கோலாலம்பூர், ஏப்ரல் 11- தமிழ்ப்பள்ளி மாணவர்களுக்காக பூப்பந்து போட்டி ஒன்றை ஶ்ரீ முருகன் நிலையமும் மலேசிய இந்திய பூப்பந்து சங்கமும் இணைந்து ஏற்பாடு செய்துள்ளன. இதற்கான அறிமுக விழா கடந்த ஞாயிற்றுக்கிழமை ஶ்ரீ முருகன் நிலைய தலைமையகத்தில் நடைபெற்றது.

மாநில மற்றும் தேசிய அளவிலான போட்டிகள் என இரண்டு பிரிவுகளாக இந்த போட்டி நடத்தப்படும். மாநில நிலையில் தகுதியாளர் சுற்று நடத்தப்பட்டு அதில் வெற்றிப் பெறுபவர்கள் தேசிய நிலையான இறுதிச் சுற்றில் பங்கெடுப்பார்கள்.

இவ்விரண்டுப் பிரிவுகளிலும் வெற்றிப் பெறுபவர்களுக்கு ரொக்கப் பணம் பரிசாக அளிக்கப்படுவதோடு தேசிய நிலை வெற்றியாளருக்கு சுழற்கிண்ணமும் வழங்கப்படும்.

தமிழ்ப் பள்ளி மாணவர்கள் விளையாட்டுத் துறையில் ஆர்வம் செலுத்துவதை ஊக்குவிக்கும் நோக்கத்தில் இந்த பூப்பந்து போட்டி ஏற்பாடு செய்யப்படுவதாக மலேசிய இந்திய பூப்பந்து சங்கத்தின் தலைவர் தனபாலன் கூறினார்.

இந்த அறிமுக விழாவிற்கு ஶ்ரீ முருகன் நிலைய இளைஞர் பிரிவு ஒருங்கிணப்பாளர் சுரேன், மலேசிய இந்திய பூப்பந்து சங்கத் தலைவர் தனபாலன், கடந்தாண்டு செல்கோம் அக்சியாத்தா பூப்பந்து போட்டி வெற்றியாளர் தீனா முரளிதரனும் கலந்துக் கொண்டனர்.

இந்த பூப்பந்து போட்டியின் விவரங்களைப் பெற விரும்புவோர் 0175551167 (ரூபன்) மற்றும் 0143304858 (ஷர்வின்) எனும் தொலைப்பேசி எண்களுக்குத் தொடர்புக் கொள்ளலாம் என ஏற்பாட்டாளர் குழு தெரிவித்தது.

 கோலாலம்பூர், ஏப்ரல்,11- கால்பந்து விளையாட்டின் வளர்ச்சியையும், அதன் தரத்தையும் கால்பந்து சூதாட்டம் பாதிக்கும். இதனைத் தடுப்பது அனைவரின் கடமை. காலபந்து அணிகள் சூதாட்டங்களில் ஈடுபடும் விளையாட்டாளர்களைக் கண்டுபிடித்து அவர்கள் மீது நடவடிக்கை எடுக்க முன்வர வேண்டும் என்று முன்னாள் கால்பந்து வீரர் சந்தோக் சிங் வலியுறுத்தினார்.

கால்பந்தாட்ட சூதாட்டம் மிகவும் மோசமானது. நாட்டுக்கு களங்கத்தை ஏற்படுத்தக் கூடியது. தரமான வளர்ந்துவரும் விளையாட்டாளர்கள் தவறான பாதைக்குச் சென்று தங்களது வாழ்க்கையை தொலைக்கவும் இது காரணமாகிறது. திறமையும், கட்டொழுங்கும் இருந்தால் மட்டுமே ஒருவர் சிறந்த விளையாட்டாளராக வர முடியும் என்றார் அவர். 

கால்பந்துட சூதாட்டங்களில் ஈடுபடும் விளையாட்டாளர்களுக்கு வாழ்நாள் தடை விதிக்கப்படுமென எப்.ஏ.எம் தலைவர் துங்கு இஸ்மாயில் சுல்தான் இப்ராஹிம் (டி.எம்.ஜே)  அறிவித்திருப்பது வரவேற்கத்தக்கது. இத்தகைய கடுமையான  நடவடிக்கைகளின் மூலமாகவே மலேசிய கால்பந்துத் துறையில் சிறந்த மாற்றத்தை ஏற்படுத்த முடியுமென சந்தோக் சிங் கருத்துரைத்தார்.

அண்மையில் கால்பந்து சூதாட்டத்தில் ஈடுபட்ட ஆட்டக்காரர்களுக்கு எதிராக மிஃபா மேற்கொண்ட துரித நடவடிக்கைகள் பாராட்டுக்குரியது. மிஃபாவின் தலைவர் டத்தோ டி.மோகன் தூரநோக்கு சிந்தனையோடும், அணியின் கட்டொழுங்கை நிலைநிறுத்தும் வண்ணமும் நல்லதொரு முடிவெடுத்துள்ளார் என்று சந்தோக் சிங் சுட்டிக்காட்டினார்.

மிஃபாவைப் பொறுத்தவரையில் இந்திய சமுதாயத்தைப் பிரதிநிதிக்கும் அணியாக தனது பாதையில் இருந்து மாறாது முன்னோக்கி சென்று கொண்டிருக்கிறது. சரியான வழிகாட்டுதலோடு முறையாக கட்டொழுங்கோடு இந்த அணி மென்மேலும் வளர்ந்து மலேசிய கால்பந்துத் துறையில் சிறந்த இடத்தை அடையும், அதற்கேற்ப மிஃபா நிர்வாகமும் செயல்படுமென டத்தோ சந்தோக் சிங் நம்பிக்கை தெரிவித்தார்.

கூச்சிங், ஏப்ரல்.9- மலேசிய பொது பேட்மிண்டன் போட்டியின் ஒற்றையர் இறுதியாட்டத்தில் மலேசியாவின் முன்னணி வீரரும் மூத்த வீரருமான லீ சோங் வேய் சீனாவின் மூத வீரர் லின் டனிடம் தோல்விகண்டார்.

இந்தப் போட்டியில் மீண்டும் உச்சநிலையிலான ஓர் ஆட்டத்தை வழங்கிய லின் டான் 21-19 மற்றும் 21-14 என்ற புள்ளிகளில் லீ சோங் வெய்யை வென்றார். 

உலக ரீதியில் முக்கிய பேட்மிண்டன் போட்டிகள் அனைத்திலும் வென்றுள்ள லின் டான், இதுவரை மலேசிய பொதுப் போட்டியில் வென்றதே இல்லை. இன்று அந்த இலக்கையும் அவர் அடைந்தார்.

லீ சோங்கிற்கு எதிராக 36 முறை விளையாடி இருக்கும் லின் டான் 25 ஆவது முறையாக அவரை வென்றுள்ளார். 

எப்போதுமே லீ சோங் வெய்க்கு எதிராக விளையாடும் போது நான் சிறந்த ஆட்டத்தையே வழங்கி வந்துள்ளேன். அது மீண்டும் ஒருமுறை நிருபிக்கப் பட்டிருக்கிறது என்றார் லின் டான்.

"தொடக்க செட்டில் நான் முன்னிலை வகித்த நிலையில் சில தவறுகளால் அந்த செட்டை இழந்தேன். இந்த தொடக்க செட் தான் மிக முக்கியமானது. அதை இழந்தது தான் எனது தோல்விக்குக் காரணம் என்று லீ சோங் வெய் சொன்னார்.

இதனிடையே தாங்கள் பேட்மிண்டன் அரங்கில் மூத்த ஆட்டக்காரர்களாக விளங்கிய போதிலும் இப்போதைக்குத் தாங்களிடம் ஓய்வு பெறும் திட்டம் எதுவுமில்லை என்று இருவருமே அறிவித்துள்ளனர்.

 கூச்சிங், ஏப்ரல்,9- மலேசியர்கள் உள்பட உலகளவில் ரசிகர்களால் பெரிதும் எதிர்பார்க்கப்படும் பேட்மிண்டன் யுத்தத்தில் இன்று மலேசிய வீரர் லீ சோங் வெய்யும் சீன வீரர் லின் டானும் மோதுகின்றனர்.

கூச்சிங்கில் பெட்ரா அரங்கத்தில் இன்று இரவு நடக்கும் மலேசிய பொது பேட்மிண்டன் இறுதி ஆட்டத்தில் மூத்த பேட்மிண்டன் வீரரகளான லீ சோங்கும் லின் டானும் மோதுவதைக் காண உலகளவில் ரசிர்கள் மிகுந்த ஆர்வத்துடன் உள்ளனர்.

நல்ல நண்பர்களாக இருந்தாலும், பேட்மிண்டன் களத்தில் பரம வைரிகளாக விளங்கிவரும் இவர்கள் இருவரின் மோதல்கள் கடந்த காலங்களில்லும் பெரும் பரப்பரப்பாக அமைந்து வந்துள்ளன.

இன்றைய ஆட்டத்தில் வென்றால், லீசோங் வெய் 12ஆவது முறையாக மலேசிய பொது சாம்பியன் பட்டத்தைக் கைப்பற்றி சாதனை படைத்தவராவார்.

அதேவேளையில், லின் டான் வென்றால் மலேசிய பொது சாம்பியன் பட்டத்தை அவர் வாகைசூடுவது இதுவே முதன்முறையாக இருக்கும். இதுவரை லின் டான் கைப்பற்றாமல் போனது மலேசிய சாம்பியன் பட்டம்தான் என்பது குறிப்பிடத்தக்கது.

நேற்று நடந்த அரையிறுதி ஆட்டத்தில் ஹாங்காங்கின் வின்செண்ட் வோங்கை 21-12, 21-9 என்ற புள்ளிகளில் வென்று இறுதியாட்டத்திற்குள் நுழைந்தார் லீ சோங் வெய்.

மற்றொரு அரையிறுதி மோதலில் லின் டான் 27-25, 19-21, 21-16 என்ற புள்ளிகளில் கடும் போரட்டத்திற்குப் பின்னர் தென் கொரியாவின் சோன் வான் ஹோவை வீழ்த்தினார்.

லின் டான் மிகச் சிறப்பாக விளையாடுகிறார். அவரது அரையிறுதி ஆட்டம், அவரது வலுவான நிலையைக் காட்டுகிறது. எங்கள் இருவருக்குமே வயதாகி விட்டது. இந்நிலையில் இளைஞர்களை வீழ்த்தி இருவரும் இறுதியாட்டத்திற்கு வந்திருப்பது மகிழ்ச்சி அளிக்கிறது என்றார் லீ சோங் வெய்.

நாங்கள் இருவரும் மோதுவதைக் காண ரசிகர்கள் எப்போதுமே ஆசைப்படுகிறார்கள். நாங்கள் பலமுறை மோதிவிட்டோம். இப்போதெல்லாம் மலேசிய ரசிகர்கள் என்னை விரோதமாக பார்த்ததில்லை. எனக்கு அவர்கள் மத்தியில் நிறைய ஆதரவு உள்ளது என்றார் லின் டான். 

புத்ரா ஜெயா, ஏப்ரல்.8- குறைந்தபட்ச ஊதியமும் ஆடம்பர வாழ்க்கையின் மீதுள்ள மோகமும்தான் எம்.ஐ.எஸ்.சி - மிஃபா கால்பந்து அணியைச் சேர்ந்த மூன்று ஆட்டக்காரர்கள் லஞ்சம் பெறுவதற்கு காரணமாக இருந்திருக்கலாம் என இளைஞர், விளையாட்டுத் துறை அமைச்சர் கைரி ஜமாலுடின் தெரிவித்தார்.

அண்மையில் கால்பந்து ஆட்ட முடிவுகளை நிர்ணயப்பதில் பல ஆயிரம் வெள்ளி லஞ்சம் பெற்ற குற்றச்சாட்டின் பேரில் மிஃபா அணியைச் சேர்ந்த முக்கிய மூன்று ஆட்டக்காரர்கள் மலேசிய ஊழல் தடுப்பு ஆணை அதிகாரிகளால் கைது செய்யப்பட்டனர்.

கால்பந்து சூதாட்ட இடைத்தரகர் என்ற அடிப்படையில் பூச்சோங் வட்டாரத்தை சேர்ந்த உலோக மறுசுழற்சி கடைப் பணியாளர் ஒருவரும் கைது செய்யப்பட்டார்.

அவர்கள் அனைவரும் தற்போது 2009-ஆம் ஆண்டின் எம்.ஏ.சி.சி சட்டத்தின் 16(a) (A) பிரிவில் கீழ் விசாரணைக்காக ஏழு நாட்களுக்கு தடுத்து வைக்கப்பட்டுள்ளனர்.

இது குறித்து கருத்துரைத்த அமைச்சர் மேற்கண்டவாறு கருத்துரைத்தார்.

முதல் தவணையில் மலேசிய பிரிமியர் லீக் போட்டிக்கு தகுதி பெற்று அக்குழு முன்னேறிய பின்பு தான் இது போன்ற சம்பவங்கள் நிகழத் தொடங்கி இருக்கக்கூடும் என்று எனக்குத் தெரிய வந்தது. காரணம், இந்தப் போட்டியில் கலந்து கொண்ட பின்னர்தான் அந்த ஆட்டக்காரர்கள் மக்கள் மத்தியில் பிரபலம் அடைந்தனர்.

பிற அணியில் விளையாடும் ஆட்டக்காரர்கள் பெறும் அதிகச் சம்பளத்தின் மீதும் ஆடம்பர வாழ்க்கையின் மீதும் கொண்ட மோகம் தான் அவர்களை இது போன்ற செயல்களைச் செய்யத் தூண்டியுள்ளது என்றும் தாம் கருவதாக அவர் சொன்னார்.

மேலும் மிஃபா அணிக்கு அதிகளவில் நிதி ஒதுக்கீடோ, அல்லது ஆட்டக்காரர்களுக்கு உயர்ந்த சம்பளமோ வழங்கப்படவில்லை என்று  மஇகா தேசிய தலைவர் டத்தோஶ்ரீ டாக்டர் .சுப்பிரமணியம் கூறிய கருத்தை அடிப்படையாக கொண்டு தான் இவ்வாறு தாம் குறிப்பிடுவதாக கைரி ஜமாலுடின் தெரிவித்தார்.

இதற்கிடையே இந்த விவகாரத்தில் துல்லியமாக செயல்பட்ட மலேசிய ஊழல் தடுப்பு ஆணையத்தை பாராட்டிய அமைச்சர் கைரி,

இந்த கைது நடவடிக்கை இதர ஆட்டக்காரர்களுக்கும் அணிகளுக்கும் ஒரு பாடமாக இருக்கட்டும்.காரணம் சட்டப்பூர்வமான நடவடிக்கையால் மட்டுமே இது போன்ற லஞ்சம், சூதாட்டத் தரகர் செயல்களை தடுக்கமுடியும் என்றும் கூறினார்.

இந்த வழக்கில் மிஃபாவும், எப்.ஏ.எம் எனப்படும் மலேசிய கால்பந்து சங்கமும் முழுமையான ஒத்துழைப்பை வழங்கும் என்றும் அமைச்சர் நம்பிக்கை தெரிவித்தார்.

கோலாலம்பூர், ஏப்ரல்.8- மலேசிய இந்தியர் விளையாட்டு கலாச்சார அறவாரியத்தின் ஏற்பாட்டில் ஆண்டுதோறும் நடத்தப்படும் மலேசிய இந்தியர் விளையாட்டுப் போட்டிகளை (சுக்கிம்) இவ்வாண்டு பேராக் மாநிலம் ஏற்று நடத்துகிறது. அதற்கான முதற்கட்ட பணிகள் தீவிரமாக நடைபெற்று வருகின்றன.

எம்.ஐ.எஸ்.சி.எப்-இன் தலைவர் டத்தோ டி.மோகன், சுக்கிம் ஏற்பாட்டுக் குழுத் துணைத்தலைவர் டத்தோ இளங்கோ ஆகியோர்  தலைமையில் இந்தப் போட்டிகள் தொபர்பான சிறப்புக் கூட்டம் நடைபெற்றது. 

அந்தக் கூட்டத்திற்கு பின்னர் செய்தியாளர்களிடம் பேசிய டத்தோ டி.மோகன் பேசிய போது, இவ்வாண்டு சுக்கிம் போட்டிகள், தஞ்சோங் மாலிம் உப்சி பல்கலைக்கழகத்தில் ஜுலை மாதம் 4 தொடங்கி 9 வரை நடைபெறும் என்று தெரிவித்தார். இதற்கான அதிகாரப்பூர்வ அறிமுக விழா விரைவில் நடைபெறும். 

இந்த ஆண்டு, முறையே தேக்குவண்டோ, பூப்பந்து, டென்னிஸ், ஸ்குவாஷ், கராத்தே, ஓட்டப்பந்தயம், கால்பந்து, சிலம்பம், கபடி, ஹாக்கி, உடற்கட்டழகு என 11 போட்டிகள் இடம்பெற்றுள்ளன. ஒவ்வொரு மாநிலத்தை பிரதிநிதித்தும் ஒருங்கிணைப்பாளர்கள் நியமிக்கப்பட்டுள்ளார்கள். 

சிலாங்கூரை பிரதிநிதித்து இந்திரன் தங்கராசு, நெகிரிசெம்பிலான் ஷண்முகம் சுப்ரமணியம், கோலாலம்பூர் பாலகுமாரன், கெடா .தியாகராஜன் லெட்சுமணன், ஜோகூர் டத்தோ எம்.அசோஜன், பினாங்கு கமலேஸ்வரன், பெர்லிஸ் வீரன் சுப்ரமணியம், பேராக் டத்தோ இளங்கோ வடிவேலு, திரெங்கானு டாக்டர் மங்கலேஸ்வரன் அண்ணாமலை, கிளந்தான் முருகன், மலாக்கா ஷண்முகம் பிச்சை, பகாங் டத்தோ குணசேகரன் ராமன் ஆகியோர் நியமனம் செய்யப்பட்டுள்ளனர். 

இவர்கள் அந்தந்த மாநிலம் சார்ந்து விளையாட்டாளர்களைத் தேர்வு செய்து சுக்கிம் போட்டியில் களம் இறக்குவார்கள். கிட்டத்தட்ட இரண்டாயிரம் இந்திய விளையாட்டாளர்கள் இந்தப் போட்டிகளில் பங்கெடுப்பார்கள். 

சுக்கிம் போட்டிகள், 4ஆவது ஆண்டில் அடியெடுத்து வைத்துள்ளது.  மிகச் சிறப்பான முறையில் இந்தப் போட்டிகளை நடத்தி முடிக்க முனைப்போடு செயல்பட்டு வருவதாக டத்தோ இளங்கோ வடிவேலு கூறினார்.

இந்திய சமுதாயத்தின் கடந்த கால விளையாட்டுத்துறை வரலாற்றை மீட்டெடுக்கும் பொருட்டு செயல்பட்டு வரும் மலேசிய இந்தியர் விளையாட்டு, கலாச்சார அறவாரியத்தின் முயற்சிகள் பாராட்டுக்குரியது எனவும் அவர் குறிப்பிட்டார்.

கோலாலம்பூர், ஏப்ரல் 7- சூப்பர் ஸ்டார் ரஜினியின் கபாலி படத்தின் பாகம் மலேசியாவில் விரைவில் படமாக்கப்படும் என எதிர்ப்பார்க்கப்படுகிறது. அதற்கான முன்னேற்பாடுகள் நடந்து வருவதாக செய்திகள் வெளிவந்துள்ளன.

பா. ரஞ்சித் இயக்கத்தில் சூப்பர் ஸ்டார் ரஜினிகாந்த் நடித்த கபாலி படம் மலேசியாவில் படமாக்கப்பட்டதிலிருந்தே அதன் மீதான எதிர்பார்ப்பு அதிகமாக இருந்தது. மலேசியாவில் ரஜினி இருந்த நாட்களில், அவர் தங்கிருந்த ஹோட்டல்களிலும் படப்பிடிப்பு தளங்களிலும் ரசிகர்கள் வெள்ளம் என திரண்டிருந்தனர்.

படம் வெளிவந்த பிறகு அப்படம் மலேசிய ரசிகர்களிடம் பெரும் வரவேற்பையும் பெற்றிருந்தது. இந்நிலையில், அண்மையில் இந்தியாவிற்கு சென்றிருந்த பிரதமர் டத்தோ ஶ்ரீ நஜிப் துன் ரசாக், ரஜினியைச் சந்தித்து படப்பிடிப்பை மீண்டும் மலேசியாவில் நடத்தும்படி கேட்டுக் கொண்டார்.

இதனையடுத்து, கபாலி படத்தின் இரண்டாம் பாக படப்பிடிப்பு மலேசியாவில் நடைபெறவுள்ளதாக தகவல் வெளியாகியுள்ளது. அதற்கான முன்னேற்பாடுகளை இங்குள்ள படப்பிடிப்பு நிறுவனங்கள் செய்து வருவதாக மலாய் நாளேடு செய்தி வெளியிட்டுள்ளது.

இச்செய்தி உண்மை எனில், சூப்பர் ஸ்டாரரின் 'கபாலி பார்ட் 2 காய்ச்சல்' விரைவில் மலேசிய ரசிகர்களிடம் பரவும். 

More Articles ...