கோலாலம்பூர், ஆக.4- கோலாலம்பூரில் நடைபெறவிருக்கும் சீ விளையாட்டுப் போட்டியின் ஏற்பட்டாளர்கள் இதுவரை 300-க்கும் மேற்பட்ட உபசரிப்பு நிறுவனங்களிடமிருந்து சுமார் 10 கோடி ரிங்கிட்டிற்கும் அதிகமான நிதி தொகையைப் பெற்றுள்ளனர் என்று இளைஞர் மற்றும் விளையாட்டு அமைச்சர் கைரி ஜாமாலுடின் தெரிவித்தார்.
சீ விளையாட்டுப் போட்டிற்குத் தேவையான சுமார் 8 கோடி ரிங்கிட்டை விட அதிகமாக பணம் வசூல் ஆகியிருப்பதற்கு மலேசியர்களின் ஒட்டுமொத்த முயற்சியும், தனியார் மற்றும் அரசுத் துறை நிறுவனங்களின் ஆதரவும்தான் முக்கியக் காரணம் என்று அவர் சுட்டிக் காட்டினார்.
நமது நாடு சீ விளையாட்டுப் போட்டியில் நிறைய பதக்கங்கள் வெல்வதை இலக்காகக் கொண்டுள்ளது என தெனாகா நேஷனல் பெர்ஹாட் (டிஎன்பி) நிறுவனத்தின் சீ விளையாட்டிற்கான நிதி வழங்கும் நிகழ்ச்சியில் கலந்துக் கொண்ட போது அவர் இதனைக் குறிப்பிட்டார்.
இந்த நிறுவனம் தங்கத்திற்கான நிதியாக 30 லட்சத்திலிருந்து 75 லட்சம் ரிங்கிட் வரை கொடுத்து உதவியதாக அவர் சொன்னார்.
அது மட்டுமல்லாமல், இவ்வாண்டு சீ விளையாட்டுப் போட்டி சிறப்பாக நடைபெற தங்களாலான உதவியை செய்ததில் நாங்கள் பெருமிதம் கொள்கிறோம். நிதியுதவியைத் தவிர இப்போட்டி முழுமைக்கும் மின்சார விநியோகம் செய்து உதவப்போவதாக டிஎன்பி நிறுவன தலைமை செயல்முறை அதிகாரி டத்தோ ரோஸ்லான் அப்துல் ரஹ்மான் கூறினார். 
மேலும், 2017-ஆம் ஆண்டின் சீ விளையாட்டுப் போட்டிக்கு  அஜினாமோட்டோ-கோ, ஃபூட்பால் தாய் பேக்டரி ஸ்போர்ட்டிங் கூட்ஸ்  கோ லிமிடெட், நாசா குழும நிறுவனம், பெட்ரோனாஸ், ரேபிட் கேஎல் மற்றும் டிஎம் ஆகிய நிறுவனங்கள் 'பிளாட்டின' அந்தஸ்து கொண்ட
உபசரிப்பு நிறுவனங்களாக திகழ்கின்றன. 
ஏர் ஆசியா, கிரேப், மலேசிய ஏர்ப்போர்ட் பெர்ஹாட், சோனி  ஆகிய நிறுவனங்கள் 'தங்க' அந்தஸ்து கொண்ட உபசரிப்பு நிறுவனங்களாக விளங்குகின்றன.

ஷா ஆலாம், ஆகஸ்ட்.1- விரைவில் ஆரம்பமாகவிருக்கும் சீ விளையாட்டில் கால்பந்து போட்டியின் போது ரசிகர்களிடையே வன்முறையைத் தடுக்க சிறப்புப் போலீஸ் படை கண்காணிப்பில் ஈடுபட்டிருக்கும் என்று கூட்டரசு உள்ளூர் பாதுகாப்பு மற்றும் பொது ஒழுங்குப் பிரிவின் இயக்குனர் டத்தோஶ்ரீ சூல்கிஃப்லி கூறினார். 

அதிலும் குறிப்பாக, கால்பந்தில் சிறந்து விளங்கும் நாடுகள் விளையாடும் போது போலீஸ் கூடுதல் கண்காணிப்புடன் செயல்படுமென ஷா ஆலாம் அரங்கத்தைப் பார்வையிட்ட போது அவர் தெரிவித்தார். 

டாமான்சாரா பெர்டானாவிலுள்ள எம்பையர் சிட்டியின் நிலவரத்தையும் போலீஸ் கண்காணிக்கும் என சூல்கிஃப்லி சுட்டிக் காட்டினார்.

விளையாட்டிற்கான இடங்கள் தயாரான வேளையில் சில கட்டுமானப் பணிகள் மட்டும் அமலில் உள்ளது. ஆக, பாதுகாப்பைக் கருத்தில் கொண்டு  சீ விளையாட்டின் போது குத்தகைக்காரர்களைக் கட்டுமானப் பணியை நிறுத்தி வைக்குமாறு கேட்டுக் கொண்டதாக அவர் கூறினார்.

சிலாங்கூரில் சுமார் 3 ஆயிரம் பேர் உள்ளடக்கிய படை எப்போதும் தயார் நிலையில் உள்ளது என டத்தோஶ்ரீ சூல்கிஃப்லி தெரிவித்தார்.

கோலாலம்பூர், ஜூலை.20- உலக நீச்சல் போட்டியில் ‘டைவிங்’ நீச்சல் பிரிவில் மலேசியாவுக்கு முதன் முறையாக தங்கப் பதக்கத்தைப் பெற்றுத் தந்து வரலாறு படைத்தார் 27 வயதுடைய பேரா வீராங்கனை சியோங் ஜூன் ஹூங். 

இந்தப் போட்டி ஹங்கேரி நாட்டின் தலைநகரான புடாபெஸ்ட்டில் நடந்து வருகிறது. இவருடைய இந்தச் சிறப்புமிக்க வெற்றிக்காக பிரதமர் டத்தோஶ்ரீ நஜிப் தமது பாராட்டுதலைத் தெரிவித்து கொண்டார்.

தம்முடைய டிவிட்டர் செய்தியில் சியோங் ஜூன் ஹூங்கிற்குப் பிரதமர் வாழ்த்துக் கூறினார். பெண்களுக்கான 10 மீட்டர் டைவிங் நீச்சல் போட்டியில் 397.50 புள்ளிகளைப் பெற்று இவர் முதலிடத்தைப் பிடித்து தங்கம் வென்றார்.

2-ஆவது இடத்தை சீனாவின் முன்னாள் உலகச் சாம்பியன் சீ யாஜீ பிடித்து வெள்ளிப் பதக்கம் பெற்றார். மற்றொரு சீன வீராங்கனையான ரென் கியான் வெண்கலப் பதக்கத்தை வென்றார்.

கடந்த 2016-ஆம் ஆண்டு ரியோ ஒலிம்பிக் போட்டியில் மற்றொரு மலேசிய வீராங்கனையான பண்டலேலா ரினோங்கும் இணைந்து மலேசியாவுக்கு வெள்ளிப்பதக்கம் பெற்றுத் தந்தவர் சியோங் ஜூன் ஹூங் என்பது குறிப்பிடத்தக்கது. 

இதனிடையே இவரது வெற்றி, மலேசியாவுக்கு பெருமையைத் தேடித் தந்த தருணமாகப் போற்றப்படுகிறது என்று தம்முடைய வாழ்த்துச் செய்தியில் துணைப்பிரதமர் டத்தோ ஶ்ரீ ஸாஹிட் ஹமிடி கூறினார்.

 

கோலாலம்பூர், ஜூலை.19- ஆசிய கால்பந்து சம்மேளனமான ஏஎப்சியின் 23 வயதுக்கு உட்பட்டோருக்கான ஆசிய சாம்பியன்ஷிப் போட்டியில், இன்று இந்தோனேசியாவுக்கு எதிராக களமிறங்கும் மலேசியக் குழு மிகக் கடுமையான போட்டியைச் சமாளிக்க வேண்டிய போராட்டத்தில் ஈடுபட்டுள்ளது. 

பேங்காக்கில் நடைபெறும் ‘எச்’ பிரிவுக்கான ஏ.எப்.சி சாம்பியன் தேர்வு ஆட்டத்திற்கான பயிற்சிகள் போதுமானதாக இல்லை என்ற குறைபாட்டுடன் மலேசியக்குழு போட்டியைச் சந்திக்க தயாராகி இருக்கிறது என்கிறார் பயிற்சியாளர் டத்தோ ஓங் கிம் சுவீ.

-தேசிய பயிற்சிக்கு வராமல் போனது

-தங்களின் மாநிலங்களுக்கு விளையாடுவதற்காக தேசிய பயிற்சிகளில் இருந்து விளையாட்டாளர்கள் அவ்வப்போது வெளியேறியது 

-பயிற்சியின் போது பாதியிலேயே மலேசிய லீக்கிலுள்ள தங்களின் கிளப்புகளுக்காக ஆட்டக்காரர்கள் விளையாடச் சென்றது

ஆகிய பல பிரச்சனைகளை தாம் எதிர்நோக்க நேர்ந்ததாக டத்தோ ஓங் கிம் சுவீ சொன்னார்.

ஆனால், அதே வேளையில் ‘எச்’ பிரிவின் தேர்வுச் சுற்றில் மலேசியாவுடன் இடம்பெற்றுள்ள இதர குழுக்களான மங்கோலியா, இந்தோனேசியா மற்றும் தாய்லாந்து ஆகியவை முழு வீச்சில் தங்களைத் தயார்படுத்திக் கொண்டுதான் இந்தப் போட்டிக்கு வந்திருக்கின்றனர் என்று அவர் சுட்டிக் காட்டினார்.

மங்கோலியக் குழு கடந்த மார்ச் மாதத்தில் இருந்தே பயிற்சியில் ஈடுபட்டுள்ளது. இந்தோனேசியக் குழு, கடந்த 10 நாள்களுக்கு முன்பே தாய்லாந்துக்கு வந்துசேர்ந்து இங்குள்ள சூழலுக்கு ஏற்ப தங்களைத் தயார்படுத்திக் கொள்வதில் ஈடுபட்டுள்ளனர்.

அதேவேளையில் பலம் பொருந்திய தாய்லாந்து, தனது லீக் ஆட்டங்கள் அனைத்தையும் மூன்று வாரங்களுக்கு முன்பே ஒத்திவைத்துவிட்டு, அனைத்து முன்னணி வீரர்களையும் ஒன்று திரட்டி, பயிற்சிகளில் ஈடுபட்டு வந்துள்ளது.

எது எப்படியிருந்த போதிலும், மலேசியா எதிர்ப்பை முறியடிக்க தன்னால் இயன்ற மட்டும் போராடும் என்று தாம் நம்பிக்கை கொண்டிருப்பதாக டத்தோ ஓங் கிம் சுவீ தெரிவித்தார்.

 

கோலாலம்பூர், ஜூலை.17– நேற்று லண்டனில் நடந்து வரும் உலக பாரா திடல் தடப் போட்டியில்மலேசிய வீரர் அப்துல் லத்தீப் ரோம்லி டி20 நீளம் தாண்டுதலில் தங்கப் பதக்கத்தை வென்று புதிய சாதனை படைத்தார்.

மலேசியாவுக்கான முதல் தங்கப்பதக்கத்தை நேற்று இரும்புக் குண்டு எறியும் போட்டியில் ஸீயாட் சூல்கிஃப்லி வென்றார். அதனைத் தொடர்ந்து அப்துல் லத்தீப் 7.37 மீட்டர் நீளம் தாண்டி இரண்டாவது தங்க பதக்கத்தை மலேசியாவிற்கு வென்று பெருமை சேர்த்தார். 

தொடர்ந்து குரோஷியா சோரன் டலிக் என்பவர் 7.32 மீட்டர் நீளம் தாண்டி வெள்ளி பதக்கமும் மற்றும் 7.12 மீட்டர் நீளம் தாண்டி டிமட்ரோ பிரட்னிகோவ் வெண்கலப் பதக்கம் வென்றார்கள்.

அடுத்த மாதம் கோலாலப்பூரில் நடைபெறவிருக்கும் சீ கேம்சில் ஸீயாட் மற்றும் லத்தீப் களம் இறங்கவிருக்கின்றனர் என்பது குறிப்பிடத்தக்கது.  

 

ஜொகூர் பாரு, ஜூலை.15- தொடங்கவிருக்கும் 29-ஆவது சீ விளையாட்டு மற்றும் 9 ஆவது பாரா விளையாட்டை முன்னிட்டு  'கோலாலம்பூர் தீப ஓட்டம்' அடுத்து ஜூலை 17ஆம் தேதி தொடங்கி 23ஆம் தேதி வரை திரங்கானுவில் நடைபெறவுள்ளது.

சுமார் 235 பேருடன் திரங்கானுவின் பெசுட் மாவட்டத்தில் தொடங்கும் இந்த ஓட்டம், கெமாமான் மாவத்தில் முடிவடையும்.

முதல் பயணமாக வரும் திங்கள் (ஜூலை 17) மதியம் 1மணிக்கு எல்இடி தீபத்தை ஏந்தியபடி 8 முக்குளிப்பு வீரர்கள் பூலாவ் பெர்ஹெந்தியான் கடலில் தீப ஓட்டத்தைத் தொடங்குவர்.

அடுத்து ஓட்டம் மாலை 3.30 மணிக்கு, கோலா பெசுட் ஜெட்டியில் தொடங்கி பெசுட் மாவட்ட அலுவலகத்தில் முடியும்.

மறுநாள் (ஜூலை-18), இந்தப் பயணம் செத்தியா மாவட்டத்தில் தொடங்கி அதற்கு மறுநாள் (ஜூலை-19) உலுத் திரங்கானுவில் முடியும்.

தொடர்ந்து, வியாழன் (ஜூலை-20) காலை 7.30 மணிக்கு கோலா நெருஸ் மாவட்டத்தில் அமைந்துள்ள டத்தாரான் ஆஸ்டின்  தொடங்கும் இந்த ஓட்டம் காலை 9 மணியளவில் டத்தாரான் பெர்மாத்தா செபெராங் டாகீரில் முடிவுறும்.

அன்று மதியம் 3.30க்கு தொடங்கும் அடுத்த ஓட்டம் இஸ்தானா மசியா கோலா திரங்கானுவில் தொடங்கி டத்தாரான் பத்து பூரோக்கில் முடிவுறும். 21ஆம் தேதி ஜூலை மாராங்கிலிருந்து கெலுலுட் கடற்கரைக்கும் 22ஆம் தேதி ஜூலை அன்று டுங்கூனிலிருந்து சுல்தான் மிசான் சைனால் அபிடின் பொலிடெக்னிக்கும் ஜுலை 23ஆம் தேதி கிழக்கு கடற்கரை பெட்ரோனாஸ் அலுவலகத்திலிருந்து கெமாசிக் கடற்கரைக்கும் இந்த தீபம் கைமாற்றப்படும்.

இறுதியாக, ஜூலை 24ஆம் தேதி டத்தாரான் சுக்காயில் தொடங்கும் ஓட்டம் பகாங்-திரங்கானு எல்லையில் நிறைவடையும். அடுத்து, அந்த சீ விளையாட்டு தீபம் காலை 10மணியளவில் பகாங் பிரதிநிதியிடம் கொடுக்கப்படும்.

 

 தஞ்சோங் மாலிம், ஜூலை.9- மலேசிய இந்தியர் விளையாட்டு கலாச்சார அறவாரியத்தின் ஏற்பாட்டில் கடந்த 4 ஆம் தேதி முதல், உப்சியில் நடைபெற்று வந்த சுக்கிம் 2017-இன் ஒட்டுமொத்த சாம்பியன் கிண்ணத்தை சிலாங்கூர் மாநிலம் வென்றது. 

இவ்வாண்டு சிலாங்கூர் 23 தங்கம், 21 வெள்ளி, 16 வெண்கலம் உட்பட 60 பதக்கங்களை வென்றது. இரண்டாம் இடத்தில் பேராக் மாநிலம் 16 தங்கம், 12 வெள்ளி, 27 வெண்கம் உட்பட 55 பதக்கங்களை வென்றெடுத்தது. 1,800 விளையாட்டாளர்களோடு 11 போட்டிகளை உள்ளடக்கி நடைபெற்ற இந்த விளையாட்டு விழா வெகு சிறப்பாக நடந்தேறியது.

அடுத்த ஆண்டுக்கான சுக்கிம் விளையாட்டு விழாவை சிலாங்கூர் மாநிலம் ஏற்று நடத்துகிறது. இன்று நடைபெற்ற கோலாகல பரிசளிப்பு விழாவில்இளம் வீரர்கள் மகிழ்ச்சி வெள்ளத்தில் திளைத்தனர்.

விலாயா மாநிலம் 12 தங்கம்,10 வெள்ளி, 21 வெண்கலம் உட்பட 43 பதக்கங்கள்.

நெகிரி மாநிலம் 9 தங்கம், 9 வெள்ளி, 12 வெண்கலம் உட்பட 30 பதக்கங்கள்.

கெடா மாநிலம் 9 தங்கம், 7 வெள்ளி, 14 வெண்கலம் உட்பட 30 பதக்கங்கள்.

மலாக்கா மாநிலம் 9 தங்கம், 1 வெள்ளி, 9 வெண்கலம் உட்பட 19 பதக்கங்கள்.

ஜோகூர் மாநிலம் 8 தங்கம்,8 வெள்ளி, 22 வெண்கலம் உட்பட 38 பதக்கங்கள்.

பினாங்கு மாநிலம் 6 தங்கம்,23 வெள்ளி, 18 வெண்கலம் உட்பட 47 பதக்கங்கள்.

பகாங் மாநிலம் 5 தங்கம்,5 வெள்ளி,6 வெண்கலம் உட்பட 16 பதக்கங்கள்.

கிளந்தான் மாநிலம் 3 தங்கம், 4 வெள்ளி, 10 வெண்கலம் உட்பட 17 பதக்கங்கள்.

திரெங்கானு மாநிலம் 1 தங்கம், 1 வெள்ளி, 1 வெண்கலம் உட்பட 3 பதக்கங்கள்.

பெர்லிஸ் மாநிலம் 3 வெண்கல பதக்கங்கள்.

பரிசளிப்பு விழாவில் இளைஞர் விளையாட்டுத்துறை துணையமைச்சர் டத்தோ எம்.சரவணன் கலந்து கொண்டார். சுக்கிம் போட்டிகளால் சமுதாயத்தில் விளையாட்டுத்துறை சார்ந்த விழிப்புணர்வு ஏற்பட்டுள்ளது. திறமையை வெளிக்கொணர நமக்கான களம் இருக்கிறது என்ற நம்பிக்கையும் வலுத்துள்ளது என்று குறிப்பிட்டார்.

சுக்கிம் 2017-இன் வெற்றி குறித்து டத்தோ டி.மோகன் கூறுகையில் சமுதாய விளையாட்டுத்துறை வரலாற்றை மீட்டெடுக்க நமது இளம் வீரர்களுக்கான களமாக சுக்கிம் விளங்கி வருகிறது. சுக்கிம் போட்டிகளில் ஜொலிக்கும் வீரர்கள் தேசிய அளவிலும் ஜொலித்து நாட்டிற்கும், சமுதாயத்திற்கும் பெருமை சேர்க்க வேண்டும். 

அதற்கேற்ற நடவடிக்கைகளை எம்.ஐ.எஸ்.சி.எப் மேற்கொள்ளுமென அவர் கூறினார். இந்த சுக்கிம்-2017 சிறந்து விளங்க உறுதுணையாக இருந்த அனைத்து நல்லுள்ளங்களுக்கும் நன்றியினை கூறினார். 

சமுதாய வேட்கையோடு இந்த மாதிரியான போட்டிகளை நடத்துவது மகிழ்ச்சி அளிக்கிறது என்று சுக்கிம் 2017-இன் ஏற்பாட்டுக்குழுத் தலைவர் டத்தோ இளங்கோ கூறினார். எம்.ஐ.எஸ்.சி.எப் இன் துணைத்தலைவர் ஜெ.தினகரன் குறிப்பிடுகையில், சுக்கிம் போட்டிகள் ஆண்டுதோறும் வளர்ச்சி நிலைகளை எட்டிச்சென்று கொண்டிருக்கிறது என பெருமையோடு கூறினார்.

 

 

 

 

More Articles ...