ஈப்போ, ஜூன்.20- கிழக்கு மேற்கு நெடுஞ்சாலையில் ஆயர் பானுணுக்கு அருகில், காரில் வந்து கொண்டிருந்த போது சாலையின் குறுக்கே யானைக்கூட்டம் ஒன்று திடிரெனக் கடந்து சென்று கொண்டிருந்ததைப் பார்த்துத் தாம் பதட்டம் அடைந்து விட்டதாக நேற்று ஒரு யானைக் குட்டியை காரில் மோதிக் கொன்ற ஆசிரியர் ஒருவர் வருத்தத்துடன் தெரிவித்தார்.

இந்தச் சம்பவம் அதிகாலை 2.30 மணியளவில் அளவில் நடந்தது. வாகனத்தினால் மோதப்பட்டு இரத்த வெள்ளத்தில் அந்த யானைக்குட்டி இறந்து கிடந்த சம்பவம் பலரது கவனத்தை பெற்றது. 

'என்ன நடந்தது?' என்பது குறித்து போலீசார் விசாரணை நடத்திக் கொண்டிருந்த நிலையில் யானை ஒன்றின் மீது மோதி விட்டதாக ஆசிரியர் ஒருவர் சம்பவம் நடந்த இடத்திற்கு அருகேயுள்ள போலீஸ் நிலையம் ஒன்றில் புகார் செய்திருந்தது தெரியவந்தது..

பெர்லிஸ் ஆராவிலுள்ள யுஐடிஎம்.மைச் சேர்ந்த அஷ்லிண்டா அலியாஸ் (வயது 49) என்ற அந்தப் பெண்மணி, கிளந்தானிலுள்ள தானா மேராவில் இருந்து ஆராவுக்கு சென்று கொண்டிருந்த போது விபத்து நடந்துள்ளது என்று கிரீக் மாவட்டப் போலீஸ் தலைவர் இஸ்மாயில் ஷே இசா தெரிவித்தார்.

'அது இருட்டாக நேரம். திடிரென சாலையின் குறுக்கே யானைக்கூட்டம் ஒன்று நடந்து செல்லும் என்று நான் கொஞ்சம் கூட எதிர்பார்க்கவில்லை' என்று நிசான் அல்மேரா காரில் பயணம் செய்த அஷ்லிண்டா கூறினார்.

'யானைகள் என் காருக்கு மிக நெருக்க இருந்ததால் மோதுவதைத் தவிர்க்க முடியாமல் போனது. எவ்வளவோ முயன்றும் அந்தக் குட்டி யானை மீது மோதிவிட்டேன். பின்னர் இது குறித்து அருகிலிருந்த போலீஸ் நிலையத்தில் புகார் செய்தேன்' என்று அவர் சொன்னார்.

இந்தச் சம்பவத்தின் போது அஷ்லிண்டாவுட்ன் காரில் இருந்த அவருடைய கணவர் மற்றும் அவருடைய மூன்று குழந்தைகள் ஆகியோர் இந்த விபத்தில் காயமின்றித் தப்பினர்.

இதனிடையே இந்தக் குட்டி யானை, காரினால் மோதிக் கொல்லப்பட்ட சம்பவத்தைத் தொடர்ந்து இப்பகுதியில் காட்டு யானைக் கூட்டம் பெரும் அமளியில் ஈடுபட்டதாகவும் குறிப்பாக, அந்தக் குட்டியின் தாய் ஆவேசத்துடன் கடும் சேதங்களை ஏற்படுத்தியதாகவும் சமூக ஊடகங்களில் வெளியான தகவல்களை கிரீக் போலீஸ் படைத்தலைவர் இஸ்மாயில் மறுத்தார்.

அப்படிப்பட்ட சம்பவம் எதுவும் நடக்கவில்லை. ஆனால், இத்தகைய தகவல்களால் மக்கள் அந்தச் சாலை வழியாக பயணம் செய்ய அஞ்சுகின்றனர் என்றார் அவர்.

இப்பகுதியில் யானைக் கூட்டங்கள் உள்பட காட்டு விலங்களின் நடமாட்டம் அதிக அளவில் இருந்தாலும், அவை இரவு 10 மணிக்கும் அதிகாலைக்கும் இடையே தான் நடமாட்டங்கள் அதிகமாக இருக்கும் என்று அவர் சொன்னார்.

 

 

 

மிரி, ஜூன் 20- இன்று காலையில் நடந்த பயங்கர தீயில் கோல பாரம எனுமிடத்தில் தொழிலாளர்கள் தங்கிருந்த 48 வீடுகள் அழிந்தன. இதனால் ஏறக்குறைய 70 பேர் தங்கள் வீடுகளை இழந்து அவதிக்குள்ளாகியுள்ளனர்.

இன்று காலை 6.30 மணியளவில் இச்சம்பவம் நடந்தது. தொழிலாளர்கள் தூங்கி கொண்டிருந்தாலும் தீ ஏற்பட்டபோது அவர்கள் தப்பி விட்டதால் யாருக்கும் காயம் ஏற்படவில்லை என மிரி தீயணைப்பு மற்றும் மீட்புத்துறையின் தலைவர் சூப்ரிடெண்டன் லா போ கியோங் கூறினார்.

வீட்டில் பொருத்தப்பட்டிருந்த மின்கம்பியினால் தீ ஏற்பட்டதாக அவர் மேலும் கூறினார்.

புத்ராஜெயா, ஜூன் 20- சட்டவிரோதமாக மேற்கொள்ளப்படும் மீன் பிடிப்பு தொழிலால் மலேசியாவில் வருடத்திற்கு ரிம.6 பில்லியன் இழப்பு உண்டாகுவதாக மீன்வள இலாகா கூறியுள்ளது. வருடந்தோறும் ஏறக்குறைய 980,000 டன் மீன்கள் சட்டவிரோதமாக பிடிக்கப்படுவதாக தெரிவிக்கப்பட்டுள்ளது.

இதில், வெளிநாட்டு மீனவர்கள் உள்ளூர் நீரிணையில் மீன் பிடிப்பது மட்டுமின்றி, உள்நாட்டு மீனவர்களும் தாங்கள் பிடிக்கும் மீனை வெளிநாட்டினருக்கு விற்கும் நிலையும் உண்டு என இலாகாவின் இயக்குனர் டத்தோ இஸ்மாயில் அபு ஹசான் கூறினார். 

இதனைத் தடுக்க இலாகாவில் 380 அதிகாரிகளும் 40 படகுகளும் பாதுகாப்பு பணியில் ஈடுப்பட்டுள்ள நிலையில் இதற்கு வலு சேர்க்கும் வகையில் மேலும் 9 படகுகளை வாங்க இலாகா நிதி ஒதுக்கியுள்ளதாக அவர் மேலும் கூறினார், மேலும் ஏற்கனவே உள்ள பழுதான படகுகளைச் சரி செய்து பயன்படுத்துமாறும் உத்தரவிடப்பட்டுள்ளதாக அவர் கூறினார்.  

 

 ஜார்ஜ்டவுன், ஜூன்.19- மலேசியர்கள் மத்தியில் பெரும் அதிர்ச்சியை ஏற்படுத்திய சம்பவமான, மாணவன் டி.நவின் தாக்கப்பட்டு சுயநினைவு திரும்பாலேயே மரணமடைந்த சம்பவம் தொடர்பில் இங்குள்ள மாஜிஸ்திரேட் நீதிமன்றத்தில் மூவருக்கு எதிராக கொலைக் குற்றச்சாட்டு சுமத்தப்பட்டுள்ளது.

கடந்த 9ஆம் தேதியன்று புக்கிட் குளுக்கோரில் இரவு 11 மணிக்கும் 12 மணிக்கும் இடையே இந்தக் குற்றத்தைப் புரிந்ததாக 18 வயதுடைய ஜே.ராகசுதன், 18 வயதுடைய எஸ்.கோகுலன் மற்றும் 17 வயது, 16 வயதுடைய இதர இருவர் ஆகிய நால்வர் மீது குற்றஞ்சாட்டப்பட்டது.

முன்பு, இவர்களுக்கு எதிராக கலவரத்தில் ஈடுபட்டது மற்றும் ஆயுதங்கள் வைத்திருந்தது ஆகிய குற்றச்சாட்டின் பேரில் குற்றவியல் சட்டத்தின் 148 ஆவது பிரிவின் கீழ் விசாரணை நடத்தப்பட்டு வந்தது. ஆனால், இப்போது அது மாற்றப்பட்டு குற்றவியல் சட்டத்தின் 302ஆவது பிரிவின் கீழ் விசாரணை நடத்தப்படவுள்ளது. இவர்களுக்கு எதிரான குற்றச்சாட்டுகள் நீதிமன்றத்தில் ஒருசேர வாசிக்கப்பட்டது. 

மாஜிஸ்திரேட்முகமட் அமின் ஷாகுல் ஹமிட் முன்னிலையில் இடம் பெற்ற இந்தக் குற்றச்சாட்டுக்குப் பின்னர் வழக்கு செப்டம்பர் 28ஆம் தேதி விசாரணை வரும் என்று தெரிவிக்கப்பட்டது.  

மேலும், நவினுடன் இருந்த பிரவின் என்ற 18 வயது மாணவனை கடுமையான காயங்களை விளைவிக்கும் வகையில் தாக்கியதாக  இவர்களுக்கு எதிராக செசன்ஸ் நீதிமன்றத்தில் மற்றொரு குற்றச்சாட்டு கொண்டுவரப்பட்டது. 

இந்த நால்வருடன் சேர்ந்து கைது செய்யப்பட்ட ஆர்.பிராவீன் என்ற 18 வயது நபர், போலீஸ் சாட்சி என்ற வகையில் உத்தரவாதத்தின் பேரில் விடுவிக்கப்பட்டுள்ளார். 

காயம் விளைவித்த வழக்கில் பிராசிகியூசன் தரப்பில் டிபிபி லிம் சாவ் சிம் ஆஜாராகியுள்ளார். இந்த வழக்கு ஆகஸ்டு 21ஆம் தேதி விசாரணைக்கு வரவிருக்கிறது.

ஜூன் 9ஆம் தேதி தாக்கப்பட்ட டி.நவின், ஜூன் 15ஆம் தேதி பினாங்கு மருத்துவமனையில் சுய நினைவு திரும்பாலேயே உயிர்நீத்தார். ஓரினப்புணர்வுக்கு உள்ளாக்கப்பட்டு இவர்.முதுகில் தீக் காயங்களை ஏற்படுத்தியதாக போலீஸ் விசாரணையில் தெரிய வந்தது.

 

 

பெட்டாலிங் ஜெயா, ஜூன்.19- அடுத்து வரும் ஜூலை முதல் தேதி  தொடங்கி மலேசியர்கள் சாதாரணமாக உட்கொள்ளாத அறுபதுக்கும் மேற்பட்ட உணவு பொருள்களுக்கு ஜி.எஸ்.டி எனப்படும் பொருள், சேவை வரி விதிக்கப்படும்.

அவற்றுள் மலேசியர்கள் அன்றாட வழக்கில் அதிகம் பயன்படுத்தாத குறிப்பிட்ட சில வகை கடல் உணவுகள், காய்கறிகள், பழங்கள், தேநீர், காப்பி, மாசாலா ஆகியவை அடங்கும்.

இதைப் பற்றிய முழுமையான அறிக்கை இன்று வெளியிடப்படும் என்று சுங்கத் துறை தலைமை இயக்குனர் டத்தோ சுப்ரமணியம் துளசி தெரிவித்தார்..

அவ்வகையில் ஜி.எஸ்.டி விதிக்கப்படும் புதிய உணவுப் பொருள்களில் விலாங்கு மீன், வாளை மீன் மற்றும் இறக்குமதி செய்யப்பட்ட பழ வகைகளான அவோகாடோ, அத்திப்பழம், திராட்சை, பீச் பழம், செர்ரி, மற்றும் பெர்ரி ஆகியவையும் அடங்கும்.

 

 ஈப்போ, ஜூன்.19- கிரிக்கிற்கு அருகே கிரிக்-ஜெலி நெடுஞ்சாலையில் நடந்த விபத்தில் இரண்டு வயதுடைய யானைக் குட்டி ஒன்று இரத்த வெள்ளத்தில் பரிதாபமாக இறந்து கிடந்தது. இச்சம்பவம் இங்கிருந்து 130 கிலோ மீட்டர் தூரத்தில் நிகழ்ந்துள்ளது.

அந்த யானைக் குட்டியின் சடலம் கடந்த வாரம் வெள்ளிக்கிழமை காலை மணி 7 அளவில் கண்டுபிடிக்கப்பட்டது என பேராக் மாநில வனவிலங்கு துறை மற்றும் தேசிய பூங்காக்களின் தலைவர் லூ கியான் சியோங் தெரிவித்தார்.

“என்னதான் இம்மாதிரியான சம்பவங்கள் நிகழ்வது மிக அரிது என்றாலும், இந்த பாதையைப் பயன்படுத்தும் மோட்டார் வாகனமோட்டிகள் எப்பொழுதுமே மிகக் கவனமாக இருக்க வேண்டும்” என்றார் அவர்.

“மேலும், இங்கு ஏற்கனவே வாகனமோட்டிகளை எச்சரிக்கைச் செய்யும் வகையில் சாலையின் ஓரத்தில் யானைகளின் நடமாட்டம் உள்ள பகுதி என்ற அறிவிப்பு பலகைகள் வைக்கப்பட்டுள்ளன. எனவே, அவர்கள்தான் அக்கரையுடனும் கவனத்துடனும் பயணிக்க வேண்டும். அதிலும் குறிப்பாக இரவு மற்றும் அதிகாலை வேளைகளில் கவனமாக வாகனங்களை செலுத்தவேண்டும் என்று லூ கேட்டுக்கொண்டார்.

மேலும், பாதுகாக்கப்பட்டு வரும் வனவிலங்குகளாகிய யானை, புலி, தாப்பீர், சிறுத்தை போன்றவற்றின் நடமாட்டத்தைக் கண்டாலும் உடனடியாக மாநில வனவிலங்கு துறைக்குத் தகவல் தெரிவிக்குமாறு வாகனமோட்டிகளிடம் அவர் வலியுறுத்தினார்..

“இது ஏனெனில் அச்சம்பவங்களைப் பற்றி மேலும் விரிவாக விசாரணை நடத்தவும். மேலும், கேட்பாரின்றி இறந்துக் கிடக்கும் விலங்குகளைக் குறைந்தபட்சம் சாலையிலிந்து அப்புறப்படுத்துவதற்கும் உதவும்” என்று அவர் குறிப்பிட்டார்.

இதனிடையே,  குறிப்பிட்னந்தச் சாலை வளையானது, பாரம்பரியமும் இயற்கைச் சுற்றுச்சூழல் தன்மை கொண்ட சுற்றுலா தளமாகவும் கருதப்பட வேண்டும் என்று மலேசியச் சுற்றுச்சூழல் பாதுகாப்பு சங்க இணை நிறுவனரும் தலைமை நிர்வாக அதிகாரியுமான அண்ட்ரூ செபஸ்தியன் குறிப்பிட்டார்.

பெலும் தெமெங்கோர் வனப் பகுதியைச் சார்ந்து வெளிவந்த பல ஆய்வுகளைப் வைத்துப் பார்க்கையில் வாகனமோட்டிகள் கண்டிப்பாக கவனமாக இச்சாலையைப் பயன்படுத்த வேண்டும் என்று அவர் தெரிவித்தார்.

"இது விபத்துகளைத் தடுக்க மட்டுமல்ல அந்த உயிரினங்களின் மீது அன்பும் அரவணைப்பும் பரிவும் காட்டவும். அதே சமயம் வன விலங்கு சட்டத்தை நாம் பின்பற்றவும் வழிசெய்யும்" என்று அவர் மேலும் சொன்னார்.

 

 கோலாலம்பூர், ஜூன்.18- ஒரு கட்டுமானப் பகுதியில் இருந்து போலீசாரின் பிடிக்குச் சிக்காமல் தப்பித்து ஓடமுயன்ற இரு கொள்ளையர்கள், பின்னர் போலீசாருக்கு எதிராக துப்பாக்கிச் சூடு நடத்தியதால், போலீசார் நடத்திய எதிர்த்தாக்குதலில் மாண்டனர்.

பாண்டார் பாரு செந்தூல் மற்றும் ஜாலான் சிகாம்புட் ஆகிய இரு இடங்களில் இவர்கள் போலீசாரின் துப்பாக்கிச் சூட்டிற்குப் பலியானார்கள். அதிகாலை 3.30 மணியளவில் நடந்த இந்தச் சம்பவத்தில் இறந்த இரு கொள்ளையர்களில் ஒருவன் 26 வயதும் மற்றொருவன் 46 வயதும் கொண்டவன் எனப் போலீசார் கூறினர்.

போலீசார் சோதனை நடவடிக்கையில் ஈடுபட்டிருந்த போது இங்குள்ள கட்டுமானப் பகுதியிருந்து இந்த நபர்களும் இரு புரோட்டன் வீரா கார்களில், அவசரமாக வெளியேறுவதைக் கண்டனர். இதனால் போலீசார் இவர்களைப் பின்தொடர்ந்தனர்.

செந்தூல் பண்டார் பாரு பள்ளிவாசலுக்கு அருகில் இந்த இரு நபர்களும் வெவேறு திசைகளில் காரில் தப்பியோடினர். போலீசார் இரு பிரிவாக இவர்களை விரட்டிய போது 46 வயதுடைய ஆசாமி, தன்னைத் தடுக்க போலீசாரின் வாகனம் மீது சில முறை மோதினான். பின்னர் போலீஸ் வாகனத்தை நோக்கி சிலமுறைகள் சுட்டான். 

இதனால், போலீசார் பதில் நடவடிக்கையில் இறங்கினர். அந்த நபர் துப்பாக்கிச் சூட்டுக்கு இலக்காகி அங்கேயே மாண்டான்.

மற்றொரு கொள்ளையன் ஜாலான் சிகாம்புட்டில் போலீசாரால் மடக்கப்பட்டான். தப்பியோட வழியில்லாத போது அவனும் போலீஸ் மீது துப்பாக்கிச் சூடு நடத்தியதால் பதில் தாக்குதல் நடத்திய போலீசாருக்கு பலியானான்.

இவர்கள் இருவரின் கார்களிலும் துப்பாக்கிகள், கத்திகள், இரும்பு வெட்டும் கருவிகள், கையுறைகள், முகமூடிகள் ஆகியவை கைப்பற்றப்பட்டன. 

மேலும் கார்களுக்குள் நிறைய இரும்புப் செப்புக் கம்பி வயர்கள் இருந்தன. இவை அந்த கட்டுமானப்பகுதியில் திருடப்பட்டவை எனத் தெரிகிறது என கோலாலம்பூர் போலீஸ் படைத்  துணைத் தலைவர் டத்தோ மஸ்லான் லாஷிம் தெரிவித்தார். ஏற்கெனவெ இவர்கள் இருவர் மீதும் கொள்ளை, போதைப் பொருள் உள்பட பல்வேறு வழக்குகள் உள்ளன என்று அவர் சொன்னார்.

 

More Articles ...