கோலாலம்பூர், டிச.4- மலிவான விலையில், அதீக ஆபத்தை ஏற்படுத்தக்கூடிய போதை மருந்துகள் போதைப்பொருள் கடத்தல்காரர்களின் கையிருப்பில் உள்ளதாகவும், இது குறித்து பொதுமக்கள் விழிப்புணர்வுடன் இருக்க வேண்டும் என்று காவல் துறை அறிவுறுத்தியுள்ளது. 

அந்தப் போதைப்பொருளை போதைப் பொருள் விநியோகஸ்தர்கள் புதிதாக விற்பனைக்கு உட்படுத்தியுள்ளனர். பெற்றோர்கள் தங்களின் பிள்ளைகள் புதிதாக மாத்திரைகள் ஏதேனும் உட்கொள்கின்றனரா என்பதை கூர்ந்து கவனிக்க வேண்டும் என்று கூட்டரசு பிரதேச போதைப்பொருள் குற்றவியல் விசாரணை இலாகாவின் தலைவர் டத்தோஶ்ரீ முகமட் சால்லே அறிவுறுத்தினார். 

"என்.பி.எஸ் என்று அழைக்கப்படும் அந்தப் போதைப் பொருள் மிகவும் ஆபத்தானது. காய்ச்சல், சலி, போன்ற உபாதைகளுக்கு நாம் உபயோகிக்கும் மாத்திரைகள் போல் அந்தப் போதைப் பொருள் காட்சியளிக்கும். இதனால், பொதுமக்கள் இது வெறும் மாத்திரையே என்று நம்பிவிடலாம்" என்று அவர் சொன்னார். 

"வீட்டில் உங்களின் பிள்ளைகள் புதிதாக மாத்திரைகள் ஏதேனும் சாப்பிட்டால், அது நிஜமாகவே உடல் உபாதைகளுக்கு பயன்படுத்தப்படும் மாத்திரையையா அல்லது போதைப் பொருளா என்பது குறித்து உடனே ஆராயுங்கள். விழிப்புணர்வுடன் இருங்கள்" என்று முகமட் சால்லே பெற்றோர்களை கேட்டுக் கொண்டார். 

கள்ளச் சந்தையில் இருக்கும் இதர போதை மருந்துகளை விட, என்.பி.எஸ் மலிவாக விற்கப்படுவதால், இது பிரபலமாகி வருவதாகவும் இதற்கு பல இளைஞர்கள் அடிமையாகலாம் என்று போலீசார் கவலைக் கொள்வதாக அவர் சொன்னார்.  

இந்நிலை தொடராமல் இருக்கும் பொருட்டு, பொதுமக்கள் அனைவரும் இது குறித்த விழிப்புணர்வு கொண்டிருக்க வேண்டும். இந்த என்.பி.எஸ்-யின் ஆபத்து குறித்து மக்களுக்கு தெளிவுப்படுத்தும் பொருட்டு, போதைப்பொருள் தடுப்புப் பிரிவுடன் இணைந்து காவல் துறை செயலாற்ற தயாராக இருப்பதாக அவர் தெரிவித்தார்.  

கோலா நெரூஸ், டிச.4- திரெங்கானு மாநிலத்தைச் சேர்ந்த 286 கிலோகிராம் எடைக்கொண்ட முகமட் ஃபைசால் என்ற 29 வயது ஆடவர், மூச்சுத் திணறல் ஏற்பட்டு உயிரிழந்தார். மூச்சு விடுவதில் சிரமம் ஏற்பட்டு சுல்தானா நூர் ஸகீரா மருத்துவமனையில் அவர் கடந்த இரண்டு மாதங்களாக சிகிச்சைக்காக அனுமதிக்கப்பட்டிருந்தார். கடந்த நான்கு நாட்களுக்கு முன்னர் தான் அவர் மருத்துவமனையிலிருந்து டிஸ்சார்ஜ் செய்யப்பட்டார். 

அவரின் உடல் இன்று காலை, மெங்காபாங் தெலிபோட் இடுகாட்டில் அடக்கம் செய்யப்பட்டது. 

"என் மகனின் உடல் வேர்த்து அவன் மூச்சு விடுவதற்கு மிகவும் சிரமப்பட்டான். அதனைத் தொடர்ந்து நான் மருத்துவ உதவியாளர் ஒருவரின் உதவியை நாடினேன். என் மகனைப் பரிசோதித்த அவர், அவன் உயிரிழந்து விட்டான் என்று என்னிடம் கூறினார்" என்று ஃபைசாலின் தாயார் கஸ்மா முகமட் நோர் கூறினார். 

குடும்பத்தில் உள்ள அனைவருடனும் அன்பாகவும், அவர்களை எப்போதும் மகிழ்ச்சிப் படுத்தும் குணம் கொண்ட ஃபைசாலின் இறப்பு தனக்கு பேரிழப்பாகும் என்று அவர் வருத்தத்துடன் தெரிவித்தார்.

காஜாங், டிச.3- உடலில் பல்வேறு இடங்களில் பல கத்திக் குத்து மற்றும் வெட்டுக் காயங்களுக்கு ஆளாகிய நிலையில், இந்தியாவைச் சேர்ந்த இருவரின் உடல் தாமான் இன்டூஸ்திரி பாலாகோங் ஜெயாவில் கண்டெடுக்கப்பட்டுள்ளன.  

இச்சம்பவம் குறித்து போலீசாருக்கு நேற்று இரவு 7.45 மணிக்கு தகவல் தெரிவிக்கப்பட்டதாகவும், அங்கு விரைந்த போது, அவ்விருவரும் இரத்த வெள்ளத்தில் மிதந்துக் கொண்டிருந்ததாக காஜாங் ஓசிபிடி துணை ஆணையர் அகமட் ஸாஃபீர் யூசோப் கூறினார்.  

தொழிற்சாலைகள் அதிகம் இருக்கும் அவ்விடத்தின் ஒரு கட்டிடத்தின் முன்புறத்தில் அவர்களின் உடல்கள் கண்டெடுக்கப்பட்டன. புல்தரை மீது குப்புறமாக அவர்கள் கிடந்ததாகவும், அவர்களின் முகம் மற்றும் முதுகுப் பகுதிகளில் பல வெட்டுக் காயங்கள் ஏற்பட்டுள்ளதாகவும் அவர் சொன்னார்.  

அவ்விருவரும் 20 வயதிற்குட்பட்ட இந்திய நாட்டவர்கள் என்று ஸாஃபீர் கூறினார். கொள்ளையின் அடிப்படையில் இந்தக் கொலைச் சம்பவம் நிகழவில்லை. கொலை செய்யப்பட்டவர்களின் பணப்பை மற்றும் அதிலிருந்த பணம் எதையும் கொலை செய்தவர்கள் எடுக்கவில்லை என்று அவர் தெரிவித்தார். 

கோலாலம்பூர், டிச.3- புதுச்சேரியில் நடைபெற்ற தொடக்கத் தமிழ்ப்பள்ளி மாணவர்களுக்கான நான்காவது அனைத்துலக மாணவர் முழக்க போட்டியில் மலேசியாவின் ரவின் நாய்க்கர் வெற்றியாளர் பட்டத்தை வாகை சூடி வரலாறு படைத்தார்.

ஆஸ்ட்ரோ வானவில்லும் வணக்கம் மலேசியாவும் இணைந்து படைத்த இந்த அனைத்துலக மாணவர் முழக்கப் போட்டியில் முதன் முறையாக வெற்றியாளராக வாகை சூடியுள்ளது மலேசியா.

ஜொகூர் கங்கார் பூலாய் மாணவரான ரவின் முதலிடத்தையும் இந்தியாவின் வேலம்மாள் பள்ளி மாணவி ஆர்த்தி வள்ளீஸ்வரன் இரண்டாவது பரிசையும், ஜொகூர் மாசாய் மாணவரான சஸ்வின்ராஜ் மூன்றாவது இடத்தையும் பிடித்தனர்.

இலங்கையைச் சேர்ந்த மாணவரான தாருகன் பஞ்சாநாதன் மற்றுமொரு மூன்றாவது வெற்றியாளராக வாகை சூடினார்.

இதுவரை கடந்த மூன்று அனைத்துலக போட்டிகளில் இந்தியாவே முதலிடத்தை வென்றது. ஆனால் இம்முறை கடுமையான போட்டி களத்தில் மலேசிய போட்டியாளர் ரவின் மிக சிறப்பாக பேசி வாதம் புரிந்து மாபெரும் இறுதிச் சுற்றில் வாகை சூடி மலேசியாவுக்கு பெருமை சேர்த்தார்.

முதல் பரிசாக 3000 மலேசிய ரிங்கிட் ரொக்கம், வெற்றியாளர் கோப்பை மற்றும் நற்சான்றிதழை ரவின் பெற்றார்.

கோலாலம்பூர், டிச.2- மலேசியாவிற்கு சுற்றுலாப் பயணம் மேற்கொண்ட தங்களின் பணம் ஏமாற்றப்பட்டதாகவும், சொந்த நாடுகளுக்குத் திரும்பிச் செல்ல டிக்கெட் வாங்குவதற்கு போதுமான பணம் இல்லை என்ற சோகக் கதையைக் கூறி, மக்களை ஏமாற்றும் கும்பல் ஒன்று இரண்டாவது கோலாலம்பூர் அனைத்துலக விமான நிலையத்தில் நடமாடுகிறது என்று அக்கும்பலால் ஏமாற்றப்பட்ட மலேசியர் ஒருவர் தனது சமூக வலைத்தளத்தில் தகவல் தெரிவித்துள்ளார்.  

அவர்களின் கதையைக் கேட்டு பரிதாபப்பட்டு, அவ்விருவருக்கும் தாம் 680 ரிங்கிட்டை வழங்கியதாகவும், அவ்விருவரும் தங்களின் நாடுகளுக்குத் திரும்பியதும், தமது பணத்தை திருப்பி அனுப்புவதாகக் கூறியதாக 35 வயதான விற்பனை நிர்வாகியாகப் பணிப் புரியும் அந்த மலேசியர் கூறினார். ஆனால், அவர்களுக்கு உதவிச் செய்த மூன்று மணி நேரத்தில், அவ்விருவரும் மீண்டும் அதேச் சோகக் கதையைக் கூறி அவரிடம் பண உதவியைக் கேட்ட போதுதான், தான் ஏமாற்றப்பட்டதை உணர்ந்ததாக அவர் சொன்னார். 

அவ்விருவரின் முகங்களையும் உடனே தனது கைத்தொலைபேசியில் புகைப் படம் எடுத்துவிட்டு, அச்சம்பவம் குறித்து அவர் போலீசாரிடம் தகவல் தெரிவித்தார். அதனைத் தொடர்ந்து, அந்த ஏமாற்று பேர்வழிகளில் ஒருவன் கைது செய்யப்பட்டான். 

இச்சம்பவத்தை அவர் தனது சமூக வலைத்தளத்தில் பகிர்ந்ததும், அவ்விருவருக்கும் தாங்களும் உதவி புரிந்ததாக சிலர் அவரிடம் தெரிவித்தனர். 100லிருந்து 800 ரிங்கிட் வரை அந்த நபர்களுக்கு கொடுத்து உதவியதாகவும், தாங்கள் ஏமாற்றப்பட்டதாகத் தெரிந்த சிலர், அது குறித்து போலீசாரிடம் புகார் கொடுக்கவில்லை என்றும் கூறினர். 

 

ஜோர்ஜ் டவுன், டிச.2- பினாங்கு மாநிலத்தில் உள்ள பிச்சைக்காரர்கள் பலர், உதவும் மனப்பான்மைக் கொண்ட பொதுமக்களை ஏமாற்றுகிறார்கள் என்று பினாங்கு மாநில சமூகநல இலாகா தகவல் தெரிவித்துள்ளது. அதனைத் தொடர்ந்து, பிச்சை வழங்குவதில் பொதுமக்கள் சற்று கவனமாகச் செயல்பட வேண்டும் என்றும், முடிந்தவரை அவர்களுக்கு பிச்சையிட வேண்டும் என்றும் அடையாளப் பலகைகள் வாயிலாக சமூகநல இலாகா எச்சரிக்கை விடுத்துள்ளது.  

அம்மாநிலத்தில் உள்ள பிச்சைகாரர்களில் பலர், நாள் ஒன்றுக்கு 300 ரிங்கிட்டு மேல் சம்பாதிக்கின்றனர். கிழிந்த உடைகளை உடுத்திக் கொண்டு, தங்களின் உடல்களில் உள்ள குறைகளை வெளியே காட்டி, பொதுமக்களின் கருணையை அவர்கள் பெற்று விடுகிறார்கள். பினாங்கு மக்கள் நல்லுள்ளம் கொண்டவர்கள் என்பதை அறிந்து அவர்கள் அவ்வாறு செயல்படுகின்றனர். உதவி செய்வது நற்பண்பே. ஆனால், யாருக்கு உதவுகிறோம் என்று அறிந்துத் தெரிந்து உதவிச் செய்தால் அது நமக்கு நன்மையளிக்கும் என்று என்று சமூகநல, சமூகப் பராமரிப்பு மற்றும் சுற்றுச்சூழல் குழுவின் தலைவர் ஃபீ பூன் போ கூறினார்.

அம்மாநிலத்தில் வெளிநாட்டவர்கள் பலரும் இந்தப் பிச்சைத் தொழிலில் ஈடுபட்டுள்ளனர். மேலும் சிலர், சில ஆசிரமங்கள் மற்றும் பராமரிப்பு இல்லங்களின் பெயர்களை உபயோகித்து நன்கொடை பெறுகிறார் என்று அவர் கூறினார்.  நன்கொடை கொடுக்குமாறு பொதுமக்களை யாரேனும் தொல்லைப் படுத்தினால், அது குறித்து உடனடியாக சமூகநல இலாகாவில் புகார் கொடுக்குமாறு அவர் அறிவுறுத்தினார். 

இதனிடையில், கடந்த 2014-ஆம் ஆண்டு தொடங்கப்பட்ட 'பிச்சைகாரர்களுக்கு உதவி புரிதல்' என்ற திட்டத்தின் வாயிலாக கடந்த ஆண்டு, 297 பிச்சைக்காரர்களுக்கு சமூகநல இலாகா உதவிப் புரிந்துள்ளதாகவும், அவர்களில் 104 பேர் வெளிநாட்டவர்கள் என்றும் மாநில சமூகநல இலாகா இயக்குனர் ஷாபல்லா ஸைனால் அபிடீன் கூறினார். 

இருந்தபோதிலும், அம்மாநிலத்திலுள்ள பிச்சைக்காரர்களின் எண்ணிக்கை நாளுக்கு நாள் அதிகரித்துக் கொண்டே இருப்பதாக அவர் சொன்னார். இவ்வருட ஜனவரி மாதத்திலிருந்து அக்டோபர் மாதம் வரை 435 பிச்சைக்காரர்களுக்கு அத்திட்டத்தின் வாயிலாக உதவிகள் வழங்கப்பட்டுள்ளது என்று அவர் சொன்னார். 

நன்கொடை வழங்கும் எண்ணம் கொண்டவர்கள், சமூகநல இலாகாவின் கீழ் பதிவுச் செய்யப்பட்டுள்ள கருணை இல்லங்களுக்கு நன்கொடைகளை வழங்கலாம். 1977-ஆம் ஆண்டின் கைவிடப்பட்டவர்கள் அல்லது ஆதரவற்றோர் சட்டத்தின் கீழ், பிச்சை எடுப்பது குற்றச்செயலாகக் கருதப்படுகிறது என்று ஷாபல்லா தெரிவித்தார்.  

 

தைப்பிங், டிச.2- 

வடக்கு – தெற்கு விரைவு நெடுஞ்சாலையின் 200-ஆவது கிலோ மீட்டரில் தான் ஓட்டிச் சென்ற  பேருந்தில் ஏதோ கோளாறு இருப்பதை அறிந்த அப்பேருந்து ஓட்டுநர், அப்பேருந்தை உடனே நிறுத்தி விட்டு, அதில் பயணித்துக் கொண்டிருந்த பயணிகளின் உயிரைக் காப்பாற்றினார். 

அவர் ஓட்டி வந்த இரண்டு மாடி பேருந்தின் டயர் ஒன்றிலிருந்து அதிகமான புகை வெளியாவதைக் கண்ட அவர், அப்பேருந்தை சாலையின் ஓரத்தில் நிறுத்தி விட்டு, பயணிகளை சீக்கிரமாக தங்களின் உடைமைகளை எடுத்துக் கொண்டு வெளியேறுமாறு அவர் பணித்தார் என்று தீயணைப்பு மற்றும் மீட்புப் படைப் பேச்சாளர் ஒருவர் கூறினார். 

அதனைத் தொடர்ந்து, தீயணைப்பு படையினருக்கு அச்சம்பவம் குறித்து அவர் தகவல் தெரிவித்தார். சற்று நேரத்தில், அப்பேருந்தின் டயரிலிருந்து நெருப்பு வெளியாகி, அது பேருந்தின் இதர பகுதிகளிலும் பரவத் தொடங்கியதாக அவர் சொன்னார்.  

சம்பவம் நிகழ்ந்த இடத்திற்கு விரைந்த தீயணைப்பு வீரர்கள், அந்தத் தீயை கட்டுக்குள் கொண்டு வர 2 மணி நேரங்களுக்குப் போராடினர். அச்சம்பவத்தில் உயிர் காயம் ஏதும் நேரவில்லை என்றும், பயணிகள் அனைவரும் அருகிலுள்ள ஓய்விடத்திற்கு அழைத்துச் செல்லப்பட்டனர் என்றும் அவர் தெரிவித்தார். 

 

More Articles ...