மலாக்கா, மே 1- கடந்த ஏப்ரல் 5 ஆம்தேதி பயிற்சியின் போது மின்னல் தாக்குதலுக்கு உள்ளான மலாக்கா கால்பந்து குழுவின் கோல்கீப்பர் மார்க்கோ ஸ்டீபன் பெட்ரோவ்ஸ்கி, இன்று உயிர்நீத்தார். 

மின்னல் தாக்கியதில் கடுமையாகக் காயமுற்ற 17 வயதுடைய ஸ்டீபன், மலாக்கா யுனைடெட் குழுவின் கோல்கீப்பரான இருந்து வந்தார். 

இங்குள்ள ஹங்ஜெபாட் அரங்கத்தில், பயிற்சியில் ஈடுபட்டிருந்தபோது ஓர் ஆஸ்திரேலியரான அவர், மின்னல் தாக்கியதால், புத்ரா ஜெயா மருத்துவமனையில் அனுமதிக்கப்பட்டிருந்தார்.

பிரேதப் பரிசோதனைக்காக அவருடைய உடல், மலாக்கா மருத்துவமனைக்கு கொண்டு செல்லப்பட்டு, பின்னர் அது ஆஸ்திரேலியாவுக்கு அனுப்பி வைக்கப்படும்.

இதனிடையே ஸ்டீபனின் மரணச் செய்தி கேட்டு, தாம் அதிர்ச்சி அடைந்ததாக மலாக்கா முதலமைச்சரும், மலாக்கா யுனைடெட் கால்பந்துக் குழுவின் தலைவருமான டத்தோஶ்ரீ இட்ரிஸ் ஹரூண் தெரிவித்தார். மின்னலில் தாக்கத்திலிருந்து அவர் மீண்டு விடுவார் எனத் தாம் பெரிதும் எதிர் பார்த்ததாக அவர் சொன்னார்.

 

 

 

 

கோலாலம்பூர்,   29 ஏப்ரல்- சிங்கப்பூர்  பொது உயரம் தாண்டும் போட்டியில் வெற்றி பெற்றுள்ளது மூலம், ரியோ டி ஜெனிரோவில் நடைபெறவிருக்கும் ஒலிம்பிக் போட்டிக்கு மெரிட் அடிப்படையில் தேர்வு பெற்றுள்ளார், நவ்ராஜ் சிங். 

இப்போட்டியில் தங்கப் பதக்கம் பெற்றது மட்டுமல்லாமல்,  கடந்த இரண்டு மாதங்களுக்கு முன்பு  கான்பெர்ரா   டிரக் கிளாசிக் போட்டியில்  2.25 மீட்டர் போட்டியிலும் நவ்ராஜ் சிங் சிறந்த அடைவு நிலையைப் பதிவு செய்துள்ளார். 

"கடந்த 3 மாதங்கள் ஆஸ்திரேலியாவில் பயிற்சி பெற்றபோது,  எனக்கு தொடர் ஆதரவு அளித்த மலேசிய தடகள  சம்மேளனத்திற்கும், மலேசிய விளையாட்டு மன்றத்திற்கும் இவ்வேளையில் நான் நன்றி  தெரிவித்துக்கொள்கிறேன். நான் மிகவும் மகிழ்ச்சியாக இருக்கிறேன். மிகவும் திருப்தியாக இருக்கிறது.  கடந்த மூன்று மாதங்கள் எனக்கு மிகவும் சவால் மிக்கதாக இருந்தது.  நான் என் வெற்றியை நிலைநாட்டுவேன் என சற்றும் எதிர்ப்பார்க்கவில்லை" என அவர் தெரிவித்தார்.

செர்டாங் ஏப் 28 – எப்.ஏ.எம் கிண்ணப் போட்டியில் “ஏ” பிரிவில்  எம்.ஐ.எஸ்.சி-மிஃபா அணி நேற்று மாலை 4.45 மணியளவில் யூ.பி.எம் செர்டாங் மினி திடலில் நடைபெற்ற ஏர் ஆசியா அணியுடான ஆட்டத்தில் கோல் எதுவுமின்றி சமநிலை கண்டதை தொடர்ந்து புள்ளிப் பட்டியலில் 2ஆம் நிலைக்கு சென்றது.

கடந்த 11ஆம் தேதி யூபிஎம் திடலில் நடைபெற்ற ஏர் ஆசியா அணியுடனான ஆட்டத்தில் முற்பாதி முடிவுற்ற நிலையில் மழையின் காரணமாக ஆட்டம் தள்ளி வைக்கப்பட்டது. அதனைத் தொடர்ந்து பிற்பாதி ஆட்டம் நேற்று நடைபெற்றது. 

எப்.ஏ.எம்-இன் விதிமுறைகளின் படி பிற்பாதி ஆட்டம் நடைபெற மட்டுமே அனுமதிக்கப்பட்டது குறிப்பிடத்தக்கது.

ஆட்டம் 0-0 என்ற நிலையில் இருந்த வேளையில், களம் இறங்கிய இரு அணிகளும் வேகமாக கோல் அடிக்கும் முயற்சியில் ஈடுபட்டனர். மிஃபா அணியின் ஆட்டக்காரர்கள் விடாமுயற்சியோடு  விளையாடிய நிலையிலும் கோல் அடிக்க முடியாத சூழல் உருவானது. 

இந்த ஆட்டத்தில் சமநிலை கண்டதால் மிஃபா அணி 19  புள்ளிகளோடு முதலிடத்தை தக்க வைக்க முடியாமல் போனது.

மேலும் மிஃபா அணிக்கான  அடுத்த முக்கிய  ஆட்டம் மே மாதம் 8 ஆம் தேதி ஞாயிற்றுக்கிழமை நடைபெறவுள்ளது. இந்த ஆட்டத்தில் மிஃபா அணி பெல்க்ரா எப்.சி அணியை சந்திக்கிறது. மலாக்கா ஹங் துவா திடலில் இரவு  8.45 மணிக்கு இந்த ஆட்டம் நடைபெறும். 

கடந்த ஆட்டத்தில் மிஃபாவிடம் தோற்ற நிலையில் பெல்க்ரா அணி மிஃபாவை வெற்றிக்கொள்ள கடுமையாக விளையாடுவார்கள். மிஃபா அணியினரும் வெற்றியை தக்க வைக்க போராடும் நிலையில் ஆட்டம் பரபரப்பாக இருக்கும். அதோடு இந்த அணியை மீண்டும் வெற்றிக்கொண்டு மிஃபா அணி முதல் இடத்தை அடையுமா? என்ற கேள்வி எழுந்திருக்கிறது. 

கோலாலம்பூர், ஏப்ரல் 26- எப் ஏ எம் கிண்ணக் கால்பந்துப் போட்டியின் ஏ பிரிவில் எம்ஐஎஸ்சி - மிஃபா குழுவுக்கும் ஏர் ஆசியா எப் சி குழுவுக்கும் இடையேயான கைவிடப்பட்ட ஆட்டம், இன்று செர்டாங்கிலுள்ள யூபிஎம் திடலில் மீண்டும் தொடரவிருக்கிறது.

கடந்த ஏப்ரல் 16ஆம் தேதி இவ்விரு குழுக்களுக்கும் இடையே நடந்த ஆட்டம் கடுன் மழை காரணமாக 45 நிமிடங்களுக்குப் பின்னர் கைவிடப்பட்டது. எனவே, இந்த ஆட்டத்தை புதிதாக நடத்துவதற்குப் பதிலாக விட்ட இடத்திலிருந்து தொடர்வதற்கு எப் ஏ எம் போட்டி ஏற்பாட்டுக் குழு முடிவு செய்தி ருக்கிறது.

இந்த ஆட்டத்தைப் புதிதாக தொடக்கத்திலிருந்து நடத்தப்படுவதற்கு எம்ஐஎஸ்சி-மிஃபா குழு விரும்பியது என்றாலும், போட்டி ஏற்பாட்டுக் குழுவின் முடிவை ஏற்றுக் கொள்வதாக மிஃபா அறிவித்திருக்கிறது.எஞ்சிய 45 நிமிட நேர ஆட்டத்தில் மிஃபா குழு வெற்றியை நிலைநாட்டப் போராடும் என்று குழு நிர்வாகி ஆறு.சின்னச்சாமி தெரிவித்தார்.

இன்றைய ஆட்டத்தில் மிஃபா குழுவினர் வெல்லவார்களேயானால், புள்ளிப் பட்டியலில் மிஃபா குழு முதலிடத்திற்கு முன்னேறிவிடும். தற்போது 21 புள்ளிகளுடன் பெல்க்ரா குழு முதலிடத்தில் உள்ளது. அடுத்து 18 புள்ளிகளுடன்  மிஃபா இரண்டாவது இடத்தில் இருக்கிறது.

தோக்கியோ, ஏப்ரல் 26- எதிர்வரும் 2020ஆம் ஆண்டு ஜப்பானியத் தலைநகர் தோக்கியோவில் நடைபெறவுள்ள ஒலிம்பிக் போட்டிகளுக்கான அதிகாரப்பூர்வ சின்னம் முதலில் வெளியிடப்பட்டவுடன் பெரிய வரவேற்பை பெற்றாலும், பின்னர் சர்ச்சையில் சிக்கியது.

பெல்ஜிய நாடக நிறுவனம் ஒன்றின் சின்னம் போலவே முதலில் வெளியான சின்னம் இருந்தது, அதை உருவாக்கியவர் அடுத்தவருடைய படைப்பை நேர்மையற்ற வகையில் பயன்படுத்துகிறார் எனக் குற்றச்சாட்டுகள் எழுந்தன.

இதையடுத்து தோக்கியோ ஒலிம்பிக் போட்டிகள் ஏற்பாட்டுக்குழு, தேர்தெடுக்கப்பட்ட அந்தச் சின்னத்தை விலக்கிக் கொள்வதாக அறிவித்தது.

இன்று அப்போட்டிகளுக்கான புதிய சின்னம் வெளியானது. அதில் பல கட்டங்கள் இசைவாக இணைந்து வட்டவடிவமாகவும், பாரலிம்பிக் போட்டிக்கான சின்னத்தில் இடையே ஒரு சிறு இடைவெளியுடனும் காணப்படுகின்றன.

உலகின் பல நாடுகளில் சரித்திரபூர்வமாக சதுரம், செவ்வகம், மற்றும் நாற்கோணங்களைக் கொண்ட வடிவங்கள் பிரபலமாக இருக்கின்றன என போட்டி ஏற்பாட்டுக் குழுவினர் தெரிவித்துள்ளனர்.

பல நாடுகளின் கலாச்சாரங்கள், சிந்தனைகள் ஆகியவற்றையும் புதிய சின்னம் பிரதிபலிக்கிறது எனவும் அவர்கள் தெரிவித்துள்ளனர்.

'வேற்றுமையில் ஒற்றுமை' எனும் செய்தியையும் தோக்கியோ ஒலிம்பிக் போட்டிகளுக்கானச் சின்னம் வெளிக்காட்டுகிறது எனவும் ஜப்பானிய ஒலிம்பிக் சம்மேளனம் தெரிவித்துள்ளது.

உலகெங்கும் அனைவரும் பங்குபெறும் வகையில் நடத்தப்பட்ட போட்டி ஒன்றின் மூலம் புதிய சின்னம் தேர்தெடுக்கப்பட்டது.

இறுதியாக அசௌ டோகோலோ சமர்ப்பித்திருந்த வடிவம் தேர்தெடுக்கப்பட்டு இன்று அறிவிக்கப்பட்டது.

நீலாய் மார்ச் 21– எப்.ஏ.எம் கிண்ணப் போட்டியில் மிகவும் பரபரப்பாக எதிர்பார்க்கப்பட்ட ஆட்டத்தில் மலேசிய இந்திய கால்பந்து சங்க அணியான மிஃபா, 1-0 என்ற கோல்கணக்கில் பெல்க்ரா அணியை வீழ்த்தி புள்ளிப் பட்டியலில் முதல் இடத்தை பிடித்தது.

நேற்று மாலை 4.45 மணியளவில் நீலாய் அரங்கத்தில் நடைபெற்ற ஆட்டத்தில் புள்ளிப்ப ட்டியலில் முதல் இடத்தில் இருந்த பெல்க்ரா அணியை 2ஆம் இடத்தில் இருந்த நமது அணி வெற்றிக்கொண்டது.

ஆட்டம் ஆரம்பித்தது முதல் இரண்டு அணி வீரர்களும் அதிரடியாக விளையாடினர். அதனைத்தொடர்ந்து முற்பாதி ஆட்டம் கோல் எதுவும் இன்றி 0-0 என்ற நிலையில் முடிந்தது.

பிற்பாதி ஆட்டம் சூடு பிடிக்க தொடங்கிய நிலையில் நமது அணியின் சார்பில் ரவீந்திரன் அதிரடியாக 1 கோல் அடிக்க ஆட்டம் 1-0 என்று வெற்றி யோடு முடிவடைந்தது.

பெல்க்ரா அணியை வெற்றிக்கொண்ட வீரர்களை மிஃபாவின்  தலைவர் டத்தோ டி.மோகன் வெகுவாக பாராட்டினார். "நமது அணி புள்ளிப் பட்டியலில் முதல் இடத்தை பிடித்திருப்பதும், மேலும் நமது ஆட்டக்காரர்கள் சிறப்பாக விளையாடி வருவதும் மகிழ்ச்சி அளிக்கிறது" என அணி யின் நிர்வாகி ஆறு. சின்னச்சாமி கூறினார். 

 

 

 

 

 

 

 

 

 

 

 

 

 

 

 

 

 

நீலாய், ஏப்ரல் 19- எப்ஏஎம் கிண்ணக் கால்பந்துப் போட்டியில் முன்னணிக் குழுக்களாக விளங்கி வரும் எம்ஐஎஸ்சி- மீஃபா குழுவும் பெல்க்ரா எப்சி குழுவும் நாளை புதன்கிழமை பலப் பரிட்சையில் இறங்கவிருக்கின்றன.

நீலாயிலுள்ள யூனிவர்சிட்டி சைன்ஸ் இஸ்லாம் மலேசியா திடலில் நடைபெறவிருக்கும் இந்த ஆட்டத்தில், 'ஏ' பிரிவில் முதலிடத்தில் இருக்கும் பெல்க்ரா எப்சியும் இரண்டாவது இடத்தில் இருக்கும் எம்ஐஎஸ்சி- மீஃபாவும் மிக உக்கிரமான ஒரு போராட்டத்தை நடத்தவுள்ளன.

'ஏ' பிரிவில் பெல்க்ரா இதுவரை ஆடிய 6 ஆட்டங்களிலும் வென்று 18 புள்ளிகளுடன் முதலிடத்தில் உள்ளது. அதேவேளையில், ஐந்து ஆட்டங்களில் வென்று, ஓர் ஆட்டத்தில் தோல்வி கண்டு 2ஆவது இடத்தில் எம்ஐஎஸ்சி- மீஃபா குழு இருந்து வருகிறது.

"மீஃபா குழு முதலிடத்தை நோக்கி முன்னேற இந்த ஆட்டம் எங்களுக்கு மிக முக்கிய ஆட்டம்" என்று குழு நிர்வாகி ஆறு சின்னச்சாமி வர்ணித்தார். 

"நாங்கள் சொந்த அரங்கத்தில் விளையாடுகிறோம். கடந்த ஆண்டிலிருந்து இதுவரை நாங்கள் சொந்த அரங்கத்தில் தோல்வி கண்டதில்லை. இந்தச் சாதனையைத் தொடர்ந்து தற்காத்து வருவதில் நாங்கள் பெருமை அடைகிறோம்" என்று அவர் தெரிவித்தார்.

மேலும், குழுவை தயார் படுத்தும் நோக்கில் மிகக் கடுமையான பயிற்சிகளில் குழுவை ஈடுபடுத்தி வருகிறார் பயிற்சியாளர் ஜேக்கப் ஜோசப் என்று அவர் சொன்னார்.

அடுத்த ஆண்டில் தகுதி உயர்வுபெற்று பிரிமியர் டிவிசனில் விளையாட வேண்டும் என்று என்ற இலட்சியத்தை அடைய வேண்டுமானால், நாளைய ஆட்டத்தின் வெற்றி மிக முக்கியமானது. 

பெல்க்ரா குழுவையும் அதன் பின்னர் ஏர் ஆசியா குழுவையும் எம்ஐஎஸ்சி- மீஃபா வெல்லுமேயானால், ஆட்டக்கரர்களுக்கு ஊக்குவிப்பு பரிசு வழங்கப்படும் என்று மலேசிய இந்திய கால்பந்து சங்கத்தின் தலைவர் டத்தோ டி.மோகன் தெரிவித்திருப்பதாக நிர்வாகி ஆறு சின்னையா சொன்னார்.

கடந்த சனிக்கிழமை, ஏர் ஆசியாவுக்கு எதிராக மீஃபா  விளையாடிய ஆட்டம், தொடங்கிய 45 நிமிடங்களுக்கு பிறகு கடும் இடிமழை காரணமாக ரத்து செய்யப்பட்டது. இந்த ஆட்டம் பின்னர் ஒரு தேதியில் மீண்டும் நடத்தப்படவுள்ளது என்பது குறிப்பிடத்தக்கது.

 

நாளை பெல்க்ராவுக்கு எதிரான ஆட்டத்தோடு எப்ஏஎம் கிண்ண முதல் சுற்று முடிவு பெறுகிறது. மே மாதம் 8ஆம் தேதியன்று அடுத்த சுற்று ஆட்டத்தில் மீண்டும் பெல்க்ராவுடன் மீஃபா குழு மோதவிருக்கிறது.

More Articles ...