கோலாலம்பூர், ஜூன்.3- முன்னாள் பயிற்றுனர் பிராங்க் பெர்ன்ஹார்டிற்கு சம்பள பாக்கியை மலேசிய கால்பந்து சம்மேளனம் இன்னமும் செலுத்தாதது வெட்கப்பட வேண்டிய விசயம் என்று டத்தோ பீட்டர் வேலப்பன் கூறினார். 

முன்னாள் ஆசிய கால்பந்து கூட்டமைப்பின் (ஏ.எப்.சி) பொது செயலாளரான டத்தோ பீட்டர், 29 வருடங்களாக அங்கு பணிபுரிந்த போது எந்தவொரு தேசிய அணியும் தனது பயிற்றுனரின் சம்பளத்தை முழுவதுமாக செலுத்தவில்லை என்று புகார்கள் வந்ததில்லை என்றார். மலேசிய அணி தற்போது இப்படி செய்ததை எண்ணுகையில் வருத்தமளிக்கிறது என்றும் அவர் கூறினார்.

2015ஆம் ஆண்டு முதல் B-22 (22 வயதுக்குட்பட்ட விளையாட்டாளர்கள்) தேசிய அணியின் பயிற்றுனராக பிராங்க் இருந்தார். கடந்த மார்ச் மாதத்தில் எப்.ஏ.எம் தலைவராக ஜொகூர் இளவரசர் பணியேற்றவுடன் இவரை பணி நீக்கம் செய்தார். 

ஆனால், ஒப்பந்தப்படி பிராங்கின் பணி காலத்தில் இன்னும் 10 மாதம் மீதம் இருந்ததால், அதற்குண்டான சம்பளத்தை தனக்கு நஷ்ட ஈடாக செலுத்த வேண்டும் என்றார் பிராங்க்.

பிராங்குடன் செய்த பணி ஒப்பந்தத்தில் இப்படி ஒரு நிபந்தனை இருந்ததால் தற்போது இவர் எப்.ஏ.எம்மிடம் தமக்கு சேர வேண்டிய சம்பளத்தை கோரி வருகிறார். இல்லையேல் உலக கால்பந்து கூட்டமைப்பிடம் (பீபா) புகார் செய்வேன் என்று பிராங்க் எச்சரித்தார். 

தற்போது விசாரணையில் இருக்கும் இந்த புகார், உண்மையென நிரூபிக்கப்பட்டால் இந்த விவகாரம் பீபா கவனத்திற்கு எடுத்து செல்லப்படும். அப்படி செய்யப்பட்டால், ஏ.எப்.சிக்கும் மலேசிய கால்பந்து துறைக்கும் இது பெரிய இழுக்காகும் என்றார் டத்தோ பீட்டர் வேலப்பன்.

கோலாலம்பூர், மே.30- மலேசிய தேசிய கால்பந்து அணியின் புதிய பயிற்றுனராக நியமிக்கப்பட்டுள்ள போர்ச்சுகலைச் சேர்ந்த நேலோ விங்காடா  நேற்று இரவு தேசிய அணி வீரர்களுக்கு பயிற்சி வழங்கி தனது பணியை தொடங்கினார்.

நேற்று நடந்த பயிற்சியின் போது எப்.ஏ.எம் தலைவரான ஜொகூர் இளவரசரும், தேசிய அணியின் துணைப் பயிற்றுனர் டான் செங் ஹோவும் உடன் இருந்தனர்.

2019ஆம் ஆண்டு நடைபெறவிருக்கும் ஏ.எப்.சி ஆசிய கிண்ண போட்டியை நோக்கி தேசிய அணியை பயிற்றுவிப்பதே நேலோ விங்காடாவின் முதல் கட்ட பணி. 

அதன் தகுதி சுற்று ஆட்டங்கள் நடைபெற்று கொண்டிருக்கும் இவ்வேளையில் ஜூன் 13ஆம் தேதியன்று லெபனான் அணியை எதிர்த்து ஜொகூரில் நடக்கவிருக்கும் போட்டியில் நேலோ விங்காடா தனது பயிற்றுனர் திறமையை வெளிப்படுத்துவார் என எதிர் பார்க்கப்படுகிறது.

இதற்கு முன்னர் நேலோ விங்காடா போர்ச்சுகல், சவுதி அரேபியா, ஜோர்டான் மற்றும் தென் கொரியா ஆகிய நாடுகளின் தேசிய அணி பயிற்றுனராக இருந்துள்ளார் என்பது குறிப்பிடத்தக்கது.

கோலாலம்பூர், மே.28- சிங்கப்பூரில் நடந்த எம்.எம்.ஏ. கலப்பு தற்காப்பு கலையின் 'ஒன் சாம்பியன்ஷிப்' இறுதிச்சுற்றில் ஏற்பட்ட தோல்விக்காக வேறு யார் மீதும் குறை சொல்வதோ, பழிபோடுவதோ சரியல்ல. அந்தத் தோல்விக்கு நான் மட்டுமே பொறுப்பு என்று அகிலன் தாணி அறிவித்துள்ளார்.

அமெரிக்க வீரர் பென் அஸ்க்ரேனுக்கு எதிரான வால்டெர்வெய்ட் சாம்பியன் போட்டியில் மலேசிய ரசிகர்களின் பலத்த ஆதரவோடு களமிறங்கிய 21 வயதுடைய அகிலன், முதல் சுற்றிலேயே தோல்வி கண்டார். 

இந்நிலையில் இது குறித்து மலேசியாவின் பிரபல ஆங்கில நாளிதழ் ஒன்றில் அகிலனின் தோல்வி தொடர்பாக வெளியான செய்தியில் இடம்பெற்றிருந்த விமர்சனம், வாசகர்களிடையே பெரும் சர்ச்சைகளை ஏற்படுத்தி இருந்தது. 

சமூக வலைத்தளங்களில் அகிலனுக்கு ஆதரவாகவும் ஆறுதல் கூறும் வகையிலும் எண்ணற்ற வலைத்தள வாசிகள் கருத்துக்களைக் குவித்த வண்ணமிருந்தனர். அதேவேளையில், ஆங்கில நாளிதழிலில் வெளியான விமர்சனத்திற்கு எதிராக பலர் பொங்கியெழுந்து கோப ஆவேசத்துடன் கருத்துக்களை பதிவு செய்தனர். 

அகிலன் ஓர் இந்தியர் என்பதால் இன நோக்கில் அந்த நாளிதழின் செய்தி அமைந்திருப்பதாகவும் இதுபோன்று  இந்திய இளைஞர்கள், விளையாட்டில் முன்னேறும் போது அரசாங்கம் ஆதரவோ, ஊக்குவிப்போ தருவதில்லை என்று கருத்துக்களை வெளியிட்டிருந்தனர்.

இந்நிலையில் வலைத்தள வாசிகளின் கருத்துக்களும் விமர்சனங்களுக்கும் ஒரு முற்றுப் புள்ளி வைக்கும் வகையிலும் ஒரு சுய விளக்கமாகவும் அகிலன் தமது வீடியோ பதிவு ஒன்றை வெளியிட்டார் அந்தப் பதிவில் தம்முடைய தோல்விக்குத் தானே காரணம் என்றும் யாரையும் குறைகூறவேண்டாம் என்றும் கருத்து தெரிவித்துள்ளார்.

எனக்கு அனுபவம் போதவில்லை. இந்தப் போட்டியில் பங்கேற்ற நடப்புச் சாம்பியனான பென் அஸ்க்ரேனிடமிருந்து நிறையக் கற்றுக் கொண்டுள்ளேன். இந்தத் தோல்வியை யாரும் பெரிதுபடுத்த வேண்டாம் என்று அவர் தமது ரசிகர்களுக்கும் பொதுமக்களுக்கும் அகிலன் வேண்டுகோள் விடுத்துள்ளார்.

பங்சாரிலுள்ள ஓர் உடற்பயிற்சி மையத்தில் அகிலன் பயிற்றுனராக பணிபுரிந்து வருகிறார் என்பது குறிப்பிடத்தக்கது.

இது குறித்து தம்முடைய வீடியோ விளக்கத்தில் அகிலன் மேலும் கூறியிருப்பதாவது: 

எனது தோல்வியை ஓர் இனவாத பிரச்சனையாக ஆக்கிவிடவேண்டாம். தோல்வி என்பது என்னுடைய தவறால் வந்தது. 

ஸ்டார் ஆங்கில நாளிதழில் வெளியான செய்தியை வைத்து அந்தப் பத்திரிகையை குறைகூறவேண்டாம். அதுவொரு பெரிய நிறுவனம். ஆனால், நான் யார்? நான் ஒரு சாதாரணமானவன்.

 

அவர்கள் அவர்களின் பணியைச் செய்கிறார்கள். இந்த விளையாட்டை அவர்கள் பிரபலப்படுத்துகிறார்கள். போட்டியிடும் வீரர்களையும் பிரபலப்படுத்துகிறார்கள்.

நான் தொழில் ரீதியில் சண்டையிடுபவன். பரிசுப் பணத்திற்காக சண்டையிடுபவன். இதன் மீதுள்ள பற்றினால் மட்டுமல்ல, எனக்கு உணவு அளிப்பது இதுதான்.

'நான் இந்தியன் என்பதால்..'. என்ற கருத்துக்களை பகிராதீர்கள். நான் இந்நாட்டிலேயே பிறந்து, வளர்ந்து, கோலாலம்பூரில் வாழ்ந்து வரும் ஒரு மலேசியனாகவே கருதுகிறேன்.

நான் பங்கேற்கும் இந்தப்போட்டி முழுக்க முழுக்க நேரடியான உடல்ரீதியிலான ஒரு மோதல். எனவே, நான் அரசாங்கத்திடம் இதற்காக உதவி கேட்கமுடியாது. ஏனெனில், இதர எந்த விளையாட்டுப் போட்டிகளைக் காட்டிலும் இந்தப் போட்டியில்  அதிக அளவிலலொருவர் காயமடைய வாய்ப்புகள் உள்ளன. 

எனவே, அரசாங்கத்தை குறைகூறுவது நியாயமல்ல. நாட்டை நிர்வகிக்கும் வேலையை அவர்கள் சிறப்பாகச் செய்கிறார்கள்.

என்னை இப்படிபட்ட பிரச்சனைகளுக்குள் இழுத்து விடாதீர்கள். மலேசியர்கள் அனைவரும் ஒன்றுபட்டு நிற்பதையே நான் விரும்புகிறேன். நான் வேலை செய்யும் உடற்பயிற்சி மையத்தில் இந்தியர்கள், சீனர்கள், மலாய்க்காரர்கள் மற்றும் வெளிநாட்டினர் என்று அனைவருக்கும் நான் பயிற்சி அளிக்கிறேன்.

எனக்கு நீங்கள் அளித்த முழு ஆதரவுக்கு நன்றி கூறுகிறேன். சிறந்த பயிற்சியைப் பெற்று, சிறந்த வெற்றிகளைப் பெற்று, சிறந்த வீரராக விளங்குவதற்கான வழிகளை நான் கண்டறியவிருக்கிறேன்.

இவ்வாறு முகநூலில் வெளியான தமது வீடியோ பதிவில் அகிலன் கூறியுள்ளார்.

கோலாலம்பூர், மே 23- இந்தியாவில் வெளியாகி சக்கை போடு போட்ட 'தங்கல்' இந்திப்படம் சீனாவில் வெளியாகி பெரும் வசூலைக் குவித்து வருகிறது. இன்றைய தேதிக்கு தங்கல் சீன டப்பிங் படத்தின் வசூல் 643 மில்லியன் யுவான் அதாவது ரிம.400.81 மில்லியனாகும்.

கடந்த மே 8ம் தேதி முதல் சீனாவில் இந்த தங்கல் படம் வெளியாகி இன்றும் வெற்றிகரமாக ஓடிக்கொண்டிருக்கிறது. பெண்கள் மல்யுத்தத்தை மையமாக வைத்து எடுக்கப்பட்ட இப்படம் சீன மொழியில் 'மல்யுத்தம் செய்வோம் அப்பா' (Let's Wrestle, Dad) என்ற பெயரில் வெளியானது. 

ஹாலிவூட் அல்லாத வெளிநாட்டுப் படங்களில் தற்போது அமீர்கானின் தங்கல் படமே வசூல் சாதனைப் படைத்து முன்னணியில் இருப்பது குறிப்பிடத்தக்கது. இதற்கு முன்னர் ஜப்பான் மொழி அனுமேஷன் படமான 'யூர் நேம்' படம் மட்டுமே 566 மில்லியன் யுவான் வரை வசூல் செய்திருந்தது குறிப்பிடத்தக்கது.

அதோடு, உலக திரையரங்கில் இந்திய சினிமாவை அடுத்த நிலைக்குக் கொண்டு சென்ற பாகுபலி படம் இவ்வாண்டு இறுதிக்குள் சீன சந்தையை குறி வைத்து வெளியிட திட்டமிட்டுள்ளதால் விரைவில் சீன சினிமா இந்திய படங்களின் முக்கிய சந்தையாக விளங்கும் என எதிர்பார்க்கப்படுகிறது.

 

கோலாலம்பூர், மே.23- மலேசிய மண்ணில் மாபெரும் வரலாறு படைத்த எவரெஸ்ட் நாயகர்களான டத்தோ எம்.மகேந்திரன் மற்றும் டத்தோ என்.மோகனதாஸ் ஆகியோரின் சாதனை எழுச்சியினை நினைவு கூரும் வகையில் எவரெஸ்ட் வெற்றியின் இருபதாம் ஆண்டு நிறைவு விழா வெகு சிறப்பாக நடைபெற்றது.

மலேசிய இந்தியர் விளையாட்டு மன்ற அறவாரியத்தின் ஏற்பாட்டில் நடந்த இந்த விழாவில், இளைஞர் மற்றும் விளையாட்டுத்துறை துணையமைச்சர் டத்தோ எம்.சரவணன் முன்னிலை வகித்தார்.

1997-ஆம் ஆண்டில் எவரெஸ்ட் சிகரத்தை எட்டிய முதல் மலேசியரான டத்தோ எம்.மகேந்திரன், அவரை அடுத்து இரண்டாவது மலேசியரான டத்தோ என். மோகனதாஸ் மற்றும் அவர்களுடன் எவரெஸ்ட் குழுவில் இடம்பெற்று இருந்தவர்களுக்கும் சிறப்புச் செய்யப்பட்டது. 

"நமது சாதனை. நாம் தொடர்ந்து நினைவு கூர்ந்து ஒரு வரலாற்றுப் பதிவு மங்கிவிடாமல் பாதுகாத்து, அடுத்த தலைமுறைக்கு கொண்டு செல்லவேண்டும் என்பது நமது கடமை என்று மலேசிய இந்திய விளையாட்டு மன்ற அறவாரியத் தலைவர் டத்தோ டி.மோகன் கூறினார்.

மகேந்திரன், மோகனதாஸ் ஆகியோருடன் அன்றைய எவரெஸ்ட் குழுவில் இடம்பெற்றிருந்த மலையேறிகளுக்கும் இந்த நாளில் சிறப்புச் செய்யப்பட்டிருப்பது தமக்கு பெரும் மகிழ்வை அளித்திருப்பதாக துணையமைச்சர் டத்தோ எம். சரவணன் கூறினார்.

அன்றைக்கு ஏகப்பட்ட சவால்கள், தடங்கல்கள், அத்தனையும் கடந்துதான் எவரெஸ்ட்டை அடைந்தோம். இன்றைக்கு நினைத்தாலும் பெருமிதமாக இருக்கிறது என டத்தோ மோகனதாஸ் சொன்னார்.

நாட்டுக்குப் பெருமை சேர்க்கவேண்டும் என்ற எண்ணம் மட்டும்தான் அன்று இருந்தது. சொல்லப்போனால், 1997-ஆம் ஆண்டில் நாங்கள் கண்ட வெற்றி, 'மலேசியா போலே' என்ற சுலோகத்தை, ஒரு மந்திரச் சொல்லாக இன்றளவும் எல்லா துறைகளிலும் ஒலிக்கும்படி செய்திருக்கிறது என்று டத்தோ மகேந்திரன் கூறினார்.

விளையாட்டுத் துறை சார்ந்த பிரமுகர்களும் முன்னாள் விளையாட்டு வீரர்களும் 1997ஆம் ஆண்டின் எவரெஸ்ட் குழு உறுப்பினர்களும் இந்நிகழ்வில் கலந்து கொண்டனர்.

 

 

கோலாலம்பூர், மே.20- ‘பந்து விளையாட்டு சமூகத்துடன் ஒரு நாள்’ எனும் நிகழ்ச்சியில் கலந்து கொண்ட இளைஞர், விளையாட்டு துறை அமைச்சர் கைரி ஜமாலுடின் நூற்றுக்கணக்கான ஆரம்பப் பள்ளி மாணவர்களுடன் தன் நேரத்தை செலவு செய்தார்.

7 வயது முதல் 12 வயது வரை உள்ள மாணவர்கள் பலர் பந்து விளையாட்டு துறையில் ஆர்வம் செலுத்த இதுபோன்ற நிகழ்ச்சிகள் ஏற்பாடு செய்யப்படுவதாக அவர் கூறினார். தேசிய பந்து விளையாட்டு வளர்ச்சி திட்டத்தின் கீழ் உள்ள ‘துனாஸ் அக்காடமி’ நடத்தி வரும் பல நிகழ்ச்சிகளை அவர் ஆதரித்து வருவது குறிப்பிடத்தக்கது.

நேற்று நடந்த நிகழ்ச்சியின் போது பண்டார் துன் ரசாக் மற்றும் வாங்சா மாஜு அணிகளுக்குள் நடைபெற்ற பந்து விளையாட்டு போட்டியில் கைரி நடுவர் ஆனார். இந்த ஆட்டம் கோல் ஏதுமின்றி சம நிலையில் முடிவுற்றது.

வரும் ஆகஸ்டு மாதம் நடைபெறும் சீ விளையாட்டு போட்டிக்கு பிறகு புக்கிட் ஜாலில் தேசிய விளையாட்டு அரங்கத்தைப் பழுது பார்த்த பின்னர், பொதுமக்கள் அவ்வரங்கத்தை பயன்படுத்த வழி செய்யப்படும் என்றும் அமைச்சர் செய்தியாளர்களிடம் பேசுகையில் கூறினார்.

கோலாலம்பூர், மே 18- நேற்று இரவு பிரதமர் நஜிப் கண் முன்னால் தன்னைத் தாக்கிய நகைச்சுவை நடிகர் சுலைமானைத் தாம் மன்னித்து விட்டதாக படத் தயாரிப்பாளர் டேவிட் தியோ கூறினார். அவர் மீது தனக்கு கோபம் இல்லை, திறந்த மனதுடன் அவரை மன்னித்து விட்டதாக டேவிட் தெரிவித்தார்.

மாட் ஓவர் என்று நன்கு அறிமுகமான சுலைமான், நேற்று TN50 தேசிய உருமாற்று திட்ட கலந்துரையாடலின்போது மேடையில் பேசிக் கொண்டிருந்த தயாரிப்பாளர் டேவிட் தியோவை கன்னத்தில் அறைந்தார். பிரதமரிடம் தரக்குறைவாக பேசியதாக கூறி டேவிட்டை சுலைமான் தாக்கியதாக நம்பப்படுகிறது. 

இச்சம்பவம் குறித்து பேசிய டேவிட், நேற்றைய சலசலப்புக்கு பிறகு பிரதமரிடம் கைக்குலுக்கும்போதே சுலைமானை மன்னித்து விட்டதாக கூறிவிட்டேன் என டேவிட் கூறினார். 

"நான் பிரதமரிடம் தரக்குறைவாக பேசியதாக கூறினார்கள். நான் எப்படி பிரதமரிடம் அப்படி பேசமுடியும்? நான் நிகழ்ச்சி நெறியாளரிடம் மட்டுமே எனது ஆதங்கத்தை முன்வைத்தேன்" என மெட்ரோவெல்த் பிக்சர்ஸ் நிறுவனத்தின் மூத்த செயல் அதிகாரி டேவிட் தியோ கூறினார்.

More Articles ...