கோலாலம்பூர், டிசம்.10- இஸ்ரேலின் தலைநகரமாக ஜெருசலத்தை அங்கீரிக்கும் அமெரிக்காவின் முடிவுக்கு பதிலடி கொடுக்கும் நோக்கில் மெக்டொனால்ட் துரித உணவுக் கடைகளைப் புறக்கணிக்கும்படி சமூக ஊடகங்களில் நடக்கும் பிரசாரம் குறித்து மலேசியாவின் மெக்டொனால்ட் விற்பனை உரிமத்தைக் கொண்டிருக்கும் நிறுவனம் மிகுந்த கவலை தெரிவித்தது.

ஜெருசலம் விவகாரம் மீது அமெரிக்க எடுத்துள்ள முடிவு தொடர்பில், பல்வேறு அமெரிக்க நிறுவனங்களின் பொருள்களை புறக்கணிக்க வேண்டும் என்று மலேசியர்களிடையே சமூக ஊடகங்களில் பிரசாரம் மேற்கொள்ளப்படுகிறது. 

தங்களுடைய நிறுவனம், எந்தவொரு அரசியல் அல்லது சமயச் சர்ச்சைகளுக்கு ஆதரவாக செயல்பட்டது கிடையாது. இஸ்ரேலுக்கு மெக்டொனால்ட் நிறுவனம் நிதியதவி வழங்குகிறது என்ற பிரசாரங்களில் உண்மையில்லை. அது அப்பட்டான பொய். அப்பட்டமான அவதூறு என்று மலேசிய மெக்டொனால்ட் நிறுவனம் அறிக்கை ஒன்றில் கூறியுள்ளது.

பொறுப்பற்ற சிலர் இத்தகைய குற்றச்சாட்டுக்களை சமூக ஊடகங்களிலும் பரப்பி வருவது கவலை அளிக்கிறது என்று மலேசிய மெக்டொனால்ட் நிறுவனம் நிர்வாக இயக்குனர் அஸ்மிர் ஜபார் தெரிவித்தார்.

 

 

 

 

 

 

 

 

 

 

 

 

 

 

 

கோலாலம்பூர், டிசம். 2017ஆம் ஆண்டுக்கான கிள்ளான் நகர் அனைத்துலக நெடுந்தூர ஓட்டப்போட்டியின் போது சக ஓட்டக்காரர்களை வழிநடத்திச் சென்ற இரு முன்னோடி ஓட்டப்பந்தய வீரர்களின் மீது கார் மோதியதால் ஒருவரின் நிலை கவலைக்கிடமாக உள்ளது.

இன்று ஞாயிற்றுக் கிழமை அதிகாலையில், முன்னோடி ஓட்ட வீராங்கனையான எவிலின் ஆங் என்பவரையும் மேலுமொரு ஓட்டக்காரரையும் பின்புறமாக வந்த கார் ஒன்று மோதியது என்று கிள்ளான் நகராண்மைக் கழகத்தின் முகநூல் கூறியது.

நெடுந்தூரப் போட்டியின் போது ஜாலான் காப்பார் பத்து டுவாவில் காப்பாரை நோக்கிச் சென்று கொண்டிருந்த அந்தக் கார் இவர்களை மோதியது.

கடுமையான காயத்திற்குள்ளான எவிலின் ஆங் தற்போது சுங்கை பூலோ மருத்துவமனைக்கு மாற்றப்பட்டு சிகிச்சை அளிக்கப்பட்டு வருகிறார். சம்பந்தப்பட்ட காரோட்டி, குடித்திருந்ததாக தெரியவந்துள்ளது. இந்த காரோட்டியிடம் நடத்தப்பட்ட தொடக்கப் பரிசோதனையில் அவர் மது அருந்தி இருந்தது கண்டுபிடிக்கப்பட்டுள்ளது. 

தலையில் கடுமையான காயத்திற்குள்ளான எவிலின் ஆங்கின் மூளையில் இரத்தக் கசிவு ஏற்பட்டுள்ளதால் அவரது நிலைமை கவலக்கிடமாக உள்ளது என்று குறிப்பிட்ட கிள்ளான் நகராண்மைக் கழகத்தின் முகநூல், மேலும் அவர் நலமடைய பிரார்த்திக்குமாறும் வேண்டுகோள் விடுத்துள்ளது.

இந்த நெடுந்தூர ஓட்டப் போட்டியின் போது நடந்த விபத்து குறித்து வட கிள்ளான் ஓசிபிடி மாஸேலான் பைஜான் உறுதிப்படுத்தினார்.

 

 

குவாந்தான், டிசம்.10- குவந்தான் நகரில் ஜாலான் செமாம்பு என்ற இடத்திலுள்ள பெட்ரோல் நிலையத்திற்கு பின்புறம் இருக்கும் ஒரு திறந்தவெளிப் பகுதியில் இருந்து மூன்று எறிகுண்டுகளைப் போலீசார் கைப்பற்றியுள்ளனர்.

இராணுவத்திற்குச் சொந்தமானது என்று நம்பப்படும் இந்த எறிகுண்டுகள், மிகப் பழமையானவை என்பதோடு முன்பு இராணுவ முகாமில் பயிற்சிக்குப் பயன்படுத்தப் பட்டவையாக அவை இருக்கக்கூடும் என்று அவர்கள் தெரிவித்தனர்.

கட்டுமானத் தொழிலாளி ஒருவர் இந்தக் குண்டுகளைக் கண்டுபிடித்து போலீசுக்கு தகவல் கொடுத்ததை அடுத்து, அந்த இடத்திற்கு வெடிகுண்டு அகற்றும் நிபுணர்கள் குழு  உடனடியாக அனுப்பப்பட்டது. 

பின்னர், இதனை ஆராய்ந்ததில்  இவை பழைய குண்டுகள் எனத்தெரிய வந்தன. இதனால் ஆபத்து எதுவும் இல்லை என்ற போதிலும் அவற்றை பின்னர் வெடிகுண்டு நிபுணர்கள் அழித்துவிட்டனர்.

 

 

கோலாலம்பூர், டிசம்.10- இங்கு டாங் வாங்கியிலுள்ள ஆடம்பர அடுக்குமாடி வீட்டின் 20-ஆவது மாடியிலிருந்து கீழே விழுந்து வெளிநாட்டைச் சேர்ந்த இளம் மாடல் அழகி ஒருவர் மாண்டார்.

இந்த அடுக்குமாடி வீட்டின் 6ஆவது மாடியிலுள்ள பால்கனி மீது, 19 வயதுடைய ஹாலந்து மாடல் அழகியான இவானா எஸ்தர் என்பவரின் உடல் அரைநிர்வாணக் கோலத்தில் கிடந்ததாக டாங் வாங்கி போலீஸ் நிலைய துணை ஆணையர் ஷகாருடின் அப்துல்லா கூறினார்.

மது மயக்கம் காரணமாக 20ஆவது மாடியின் பால்கனியில் இருந்து இவானா தவறி விழுந்திருக்கக்கூடும் என்றும் அப்படி விழும் போது அவர் 6ஆவது மாடியின் பால்கனி கூரை மீது விழுந்து உயிரிழந்திருக்கலாம் என்றும் தெரியவருகிறது.

ஹாலந்து மற்றும் பெல்ஜியம் ஆகிய இருநாடுகளின் குடியுரிமையையும் கொண்டிருக்கும் இவர் கடந்த 2014ஆம் ஆண்டில் கோலாலம்பூரில் நடந்த சூப்பர் மாடல் தேர்வுப் போட்டி ஒன்றில் இவானா மூன்றாவது இடத்தை பிடித்தார். அப்போது வருக்கு வயது 15 என்பது குறிப்பிடத்தக்கது.

இவானாவின் மரணத்தில் சந்தேகிக்கும் படியான குற்ற அம்சங்கள் எதுவுமில்லை என்றும் இதுவொரு திடீர் விபத்து மரணம்தான் என்றும் துணை ஆணையர் ஷகாருடின் சொன்னார்.

 

செனாய், டிசம்.10- ஜொகூர் பாருவில் ஐந்து வெவ்வேறு இடங்களில் நடத்தப்பட்ட சோதனை நடவடிக்கைளின் போது சுமார் 42 ஆயிரம் ரிங்கிட் மதிப்புடைய குழந்தைகளுக்கான போலிப் பால் பவுடர் அடங்கிய 210 பெட்டிகளை அதிகாரிகள் கைப்பற்றி உள்ளனர்.

இங்குள்ள இஸ்கந்தார் புத்ரி, தாமான் முத்தியாரா ரினி, தாமான் ஆர்க்கிட், தாமான் டாயா மற்றும் தாமான் நூசா பெஸ்தாரி ஆகியவற்றிலுள்ள சீனர் மருந்துக் கடை மற்றும் இதர மளிகை கடைகளில் இருந்து இந்த போலிப் பால் பவுடர்களை ஜொகூர் உள்நாட்டு வாணிப, பயனீட்டாளர் துறை அமைச்சின் அதிகாரிகள் மீட்டதாக அமைச்சின் மாநில இயக்குனர் கைருல் அன்வார் பாச்சோக் கூறினார்.

குழந்தைகளுக்கான பால் பவுடர் தயாரிக்கும் நிறுவனம் ஒன்றின் உதவியுடன் இந்தச் சோதனை நடவடிக்கைகள் மேற்கொள்ளப்பட்டன. இந்தப் போலிப் பால் பவுடர் பாலை அருந்தியதால் தங்களின் குழந்தை வாந்தியெடுக்க நேர்ந்ததாக பெற்றோர் புகார் செய்ததை அடுத்து உடனடி நடவடிக்கை எடுக்கப்பட்டதாக அவர் சொன்னார். 

 

 

கோலாலம்பூர், டிச.9- நெடுஞ்சாலை குறியீடு புத்தகங்களின் பற்றாக்குறை நிலவுவதால், சிலாங்கூரைச் சேர்ந்த 20க்கும் மேற்பட்ட கார் ஓட்டும் பயற்சி நிலைய மாணவர்களான 6,000 பேர் வாகனம் ஓட்டும் சோதனை எழுத முடியாமல் தவிக்கின்றனர்.  

இந்த நெடுஞ்சாலை குறியீடு புத்தகங்கள் இல்லாததால், கார் ஓட்டும் பயிற்சியில் ஈடுபட்டிருந்த போதிலும், சோதனை செய்யாத காரணத்தால், அம்மாணவர்களுக்கு 'எல் உரிமம்' கூட கிடைக்கவில்லை என்று பெற்றோர்கள் பலர் எரிச்சலடைந்துள்ளனர். 

கடந்த அக்டோபர் மாதம் தொடங்கி தனது மகள் இந்தக் கார் ஓட்டும் பயிற்சியில் ஈடுபட்டு வருவதாகவும், இந்தக் குறியீடு புத்தகப் பற்றாக்குறையினால், தன் மகள் இணையம் வாயிலான அந்தச் சோதனையை எடுக்க முடியாமல் தவித்து வருகிறார் என்று ரோஸ்  தெரிவித்தார்.

அந்தக் கார் ஓட்டும் பயிற்சி நிலையத்தில் மறுசுழற்சி செய்யப்பட்ட புத்தகங்கள் பயிற்சியில் ஈடுபட்டிருக்கும் மாணவர்களுக்கு வழங்கப்பட்டிருந்த போதிலும், அவர்களுக்கான சொந்தப் புத்தகம் கிடைக்கப் பெற்ற பின்னரே, மாணவர்கள் அந்த்ச் சோதனையை எழுத முடியும்.

ஒவ்வொரு புத்தகத்தின் மீதும் ஓர் எண் கொடுக்கப்படும். சோதனை எழுதுவதற்கு அந்த எண்ணை இணையத்தில் உள் நுழைவதற்கு பயன்படுத்த வேண்டும். ஏற்கனவே உபயோகப்படுத்தப்பட்ட எண்களைக் கொண்டு அவர்கள் உள் நுழைய முடியாது. 

"என் மகள் பல்கலைக்கழகம் செல்வதற்கு முன்பு, அவள் வாகன உரிம்ம் பெற்றுக் கொள்ள வேண்டும் என்று நான் எதிர்பார்க்கின்றேன். இந்த வாகனப் பயிற்சிக்காக மொத்தக் கட்டணத்தையும் நான் செலுத்தி விட்டேன். ஆனால், என் மகளுக்கு எல் லைசன்ஸ் கூட கிடைக்கவில்லை" என்று 'தி ஸ்டார்' ஆங்கில நாளிதழிடம் ரோஸ் தெரிவித்தார். 

எஸ்.பி.எம் தேர்வை எழுதி முடித்தும் தன் மகன் வாகனம் ஓட்டும் பயிற்சிக்கு தன்னை பதிவு செய்துக் கொண்ட போதிலும், இந்தப் பிரச்சனையால் அவனால் வாகன உரிம்ம் பெற முடியவில்லை என்று 50 வயதான ரேய் குறைப்பட்டுக் கொண்டார். 

கடந்த ஜூன் மாதத்திலிருந்து சாலை போக்குவரத்துத் துறை இந்தப் புத்தகங்களை தங்களுக்கு சரிவர அனுப்பவில்லை என்று வாகனம் ஓட்டும் பயிற்சி நிலைய உரிமையாளர் ஒருவர் தகவல் தெரிவித்தார்.

நிதியமைச்சு மற்றும் இந்தப் புத்தகங்களை அச்சடிக்கும் நிறுவனத்திற்கும் இடையில் எழுந்துள்ளா பிரச்சனையின் காரணத்தால் இந்தப் பற்றாக்குறை நிலவுகிறது என்று அவர் சொன்னார். 

இதனிடையில், இந்தப் பயிற்சி நிலையத்தில், அந்தப் புத்தகங்களை தங்களின் இஷ்ட்த்திற்கு தங்களிடம் பதிவோரிடம் தருவதால் இந்தப் பிரச்சனை எழுந்துள்ளதாக சாலை போக்குவரத்து துறை கூறியது. 

அந்தப் புத்தகங்கள் அச்சடிக்கப்பட்டு வருவதாகவும், தவணை முறையில் அந்தப் புத்தகங்கள் இந்தப் பயிற்சி நிலையங்களுக்கு பகிர்ந்தளிக்கப்பட்டு வருவதாக சாலை போக்குவரத்து துறையின் துணை நிர்வாக இயக்குநர் டத்தோ வான் அகமட் உஸீர் சொன்னார்.  

"பிரபலமான பயிற்சி நிலையங்களில் தான் இந்தப் பற்றாக்குறை நிலவுகிறது. இந்த நிலையங்களில் பலர் தங்களைப் பதிவு செய்து கொள்கிறார்கள். அதனால்தான், இந்தக் குறியீடு புத்தகப் பற்றாக்குறை நிலவுகிறது" என்று வான் அகமட் மேலும் சொன்னார்.

 

 ஷா ஆலாம், டிச.9- நேற்று காலை மணி 9.40-க்கு கம்போங் ஜாவா என்ற பகுதியில், பெண் ஒருவர் கடத்தப்படும் சிசிடிவி பதிவின் வீடியோ சமூக வலைத்தளங்களில் பரவலாகி வருகிறது. அந்த வீடியோவின் நம்பகத்தன்மையை போலீசார் உறுதிப்படுத்தியுள்ளனர். 

'KEE46' என்ற எண் பட்டைக் கொண்ட மெர்செடிஸ் பென்ஸ் ரகக் காரில் வந்த ஆடவன் ஒருவன், அந்த நடுத்தர வயதுடையை பெண்ணை கடந்திச் சென்றுள்ளதாகவும், அந்த கார் அல்லது அந்த ஆடவன் குறித்து தகவல் தெரிந்தவர்கள் உடனடியாக தங்களைத் தொடர்புக் கொள்ளுமாறு அந்தப் பெண்ணின் குடும்பத்தினர் வாட்ஸாப் புலனத்தில் அந்த வீடியோவை பகிர்ந்து தகவல் வெளியிட்டுள்ளனர்.  

ஒரு தொழிற்சாலையின் முன்புறம் நின்றிருந்த அந்தக் காரை நோக்கி கடத்தப்பட்ட அந்தப் பெண்மணி நடந்துச் செல்கிறார். அங்கு நின்றிருந்த ஆடவன் ஒருவன், அவரிடம் ஏதோ ஒரு பொட்டலத்தை தருகிறான். அதை அந்தப் பெண் கையில் வாங்கும் போது, அவன் அவரை பிடித்து அந்தக் காரினுள் தள்ளுகிறான்.

அதுவரை மூடப்பட்டிருந்த அந்தக் காரின் கதவு, உள்ளிலிருந்து திறக்கப்பட்டு, அந்தப் பெண்ணை உள்ளே இருந்த யாரோ ஒருவர் வழுக்கட்டாயமாக இழுக்கும் காட்சிகளை அந்தத் தொழிற்சாலையின் சிசிடிவி காமிரா பதிவு செய்துள்ளது.  

அச்சம்பவம் குறித்து, அந்தப் பெண்ணின் உறவுக்காரரும், அந்தத் தொழிற்சாலையின் மேலாளரும் ஶ்ரீ மூடா காவல் நிலையத்தில் புகார் கொடுத்துள்ளதாக அந்தப் பெண்ணின் சகோதரர் எஸ்.நந்தா கூறினார்.  

"காலை 8 மணிக்கு வேலைக்குச் சென்ற என் அக்கா இதுவரை வீடு திரும்பவில்லை. எங்களுக்கு பயமாக இருக்கிறது. அவர் குறித்த தகவல் அறிந்தவர்கள் உடனடியாக எங்களைத் தொடர்புக் கொள்ளுங்கள்" என்று நந்தா கேட்டுக் கொண்டுள்ளார். இச்சம்பவம் குறித்து விசாரணை மேற்கொள்ளப்பட்டு வருவதாக ஷா ஆலாம் ஓசிபிடி துணை ஆணையர் ஷஃபியன் மாமாட் தெரிவித்தார். 

 

 

More Articles ...