தஞ்சோங் மாலிம், ஜூலை.8– மலேசிய இந்தியர் விளையாட்டு கலாச்சார அறவாரியத்தின் ஏற்பாட்டில் 4ஆவது ஆண்டில் அடியெடுத்து வைத்துள்ள சுக்கிம் போட்டிகள், தஞ்சோங் மாலிம் உப்சியில் நடைபெற்று வருகின்றது. விளையாட்டாளர்கள் அவரவர் மாநிலம் சார்ந்து தங்கத்தை வென்றெடுக்க அதிரடியாக தங்களது திறமைகளை வெளிப்படுத்தி வருகிறார்கள். 

நேற்றைய நிலவரப்படி சிலாங்கூர் மாநிலம் 8 தங்கங்களுடன் பதக்கப்பட்டியலில் முன்னிலை வகிக்கிறது. பேராக் மாநிலம் 5, தங்கப்பதக்கங்களுடன் 2-ம் இடத்தையும், மலாக்கா மாநிலம் 5 தங்கப்பதக்கங்களுடன் 3-ம் இடத்தையும்  பிடித்துள்ளன. 11 போட்டிகளில் கிட்டதட்ட 1800 விளையாட்டாளர்கள் பங்கெடுத்து விளையாடி வருகிறார்கள்.

சிலம்பம், கால்பந்து, ஹாக்கி, ஓட்டப்போட்டிகள், பூப்பந்து, டென்னிஸ், உடற்கட்டழகு, கபடி, கராத்தே, தேக்குவண்டோ, ஸ்குவாஷ் என அனைத்து போட்டிகளும் விறுவிறுப்பாக நடைபெற்று வருகின்றன. 

சுக்கிம் 2017-இல் நூலிழையில் சுக்மாவின் அடைவு நிலைகளை தவறவிட்ட விளையாட்டாளர்களின் வரலாறும் பதிவு செய்யப்பட்டிருந்தது குறிப்பிடத்தக்கது. அதே நேரத்தில் கடந்த கால சுக்கிம் போட்டிகளின் அடைவு நிலைகள் முறியடிக்கப்பட்டது குறிப்பிடத்தக்கது.

மலேசிய இந்தியர் விளையாட்டு கலாச்சார அறவாரியத்தின் தலைவர் டத்தோ டி.மோகன் விளையாட்டாளர்களை சந்தித்து அவர்களிடம் சுக்கிம் 2017- இன் தரம் குறித்து கருத்து பரிமாற்றம் செய்தார். 

அதன் பின் செய்தியாளார்களிடம் பேசிய அவர் குறிப்பிடுகையில் சமுதாய பெற்றோர்களும், விளையாட்டாளர்களும் சுக்கிம் போட்டிகளில் ஆர்வத்தோடு கலந்து கொண்டிருப்பது மகிழ்ச்சி அளிக்கிறது. நம்முடைய இலக்கை அடைய தேவையான அனைத்து நடவடிக்கைகளும் மேற்கொள்ளப்பட்டு வருகின்றன. 

 

தஞ்சோங் மாலிம், ஜூலை.7- இந்திய சமுதாயத்தின் கடந்த கால  விளையாட்டுத்துறை வரலாற்றை மீட்டெடுக்கும் சக்தியாகவும், சமுதாய இளைஞர்கள் தவறான பாதைகளுக்கு செல்வதை தடுக்கும் முயற்சியாகவும்  சுக்கிம் விளையாட்டுப் போட்டி விளங்குகின்றது என்று பேராக் மாநில மந்திரி புசார் டத்தோஸ்ரீ டாக்டர் ஷம்ரி தெரிவித்தார்.

சுக்கிம்-2017 இந்தியர்களுக்கான விளையாட்டுப் போட்டியினை இங்குள்ள உப்சி கல்லூரி திடலில் அதிகாரப்பூர்வமாக தொடக்கி வைத்துப் பேசிய போது அவர் இவ்வாறு கூறினார். 

சமுதாய இளம் விளையாட்டளர்களை ஓரிடத்தில் ஒன்று திரட்டிய முயற்சியையும் அவர் வெகுவாக பாராட்டினார். அத்தனை விளையாட்டாளர்களையும், ஒற்றுமையாக ஓரிடத்தில் ஒன்றாக பார்த்தது மகிழ்ச்சி அளித்தாகவும், விளையாட்டின் வழி ஒழுக்கத்தை கற்பிக்க முடியும் எனவும் அவர் குறிப்பிட்டார்.

துணைப்பிரதமர் இந்த நிகழ்ச்சிக்கு வருகை புரியவிருந்தார். ஆனால், கடைசி நேரத்தில் சில தவிர்க்க முடியாத காரணத்தினால் அவரால் வர முடியவில்லை என்பது குறிப்பிடத்தக்கது.

சுமார் 1,800 விளையாட்டாளர்கள், ஒருங்கிணைப்பாளர்கள், பயிற்றுநர்கள், பெற்றோர்கள் எனக் கிட்டத்தட்ட 5,000 பேர் திரண்டதால் உப்சி கோலாகலம் பூண்டது. 

இந்தக் காட்சிகளை பார்க்கும் பொழுதும், இளைஞர்களின் உற்சாகத்தை ஒப்பிடும் பொழுதும் சமுதாய விளையாட்டுத்துறை வரலாற்றை மீட்கும் நம்பிக்கை வலுத்துள்ளது என மஇகாவின் தலைவரும், சுகாதார அமைச்சருமான டத்தோஸ்ரீ டாக்டர் சுப்பிரமணியம் தெரிவித்தார்.

எம்.ஐ.எஸ்.சி.எப்.-இன் தலைவர் டத்தோ டி.மோகன் குறிப்பிடுகையில் இந்திய சமுதாயத்தின் இளம் வீரர்களுக்கான சிறந்த களமாக சுக்கிம் அமைந்துள்ளது என்றார்  இதன்வழி எதிர்காலங்களில் சிறந்த வீரர்கள் சமுதாயத்தையும், நாட்டையும் பிரதிநிதிப்பார்கள் என்று நம்பிக்கை தெரிவித்தார்

.

சுக்கிம்-2017 ஏற்பாட்டுக்குழுத் தலைவர் டத்தோ இளங்கோ இந்த நிகழ்ச்சி சிறக்க பாடுபடும் அனைவருக்கும் நன்றியை தெரிவித்துக் கொண்டார்.

இந்த நிகழ்ச்சியில் சமுதாய விளையாட்டுத்துறை ஆர்வலர்கள், மஇகாவினர் சுற்றுவட்டார பொதுமக்கள் என பலரும் கலந்து கொண்டினர்.    

விளையாட்டாளர்களின் அழகான அணிவகுப்பு, வானைப் பிளக்கும் வாணவேடிக்கைகள் என சுக்கிம்-2017 அதிகாரப்பூர்வமாக தொடங்கியது.

 

கோலாலம்பூர், ஜூலை,5- அடுத்தமாதம் நடைபெறவிருக்கும் 29 ஆவது சீ கேம்ஸ் மற்றும் 9ஆவது ஆசியான் பாரா விளையாட்டுகளில் கலந்துக் கொள்ளும் தேசிய விளையாட்டாளர்களுக்கு மக்கள் திரண்டு வந்து தங்களின் முழு ஆதரவைத் தெரிவிக்க வேண்டும் எனப் பிரதமர்

டத்தோஶ்ரீ நஜீப் துன் ரசாக் அழைப்பு விடுத்துள்ளார்.

நமது அனைவருடைய ஆதரவு நம் நாட்டு விளையாட்டு வீரர்களுக்குப் பெரும் உற்சாகத்தை ஏற்படுத்துவதோடு அது வெற்றிக்கு ஊன்றுகோலாக அமையும் என்று அவர் தெரிவித்தார். 

நமது நாடு ஒரே சமயத்தில் இரு பெரும் போட்டிகளுக்குத் தன்னைத் தயார்படுத்தி வருவது பெருமைக்குரிய செயலாகும் என்றார் அவர்.

வெற்றியோ, தோல்வியோ நமது விளையாட்டாளர்கள் மலேசியர்கள் அனைவரையும் ஒன்றுபடவைப்பார்கள். எனவே, நாம் நமது வீரர்களுக்கு பக்கபலமாக இருப்போம். 

மிகச் சிறந்த முறையில் தங்களின் விளையாட்டுத்திரனைக் காட்டுவதற்கு நம்முடைய ஒருமித்த ஆதரவு அவர்களுக்கு மிகச் சிறந்த ஊக்குவிப்பாக அமையும் என்று பிரதமர் நஜிப் வலியுறுத்தினார்.  

கடந்த ஆண்டு அக்டோபர் 2017 வரவுசெலவுத் திட்டத்தில் இவ்விரண்டு விளையாட்டுகளுக்காக 45 கோடி ரிங்கிட் அரசாங்கம் ஒதுக்கீடு செய்துள்ளது என அவர் கூறினார். 

பல்வேறு இன, மத மற்றும் கலாச்சாரங்களை உள்ளடக்கிய மலேசியர்களின் ஒற்றுமைக்கு அடையாளமாக இவ்விளையாட்டு நிகழ்ச்சிகள் அமைவதால், அரசாங்கம் இது போன்ற நிகழ்ச்சிக்கு அதிக ஆர்வத்தையும் ஊக்குவிப்பையும் வழங்குகிறது என்றார் அவர். 

 

 கோலாலம்பூர், ஜூலை.4- கோலாலம்பூரில் செப்டம்பர் மாதத்தில் நடைபெறவிருக்கும் 29ஆவது சீ கேம்ஸ் போட்டிக்கான டிக்கெட்டுகள் இன்றுரு முதல் விற்பனைக்கு வந்தன. 

இந்தப்போட்டியின் தொடக்க விழா மற்றும் நிறைவு விழா உள்பட 19 வகை விளையாட்டுப் போட்டிகளுக்கான 10 ரிங்கிட் மற்றும் 20 ரிங்கிட் விலையிலான டிக்கெட்டுகள் இணையம் வழி இன்றைக்கு விற்பனைக்கு வந்தன. இந்த டிக்கெட்டுகளை www.kualalumpur2017.com.my என்ற அகப்பக்கத்தில் வாங்கலாம். 

மேலும், அங்கீகரிக்கப்பட்ட முகப்பிடங்கள் மற்றும் விளையாட்டு அரங்குகளிலும் டிக்கெட்டுகளை வாங்கிக் கொள்ளலாம். 

சில பிரபலமான விளையாட்டுக்களில் ரசிகர்களின் கூட்டத்தைக் கட்டுப்படுத்தவும் சில அரங்குகளில் குறிப்பிட்ட எண்ணிக்கையிலான இருக்கைகள் மட்டுமே இருப்பதாலும் டிக்கெட் விற்பனை முறை அமல்படுத்தப் பட்டிருப்பதாக இளைஞர் மற்றும் விளையாட்டுத்துறை அமைச்சர் கைரி ஜமாலுடின் தெரிவித்தார்.

 சுபாங் ஜெயா ஜூன்.29– இந்திய சமுதாயத்தை பிரதிநிதித்து முதன்முறையாக பிரீமியர் லீக்கில் களம் கண்ட மிஃபா அணிக்கு மென்மேலும் உத்வேகத்தை அளிக்கும் வண்ணம் இரண்டாம் பாதியில் 7 புதிய ஆட்டக்காரர்கள் புதிதாக இடம் பெறவுள்ளனர்.

அனைத்துலக மெகாடெக் கல்லூரியின் அரங்கத்தில் நடைபெற்ற இந்த புதிய ஆட்டக்காரர்கள் அறிமுக நிகழ்ச்சிக்கு மஇகாவின் தலைவரும், சுகாதார அமைச்சருமான டத்தோஸ்ரீ டாக்டர் எஸ்.சுப்பிரமணியம் தலைமை தாங்கி சிறப்பித்தார். 

மூன்று அனைத்துலக ஆட்டக்காரர்களும், நான்கு உள்ளூர் ஆட்டக்காரர்களும் மிஃபாவிற்காக களம் இறங்குகிறார்கள். ஜேப்பில் சின் என்ற கொரிய ஆட்டக்காரர், லூயிஸ் எடுவர்டோ புர்சினோ என்ற பிரேசில் ஆட்டக்காரர், கபாப் சீன் செர்மன் என்ற லைபீரியா ஆட்டக்காரர், மற்றும் பக்ருல், ஷாருல், டார்சென், இசாட் ஆகிய 4 உள்ளூர் ஆட்டக்காரர்கள் இதில் அடங்குவர். 

மிஃபா அணியைக் கண்காணிக்கவும், தொழில்நுட்ப இயக்குநராகவும், பயிற்றுநர் தேவன் நியமிக்கப்பட்டார்.. இந்த நியமனங்கள் குறித்து டத்தோஸ்ரீ டாக்டர் சுப்பிரமணியம்  குறிப்பிடுகையில் 'நமது சமுதாய அணிக்கு புதிய உத்வேகத்தை அளிக்கும் வண்ணம் இந்த விளையாட்டாளர்கள் நியமிக்கப்பட்டுள்ளார்கள். இவர்கள் மற்ற மற்ற அணிகளில் சிறந்து விளங்கிய நிலையில் இன்று மிஃபாவிற்காக களம் காண்பது மகிழ்ச்சி அளிக்கிறது என்றார்.

இவர்களின் வருகையும், பயிற்றுநர் தேவனின் வருகையும் மிஃபா அணிக்கு புதிய பலத்தை அளிக்கும். மேலும் நாம் பிரிமியர் லீக்கில் நிலைத்திருக்கும் நிலைப்பாட்டையும் இவர்கள் உறுதி செய்வர் என்று அவர் கூறினார். 

மிஃபாவின் தலைவர் டத்தோ டி.மோகன் குறிப்பிடுகையில் நமது சமுதாய அணியை வலுப்படுத்த இந்த முயற்சி மேற்கொள்ளப்பட்டது. நமக்கான களம் இருந்தால் மட்டுமே அதன் வழி அதிகமான இளம் விளையாட்டாளர்களுக்கு வாய்ப்புக்களை ஏற்படுத்த முடியுமென சுட்டிக்காட்டினார்.

நீண்ட இடைவெளிகளுக்கு பின் நாளை (30/06/2017) வெள்ளிக்கிழமை மாலை 4.45 மணியளவில் ஷா அலாம் யு.ஐ.டி.எம் திடலில் நடைபெறும் ஆட்டத்தில் மிஃபா அணி கோலாலம்பூர் அணியை சந்தித்து விளையாடுகிறது. இந்த ஆட்டத்தைக் காணவும், ஆதரவளிக்கவும் சமுதாயத்தினர் திரளாக கலந்து கொள்ள வேண்டுமெனவும் அவர் கேட்டுக்கொண்டார்.

கோலாலம்பூர், ஜூன்.23- உலக ஹாக்கி லீக் போட்டியில், பலம் பொருந்திய இந்தியாவை வீழ்த்தி மலேசியக் குழு அரையிறுதி ஆட்டத்திற்குத் தேர்வு பெற்று புதிய சாதனைப் படைத்தது.

உலகத் தர வரிசையில் 6ஆவது இடத்தில் இருக்கும் இந்தியாவை மலேசியா 3-2 என்ற கோல்கணக்கில் வென்றது.

லண்டனில் நடந்துவரும் இந்தப் போட்டியில் நாளை சனிக்கிழமை நடைபெறும் அரையிறுதியாட்டத்தில் ஒலிம்பிக் சாம்பியன் அர்ஜெண்டினாவுடன்  மலேசியா மோதவிருக்கிறது.

ஆட்டத்தின் 19-ஆவது மற்றும் 20ஆவது நிமிடங்களில் இரு பெனால்டி கார்னர்கள் மூலம் மலேசிய வீரர்களான முகமட் ரஸி அப்துல் ரஹ்மான் மற்றும் துங்கு அகமட் தாஜுடின் ஆகிய இருவரும் கோல் அடித்து மலேசியாவை 2-0 என்ற நிலையில் முன்னிலைக்குக் கொண்டு வந்தனர்.

எனினும், 24ஆவது மற்றும் 26ஆவது நிமிடங்களில் இந்திய அணி ராமன்தீப் சிங் வழி இருகோல்களைப் போட்டு ஆட்டத்தை சமன் படுத்தியது.

ஆனால், 48ஆவது நிமிடத்தில் மலேசிய வீரர் முகம்ட் ரஸி மலேசியாவின் வெற்றிக் கோலைப் போட்டார். இதன்வழி உலக லீக் ஹாக்கிப் போட்டியில் மலேசியா முதன் முறையாக அரையிறுதிப் போட்டிக்குத் தேர்வு பெற்றுள்ளது என்பது குறிப்பிடத்தக்கது.

 சென்னை, ஜூன்19- விஸ்வரூபம்-2 வெளியாகி 4 வருடங்களை கடந்த நிலையில், பாகம் 2 வெளியாவதில் தயாரிப்பு நிறுவனத்துக்கும், கமலுக்கும் இடையே இருந்த பிரச்சனைகள் முடிவுக்கு வந்தது. இதனை தொடர்ந்து படப்பிடிப்பை துவங்கினார் கமல்ஹாசன். 

விஸ்வருபம் முதல் பாகம், 2013ஆம் ஆண்டு ஜனவரி மாதம் 25 ஆம் தேதி வெளியானது. அதன்பிறகு இரண்டாம் பாகம் வெளியாவதில் தயாரிப்பு நிறுவனத்திற்கும், கமல்ஹாசனுக்கும் இடையே நிலவிவந்த பிரச்சனைகள் ஒருவழியாக முடிவுக்கு வந்தது. 

இதனை தொடர்ந்து, பல வருடங்கள் கிடப்பில் கிடந்த விஸ்வரூபம்-2 திரைப்படத்தின் பட வேலைகளில், மீண்டும் மும்முரமாக நடிகர் கமல்ஹாசன் ஈடுபட்டு வருகிறார். 

இரண்டாம் பாகத்தின் பெரும்பாலான காட்சிகளை, விஸ்வரூபம் முதல் பாகம் எடுக்கும் போதே கமல்ஹாசன் படமாக்கிவிட்டார். தற்போது 4 வருடங்களுக்கு பிறகு துருக்கி நாட்டில் “விஸ்வரூபம்-2” படப்பிடிப்பை துவங்கிஇருக்கிறார். 

இந்நிலையில் விஸ்வரூபம் இரண்டாம் பாகத்தின் இறுதி பாடல் ஒலிப் பதிவையும் கமல்ஹாசன் முடித்து விட்டதாக தகவல்கள் வெளியாகியுள்ளன. 

இந்தி மொழிக்கான பாடல் வரிகளை பிரசூன் ஜோசியும், தமிழ் மொழிக்கான பாடலை கமல்ஹாசனும் எழுதியுள்ளனர். இன்னும் சில நாட்களில் தெலுங்கு மொழிக்கான பாடலும் பதிவும் நடைபெறும் என கூறப்படுகிறது.

படத்தின் இறுதிக்கட்ட வேலைகள் விறுவிறுப்பாக நடைபெற்று வருவதால், வரும் அக்டோபர் 18-ஆம் தேதி விஸ்வரூபம்-2 வெளியாகும் என எதிர்பார்க்கப்படுகிறது. 

More Articles ...