ஷாஆலம்,நவ.22-  தேசிய கால்பந்து குழுவின் முன்னாள் பயிற்சியாளரான டத்தோ கே.ராஜகோபால், பி.கே.என்.எஸ். கால்பந்து கிளப் குழுவின் பயிற்சியாளராக நியமிக்கப்பட்டுள்ளார். 

முன்னாள் தேசிய கால்பந்து வீரரான ராஜகோபால் தனது தொடக்க்க் காலத்தில் பி.கே.என்.எஸ். குழுக்கு விளையாடியவர் என்பதோடு அதன் பின்னர் அக்குழுவின் பயிற்சியாளராகவும் இருந்துள்ளார் என்பது குறிப்பிடத்தக்கது.

பயிற்சியாளர் ராஜாகோபால் தலைமையில் பயிற்சிபெற்ற தேசிய குழு கடந்த 2010- ஆம் ஆண்டில் ஏ.எப்.எப். கிண்ண சாம்பியனாக வாகை சூடியது. சூப்பர் லீக்கில் விளையாடிவரும் பி.கே.என்.எஸ். குழுவுக்கு பயிற்சியாளர் பொறுப்பை ஏற்றுள்ள நிலையில், குழுவின் முன்னேற்றத்தில் உடனடி அதிசயம் எதுவும் நிகழும் என்ற எதிர்பார்ப்பை வைக்கவேண்டாம் என்று ராஜகோபால் சுட்டிக்காட்டினார்.

தற்போது சூப்பர் லீக் கால்பந்து போட்டியில் பி.கே.என்.எஸ். குழு 7ஆவது இடத்தில் இருந்து வருகிறது. எனவே குழுவின் நிலை குறித்து உண்மையான சூழலை மனதில் கொள்ளவேண்டும் என்றும் அவர் சொன்னார்.

எனினும், வரும் ஆண்டு பி.கே.என்.எஸ். குழுவுக்கு நிச்சயமாக முன்னேற்றைக் கொண்டுவரும் ஆண்டாக அமையும் என்று எதிர்பார்க்கலாம் என்றார் அவர்.

ஜொகூர்பாரு, நவ.5- மலேசிய கிண்ணக் கால்பந்து போட்டியில் 26 வருடங்களுக்கு பிறகு சாம்பியன் கிண்ணத்தைக் கைப்பற்றி ஜே.டி.டி எனப்படும் ஜொகூர் டாருள் தக்ஸிம் குழு பெரும் உற்சாகத்தை ஏற்படுத்தியதைத் தொடர்ந்து ஜொகூர் மாநிலத்தில் இன்று மாநில பொது விடுமுறை அறிவிக்கப்பட்டது.

ஜே.டி.டி. குழுவின் இந்த வெற்றிக்காக ஜொகூர் பெருமை கொள்கிறது என்று கூறிய மாநில மந்திரி புசார் டத்தோஸ்ரீ காலிட் நோர்டின், ஜொகூர் குழுவின் மீது அதிகப் பற்று வைத்து அதை ஆதரித்து வரும் கால்பந்து ரசிகர்களுக்கு நன்றி தெரிவித்துக் கொண்டார். 

தொடர்ந்து ஜே.டி.டிக்கு ஆதரவு நல்கிவரும் ஜொகூர் சுல்தானுக்கும் அவர் நன்றி தெரிவித்துக் கொண்டார். 

நேற்றிரவு ஷாஆலம் அரங்கத்தில் கெடா குழுவுக்கு எதிராக நடந்த இறுதியாட்டத்தில் ஜே.டி.டி குழு 2-0 என்ற கோல் கணக்கில் வாகை சூடி மலேசியக் கிண்ணத்தைக் கைப்பற்றியது.

ஆட்டம் தொடங்கிய சிறிது நேரத்திலேயே ஜொகூர் அய்டில் ஷாபுவானும்யார்ஜெண்டினா வீரர் கொன்ஷாலோ கப்ரேராவும் கோல்களை அடித்து, 1991ஆம் ஆண்டுக்குப் பிறகு முதன் முறையாக மலேசியக் கிண்ணச் சாம்பியன் பட்டத்தை ஜொகூர் வெல்ல உதவினர்.

கடந்த மூன்று ஆண்டுகளாக தொடர்ந்து இறுதியாட்டத்தில் தோல்வி கண்டு வரும் கெடாவுக்கு நேற்றைய இரவு மிகவும் ஏமாற்றமான ஓர் இரவாக அமைந்தது. 

 

 

 

 

 

 

 

 

 

 

கோலாலம்பூர், அக்26- மலேசிய நீச்சல் வீராங்கனை வெண்டி இங் யான் யீ, ஊக்கமருந்து சோதனையில் தோல்வி அடைந்ததைத் தொடர்ந்து, ஆகஸ்டு மாதம் கோலாலம்பூரிலில் நடைபெற்ற சீ விளையாட்டுப் போட்டியில் அவர் வென்ற தங்கப் பதக்கங்களை திருப்பித் தருமாறு பணிக்கப்பட்டுள்ளார். 

வெண்டியின் பி’ சோதனை மாதிரிகள், அதாவது, அவரிடம் ஏற்கெனவே எடுக்கப்பட்ட மாதிரியிலிருந்து தனியாக வைக்கப்பட்ட ஒரு பகுதியிலும், உடல் எடையக் குறைக்கும் மருந்துகளில் இருக்கும் 'சிபூதிராமின்' எனப்படும் அந்த ஊக்க மருந்தின் தாக்கம் தென்பட்டுள்ளது. 

24 வயதான வெண்டியின் முன்னிலையில் ‘பி’ மாதிரி திறக்கப்பட்டு, சோதனைக்கு உட்படுத்தப்பட்டது. இந்த 'சிபூதிராமின்' என்ற ஊக்க மருந்து உலக ஊக்கமருந்து தடுப்பு கழகம் தடை செய்துள்ளது என்பது குறிப்பிடத்தக்கது.

இவ்விவகாரம் குறித்து மலேசிய அமெச்சூர் நீச்சல் மன்றத் தலைவர் டத்தோஶ்ரீ ஷாஹிடின் காசிமிடம் தெரிவித்தப் பின்னரே இது குறித்து மேல் விவரங்களை தன்னால் பகிர்ந்துக் கொள்ளமுடியும் என்று அம்மன்றத்தின் செயலாளர் மே சென் கூறினார். 

3 மீட்டர் 'ஸ்பிரிங் போர்டு' தனிநபர் டைவிங் நீச்சலில் வெண்டி வென்ற தங்கப் பதக்கம் பறிக்கப்பட்டு, இப்போட்டியில் இரண்டாம் இடத்தைப் பிடித்த மற்றொரு மலேசிய வீராங்கனையான நூர் டபிதா சப்ரிக்கு இந்தத் தங்கப் பதக்கம் வழங்கப்படவுள்ளது. 

அதேவேளையில் 3 மீட்டர் 'ஸ்பிரிங் போர்டு' இரட்டையர் டைவிங் நீச்சலில் வெண்டி மற்றும் டபிதா ஜோடி வென்ற தங்கப் பதக்கங்கள் சிங்கப்பூரைச் சேர்ந்த ஆஷ்லீ டான் – பொங் கெய் இயான் ஜோடிக்கு  வழங்கப்படும். 

ஊக்க மருந்தை உட்கொண்ட குற்றத்திற்காக வெண்டிக்கு 2 ஆண்டு காலம்  நீச்சல் போட்டிகளில் பங்கேற்கத் தடை விதிக்கப்படலாம்.

 

 

 

 

 

 

கோலாலம்பூர், அக்.5- மலேசியாவின் வெவ்வேறான இனங்களை ஒன்றுபடுத்துவதில் முக்கிய கூறாக, விளையாட்டுத் துறை பங்காற்றுகிறது என்று பிரதமர் டத்தோஶ்ரீ நஜிப் குறிப்பிட்டார்.

விளையாட்டுத்துறை ஒருமைப்பாட்டை விதைக்கிறது என்று குறிப்பிட்ட அவர், கடந்த ஆண்டு நடந்த தேசிய விளையாட்டு தினக் கொண்டாட்டத்தில் 76 லட்சம் மலேசியர்கள் கலந்து கொண்டதை அவர் சுட்டிக்காட்டினார்.

நமது மக்களை விளையாட்டு, எப்படி அரசியல் எல்லைகளையும் கடந்து ஒன்றுபடுத்துகிறது? என்பதற்கு இதுவோர் உதாரணம் என்றார் அவர். இன்று புக்கிட் ஜாலில் தேசிய அரங்கத்தில் நடந்த தேசிய விளையாட்டு தினக் கொண்டாட்டத்தைத் தொடக்கி வைத்துப் பேசிய போது பிரதமர் நஜிப் இதனைத் தெரிவித்தார்.

உணவை அதிகம் நேசிக்கும் மலேசியர்களிடையே உடல் பருமன் பிரச்சனை ஒரு முக்கிய சுகாதாரப் பிரச்சனையாக ஆகியுள்ளது. நாம் லாசி லெமாவை பெரிதும் விரும்புகிறோம். ரொட்டிச் சானாயை பெரிதும் விரும்புகிறோம். 'தே தார்ரே'யை பெரிதும் விரும்புகிறோம். ஆனால், விளையாட்டுக்களைத் தான் விரும்புவதில்லை. முதலில் நமது உடலில் அதிகக் கொழுப்பைச் சேர்த்து வைக்காதீர்கள் என்று பிரதமர் கேட்டுக்கொண்டார்.

இளைய தலைமுறையினர் அதிக அளவில் விளையாட்டுத் துறைகளில் ஈடுபட்டு வருகின்றனர். எதிர்கால மலேசியாவை வழிநடத்தப் போகிறவர்கள் என்ற முறையில் இது நாட்டுக்கு நல்லதாகவே அமையும் என்று அவர் வலியுறுத்தினார்.

 

 

 

 

 

 

 

 

கோலாலம்பூர், அக்.14- ஓட்டப்பந்தய போட்டிகளில் பாயும் புலியாக திகழ்ந்த போதிலும், 'மிஸ் மலேசியா' அழகிப் போட்டியில் ஒயிலாக நடைபயின்று இறுதிச் சுற்றுக்கு தேர்வாகி இருக்கிறார் ஓட்ட வீராங்கனை எம்.தனலெட்சுமி. 

பினாங்கை மாநிலத்தை சேர்ந்த 23 வயதான தனலெட்சுமி தான் தொடர்ந்து விளையாட்டுத் துறையிலும் முழு கவனம் செலுத்துவேன் என்று கூறினார். 

இவரை செல்லமாக தனா என்றும் அழைப்பர். தனா தொடர் ஓட்டப் போட்டியில் சிறந்த விரங்கனை என்பது குறிப்பிடத்தக்கது. இந்த ஆண்டு மலேசியாவில் நடந்ததேறிய சீ விளையாட்டு போட்டியில் 4x400 தொடர் ஓட்டப் போட்டியில் வெண்கலப் பதக்கம் பெற்றது குறிப்பிடத்தக்கது. 

இந்தப் போட்டியில் சக வீராங்கனைகளான பேட்ரிக் பாகாவ், நூருல் பைசா, ஷெரன் சாம்சன் வெல்லபாய் மற்றும் தனலெட்சுமி ஆகியோர் பங்கேற்று வாகை சூடினர் என்பது குறிப்பிடத்தக்கது.

விளையாட்டு துறையில் மிக ஆர்வம் கொண்டுள்ள இவர், தான் 10 வயதில் விளையாட்டுத் துறையில் கால் பதித்ததாக அவர் கூறியுள்ளார். 

மேலும் இவர் தற்போது அவர் HELP பல்கலைக்கழகத்தில் மேற்படிப்பைத் தொடர்ந்து வருகிறார். மேலும் இவர் தான் கோல்ப் விளையாட்டுகளிலும் ஆர்வம் காட்டி வருகிறார்.

அதுமட்டுமின்றி காமன்வெல்த் விளையாட்டுப் போட்டிகளிலும், ஆசிய ரீதியிலான ஓட்டப் போட்டிகளிலும் பங்கேற்க நான் முயற்சித்து வருகிறேன். விளையாட்டுகளில் சிறந்ததை எடுப்பது என் இலக்காக கொண்டுள்ளேன் என்றார் அவர். 

 

கோலாலம்பூர், அக்.5- ஶ்ரீ முருகன் நிலையத்தின் இளைஞர் பிரிவு ஏற்பாடு செய்த எஸ்.எம்.சி கிண்ண பூப்பந்து போட்டியில் சிலாங்கூர் மாநில அளவில் காஜாங் தமிழ்ப்பள்ளி வெற்றி வாகை சூடியது.

ஶ்ரீ முருகன் நிலைய ஏற்பாட்டில் இரண்டாவது முறையாக நடைபெறும் இந்த போட்டி விளையாட்டில் இவ்வாண்டு மொத்தம் 142 பள்ளிகள் கலந்து கொண்டன. மாநில அளவில் நடத்தப்பட்ட இந்த பூப்பந்து போட்டியில், சிலாங்கூர் மாநிலத்திற்கான போட்டி கடந்த ஆகஸ்டு 30ஆம் தேதி பூச்சோங்கில் நடைபெற்றது. இப்போட்டிக்கு பிரதமர் துறையின் துணையமைச்சர் செனட்டர் டத்தோஶ்ரீ எஸ்.கே.தேவமணி சிறப்பு வருகை புரிந்தார்.

போட்டியில் நிறைய பள்ளிகள் உற்சாகமாக பங்கு கொண்ட நிலையில் காஜாங் தமிழ்ப்பள்ளி வெற்றியாளராக வாகை சூடியது. மேலும், இரண்டாவது நிலையில் பூச்சோங் தமிழ்ப்பள்ளி வெற்றி பெற்றது குறிப்பிடத்தக்கது.

முன்னதாக, ஜொகூர் மாநில அளவிலான போட்டியில் மாசாய் தமிழ்ப்பள்ளி முதல் நிலையிலும் துன் அமீனா தமிழ்ப்பள்ளி இரண்டாம் நிலையிலும் வெற்றி பெற்றன. 

மலாக்கா மாநில போட்டியில் மலாக்கா குபு பள்ளி முதல் நிலையில் வெற்றி பெற்றது. இப்போட்டியில் புக்கிட் லிந்தாங் பள்ளி இரண்டாம் நிலையில் வெற்றி பெற்றது.

கோலாலம்பூர், செப்.22- பாரா ஆசியான் விளையாட்டுப் போட்டியில் மலேசிய ஓட்டப் பந்தய வீரர் தவனேஸ்வரன் சுப்பிரமணியம் மீண்டும் அதிரடி வெற்றிகளைக் குவித்தார்.

நேற்று நடந்த 200 மீட்டர் ஓட்டத்தில் 24.15 வினாடிகளில் ஓடி மூன்றாவது தங்கப் பதக்கத்தை வென்றார். மேலும், நால்வர் பங்கேற்கும் 100 மீட்டர் தொடர் ஓட்டப் போட்டியில் மலேசியக் குழு 2ஆவது இடத்தைப் பிடித்ததால், இக்குழுவில் இடம்பெற்றிருந்த தவனேஸ்வரன் ஒரு வெள்ளிப் பதக்கத்தையும் பெற்றார்.

சிகாமட்டைச் சேர்ந்த 18 வயதுடைய தவனேஸ்வரன் 100 மீட்டர் ஓட்டத்திலும் 400 மீட்டர் ஓட்டத்திலும் ஏற்கனவே இரண்டு தங்கப் பதக்கங்களை வென்றார் என்பது குறிப்பிடத்தக்கது. 

பாரா ஆசியான் போட்டியில் திடல் களப் போட்டியில் மூன்று தங்கப் பதக்கங்களை வென்றவர்களில் தவனேஸ்வரனை அடுத்து உமி சயுதா என்ற வீராங்கனை 3 தங்கங்களை வென்றுள்ளார்.

இவருக்கு பிறவியிலேயே இரண்டு கால்களும் இருவேறு அளவில் இருக்கின்றன. அதாவது சிறுத்தும் பெருத்தும் உள்ளன. இருப்பினும், இதையெல்லாம் கடந்து தென் கிழக்காசியாவின் பாரா போட்டியில் தலைசிறந்த ஓட்டக்காரர் என்ற பெருமையை நிலைநாட்டியுள்ளார்.

போட்டியின் தொடக்க நிலையில், அவர் மிக மெதுவாகவே ஓடினார். ஆனால், போட்டியை முடிக்கும் தருணத்தில் அவரது துரிதத்திற்கு இதர போட்டியாளர்களால் ஈடுகொடுக்க முடியவில்லை. 

“நான் பாரா ஆசியான் ஓட்டப் போட்டியில் சிறந்த வீரனா? என்று தெரியாது. ஆனால், இப்போட்டியில் பங்கேற்றது அதற்காக அல்ல. ஒரு போட்டியில் கலந்து கொண்டு என் திறமையைச் சோதிக்க வேண்டும் என்று மட்டுமே நான் விரும்பினேன்” என்று தவனேஸ்வரன் குறிப்பிட்டார்.

"மேலும் எனது அடுத்த இலக்கு, எனது கல்வி. நான் எஸ்.பி.எம். தேர்வு எழுதவுள்ளேன். படிப்பிலும் சிறந்த வெற்றியைக் குவிக்க வேண்டும் என்று விரும்புகிறேன்" என்றார் அவர்.

கடைசியாக, 200 மீட்டர் ஓட்டப் போட்டியில் பங்கேற்ற போது தேசிய அரங்கத்தில் அவரது ஓட்டத்தைக் காண அவரது பெற்றோர்களும் உடன்பிறப்புகளும் திரண்டு இருந்தனர்.

"எனது ஓட்டத்தைக் காண வேண்டும் என்பதற்காக எனது பெற்றோர்கள் நேற்றுத்தான் ஜொகூரில் இருந்து அரங்கத்திற்கு வந்திருந்தனர். இது எனக்கு மிக மகிழ்ச்சி அளித்தது" என்றார் தவனேஸ்வரன்.

More Articles ...