கோலாலம்பூர், மார்ச். 6- கடும் அரசதந்திர நெருக்கடி உருவாகி இருக்கும் நிலையில், எதிர்வரும் மார்ச் 28ஆம் தேதியன்று மலேசியாவுக்கும் வடகொரியாவுக்கும் இடையிலான ஆசிய கிண்ணத் தகுதிச் சுற்று கால்பந்து ஆட்டம் நடக்குமா, நடக்காதா? என்ற கேள்விக்கு நாளை பதில் கிடைக்கும். 

விமான நிலையத்தில் வடகொரியத் தலைவரின் மூத்த சகோதரர் கிம் ஜோங் நாம் படுகொலை செய்யப்பட்டதை அடுத்து இருநாடுகளுக்கும் இடையேயான உறவில் சிக்கல் ஏற்பட்டிருக்கிறது.

இந்நிலையில் 2019-ஆம் ஆண்டுக்கான ஆசிய கிண்ணக் கால்பந்துப் போட்டியின் தகுதிச் சுற்று ஆட்டங்கள் நடந்து வருகின்றன. இதில் மலேசியாவும் வடகொரியாவும் மார்ச் 28ஆம் தேதி மோதவிருக்கின்றன.

வட கொரியத் தலைநகரான பியோங் பாங்கில் இந்த ஆட்டம் நடைபெறவிருப்பதால், இப்போதுள்ள சூழ்நிலையில் இது சாத்தியமா, இல்லையா? என்பது பற்றி நாளை முடிவெடுக்கப்படும் என்று இளைஞர் மற்றும் விளையாட்டு துறை அமைச்சர் கைரி ஜமாலுடின் தெரிவித்தார்.

இது பற்றி கலந்தாலோசிக்க மலேசிய கால்பந்து கழகத்துடன்  பேச்சுவார்தை நடத்தவுள்ளதாகவும் அவர் கூறினார்.

கிம் ஜோங் நாம் கொலை வழக்கில் மலேசியாவிற்கும் வடகொரியாவிற்கும் கருத்து வேறுபாடு நிலவிவரும் இவ்வேளையில் பியோங்யாங்கில் நடக்கவிருக்கும் இந்தப் போட்டி, பிரச்சனையை உண்டாக்கும் என பலர் கருதுவதாக அவர் தெரிவித்தார். 

எந்தவொரு முடிவாக இருந்தாலும், அது ஆசிய கால்பந்து சம்மேளனத்திற்குத் தெரிவிக்கப்படும் என்று இன்று 13ஆவது நாடாளுமன்ற கூட்டத் தொடரின் தொடக்க நிகழ்வில் பங்கேற்ற பின்னர் செய்தியாளர்களிடம் அவர் தெரிவித்தார். 

 

 

கோலாலம்பூர், மார்ச் 6- எதிர்வரும் ஆகஸ்ட் 19 முதல் 31 வரை மலேசியாவில் நடைபெறவுள்ள சீ விளையாட்டு போட்டியின் ஒரு பகுதியாக சீ போட்டி தொடர் ஓட்டம் நேற்று புருணையிலிருந்து துவங்கியது. 

‘ஒன்றாக உயர்வோம்’ என்ற கருப்பொருளைக் கொண்டு முதன் முறையாக நடைபெறும் இந்த தொடர் ஓட்டத்தை மலேசிய இளைஞர் மற்றும் விளையாட்டு துறை அமைச்சர் கைரி ஜமாலுடின் புருணையிலுள்ள சுல்தான் ஹஸ்ஸானால் பொல்கியா அரங்கத்தில் துவக்கி வைத்தார்.

மொத்தம் 11 நாடுகளை உள்ளடக்கிய இந்த தொடர் ஓட்டம், அடுத்து சிங்கப்பூருக்கு வந்தடையும். பிறகு மலேசியாவில் அந்த தொடர் ஓட்டம், 29ஆவது சீ விளையாட்டு போட்டியின் துவக்க விழாவன்று சீ விளையாட்டுப் போட்டி அரங்கத்தை வந்தடையும்.

தென்கிழக்காசிய நாடுகளிடையே ஒற்றுமையை வளர்க்கவும் இது உதவும் என்று அமைச்சர் கைரி கூறினார். இந்த சீ விளையாட்டு போட்டியும் செப்டம்பர் மாதம் நடைபெறவுள்ள ஆசியான் மாற்றுத் திறனாளிகள் போட்டியும் மிக பிரமாண்டமாக நடந்தேற இதில் பங்கேற்கும் தென்கிழக்காசிய நாடுகள் அனைத்தும் ஒற்றுமையாக இணைந்து செயல்பட வேண்டும் என்றும் அவர் கேட்டுக் கொண்டார்.

இந்த தொடர் ஓட்டத்தின் துவக்க விழாவில் விளையாட்டு வீரர்களுடன் சேர்ந்து அமைச்சர் கைரியும் புருணை இளவரசி சுஃப்ரி பொல்கியாவும் பங்கேற்று ஓடினர். 7.4 கிலோமீட்டர் தூரம் கொண்ட இந்த துவக்க ஓட்டத்தில் புருணை விளையாட்டு ஜாம்பவான்கள் பலரும் கலந்துகொண்டனர்.

 

கோலாலம்பூர், மார்ச் 4- சீனா, பெய்ஜிங்கில் நடந்து வரும் முக்குளிப்புப் போட்டியில் மலேசிய அணி வெள்ளிப் பதக்கத்தைத் தட்டி சென்றது. பதக்கம் வென்ற பண்டேலேலா ரினோங் மற்றும் சியோங் ஹூன் ஹோங் ஜோடிக்கு பிரதமர் நஜிப் தனது வாழ்த்துகளைத் தெரிவித்துக் கொண்டார்.

நேற்று இரவு பெய்ஜிங்கில் ஃபினா உலக வரிசை முக்குளிப்பு போட்டி நடைபெற்றது. அதில் கலந்து கொண்ட பண்டலேலா அணி சிறப்பான புள்ளிகளைப் பதிவு செய்து வெள்ளி பதக்கம் வென்றது. பெண்களுக்கான 10 மீட்டர் ஒருங்கிணைக்கப்பட்ட தளப் போட்டியில் இந்த ஜோடி பதக்கத்தை வென்றது. 

சீனாவைச் சேர்ந்த அணி இப்போட்டியில் தங்கத்தை வென்ற நிலையில், வட கொரியாவைச் சேர்ந்த அணி வெண்கலத்தை வென்றது. 

மலேசியாவின் வெற்று குறித்து, தனது டிவிட்டரில் பதிவேற்றம் செய்திருந்த பிரதமர், "நமது முக்குளிப்பு ராணிகள் பண்டலேலா மற்றும் சியோங் ஜூன் ஹோங் ஆகியோர் வெள்ளிப் பதக்கம் வென்று மீண்டும் நாட்டிற்கு பெருமை தேடி தந்துள்ளனர். வாழ்த்துகள்" என பாராட்டுகளைத் தெரிவித்திருந்தார்.

 சிரம்பான், மார்ச்1- பிரிமியர் லீக் கால்பந்து போட்டியில் பலம் வாய்ந்த நெகிரி செம்பிலான் குழுவை எதிர்த்துக் களம் இறங்கிய மிஃபா அணி 2-1 என்ற கோல்கணக்கில் வீழ்ந்தது. 

பரோய் துவாங்கு அப்துல் ரஹ்மான் அரங்கில் நடந்த இந்த ஆட்டத்தில் இரண்டு அணி வீரர்களும் கடுமையாகப் போராடினர். இரண்டு அனி வீரர்களுமே கோலடிக்கும் முயற்சியில் தீவிரமாக ஈடுபட்டனர் என்றாலும் முற்பகுதி ஆட்டம் முடியவிருந்த தருணத்தில் நெகிரி குழு முதல் கோலைப் போட்டது.

பிற்பாதி ஆட்டத்தின் 50ஆவது நிமிடத்திலும் மீண்டும் ஒரு கோலை நெகிரி புகுத்தியது. இருப்பினும், 53ஆவது நிமிடத்தில் மிஃபா அணியின் சார்பில் மைக்கேல் ஒரு கோலை அடிக்கவே ஆட்டம் சூடுபிடித்தது.

ஆட்டத்தைச் சமமாக மிஃபா தீவிரப் போராட்டம் நடத்தியது.  எனினும், அவர்களின் முயற்சிக்கு கடைசி வரையில் பலன் கிட்டவில்லை. இறுதியில் 2-1 என்ற கோல கணக்கில் நெகிரி குழு வென்றது.

இந்த ஆட்டத்தைக் காண 5,000க்கும் மேற்பட்ட ரசிகர்கள் திரண்டிருந்தனர். மாநில மந்திரி பெசார் டத்தோஸ்ரீ உத்தாமா ஹாஜி முகமது பின் ஹாசன், மிஃபாவின் தலைவர் டத்தோ டி.மோகன், முன்னாள் தேசிய கால்பந்து வீரர் டத்தோ சந்தோங் சிங் ஆகியோரும் கலந்து கொண்டனர்.

அடுத்து எதிர்வரும் 3 ஆம் தேதி வெள்ளிக்கிழமை மாலை 4.45 மணியளவில் கிளானாஜெயா எம்.பி.பி.ஜே திடலில் யு.ஐ.டி.எம் அணியை மிஃபா எதிர்கொள்கிறது.

 

 

நீலாய், பிப்.28– மலேசிய பிரிமியர் லீக் கால்பந்து ஆட்டத்தில் நாளை 28ஆம் தேதி மிஃபா அணி பலம் பொருந்திய நெகிரி செம்பிலான் அணியை எதிர்த்து களம் இறங்குகிறது. இந்த ஆட்டம் துவாங்கு அப்துல் ரஹ்மான், பரோய் திடலில் இரவு 9 மணிக்கு  நடைபெறவுள்ளது.

இந்த ஆட்டம் மிகவும் முக்கியத்துவம் வாய்ந்தது, அதேவேளையில் மிகக் கடுமையான ஆட்டமாக இருக்கும் என மிஃபா நிர்வாகி சேம் தெரிவித்தார்.

பிரிமியர் லீக்கில் மிஃபா கடும் சவால்களை எதிர்நோக்கி இருக்கிறது.

புள்ளிப்பட்டியலில் முதல் இடத்தில் இருக்கின்ற நெகிரி செம்பிலானுக்கு எதிரான நாளைய ஆட்டத்தில் எதிரிகளுக்கு எதிர்பாராத அதிர்ச்சியை ஏற்படுத்தும் வகையில் மிஃபா வீரர்கள் சிறப்பாக விளையாடுவார்கள் என்று நிர்வாகி சேம்  நம்பிக்கை தெரிவித்தார்.

நெகிரிசெம்பிலான் அணியை பொறுத்தவரையில் மிஃபா அணியை விட பலம் வாய்ந்தது. மேலும் பிரிமியர் லீக் ஆட்டங்களில் தொடர் வெற்றிகளை அது பதிவு செய்து வருகிறது. 

இந்நிலையில், நாளைய ஆட்டம் மிஃபாவுக்கு மிகப் பெரிய போராட்டமாக அமையவிருக்கிறது. அதன் தற்காப்பு ஆட்டக்காரர்கள் எதிரிகளின் தாக்குதல்களை முறியடிக்க கூடுதல் விழிப்புடன் செயல்படவேண்டும் என்று நிர்வாகி சேம் வலியுறுத்தினார்.

 ஷாஆலம், பிப்.24- சிலாங்கூர் கால்பந்து சங்க (எப்.ஏ.எஸ்.) புதிய தலைவராக தேர்ந்தெடுக்கப்பட்டுள்ள டத்தோஶ்ரீ சுபஹான் கமால், மீண்டும் சிலாங்கூரை கால்பந்தாட்ட புகழின் உச்சத்திற்குக் கொண்டு வரப் போராடப் போவதாக சூளுரைத்துள்ளார்.

ஒரு வர்த்தகரான 51 வயதுடைய சுபஹான் கமால், சிலாங்கூர் கால்பந்து சங்கத்தின் சிறப்பு பொதுப் பேரவைக் கூட்டத்தில் மாநில கால்பந்து சங்கத்தின் தலைவராக ஏகமனதாக தேர்ந்தெடுக்கப்பட்டார். 

இவர் மலேசிய ஹாக்கி சம்மேளத்தின் தேசியத் தலைவராகவும் இருந்து வருகிறார் என்பது குறிப்பிடத்தக்கது.

அடுத்த ஆண்டு கால்பந்து களத்தில் சிலாங்கூர் அதிரடி ஆட்டத்தை வழங்கும் என்றும் ரசிகர்களின் முழுமையான ஆதரவு தங்களுக்குத் தேவைப்படுகிறது என்றும் அவர் சொன்னார்.

இவ்வாண்டு எங்களின் இலக்கு சூப்பர் லீக்கில் தொடர்ந்து ஆடுவதை நிலைநிறுத்திக் கொள்வதுதான். எங்களின் நிதிப் பிரச்ச்னைகளை களைந்த பின்னர் அடுத்த ஆண்டில் பல புதிய ஆட்டக்காரர்களை விலைக்கு வாங்குவது குறித்துத் திட்டமிடுவோம் என்றார் அவர்.

மலேசியக் கிண்ண போட்டியில் 33 முறை சாம்பியனாக வாகைசூடி வரலாறு படைத்த குழு சிலாங்கூர் ஆகும். சிறப்புப் பேரவைக் கூட்டத்தில் 2017-ஆம் முதல் 2021-ஆம் ஆண்டு வரையிலான காலத் தவனைக்கு தேர்ந்தெடுக்கப்பட்டுள்ள சிலாங்கூர் கால்பந்து சங்க நிர்வாகத்தினர் விபரம் வருமாறு;

தலைவர்: டத்தோஶ்ரீ சுபஹான் கமால்.

துணைத் தலைவர்: டதோஶ்ரீ ஷாரில் மொக்தார்,

உதவித் தலைவர்கள்: 

1) டத்தோ லிம் தியென் ஷியாங், 2) நிஸாம் சானி,

3) கே.பழனிச்சாமி, 4) அப்துல் ரவுப் அகமட்

ஆட்சிக் குழு உறுப்பினர்: டத்தோ எஸ்.சிவசுந்தரம், டத்தோ ரசாக் அப்துல் கரிம், கே.சந்தான ராஜு, டத்தோ முகமட் சஹாரிஷால், ஆர்.சேகர் சந்திரா, முஸ்தாஷா அகமட், ஒமார் அலி, டத்தோ  அரிப்பின், டத்தோ பி.எஸ்.சுகுமாரன்,சைமன் லிம் சுவீ, முகமட் யுனுஸ், நஷாப் ஹிட்ஸான், கே.செண்பகமாறன் ஆகியோர்.

செர்டாங் பிப்.20- இந்திய உயர்கல்வி மாணவர்களிடையே நல்லுறவை ஏற்படுத்தும் நோக்கில் புத்ரா மஇகாவின் ஏற்பாட்டில் மூன்று நாட்கள் நடைபெற்ற போட்டி விளையாட்டு விழாவில் யூ.டி.எம் (ஜோகூர்) அணியி சுழற்கிண்ணத்தை வாகைசூடியது.

மொத்தம் 26 கல்லூரிகளில் இருந்து கிட்டதட்ட 500 மாணவர்களுக்கு மேல் இப்போட்டியில் கலந்து கொண்டனர். போட்டியை மஇகாவின் தலைவரும், சுகாதார அமைச்சருமான டத்தோஸ்ரீ டாக்டர் எஸ்.சுப்ரமணியம் அதிகாரப்பூர்வமாக தொடக்கி வைத்தார்.

இன்றைய நிறைவு விழாவில் மஇகாவின் உதவித்தலைவரும், மிஃபாவின் தலைவருமான டத்தோ டி.மோகன் கலந்து கொண்டு வெற்றி பெற்ற அணிக்கு சுழற் கிண்ணத்தை எடுத்து வழங்கினார்.

ஆண்களுக்கு கால்பந்து போட்டிகளும், பெண்களுக்கு பேட்மிண்டன் போட்டிகளும் நடத்தப்பட்டன. கால்பந்துப் போட்டிகளில் 31 குழுக்கள் பங்கெடுத்தன. யூ.டி.எம் அணி இறுதியாட்டத்தில் லிம்-கோக் விங் அணியை வீழ்த்தி சுழற்கிண்ணத்தை வென்றது.

கால்பந்துப் போட்டிகளில் 2ஆம் இடத்தை லிம் கோக் விங் அணியும் 3ஆம் இடத்தை யூ.எஸ்.எம். நிபோங் திபால் அணியும், 4ஆம் இடத்தை நீலாய் யுனிவர்சிட்டி அணியும் வென்றன.

பேட்மிண்டன் போட்டிகளில் முதல் இடத்தை யு.எம். அணியும், 2ஆம் இடத்தை பி.எஸ்.ஏ.எஸ் அணியும், 3ஆம் இடத்தை யூ.பி.எம்  அணியும், 4ஆம் இடத்தை மணிப்பால் அணியும் வென்றன.

இந்தப் போட்டிகள் குறித்து டத்தோ டி.மோகன் குறிப்பிடுகையில், இந்திய மாணவர்களை ஓரிடத்தில் ஒன்று திரட்டியமைக்கு புத்ரா மஇகாவிற்கு பாராட்டுக்களை தெரிவித்துக் கொள்வதாக கூறினார்.

இந்தப்போட்டிகள் ஆண்டுதோறும் அதிகமான மாணவர்களை கொண்டு நடத்தப்பட வேண்டும். விளையாட்டுத்துறையின் வழி நமது சமுதாய மாணவர்களை ஒன்றுபடுத்தும் நடவடிக்கையாக இது அமைந்துள்ளது என்றார்.

 

More Articles ...