பட்டுள்ள தாக சிபு துணை ஓசிபிடி சூப்ரிண்ட். மார்டின் கூ தெரிவித்தார். 

"கம்போங் பஹாகியா ஜெயா என்ற இட்த்திலுள்ள தனது வளர்ப்பு பெற்றோர்கள் வீட்டில், ஞாயிற்றுக்கிழமை மாலை 6 மணிக்கு அந்தக் குழந்தையை அச்சிறுமி பிரசவித்துள்ளாள். மற்றவர்களுக்கு இது தெரிந்து விடக்கூடாது என்ற பயத்தில், தனது அலமாரியின் இழுப்பறையில் அந்தக் குழந்தையை அச்சிறுமி ஒளித்து வைத்து விட்டாள். 

"மறுநாள் மாலை 4 மணிக்கு, அந்த அறையில் குழந்தைச் சத்தம் கேட்டு அதிர்ச்சியான அந்தச் சிறுமியின் சகோதரி, அந்த அலமாரியைச் சோதனை செய்தபோது, துவாலையால் சுற்றப்பட்டு அக்குழந்தை அந்த இழுப்பறைக்குள் இருந்த்தை கண்டெடுத்துள்ளார்" என்று மார்டீன் கூ கூறினார்.  

அதனைத் தொடர்ந்து, இச்சம்பவம் குறித்து போலீசாருக்கு தகவல் தெரிவிக்கப்பட்ட்து. அவர்கள் வசித்து வரும் அதே கிராமத்தைச் சேர்ந்த அச்சிறுமியின் காதலன், குற்றவியல் சட்டம் 376-ஆவது பிரிவின் கீழ், கற்பழிப்பு குற்றத்தின் கீழ் கைது செய்யப்பட்டுள்ளான். 

 

கிள்ளான், டிச.6- இந்தியாவில் தனது மாமியாரால் கொடுமைப் படுத்தப்பட்டதால் மலேசியாவிற்கு திரும்பவிருந்த தேவசூரியா, விசா காலாவதி ஆகிவிட்ட நிலையில் விமானநிலையத்தில் தடுத்து நிருத்தப்பட்டதைத்தொடர்ந்து அவருக்கு தேவையான உதவிகளை வழங்க மெலிண்டா விமான நிறுவனம் முன்வந்தது.

விசாவில் குறிப்பிட்டுள்ள காலக் கட்டத்தை விட கூடுதலான நாள்கள் இந்தியாவில் தங்கியிருந்த குற்றத்திற்காக மலேசியாவிற்கு திரும்ப முடியாதவாறு நேற்று விமான நிலையத்தில் தேவசூரியா தடுக்க வைக்கப்பட்டார். 

அவர் மீண்டும் மலேசியாவிற்கு திரும்பும் வாய்ப்பு வழங்கப்பட்டாலும், தன்னால் விமானப் பயண டிக்கெட்டிற்கான பணத்தை செலுத்த முடியாது என்று நேற்று அவர் கண்ணீரோடு தெரிவித்தார். 

அவரின் இன்னல்களைப் புரிந்துக் கொண்ட மலிண்டோ விமானச் சேவை நிறுவனம், தேவசூரியா மற்றும் அவரின் நான்கு வயது மகனுக்கான டிக்கெட்டுகளை வழங்க முன்வந்துள்ளது என்று மலிண்டோவின் தகவல் தொடர்பு நிர்வாகி சுரேஸ் வாணன் கூறினார்.  

திருச்சி விமான நிலையத்தில் விமானம் ஏறவிருந்த தேவசூரியாவை அந்நாட்டு காவல்துறை தடுத்து நிறுத்தியது. அங்குச் சட்டவிரோதமாகத் தங்கியிருந்த குற்றத்திற்காக அவர் அபராதம் செலுத்தவேண்டும் என்றும், அதைச் செலுத்த தவறினால், அவர் மலேசியா திரும்ப முடியாது என்றும் காவல் துறையினர் அவரிடம் தெரிவித்தனர். 

அதனைத் தொடர்ந்து, தனது கணவரின் சொந்த ஊரான ராமநாதபுரத்திற்கு அவர் திரும்பிச் செல்லும் கட்டாயம் ஏற்பட்டது. அந்தப் பயணச் சேவைக்கான டிக்கெட் பணத்தை திரட்டுவதற்கு தனது கணவர் கடன் வாங்கியதாகவும், அந்தப் பயணம் ரத்து செய்யப்பட்ட நிலையில், தம்மால் மீண்டும் மலேசியாவிற்கு திரும்ப முடியுமா? என்பது கேள்விக்குறியே என்று தேவசூரியா நேற்று கூறினார். 

அவரின் நிலையைக் கண்டு பரிதாபமடைந்த மலிண்டோ விமானச் சேவை நிறுவனம், அவருக்கும் அவரின் மகனுக்கும் டிக்கெட்டுகளை வழங்கவிருப்பதாக அதன் தகவல் தொடர்பு சுரேஸ் நேற்று ஊடகங்களுக்கு தகவல் தெரிவித்தார். மனிதநேய அடிப்படையில் அவருக்கு உதவத் தாங்கள் முன்வந்துள்ளதாக அவர் சொன்னார்.  

இதனிடையில், ராமநாதபுரத்திலிருந்து மீண்டும் திருச்சி விமான நிலையத்திற்கு தேவசூரியா மற்றும் அவரின் மகன் அழைத்து வருவதற்கான பயணச் சேவைக்கு உதவி வழங்க மலேசியாவின் ருத்ரா தேவி சமாஜ் அமைப்பின் துணைத் தலைவர் ஜி.குணராஜ் தெரிவித்தார்.  

"ராமநாதபுரத்திலுள்ள ஆத்ம சாந்தி நிலையத்தைத் தொடர்புக் கொண்டு, தேவசூரியாவிற்கு தேவையான உதவிகளை வழங்குமாறு நாங்கள் கேட்டுக் கொண்டோம். அவர்களும் அவருக்கு உதவ முன்வந்துள்ளனர்" என்று குணராஜ் சொன்னார்.  

மேலும், மலேசியாவிலுள்ள பலரும் தேவசூரியாவிற்கு உதவ முன்வந்துள்ளனர். யொங் லாய் லிங் என்ற வழக்கறிஞர், தானும் தனது நண்பர்களும், தேவசூரியாவின் கணவர் வாங்கிய கடனை அடைக்கும் பொருட்டு, நிதி திரட்டி வருவதாகத் தெரிவித்தார்.  

இந்தியாவில் மாமியாரால் கொடுமைப்படுத்தப்பட்டு, எப்படியாவது தன்னை மலேசியாவிற்கு அழைத்துச் செல்லுமாறு 37 வயதான தேவசூரியா வீடியோ ஒன்றில் கெஞ்சி அழுதக் காட்சி, சமூக வலைத் தளங்களில் பரவலானதைத் தொடர்ந்து, அவருக்கு பலர் ஆதரவு குரல்களை எழுப்பி வருகின்றனர். 

கிள்ளான், டிச.5- மூன்று மாதங்களாக தன் மாமியாரின் கொடுமைகளைத் தாங்கிக் கொண்டு, இறுதியாக இன்று மலேசியாவிற்கு திரும்பும் குதூகலத்தோடு திருச்சி விமான நிலையத்திற்கு வந்த தேவசூரியா சுப்ரமணியத்திற்கு காத்திருந்தது அதிர்ச்சி மட்டுமே.  

இந்தியாவில் சட்டவிரோதமாக தங்கியிருந்த குற்றத்திற்காக அவர் தடுத்து வைக்கப்பட்டு, அவருக்கு அபராதமும் விதிக்கப்பட்டுள்ளது. மேலும், மலிண்டோ விமானத்தில் செல்வதற்கான அவரின் பயண டிக்கெட்டும் ரத்து செய்யப்பட்டுள்ளது.  

"என் கணவரின் ஊரிலிருந்து இந்த விமான நிலையத்திற்கு ஆறு மணி நேரம் பயணம் மேற்கொண்டேன். இப்போது நான் அங்குத் திரும்பச் செல்ல வேண்டும். எனக்கு என்ன செய்வதென்று தெரியவில்லை" என்று அவர் கண்ணீரோடு தெரிவித்தார். 

இந்தியாவிற்கு மூன்று மாத விசாவில் சென்ற தேவசூரியா, அந்த விசாவை 45 நாட்களில் புதுப்பிக்க வேண்டும் என்று குறிப்பிடப்பட்டுள்ளதை படிக்கத் தவறி விட்டதாகக் கூறினார்.  

இதனிடையில், மலேசியாவிற்கு தாம் திரும்புவதற்கான பயண டிக்கெட்டை வாங்குவதற்காக தனது கணவர் கடன் வாங்கினார் என்றும், இன்று அந்த டிக்கெட்டு ரத்து செய்யப்பட்டதைத் தொடர்ந்து, தன்னால் மீண்டும் மலேசியாவிற்கு திரும்ப முடியுமா என்ற கேள்வி மனதில் எழுந்துள்ளதாக தேவசூரியா சொன்னார். 

ராமநாதபூரத்திலுள்ள காவல் நிலையத்திலிருந்து, தம்மீதான தடையை விலக்கக் கோரும் கடிதம் ஒன்றை பெறும் பொருட்டு, தேவசூரியா மீண்டும் ராமநாதபூரத்திற்கு திருப்பி அனுப்பப்பட்டுள்ளார். 

ஆனால், அந்தக் கடித்த்தை பெற்ற போதிலும், தம்மால் மலேசியாவிற்கு திரும்ப முடியுமா என்று சந்தேகம்தான். டிக்கெட் வாங்குவதற்கு தன்னிடமோ அல்லது தனது கணவரிடமோ பணம் இல்லை என்று அவர் தெரிவித்தார். 

கோலாலம்பூர், டிசம்.5- ‘’அனைத்துலக மாணவர் முழக்கம் பேச்சுப் போட்டியில்  நான் வாகை சூடியது எனக்கு மிகுந்த மகிழ்ச்சியைத் தந்துள்ளது. ‘மலேசியா போலே’ என்பதை நான் நிலைநாட்டி இருப்பதில் சந்தோசப் படுகிறேன்’’ என்று மாணவர் ரவின் அசோக் நாய்க்கர் கூறினார்.

ஜொகூர், கங்கார் புலாய் தமிழ்ப்பள்ளியைச் சேர்ந்த ரவின், தமிழ்ப்பள்ளி மாணவர்களுக்கான 4ஆவது அனைத்துலக மாணவர் முழக்கம்-2017 பேச்சுப் போட்டியில் வாகை சூடி வெற்றிக் கோப்பை, 3,000 ரிங்கிட் ரொக்கம், மற்றும் சான்றிதழ்களைப் பெற்றார்.

ஆஸ்ட்ரோ வானவில்லும் வணக்கம் மலேசியாவும் இணைந்து ஆண்டுதோறும் நடத்தும் இந்த அனைத்துலக மாணவர் முழக்கம் பேச்சுப் போட்டி, புதுச்சேரி பல்கலைக் கழகத்தின் மண்டபத்தில்  நடந்தது. இந்தியா, இலங்கை, சிங்கப்பூர், ஐக்கிய அரபு சிற்றரசு மற்றும் மலேசியா ஆகிய ஐந்து நாடுகளைச் சேர்ந்த 14 மாணவர்கள் இந்த மாபெரும் இறுதிச் சுற்றில் போட்டியிட்டனர். 

இவர்களில் நால்வர் இறுதிச் சுற்றுக்கு முன்னேறினர். ரவினுடன், இந்தியாவைச் சேர்ந்த ஆர்த்தி வள்ளீஸ்வரன், இலங்கை, கொக்குவில்லைச் சேர்ந்த தாருகன் பஞ்சநாதன்  மற்றும் மலேசியாவின் ஜொகூர், மசாய் தமிழ்ப் பள்ளியைச் சேர்ந்த சஸ்வின் ராஜ் செல்வமணி ஆகியோரே அந்த நால்வர் ஆவர்.

இந்தப் போட்டியில் முதன் முறையாக மலேசிய மாணவர் ரவின் சாம்பியன் பட்டத்தை வாகை சூடினார். தன்னுடைய வெற்றிக்குப் பின்னர் அந்த மகிழ்ச்சியை வணக்கம் மலேசியா இணையச் செய்தியுடன் அவர் பகிர்ந்து கொண்டார். அப்போது ரவின் மேலும் கூறியதாவது:

“நான் ரொம்ப ரொம்ப மகிழ்ச்சியாக இருக்கேன். ‘மலேசியா போலே’ என நிருப்பிச்சிருக்கேன். நிறைய பேருக்கு நன்றி சொல்ல வேணும். எனது பள்ளி, தலைமையாசிரியர். பயிற்சி அளித்த ஆசிரியர்கள் குழு, பயிற்சிகளை ஒருங்கிணைத்த செல்வ சுப்பிரமணியம், இவர்களுக்கும் மேலாக மிகப் பெரிய வாய்ப்பை தந்து, அனைத்துலக அரங்கத்திலே மேடையேற வைத்த ஆஸ்ட்ரோ வானவில் மற்றும் வணக்கம் மலேசியா நிறுவனங்கள் ஆகியவற்றுக்கு நான் மனமார்ந்த நன்றியைச் சொல்லிக் கொள்கிறேன்.

“இந்த அனைத்துலக போட்டியிலே முதல் மூன்று முறையும் இந்தியா தான் ஜெயிச்சிருக்கு.. முதல் முறையான வெற்றிக் கோப்பையை நாம ஜெயிச்சிருக்கிறோம். மலேசியாவிலே இருக்கிற எல்லா தமிழ்ப்பள்ளிகளுக்கும் இது சந்தோசத்தை தந்திருக்கும் என்று நினைக்கிற போது ரொம்பவே மகிழ்ச்சியா இருக்கு..,

 

இரண்டாவது இடத்தைப் பிடித்த இந்தியாவின் ஆர்த்தி வள்ளீஸ்வரன் கூறிய போது:

‘’நான் கடைசி வரை சிறப்பாகவே போட்டி கொடுத்ததாக நம்புகிறேன். நான் படிக்கும் பள்ளி வேலம்மா பள்ளி. எல்லா துறைகளிலும் சிறந்த மாணவர்களை உருவாக்கி வரும் பள்ளி. 

‘’எனவே,  2ஆவது இடத்தை பிடித்ததில் சற்று வருத்தம் தான் என்றாலும் அடுத்தடுத்த வெற்றிகளுக்கு இது படிக்கல்லாக அமையும் என்ற நம்பிக்கை எனக்கு உண்டு. இந்த வெற்றி எனது பள்ளிக்கும் எனது ஆசிரியர்களுக்கும் எனது பெற்றோர்களுக்கு உரிய வெற்றி’’ –இவ்வாறு ஆர்த்தி சொன்னார்.

 

இந்த மாணவர் முழக்கப் போட்டியில் இரு மூன்றாவது வெற்றியாளர்களில் ஒருவரான இலங்கை சேர்ந்த தாருகன் பஞ்சநாதன்  கூறியதாவது:

மூன்றாவது பரிசோடு போறேன். எங்க டீச்சர் கொஞ்சம் முறைப்பாடு  கொடுப்பார். இருந்தாலும் மகிழ்ச்சி மனசுக்குள் கிடக்கெ தானே செய்யும். ஏன்னா, சமீபமா, ‘பேசு தமிழா பேசு’ போட்டியிலே எங்க மண்ணைச் சார்ந்த அண்ணன் சாருகன் மெய்யகழன் வென்றார். அவரு என்னோட மானசீக குருவானவர். அவரோட ஆசியைப் பெற்றுக் கொண்டுதான் நான் இங்ஙனம் வந்தவன். முதல் பரிசோடு போய், நான் அவரை பார்க்க நெனைச்சிருந்தன். இருந்தாலும் அவர் இந்த வெற்றிக்காக  என்னைத் தட்டிக் கொடுப்பார்.

இறுதிச் சுற்றுப் போட்டியின் போது என்னோட கைக் குறிப்பை எடம் தவறி வைச்சிட்டதாலே கொஞ்சம்  பதட்டப் பட்டுட்டேன். அது கைக்கு கெடச்ச பிறகு தெம்பாகிப் போயி, போட்டியிலே நின்னு தாக்குப் பிடிச்சேன். 

அடுத்து என்ன செய்ய உத்தேசம் என்று ‘வணக்கம் மலேசியா’ கேட்ட போது கொஞ்சமும்  தயங்காமல், மாணவர் முழக்கத்தின் தாக்கம் குறையாமல் மேடை பேச்சு பாணியில் பதில் தந்தார் தாருகன்.

“ஒரு கடன் முடிந்தது. மறுகடன் ‘வா மகனே வா’ என்று என்னை அழைக்கிறது. மாணவர் முழக்கத்தை அடுத்து, எனக்கு தாயக மண்ணிலே தேர்வுகள் காத்திருக்கின்றன. எனது அடுத்த போர் தேர்வு தான். அங்கே நான் முதலிடத்தைப் பிடிக்கவேண்டும். என்னோடு போட்டியிட்ட  அனைத்து போட்டியாளர்களும் எனது நண்பர்கள். அந்த நட்பை எப்படியாவது புலனத் தொடர்புகள் வழி தொடரவேண்டும். வணக்கம் மலேசியா அண்ணன்மார்களுக்கு நன்றி. எனக்கு உதவிய அனைவருக்கும் நன்றி.

இவ்வாறு தாருகன் பதிலளித்தார். எது பற்றிக் கேட்டாலும் ஒரு மேடைப் பேச்சாளனைப் போலவே பேசும் தகுதி இவருக்கு இயல்பாகவே இருப்பது வியப்பளிக்கும் விடயம் என்பது இங்கு குறிப்பிடத்தக்கது.

மற்றொரு 3ஆவது வெற்றியாளரான ஜொகூர், மசாய் தமிழ்ப் பள்ளியைச் சேர்ந்த சஸ்வின் ராஜ் செல்வமணி இயல்பாகவே நகைச்சுவை உணர்வோடு பேசுவதில் கெட்டிக்காரர். அவர் தமது வெற்றி பற்றி கூறியதாவது:

‘’வெற்றி தோல்வியெல்லாம் சகஜம்ப்பா. நான் முதலிடத்திற்குத் தான் குறிவைத்தேன். ஆனால், என் நண்பன் ரவின் தட்டிச் சென்று விட்டான். எனக்குப் பெருமைதான்.. முடிவில், வென்றிருப்பது மலேசியா என்பதில்.

‘’இறுதிச் சுற்றின் போது எனது பேச்சினை நடுவர்களும் மக்களும் நிறைய ரசித்தார்கள் என்று நினைக்கிறேன். அதுதான் எனக்கு வெற்றி. முதலில் எனது பள்ளிக்கும் தலைமையாசிரியர், ஆசிரியர்கள், பயிற்சி ஒருங்கிணைப்பாளர் செல்வா, ஆஸ்ட்ரோ வானவில் மற்றும் வணக்கம் மலேசியா நிறுவனத்தினர் ஆகிய அனைவருக்கும் நன்றி சொல்ல கடமைப் பட்டுள்ளேன். களம் மாறலாம், என் பேச்சு மட்டும் மாறவே மாறாது’’ என்று வழக்கம் போலவே ‘பஞ்ச்’ வைத்து பேச்சை முடித்தார் சஸ்வின்.

இரண்டாவது சுற்று வரை முன்னேறி, இறுதிச் சுற்றுக்குள் நுழையும் வாய்ப்பை நழுவிட்ட கெடா, பாயா புசார் தமிழ்ப் பள்ளி மாணவர் சரத் சுதாகர் பேசிய போது, ‘நல்ல வாய்ப்பு கைநழுவியது எனக்கு வருத்தம்தான். நண்பன் ரவினும் நண்பன் சஸ்வினும் இறுதி வரை சென்று வென்றிருப்பது பெருமை தருகிறது.

எனக்கு வேறு வேறு இலக்குகள் உண்டு. அந்த இலக்கை நோக்கி பயணத்தைத் தொடர்வேன். பேச்சுப் போட்டிகளிலும் தொடர்ந்து பங்கேற்பேன் என்று சரத் சுதாகர் கூறிய போது அருகிலிருந்த அவரது பெற்றோர்கள் உற்சாகத்துடன் மகனின் முதுகில் தட்டிக்கொடுத்தனர். 

 

 

 

 

More Articles ...