புனித வெள்ளி என்பது கிறிஸ்துவர்கள் இயேசு கிறிஸ்து அனுபவித்த துன்பங்களையும் சிலுவைச் சாவையும் நினைவுகூர்ந்து ஒவ்வொரு ஆண்டும் அனுசரிக்கின்ற ஒரு நாளாகும். கிறிஸ்துவ வழிபாட்டு ஆண்டில் முக்கியமான இந்த நாள், இயேசு உயிர்த்தெழுந்த ஞாயிறு கொண்டாட்டத்திற்கு முந்தைய வெள்ளிக்கிழமை அனுசரிக்கப்படும். இயேசு கல்வாரி மலையில் சிலுவையில் அறையப்பட்டதை நினைவுகூர்கின்ற இந்நாளின்போது தேவாலயங்களில் சிறப்பு வழிபாடுகள் நடைபெறும். கி.பி 33 - 34ஆம் ஆண்டுகளிடையில் இயேசு இறந்திருக்கலாம் என்று பல அறிஞர்கள் கணிக்கின்றனர். 

இயேசு மனித குலம் முழுவதையும் பாவத்திலிருந்து மீட்பதற்காகவும், இறைவாழ்வை மனிதருக்கு அளிப்பதற்காகவும் பல துன்பங்கள் அனுபவித்து சிலுவையில் இறந்தார் என்பது கிறிஸ்துவர்களின் நம்பிக்கை. இந்நம்பிக்கைக்கு முக்கிய ஆதாரமாக இருப்பது விவிலிய நூல்களே.

புனித வெள்ளியன்று தேவாலயங்களில் நிகழும் ஒரு முக்கிய விசயம் சிலுவைப் பாதையாகும். தேவாலய அதிகாரபூர்வ வழிபாட்டில் இது இல்லாவிட்டாலும், கிறிஸ்துவர்கள் விரும்பி நடத்துகின்ற இந்த சிலுவைப் பாதை ஒரு இறைவேண்டலாகும். இயேசு அனுபவித்த துன்பங்களோடு மக்கள் தங்களையே ஒன்றுபடுத்திக்கொண்டு, மனத் துயர் கொண்டு, இனிமேல் நல்ல வாழ்க்கை வாழ்வதற்கு கடவுளின் அருளை இறைஞ்சுகின்ற வாய்ப்பாக இந்த சிலுவைப் பாதையை கிறிஸ்துவர்கள் எண்ணுகின்றனர்.

இயேசுவின் இறுதி நாட்களை விவிலியத்தில் உள்ள நற்செய்தி வாசகங்களில் இருப்பதை நாம் பார்க்கலாம். விவிலிய சான்றுகளை இன்றுவரை கிறிஸ்துவர்கள் பின்பற்றி வருகின்றனர்.

மக்களுக்கு பல அற்புதங்களை நிகழ்த்தி போதித்து வந்த இயேசுவை கொலை செய்யவேண்டும் என்று யூத மத போதகர்கள் திட்டம் தீட்டி வந்தார்கள். இயேசுவின் சீடரான யுதாஸ் இஸ்காரியோத்து என்பவன் அவரைக் காட்டிக் கொடுக்க அவர்களிடம் 30 வெள்ளிக் காசுகளைப் பெற்றான். பிறகு, எருசலேம் கெத்சமனி தோட்டத்தில் கோவில் காவலர்கள் இயேசுவைக் கைது செய்தனர். முதலில் அன்னாஸ் என்பவரும் பிறகு எருசலேம் கோவில் தலைமைக் குருவும் இயேசுவை விசாரித்தனர். ஆனால், இயேசு அவர்களிடம் ஒன்றும் கூறாமல் மௌனம் காத்தார்.

பிறகு உரோமை ஆளுநர் போந்தியுஸ் பிலாத்து என்பவரிடம் கொண்டு சென்றனர். விசாரணைக்குப் பின், இயேசுவை குற்றமற்றவர் என்று பிலாத்து தீர்ப்பிட்டார். ஆனால், மக்கள் அதை ஏற்க மறுத்ததால், இயேசுவைக் கசையால் அடிக்கச் செய்து அவரை விடுதலைச் செய்ய பிலாத்து முனைந்தார். அப்போதும் அமைதி அடையாத மக்கள் இயேசுவை சிலுவையில் அறைய வேண்டும் என்று கூச்சலிட்டனர். 

மக்கள் கலவரம் செய்தால் தனது ஆளுநர் பதவி பறிப்போய்விடும் என்ற அச்சத்தில் இயேசுவை சிலுவையில் அறைய பிலாத்து உத்தரவிட்டான். பிலாத்து “இவனது இரத்தப் பலியில் எனக்குப் பங்கில்லை” என்று கூறியதாக விவிலியச் சான்றுகள் தெரிவிக்கின்றன. காவலர்கள் இயேசுவின் தலையில் முள்முடியை அணிவித்து அவரை அடித்து துன்புறுத்தி, அவர் மீது சிலுவையைச் சுமத்தி கல்வாரி மலைக்கு நடக்கச் செய்தனர். அந்த இடத்திற்கு வந்ததும் இயேசுவைச் சிலுவையில் அறைந்தார்கள். அவருடைய வலப்புறத்திலும் இடப்புறத்திலுமாக இரண்டு திருடர்களையும் சிலுவையில் ஏற்றினார்கள். சில மணி நேரங்களுக்குப் பிறகு இயேசு கடவுளிடம் பிரார்த்தனைச் செய்தபின் உயிர் நீத்தார்.

இதுவே விவிலிய நற்செய்தி நூல்கள் இயேசுவின் துன்பங்கள் பற்றியும் சிலுவையில் அறையப்பட்டது பற்றியும் தரும் சான்றுகளின் சுருக்கம்.

"அங்க பாரு பாம்பு 'ஏப்ரல் ஃபூல்", இங்க பாரு டீச்சர் வராங்க 'ஏப்ரல் ஃபூல்" என்று ஆரம்பப்பள்ளி காலங்களில் அருகில் இருக்கும் நண்பர்களை ஏமாற்றுவதில் அலாதி ஆனந்தம் நமக்கு. இன்று சிறிது முதிர்ச்சியடைந்த பிறகு இதனைக் கண்டுக்கொள்ளாது போனாலும், ஏப்ரல் ஒன்றாம் தேதி ஏன் இந்த தினத்தைக் கொண்டாடுகிறார்கள் என்ற சந்தேகம் இன்னும் பலருக்கு இருந்து கொண்டே இருக்கும். 

எப்படி இந்த 'முட்டாள்கள் தினம்' உருவானது? எங்கு தொடங்கியது? இதோ சில அலசல்.

ஏப்ரல் ஃபூல் எவ்வாறு எப்போது ஆரம்பமானது என்பதில் தெளிவான வரலாறு இல்லாதபோதும் பிரான்ஸ் நாட்டில் தான் இது முதன்முதலில் தொடங்கப்பட்டது எனத் தெரியவருகிறது. 16ம் நூற்றாண்டு வரை ஐரோப்பாவின் பல நாடுகளில் ஏப்ரல் ஒன்றாம் தேதி புத்தாண்டு தினமாக கொண்டாடப்பட்டு வந்தது. பின்னர் 1562-ஆம் ஆண்டுகளில் அப்போதைய போப்பாண்டவரான 13-ஆவது கிரகரி, பழைய ஜூலியன் ஆண்டுக் கணிப்பு முறையை ஒதுக்கி புதிய கிரிகோரியன் ஆண்டுக் கணிப்பு முறையை நடைமுறைப்படுத்தினார். 

இதன்படி ஜனவரி முதலாம் தேதி தான் புத்தாண்டு ஆரம்பமாகின்றது. (இன்று நாம் ஆங்கில புத்தாண்டு என்று கொண்டாடுகிறோமே அது தான் இது) எனினும் இந்த “புதிய” புத்தாண்டு தினத்தை ஐரோப்பிய நாடுகளும், அவற்றின் மக்களும் உடனே ஏற்றுக் கொள்ளவில்லை. 

அதற்குச் சில காலம் எடுத்தது. பிரான்ஸ் 1852-ஆம் ஆண்டிலும், ஸ்கொட்லாந்து 1660-ஆம் ஆண்டிலும், ஜெர்மனி, டென்மார்க், நோர்வே போன்ற நாடுகள் 1700-ஆம் ஆண்டிலும், இங்கிலாந்து 1752-ஆம் ஆண்டிலும் தான் இந்தப் புதிய புத்தாண்டு தினத்தை அதிகாரப்பூர்வமாக ஏற்றுக் கொண்டன. தொடக்கத்திலேயே புதிய வழக்கத்தை ஏற்றுக் கொண்டு ஜனவரி முதலாம் திகதியை புத்தாண்டாகக் கொண்டாடத் தொடங்கிய மக்கள், பழைய வழக்கில்  ஏப்ரல் முதல் தேதியைப் புத்தாண்டாக கொண்டாடியவர்களை 'ஏப்ரல் முட்டாள்கள்' என்று அழைத்தார்கள். 

இதலிருந்து தான் ஏப்ரல் முட்டாள்கள் தினம் ஆரம்பமாயிற்று என்பது பலராலும் ஏற்றுக் கொள்ளப்பட்டது என்று ஒரு ஆய்வின் மூலம் தெரியவருகிறது. இதைத் தவிர்த்து பல காரணங்கள் கூறப்பட்டாலும் அதற்குச் சான்றுகள் நிறுவப்படவில்லை.

எது எப்படியோ மற்றவர்களை ஏமாற்றி நாம் சந்தோசப்படுவதற்கு என்று ஒரு நாளை ஒதுக்கிய ஐரோப்பா மக்களுக்கு நன்றிங்க..

கோலாலம்பூர், மார்ச் 8- 1789 ஆம் ஆண்டு ஜூன் 14 ஆம் திகதி சுதந்திரத்துவம், சமத்துவம், பிரநிதிநித்துவம் என்ற கோரிக்கைகளை முன்வைத்து பிரெஞ்சுப் புரட்சியின் போது பாரிஸில் உள்ள பெண்கள் போர்க்கொடி உயர்த்தினர்.

ஆணுக்கு நிகராக பெண்கள் இந்தச் சமுதாயத்தில் உரிமைகள் பெற வேண்டும் என்றும், வேலைக்கேற்ற ஊதியம், எட்டு மணிநேர வேலை, பெண்களுக்கு வாக்குரிமை, பெண்கள் பெண்ணடிமைகளாக நடத்தப்படுவதிலிருந்து விடுதலை வேண்டும் என்றும் பெண்கள் கிளர்ச்சிகளில் ஈடுபட்டனர்.

புயலாகக் கிளம்பிய பூவையரை துரும்பாக எண்ணிய அந்நாட்டு அரசன் இடியென முழங்கி, இவர்களை என் அதிகாரம் கொண்டு அடக்குவேன் என்றும், ஆர்ப்பாட்டத்தில் ஈடுபடுவோரைக் கைது செய்வேன் எனவும் அறிவித்தான்.

அரச மாளிகை முன்பு ஆர்ப்பாட்டத்தில் ஈடுபட்ட அனைவரையும் கைது செய்வோம் என்று மிரட்டிய அரசனின் மெய்க்காப்பாளர் இருவரையும் திடீரென கூட்டத்தினர் பாய்ந்து தாக்கிக் கொன்றனர். இதை எதிர்பாராத அரசன் அதிர்ந்து போனான். கோரிக்கைகளை கண்டிப்பாக பரிசீலிப்பேன். உங்களுக்குச் சாதகமாக அறிவிப்பேன் என்று ஆர்ப்பாட்டத்தில் கொதித்தெழுந்தவர்களைச் சமாதானப் படுத்தினான்.

இயலாது போகவும், அரசன் லூயிஸ் பிலிப் முடிதுறந்தான். இந்தச் செய்தி ஐரோப்பிய நாடுகளில் வேகமாகப் பரவிட அங்கும் பெண்கள் போராட்டங்களில் ஈடுபட்டனர். தொடர்ந்து கிரீஸில் லிசிஸ்ட்ரடா தலைமையில் ஜெர்மனி, ஆஸ்திரியா, டென்மார்க் நாடுகளைச் சேர்ந்த பெண் பிரதிநிதிகள் கலந்துகொண்டு தொடர் போராட்டங்களில் ஈடுபட ஆளும் வர்க்கம் அசைந்து கொடுக்கத் தொடங்கியது.

இத்தாலியிலும் பெண்கள் இதுதான் சமயம் என்று தங்களது நீண்டநாள் கோரிக்கையான வாக்குரிமையைக் கேட்டு ஆர்ப்பாட்டங்களில் இறங்கினர். பிரான்சில், புருஸ்ஸியனில் இரண்டாவது குடியரசை நிறுவிய லூயிஸ் பிளாங்க், பெண்களை அரசவை ஆலோசனைக் குழுக்களில் இடம்பெறச் செய்யவும் பெண்களுக்கு வாக்குரிமை அளிக்கவும் ஒப்புதல் தந்தான். அந்த நாள் 1848 ஆம் ஆண்டு மார்ச் 8ம் நாளாகும். அந்த மார்ச் 8 ஆம் நாள் தான் அனைத்துலக பெண்கள் நாள் உலகெங்கும் அமைய ஒரு வித்தாக அமைந்தது.

கோலாலம்பூர், பிப்ரவரி 21-   ஒரு மனிதனும்  பேசும் முதல் மொழிக்கு அவனுடைய தாய்தான் முதல் ஆசிரியை. அதுவே அவனது தாய்மொழியும் ஆகும்.  கடந்த 1999-ஆம் ஆண்டு முதல், ஒவ்வொரு பிப்ரவரி 21-ஆம் தேதியும்  உலகத் தாய்மொழி தினம் கொண்டாடப்படுகிறது.  

சிறந்த கல்வி, வேலை, துறைசார்ந்த நிபுணத்துவத்தை அனைத்துலக நிலையில் வளர்த்துக்கொள்ள வேண்டியதன் அவசியம் உள்ளிட்ட பல்வேறு காரணங்களுக்காக தாய்மொழியை விட  உலகமொழியான ஆங்கிலத்திற்கு அதிக முக்கியத்துவம் கொடுக்கிறோம்.   இதனால்,   உலகில் ஏறக்குறைய 7000  மொழிகள்  இருந்தாலும் அவைகளுள் பல மொழிகள் அழிந்து வருவதற்கு  தாய்மொழியைவிட  உலகமொழிக்குக் கொடுக்கும் முக்கியத்துவமே காரணமாகக் கூறப்படுகிறது.

எனினும் என்னத்தான் நாம் உலக மொழிக்கு முக்கியத்துவம் கொடுத்தாலும்,  தாய் மொழி மட்டுமே, அம்மொழி சார்ந்த மக்களின் வாழ்வியல் கூறுகளை, பண்பியல் தொன்மைகளை, புறவியல் ரீதியாகவும் அகவியல் ரீதியாகவும் உள்வாங்கி உயரச் செய்கிறது. மொழியை இழந்தவன் செத்த பிணத்துக்கு சமன் என்று கூறுவார்கள்.

அவ்வாறு, வங்க மொழியைக் காக்க உயிர் நீத்த மாணவர்களின் நினைவாக, ஆண்டுதோறும் பிப்ரவரி 21-ஆம் தேதி உலகத் தாய்மொழி தினம் கொண்டாடப்படுகிறது. 

கடந்த, 1946ல், உருதுமொழியை அலுவல் மொழியாக பாகிஸ்தான் அரசு அறிவித்தது. ஆனால் கிழக்கு பாகிஸ்தானில் பெரும்பான்மையாக இருந்த வங்காளிகள், வங்க மொழியையும் தேசிய மொழியாக அறிவிக்க வேண்டும் என்று போராட்டத்தில் குதித்தனர்.

டாக்கா பல்கலைக்கழகம் பொரியியல் கல்லூரி, மருத்துவக்கல்லூரி மற்றும் பல்வேறு கல்வி நிறுவனங்களில் பயிலும் மாணவர்கள், இந்த போராட்டத்தை தலைமையேற்று நடத்தினர். தாய்மொழி காக்க திரண்ட மாணவர்கள் மீது பாகிஸ்தான் அரசு துப்பாக்கிச் சூடு நடத்தியது. அதில் நான்கு மாணவர்கள் உயிரிழந்தனர்.

பொதுமக்கள், இளைஞர்கள் போராட்டத்தை தீவிரப்படுத்தியதையடுத்து, உருது மற்றும் வங்காளம் ஆகிய இரு மொழிகளும், அலுவலக மொழியாக அங்கீகரிக்கப்பட்டன. அதன் தொடர்ச்சியாக பாகிஸ்தானில் இருந்து கிழக்கு பாகிஸ்தான் பிரிந்து, வங்காளதேசம் உருவானது.

வங்க மொழி காக்க உயிர் நீத்த மாணவர்களின் நினைவு நாளான, பிப்ரவரி 21 உலக தாய்மொழி நாளாக கொண்டாட வேண்டும் என, வங்கதேசம், 28 நாடுகளின் ஆதரவுடன், ஐ.நா சபையில் கோரிக்கை வைத்தது. கோரிக்கை ஏற்கப்பட்டு, ஆண்டுதோறும் உலக தாய்மொழி தினம், பிப்ரவரி 21ல் கொண்டாடப்படுகிறது.

மலேசியாவைப் பொறுத்தவரை தமிழர்களின் தாய்மொழியைக் கட்டிக்காக்கும் முக்கிய அம்சமாகத் திகழ்ந்து வருகின்றன. அதோடு, வானொலி,  தொலைகாட்சி ஊடகங்களும், உயர்க்கல்விக்கல்விக்கூடங்களில் ஒரு துறையாகவும், இலக்கியத் துறை வளர்ச்சியிலும்  தமிழ் மொழி இடம்  பெற்றிருப்பது முக்கிய அம்சமாகும்.

எனினும், இந்நிலை தொடர்ந்து  நீடிக்க வேண்டும். ஆண்டுதோறும்  பிள்ளைகளைத் தமிழ்ப்பள்ளியில் சேர்க்கவேண்டும் என பல்வேறு சமூக இயக்கங்கள் வலியுறுத்தி வருகின்றன. எனினும்,  "அம்மா’ ‘அப்பா’ என்று முதலில் சொல்லி கொடுக்குமிடம்  நம்  வீடுதான். 

தாய்மொழியை நேசிக்கும் பண்புதனை அடுத்தடுத்த தலை முறைக்குக் கொண்டு செல்லவேண்டும். நமது முன்னோர்கள், காலகாலமாய் கையில் ஏந்தி வந்து நம்மிடம் ஒப்படைத்த தாய்மொழி என்கிற தீபத்தை, நமது பிள்ளைகளிடம் நாம் ஒப்படைக்கக் கடமைப் பட்டுள்ளோம்.

தாய்மொழி தினத்தில் தமிழ்மொழி பயன்பாட்டை விதைப்போம். 

 

 

இதோ அதோ என நெருங்கி விட்டது காதலர் தினம். சமூக வலைதளங்கள், கடைகள், பேரங்காடிகள், என எங்கெங்கு காணினும் காதல் ஜுரத்தின் வெப்பத்தை உணர முடிகிறது.   இப்படி உருகி உருகி காதலிக்கும் அன்பர்களே,  இந்த நாளை உருவாக்கித் தந்த அந்த மகான் "வேலண்டைன் " பற்றி கொஞ்சம் தெரிந்துகொள்ள வேண்டாமா? 

பிப்ரவரி 14ம் தேதி மத்திய இங்கிலாந்தில் பறவைகள் மூலம் ஜோடிகளைத் தேர்வு செய்த ஆங்கிலேய பழமைவாதிகளின் இந்த நாளையே காதலர் தினமாக கொண்டாடுவதாக சிலர் கூறுகின்றனர். இருப்பினும், ரோமானிய அரசனின் ஆட்சிக் காலத்தில்தான் காதலர் தின கொண்டாட்டம் துவங்கியதற்கான சான்றுகள் உள்ளதாக வரலாற்று ஆய்வாளர்கள் கூறுகின்றனர். கிளாடிஸ் மிமி ஆட்சி புரிந்தபோது, தனது படைவீரர்களுக்கு முட்டாள் தனமாக உத்தரவு பிறப்பிப்பானாம். இந்த அரசனின் நடவடிக்கையால் படையில் சேர பலர் தயங்கினர்.

திடீரென ஒருநாள் அவன் அமைச்சர்களை அழைத்தான். ‘ரோமாபுரி நாட்டில் இனி எவருமே திருமணம் செய்து கொள்ளக்கூடாது என்று உடனே ஒரு அறிவிப்பு செய்யுங்கள். ஏற்கனவே நிச்சயித்த திருமணங்களும் ரத்து செய்யப்படுகிறது. இதை மீறுபவர்கள் கைது செய்யப்பட்டு இருட்டுச் சிறையில் அடைக்கப்படுவார்கள். பின்னர் பொது இடத்தில் அவர்கள் கல்லால் அடித்து தலை துண்டித்து கொல்லப்படுவார்கள்’’ என்றானாம்.

இதை கேட்ட ரோமானியர்கள் அதிர்ச்சிக்கு ஆளாகினர். திருமணமானவர்கள் மனைவியை பிரிந்து வரத் தயங்குகிறார்கள். காதலிக்கும் வாலிபர்கள் காதலியை பிரிந்து வர தயங்குகின்றனர். இது இரண்டும் இல்லாவிட்டால் படையில் சேர்வார்கள் என்று அவன் நினைத்துள்ளான். பாதிரியார் வேலண்டைன் அரசனின் இந்த அறிவிப்பை மீறி இரகசியமாகத் திருமணங்களை நடத்தி வைத்தார். காதலிக்கு அனுப்பிய முதல் வாழ்த்து: இதையறிந்த மன்னன் வாலண்டைனை கைது செய்து சிறையில் அடைத்தான்.

மரணதண்டனையை நிறைவேற்ற நாளும் நிர்ணயிக்கப்பட்டது. இடைப்பட்ட காலத்தில் சிறையில் இருந்த பாதிரியார் வேலண்டைன் சிறைக் காவலர் தலைவனின் பார்வை இழந்த மகள் அஸ்டோரியசுக்கும் காதல் மலர்ந்துள்ளது.  வேலண்டைன் விடுவிக்க அஸ்டோரியஸ் முயன்றாள். இதை அறிந்த சிறைத் துறைத் தலைவன் மகளை வீட்டுச் சிறையில் வைத்தான். அனைத்து காவலையும் மீறி அட்டை ஒன்றில் காகித அட்டை ஒன்றின் மூலம் செய்தி அனுப்பினார் வேலண்டைன். இந்த வரலாறு உண்மையாக இருக்குமானால், முதல் காதலர் வாழ்த்து இதுவாகத்தான் இருந்திருக்க வேண்டும் என்று கருதப்படுகிறது.

இந்த கடிதத்தை படிக்கும் அதே நேரத்தில் வாலண்டைன் கல்லால் அடிக்கப்பட்டு சித்திரவதை செய்த பின் வேலண்டைனின் தலை துண்டிக்கப்பட்டது. அந்த நாள் 270வது வருடம் பிப்ரவரி மாதம் 14ம் தேதி.  வேலண்டைன் ரோம் மக்களின் மனங்களில் மறையாமல் நிறைந்திருந்தார். ரோமானிய சர்ச்சுகள் ஐரோப்பியரின் கட்டுப்பாட்டுக்குள் வந்த போது ‘பாகான்‘ விடுமுறை தினம் அறிவிக்கப்பட்டது. இதுவே வாலண்டைன் தினமாகக் கொண்டாடப்பட்டது. சுமார் 200 ஆண்டுகளுக்கு பிறகு போப்பாண்டவர் ஜெலாசியஸ் மி வேலண்டைனை புனிதராக அறிவித்தார். அன்றிலிருந்து வேலண்டைன் தினம் காதலர் தினமாக கொண்டாடப்பட்டு வருகிறது.

 

காதலர் தினத்தை முன்னிட்டு இன்று சந்தையில் பல்வேறு பரிசுப் பொருட்கள் விற்கப்படுகின்றன. அழகான ரோஜாக்கள், பூங்கொத்துகள், சாக்லெட்டுகள், கரடி பொம்மைகள், வாழ்த்து அட்டைகள் என காதலர் தின பரிசு பொருட்கள் நிரம்பி வழிகின்றன. இவற்றுள் எதை நம் துணைக்கு வாங்கிக் கொடுக்கலாம் என காதலர்கள் இந்த நேரத்திலும் கூட குழம்பிக்கொண்டிருக்கலாம். ஆனால், காதலர் தினமானது ஒரு நாள் கொண்டாட்டம் அல்ல,   பல நாடுகளில் வேலண்டைன்ஸ் டே   ஒரு வாரத்திற்குக் கொண்டாடப்படுகிறது. 

காதலர் வாரத்தின் முதல் நாள் தான் ´ரோஸ் டே´.அதாவது, பிப்ரவரி 7-ஆம் தேதி தொடங்கும். இந்நாளில் காதலர்கள் ரோஜாப் பூக்களை, அதிலும் காதலின் சின்னமான சிவப்பு நிற ரோஜாப் பூக்களை கொடுத்துக் கொள்வார்கள்.

காதல் வாரத்தின் இரண்டாம் நாளன்று காதலர்கள் ´ஐ லவ் யூ´ என்று தங்கள் காதலை வித்தியாசமான முறையில், ஆச்சரியப்படத்தக்க வகையில் வெளிப்படுத்துவார்கள். 

காதலர் வாரத்தின் மூன்றாம் நாள் தான் ´சாக்லெட் டே´. இந்நாளில் தங்கள் துணைக்கு அவர்களுக்கு பிடித்த சாக்லெட்டுகளை வாங்கிக் கொடுப்பார்கள்.

இந்நாள் பெண்களுக்கு மிகவும் ஸ்பெஷலான நாள். ஏனெனில் இந்நாள் தான் டெடி டே. பொதுவாக பெண்களுக்கு டெடி பியர் எனும் கரடி பொம்மைகள் என்றால் கொள்ளை பிரியம். இந்த நாளில் காதலன் காதலிக்கு அழகான டெடி பியர் கொடுப்பார்கள்.

இது ஒவ்வொரு காதலர்களுக்கும் மிகவும் முக்கியமான நாள். ஏனென்றால் இந்நாளில் காதலர்கள் இருவரும் தங்கள் உறவை சந்தோஷமாகவும், நம்பிக்கையுடனும் வளர்க்கும் வகையில் சத்தியம் செய்து கொள்வார்கள்.

ஹக் டே என்பது காதலர்கள் இருவரும் அனைத்தையும் மறந்து, நாம் இருவரும் எப்போதும் வாழ்நாள் முழுவதும் ஒன்றாக பிரியாமல் இருக்க வேண்டுமென்று கட்டிப்பிடித்து கொண்டாடும் நாள். காதலர் வாரத்தின் ஏழாம் நாள் தான் கிஸ் டே எனப்படும் முத்த மழை பொழியும் நாள். இந்த நாளன்று காதலர்கள் தங்கள் அன்பை முத்தத்தின் வாயிலாக வெளிப்படுத்துவார்கள்.

இறுதியில் தான் வேலன்டைன்ஸ் டே என்னும் காதலர் தினத்தைக் கொண்டாடுவார்கள். இந்நாளில் காதலர்கள் இருவரும் ஒன்றாக நேரத்தை செலவழித்து, அந்நாளை மறக்க முடியாத ரொமான்டிக் நாளாக கழிப்பார்கள்.

காதலர் தினத்தில் இவ்வளவு விஷயம் இருக்கா...? பர்சு காலியாகிவிடுமே என நீங்கள் பயந்தால் அதற்கு நாங்கள் பொறுப்பல்ல. 

கோலாலம்பூர், டிசம்.24- கிறிஸ்துமஸ் கொண்டாட்டத்தை முன்னிட்டு பற்றி அறிந்து கொள்ள வேண்டிய சில  அரிய தகவல்கள் பல உண்டு அவற்றில் சில தகவல்களை இங்கே காணலாம்...

## இயேசு கிறிஸ்து கி.மு.5ஆம் ஆண்டு, பெத்லகேம் நகரில் பிறந்தார். பெத்லகேம் என்றால் ‘அப்பத்தின் வீடு’ என்பது பொருள்.

## இயேசு என்ற பெயரின் எபிரேய மூலச்சொல்லான ‘யெஷுவா’ என்பதற்கு ‘கடவுள் விடுவிக்கிறார்’ என்றும், கிறிஸ்து என்ற கிரேக்க வார்த்தைக்கு ‘அருட்பொழிவு பெற்றவர்’ எனவும் பொருள்.

## கி.பி.240-களில் மார்ச் 28-ஆம் தேதி கிறிஸ்துப் பிறப்பு விழா கொண்டாட்டம் நிகழ்ந்ததாக, அக்காலக் கிறிஸ்துவ நாள்காட்டி குறிப்பிடுகிறது.

## டிசம்பர் 25-ஆம் தேதி கிறிஸ்துமஸ் கொண்டாடும் வழக்கம் கி.பி.336- ஆம் ஆண்டு ரோம் நகரில் தோன்றியது. இந்தத் தேதிக்கு, போப் முதலாம் ஜூலியஸ் அங்கீகாரம் வழங்கினார்.

## கிறிஸ்துமஸ் 'கேரல்' கீதங்கள் 4ஆம் நூற்றாண்டு முதல் தேவாலயங்களிலும், 13ஆம் நூற்றாண்டு முதல் வீதிகளிலும் பாடப்படுகின்றன.

## கிறிஸ்துமஸ் விழாவின்போது, இயேசு பிறந்த காட்சியை குடிலாக அமைக்கும் வழக்கத்தை, அசிசி புனித பிரான்சிஸ் 1223ஆம் ஆண்டு தொடங்கி வைத்தார். 

## கிறிஸ்துமஸ் தாத்தா பரிசு கொடுக்கும் வழக்கம் 10ஆம் நூற்றாண்டில் தோன்றினாலும், தொப்பையும், குல்லாவும் கொண்ட 'சான்டாகிளாஸ்' 19ஆம் நூற்றாண்டில்தான் வடிவம் பெற்றார்.

## 16ஆம் நூற்றாண்டு முதலே கிறிஸ்துமஸ் விழாக்களை நட்சத்திரங்கள் அலங்கரித்து வருகின்றன.

## 15ஆம் நூற்றாண்டு முதல் வழக்கத்தில் உள்ள கிறிஸ்துமஸ் மரம், 1882ஆம் ஆண்டு முதன் முதலாக மின்விளக்குகளால் அலங்கரிக்கப்பட்டது.

மலாக்கா, நவம்பர் 8- நாட்டின் வரலாற்று சிறப்பு மிக்க  மலாக்கா மாநிலத்தில் அமைந்துள்ள மலாக்கா ஆற்றின் 20 கிலோ மீட்டர் ஆழத்தில்  மஜாபாஹிட் பேரரசு கால ஆலயத்தின் ஒரு பகுதி கண்டுபிடிக்கப்பட்டுள்ளது. 

அண்மையில், நிபுணத்துவம் வாய்ந்த முக்குளிப்பு குழு ஒன்று,  வரலாற்றுத் தேடலுக்காக  மலாக்கா ஆற்றில் இறங்கியபோது, ஆற்றுப்படுகையில், இந்து ஆலயத்தின் ஒரு பகுதியையும்,  ஒரு கோட்டையைப் போன்ற கட்டமைப்பையும் கண்டுபிடித்துள்ளது.

இந்த கண்டுபிடிப்பை மலாக்கா மாநில முதல்வரும் உறுதி செய்துள்ளார். 

இந்தோனேசியாவின் ஆகக் கடைசியான இந்தியப் பேரரசாக விளங்கிய மஜாபாஹிட், கிழக்கு ஜாவாவில் அமைந்திருந்தது.   இந்தோனேசியா மற்றும் தென் கிழக்காசிய வரலாற்றில் மிகவும் உச்சம் பெற்றிருந்த, பலம் வாய்ந்த  பேரரசுகளுள் ஒன்றாகத் திகழ்கிறது.    

1365-ஆம் ஆம் ஆண்டு எழுதப்பட்ட நகரகிரேதாகிராமம் எனும் சாவக நூலின் படி, மஜாபாகித் பேரரசு இன்றைய இந்தோனேசியா, சிங்கப்பூர், மலேசியா, புருணை, தென் தாய்லாந்து, பிலிப்பைன்ஸ், கிழக்குத் தீமோர் உட்பட 96 திறைநாடுகளுடன் சுமத்திராவிலிருது நியு கினி வரை வியாபித்திருந்தது. 

மஜாபாஹிட் பேரரசின் போது, இந்து  மதமரபுகளும், சம்பிரதாயங்களும் பின்பற்றுப்பற்றப்பட்டுள்ளன. அந்த வகையில்,  மஜாபாஹிட் அரசர்கள்   தாங்கள் சென்ற நாடுகளிலெல்லாம் இந்து ஆலயங்கள் அமைத்துள்ளனர்.  

அவ்வாறு கட்டப்பட்ட இந்து ஆலயங்களில் ஒன்றுதான்  தற்போது  மலாக்கா ஆற்றுப்படுகையில் கண்டுபிடிக்கப்பட்டுள்ளது என நம்பப்படுகிறது.

இந்த கண்டுபிடிப்பு,  இந்து  சமய மரபுகள் மலாயா உட்பட தென்கிழக்காசிய நாடுகளில் கோலோச்சியதற்கான  மற்றொரு  ஆதாரமாக விளங்குகிறது. குறிப்பாக,   சுண்ணாம்பு தடவி தாம்பூலம் தரிக்கும் வழக்கமும், வட்டமாக அமர்ந்து தயிர் சாதம் உண்ணும் வழக்கமும், இல்லம் தேடி வரும் விருந்தினர்களுக்குத் தாம்பூலம் வழங்கி வரவேற்கும் வழக்கத்தையும் பின்பற்றியுள்ளனர். 

 மேலும் எழுதுவதற்குச் சோழ மண்டல  எழுத்தைப் பயன்படுத்தியதையும் அறிய முடிகிறது.   

மஜாபாஹிட்டின் சிதைவுகள் மிகக் குறைந்த கிடைப்பதால்,  இப்பேரரசின்  தாக்கங்கள் இன்னமும் வரலாற்றாசிரியர்களிடையே ஆய்வுக்குரியதாகவே இருந்து வந்துள்ளது. இந்நிலையில், அண்மையில் கண்டுபிடிக்கப்பட்ட இந்த  புராதன இந்து ஆலய சிதிலங்கள்   மஜாபாஹிட்  பேரரசு குறித்த  அடுத்தக் கட்ட ஆய்வுக்கு இட்டுச் செல்ல வேண்டும் இந்திய சமுதாயத் தலைவர்களும், சமூக இயக்கத்தினரும் கோரிக்கை விடுத்துள்ளனர்.  

 

 

 

 

 

 

 

இருட்டில் இருக்கும் வரை நமக்கு எதுவும் தெரிவதில்லை. அதில் ஒளிச் சுடரை ஏற்றும் போது, கண்களுக்கு அனைத்தும் புலப்படுகிறது. மனித வாழ்வின் அனைத்து நிலைகளிலும்  இருளிலிருந்து மீண்டு ஒளி பெறும் தத்துவம் பயன்படுகிறது. வாழ்வின் வெற்றிக்கான இந்த அடிப்படை தத்துவத்தை தான்  இந்துக்கள் கொண்டாடும் தீபாவளியும் நமக்குப் புலப்படுத்துகிறது. 

தீபம் என்றால் ஒளி. ஆவளி என்றால் வரிசை. வரிசையாய் விளக்கேற்றி, இருளை நீக்கி, ஒளி தரும் பண்டிகை தான் தீபாவளி .  

தீபத்தில் பரமாத்மாவும், அக்னியில் ஜீவாத்மாவும் வாசம் செய்து அருள்  தருவதாய் ஐதீகம். 

நம் அனைவரது மனதிலும் ஏதோ ஒரு இருட்டு இருக்கத்தான் செய்கிறது.  அகங்காரம், பொறாமை,  தலைக்கனம்,   ஏன் தாழ்வு மனப்பான்மை கூட ஒரு வித மன இருட்டுதான். இது போன்ற ஏதாவது ஒரு மன இருட்டை அகற்றும் போது, வெற்றியும் மகிழ்ச்சியும் நிரந்தரமாக நம்மில் நிலைத்திடும் என்பதால் தான் இந்துக்களிடையே  விளக்கேற்றுதல் முக்கிய அம்சமாக பின்பற்றப்படுகிறது. 

இந்துக்கள் தீபாவளி கொண்டாடுவதற்குப் பல காரணங்களை, புராணக் கதைகளின் வழியாகக் கூறுகின்றனர். இராமன் பதினான்கு வருடங்கள் வனவாசம் முடித்து, நாடு திரும்பும் போது மக்கள் விளக்கேற்றி வரவேற்றனர். புராணக் கதைகளின் படி, கிருஷ்ணனின் இரு மனைவியருள் ஒருவரான நிலமகளுக்குப் பிறந்த மகன் ஓர் அசுரன். அப்போது கிருஷ்ணன் வராக(பன்றி) அவதாரம் எடுத்திருந்தான்.

பிறந்த அசுரனின் பெயர் நரகன். அந்நரகன், தன் அன்னையால் மட்டுமே தனக்கு இறப்பு ஏற்பட வேண்டும் என்று வரம் வாங்கியிருந்தான். அவனின் அநீதிகளை நிறுத்த வேண்டி, கிருஷ்ணன் தனது திறமையால் அந்நரகாசுரனை இறக்க வைக்கிறான். கிருஷ்ணர், நரகாசுரன் என்ற அசுரனைக் கொன்ற போது, அவன் தான் இறக்கும் தினத்தை மக்கள் கொண்டாட வேண்டும் என்று கேட்ட வரத்திற்கிணங்க தீபாவளி மகிழ்ச்சியாகக் கொண்டாடப்படுகின்றது.

இராமாயண இதிகாசத்தில், இராமர், இராவணனை அழித்து விட்டு, தனது வனவாசத்தையும் முடித்து விட்டு, மனைவி சீதையுடனும் சகோதரன் இலட்சுமணனுடனும் அயோத்தி திரும்பிய நாளை, அயோத்தி மக்கள் ஊரெங்கும் விளக்கேற்றிக் கொண்டாடி மகிழ்ந்தனர். 

இந்நாளே தீபாவளியாக கொண்டாடப்படுவதாக கருதப்படுகிறது. ஸ்கந்த புராணத்தின் படி, சக்தியின் 21 நாள் கேதார விரதம் முடிவுற்றது இத்தினத்தில் தான். விரதம் முடிவடைந்த பின்னர் சிவன், சக்தியை தன்னில் ஒரு பாதியாக ஏற்று 'அர்த்தநாரீஸ்வரர்' உருவமெடுத்தார்.

1577-இல் இத்தினத்தில், பொற்கோயில் கட்டுமானப் பணிகள் தொடங்கியதையே சீக்கியர்கள் இந்நாளில் கொண்டாடுகின்றனர். மகாவீரர் நிர்வாணம் அடைந்த தினத்தை நினைவுகூர்ந்து, இத்தினத்தை சமணர்கள் கொண்டாடுகின்றனர். 

தீபாவளி அன்று அனைவரும் அதிகாலை எழுவர். இல்லத்தின் மூத்த உறுப்பினர் ஒவ்வொருவர் காலிலும் நலங்கு இட்டு மகிழ்வர். பின் எண்ணெய்க் குளியல் (கங்கா குளியல்) செய்வர். நல்லெண்ணெயில் ஓமம் மற்றும் மிளகு போட்டுக் காய்ச்சுவது சிலரது வழக்கம். மக்கள் புத்தாடை உடுத்தியும் பட்டாசுகள் வெடித்தும் மகிழ்வர். பொதுவாக தீபாவளி அன்று பாரம்பரிய உடைகளை அணியவே பெரும்பாலான தென்னிந்திய மக்கள் விரும்புகின்றனர். அன்று அநேக பெண்கள் பட்டுப்புடவையும் ஆண்கள் வேட்டியும் உடுத்துவது வழக்கம். 

தீபாவளி அன்று ஒவ்வொரு இல்லத்திலும் மங்கள இசையான நாதஸ்வரம் ஒலிக்கும். அன்று இனிப்புக்கள் நிறைய செய்து ஒருவருக்கொருவர் பரிமாறிக் கொள்வர். பரிசுகள் தந்து மகிழ்வர். பெரியோரை வணங்கி வாழ்த்து பெறுவர். தீபாவளி இலேகியம் (செரிமானத்திற்கு உகந்தது) அருந்துவதும் மரபு. தீபாவளியன்று நீராடுவதை மட்டும் புனித நீராடல் என்று சொல்வதற்கு காரணம், அன்றைய தினம், அதிகாலையில் எல்லா இடங்களிலும், தண்ணீரில் கங்கையும், எண்ணெயில் லட்சுமியும் அரப்பில் சரஸ்வதியும், குங்குமத்தில் கௌரியும், சந்தனத்தில் பூமாதேவியும், புத்தாடைகளில் மஹாவிஷ்ணுவும் வசிப்பதாக கருதப்படுவதேயாகும்.

அந்த நீராடலைத்தான் "கங்கா ஸ்நானம் ஆச்சா" என்று ஒருவருக்கொருவர் விசாரிப்பர். அன்றைய தினம், எல்லா நதிகள், ஏரிகள், குளங்கள், கிணறுகளிலும், நீர்நிலைகளும் 'கங்கா தேவி" வியாபித்து இருப்பதாக ஐதீகம். 

 

தீபாவளிக்கு இன்னும் ஒரு சில நாட்களே எஞ்சியுள்ளன. இம்முறை, தீபாவளி விற்பனை அனைத்தும் கடை வீதிகளில் களைக்கட்டியதோ இல்லையோ, ஆன்லைனில்  பல மாதங்களுக்கு முன்பே தொடங்கி விட்டதைக் காண முடிந்தது.  

இந்நிலையில், கடந்த 10 நாட்களாக நாட்டின் பல இடங்களிலும், மாநகர மன்றங்கள் அமைத்து தந்த தீபாவளி  சந்தைகளும், தனியாரின் விற்பனை பெரு விழாக்களும் அமைக்கப் பட்டுள்ளன.எனினும்,இவ்வாண்டு மக்கள் நடமாட்டம் முன்பு போல் அல்லாமல் கணிசமாகக் குறைந்துள்ளதையும், இது போன்ற பண்டிகைக் காலங்களில் வியாபாரத்தின் மூலம்  லாபம் ஈட்டலாம் என நம்பி பணம் போட்ட வியாபாரிகள், தங்கள் கடைகளில் ஆள் வரவு இன்றி ஏக்கத்துடன் காத்திருப்பதையும் காண முடிந்தது.  

இது குறித்து, தீபாவளி விற்பனைச் சந்தை வியாபாரிகள் சிலரிடமும்,  அங்கு வருகைப்புரிந்த வாடிக்கையாளர்களுடனும் வணக்கம் மலேசியா இணையச் செய்திக்காக நேர்க்காணல் செய்தோம். 

அண்மைய ஆண்டுகளாக சமூக வலைதளங்கள் மூலமாக மேற்கொள்ளப்படும் ஆன்லைன்  விற்பனை அதிகரிக்கத் தொடங்கியுள்ளது. அரசாங்கமும், மக்கள் கூடுதல்  வருமானத்திற்காக  இது போன்ற வாய்ப்புக்களைப் பயன்படுத்திக் கொள்ளலாம் என ஊக்குவித்து வருவதைத் தொடர்ந்து, நம் நாட்டில் இந்த பேஸ்புக் இணைய விற்பனைப் பக்கங்கள் முன்பைக் காட்டிலும், அதிகமாக பெருகிவிட்டன.ஒரு வருடத்தில் எந்த காலக்கட்டத்திலும், இத்தகைய இணைய விற்பனை பக்கங்களில் உலா வரும் ஆடை அணிகலன்களைப் பார்க்கும் இளைஞர்களும் யுவதிகளும்,  சிறந்தவற்றைத் தேர்ந்தெடுத்து வாங்கிக் கொள்கின்றனர்.

அவர்களைப் பொருத்தவரை,  வெளியில் அங்கும் இங்கும் தேடித் திரிந்து கிடைப்பதை வாங்குவதை விட, பிடித்தது கண் முன் வரும் போது, அதனை பணம் செலுத்தி வாங்கிக் கொள்வதில் முனைப்பு காட்டுகின்றனர். 

இத்தகய இணையப்பக்கங்களால் சிலர் அவ்வப்போது ஏமாற்றப்பட்டாலும், பெரும்பாலான நேரங்களில் சிறந்த, தரமான  சேவை கிடைப்பதால், தீபாவளி போன்ற பண்டிகைக் காலங்கள் நெருங்குவதற்குள்ளாகவே பலர், தங்களுக்குப் பிடித்தவற்றை வாங்கி வைத்து விடுவதும், சந்தை வியாபாரிகளின்  வியாபாரம் பாதிக்கப்படுவதற்கு ஓர் காரணமாக அமைந்து விடுகிறது எனலாம். 

எனவே, பண்டிகைக் காலங்களில் நல்ல வருமானம் ஈட்டுகிறார்களா என இணைய  விற்பனை  நடத்தும்  இளம்பெண் ஒருவரை கேட்டபோது,  " இப்போதுள்ள இளைஞர்கள் ஆன்லைன் மூலம் வாங்குவதை விரும்புகிறார்கள் என்பதை மறுக்கவில்லை.அதனால் நல்ல லாபமும் எங்களுக்குக் கிடைக்கிறது. ஆனால் தீபாவளி நெருங்கிவிட்டால், அது குறைந்து விடுகிறது. காரணம் விற்பனை பெருவிழாக்கள்" என்கிறார் இத்துறையில் கடந்த இரண்டு ஆண்டுகளாக ஈடுபட்டு வரும் கவிதா.

"தீபாவளி நெருங்கிவிட்டால், விற்பனை பெருவிழாக்கள் நடத்தப்படும். இதில் வட இந்தியாவிலிருந்து அதிகமான வியாபாரிகள்  தங்கள் பொருட்களை வியாபாரம் செய்வார்கள். தீபாவளிக்குக் கடைசி இரண்டு நாட்களில் குறைந்த விலையில்  வாங்கலாம் எனக் கருதி, ஆன்லைனில் வாங்குவதைக் குறைத்து விடுவார்கள். நான் என் தீபாவளி விற்பனை அனைத்தும் செப்டம்பர் மாத தொடக்கத்திலேயே ஓய்ந்து விட்டது " என்கிறார் இவர்.

இப்படியாக, தீபாவளி கருத்துகள் குறித்து வியாபாரிகளும்,  மக்களும் பல்வேறு கருத்துக்களை முன் வைத்தாலும்,  மக்களின் வாங்கும் சக்தி குறைந்து விட்டதா? என்பதையும் சீர்தூக்கி பார்க்க வேண்டியுள்ளது. பல்வேறு இடங்களில் நடத்தப்படும் தீபாவளி சந்தைகளைக் கண்ணோட்டமிட்ட போது, மலிவாக இருப்பதையெல்லாம் வாங்கும் பழக்கம் குறைந்து, தேவையானவற்றை, அதே நேரத்தில் அடிக்கடி பயன்படுத்தக் கூடிய வகையில் ஆடைகள்  வாங்க முனைவதை மக்களிடம் காண முடிகிறது.  

அலுவலகத்திற்கு அணிந்து செல்லும் வகையில்  உடைகளை வாங்கினால், தீபாவளிக்குப் பின்னரும், அடிக்கடி அணியலாம் என்ற எண்ணம் இந்தியர்களிடையே தலைத்தூக்கத் தொடங்கியுள்ளதைக் காண முடிகிறது. அடர்த்தி குறைந்த நிறங்கள், மினுமினுக்கும் வேலைப்பாடுகள் அதிகம் இல்லாத உடைகள் அலுவலகம் செல்லும் பெண்களின்  தேவையாக உள்ளன. சிக்கனமாக, அதே நேரத்தில்  தேவையானவற்றை மட்டுமே வாங்க வேண்டும் என்ற விழிப்புணர்வு மக்களிடையே மேலோங்கியுள்ள நிலையில், அதற்கான  தேவையைச் சந்தை வியாபாரிகள் பூர்த்தி செய்கிறார்களா? என்பதே கேள்வியாக உள்ளது. 

எது எப்படியிருப்பினும், தீபாவளிக்கு இன்னும் இரு நாட்களே எஞ்சியிருக்கும் நிலையில்,  கடந்த  ஞாயிற்றுக்கிழமை முதல் நகரங்களில்   அமைக்கப்பட்டிருக்கும் தீபாவளி சந்தையில் மக்கள் கூட்டம் அலைமோதத் தொடங்கியுள்ளது.இதன்மூலம், இதுவரை இருந்து வந்த தோய்வெல்லாம் மறைந்து, வியாபாரிகள் சுறுசுறுப்பாக  இயங்கத் தொடங்கியுள்ளனர். 

'தீபாவளிக்கு ஆகுற செலவைப் பார்த்தால், அன்றே நரகாசுரனை மன்னிச்சு விட்டுருக்கலாமோ?' 

முகநூலிலும், வாட்ஸாப் போன்ற சமூக வலைதளங்களிலும்  தீபாவளியை முன்னிட்டு பரவி வரும் ஜாலி மீம்ஸ் இது. 

ஒருவேளை மன்னிச்சு விட்டிருந்தால்? என கண்டிப்பாக இந்த தீபாவளி பரபரப்பிலும்  உங்கள் மூளையில் ஒரு சிறிய கேள்வி வந்து போயிருக்கும். 

நாம் அனைவரும் தீபாவளி பண்டிகையை எதிர்நோக்க மும்முரமாக செயல்பட்டுக்கொண்டிருக்கிறோம். இந்த சமயத்தில் யாரையாவது சட்டென கூப்பிட்டு,  தீபாவளி ஏன் கொண்டாடப் படுகிறது எனக் கேட்டால், ஒரே வரியில்  "கிருஷ்ணர்  நரகாசுரனைக் கொன்றதால்  நாம கொண்டாடுகிறோம் ' என்ற ஒற்றை வரியில் சொல்லி விட்டு போய்விடுவார்கள். ஆனால்,   'அவ்வளவுதானா?  முழுமையாகச் சொல்லுங்கள்'  என்றால் இன்னமும் திருதிருவென விழிக்கும் பழக்கம் நம்மில் பலரிடம் இருக்கத்தான் செய்கிறது. 

தீபாவளி ஏன்? எதனால்? வாருங்கள் மீண்டுமொருமுறை தெரிந்துக்கொள்வோம். 

நரகாசுர‌ன் எ‌ன்ற அர‌க்க‌ன் ஒருவ‌ன் இரு‌ந்தா‌ன். அவனு‌க்கு இ‌ந்த மூவுலகமு‌ம் த‌ன் க‌ட்டு‌ப்பா‌ட்டி‌ல் கொ‌ண்டு வ‌ந்து த‌ன் ‌விரு‌ப்ப‌த்‌தி‌ற்கு அனுப‌வி‌க்க வே‌ண்டு‌ம் எ‌ன்ற பேராசை இரு‌ந்தது. தேவ‌ர்க‌ள் கூட த‌ன் காலடி‌‌யி‌ல் ‌கிட‌க்க வே‌ண்டு‌ம் எ‌ன்ற ந‌ப்பாசை இரு‌ந்தது.

இ‌ந்த ஆசைகளை ‌நிறைவே‌ற்ற ‌பிர‌ம்மனை நோ‌க்‌கி கடு‌ம் தவ‌ம் இரு‌ந்தா‌ன் நரகாசுர‌ன்.

இதனை பா‌ர்‌த்த ‌‌பிர‌ம்ம‌ன், தன‌‌க்காக தவ‌ம் இரு‌ந்த நரகாசுரனு‌க்கு அவ‌ன் கே‌‌ட்கு‌ம் வர‌ங்களை அ‌ள்‌ளி அ‌ள்‌ளி கொடு‌த்தா‌ர். ஒரு கெ‌ட்டவ‌னு‌‌க்‌கு ‌ப‌த‌வி கிடை‌‌த்தா‌ல் எ‌ப்படியெ‌ல்லா‌ம் பய‌ன்படு‌த்துவானோ அ‌ப்படியெ‌ல்லா‌ம் பய‌ன்படு‌த்‌தி‌க் கொ‌ண்டா‌ன் நரகாசுர‌ன்.

எ‌ல்லோரு‌க்கு‌ம் து‌ன்ப‌ம் ‌விளை‌வி‌த்து வ‌ந்த நரகாசுர‌ன், தே‌வ‌ர்களையு‌ம் மு‌‌னிவ‌ர்களையு‌ம் அவ‌ன் கொடுமை‌ப்படு‌த்‌தினா‌ன். அதும‌ட்டு‌‌ன்‌றி தன‌க்கு வர‌ம் கொடு‌த்த ‌பிர‌ம்மனை எ‌தி‌ர்‌த்தே போ‌ர் தொடு‌த்தா‌ன் நரகாசுர‌ன்.

வர‌த்தை கொடு‌த்து ‌வி‌ட்டு நரக வேதனைகளை அனுப‌வி‌க்க வே‌ண்டி இரு‌க்‌கிறதே எ‌ன்று புல‌ம்‌பினா‌‌ர் பிர‌ம்ம‌ன். கா‌க்கு‌ம் கடவுளான ‌கிரு‌ஷ்ண பகவா‌னிட‌ம் த‌ன் குறைகளை கூ‌றி முறை‌யி‌‌ட்டா‌ர்.

இதனா‌ல் ‌கிரு‌ஷ்ண பகவா‌ன் நரகாசுரனை அணு‌கி, தவ‌‌ம் செ‌ய்து பெ‌ற்ற வர‌த்தை தவறான வ‌ழி‌யி‌ல் செய‌ல்படு‌த்துவது ‌நியாய‌ம் அ‌ல்ல எ‌ன்று முறையாக சொ‌ல்‌லி பா‌ர்‌த்தா‌ர்.

ஆனா‌ல் நரகாசுர‌ன் கே‌ட்பதாக இ‌ல்லை. த‌ன் ‌விரு‌ப்ப‌ம் போ‌ல் ம‌க்களை கொடுமை‌ப்படு‌த்‌தினா‌ன். இதனா‌ல் கோப‌‌ம் அடை‌ந்த ‌கிரு‌‌ஷ்ண பகவா‌ன், நரகாசுரனை போரு‌க்கு அழை‌த்து த‌‌ம் ச‌க்கராயுத‌த்தா‌ல் அவ‌னி‌ன் உடலை இர‌ண்டாக ‌பிள‌ந்தா‌ர்.

இற‌க்கு‌‌ம் ‌நிலை‌யி‌ல் இரு‌ந்த நரகாசுர‌ன், கிரு‌ஷ்ண‌னி‌ன் காலை ‌பிடி‌த்து, பகவானே எ‌ன்னுடைய சாவு கெ‌ட்டவ‌ர்களு‌க்கு ஒரு பாடமாக இரு‌க்க வே‌ண்டு‌ம். நா‌ன் செ‌ய்த பாவ‌ங்களை ம‌ன்‌னி‌த்து ‌விடு‌ங்க‌ள் எ‌ன்று கெ‌ஞ்‌சினா‌ன்.

 'இற‌‌க்கு‌ம் ‌ தருவாயில்,  உ‌ள்ள என‌க்கு ஒரு ஆசை. அதை இ‌ப்போது தெ‌ரி‌வி‌க்‌கிறே‌ன் எ‌ன்று சொ‌ன்ன நரகாசுர‌ன், கொடியவனாக நா‌ன் இற‌க்கு‌ம் இ‌ந்நாளை ம‌க்க‌ள் அனைவரு‌ம் அ‌‌ல்ல‌ல் ‌நீ‌ங்‌கிய ந‌ன்நாளாக ம‌ங்களகரமான நாளாக கொ‌‌ண்டாடி ம‌கிழ வே‌ண்டு‌ம்' எ‌ன்று வே‌ண்டினா‌ன்.

‌கிரு‌ஷ்ண பகவானு‌ம் அ‌வ்வாறே அவனு‌க்கு அரு‌ளினா‌ர். இதனா‌ல் தா‌ன் நரகாசுர‌ன் இ‌ற‌ந்த நாளை‌த்தா‌ன் இ‌ந்து‌க்க‌ள் ‌தீபாவ‌ளியாக கொ‌‌ண்டாடி வரு‌கி‌ன்றன‌ர் எ‌‌ன்று ஜ‌தீக‌ம் கூறு‌கிறது.

இனி நம் குழந்தைகள்  கேட்டாலும்,  சரளமாக சொல்லலாமே. பண்டிகைகளும் விழாக்களும், பின்பற்றி செய்வதை விட, பின்னணியும் உள்நோக்கமும்  தெரிந்து பின்பற்றுவதே, அதன்  தாத்பரியத்தை உணரச் செய்யும் எனில் மிகையில்லை