கோலாலம்பூர், மார்ச்.18-- அனைத்துலகப் போட்டிகளில் தொடர்ந்து வெல்லவேண்டும். அடுத்துவரும் ஒலிம்பிக் போட்டிக்குத் தகுதி பெறவேண்டும். ஒலிம்பிக்கில் பதக்கம் வெல்வது எனது கனவு என்கிறார் இளம் பேட்மிண்டன் வீராங்கனையான தீனா முரளிதரன்.

பேட்மிண்டன் போட்டிகளில் மலேசியாவுக்கென தனி வரலாறு உண்டு. அந்த வரலாற்றுக்குள் ஒரு வரலாறைப் பதிவு செய்திருக்கிறார் தீனா.

அண்மையில் ஈப்போவில் நடந்து முடிந்த தேசிய பேட்மிண்டன் சாம்பியன் போட்டியில் மகளிர் ஒற்றையர் பிரிவில் தேசிய சாம்பியனாக வாகை சூடியுள்ளார் 19 வயதுடைய தீனா

தீனாவின் இந்த வெற்றி, மலேசிய இந்தியர்களைப் பொறுத்தவரை ஒரு வரலாற்றுப்பூர்வமான சாதனையாகும். பேட்மிண்டனின் மகளிர் பிரிவில் தேசிய சாம்பியனாக வாகை சூடியிருக்கும் முதல் மலேசிய இந்திய வீராங்கனை என்ற சாதனையை தீனா படைத்திருக்கிறார்.

தீனாவின் மூத்த சகோதரர் கஜென் சிலாங்கூர் மாநிலத்தைப் பிரதிநிதித்து விளையாடியுள்ளார் அதேவேளையில், தீனாவின் இளைய சகோதரி செலினா முரளிதரன் தற்போது சிலாங்கூரை பிரதிநிதித்து விளையாடி வருகிறார்.

தேசிய சாம்பியன் போட்டியில் வென்றிருந்தாலும் தாம் அனைத்துலக போட்டிகளில் முத்திரை பதிக்கவேண்டும் என்ற வேட்கையுடன் தொடர்ந்தது கடுமையான பயிற்சிகளில் ஈடுபட்டு வருவதாக 'வணக்கம் மலேசியா' இணையச் செய்திக்கு அளித்த காணொளிப் பேட்டியில் தெரிவித்தார்

"6 வயதில் இருந்தே பேட்மிண்டன் விளையாடி வருகிறேன். எனது வெற்றிக்காக நீண்ட காலம் பயிற்சி செய்து வந்துள்ளேன். எனக்கு மிகவும் பக்கபலமாக இருப்பவர்கள் என் பெற்றோர்கள்" என்கிறார் அவர்.

 கிள்ளானைச் சேர்ந்த முரளிதரன் -டாக்டர் பரிமளா தம்பதியரின் இரண்டாவது பிள்ளையான தீனா, தனது முக்கிய இலக்கு ஒலிம்பிக் போட்டி வரை சென்று பதக்கம் வெல்வதுதான் என்கிறார்.  

கிளானா ஜெயா மார்ச்.17– பிரிமியர் லீக் கால்பந்து போட்டியில் விளையாடி வரும் மிஃபா அணி 3-1 என்ற கோல் கணக்கில் சபா அணியை வீழ்த்தி தனது வெற்றியைப் பதிவு செய்தது. 

கடந்த சில ஆட்டங்களில் சறுக்கல்களுக்கு உள்ளான நிலையில் இந்த வெற்றி, மிஃபா ஆட்டக்காரர்களுக்கு புதிய மனவலிமையையும் மிஃபா ரசிகர்களுக்கு புதிய உற்சாகத்தையும், ஏற்படுத்தி இருக்கிறது.

கிளானா ஜெயா எம்.பி.பி.ஜே திடலில் நடைபெற்ற சபாவுக்கு எதிரான இந்த  ஆட்டம் தொடங்கியது முதல் மிஃபா அணி சிறப்பாக விளையாடியது. 6-ஆவது நிமிடத்தில் மிஃபாவுக்கு கிடைத்த பெனால்டியை டிமிட்ரி கோலாக்கினார். 15-ஆவது நிமிடத்தில் 2 ஆவது கோலை மைக்கேல் இரண்டாவது கோலைப் போட்டார். மீண்டும் 39-ஆவது நிமிடத்தில் மற்றுமொரு கோலை டிமிட்ரி அடிக்க, முற்பாதி ஆட்டம் 3-0 என்ற கணக்கில் முடிந்தது. 

பிற்பாதி ஆட்டத்தில் 49-ஆவது நிமிடத்தில் சபா அணி பெனால்டி வழி ஒரு கோலைப் புகுத்தியது. பிற்பாதி ஆட்டத்தில் மிஃபா மிகச் சிறப்பாக விளையாடியது என்றாலும் அதன் கோலடிக்கும் முயற்சிகளுக்கு பலன் கிட்டவில்லை. இதைத் தொடர்ந்து ஆட்டம் 3-1 என்ற கோல்கணக்கில் முடிந்தது.  

இந்த ஆட்டத்தைத் தொடர்ந்து, அடுத்து வரவிருக்கும் ஆட்டங்களிலும் மிஃபா அணி வெற்றியைப் பதிவு செய்ய வேண்டுமென்ற கட்டாயத்தில் உள்ளது. பிரிமியர் லீக்கில் தொடர்ந்து இடம்பெற ஏதுவாக மிஃபா இன்னும் சில வெற்றிகளை நிலைநாட்ட வேண்டியது அவசியமாகும். 

அடுத்த ஆட்டத்தில் பி.கே.என்.பி அணியை எதிர்த்து மிஃபா விளையாடுகிறது. இந்த ஆட்டம் ஏப்ரல் 7ஆம் தேதி வெள்ளிக்கிழமை மாலை 4.45 மணியளவில் கிளானாஜெயா எம்.பி.பி.ஜே திடலில் நடைபெறும். 

 

 

 

 

 

 

 கோலாலம்பூர், மார்ச்.16- முறையான பயிற்சி வழிகாட்டலும், பெற்றோர்களின் அர்ப்பணிப்பு மற்றும் விழிப்புணர்வும் இருந்தால், நாம் பேட்மிண்டனில் அடுத்த பஞ்ச் குணாளனை உருவாக்க முடியும் என்று முன்னாள் தேசிய வீரர் தனபாலன் அரிகிருஷ்ணன் தெரிவித்தார்.

ஆசிய பேட்மிண்டன் சம்மேளத்தின் மேம்பாட்டு அதிகாரியாக தற்போது செயல்பட்டுவரும் தனபாலன், 'வணக்கம் மலேசியா'வுக்கு அளித்த சிறப்பு நேர்காணலின் போது மேற்கண்டவாறு தெரிவித்தார்.

பேட்மிண்டன் விளையாட்டைப் பொறுத்தவரையில், பெற்றோர்கள் சில தியாகங்களைச் செய்யவேண்டும். அது அவர்களின் நேரம் மற்றும் பொருள்சார்ந்த விஷயம். அவர்களின் பிள்ளைகள் பேட்மிண்டனில் புகழ்பெற அவர்கள் அத்தகைய தியாகங்களுக்குத் தங்களைத் தயார்படுத்திக் கொள்ளவேண்டும். பயிற்சிகளுக்கு அனுப்பினால் மட்டும் போதாது. அவர்களின் வளர்ச்சியில் அவர்களுக்கு அக்கரை இருக்கிறது என்பதை புலப்படுத்தவேண்டும் என்றார் அவர்

கிள்ளான், கம்போங் ஜாவாவில் அமைந்துள்ள 'டெஸ்டினி' பேட்மிண்டன் அரினாவின் ஆலோசகராவும் நியூசிலாந்தின் முன்னாள் தேசிய பயிற்சியாளருமான தனபாலன், "அடுத்த பஞ்ச் குணாளனை தமிழ்ப்பள்ளிகளில் இருந்துதான் நான் தேடிக்கொண்டிருக்கிறேன்" என்று தெரிவித்தார்.

அந்த வகையில் சிம்பாங் லீமா தமிழ்ப்பள்ளியைச் சேர்ந்த 150-க்கும் மேற்பட்ட மாணவர்களுக்கு வார இறுதி நாள்களில் நாங்கள் பயிற்சி அளித்து வருகிறோம். இன்னும் இவ்வட்டாரத்திலுள்ள இதர பள்ளிகளையும் அணுகியுள்ளோம். அவர்களும் தங்களின் பிள்ளைகளைப் பயிற்சிகளுக்கு அனுப்ப முன்வந்துள்ளனர் என்று அவர் சொன்னார்.

இந்த மாணவர்களுக்கு தேசிய நிலைப் பயிற்சிகளுக்கு இணையான தரத்திலேயே பயிற்சி அளித்து வருகிறோம். எனவே, எங்கள் இலக்கை அடைந்து விடமுடியும் என்று தனபாலன் நம்பிக்கை தெரிவித்தார்.

தற்போது பேட்மிண்டன் பயிற்சியில் ஈடுபட்டுவரும் மாணவர்களுக்கு நமது பாரம்பரியம், நமது சிறப்பு, வரலாறு என சில அம்சங்களையும் நாம் போதிக்கிறோம். மேலும் பயிற்சி தொடங்கும் முன்னர் அவர்களுக்கு யோகா பயிற்சியும் அளிக்கப்படுகிறது என்றார் அவர்.

 

 

 

 

 

பர்மிங்ஹாம், மார்ச்.12- உலகின் முதல்நிலை ஆட்டக்காரரான மலேசியாவின் முன்னணி வீரர் லீ சோங் வேய் அகில இங்கிலாந்து சாம்பியன் பட்டத்தை 4ஆவது முறையாக வாகைசூடிய மலேசிய ரசிகர்களை உற்சாகத்தில் ஆழ்த்தினார்.

இங்கு நடந்த ஒற்றையர் இறுதியாட்டத்தில் லீ சோங் வெய் 21-12 மற்றும் 21-10 என்ற புள்ளிகளில் நேரடி செட்டுகளில் சீனாவின் இளம் வீரர் ஷி யுக் கியுவை வென்று சாம்பியனார்.

ஏற்கெனவே 2010-ஆம் ஆண்டு, 2011-ஆம் ஆண்டு மற்றும் 2014-ஆம் ஆண்டு ஆகிய ஆண்டுகளில் அகில இங்கிலாந்து பட்டத்தை லீ சோங் வெய் வென்றுள்ளார் என்பது குறிப்பிடத்தக்கது.

முதல் செட்டில் தொடக்கத்தில் இரு ஆட்டக்காரர்களும் புள்ளிகளை விட்டுக் கொடுக்காமல் ஆடினர் என்றாலும் லீ சோங் வெய்யின் அனுபவம் அவரது கைஅயை மேலோங்க வைத்தது. அதேவேளையில் இரண்டாவது செட்டில் மிக அபாரமாக விளையாடிய லீ சொங் வெய் எளிதாக வெற்றி இலக்கை எட்டினார்.

அகில இங்கிலாந்து பேட்மிண்டன் போட்டி தொடங்குவதற்கு மூன்று வாரங்களுக்கு முன்பு, காலில் காயமடைந்ததால் போட்டிக்குச் செல்லாமல் விலகிக் கொள்ள திட்டமிட்டிருந்த லீ சோங் வெய், பின்னர் குணமடைந்ததால் தம்முடைய முடிவை மாற்றிக்கொண்டார்.

"கடைசி நேரத்தில் போட்டியில் கலந்து கொள்ள எடுத்த முடிவு குறித்து மகிழ்ச்சி அடைகிறேன். 34 வயதை எட்டிவிட்ட நிலையில் இந்தப் போட்டியில்  வென்றிருப்பது மகிழ்ச்சியை அளித்திருப்பதாக  லீ சோங் வெய் கூறினார். 

வெற்றிக்குப் பின்னர் தம்முடைய ரசிகர்களுக்கு நன்றி தெரிவித்துக் கொண்ட லீ சோங் வெய், மீண்டும் ரசிகர்களை அடுத்த ஆண்டு மீண்டும் அகில இங்கிலாந்து பேட்மிண்டன் போட்டியில் சந்திப்பதாக தெரிவித்தார்.

 பர்மிங்ஹாம், மார்ச். 12- அகில இங்கிலாந்து பேட்மிண்டன் போட்டியின் கலப்பு இரட்டையர் பிரிவில் மலேசியாவின் சான் பெங் சூன் -கோலியு யிங் ஜோடி சாம்பியன் பட்டத்தைக் கைநழுவ விட்டது.

சீனாவின் பலம் பொருந்திய இரட்டையர் ஜோடியான லு காய்-ஹுவாங் யாக் கியோங் ஜோடியுடன் மோதிய சான் பெங் சூன் - கோ லியு யிங் ஜோடி, இறுதியாட்டத்தில் 21-18, 19-21, 16-21, என்ற புள்ளிகளில் தோல்விகண்டது.

கிட்டத்தட்ட 62 ஆண்டுகளுக்குப் பின்னர் அகில இங்கிலாந்து பேட்மிண்டன் போட்டியின் கலப்பு இரட்டையர் பிரிவில் மலேசிய ஜோடி இறுதி ஆட்டத்திற்குத் தேர்வு பெற்றிருந்தது..

இவ்விரு அணியும் இதுவரை 4 முறை மோதியுள்ளன என்றாலும் ஒருமுறை கூட மலேசிய ஜோடி இந்த சீன ஜோடியை வென்றதில்லை. 

தொடக்க செட்டில் கடுமையான போராட்டத்திற்குப் பின் வென்ற மலேசிய ஜோடி, 2ஆவது செட்டிலும் கடுமையாக போராடியது. எனினும், கடைசி தருணத்தில் கவனம் சிதைந்ததால் 21-191 என்ற புள்ளிகளில் தோல்விகண்டது. கடைசி செட் ஆட்டத்தில் சீன ஜோடியின் கை தொடக்கம் முதற்கொண்டே இருந்தே ஓங்கி இருந்தது. கடைசியில் 21-16 என்ற புள்ளிகளில் மலேசிய ஜோடியை வென்று சாம்பியன் பட்டத்தை சீன ஜோடி வாகைசூடியது. badmintonBda

கோலாலம்பூர், மார்ச்.12- கடந்த 2015ஆம் ஆண்டு முதல் அனைத்துலக அரங்கில் குறிப்பிடத்தக்க வெற்றி எதனையும் நிலைநாட்ட முடியாமல் இருந்து வந்த மலேசிய ஸ்குவேஷ் வீராங்கனை நிக்கோல் டேவிட், நேற்று கொலம்பியா சாம்பியன் போட்டியில் வாகைசூடினார்.

நீண்ட இடைவெளிக்குப் பின்னர் கிடைத்த இந்த வெற்றி குறித்து தாம் மிகுந்த மகிழ்ச்சி அடைவதாக நிக்கோல் கூறினார். கொலம்பியாவின் முதலாவது 'சியுடாட் டி புளோரிடபிளாங்கா' ஸ்குவேஷ் போட்டியில் அமெரிக்காவின் ஆலிவியா பிளாட்ச் போர்டை 11-3,11-4,11-8 என்ற புள்ளிகளில் வென்று சாம்பியன் பட்டத்தை நிக்கோல் வென்றார்.

உலகின் தலைசிறந்த ஸ்குவேஷ் வீராங்கனையான பினாங்கைச் சேர்ந்த நிக்கோல் டேவிட், 8 முறை உலகச் சாம்பியன் பட்டத்தை வென்று மலேசியாவுக்குப் பெருமை சேர்த்தவர் என்பது குறிப்பிடத்தக்கது.

"மீண்டும் வெற்றியின் பக்கம் நான் திரும்பி இருப்பது மிக மகிழ்ச்சியாக இருக்கிறது. இது என் மனதில் எந்நாளும் நீடித்து இருந்துவரும்" என்றார் அவர். ஆகக் கடைசியாக அவர், கடந்த 2015 ஆம் ஆண்டு டிசம்பரில் ஹாங்காங் பொது ஸ்குவேஷ் போட்டியில் அவர் சாம்பியனாக வாகை சூடினார்.

அடுத்து இம்மாதம் 19ஆம் தேதி தொடங்கும் பிரிட்டிஷ் ஸ்குவேஷ் போட்டியில் கலந்து கொள்வதற்கு முன்பாக கிடைத்த இந்த வெற்றி, ,நிக்கோலுக்கு சிறந்த ஊக்குவிப்பாக அமையும் என்று கருதப்படுகிறது. 

 

 

Eight-time World Champion Nicol David lifted her first PSA World Tour title since December 2015 after beating Olivia Blatchford in the final of the inaugural Ciudad de Floridablanca tournament in Colombia.  

The World No. 7 scored an empathic 11-3, 11-4, 11-8 victory over the American, ranked No 27 in the world, in 70 minutes.  


Read more at http://www.thestar.com.my/news/nation/2017/03/12/nicol-david-ends-18-month-draught-with-colombian-victory/#l8Wr6KoI5dme3vzw.99

 பர்மிங்ஹாம், மார்ச்.12- இன்று இரவு நடக்கும் அகில இங்கிலாந்து பேட்மிண்டன் போட்டியின் இறுதிச் சுற்றில் மலேசிய ரசிகர்கள் இரட்டை வெற்றி மகிழ்ச்சிக்காக ஆவலுடன் காத்திருக்கின்றனர். 

ஆண்களுக்கான ஒற்றையர் பிரிவில் மலேசியாவின் மூத்த வீரர் லீ சோங் வெய்யும் கலப்பு இரட்டையர் ஆட்டத்தில் சான் பெங் சூன் - கோ லியு யிங் ஜோடியும் இறுதி ஆட்டத்திற்கு தேர்வு பெற்றுள்ள நிலையில், இவர்களின் வெற்றிகள் மலேசியாவுக்கு இரட்டை மகிழ்ச்சியாக அமையும் என்று எதிர்பார்க்கப்படுகிறது.  

பிரசித்திப் பெற்ற அகில இங்கிலாந்து பேட்மிண்டன் போட்டி தொடங்குவதற்கு மூன்று வாரங்களுக்கு முன்பு, காலில் காயமடைந்ததால் போட்டிக்குச் செல்லாமல் விலகிக் கொள்ளும் முடிவில் இருந்த லீ சோங் வெய், பின்னர் சற்று குணமடைந்ததும் தம்முடைய முடிவை மாற்றிக்கொண்டார்.

"நான் கடைசி நேரத்தில் போட்டியில் கலந்து கொள்ள எடுத்த முடிவு குறித்து இப்போது மகிழ்ச்சி அடைகிறேன். 34 வயதை எட்டிவிட்ட நிலையில் இந்தப் போட்டியில் இறுதி ஆட்டம் வரை முன்னேறி இருப்பது உண்மையிலேயே எனக்கு மகிழ்ச்சியை அளித்திருக்கிறது" என்கிறார் லீ சோங் வெய்.

அரையிறுதி ஆட்டத்தில் தைவான் ஆட்டக்காரர் சவ் தியென் சென்னுடன் மோதிய லீ சோங் வெய், தொடக்க செட்டில் 21-10 என்ற புள்ளிகளில் தோல்விகண்ட போது லீ சோங் வெய் தொடர்ந்து தாக்குப் பிடிக்க மாட்டாரோ என்ற ஐயம் ரசிகளுக்கு ஏற்பட்டது.

எனினும், முதல் செட் தோல்வியில் இருந்து அபாரமாக மீண்ட லீ சோங் வெய், பின்னர் அடுத்த இரண்டு செட்டுகளையும் 21-14, 21-9 என்ற புள்ளிகளில் வென்று, இறுதி ஆட்டத்திற்குள் நுழைந்தார்.

இறுதியாட்டத்தில் சீனாவின் இளம் நட்சத்திரமான ஷி யூக்கியுடன்  லீ சோங் வெய் இன்று மோதுகிறார். மலேசிய நேரப்படி இரவு 8 மணிக்கு இறுதிச் சுற்றுப் போட்டிகள் ஆரம்பமாகின்றன.

உலகத் தரவரிசையில் 10ஆவது இடத்தில் இருக்கும் ஷி யூக்கி,  ஐந்து முறை உலகச் சாம்பியன் பட்டத்தை வென்றுள்ள சக சீன வீரர் லின் டானை அரையிறுதி ஆட்டத்தில், 24-22 21-11 என்ற புள்ளிகளில் வீழ்த்தி இறுதி ஆட்டத்திற்கு தேர்வு பெற்றுள்ளார் என்பது குறிப்பிடத்தக்கது.

இறுதியாட்டம் மிகக் கடுமையாக இருக்கும். இளம் சீன ஆட்டக்காரரை நான் ஏற்கெனவே இரண்டு முறை வென்றிருந்தாலும் அண்மைய காலத்தில் சிறந்த முறையில்  அவர் வளர்ச்சி கண்டுள்ளார் என்று லீ சோங் வேய் குறிப்பிட்டார்.

இதனிடையே கலப்பு இரட்டையர் ஆட்டத்தில் மலேசியாவின் சான் பெங் சூன் மற்றும் கோ லியு யிங் ஜோடி, இறுதியாட்டத்தில் சீனாவின் லு காய்-ஹுவாங் யாக் கியோங் ஜோடியுடன் மோதவிருக்கின்றது. 

More Articles ...