ஜோர்ஜ்டவுன், பிப்.19- தொழுகை முடிந்து வீடு திரும்பி கொண்டிருந்த 60 வயது முதியவரை அடையாளம் தெரியாத ஆடவன் ஒருவன் எட்டி உதைத்ததில் அம்முதியவர் தடுமாறி கீழே விழுந்து படுகாயம் அடைந்தார். 

இச்சம்பவம் நேற்று மாலை 3 மணியளவில் கெர்னி டிரைவ் சாலை அருகே நடந்தது. அடையாளம் தெரியாத நபர் செய்த இச்செயலால் தடுமாறி கீழே விழுந்த முதியவருக்கு உடலிலும் நெஞ்சு பகுதியில் கடுமையான காயங்களும் வலியும் ஏற்பட்டதாக திமோர் லாவுட் மாவட்ட போலீஸ் தலைவர் ஏசிபி அனுவர் ஓமார் கூறினார்.

 

  ####காணொளி: நன்றி facebook

இச்சம்பவம் பின்னால் வந்து கொண்டிருந்த கார் ஒன்றின் முன்பக்க காமிராவில் பதிவானதை அடுத்து காரின் உரிமையாளர் அக்காணொளியைச் சமூக வலைத்தளத்தில் பதிவேற்றம் செய்தார். இதனைப் பொதுமக்கள் பரவலாக பகிர்ந்து வருகின்றனர்.

லங்காவி, பிப்.19- நாட்டின் பிரசித்தி பெற்ற லங்காவி கேபிள் கார் சேவையில் ஏற்பட்ட கோளாறினால் மலையேறி, இறங்கி கொண்டிருந்த 88 பேர் அந்தரத்தில் சிக்கி தவித்தனர். அவர்களை மீட்பு படையினர் பத்திரமாக மீட்டனர்.

நேற்று மாலை 6.55 மணியளவில் லங்காவி ஸ்கைகேப் எனும் தொங்கும் கேபிள் காரின் ஒரு 'பேரிங்கில்' பழுது ஏற்பட்டதை அடுத்து அதன் சேவை நிலைக்குத்தியது. இதனால் மச்சிங்சாங் மலைக்கு ஏறியும் இறங்கியும் கொண்டிருந்த 88 பேர் அந்தரத்தில் தொங்கினர். 

சம்பவத்தை அடுத்து தீயணைப்பு படையினர் மூன்று மணிநேரம் போராடி சுற்றுப்பயணிகளைக் காப்பாற்றினர். காட்டு பாதை வழியாக மலையேறிய மீட்பு படையினர் சேவை நிர்வாக ஊழியர்களுடன் இணைந்து பயணிகளை பத்திரமாக நிலையத்தில் இறக்கினர்.

அலோர்ஸ்டார், பிப்.18-கோலக் கெட்டில், மெர்பாவ் புலாஸ் என்ற இடத்திற்கு அருகில் சட்ட விரோதமாக சேவல் சண்டை நடத்திய கும்பல் ஒன்று, போலீசார் வருவதைக் கண்டு பீதியடைந்து அருகிலிருந்த ஆற்றில் குதித்து தப்பிக்க முயன்ற போது ஐவர் நீரில் மூழ்கி பரிதாபகரமாக மாண்டனர். 

இறந்தவர்களில் நால்வர் 40 வயதுக்கும் 50 வயதுக்கும் உட்பட்டவர்கள் என்று அடையாளம் கூறப்பட்டது. ஐந்தாவது நபர் பற்றி இன்னும் அடையாளம் காண இயலவில்லை என்று பாலிங் மாவட்ட ஓசிபிடி ஷரிபுடின் யூசோப் தெரிவித்தார்.

இங்குள்ள கம்போங் தானா லிச்சிங் என்ற இடத்தில் சட்ட விரோதமாக சேவல் சண்டை பந்தயத்தில் கும்பல் ஒன்று ஈடுபட்டு வருவதாக தகவல் கிடைத்ததைத் தொடர்ந்து போலீஸ் குழு ஒன்று அந்த இடத்திற்கு விரைந்ததாக அவர் சொன்னார். 

செம்பனைத் தோட்டத்தில் நடந்த இந்தச் சேவல் சண்டையின் போது போலீசார் வருவதைக் கண்டு பயந்து சிலர் தப்பிச் செல்லும் நோக்கில் அருகிலிருந்த ஆற்றில் குதித்து நீரில் மூழ்கி உயிரிழந்ததாகவும் ஓசிபிடி ஷரிபுடின் தெரிவித்தார்.

இந்தச் சம்பவத்தின் போது சண்டைக்காக தயார்படுத்தப் பட்ட பல் சேவல்களையும் போலீசார் மீட்டனர் என்பது குறிப்பிடத்தக்கது. மேலும், தீயணைப்பு மற்றும் மீட்புப் படைப் பிரிவைச் சேர்ந்த வீரர்கள் ஆற்றில் மூழ்கிய அந்த ஐவரின் உடலையும்  இருந்து மீட்டனர்.

கோலாலம்பூர், பிப்.18- செலாயாங்கிலுள்ள மளிகைக் கடை ஒன்றில் இரண்டு ஊழியர்களுக்கு இடையே நடந்த வாக்குவாதம் கடுமையாகி  அடிதடியில் முடிந்ததில் ஒருவர் மற்றொருவரை கத்தியால் குத்திக் கொன்றதோடு, தானும் தூக்கு மாட்டித் தற்கொலை செய்து கொண்டார். 

இந்தச் சம்பவம் இன்று அதிகாலை 12.30 மணியளவில் பத்துகேவ்ஸ் , தாமான் செலாயாங்கில் நடந்தது. கடையினுள் இரண்டு ஊழியர்களுக்கும் கடுமையான சண்டையில் ஈடுபட்ட போது இவர்களைத் தடுப்பதற்கு முனைந்த கடை முதலாளியும் காயமடைந்தார்.

இந்தச் சண்டை குறித்து பொதுமக்கள் தகவல் அளித்ததைத் தொடர்ந்து அந்த இடத்திற்கு போலீசார் விரைந்தனர். மளிகைக் கடையின் பின்புறத்தில் ஊழியர் ஒருவர் கத்திக் குத்துக் காயங்களுடன் இறந்த கிடந்தார். 

அதே வேளை, அவரைக் கத்தியால் குத்தியதாக நம்பப்படும் மற்றொரு ஊழியர் கடையின் முன்புறத்தில் தூக்கில் தொங்கி கொண்டிருந்தார் என்று போலீசார் தெரிவித்தனர்.

இந்தக் கொலை மற்றும் தற்கொலை குறித்து கோம்பாக் மாவட்டப் போலீசார் தொடர்ந்து விசாரணை நடத்தி வருவதாக துணை ஆணையர் அலி அகமட் தெரிவித்தார்.

 

கோலாலம்பூர்,பிப்.18- கடந்த 2015 ஆண்டில் வீட்டுப் பணிப்பெண்ணாக வேலைக்குச் சேர்ந்தது முதல் சம்பளமே கொடுக்கப்படவில்லை என்று முதலாளிகளின் கொடுமையினால் இறந்து போனதாக கூறப்படும் இந்தோனேசியப் பணிபெண்ணின் குடும்பத்தினர் குற்றஞ்சாட்டினர்.

கடந்த வாரம் சனிக்கிழமையன்று பொதுமக்களில் ஒருவர் தகவல் கொடுத்ததைத் தொடர்ந்து முதலாளிகளின் கொடுமைக்கு உள்ளாகி, வீட்டில் கார் நிறுத்துமிடத்தில் படுத்திருந்த அடெலினா என்ற 21 வயதுடைய இந்தோனேசிய வீட்டுப் பணிப்பெண்ணை போலீசார் மீட்டு புக்கிட் மெர்டாஜாம் மருத்துவமனயில் சேர்த்தனர். மறுநாள் அந்தப் பெண் இறந்து போனார். 

புத்திட் மெர்டாஜம் தாமான் கோத்தா பெர்மாயிலுள்ள ஒரு வீட்டைச் சேர்ந்த அண்ணன், தங்கை மற்றும் அவர்களின் 60 வயது  தாயார் ஆகியோர் கைது செய்யப்பட்டு ஒருவாரம் காலம் விசாரணைக்காக தடுத்து வைக்கப்பட்டனர்.

இந்நிலையில் அடெலினா வேலைக்குச் சேர்ந்தது முதல் அவரது முதலாளிகள் சம்பளமே வழங்கவில்லை என்று இந்தோனேசியாவிலுள்ள அந்தப் பெண்ணின் குடும்பத்தினர் கூறியதாக இந்தோனேசிய நாளிதழ் ஒன்று கூறியது. 

அடெலினா முறையாக பதிவு செய்யப்படாமல் பணிப்பெண் வேலைக்காக மலேசியாவுக்கு அனுப்பப்பட்டவராக இருக்கலாம். ஆனாலும் அவருக்கு சம்பளம் கொடுக்காமல் மறுப்பதில் எந்த நியாயமும் இல்லை. அவருடைய மூன்று ஆண்டுகாலச் சம்பளம் தரப்பட வேண்டும் என்று அவர்கள் வலியுறுத்தினர்.  

 ஈப்போ, பிப்.17- சீனப் புத்தாண்டு விடுமுறையைக் கழிக்க பாட்டி வீட்டுக்கு வந்திருந்த பேரப் பிள்ளைகள், குளியலறை தொட்டி தண்ணீரில் விளையாடிக் கொண்டிருந்த போது துரதிஷ்டவசமாக மூழ்கியத்தில்  ஒருவர் இறந்தது. மற்றொரு குழந்தை மருத்துவமனையில் உயிருக்குப் போராடிக் கொண்டிருக்கிறது.

இங்கு ஜெலப்பாங் என்ற இடத்திலுள்ள தாமானில் இந்தத் துயரச் சம்பவம்  நடந்தது.

நான்கு வயது மற்றும் இரண்டு வயதுப் பேரப் பிள்ளைகளான அவர்கள், இருவரும் காலையில் விளையாடிக் கொண்டிருந்த வேளையில் இவர்களின் இதர இரண்டு மூத்த உடன்பிறப்புக்களும் தூங்க்கி கொண்டிருந்தனர். 

அதே வேளையில் இவர்களின் பாட்டி காலை உணவைத் தயாரிப்பதில் தீவிரமாக ஈடுபட்டிருந்தார். சிறிது நேரம் விளையாடிக் கொண்டிருந்த இரண்டு பேரப் பிள்ளைகளிடமிருந்தும எந்த சத்தமும் வராமல் போகவே பாட்டி அவர்களுக்காக குரல் கொடுத்துப் பார்த்தார்.

 அதற்கும் பதில் இல்லாத நிலையில் அவர்கள் விளையாடிக் கொண்டிருந்த இடத்திற்கு சென்றுப் பார்த்த போது பாட்டி அதிர்ந்து போனார்.

பக்கத்தில் இருந்த குளியலறைத் தொட்டியில் இருந்த தண்ணீரில் அந்த இரு சிறுவர்களும் மூழ்கிக் கிடந்தனர். 

பின்னர் அந்தச் சிறுவர்களைச் சுமந்து கொண்டு மருத்துவமனைக்கு விரைந்தனர் என்றாலும் சிறிது நேரத்தில் நான்கு வயது சிறுவன் உயிர் நீத்தான். அதேவேளையில் இரண்டு வயதுச் சிறுவனுக்குஅபாயகரமான நிலையில் அவசரச் சிகிச்சைப் பிரிவில் சிகிச்சை அளிக்கப்பட்டு வருகிறது.

சீனப் பெருநாள் விடுமுறை காரணமாக, கோலாலம்பூர் செராசில் இருந்து பாட்டி வீட்டிற்கு தங்களின் பெற்றோர்களுடன் இந்தச் சிறுவர்கள் வந்திருந்தனர் என்பது குறிப்பிடத்தக்கது.

 

 

 

 

 

 

கோலாலம்பூர்,பிப்.17- என்ன பொருளாக இருந்தாலும் பேரம் பேசி வங்குவதற்குப் உள்நாட்டவருக்கும் சரி, வெளி நாட்டவருக்கும் சரி  பொருத்தமான இடமென்றால், அது கோலாலம்பூர்  பெட்டாலிங் ஸ்த்ரீட் என்ற காலம் கொஞ்சம் கொஞ்சமாக மங்கி வருகிறது.

கடந்த 2015ஆம் ஆண்டில் இருந்தே பெட்டாலிங் ஸ்த்ரீட்டில் வியாபாரம் 30 முதல் 40 விழுக்காடு வரை குறைந்து விட்டது என்று அங்காடிக் கடை வியாபாரிகள் சங்கத் தலைவர் ஆங் சே டீ கூறினார்.

இவ்வாண்டு கூட சீனப் பெருநாள் தருணமாக இருந்தும் வாடிக்கையாளர்கள் இல்லாமல் தவிப்பில் இருக்கிறார்கள் பெட்டாலிங் ஸ்த்ரீட் வியாபாரிகள் என்கிறார் ஆங் சே டீ.

இங்கு சுமார் 773 அங்காடிக் கடைக்காரர்கள் இருக்கிறார்கள். பல்வேறு பொருள்களை வாங்க இங்கு உள்ளூர்க்காரர்களும் வெளிநாட்டுச் சுற்றுப் பயணிகளும் அலை மோதுவார்கள். எந்தப் பொருளாக இருந்தாலும் வாடிக்கையாளர்கள் நிறைய பேரம் பேசுவதற்கான வாய்ப்புள்ள இடமாக இது விளங்கியது.

கடந்த ஏப்ரல் 2015-இல் ஜிஎஸ்டி வரி அறிமுகமானது முதல் எங்களின் வியாபாரம் சரியத்  தொடங்கி விட்டது. பொருள்களின் விலை அதிகரித்து விட்டது. ஆனால் எங்களின் சம்பளம் அப்படியே தானே இருக்கிறது என்று வாடிக்கையாளர்கள் கூறுகிறார்கள் என்று ஆங் சே டீ கூறினார்.

பெட்டாலிங் ஸ்த்ரீட்டில் மக்கள் நடமாட்டமே  குறைந்து விட்டது. கடை வாடகை முதல் வேலையாள் கூலி வரை எல்லாமே அதிகரித்து விட்டதால் வியாபாரமும் சரிந்த நிலையில் சமாளிக்க முடியாத நிலையில் இந்த அங்காடி வியாபாரிகள் உள்ளனர் என்று அவர் வருத்தத்துடன் கூறினார்.

 

 

 

 

More Articles ...