கோலாலம்பூர், மார்ச். 8- பிரிமியர் லீக் கால்பந்து போட்டிக்கான பதிவுக்கான ஆவணத்தை குறிப்பிட்ட கால அவகாசத்திற்குள் சமர்ப்பிக்கத் தவறியதற்காக தங்களுக்கு விதிக்கப்பட்டிருக்கும் 5 லட்சம் ரிங்கிட்  அபராதம் விதிக்கப்பட்டிருப்பதால் அதிர்ச்சி அடைந்துள்ளது மிஃபா எனப்படும் மலேசிய இந்திய கால்பந்து சங்கம்.

இவ்வளவு அபராதத்தைச் செலுத்துவதை விட  பிரிமியர் போட்டியில் இருந்து மிஃபா விலகிக் கொள்வது மேல் என்று அதன் தலைவரான டத்தோ டி. மோகன் கூறினார். செய்த தவறோடு ஒப்பிடும் போது இந்த அபராதம் கொஞ்சமும் நியாயமற்றது என்று அவர் சொன்னார். 

மலேசிய கால்பந்து சங்கத்தின் ஓர் அங்கமான விளங்கும் எல்.எல்.பி. பிரிவு இந்த அபராதத்தை விதித்துள்ளது.  இந்த அளவுக்கெல்லாம் அபராதத் தொகை விதிக்கப்படுமானால், பிறகு இந்தப் போட்டியில் பங்கேற்கக் குழுவை அனுப்புவதில் எந்தப் புண்ணியமும் இல்லை என்று டத்தோ மோகன் குறிப்பிட்டார்.

2018ஆம் ஆண்டுக்கான பிரிமியர் லீக் போட்டிக்கான பதிவு ஆவணத்தை காலதாமதமாக சமர்ப்பித்தது அல்லது முழுமையாகப் பூர்த்தி செய்யாமல்  4 சூப்பர் லீக் குழுக்களுக்கு 15 லட்சம் ரிங்கிட் அபராதமும் 6 பிரிமியர் லீக் குழுக்களுக்கு 5 லட்சம் ரிங்கிட்டும் அபராதம் விதிக்கப்பட்டுள்ளது. 

இந்த அபராதத்திற்கு எதிராக மிஃபா மேல் முறையீடு செய்ய விருக்கிறது. இது கொஞ்சம் கூட நியாயமற்றது. பெரும்பாலான குழுக்கள் போட்டியில் தொடர்ந்து குழுவை பங்கேற்றுப் பொருளீட்ட முடியாமல்  போராடிக் கொண்டிருக்கின்றன என்று அவர் சுட்டிக்காட்டினார்.

 

 

 

 

 

 

 

 

 

 

 

 

 

 

 

 

 

 

 

கோலாலம்பூர், பிப்-14 – இந்தோனிசியா  தலைநகரான ஜக்கர்த்தாவில் நடந்த 18-ஆவது பொது அழைப்பு ஆசிய விளையாட்டுப் போட்டியில் மலேசியாவின் ஜி. அரவின் தேவர்  200 மீட்டர் ஓட்டத்தில் வெண்கலப் பதக்கம் வென்றார். 

ஈப்போவைச் சேர்ந்த 25 வயதுடைய அரவின் 200 மீட்டர் தூரத்தை 21.67 வினாடிகளில் ஓடி முடித்தார். இந்தப் போட்டியில் முதலிடத்தைப் பிடித்து தைவானைச் சேர்ந்த யாங் சுன் ஹான் தங்கப் பதக்கத்தை வென்றார். இவர் 20.88 வினாடிகளில் 200 மீட்டரைக் கடந்தார்.

ஹாங்காங்கின் சன் ஹா சூன் 21.47 வினாடிகளில்  ஓடி 2-ஆவது இடத்தைப் பிடித்து வெள்ளிப் பதக்கம் வென்றார்.

அரவினின் வெண்கலப் பதக்க வெற்றியை அவரது பயிற்சியாளர் எம். பாலமுருகன் பாரட்டினார்.

 இவ்வாண்டில் 400 மீட்டர் ஓட்டத்தில் மட்டுமே அரவின் கவனம் செலுத்தி வந்தார் என்றும் இருப்பினும் 200 மீட்டரில் வெண்கலப்பதக்கத்தை அவர் கைப்பற்றியது தமக்கு ஆச்சர்யத்தை ஏற்படுத்தியது என்றும் அவர் கூறினார்.

 

 

 

 

 

 

 

 

 

 

 

கோலாலம்பூர், பிப்.5- ஜேடிடி என்றழைக்கப்படும் ஜொகூர் டாருல் தக்ஸீம் கால்பந்து குழுவின் விளையாட்டாளர்கள் மற்றும் பயிற்சியாளர்கள் ஜொகூர்  இளவரசர் துங்கு இஸ்மாயில் சுல்தான் இப்ராஹிமிற்கு, அஸ்டின் மார்டின் (Aston Martin) ஆடம்பரக் காரைப் பரிசளித்தனர்.   

கடந்த வாரம் அந்தக் கால்பந்து குழுவினர், தங்களின் பத்தாவது வெற்றிக் கிண்னத்தை கோப்பையை வென்றனர். அந்த வெற்றியை கொண்டாடும் வகையில், ஜொகூர் இளவரசருக்கு அந்தக் கார் பரிசளிக்கப்பட்டுள்ளது. 

"ஜொகூர் இளவரசருக்கு இன்ப அதிர்ச்சியை தரும் வண்ணம், ஜேடிடி கால்பந்து குழுவினர், நீலம் மற்றும் சிவப்பு வண்ணத்திலான அந்த ஆடம்பரக் காரை பரிசளித்துள்ளனர்.

 இந்த நீலம் மற்றும் சிவப்பு வண்ணமானது, ஜொகூர் மாநிலத்தின் கொடியின் வண்ணத்தைப் பிரதிபலிக்கிறது" என்று 'சவுத்தர்ன் ஜொகூர் டைகர்ஸ்' முகநூல் அகப்பக்கம் தகவல் தெரிவிக்கப்பட்டுள்ளது

கடந்த சனிக்கிழமையன்று, மலேசிய சூப்பர் லீக் கால்பந்து விளையாட்டின் போது, கெடா மாநில கால்பந்து குழுவினை 2-1 என்ற கோல் வித்தியாசத்தில் ஜேடிடி தோற்கடித்து, அக்குழுவின் 10-ஆவது வெற்றிக் கிண்ணத்தை வென்றது என்பது குறிப்பிடத்தக்கது.

 

 

சுபாங் ஜெயா ஜன. 29-  பிரிமியர் லீக் 2018-இல் கால்பந்துக் களத்தில் இறங்கியுள்ள மிஃபா அணியின் ஜெர்சி வெளியீட்டு விழா பிரம்மாண்டமான முறையில் சுபாங் ஜெயா ஒன் சிட்டி வணிக வளாகத்தில் நடைபெற்றது. இந்த விழாவில் சிறப்பு விருந்தினராக கலந்து கொண்ட மஇகாவின் தேசியத்தலைவரும், சுகாதாரத்துறை அமைச்சருமான டத்தோஶ்ரீ டாக்டர் சுப்பிரமணியம்,  மிஃபாவின்  ஜெர்சியை அதிகாரப்பூர்வமாக வெளியிட்டார்.

விளையாட்டுத் துறையின் வழி சமுதாயத்தில் பல மாற்றங்களை உருவாக்கலாம். அந்த வகையில் மிஃபா கால்பந்து அணி சமுதாயத்தின் நம்பிக்கையை பெற்றுள்ளது. இதன் வழி ஒரு மிகப்பெரிய மாற்றத்தை உருவாக்குவோம். இதற்கு துணை நிற்கும் அனைத்து நல்லுள்ளங்களுக்கும்  குறிப்பாக 'மாசா' பல்கலைக்கழகத்தின் தலைவர் டான்ஶ்ரீ  டாக்டர் ஹாஜி முகமட் ஹனிபா  இவர் மிஃபாவிற்கு பெரிய அளவில் உதவிக்கரம் நீட்டியுள்ளார்  என அவர் கூறினார்.

மிஃபாவின் தலைவர் டத்தோ டி.மோகன் உரையாற்றுகையில் மிஃபாவின் வளர்ச்சிக்கு துணை நின்ற அனைத்து நல் உள்ளங்களுக்கும் நன்றியை தெரிவித்தார்.  டத்தோஶ்ரீ சுப்பிரமணியம்  மிஃபாவிற்காக எல்லா நிலைகளிலும் உதவிகளை செய்து வருகிறார். டத்தோ எம்.சரவணனின்  உதவியும் மிஃபாவிற்கு பக்க பலமாக இருந்துள்ளது. டான்ஶ்ரீ  டாக்டர் ஹாஜி முகமது ஹனிபா அவர்கள் இந்த வருடம் பேருதவி புரிந்துள்ளார். 

இந்த வருடம் கே.தேவன்  பயிற்சியில் மிஃபா அணி வலுப்படுத்தப்பட்டு வருகிறது. நிச்சயமாக  இந்த வருடம் குறிப்பிடத்தக்க வெற்றிகளை அது நிலைநாட்டும்.  இன்னும் சில ஆண்டுகளில் அதிகமான தரமான இந்திய விளையாட்டாளர்களை மிஃபா உருவாக்கும் என அவர் நம்பிக்கை தெரிவித்தார்.

இந்த நிகழ்ச்சியில், இளைஞர் விளையாட்டுத்துறை துணையமைச்சர் டத்தோ எம்.சரவணன், முன்னாள் கால்பந்து வீரர்களான டத்தோ சந்தோக் சிங், டத்தோ தனபாலன்,  மிஃபாவின் துணைத்தலைவர் தினகரன், மிஃபாவின் செயலாளர் அன்பானந்தன், உதவித் தலைவர்களான டத்தோ பதி, ஆறுமுகம், மிஃபா அணியின் மேலாளர் ஏ.எஸ்.பி  ராஜன்,  பயிற்றுநர் கே.தேவன் உள்ளிட்டோர் கலந்து கொண்டு சிறப்பித்தனர்.

      

 

 

 

 

 

 

 

 

 

 

 

 

கோலாலம்பூர், ஜன.24- தேசிய மகளிர் ஹாக்கி குழுவின் துணைப் பயிற்சியாளர் பதவிக்கான ஒப்பந்தத்தை மீண்டும் மலேசிய ஹாக்கி சம்மேளனம் தமக்கு புதுப்பிக்கவில்லை என்று இமான் கோபிநாதன் உறுதிப்படுத்தினார்.  

கடந்த இரண்டு மாதங்களில், மூன்று துணைப் பயிற்சியாளர்களை மலேசிய ஹாக்கி  சம்மேளனம், அவர்களின் வேலையிலிருந்து வெளியேற்றி உள்ளது என்பது குறிப்பிடத்தக்கது. தனக்கான ஒப்பந்தங்கள் புதுப்பிக்கப்படாதது குறித்த மலேசிய ஹாக்கி சம்மேளனம் வழங்கிய பதிலில் தமக்கு திருப்தி இல்லை என்று 40 வயதான கோபிநாதன் கூறினார். 

"அவர்களின் காரணங்கள் என்ன என்பதை நான் வெளிப்படையாக கூற முடியாது. இருந்த போதிலும், அவை அனைத்தும் நியாயமான காரணங்களாக எனக்கு தோன்றவில்லை. அவர்கள் எதிர்பார்ப்பது போல் நான் இல்லை. நான் அதை விட திறமைசாலி என்ற நம்பிக்கை என்னுள் உண்டு. என்னால், தேசிய ஹாக்கி  அணி, குறிப்பாக மகளிர் அணிக்கு நல்ல மேம்பாடை கொண்டு வர முடியும்" என்றார் அவர். 

"நம் நாட்டின் ஹாக்கி அணி, ஒலிம்பிக் போட்டிகளில் பங்கெடுத்து, நாட்டிற்கு பதக்கங்களை வெல்ல வேண்டும் என்ற எண்ணத்தில்தான் நான் முதலில் இந்தப் பயிற்சியாளர் பொறுப்பை ஏற்றுக் கொண்டேன். எனது முயற்சி எப்போதும் தொடரும். எனக்கான வாய்ப்பு மீண்டும் வந்தால், கண்டிப்பாக நாட்டின் தேசிய ஹாக்கி  அணிக்கு நான் பெருமைத் தேடித் தருவேன்" என்று கோபிநாதன் உறுதியளித்தார். 

சிப்பாங், ஜன.23- சீனாவில் நடந்த  23 வயதுக்கு உட்பட்டோருக்கான ஆசிய கால்பந்து சம்மேளனத்தின் ( ஏ.எப்.சி.)  கால்பந்துப் போட்டியில் சிறப்பாக விளையாடி காலிறுதிச் சுற்றுக்கு முன்னேறி புதிய உத்வேகத்தை ஏற்படுத்திய மலேசிய கால்பந்து வீரர்கள், தொடர்ந்து கடும் சவால்களைச் சமாளிக்கத் தாயராக வேண்டும் என்று குழுவின் பயிற்சியாளர்டத்தோ ஓங் கிம் சுவீ வலியுறுத்தினார்.

மலேசிய லீக் (எம்-லீக்) போட்டியில் தாங்கள் விளையாடும் அந்தந்தக் குழுக்களின் வெற்றிக்காக  இந்த இளம் ஆட்டக்காரர்கள் அனைவரும்  முழு வீச்சில் விளையாட வேண்டும் என்று அவர் கேட்டுக்கொண்டார்.

சீனாவில் நடந்த ஏஎப்சி போட்டியில் சிறப்பாக விளையாடியதை பெருமையாகக் கருதி மலேசிய லீக் போட்டிகளின் போது அலட்சியமாக இருந்து விடக்கூடாது. சம்பந்தப்பட்ட மலேசிய லீக் குழுக்களின் பயிற்சியாளர்களின் மனதைக் கவரும் வகையில் விளையாடி தொடர்ந்து அந்தந்தக் குழுக்களில் முதல் 11 ஆட்டக்காரர்களில் ஒருவராக திகழவேண்டும் என்று நேற்று சீனாவில்  இருந்து தாயகம்  திரும்பிய பின்னர் செய்தியாளர்களிடம் ஓங் கிம் சுவீ தெரிவித்தார்.

ஏஎப்சி சாம்பியன் போட்டியின் தொடக்க ஆட்டத்தில் ஈராக்கிடம் 4-1 என்ற கோல்கணக்கில் தோல்வி கண்டாலும் அடுத்து ஜோர்டானுடன் 1-1 என்ற கோல்கணக்கில் சமநிலை  கண்டு 3ஆவது ஆட்டத்தில் பலம் பொருந்திய சவுதி அரேபியாவை 1-0 என்ற கோல்கணக்கில் மலேசியா வென்று காலிறுதிக்குத் தகுதி பெற்றது.

காலிறுதி ஆட்டத்தில் பலம் பொருந்திய தென்கொரியாவுடன் மோதியதில்  மலேசியா 2-1 என்ற கோல்கணக்கில் தோல்வி கண்டது.  இந்த ஆட்டத்தில் தொடக்கத்தில்  முதல் கோலை தென்கொரியா அடித்தது. எனினும்,  மலேசிய வீரர் தனபாலன் ஒரு கோலை அடித்து ஆட்டத்தைச் சமாக்கினார். இருப்பினும், ஆட்டம் முடிய 5 நிமிடங்கள் இருந்த போது தென்கொரியா மேலும் ஒரு கோலைப் போட்டு வெற்றி பெற்றது.

 

கோலாலம்பூர், டிச.27- கடந்த அக்டோபர் மாதம் வங்காளதேசத்தில் நடந்த ஆசியா கோப்பை சாம்பியன்ஷிப் போட்டியின் போது, வாடா என்றழைக்கப்படும் உலக ஊக்க மருந்து தடுப்பு ஏஜென்சியால் தடைச் செய்யப்பட்ட 'செபுதிராமீன்' (Sibutramine) எனப்படும் ஊக்கமருந்தை உட்கொண்ட சர்ச்சையில் சிக்கிக் கொண்ட தேசிய ஹாக்கி அணியின் கோல்கீப்பர் எஸ். குமார், முன்பை விட தாம் தற்போது பக்குவப்பட்டிருப்பதாக தெரிவித்தார்.

ஒன்பது மாதம் மட்டுமே நிரம்பிய குமாரின் மகன் சித்தார்த் பவனாஜ் கடந்த நான்கு நாட்களுக்கு முன்னர் மருத்துவமனையில் அனுமதிக்கப்பட்டார். தனது மகனின் ஆரோக்கியம் குறித்து தாம் மிகவும் பதறிப் போனதாகவும், கடந்த வெள்ளிக்கிழமையன்று சித்தார்த் மருத்துவமனையிலிருந்து வெளியேற்றப்பட்டதைத் தொடர்ந்து தமக்கு சற்று தெளிவு ஏற்பட்டுள்ளதாக குமார் தெரிவித்தார். 

கடந்த 17-ஆம் தேதியன்று, ஆசியா கோப்பை சாம்பியன்ஷிப் போட்டியின் போது, தடைச் செய்யப்பட்ட அந்த ஊக்க மருந்தை குமார் உட்கொண்டிருந்தார் என்பது உறுதிப்படுத்தப்பட்டது.  

"ஊக்க மருந்து குறித்த முடிவு வெளியாக்கப்பட்டதைத் தொடர்ந்து நான் அமைதியற்ற நிலையிலேயே இருந்தேன். அதேச் சமயம், என் மகனின் நுரையீரலில் பிரச்சனை ஏற்பட்டு அவனை மருத்துவமனையில் அனுமதித்தோம். எனது முழு கவனமும் என் மகனின் ஆரோக்கியத்தில் நான் செலுத்தியதால், முன்பைக் காட்டிலும் இப்போது நான் பக்குவப்பட்டுள்ளேன்" என்று குமார் சொன்னார். 

"நான் தவறுதலாக ஏதேனும் உணவை உட்கொண்டிருக்கக் கூடும். அதனால் தான் நான் ஊக்க மருந்தை உட்கொண்டேன் என்று நிரூபிக்கப்பட்டுள்ளது" என்று அவர் சொன்னார்.  

அச்சம்பவம் தொடர்பிலான விசாரணைக்கான தேதியை அனைத்துலக ஹாக்கி கூட்டமைப்பு அறிவிக்கும். கிறஸ்துமஸ் பண்டிகையை முன்னிட்டு அந்தக் கூட்டமைப்பு அதிகாரிகள் அனைவரும் விடுப்பில் உள்ளனர். அவர்கள் அனைவரும் வேலைக்கு வந்தப் பின்னரே, குமாரின் வழக்கு தொடர்பு விசாரணைக்காக தேதி அறிவிக்கப்படும்.

More Articles ...