மெர்சிங், பிப்.19- மெர்சிங்கிற்கு அருகில் நிடார் சாலையின் 17ஆவது கிலோ மீட்டரில் கட்டுப்பாட்டை இழந்த பயணிகள் பேருந்து ஒன்று சாலைத் தடுப்புச் சுவரில் மோதி அருகிலிருந்த பள்ளத்தில் தடம் புரண்டதில்  15 பயணிகள் காயமடைந்தனர்.

மலாக்காவில் இருந்து மெர்சிங்கிற்குச் சென்று கொண்டிருந்த  இந்தப் பேருந்தில் 32 பயணிகள் இருந்தனர். இவர்களில் ஜொகூர் மெர்சிங் பொலிடெக்னிக் கல்லூரியைச் சேர்ந்த 10 மாணவர்களும் அடங்குவர்.

நேற்று நள்ளிரவு 12.35 மணியளவில் நிடாரிலுள்ள பெல்டா பண்ணைக்கு அருகே சென்று கொண்டிருந்த போது பேருந்து கட்டுப்பாட்டை இழந்தது எனத் தெரிய வந்துள்ளது.

இந்தப் பேருந்து விபத்தில் காயமடைந்த 15 பேரில் 14 பேர் பெல்டா நிடார் சுகாதாரக் கிளினிக்கில் சிகிச்சைப் பெற்றனர். எனினும் இந்தப் பெருந்தில் பயணம் செய்த ஒரேயொரு பெண் பயணி மட்டும் கடுமையாகக் காயமடைந்தார். அவரது இடது கையில் எலும்பு முறிவு ஏற்பட்டது. விலாப் பகுதியிலும் கடுமையாக காயமடைந்தார். அவர் மெர்சிங் மருத்துவமனையில் சேர்க்கப்பட்டார்.

 

 

 

 

 

 

 

 

 

 

 

 

புக்கிட் மெர்டாஜாம் பிப்.19- இந்தோனிசியப் பணிப்பெண் ஒருவர் கொடுமைக்கு உள்ளாக்கப்பட்டு, உயிர் நீத்த சம்பவம் தொடர்பில் கைது செய்யப்பட்ட 60 வயதுடைய மாது ஒருவருக்கான போலீஸ் காவல் மேலும் 7 நாள்களுக்கு நீட்டிக்கப் பட்டுள்ளது.

இந்த மாதுவுக்கு ஏற்கனவே வழங்கப்பட்டிருந்த 7 நாள் தடுப்புக் காவல், காலாவதியாவதை முன்னிட்டு மீண்டும் 7 நாள்களுக்கு காவல் நீட்டிக்கப் பட்டதாக செபராங் பிறை தெங்கா மாவட்டப் போலீஸ் தலைவர் துணை ஆணையர் நிக் ரோஸ் அஸ்லான் சொன்னார்.

மரணமடைந்த இந்தோனிசியப் பணிப்பெண்ணான அடெலினா (வயது 26) என்பவரை வேலைக்கு அமர்த்திய அண்ணன் -தங்கையான  39 வயதுடைய ஓர் ஆணும் 36 வயதுடைய ஒரு பெண்ணும் அந்தப் பணிப்பெண்ணைக் கொடுமைப் படுத்தியதாக சந்தேகத்தின் பேரில் ஏற்கனவே போலீசாரால் தடுத்து வைக்கப்பட்டுள்ளனர்.

தற்போது தடுப்புக் காவல் நீட்டிக்கப்பட்ட அந்த 60 வயது மாது, இந்த அண்ணன் -தங்கையின் தாயார் என அடையாளம் கூறப்பட்டது.

கொடுமைப் படுத்தப் படுவதாக தகவல் கிடைத்ததைத் தொடர்ந்து புக்கிட் மெர்டாஜாம் தாமான் கோத்தா பெர்மாய் என்ற இடத்திலுள்ள வீடு ஒன்றிலிருந்து அடெலினாவை கடந்த 11ஆம் தேதி  போலீசார் மீட்டனர்.

கார் நிறுத்துமிடத்தில் நாய்கள்  கட்டப்பட்டிருந்த பகுதியில் அந்தப் பணிப் பெண் உடல்நலம் குன்றிப் படுத்திருந்த போது போலீசார் அவரை மீட்டனர்.

அந்தப் பெண்ணின் முகத்திலும் தலையிலும் கடுமையான காயங்கள் காணப்பட்டன. மேலும் அவருடைய கைகள் மற்றும் கால்களில் தீராத ரணங்கள் இருந்தன.

நீண்ட காலமாகவே இந்தப் பெண் இத்தகைய கொடுமைகளுக்கு ஆளாகி இருக்கலாம் என்றும் அவர் ஏராளமான இரத்தத்தை இழந்திருந்தார் என்று கண்டறியப் பட்டிருப்பதாகவும் பிரேதப்  பரிசோதனை நடத்திய குழுவுக்கு தலைமை ஏற்றிருந்த டாக்டர் அமீர் சாட் குறிப்பிட்டதாக துணை ஆணையர் நிக் ரோஸ் கூறினார்.

இந்தச் சம்பவம் குறித்து தொடர்ந்து விரிவான விசாரணையைத் தாங்கள் மேற்கொண்டிருப்பதாக குறிப்பிட்ட அவர், கொலைக் குற்றத்தின் அடிப்படையில் குற்றவியல் சட்டத்தின் 302-ஆவது பிரிவின் கீழ் விசாரணை  நடந்து வருவதாகவும் அவர் சொன்னார்.

 

 

 

 

 

 

 

 

கோலாலம்பூர், பிப்.19- லங்காவியின் பிரபல கேபிள் கார் சேவையில் நேற்று கோளாறு ஏற்பட்டு 88 பேர் அந்தரத்தில் சிக்கி தவித்தாலும் இன்று அதில் ஏறுவதற்கு மக்கள் கூட்டம் நிரம்பி இருப்பதாக தெரிவிக்கப்பட்டுள்ளது.

நேற்று மாலை 6.55 மணியளவில் லங்காவி ஸ்கைகேப் எனும் தொங்கும் கேபிள் காரின் ஒரு 'பேரிங்கில்' பழுது ஏற்பட்டதை அடுத்து அதன் சேவை நிலைக்குத்தியது. இதனால் மச்சிங்சாங் மலைக்கு ஏறியும் இறங்கியும் கொண்டிருந்த 88 பேர் அந்தரத்தில் தொங்கினர். மேலும் நூற்றுக்கணக்கானோர் இடை நிலையங்களில் சிக்கி தவித்தனர்.

இன்று நண்பகல் 12 மணிக்கு இந்த கேபிள் கார் சேவை மீண்டும் தொடங்கப்பட்ட நிலையில், 3,000க்கும் மேற்பட்ட சுற்றுப்பயணிகள் டிக்கெட்டுகளை வாங்கி வரிசையில் நின்றனர் என பனோராமா லங்காவி நிறுவனத்தின் இயக்குனர் டத்தோ அஜிஜான் நோர்டின் கூறினார்.

ஏற்கனவே முன்பதிவு செய்திருந்த சுற்றுப்பயணிகளின் எண்ணிக்கை இதில் சேர்க்கப்படவில்லை எனவும் அவர் கூறினார். மேலும், இது வழக்கமான ஒன்று தான் என்று கூறிய அஜிஜான், எந்த சுற்றுப்பயணிகளும் நேற்றைய தொழில்நுட்ப கோளாறினைக் காரணம் காட்டி பயணத்தை ரத்துச் செய்யவில்லை என சொன்னார்.

ஈப்போ, பிப்.19- இங்குள்ள மெனோரா சுரங்கப் பாதையின் உள்ளே இரு கார்கள் மோதிக் கொண்டப்பின் நடுசாலையில் கவிழ்ந்தன. இதனால் அப்பகுதியில் கடும் வாகன நெரிசல் ஏற்பட்டது.

இன்று காலை 11.30 மணியளவில் ஈப்போவிலிருந்து கோலகங்சார் செல்லும் சுரங்கப் பாதை உள்ளே 261.4 கிமீ-இல் பயணித்துக் கொண்டிருந்தபோது இரு கார்கள் ஒன்றோடு ஒன்று மோதி கொண்டன. இதில் இரு கார்களும் தலைக்கீழாக கவிழ்ந்தன.

சம்பவம் தொடர்பில் தீயணைப்பு மற்றும் மீட்பு படையினருக்குக் காலை 11.31 மணிக்குத் தகவல் கிடைத்ததாகவும் சம்பவ இடத்திற்கு வந்தபோது பாதிக்கப்பட்டவர்கள் யாரும் அவ்விடத்தில் இல்லை என்றும் மீட்பு படை பேச்சாளர் கூறினார்.

விபத்தில் மற்றவர்கள் பாதிக்கா வண்ணம் மீட்பு படையினர் பாதுகாப்பு நடவடிக்கைகளில் ஈடுபட்டனர். விபத்துக்குள்ளான வாகனங்கள் அப்புறப்படுத்தப்பட்ட நிலையில் வாகன நெரிசல் இன்னும் தொடர்ந்து கொண்டிருப்பதாக தகவல்கள் கிடைத்துள்ளன.

கோத்தா கினாபாலு, பிப்.19- சபாவின் புலாவ் மாபுல் பகுதி, முக்குளிப்போருக்கு சொர்க்க பூமியாக திகழ்கிறது என்றாலும் அப்பகுதிக்கு வந்திருந்த வெளிநாட்டு சுற்றுப் பயணிகளுக்கு குறிப்பாக சுற்றுச் சூழல் ஆர்வலர்களுக்கு கடும் அதிர்ச்சியைத் தரும் சம்பவங்கள் நடந்தன.

இப்பகுதியின் கடலடியில் உலாவும் 'மண்டா ரே' வகைத் திருக்கை மீன்கள், மற்றும் குட்டி சுறா மீன்கள் ஆகியவற்றை கண்டு களிக்க முக்குளிப்பில் ஆர்வம் மிக்க சுற்றுப் பயணிகள் இங்கு கணிசமாக வருவதுண்டு.

கடலில் தாங்கள் காண வந்த அந்த வித்தியாசமான கடல் உயிரினங்கள், புலாவ் மாபுல் கடலோரப் பகுதியிலுள்ள  கிராம மக்களால் வெட்டிக் கொல்லப்படும் காட்சியை சுற்றுப்பயணிகள் காண நேர்ந்த போது அதிர்ச்சியும் வேதனையும் அடைந்தனர்.

இந்தக் காட்சியைக் கண்ட சீன நாட்டு மற்றும் மேற்கத்திய நாட்டுச் சுற்றுப்பயணிகள் எதற்காக இப்படிக்கொல்கிறார்கள்? என்று சுற்றுலா வழிகாட்டிகளை கேள்வி மேல் கேள்வி கேட்டு நச்சரித்து விட்டனர்.

சிப்பாடான் என்ற இடத்தில் கடல் வாழ் திருக்கை மீன்களையும் சுறா மீன்களையும் கண்டு கழிப்பதற்காக வந்த அவர்கள், அதே உயிரினங்கள் மனிதர்களால் தங்களின் கண் முன் கொல்லப்படுவதைக் காண நேர்ந்தால், அந்த வேதனைக்கு அளவு ஏது? என்கிறார் சபாவின் சுற்றுச் சூழல் பாதுகாப்பு இயக்க ஆர்வலரும் சபா சுறா மீன்கள் பாதுகாப்புச் சங்கத்தின் தலைவருமான அட்டெரிக் சோங்.

இத்தகைய மண்டா ரே வகைத் திருக்கை மீன்கள், கூட்டரசு மீன்வளச் சட்டத்தின் கீழ் பாதுகாக்கப்பட்ட உயிரினமாக  கடந்த ஆண்டிலேயே அரசு கெஜட்டில் பதிவு செய்யப்பட்டிருக்க வேண்டும். 

அதேபோன்று சுத்தியல் தலை சுறா மின்கள் என்றழைக்கப்படும் இனங்களும் பாதுகாக்கப்பட்ட இனமாக அறிவிக்கப்பட்டிருக்க வேண்டும். ஆனால் என்ன காரணமோ தெரியவில்லை, அவை இன்னமும் கெஜட் செய்யப்படாமலேயே இருக்கிறது என்று அவர் சொன்னார்.

 

 

 

 

 

 

 

 

 

 

ஷா ஆலம், பிப்.19- கடந்த ஜனவரி தொடங்கி மூடப்பட்டதாக அறிவிக்கப்பட்டிருக்கும் பத்து தீக்கா சாலைக் கட்டண டோல் சாவடியில் மூன்றாவது முறையாக நடந்த கோரமான  வாகன விபத்தில் இருவர் மாண்டனர்.   அதேவேளையில் விபத்தில் இறந்த ஒருவருக்கு அன்றைய தினம் அவரது பிறந்தாள் என்பது குறிப்பிடத்தக்கது.

நேற்றிரவு 12.55 மணியளவில்  ஷா ஆலமில் இருந்து பத்து தீக்கா சாலைக் கட்டணச் சாவடியை  நோக்கி இவர்கள் இருவரும் பயணம் செய்து கொண்டிருந்தனர்.  ஃபாத்துரா கைருள் (வயது 31)  என்ற ஆடவரும் நூர் ஹிடாயா (வயது 27) என்ற இளம் பெண்ணும் பயணம் செய்த மைவி கார், மிக வேகமாக வந்ததாக கூறப்பட்டது.

சாலை கட்டணச் சாவடியைத் தாண்டும் போது அது கட்டுப்பாட்டை இழந்து சாவடியின் தடுப்புச் சுவரில் மோதியதாக தொடக்க விசாரணையில் தெரிய வந்திருப்பதாக ஷா ஆலம்  மாவட்டப் போலீஸ் தலைவர் துணை ஆணையர் பகாருடின் மாட் தாய்ப் தெரிவித்தார்.

சம்பவம் நடந்த இடத்திலேயே இந்த இருவரும் உயிரிழந்தனர். இவர்களில் ஒருவருக்கு அன்றைய தினம் பிறந்த நாள் எனத் தெரிய வந்துள்ளது விபத்துக்குள்ளான காரினுள் பிறந்த நாள் 'கேக்' சிதைந்து சிதறிக் கிடந்தது. 

பத்து தீக்கா சாலைக் கட்டணச் சாவடியும் சுங்கை ராசாவ்  சாவடியும் ஜனவரி மாதம் முதல் மூடப்பட்டது. இங்கு சாலைக் கட்டணம் எதுவும் வசூலிக்கப் படுவதில்லை என்றாலும் அதன் தடுப்புச் சுவர்களும் சாவடிகளும் இன்னும் அகற்றப்படாமலேயே இருந்து வருகிறது. ஏற்கெனவே பத்து தீக்கா கட்டணச் சாவடியில்  இது போன்று இரண்டு முறை விபத்துக்கள் நடந்துள்ளன.  

கோத்தா கினபாலு, பிப்.19- சீனப் புத்தாண்டை சந்தோசமாக கழிக்க நினைத்த 39 சீனப் பயணிகள் தங்களை ஏற்றி பேருந்து தீப்பிடித்ததைக் கண்டு ஒருகணம் அதிர்ந்து போயினர்.

சபாவில் உள்ள தம்பாருளி-ரானாவ் சாலையில் நேற்று இரவு 8.45 மணியளவில் நகரிலிருந்து ஏறக்குறைய 45 கிமீ தொலைவு தூரத்தில் சென்று கொண்டிருந்த சுற்றுலா பேருந்து திடீரென தீப்பிடித்தது. பேருந்தின் பின்பக்க டயரிலிருந்து தீப்பொறிகள் வந்ததைக் கண்ட ஓட்டுனர் உடனடியாக அனைத்து பயணிகளையும் கீழே இறங்குமாறு பணித்தார். உயிரைக் காப்பாற்றி கொள்ள பேருந்தில் இருந்தவர்கள் அலறியடித்து வெளியேறினர்.

டயரின் அடியில் ஏற்பட்ட தீயை அணைக்க பேருந்தில் இருந்த தீயணைப்புக் கருவியைப் பயன்படுத்தியும்  ஓட்டுனரால் தீயை அணைக்க முடியவில்லை. மேலும் சிறிது நேரத்தில் பேருந்து முழுவதும் தீ வேகமாக பரவியது.  

இந்த தீச் சம்பவத்தில் யாரும் காயமடையவில்லை என்றும் தீ உண்டானதுக்கு பிரேக்கில் ஏற்பட்ட கோளாறு காரணமாக இருக்கலாம் என துவாரான் மாவட்ட போலீஸ் தலைவர் துணை சூப்ரிடெண்டன் சூல்பஹாரின் இஸ்மாயில் கூறினார்.

39 பயணிகளையும் பேருந்தின் உரிமையாளர் வேறு ஒரு பேருந்து மூலம் நகருக்கு அழைத்துச் சென்றதாகவும் அவர் மேலும் கூறினார். 

More Articles ...