புத்ராஜெயா, மே.13- கோலாலம்பூரில் நடைபெறவிருக்கும் சீ விளையாட்டுப் போட்டியின் போது பாதுகாப்பை உறுதி செய்வதற்காக ஒரு சிறப்புப் படைப் பிரிவு அமைக்கப்பட்டுள்ளதாக உள்துறை அமைச்சரும் துணைப் பிரதமருமான டத்தோஶ்ரீ ஸாஹிட் ஹமிடி அறிவித்துள்ளார் .

எதிர்வரும் ஆகஸ்டு மாதம் 19ஆம் தேதி முதல் 30ஆம் தேதி வரை நடைபெறவிருக்கும் இந்த விளையாட்டுப் போட்டி சுமூகமாகவும் எந்தவொரு தங்கு தடையின்றியும் நடைபெற ‘KL2017 Anti Terrorism Task Force’ என்ற சிறப்பு படைப் பிரிவு அமைக்கப்பட்டுள்ளது.

போலீஸ் மற்றும் ராணுவ வீரர்களை உள்ளடக்கிய இந்த சிறப்புப் படை, பல்வேறு அரசாங்க துறைகளுடன் இணைந்து செயல்பட உள்ளது. விளையாட்டுப் போட்டி ஆரம்பிக்கும் முன் (குற்றத்தை தடுப்பது), போட்டியின் போது (அவசர பாதுகாப்பு நிர்வாகம்) மற்றும் போட்டி முடிந்த பின் (பாதுகாப்பு நிலவரங்களை ஆய்வு செய்தல்) என மூன்று பிரிவுகளாக இந்த சிறப்புப் படைச் செயல்படும். 

மலேசிய மக்களும் வெளிநாட்டினரும் மலேசிய பாதுகாப்பு அமைப்பின் மேல் நம்பிக்கை கொள்ளவே இந்த திட்டம் மேற்கொள்ளப்படுவதாக டத்தோஶ்ரீ ஸாஹிட் கூறினார். 

கோலாலம்பூர் சீ விளையாட்டு பாதுகாப்பு உயர்மட்ட குழுவின் கூட்டத்தில் கலந்து கொண்ட துணைப் பிரதமர் செய்தியாளர்களிடம் பேசியபோது இதனைக் கூறினார்.

புத்ராஜெயா, மே.4- இரு ஆண்டுகளுக்கு ஒருமுறை நடத்தப்பட்டு வரும் மலேசிய இந்தியர் விளையாட்டு விழாவான 'சுக்கிம்'  இந்திய சமுதாயத்தில் போட்டிகள் பல தரமான விளையாட்டாளர்கள் உருவாவதற்கு அடித்தளமாக விளங்குகிறது என்று இளைஞர் விளையாட்டுத்      துறை துணையமைச்சர் டத்தோ சரவணன் குறிப்பிட்டார்.

இன்று புத்ரா ஜெயாவிலுள்ள இளைஞர், விளையாட்டுத்துறை அமைச்சின் டேவான் செர்பகுணாவில், 2017ஆம் ஆண்டுக்கான 'சுக்கிம்' தொடக்க விழா நிகழ்வில் கலந்து கொண்டு பேசிய போது அவர் இதனைக் கூறினார்.

இவ்வாண்டு 4ஆவது சுக்கிம் போட்டி, தஞ்சோங் மாலிமிலுள்ள உப்சி பல்கலைக் கழகத்தில் ஜூலை மாதம் 4ஆம் தேதியிலிருந்து 9-ஆம் தேதிவரையில் நடைபெறவிருக்கிறது.

இப்போட்டிக்கான தொடக்கவிழா நேற்று இங்கு நடைபெற்றது. இவ்விழாவில் துணையமைச்சர் டத்தோ சரவணன், மலேசிய இந்தியர் விளையாட்டு கலாசார அறவாரியத்தின் தலைவர் டத்தோ டி.மோகன், கல்வி அமைச்சின் விளையாட்டுத்துறை இயக்குனர் டத்தோ மொகிந்தர் சிங், ஜொகூர் ஆட்சிக்குழு உறுப்பினர் டத்தோ அசோஜன், பேரா மந்திரி புசாரின் சிறப்புப் பிரதிநிதி டத்தோ இளங்கோவன், மலேசிய இந்தியர் விளையாட்டு கலாசார அறவாரியத்தின் துணைத் தலைவர் ஜே.தினகரன் உள்பட பலருமளிதில் கலந்து கொண்டு சிறப்பித்தனர்.

நான்காவது சுக்கிம் போட்டி அறிமுக விழாவில் பேசிய டத்தோ சரவணன், இந்த விளையாட்டு போட்டியினால், நமது இந்திய சமுதாயம் பலனடையும். நமது இளையோர் சமுதாயம் பலனடையும். உண்மையில் இந்த முயற்சி பாராட்டுக்குரியது. எதிர்காலத்தில் நமது சமுதாயம் பல நல்ல விளையாட்டாளர்களையும் ஓட்டப்பந்தய வீரர்களையும் பெறுவதற்கு சுக்கிம் முக்கிய பங்காற்றும் என்று அவர் நம்பிக்கை தெரிவித்தார்.

முதலாவது சுக்கிம் போட்டி கெடாவிலும் 2ஆவது போட்டி விளையாட்டு ஜொகூரிலும் 3ஆவது சுக்கிம் போட்டி நெகிரி செம்பிலானிலும் நடந்தது. தற்போது அடுத்து 4ஆவது போட்டி பேரா, தஞ்சோங் மாலிம் உப்சி பல்கலைக் கழகத்திலும் நடைபெறவிருக்கிறது என்பது குறிப்பிடத்தக்கது.

 கோலாலம்பூர், ஏப்ரல்.30- 2022-ஆம் ஆண்டுக்கான காமன்வெல்த் கேம்ஸ் மலேசியாவில் நடத்தப்படும் சாத்தியம் அதிகரித்து உள்ளது. 

இந்தப் போட்டியை நடத்த திட்டமிட்டிருந்த தென் ஆப்பிரிக்காவின் டர்பன் நகரம், தகுதி நீக்கம் செய்யப்பட்டு விட்டதால் கோலாலம்பூர் ஏற்று நடத்தக்கூடும் என்று லண்டனிலுள்ள விளையாட்டுச் செய்தி இணையத்தளம் ஒன்று கூறியுள்ளது.

மேலும் இதற்கான விண்ணத்தைச் செய்வதற்கான காலக்கெடு முடிவதற்குள் மலேசியா விண்ணப்பத்தைச் செய்து முடித்திருப்பதை அது மேற்கோள் காட்டி இந்தச் செய்தியை வெளியிட்டுள்ளது.

டர்பனில் போட்டியை நடத்துவதற்கான நிதி உத்தரவாதத்தை தென் ஆப்பிரிக்க அரசாங்கம் வழங்கத் தவறியதால் அது தகுதி நீக்கம் செய்யப்பட்டது. இந்தச் சூழலில் இங்கிலாந்தும் ஆஸ்திரேலியாவும் போட்டியை நடத்த முன்வந்தன.

அதேவேளையில் மலேசியா மற்றும் கனடா ஆகிய நாடுகளும் ஆர்வம் காட்டின. தற்போது இவ்விரு நாடுகளும் 2002-இல் காமன்வெல்த் போட்டியை நடத்துவதற்கான விண்ணப்பத்தை உரிய காலக்கெடு முடிவடைவதற்குள் சமர்ப்பித்து விட்டன என்பது குறிப்பிடத்தக்கது.

கோலாலம்பூர், ஏப்ரல்.28- புத்ராஜெயாவில் நடந்த தேசிய மாணவ செஸ் சாம்பியன்ஷிப் போட்டியின் போது 12 வயது போட்டியாளரான ஒரு சிறுமி அணிந்திருந்த ஆடை மிகக் கவர்ச்சியாக இருப்பதாகக் கூறி நடுவரால் பாதியிலேயே தடுக்கப்பட்டார்.

எம்.எஸ்.எஸ். கோலாலம்பூரின் மாவட்டச் சாம்பியனான அந்த மாணவி, சம்பந்தப்பட்ட செஸ் போட்டியின் இயக்குனராலும் லைமை நடுவராலும்தான் அவமதிக்கப்பட்டு விட்டதாகவே கருதுகிறாள் என்று செஸ் விளையாட்டாளரும் அந்த மாணவியின் பயிற்சியாளருமான குஷால் சந்தர் தெரிவித்தார்.

இரண்டாவது சுற்றுப் போட்டி நடந்து கொண்டிருந்த போது குறுக்கிட்டு, என்னுடைய மாணவியின் உடை முறையானதாக இல்லை கூறிவிட்டார்கள் என்று குஷால் சந்தர் தமது முகநூல் பதிவில் கூறியுள்ளார்.

சிறுமியின் உடை கவர்ச்சிகரமாக இருக்கிறது. சில கோணங்களில் இருந்து பார்த்தால், உணர்ச்சியைத் தூண்டுவதாக உள்ளது என்று தம்முடைய போட்டி இயக்குனர் கருதுகிறார் என்று என்னுடைய மாணவியிடமும் அவருடைய தாயாரிடமும் தலைமை நடுவர் கூறிவிட்டார்.

போட்டி இயக்குனரின் இதந்தகைய கருத்து முற்றிலும் அபத்தமானது, வரம்புக்கு மீறிய செயல் என்று குஷால் சந்தர் சாடினார்.

ஆனால், பேச்சுவார்த்தை நடத்தப்பட்ட போது அந்த மாணவியிடமும் அவருடைய தாயாரிடமும் தலைமை நடுவர் மன்னிப்புக் கேட்டுக் கொண்டார். அவருடைய உடையில் எந்தக் குறையும் இல்லை என்பதை அவர் ஒப்புக்கொண்டார். போட்டி இயக்குனரின் உத்தரவு காரணமாகவே இந்த உடையுடன் அந்த மாணவி கலந்து கொள்ள முடியாது என்று நடுவர் கூறிவிட்டார்.

அதற்குப் பதிலாக, அடுத்த சுற்றில் விளையாட, நீண்ட கை கொண்ட சட்டையை அண்டையிலுள்ள பேரங்காடிக்குச் சென்று வாங்கி அணிந்து கொள்ள அனுமதி அளிக்கப்பட்டது.

ஆனால், அடுத்த சுற்று தொடங்குவதற்கு முன்பு அந்தப் பேரங்காடியிலுள்ள கடைகள் திறக்கப்பட மாட்டாது என அறிந்த மாணவியின் தாயார், பின்னர் போட்டி இயக்குனருடன் பேச முயன்றார். அடுத்த சுற்றுக்கு முன்பு அவரை அழைப்பதாக கூறி ய போட்டி இயக்குனர், கடை அவரை அழைக்கவே இல்லை. தொலைபேசி அழைப்புக்கும் பதில் தரவில்லை.

இதனால், வேறு வழியின்றி அந்த மாணவி போட்டியிலிருந்து வாபஸ் பெற்றுக்கொள்ள நேர்ந்தது. இந்த மாணவி செஸ் போட்டியில் பங்கேற் எடுத்துக் கொண்ட முயற்சி, நேரம் மற்றும் பணம் ஆகிய அனைத்தும் விரயமாகிவிட்டது. செஸ் போட்டியில் மிகச் சிறந்த எதிர்காலத்தைக் கொண்ட சிறுமி அவள் என்று குஷால் சந்தர் வர்ணித்தார்.

20 ஆண்டுகளுக்கு மேலாக செஸ் விளையாடி வருகிறேன். இது போன்ற பிரச்சனை எதனையும் இதுவரை தாம் அறிந்திருக்கவில்லை. இந்தச் செயலுக்காக அந்தப் போட்டி இயக்குனர் மன்னிப்புக் கேட்க வேண்டும் என்று குறிப்பிட்ட அவர், அந்தப் போட்டியின் போது மாணவி அணிந்திருந்த உடையுடன் அவரைப் படம் பிடித்து தம்முடைய முகநூலிலும் பதிவேற்றம்  செய்துள்ளார். 

 

 

 

கோலாலம்பூர் ஏப்ரல்.23 –மலேசிய பிரிமியர் லீக்கில் மிஃபா அணியை நிலைத்திருக்கவும், இந்திய விளையாட்டாளர்களுக்கு வாய்ப்புகளை அதிகப்படுத்தவும் நடந்த மிஃபா நிதி திரட்டும் விருந்து நிகழ்ச்சியில் ஆயிரத்திற்கும் மேற்பட்டோர் கலந்து கொண்டு தங்களது பங்களிப்புக்கு  உறுதி அளித்தனர்.

கோலாலம்பூர் பெர்ஜெயா டைம்ஸ் ஸ்கொயரில் நடைபெற்ற இந்த விருந்து நிகழ்ச்சியில் சிறப்பு விருந்தினராக கலந்து கொண்ட டத்தோஸ்ரீ டாக்டர் சுப்ரமணியம் குறிப்பிடுகையில், இந்தியர்களின் விளையாட்டுத் துறையில் மிஃபா புதிய நம்பிக்கையை ஏற்படுத்தியுள்ளது எனக் கூறினார்.

நமது அணி பிரிமியர் லீக்கில் பயணம் செய்ய பொருளாதார ரீதியில் நாம் பலமாக இருக்க வேண்டும். நிதிப் பற்றாக்குறையை பூர்த்தி செய்ய சமுதாயத்தினர் உறுதுணையாக இருக்க வேண்டும். சமுதாயத்தின் வளர்ச்சி முழுமை பெற விளையாட்டுத்துறை மிக முக்கியமானது என்று அவர் சுட்டிக்காட்டினார்.

கடந்த 60-ஆம் மற்றும் 70-ஆம் ஆண்டுகளில் நாம் விளையாட்டுத் துறையில் சிறந்து விளங்கிய வரலாற்றையும், பொற்காலத்தையும் மீட்டெடுக்க மிஃபா புதிய உத்வேகத்தை அளித்துள்ளது. அதனை மங்காமல் பாதுகாத்து மலரச்செய்வது நமது கடமை என்று குறிப்பிட்டார். 

மிஃபா பயிற்சி முகாம் வழி கிட்டத்தட்ட 2,300 மாணவர்கள் பயிற்சி பெற்று வருகிறார்கள். இதன்வழி  எதிர்காலத்தில் தேசிய தரத்தில் விளையாட்டாளர்களை நாம் உருவாக்க முடியும். அதற்கு நமது ஆதரவும் ,உதவியும் மிக இன்றியமையாதது என்று அவர் சொன்னார்.

இந்திய நிறுவனங்கள் மிஃபா நடத்தும்  12 வயது,14 வயது மற்றும்16 வயதிற்கு உட்பட்டவர்களுக்கான கால்பந்து போட்டிகளுக்கு ஆதரவளிப்பதன் வழி தங்களது பங்களிப்பை சமுதாயத்திற்கு வழங்க முன் வர வேண்டுமெனக் கேட்டுக்கொண்டார்.

மிஃபா பயிற்சி முகாம் விளையாட்டாளர்களுக்கு கால்பந்து போட்டி விளையாட்டுக்களை அதிகப்படுத்துவதன் வழியே தர ஆட்டக்காரர்களைஉருவாக்க முடியும். சமுதாய கால்பந்து வளர்ச்சிக்கு மிஃபா மேற்கொள்ளும் திட்டங்களுக்கு சமுதாய ஆர்வலர்கள் கைகொடுப்பார்கள் என்ற நம்பிக்கை இருக்கிறது.

இந்த நம்பிக்கை தொடர்ந்து நமது செயல்திட்டங்களை விரிவுபடுத்தினால் கண்டிப்பாக இன்னும் 5 முதல் 7 வருடங்களில் தேசிய அளவில் தரம் வாய்ந்த விளையாட்டாளர்களை அதிகமாக உருவாக்கலாம் என்று அவர் தெரிவித்தார். 

இந்நிகழ்ச்சியில் டத்தோ அப்துல் அஸிஸ் ‌ஷாகர், பேராசிரியர் டான்ஸ்ரீ ஹெச்.ஜே முகமது ஹனிபா, மிஃபா துணைத் தலைவர் ஜெ.தினகரன், மிஃபா நிதிக் குழுத் தலைவர் கே.வி.அன்பானந்தன், டான்ஸ்ரீ புவன், டான்ஸ்ரீ ரவிமேனன், டான்ஸ்ரீ டத்தோ பாலன், டான்ஸ்ரீ நல்லா, டத்தோ சிவராஜ் சந்திரன், டத்தோ ஜோசப் அடைக்கலம், டத்தோ இளங்கோ, டத்தோ குணசேகரன், டத்தோ முத்துக்குமார், டத்தோ லோகநாதன், திரு. ஆறுமுகம், திரு. ஜாசன், திரு. கணேசன், மிஃபா விளையாட்டாளர்கள், மிஃபா குடும்பத்தினர், சமுதாய தலைவர்கள், ஆர்வலர்கள் உள்ளிட்ட பலரும் கலந்து கொண்டு சிறப்புச் செய்தனர்.

இந்த நிகழ்ச்சியில் சிறப்பு அம்சமாக மூத்த கால்பந்து வீரர்களான டத்தோ சந்தோக் சிங், டத்தோ கராத்து, டத்தோ சோ சின் ஆன், டத்தோ சுக்கோர் சாலே, திரு.தனபாலன் ஆகியோருக்குச் சிறப்பு செய்யப்பட்டது. 

கோலாலம்பூர், ஏப்ரல் 21- கால்பந்து ஊழல் விவகாரங்களில் ஈடுபட்டதாக சந்தேகிக்கப்படும் நபர்களின் பெயர் பட்டியலை எப்.ஏ.எம் தங்களிடம் ஒப்படைத்துவிட்டதாக ஊழல் தடுப்பு ஆணையம் அறிக்கை விடுத்துள்ளது. சந்தேகிக்கப்படும் நபர்களைக் கண்காணித்து தகுந்த நடவடிக்கை எடுக்குமாறு எப்.ஏ.எம் தலைவரான ஜொகூர் இளவரசர் (டிஎம்ஜே) பணித்ததாக எம்.ஏ.சி.சி விடுத்த அறிக்கையில் குறிப்பிடப்பட்டுள்ளது. 

கால்பந்து வீரர்கள், போட்டி நடுவர்கள், எப்.ஏ.எம் அதிகாரிகள் என பலரும் அந்த பட்டியலில் இடம்பெற்றுள்ளனர். மலேசிய கால்பந்து துறையில் நிகழும் ஊழலைத் தடுக்க வேண்டும் என்ற எண்ணத்தில் டிஎம்ஜே எம்.ஏ.சி.சி ஆணையரை நேரில் சந்தித்து இந்தப் பட்டியலை ஒப்படைத்தார்.

நாட்டில் நிகழும் ஊழல் சம்பவங்களைத் தடுக்க எல்லோரும் சேர்ந்துச் செயல்பட வேண்டும் என்பதற்கு இது ஒரு நல்ல உதாரணம். ஊழலை ஒழித்து மலேசிய கால்பந்துத் துறையை டிஎம்ஜே முன்னேற்றுவார் என்ற நம்பிக்கைப் பலருக்கும் உண்டு. அவரின் இலக்கை அடைய எம்.ஏ.சி.சி கண்டிப்பாக உதவும் என்று அதன் ஆணையர் டத்தோ சுல்கிஃப்லி அகமாட் கூறினார்.

இந்தச் சந்திப்பைத் தொடர்ந்து கால்பந்து ஊழலில் ஈடுபட்ட பலர் கைது செய்யப்படுவர் என்று எதிர்ப்பார்க்கப்படுகிறது.

கோலாலம்பூர், ஏப்ரல் 19- நம் நாட்டின் விளையாட்டுத் துறையில் நிகழும் ஊழல் விவகாரங்கள் கட்டுக்கடங்காமல் போய்விடவில்லை என்று ஊழல் தடுப்பு ஆணையத் துணை ஆணையர் டத்தோ அஸாம் பாக்கி கூறினார்.

கடந்த 5 வருடங்களாக விளையாட்டுத் துறை அதிகாரிகளோ விளையாட்டு வீரர்களோ சம்பந்தப்பட்ட ஊழல் புகார்கள் இன்னமும் விசாரணை நிலையில் தான் உள்ளன. யார் மீதும் இன்னும் குற்றம் சாட்டப்படாத நிலையில் அவர்களைக் குற்றவாளிகள் என்று சொல்லிவிட முடியாது என்றார் அவர்.

விளையாட்டுப் போட்டிக்கான பொருட்களை வாங்குவது, அரங்கங்கள் துப்புரவு பணி என்று ஏதோவொரு சிலர் ஊழல் புரிவது உண்மைதான். ஆனால், அதற்காக ஒட்டுமொத்த விளையாட்டுத் துறைகள் மீதே மக்கள் குறைக் கூற கூடாது என்று அவர் கோரினார்.

இளைஞர், விளையாட்டுத் துறை அலுவலகத்தில் நடைபெற்ற ஊழல் தடுப்பு ஆணையத்தின் கருத்தரங்கில் கலந்து கொண்டு அவர் பேசியபோது இதனைக் கூறினார். நிகழ்ச்சியில் இளைஞர், விளையாட்டுத் துறை அமைச்சர் கைரியும் கலந்து கொண்டார்.

More Articles ...