கோலாலம்பூர், மார்ச் 12-அகில இங்கிலாந்து பேட்மிண்டன் போட்டியில், மலேசிய இரட்டைர் ஜோடிகள் தங்களின் அபார ஆட்டத்தின் வழி காலிறுதிச் சுற்றுக்குத் தேர்வுப் பெற்றனர்.

குறிப்பாக, கூ கியென் கியாட் – டான் பூன் ஹியோங் ஜோடி 21-15, 15-21, 23-21 என்ற புள்ளிகளில் நடப்பு உலகச் சாம்பியனான இந்தோனோசியாவின் முகமட் ஹசான் – ஹெண்ட்ரா செத்தியாவான் ஜோடியை வீழ்ச்சி அதிர்ச்சி அலையை உருவாக்கியது.

அடுத்து மற்றொரு மலேசிய இரட்டையர் ஜோடியான கோ ஷெம் – டான் வீ கியோங் ஜோடி 17-21, 24-22, 23-21 என்ற புள்ளிகளில் கடும் போராட்டத்திற்குப் பின்னர் சீனாவின் சாய் பியாவ் – ஹோங் வெய் ஜோடியை வென்று காலிறுதி ஆட்டத்திற்குத் தகுதி பெற்றுள்ளது.

எனினும், இவ்விரு மலேசிய ஜோடிகளும் காலிறுதி ஆட்டத்தில் மோதவிருக்கின்றன. இதனால், இரு குழுக்களில் ஒன்று, அரையிறுதி ஆட்டத்திற்குத் தேர்வு பெறுவது திண்ணம்.

அனுபவம் வாய்ந்த கூ கியென் கியாட் – டான் பூன் ஹியோங் ஜோடி மீண்டுமொரு முறை அகில இங்கிலாந்து இரட்டையர் சாம்பியன் போட்டியில் சாம்பியனாக வாகை சூட உறுதி பூண்டுள்ளன. 2007ஆம் ஆண்டில் இந்த ஜோடி, அகில இங்கிலாந்து இரட்டையர் சாம்பியன் பட்டதை வென்றது.

மேலும் இந்தப் போட்டியில் சிறந்த இடத்தைப் பிடிக்கும் இரட்டையர் ஜோடி, அடுத்து பிரேசிலில் நடைபெறும் ஒலிம்பிக் போட்டிக்குத் தேர்வு பெறும் வாய்ப்பை எதிர்நோக்கியுள்ளதால், இவர்களுக்கிடையே போட்டி மிகக் கடுமையாக இருக்கும் என்று எதிர்பார்க்கப்படுகிறது.

கோலாலம்பூர், மார்ச் 11- அகில இங்கிலாந்து பேட்மிண்டன் போட்டியின் தொடக்க ஆட்டத்தில் முன்னணி வீர்ர் லீ சோங் வெய் தோல்வி கண்ட போதிலும் அவருக்கு பக்க பலமாக மலேசிய ரசிகர்கள் இருந்து வரவேண்டும் என்று தேசிய பயிற்சியாளர்களில் ஒருவரான  ஹெண்ட்ராவான் வலியுறுத்தினார்.

“இதுவொரு எதிர்பாராத தோல்விதான். குறிப்பிட்ட இந்த ஆட்டத்தில், இந்திய வீர்ர் பிரனீத் மிகச் சிறப்பாக ஆடினார். அவரைப் பொறுத்தவரை ஒரு புதுமுகம். அவர் இழப்பதற்கு எதுவுமில்லை” என்று அவர் சுட்டிக்காட்டினார். 

எனவே, அவருக்கு நெருக்குதல் இல்லை. ஆனால், லீயைப் பொறுத்தவரை அவருக்கு நெருக்குதல் அதிகம். அதன் காரனமாகவே அவர் சில தவறுகளைச் செய்ய நேர்ந்தது என்று ஹெண்ட்ராவான் சொன்னார்.

அடுத்து லீ ஒலிம்பிக் போட்டிக்குத் தயாராகவிருக்கிறார். அவர் தனது ஒலிம்பிக் இலக்கை அடைய நமது ரசிகர்கள் ஆதரவாக இருக்க வேண்டும் என்று அவர் கேட்டுக் கொண்டார்.

கோலாலம்பூர், மார்ச் 11- ஆசிய கால்பந்து சம்மேளன (ஏஎப்சி) கிண்ண சாம்பியன்  போட்டியின் ‘எச்’ பிரிவு ஆட்டத்தில் மலேசியாவின் ஜோகூர் டாருள் தக்‌ஷிம் (ஜேடிடி) குழு 1-0 என்ற கோல்கணக்கில் இந்தியாவின் பெங்களூரு அணியை வென்றது.

ஜேடிடி முற்றிலும் மாறுபட்ட ஒரு குழுவை இந்த  ஆட்டத்தில் களமிறக்கியது. குறிப்பாக, மலேசியாவின் சூப்பர் லீக் ஆட்டத்தைக் கருத்தில் கொண்டு அதன் பயிற்சியாளர் மரியோ கோமஸ், இளம் ஆட்டக்காரர்களை விளையாட அனுமதித்தார்.

இதனால், முற்பகுதி ஆட்டத்தின் போது ஜேடிடி மிகவும் தடுமாற்றத்துடன் காணப்பட்டது. எனினும், பிற்பகுதி ஆட்டத்தின் போது களமிறங்கிய முன்னணி வீர்ர் சஃபிக் ரஹிம்  ஜேடிடியின் வெற்றிக் கோலைப் போட்டார். 

ஏஎப்சி கிண்ணப் போட்டியில் ஜேடிடி குழுவுக்கு இது 2ஆவது வெற்றியாகும். 

லண்டன், மார்ச் 11- என்னால் நம்ப முடியவில்லை. முதல் சுற்று ஆட்டத்திலேயே, புதுமுக ஆட்டக்காரரிடம் தோல்வி கண்டு வெளியேற நேர்ந்திருப்பதை நம்பமுடியவில்லை என்று மலேசியாவின் முன்னணி பேட்மிண்டன் வீர்ர் டத்தோ லீ சோங் வெய் வேதனையுடன் கூறியுள்ளார்.

அகில இங்கிலாந்து பேட்மிண்டன் போட்டியின் முதல் சுற்று ஆட்டத்தில்  இந்திய வீர்ர் சாய் பிரனீத்திடம் லீ சோங் வெய் தோல்வி கண்டார்.

உலகத் தரவரிசையில் 2ஆவது இடத்தில் இருக்கும் லீ சோங் வெய், கடந்த ஜனவரியில் இருந்து 21 ஆட்டங்கள் தொடர்ந்து வாகை சூடி வந்தார்.

“நான் எதிபார்க்கவே இல்லை. இந்தியாவின் புதுமுக வீர்ர் மிகச் சிறப்பாக விளையாடினார். நெருக்குதல் அதிகமாக இருந்தாலும் வென்று விடலாம் என்ற நம்பிக்கையுடன் இருந்தேன் என்று அவர் சொன்னார்.

இந்த முதல் சுற்று ஆட்டத்தில் பிரனீத் 24-22, 22-20 என்ற புள்ளிகளில் லீ சோங் வெய்யை வென்றார்.

முதலாவது செட் ஆட்டத்தின் போது ஒரு கட்டத்தில், 15-7 என்ற புள்ளிகளில் லீ சோங் வெய் முன்னணியில் இருந்தார். அதேபோன்று 2ஆவது செட்டில் 17-12 என்ற புள்ளிகளில்  முன்னணியில் இருந்தார். ஆனால், பிரனீத் தோல்வி முகத்திலிருந்து மீண்டு சாதனைக்குரிய வெற்றியை நிலைநாட்டினார்.

கோலாலம்பூர், மார்ச் 9- மலேசியாவின் முதல்நிலை பேட்மிண்டன் இரட்டையர் ஆட்டக் காரர்களான கோ ஷெம்–டான் வீ கியோங் ஜோடி, அகில இங்கிலாந்து போட்டியில் புதிய அலையை ஏற்படுத்தக்கூடிய வாய்ப்பு இருப்பதாக கருதப்படுகிறது.

இந்தியாவின் பொது பேட்மிண்டன் போட்டியில் சாம்பியனாக வாகைசூடிய இந்த ஜோடி, அதன் பின்னர் ஜெர்மனி போட்டியில் இரண்டாவது சுற்றினை மட்டுமே தாண்டியது. 

உலகத் தர வரிசையில் 16ஆவது இடத்தில் இருக்கும் கோ ஷெம்–டான் வீ கியோங் ஜோடி, நிலையான ஆட்டத்தை வழங்கினால், அகில இங்கிலாந்து போட்டியில் வியப்பூட்டும் வகையில் முன்னேறமுடியும் என்று மலேசிய பேட்மிண்டன் சங்க தொழில்நுட்பத் துறை இயக்குனர் மோர்ட்டன் ஃபுரோஸ்ட் தெரிவித்தார்.

ஜெர்மனியில் ஏற்பட்ட தோல்வி பற்றிக் கவலைப்படாமல் அகில இங்கிலாந்து போட்டியில் கூடுதல் கவனம் செலுத்தினால், அதிர்ச்சி தரும் முடிவுகளை இந்த ஜோடி தர முடியும் என்றார் அவர்.

ஒற்றையர் ஆட்டத்தில், மலேசியாவின் முன்னணி வீர்ரான லீ சோங் வெய் தொடக்க ஆட்டத்தில், இந்தியாவின் சாய் பிரனீத்தைச் சந்திக்கிறார்.

கோலாலம்பூர், மார்ச் 9- ஏஎப்சி கிண்ண கால்பந்துப் போட்டியில், சிங்கப்பூரின் தம்பைன்ஸ் ரோவர்ஸ் குழு, சிலாங்கூரை 1-0 என்ற கோல் கணக்கில் வென்றது எற்கெனவே தோல்விமுகத்தில் இருந்து வரும் சிலாங்கூருக்கு இந்தச் சரிவு மேலும் தர்மசங்கடத்தை ஏற்படுத்தி இருக்கிறது.

கோலாலம்பூரிலுள்ள செலாயாங் நகராண்மைக் கழக அரங்கத்தில் நடந்த இந்த ஆட்டத்தின் 27ஆவது நிமிடத்தில் சிங்கப்பூரின் முன்னாள் தேசிய ஆட்டக்காரர் பைஸ்ருல் நவாஸ் ஷா, தமது குழுவான தம்பைன்ஸ் ரோவர்ஸின் வெற்றிக் கோலைப்போட்டார். 

ஏஎப்சி கிண்ணப் போட்டியின் ‘இ’ பிரிவில் இதுவரை ஆடியுள்ள இரண்டு ஆட்டங்களிலுமே சிலாங்கூர் தோல்வி கண்டுள்ளது. தம்பைன்ஸ் ரோவர்ஸ் குழு இரண்டு வெற்றிகளைப் பெற்று 6 புள்ளிகளுடன் முதலிடத்தில் உள்ளது.