ஜொகூர் பாரு, செப்.2- மலேசியாவின் புகழ்பெற்ற கால்பந்து கிளப்பான ஜொகூர் டாருள் தஷிம் எனப்படும் ஜேடிடி கிளப்பிற்கு இங்கிலாந்தின் முன்னாள் மன்செஸ்ட்டர் யுனைடெட் கால்பந்து வீரர்களான ரியான் ஹிக்ஸ் மற்றும் கெர்ரி நேவில் ஆகியோர் வருகை புரிந்தனர்.

இந்த வருகையின் போது ஜேடிடி கிளப்பின் கால்பந்து வசதிகள் குறித்து அவர்கள் நேரில் கண்டறிந்தனர் என்று அவர்களின் வருகைத் தொடர்பான புகைப் படங்களுடன் ஜேடிடியின் சமூக வலைத்தளத்தில் தகவல் வெளியிடப்பட்டுள்ளது.

## படங்கள்: நன்றி, ஜேடிடி கால்பந்து கிளப் ##

ஜேடிடியின் பாடாங்ஶ்ரீ கெலாம் பயிற்சி மையத்திற்கு வந்திருந்த ரியான் ஹிக்ஸும் கெர்ரி நேவிலும் ஜேடிடி கிளப்பின் அதிபர் துங்கு இஸ்மாயில் சுல்தான் இப்ராகிம் அவர்களைச் சந்தித்துப் பேசினர். ஜேடிடி கிளப்பின் கால்பந்து தூரநோக்குத் திட்டங்கள் பற்றியும் கால்பந்து துறைசார்ந்த பல்வேறு அம்சங்கள் குறித்தும் அவர்கள் விவாதித்தனர்.

கால்பந்து சார்ந்த பல்வேறு ஆக்ககரமான பணித் திட்டங்களில் ஈடுபட்டுவரும் துங்கு இஸ்மாயில், உலகின் முன்னணி கால்பந்து கிளப்புகளுடனும் அதிகாரிகளுடன் பல்வகை பணிகளில் ஈடுபாடு காட்டி வருகிறார்.

ஜெர்மனியின் பொருஷ்யா டோர்ட்முண்ட், ஸ்பெயினின் வாலென்சியா ஆகிய கிளப்புடன் பங்காளித்துவ அடிப்படையிலும் ஜேடிடி கிளப் செயல்பட்டு வருகிறது என்பது குறிப்பிடத்தக்கது. 

 

கோலாலம்பூர், ஆக.29- பாராலிம்பிக் போட்டியில் பங்கெடுக்க மலேசியாவைச் சேர்ந்த குழு இன்று பிரேசில் கிளம்பியது. வீரர்களுக்கு பிரதமர் நஜிப் துன் ரசாக் தனது டிவிட்டரில் வாழ்த்துக் கூறியுள்ளார். இந்த பாராலிம்பிக் போட்டியில் தங்கம் வென்றால் ரிம 1 மில்லியன் வழங்கப்படும் என அரசாங்கம் அறிவித்துள்ளது. 

ரியோவில் நடைபெறவிருக்கும் பாராலிம்பிக் போட்டிக்காக 21 பேர் அடங்கிய குழு இன்று அனைத்துலக விமான நிலையத்திலிருந்து புறப்பட்டது. அடுத்த மாதம் 7ம் தேதி முதல் 18ம் தேதிவரை ஒலிம்பிக் போட்டி நடந்த அதே இடத்தில் பாராலிம்பிக் போட்டி நடைபெறவுள்ளது. மலேசியாவைப் பிரதிநிதித்து டாக்டர் அங் கீன் கூ தலைமையில் போட்டியாளர்கள் இப்போட்டியில் கலந்து கொள்ள உள்ளனர்.

இம்முறை பாராலிம்பிக்கில் தங்கம் வெல்லுபவர்களுக்கு ரிம 1 மில்லியன் வழங்கப்படும் என விளையாட்டுத்துறை அமைச்சர் கைரி ஜமாலுடின் நேற்று தெரிவித்தார். இதுநாள் வரை பாராலிம்பிக் போட்டியில் மலேசியா தங்கத்தை வென்றதில்லை. 

எனவே தங்கம் வெல்லும் போட்டியாளர்களுக்கு தேசிய விளையாட்டு மன்றம் ரிம 1 மில்லியன் வழங்கும். அதேநேரத்தில் வெள்ளி மற்றும் வெண்கலம் வெல்லும் வீரர்களுக்கு முறையே ரிம 3 லட்சம் மற்றும் ரிம 1 லட்சம் வழங்கப்படும் என கைரி தெரிவித்தார். 

பதக்கம் வெல்லுபவர்களுக்கு இந்த வெகுமதி மட்டுமின்றி, வாழ்நாள் முழுதும் மாதந்தோறும் ரிம5000, ரிம3000 மற்றும் ரிம2000 என சிறப்பு ஓய்வூதியம் வழங்கப்படும்.

கடந்த 2012ம் ஆண்டு லண்டனில் நடந்த பாராலிம்பிக் போட்டியில் அம்பு எய்தல் பிரிவில் ஷசிஹின் சனவி வெள்ளிப் பதக்கம் வென்றார் என்பது குறிப்பிடத்தக்கது.

சிப்பாங், ஆக.24- நானும் லின் டானும் என்ன காதலித்து கொண்டிருக்கிறோமா கடிதம் எழுதி கொள்ள? என கிண்டலாக குறிப்பிட்டார் நாட்டின் முன்னணி பூப்பந்து விளையாட்டாளர் டத்தோ லீ சோங் வெய். அண்மையில் சமூக வலைத்தளங்களில் வைரலாக பரவிய லீ சோங்- லின் டான் கடிதம் பெரும் பரபரப்பை ஏற்படுத்தி பின்னர் அது பொய் கடிதம் என்பது கண்டுப்பிடிக்கப்பட்டது.

இன்று தாயகம் திரும்பிய டத்தோ லீ சோங் வெய்யிடம் செய்தியாளர்கள் இக்கடிதத்தைப் பற்றி கேட்டப்போது லீ மேற்கண்டவாறு பதிலளித்தார். "அந்த கடிதத்தை ஏதோ ஒரு சீன செய்தியாளர் தான் எழுதியுள்ளார். அவர் என்ன நாங்கள் காதலிக்கிறோம் என நினைத்துக் கொண்டிருக்கிறாரா?" என கேட்டார். 

'நெட்' வாசகர் கூட்டத்தை வசீகரித்த அந்தக் கடிதம் இப்படிக் கூறுகிறது: 

"சில வேளைகளில் நான் (லின் டான்) உன்னிடம் (லீ சோங்) தோற்கும் போதெல்லாம் எனக்கு வருத்தமே இருந்ததில்லை. ஏனெனில், நீ எனது மாபெரும் மதிப்புக்குரிய பேட்மிண்டன் எதிரி. நான் உன்னிடம் தோற்கவே விரும்புகிறேன். போட்டி முடிந்து உன்னைக் கட்டித் தழுவும் போதெல்லாம் உன்னோடு பத்தாண்டுகளுக்கு மேலாக களத்தில் இருந்து வருவது ஒரு கனவு போலவே இருக்கிறது....."

"ஆகக் கடைசியான ஆட்டத்திற்குப் பின்னர் உனது ஜெர்சியை நான் வாங்கிக் கொண்டது எனது வருங்காலக் குழந்தைக்குத் தருவதற்குத்தான். இந்த ஜெர்சியை என் குழந்தையிடம் கொடுத்து  "லீ சோங் வெய் என்ர அங்கிளின் ஜெர்சி இது. அவர் உன்னுடைய தந்தையின் மாபெரும் மதிப்புக்குரிய எதிரி. அதேவேளையில் மிகச் சிறந்த நண்பரும் கூட... என்று சொல்வேன்..., என்று அக்கடிதத்தில் எழுதப்பட்டிருந்தது.

கோலாலம்பூர், ஆக.24- ஒலிம்பிக்கில் பதக்கம் வென்ற விளையாட்டு வீரர்களுக்கு தலா ரிம 2 லட்சம் கூடுதலாக வழங்கப்படும் என பிரதமர் டத்தோ ஶ்ரீ நஜிப் துன் ரசாக் அறிவித்தார். இன்று அனைத்துலக விமான நிலையத்தில் வீரர்களை வரவேற்க சிறப்பு வருகை புரிந்த போது பிரதமர் இதனை அறிவித்தார்.

பிரேசில் ரியோ நகரில் நடைபெற்ற இவ்வாண்டின் ஒலிம்பிக் போட்டியில் மலேசியா 4 வெள்ளி, ஒரு வெண்கலத்தை வென்றது. மலேசியா வரலாற்றில் ஒலிம்பிக்கில் அதிகமான பதக்கங்களை வென்றது இம்முறை தான் என்பது குறிப்பிடத்தக்கது. 

ஒலிம்பிக் பதக்க வீரர்களுக்கு இதற்கு முன்னமே நிறைய வெகுமதிகளை விளையாட்டு சங்கமும் தனியார் நிறுவனங்களும் அறிவித்துள்ளவேளை, இன்று பிரதமர் ரிம 2 லட்சம் சிறப்பு வெகுமதி வழங்குவதாக அறிவித்தது விளையாட்டு ரசிகர்களிடையே பலத்த கரவோஷத்தை எழுப்பியது. இதற்கு முன்னர் அரசாங்கம் அறிவித்திருந்த தொகையை விட இது கூடுதலாக வழங்கப்படுகிறது.

காம்பெளக்ஸ் பூங்கா ராயாவில் நடந்த ஒலிம்பிக் வீரர்களை வரவேற்கும் வைபவத்திற்காக ஆயிரக்கணக்கான மலேசியர்கள் ஒன்று திரண்டனர்.

கோலாலம்பூர், ஆக.24- மலேசிய வரலாற்றில் ஒலிம்பிக்கில் அதிக பதக்கம் வென்று நாட்டிற்கு பெருமை சேர்த்து இன்று தாயகம் திரும்பிய நம் நாட்டு விளையாட்டு வீரர்களை வரவேற்க ஆயிரக்கணக்கான மலேசியர்கள் புடைச்சூழ பிரதமர் தம்பதிகள் முன்னின்று வரவேற்றனர். அனைத்துலக விமான நிலையத்தில் காம்பெளக்ஸ் பூங்கா ராயாவில் நடந்த வரவேற்பு நிகழ்ச்சிக்காக பிரதமர் டத்தோ ஶ்ரீ நஜிப் துன் ரசாக்கோடு அவரது துணைவியாரும் சிறப்பு வருகை புரிந்தனர்.

மாலை 3 மணிக்கு வீரர்கள் வந்திறங்குவர் என்ற கூறப்பட்ட நிலையில் ஆயிரக்கணக்கான மலேசியர்கள் வீரர்களை வரவேற்க பிற்பகல் தொடங்கி காத்துக்கிடந்தனர். காத்திருந்த மலேசியர்கள் வெறுமனே நிற்காமல் வீரர்கள் வரும் வரை மலேசியா போலே என்று முழக்கமிட்டுக் கொண்டிருந்தனர். 

##டத்தோ லீ சோங் வெய் தனது மகனைத் தூக்கி கொண்டு ரசிகர்கள் நடுவே நடந்து செல்கிறார்

அதோடு, ஆண்கள் ஒற்றையர் பிரிவில் நாட்டிற்கு வெள்ளி பதக்கத்தைப் பெற்று தந்த டத்தோ லீ சோங் வெய்யின் பெயரை முழக்கமிட்டு மலேசியர்கள் ஆராவாரம் செய்தனர். 

பிரேசில் ரியோ நகரில் நடைபெற்ற இவ்வாண்டின் ஒலிம்பிக் போட்டியில் மலேசியா 4 வெள்ளி, ஒரு வெண்கலத்தை வென்றது. மலேசியா வரலாற்றில் ஒலிம்பிக்கில் அதிகமான பதக்கங்களை வென்றது இம்முறை தான் என்பதால் மலேசியர்களிடையே விளையாட்டு வீரர்களை வரவேற்பதில் அளவிலா ஆர்வம் உண்டானது.

கோலாலம்பூர், ஆக.24- கடந்த 12 ஆண்டுகளுக்கு மேலாக பேட்மிண்டன் அரங்கத்தை, தங்களின் ஆட்டக் களமாக அல்லாமல், ஒரு போர்க் களமாகவே மாற்றியவர்கள் மலேசியாவின் லீ சோங் வெய்யும் சீனாவின் லின் டானும்...! இந்தப் பேட்மிண்டன் 'போர்கள்' இவர்களைப் பரமவைரிகளாவே படம் பிடித்துக் காட்டியிருக்கிறது. 

ஒவ்வொரு முறையும் லின் டானுடன் லீ சோங் வெய் களமிறங்கும் போதெல்லாம், மலேசிய ரசிகர்கள் அவரை மிக மோசமான எதிரியாகத்தான் பார்த்து வந்துள்ளனர். ஏனெனில், 37 முறை இவர்கள் இருவரும் மோதியிருக்கிறார்கள். இதில் 25 முறை லீ சோங் வெய்யை லின் டான் வீழ்த்தி இருக்கிறார். 

குறிப்பாக, இரண்டு ஒலிம்பிக் போட்டிகளின் இறுதியாட்டங்களிலும் 4 உலகச் சாம்பியன் இறுதியாட்டங்களிலும் இதர பல நாடுகளின் பொதுப் பேட்மிண்டன் போட்டிகளிலும் லீ சோங் வெய்யை தொடர்ந்து வீழ்த்தி வந்துள்ளார் லின் டான். இவர்கள் இருவருக்கும் இடையேயான அதிரடி மோதல்கள் உலகறிந்த விஷயம்.

அண்மைய ஒலிம்பிக் அரையிறுதி ஆட்டத்தில் லீ சோங் வெய் கடும் போராட்டத்திற்குப் பின்னர் லின் டானை வீழ்த்திய மறுநாள், லீ சோங்  வெய்யிக்கு லின் டான் எழுதியதாக நெஞ்சை நெகிழ வைக்கும் கடிதம் ஒன்று வலைத் தளங்களில் வெளியாகி பரபரப்பை ஏற்படுத்தியது. அந்தக் கடிதம், தங்களுக்கிடையே நட்பின் ஆழத்தை லின் டான் எடுத்தியம்புவதாக அமைந்திருந்தது. ஆனால், அப்படியொரு கடிதம் போலி எனப் பின்னர் உறுதிப்படுத்தப்பட்டது. 

இவர்களின் நட்பை முன்நிறுத்தி யாரோ ஒருவர், மனதைத் தொடும்  வகையில் லின் டான் எழுதியது போல தனது உணர்வுகளை எல்லாம் கொட்டிக் குவித்து ஒரு கடிதத்தை எழுதி, அதை வலைத் தளத்தில் உலவ விட்டு விட்டார். படித்தோரை நம்பச் செய்யும் அளவுக்கு தத்ரூபமாக லின் டான் எழுதியைப் போலவே கடிதம் எழுதப்பட்டுள்ளது.

'நெட்' வாசகர் கூட்டத்தை வசீகரித்த அந்தக் கடிதம் இப்படிக் கூறுகிறது: 

"சில வேளைகளில் நான் (லின் டான்) உன்னிடம் (லீ சோங்) தோற்கும் போதெல்லாம் எனக்கு வருத்தமே இருந்ததில்லை. ஏனெனில், நீ எனது மாபெரும் மதிப்புக்குரிய பேட்மிண்டன் எதிரி. நான் உன்னிடம் தோற்கவே விரும்புகிறேன். போட்டி முடிந்து உன்னைக் கட்டித் தழுவும் போதெல்லாம் உன்னோடு பத்தாண்டுகளுக்கு மேலாக களத்தில் இருந்து வருவது ஒரு கனவு போலவே இருக்கிறது....."

"ஆகக் கடைசியான ஆட்டத்திற்குப் பின்னர் உனது ஜெர்சியை நான் வாங்கிக் கொண்டது எனது வருங்காலக் குழந்தைக்குத் தருவதற்குத்தான். இந்த ஜெர்சியை என் குழந்தையிடம் கொடுத்து  "லீ சோங் வெய் என்ர அங்கிளின் ஜெர்சி இது. அவர் உன்னுடைய தந்தையின் மாபெரும் மதிப்புக்குரிய எதிரி. அதேவேளையில் மிகச் சிறந்த நண்பரும் கூட... என்று சொல்வேன்...,

இப்படி உருக்கமாகக் கூறுகிறது அந்தப் போலிக் கடிதம்...! 

இந்தக் கடிதம் என்னவோ, போலியானது என்பது உண்மை. ஆனால் லீ சோங் வெய்யிக்கும் லின் டானுக்கும் இடையேயான அந்த நட்பு போலியானதல்ல. அது 2000-இல் தொடங்கியது. பையன்களாக பேட்மிண்டன் ஜுனியர் போட்டிகளில் கலந்து கொண்ட காலத்திலேயே இந்த நட்பு தொடங்கிவிட்டது என்று கூறி அப்போது எடுத்துக் கொண்ட புகைப்படங்களை சில தினங்களுக்கு வெளியிட்டுள்ளார் சீனாவின் முன்னாள் தேசிய பேட்மிண்டன் வீரர் பாவ் சூன் லாய். 

அந்த நட்பு பல வெற்றி - தோல்விகளைக் கடந்து பயணப்பட்டுக் கொண்டிருக்கிறது. ரசிகர்களுக்கு வேண்டுமானால், இவர்கள் எதிரிகள். பேட்மிண்டன் களத்தில் இறங்கிவிட்டால் இவர்கள் எதிரிகள். இந்த வட்டத்திற்கு வெளியே இவர்கள் சிறந்த நண்பர்கள். ஒலிம்பிக் அரையிறுதியில் தோல்வி கண்ட பின்னர் லீ சோங் வெய்யை, லின் டான் கட்டித் தழுவிக் கொண்டார். தொடர்ந்து இருவரும் அணிந்திருந்த டி-சர்ட்டுகளை மாற்றிகொண்டனர்.

இப்போது லீயிக்கு 33 வயது. லின் டானுக்கு 32 வயது. இவர்கள் பேட்மிண்டன் களங்களை விட்டு வெளியேறும் விளிம்புகளில் நிற்கின்றனர். ஆனால், இவர்களின் நட்புக்கு விளிம்புகளே இல்லை...!

கோலாலம்பூர், ஆக.24- ஒலிம்பிக்கில் தங்கம் வென்ற ஆசியான் வீரர்கள் இனி இலவசமாக விமானத்தில் பறக்கலாம். ஒருமுறை அல்ல இருமுறை அல்ல. வாழ்நாள் முழுதும் இலவசமாக பயணிக்கலாம். இதனை ஏர் ஆசியாவின் தலைமை செயல்முறை அதிகாரி டான் ஶ்ரீ டோனி பெர்னான்டஸ் தனது முகநூல் அகப்பக்கத்தில் அறிவித்துள்ளார்.

இன்று தனது முகநூலில் டோனி பெர்னான்டஸ்,"ஆசியானில் உருவான ஏர் ஆசியா ஒலிம்பிக் வழி மிகுந்த மகிழ்ச்சி தந்த ஒலிம்பிக் வீரர்களுக்கு சன்மானம் தர முடிவு செய்துள்ளது. விடாமுயற்சியைக் கைவிடாது, உலகில் சிறந்தவர்களாக உருவாக நம்பிக்கை இழக்காது உழைக்கவேண்டும் என்பதை அவர்கள் நமக்கு கற்பித்துள்ளனர். எனவே, ஏர் ஆசியா ஒலிம்பிக்கில் தங்கம் வென்ற ஆசியான் வீரர்களுக்கு வாழ்நாள் முழுதும் இலவசமாக பயணிக்கும் அனுமதியை சன்மானமாக அளிக்கிறது.

அதோடு வெள்ளி மற்றும் வெண்கலம் வென்ற வீரர்களுக்கும் சன்மானம் உண்டு. ஆசியானைச் சேர்ந்தவர்கள் தாங்கள் உலகில் சிறந்தவர்கள் என்பதை நம்பவேண்டும் என்பதே எங்கள் ஆசை. எங்களைக் கனவு காண வைத்து நம்ப வைத்த பதக்கம் வென்ற அனைத்து வீரர்களுக்கும் நன்றி" என அவர் தெரிவித்திருந்தார்.

டோனி பெர்னான்டஸின் பதிவேற்றத்திற்கு பலர் பாராட்டு தெரிவித்து வாழ்த்து கூறி கருத்து தெரிவித்துள்ளனர். அதில் சிலர், அடுத்த தலைமுறையினரை விளையாட்டுத் துறையில் ஈடுபட வைக்க இது சிறந்ததொரு ஊக்குவிப்பு எனவும் கருத்து தெரிவித்திருந்தனர்.

More Articles ...