ஈப்போ, பிப்.17- இந்தியாவின் மிகப்பெரிய அனைத்துலக வாகனத் தயாரிப்புத் தொழில் குழுமான டாடா நிறுவனத்தின் தொழில்கூடம் தஞ்சோங் மாலிமில் அமைவதற்கான ஏற்பாடுகளில் மலேசியா தீவிரம் காட்டியுள்ளது என்று இரண்டாவது வர்த்தக,தொழில் துறை அமைச்சரான டத்தோஶ்ரீ ஓங் கா சுவான் தெரிவித்தார்.

இங்கிலாந்தின் கார் தயாரிப்பு நிறுவனங்களான ஜக்குவார் மற்றும் லேண்ட் ரோவர் போன்றவற்றுடன் கொள்முதல் செய்து வரும் டாடா குழுமம், தஞ்சோங் மாலிம் பகுதியில் தங்களின் வாகனத் தயாரிப்புத் தொழிலை அமைக்கவிருக்கிறது என்றார் அவர்.

சீனாவுடன்  சேர்ந்து புரோட்டன் மற்றும் கீலி நிறுவங்களுக்கு இடையிலான கூட்டுத்தொழில் திட்டம் உருவாகி இருக்கும் நிலையில் அடுத்து இந்தியாவுடன் வாகனத் தயாரிப்பு தொழிலில் இறங்க மலேசியா இலக்குக் கொண்டுள்ளது என்றார் அவர்.

இந்த சீனப்புத்தாண்டு முடிந்தவுடன் இது தொடர்பாக இந்தியாவின் தொழில்துறை அமைச்சருடன் தொடர்பு கொள்ளத் திட்டமிட்டிருப்பதாகவும் இது குறித்து ஏற்கெனவே பிரதமர் நஜிப்புடனும் பேரா மந்திரி புசாருடனும் பேசப்பட்டு அவர்களும் முழு ஆதரவை அளித்திருப்பதாகவும் ஓங் கா சுவான் சொன்னார்.

தஞ்சோங் மாலிமில் வாகனத் தயாரிப்புக்கான மையம் ஒன்றை அமைக்க டாடா குழுமம் முடிவு செய்தால், அது மலேசிய சந்தையை மட்டுமின்றி  ஆசியான் நாடுகளுக்கான ஏற்றுமதியையும் நோக்கமாக கொண்டிருக்கும் என்று அவர் குறிப்பிட்டார்.

அப்படியொரு சூழல் உருவாகும் போது டாடா குழுமத்திற்கான சில சலுகைகளையும் நாம் அளிக்க வேண்டியது  அவசியமாகிறது.  இவை சாத்தியமானால், புரோட்டன் சிட்டிக்கு அருகில் டாடா தொழிற்சாலை அமையக் கூடும் என்றார் அவர்.

 

 

 

 

 

 

 

 

 

லங்காவி, பிப்.17- அமானா சஹாம் சத்து மலேசியா திட்டத்தில் முதலீடு செய்வதற்கு வசதியாக பி-40 எனப்படும் வறுமைக் கோட்டிற்குக் கீழே இருக்கும் மலேசிய இந்திய சமுதாயத்திற்கென சிறப்பு நிதி ஒதுக்கீடு இம்மாத இறுதியில் தொடங்கும் என்று பிரதமர் டத்தோஶ்ரீ நஜிப் அறிவித்துள்ளார்.

இந்நோக்கத்திற்காக 500 மில்லியன் ( 50 கோடி) ரிங்கிட் ஒதுக்கப் படவிருப்பதாகவும் ஒரு நபருக்கு 5,000 யூனிட் பங்குகள் மட்டுமே எனக் கட்டுப்பாடு விதிப்பதன் வழி  அதிகமான இந்தியர்கள் இதன் மூலம் பலனடைய வழிபிறக்கும் என்றும் என்றும் பிரதமர் நஜிப் தெரிவித்தார்.

லங்காவியில் நேற்று நடந்த 'தே தாரே' என்ற நிகழ்ச்சியில் அவர் கலந்து கொண்டு அவர் பேசினார். இந்நிகழ்ச்சியில் ஆயிரத்திற்கும் அதிகமான இந்தியர்கள் கலந்து சிறப்பித்தனர்.

ஏற்கெனவே இந்தியர்களின் மேம்பாட்டுக்கு உதவும் வகையில் அமானா சஹாம் சத்து மலேசியாவின் பங்குகளை வாங்குவதற்கு  150 கோடி ரிங்கிட் நிதித் திட்டத்தை பிரதமர் அறிவித்திருந்தார். ஒரு முதலீட்டாளருக்கு 30ஆயிரம்  யூனிட்டுகள் மட்டுமே விற்கப்படும் என்ற இந்தத் திட்டம் ஜனவரி 29 ஆம் தேதி தொடங்கியது.

தற்போது புதிதாக ஒதுக்கப்படவிருக்கும் வறுமைக் கோட்டிற்கு கீழே உள்ள இந்தியக் குடும்பங்களுக்கான திட்டம் சுமார் ஒரு லட்சம் இந்தியக் குடும்பங்களின் வாழ்க்கைத் தரத்தை உயர்ந்த உதவும் என்று பிரதமர் நஜிப் சொன்னார்.

 

 

 

 

 

 

அலோர்ஸ்டார், பிப் 16- உலுயாம் பாரு நீர் வீழ்ச்சிக்கு குளிக்கச் சென்றிருந்த போது நீர் மூழ்கி இறந்த மூன்று இந்திய இளைஞர்களில் சகோதர்களான இளம் நடிகர் நகுலன் மற்றும் பேச்சீஸ்வரன் ஆகிய இருவரையும் இழந்த துயரத்தில் கதறியழுதார் அவர்களின் தாயாரான 48  வயதுடைய குடும்ப மாது அன்பழகி.

தன்னுடைய பிறந்த நாளன்று இரு பிள்ளைகளைப் பறிகொடுத்து இருக்கிறார் அன்பழகி. 

காலையில் பிறந்த நாளுக்கு தாயாருக்கு வாழ்த்துக் கூறினார்கள். அதன் பிறகு பிற்பகலில் அவர்களின் மரணச் செய்தி தாயாருக்கு வந்த சேர்ந்த போது துயரத்தில் இடிந்து போனார் அன்பழகி. 

நகுலன்- பேச்சீஸ்வரன் ஆகியோரை இழந்து, அளவிட முடியாத துயரத்தில் தாயார் அன்பழகி மூழ்கி இருக்கிறார் என்று இந்த சகோதரர்களின் மாமாவான அறிவழகன் கூறினார்.

காலை 11.55 மணியளவில் நீரில் மூழ்கி விட்ட நகுலன், பேச்சீஸ்வரன் மற்றும் கணேசன் ஆகிய மூவரும் நண்பகல் 1.15 மணியளவில் தீயணைப்பு மற்றும் மீட்புப்படையினரால் மீட்கப்பட்டனர்.

 

 

 

 

 

 

 

 

 

 

 

 

 

 

கோலக் குபுபாரு பிப் 16- உலுயாம்பாரு சுங்கை சென்டுட் நீர் வீழ்ச்சிக்கு நண்பர்கள் குழுவுடன் குளிக்கச் சென்றிருந்த இளம் நடிகர் பா.நகுலன் (வயது 20) அவரது மூத்த சகோதரர் பா. பேச்சீஸ்வரன் (வயது25) மற்றும் அவர்களின் நண்பரான கணேசன் (வயது 23) ஆகியோர் நீரில் மூழ்கி இறந்தனர். இந்தச் துயரச் சம்பவம் இன்று காலையில்  நடந்தது.

நண்பர்களுடன் நீர் வீழ்ச்சியில் குளித்துக் கொண்டிருந்த தங்களது குழுவைச் சேர்ந்த இளம் பெண் ஒருவர், நீர் வீழ்ச்சியில் தத்தளிப்பதைக் கண்ட நகுலன் அவரைக் காப்பாற்ற நீரில் பாய்ந்தார்.  அந்தத் தோழியை அவர் காப்பாற்றி விட்டார் என்றாலும் அவர் நீர்ச்சுழற்சியில் சிக்கினார்.

இதனைக் கண்டு அதிர்ந்து போன நகுலனின் அண்ணன் பேச்சீஸ்வரனும் நண்பரான கிள்ளானைச் சேர்ந்த கணேசனும் நகுலனை மீட்க நீரில் குதித்தனர். பின்னர் துரதிஷ்டவசமாக அவர்களும் நீரில் மூழ்கி உயிரிழந்தனர்.

சைபர் ஜெயாவிலுள்ள நிறுவனம் ஒன்றில் பணி புரிந்து வந்த நகுலன், அலோர்ஸ்டாரைச் சேர்ந்தவர் ஆவார். நகுலனுடன் பிறந்தவர்கள் நான்கு சகோதரிகள் மற்றும் நான்கு சகோதரர்கள் என்று அவருடைய மாமாவான அறிவழகன் (வயது 35) தெரிவித்தார். 

சிறந்த நடிகராகத் திகழ வேண்டும் என்பதில் மிகுந்த ஆர்வம் கொண்ட நகுலன், ஆஸ்ட்ரோவும் "வணக்கம் மலேசியா"வும் இணைந்து நடத்திய மாணவர்களுக்கான ஓரங்க நாடகப் போட்டிகளில் கலந்து கொண்டு நடித்தவர் என்பது குறிப்பிடத்தக்கது. மேலும்,  வணக்கம் மலேசியா ஏற்பாட்டில் நடிகர் நாசர் நடத்திய நடிப்புப் பயிற்சிப் பட்டறை ஒன்றிலும் கலந்து கொண்ட நகுலனின் திறமையைக் கண்டு நடிகர் நாசர் அவரைப் பாராட்டி ஊக்குவித்தார்.

மேலும் அண்மையில் படப்பிடிப்பு நடந்து முடிந்த தொலைக்காட்சி படம் ஒன்றில் நகுலன் முக்கிய பாத்திரத்தில் நடித்துள்ளார். நீர் வீழ்ச்சியிவிருந்து மீட்கப்பட்ட இவர்களின் உடல்கள் கோலகுபுபாரு மருத்துமனைக்குக் கொண்டு வரப்பட்டு பிரேதப் பரிசோதனைக்குப் பிறகு சொந்த ஊரான அலோர்ஸ்டாருக்கு எடுத்துச் செல்லப்பட்டது. 

 

 

 

 

 

 

 

கோலாலம்பூர், பிப்.16- சீனப்புத்தாண்டு தினத்தை முன்னிட்டு  சீன தினசரிகளில் உள்நாட்டு வாணிப, கூட்டுறவு மற்றும் பயனீட்டாளர் அமைச்சு  வெளியிட்டிருந்த முழுப் பக்க வாழ்த்து விளம்பரங்களில் குரைக்கும் நாய் படத்திற்குப் பதிலாக குரைக்கும் சேவல் படத்தை பிரசுரித்ததற்காக அமைச்சு மன்னிப்புக்கேட்டுக் கொண்டுள்ளது.

உணமையில் சீனர்களுக்கு இந்ட்தப் புத்தாண்டு நாய்கள் ஆண்டாகும். ஆனால் அமைச்சு வெளியிட்டுள்ள விளம்பரத்தில் சேவல் ஒன்று 'வாங் வாங்' கத்துவது போன்ற படம், இடம் பெற்றுள்ளது. வாங் வாங் என்பது வளப்பத்தைக் குறிப்பதாகும்.

சீனர்களுக்கான நாய்கள் புத்தாண்டில் சேவல் இடம்பெற்றது குறித்து சமூக வலைத் தளங்களில் கடும் சர்ச்சை கிளர்ந்தது. சீன சமுதாயத்தில் பலருக்கு இந்த விளம்பரம் வாழ்த்துக் கூறுகிறது என்பதைக் காட்டிலும் குழப்பத்தை ஏற்படுத்தியது என்றே கருதப்பட்டது.

பின்னர் இது குறித்து தனது அதிகாரப்பூர்வ முகநூல் பக்கத்தில் அமைச்சு மன்னிப்புக் கேட்டுக்கொண்டுள்ளது. 

"தொழில் நுட்ப தவறு காரணமாக இது நடந்து விட்டது. இத்தகைய சீனப் புத்தாண்டு வாழ்த்து விளம்பரத்தை வெளியிட்டதற்காக அமைச்சு மில்லியன்  முறை மன்னிப்புக்  கேட்டுக்கொள்கிறது. அதேவேளையில் புத்தாண்டைக் கொண்டாடும் அனைத்து மலேசியர்களுக்கும் நல் வாழ்த்துகளைத் தெரிவித்துக்கொள்கிறோம்" அமைச்சின் முகநூல் பதிவு தெரிவித்திருக்கிறது.

நாய் ஆண்டுக்கு நாய் படத்திற்கு பதிலாக சேவல் படத்தை வெளியிட்ட விவகாரத்தில், எப்படி நடந்தது இந்தக் குழப்பம் என்பதற்கான விளக்கம் எதனையும் அமைச்சு வெளியிடவில்லை.

 

 

 

 

 

 

கோலாலம்பூர், பிப்.16- சீனப் புத்தாண்டை முன்னிட்டு மசீச ஏற்பாட்டில் இன்று நடந்த திறந்த இல்ல உபசரிப்பில் பிரதமர் டத்தோஶ்ரீ நஜிப் துன் ரசாக் சிறப்பு வருகை புரிந்தார். 

இன்று காலை 9.45 மணியளவில் தனது துணைவியார் டத்தின்ஶ்ரீ ரோஸ்மா மன்சோர் உடன் வருகை புரிந்த பிரதமரை மசீசவின் தலைவர் டத்தோஶ்ரீ லியாவ் தியோங் லாய் மற்றும் துணைத் தலைவர் டத்தோஶ்ரீ டாக்டர் வீ கா சியோங் ஆகியோர் வரவேற்றனர்.

மேடைக்கு வந்த பிரதமர், நாடு மற்றும் நாட்டு மக்களின் வளர்ச்சி மற்றும் சக்தியின் அடையாளமாக அங்கு வைக்கப்பட்டிருந்த பொன்சாய் செடிக்கு நீர் ஊற்றினார். பின்னர் டத்தோஶ்ரீ லியாவ் அந்த பொன்சாய் செடியை சீனப் புத்தாண்டு பரிசாக பிரதமருக்கே வழங்கினார்.

திறந்த இல்ல உபசரிப்பில் துணைப்பிரதமர் டத்தோஶ்ரீ அமாட் ஷாஹிட் ஹமிடி, மஇகா தேசியத் தலைவர் டத்தோஶ்ரீ எஸ்.சுப்ரமணியம், மைபிபிபி தலைவர் டான்ஶ்ரீ கேவியஸ், கெராக்கான் தலைவர் டத்தோஶ்ரீ மா சியு கியோங் ஆகியோர் கலந்து கொண்டனர். 

ஜோர்ஜ்டவுன், பிப்.16- உடனடி கோப்பிக் கலவை (Instant coffee mixture) காரணமாக பினாங்கு மருத்துவமனையில்  சிலர் சேர்க்கப்பட்டு  சிகிச்சை அளிக்கப்பட்டது தொடர்பில் சம்பந்தப்பட்ட நால்வரும் ஷாபு வகை போதைப்பொருளை உட்கொண்டிருந்தது தெரியவந்துள்ளதாக பினாங்கு போலீஸ் தலைவர் டத்தோ தெய்வீகன் கூறினார்.

இந்த போதைப்பொருள் தொடர்பான முடிவு கடந்த வாரமே கிடைத்து விட்டாலும் கோப்பித் தூளின் இராசயன முடிவு இன்னும் கிடைக்காததால் எந்த இறுதி முடிவையும் எடுக்க வில்லை என அவர் கூறினார். 

சம்பந்தப்பட்ட நால்வரின் ரத்த மற்றும் சிறுநீர் சோதனையில் அவர்கள் ஷாபு போதைப்பொருளை உட்கொண்டிருந்தது தெரிய வந்தது. ஆனால், அது சம்பந்தப்பட்ட உடனடி கோப்பி கலவையில் கலக்கப்பட்டிருந்ததா என்பது உறுதியாக தெரியவில்லை என அவர் மேலும் கூறினார்.

முன்னதாக, பெண் ஒருவரால் விற்கப்பட்ட கோப்பியைக் குடித்த ஐவர், மருத்துவமனையில் சேர்க்கப்பட்டு சிகிச்சை பெற்றுள்ளனர். இது 'டுரியான் வொய்ட் கோப்பி' எனக் கூறி அந்த கோப்பிக் கலவையை அப்பெண் விற்பனை செய்துள்ளார்.

More Articles ...