அம்ஸ்டர்டாம், மே.18- இங்கிலாந்தின் மன்செஸ்ட்டர் யுனைடெட் குழுவுக்கும் ஹாலந்தின் அயாக்ஸ் குழுவுக்கும் இடையே நடைபெறவிருக்கும் ஐரோப்பா லீக் கால்பந்து இறுதியாட்டம் ரணகளமாகப் போகிறது என எச்சரிக்கை விடுக்கப்பட்டிருக்கிறது.

புகழ்பெற்ற இவ்விரு குழுக்களுக்கும் இடையலான இந்த இந்த ஆட்டம், சுவீடனின் தலைநகரான ஸ்டோக்ஹோமில் மே மாதம் 25-ஆம் தேதி இரவு இடம்பெறவிருக்கிறது. அதாவது, மலேசிய நேரப்படி 26ஆம் தேதி அதிகாலையில் போட்டி நடைபெறுகிறது.

இந்த ஆட்டத்தின் போது மிகவும் அடாவடியான அயாக்ஸ் குழுவின் ரசிகர்கள் படை களமிறங்கப் போகிறது என்றும் ஸ்டோக்ஹோம் நகர வீதிகள் ரணகளம் ஆகப்போகிறது என்றும் இப்போதே ஊடகங்களில் தகவல்கள் வெடித்துள்ளன.

இந்த ரசிகர் படையினர் பெரும்பாலும் டிக்கெட் எடுப்பது கிடையாது. தெருக்களில் திரண்டு தொலைக்காட்சிகளில் கால்பந்து ஒளிபரப்பை காணுவர். ஆனால், உண்மையில் விளையாட்டைப் பார்ப்பதைக் காட்டிலும் அவர்கள் தங்களுடைய குழு வெல்லவேண்டும் என்பதில் மட்டுமே குறியாக இருப்பர். தோல்விக்கு உள்ளாகி விட்டதால் தெருச் சண்டையில் இறங்கிவிடுவர்.

இந்த இறுதியாட்டத்திற்கு ரசிகர்களுக்கு டிக்கெட் கிடைப்பது கடினம். இப்போதே டிக்கெட் ஒன்று 10,000 பவுண்டு வரை கள்ளச் சந்தையில் விற்கப்படுவதாக தகவல்கள் வெளியாகி உள்ளன. 

மொத்தம் 48 ஆயிரம் டிக்கெட்டுகள் வெளியாக்கப் படவுள்ளது. மன்செஸ்ட்டர் யுனைடெட் குழுவுக்கென 10 ஆயிரம் டிக்கெட்டுகளும் அயாக்ஸ் குழுவுக்கு என்று 10 ஆயிரம் டிக்கெட்டுகளும் வழங்கப்பட்டு விடும். எஞ்சியவை ரசிகர்களுக்காக நேரடியாக விற்கப்படும். 

ஆனால், ஹாலந்தில் இருந்து அயாக்ஸ் குழுவின் அதிதீவிர ரசிகர்கள் சில ஆயிரம் பேர் வரவிருக்கின்றனர். இவர்களைப் பல சுற்றுலா நிறுவனங்கள் தலைக்கு 160 பவுண்ட் (டிக்கெட்டை சேர்க்காமல்) வாங்கிக் கொண்டு பஸ் பஸ்சாக கொண்டுவந்து இறக்கும் முயற்சியில் ஈடுபட்டுள்ளன.

ஏற்கேனவே லியோன் குழுவுக்கு எதிரான அரையிறுதி ஆட்டத்தின் போது ஆயாக்ஸ் ஆதரவாளர்கள் படு கலாட்டாவில் இறங்கினர். இம்முறை மன்,யுனைடெட் ரசிகர்களுடன் இவர்கள் தெருச் சண்டைகளில் இறங்குவதற்கு தயாராகி வருவதாக தகவல்கள் வெளிவந்துள்ளன.

சண்டை வந்தால் என்னென்ன செய்யலாம்? என்று இந்த ரசிகர்களுக்கென இயங்கும் இணையத் தளம் ஒன்று ஆலோசனைகளை வெளியிட்டுள்ளது. மேலும், ரசிகர்கள் கைதானால், அவர்களை எப்படி ஜாமினில் எடுக்கவேண்டும் என்பதற்கான அனுபவம் தங்களுக்கு இருப்பதால் அதற்கான வசதிகளும் ஏற்பாடு செய்யப்படும் என்றும் அது குறிப்பிட்டுள்ளது.

இதைக் கவனத்தில் கொண்டு பார்க்கும் போது ஐரோப்பா லீக் கிண்ண கால்பந்து இறுதியாட்டம் தெருச் சண்டையாக மாறி இரத்தக்களரி ஆகக்கூடும் என்ற அச்சம் பரவியுள்ளது.

லண்டன், மே.15- பிரபல முன்னாள் கால்பந்து வீரரான இங்கிலாந்தின் டேவிட் பெக்காம், தம்முடைய மனைவியும் முன்னாள் பாடகியும் இந்நாள் பிரபல ஆடை வடிவமைப்பாளருமான விக்டோரியாவுக்கு காதல் நினைவுப் பரிசாக ஒரு தீவை விலைக்கு வாங்கித் தர திட்டமிட்டுள்ளார்.

விக்டோரியாவுடன் காதல் மலர்ந்து 20 ஆண்டுகள் நிறைவடைவதை முன்னிட்டு தீவைப் பரிசாகத் தர டேவிட் பெக்காம் முடிவு செய்திருப்பதாக இணையச் செய்தி ஒன்று கூறியது.

கரீபியன் கடல் பகுதியில் தீவு ஒன்றை வாங்கும் முயற்சியில் அவர் இறங்கியுள்ளார். விடுமுறை நாள்களை குடும்பத்தினருடன் அமைதியான கழிக்க அவர் திட்டமிட்டுள்ளார்.

தனிமைக்குள், யாரும் ஊடுருவதாக ஓர் இடம் வேண்டும் என்பதே அவருடைய எண்ணமாகும். செய்தியுலக புகைப்படக்காரர்களின் துரத்தல்கள், ரசிகர்களின் செல்ஃபி தொல்லைகள் இல்லாத வகையில் விடுமுறையை தனது 4 பிள்ளைகளுடனும் கழிக்க அவர் விருப்பம் கொண்டுள்ளார் என அந்த இணையச் செய்தி கூறியது.

லண்டன், மே.15- இவ்வாண்டுக்கான இங்கிலாந்தின் பிரிமியர் லீக் கால்பந்து போட்டி ஒருவழியாக இறுதிக்கட்டத்திற்கு வந்துவிட்ட நிலையில் கடைசி நேர அதிரடியாக டோட்டன்ஹாம் குழு 2-1 என்ற கோல்கணக்கில் மன்செஸ்ட்டர் யுனைடெட் குழுவை வீழ்த்தியது.

இந்த வெற்றியின் மூலம் 55 ஆண்டுகளுக்குப் பிறகு டோட்டன்ஹாம் குழு பிரிமியர் லீக்கில் 2ஆவது இடத்தைப் பிடித்தது. சாம்பியன் பட்டத்தை செல்சி வாகைசூடியுள்ள நிலையில், 3ஆவது, 4ஆவது மற்றும் 5ஆவது இடங்களைக் கைப்பற்ற நான்கு குழுக்கள் முயன்று வருகின்றன. 

எனினும், 3ஆவது இடத்தை மன்செஸ்ட்டர் சிட்டி பிடிக்கும் வாய்ப்பு பிரகாசமாக இருக்கும் நிலையில், 4ஆவது இடத்திற்கான போட்டியில் லிவர்புல் குழுவும் அர்சனலும் தீவிரமாக உள்ளன. 

லிவர்புல் குழுவுக்கு இன்னும் ஓர் ஆட்டம் மட்டுமே எஞ்சியிருக்கும் நிலையில், 73 புள்ளிகளைப் பெற்றுள்ளது. அர்சனலுக்கு இன்னும் இரண்டு ஆட்டங்கள் கைவசம் உள்ளன. தற்போது அது 69 புள்ளிகளைக் கொண்டுள்ளது. மன்செஸ்ட்டர் யுனைடெட் குழுவுக்கு இன்னும் இரு ஆட்டங்கள் கவசம் உள்ளன. அது 65 புள்ளிகளுடன் 6ஆவது இடத்தில் இருக்கிறது. 

 பிரிமியர் லீக்கில் முதல் நான்கு இடங்களைப் பிடிக்கும் குழுக்கள் ஐரோப்பிய சாம்பியன்ஸ் லீக் போட்டியில் பங்கேற்க தகுதி பெறும். 5ஆவது, 6ஆவது இடத்தில் இருக்கும் குழுக்கள் ஐரோப்பா லீக்கில் விளையாடும் வாய்ப்பைப் பெறும்.

பிரிமியர் லீக்கில் இருந்து தகுதி இறக்கம் கண்டுள்ள கடைசி மூன்று குழுக்கள்  மிடில்ஸ்பரோ, ஹல் சிட்டி மற்றும் சண்டர்லேண்ட் ஆகியவை. 

லண்டன், மே.13- இன்னும் இரண்டு ஆட்டங்கள் எஞ்சியிருக்கும் நிலையிலும், எதிர்பார்க்கப் பட்டதைப் போலவே இங்கிலீஷ் பிரிமியர் சாம்பியன் பட்டத்தை தட்டிச் சென்றது செல்சி.

போட்டியின் ஆரம்ப காலம் தொட்டு தொடர்ச்சியாக முன்னிலை வகித்து வந்துள்ள செல்சி குழு, தனது புதிய நிர்வாகியான இத்தாலியைச் சேர்ந்த அந்தோனியோ கொண்டே பொறுப்பேற்ற பின்னர் புதிய உத்வேகத்துடன் விளையாடி வந்தது.

இதன் விளைவாக, 36 ஆட்டங்களை முடித்துள்ள செல்சீ, இன்னும் இரண்டு ஆட்டங்கள் கைவசம் இருக்கும் நிலையில், 87 புள்ளிகளுடன் முதலிடத்தைப் பிடித்தது.

நேற்று வெஸ்ட் புரோம்விச் குழுவுக்கு எதிரான ஆட்டம், கிட்டத்தட்ட கடைசி வரை கோல் எதுவுமின்றி சமநிலையை நோக்கி நகர்ந்து கொண்டிருந்த வேளையில், 82ஆவது நிமிடத்தில் இளம் வீரர் மிச்சி பட்ஷுயாயி ஒரு கோலைப் போட்டு செல்சியின் சாம்பியன் வெற்றியை உறுதிப்படுத்தினார்.

 

6ஆவது முறையாக பிரிமியர் சாம்பியன் பட்டத்தை செல்சி வென்றிருக்கிறது. முதன் முறையாக இங்கிலாந்து பிரிமியர் லீக் குழுவுக்கு தாம் பயிற்சி அளித்திருக்கும் நிலையில், தமது குழு சாம்பியனாக வாகை சூடியிருப்பது குறித்து அளவற்ற மகிழ்ச்சி அடைந்திருப்பதாக நிர்வாகி அந்தோனியோ கொண்டே தெரிவித்தார்.

இதனிடையே தாமும் தமது ஆட்டக்காரர்களும் அடுத்து எப்.ஏ. கிண்ணத்தை வாகைசூடி, இந்த ஆண்டில் இரட்டை வெற்றியை நிலைநாட்டத் திட்டமிட்டிருப்பதாக அந்தோனியோ கொண்டே தெரிவித்தார்.

இம்மாதம் 27 ஆம் தேதி நடைபெறவிருக்கும் எப்.ஏ. கிண்ண இறுதியாட்டத்தில் செல்சியும் அர்சனலும் மோதவிருக்கின்றன. இந்த ஆட்டத்தில் வெல்வதுதான் தங்களின் அடுத்த இலக்கு என்று அவர் சுட்டிக்காட்டினார்.

 கிளாஸ்கோ, மே.9- தவறு செய்கிற கால்பந்து வீரர்களுக்கு சிவப்பு  எச்சரிக்கை அட்டையைக் காட்டி ஆட்டத்திலிருந்து வெளியேற்றிய நடுவர்களை பார்த்திருப்பீர்கள். ஆனால், சக நடுவருக்கே சிவப்பு அட்டையைக் காட்டி வெளியேற்றிய நடுவரைப் பார்த்திருக்கிறீர்களா?

ஸ்காட்லாந்தில் பிரிமியர் லீக கால்பந்து போட்டியின் போது இப்படியொரு அதிர்ச்சி தரும் சம்பவம் நடந்தது. கில்மானோக் குழுவுக்கும் டாண்டி குழுவுக்கும் இடையே நடந்த கால்பந்து போட்டியின் போது லைன்ஸ் மென்னாக பணிபுரிந்த துணை நடுவர் அண்ட்ரூ வில்லியத்திற்கு நடுவர்கிரெய்க் தோம்சன் சிவப்பு எச்சரிக்கை அட்டையைக் காட்டி வெளியேற்றி போது ரசிகர்கள் உள்பட அனைவரும் கடும் அதிர்ச்சிக்கு உள்ளாயினர்.

முற்பகுதி ஆட்டம் முடிய நில நிமிடங்கள் இருந்த போது கிமானோக் குழுவுக்கு கிடைத்த 'கார்னர் கிக்கை'' எடுக்க அக்குழுவின் ஆட்டக்காரர் ஜோர்டன் ஜோன்ஸ் தயாராக இருந்த வேளையில், ஆட்டத்தை நிறுத்தி விட்டு வயிற்றைப் பிடித்துக் கொண்டு அங்கிருந்து துணை நடுவர் அண்ட்ரூ நகர்ந்தார்.

## வீடியோ: நன்றி -SPFL

என்ன நடந்தது எனக் கண்டறிய முனைந்த போது அண்ட்ரூ முகத்தை திருப்பிக் கொண்டு சற்று தொலைவாகப் போய் குமுட்டினார்.  இதனிடையே இந்தச் சம்பவத்தை நடுவர் கிரெய்க் தோம்சன் அருவருப்பான ஒன்றாகக் கருதி இருக்கவேண்டும். சில வினாடிகள் ஆலோசித்து விட்டு துணை நடுவர் அண்ட்ரூவை நோக்கி முன்னேறிய நடுவர் தோம்சன், சிவப்பு எச்சரிக்கை அட்டையை எடுத்துக் காட்டி வெளியேற்றினார்.

ஒருகணம் தயங்கிய அண்ட்ரூ பின்னர் அங்கிருந்து வெளியேறினார். நடுவர் சக நடுவருக்கு சிவப்பு அடையாள அட்டையைக் காட்டிய போது சில வினாடிகள் அதிர்ந்து போன ரசிகர்களால் அரங்கம் 'பேய்' அமைதியில் இருந்தது. ஆனால் நம்பமுடியாத, இந்தச் சம்பவத்தின் விளைவாக ரசிகர்கள் உற்சாகத்தில் வெடிக்க அரங்கம் அதிர்ந்தது.

இரு குழுக்களின் ரசிகர்களுமே காதை பிளக்கும் வண்ணம் கரவொலி எழுப்பி நடுவருக்குத் தங்களின் ஆதரவைப் புலப்படுத்தினர். கடந்த ஆண்டில் செக் குடியரசில் கால்பந்து போட்டியின் போது இரண்டு லைன்ஸ் மென்களும் போதையில் இருந்தது கண்டுபிடிக்கப்பட்டதை தொடர்ந்து அவர்களின் நடுவர் உரிமம் பறிக்கப்பட்டது என்பது குறிப்பிடத்தக்கது.

 

டோர்ட்மண்ட், ஏப்ரல்.12- ஐரோப்பிய சாம்பியன்ஸ் லீக் கால்பந்து போட்டியில் பிரான்சின் மொனாகோ குழுவுக்கு எதிராக விளையாடுவதற்கு புறப்பட்ட ஜெர்மனியின் பெருஷியா டோர்ட்மண்ட் குழுவினரின் பஸ்குண்டுவெடிப்பில் சிக்கியது. 

தங்கும் விடுதியில் இருந்து கால்பந்து அரங்கத்திற்குச் சென்று கொண்டிருந்த போது டோர்ட்மண்ட் குழுவினரின் பஸ் மூன்று முறை வெடிப்புக்கு உள்ளானது. இதில் பஸ்சின் டயர்கள், கண்ணாடிகள் சேதமடைந்தன ஓர் ஆட்டக்காரருக்கு கை முறிவு ஏற்பட்டது. பஸ் சாலை குண்டுகளில் சிக்கியதாக தெரிகிறது இது குறித்து போலீசார் தீவிரப் புலன்விசாரணை நடத்தி வருகின்றனர்.

இந்நிலையில் நேற்று நடைபெறவிருந்த சாம்பியன்ஸ் லீக் காலிறுதி ஆட்டம் இன்று இரவுக்கு ஒத்திவைக்கப்பட்டது. அரங்கத்தில் கூடியிருந்த பல்லாயிரக் கணக்கான ரசிகர்கள் தொடர்ந்து அங்கே வைக்கப்பட்டிருந்தனர். 

கால்பந்து அரங்கைச் சுற்றிலும் முழுமையாகச் சோதனை நடத்தப்பட்ட பின்னர் ரசிகர்கள் வெளியேற அனுமதிக்கப்பட்டனர். இந்தச் சூழலில் மிக அமைதியாக இருந்து ஆதரவு நல்கிய இரு குழுக்களின் ரசிகர்களும் போலீசார் பாராட்டுக்களைத் தெரிவித்துக் கொண்டனர். 

அதேவேளையில் மறுநாளைக்கு ஆட்டம் ஒத்தி வைக்கப்பட்டதால் பிரான்சிலிருந்து இங்கு வந்திருந்த மொனாகோ ரசிகர்கள் பலருக்கு இரவுத் தங்களுக்கு உள்ளூர் டோர்ட்மண்ட் குடியிருப்புவாசிகள் இடம்தந்து உதவிய சம்பவங்கள் வலைதளங்களில் பெரும் பாராட்டைப் பெற்றன.

 

 

 மும்பை, ஏப்ரல்.10- இந்திய பிரிமியர் லீக் கிரிக்கெட் (ஐபிஎல்) போட்டியில் கொல்காத்தா நைட் ரைடர்ஸ் குழுவுக்கு எதிராக கடைசி நேர அதிரடி வேட்டை நடத்திய மும்பை இண்டியன்ஸ் அணி, 4 விக்கெட் வித்தியாசத்தில் வாகைசூடியது.

அனுபவம் மிக்க கம்பீரும் கிறிஸ் லைனும் தொடக்க வீரர்களாக களமிறங்கினர். 19ஆவது ரன்னில் கம்பீரை வெளியேற்றினார் மும்பையின் இளம் பந்து வீச்சாளர் கர்னூல் பாண்டியா. அடுத்து கர்னூலின் அதிரடி பந்து வீச்சில் உத்தப்பா, யூசோப் பதான் ஆகியோர் ஆட்டமிழந்த போது கொல்கத்தா ஆட்டம் காணத் தொடங்கியது. 

எனினும், கிறிஸ் லைன் தொடர்ந்து தாக்குப்பிடித்து ஆடினார். 33ஆவது ரன்னில் அவரும் வெளியேற்றப்பட்ட பின்னர், களத்திற்கு வந்த சூர்யகுமார், வோக்ஸ் ஆகியோர் மும்பைக்கு குழுவுக்கு விளையாடும் இலங்கை வீரர் மலிங்காவின் பந்துவீச்சுக்கு பலியாயினர்.

மறுமுனையில் மணிஷ் பாண்டே தனியொருவராக கொல்கத்தாவை தூக்கி நிறுத்தப் போராடினார். பொறுப்புடனும் அபாரமாகவும் ஆடிய மணிஷ் பாண்டே கடைசிவரை தாக்குப் பிடித்து 81 ரன்களைக் குவித்தார். இதனால் கொல்கத்தா குழு 178 ரன்கள் எடுத்து ஆட்டத்தை முடித்தது. 

அடுத்து களமிறங்கிய மும்பை அணி 179 ரன்கள் எடுத்தால் வெற்றி என்ற நிலையில் தொடக்க வீரர்களான பார்த்தீவ் படேலும் குல்திப் யாதவும் நின்று தாக்குப் பிடித்து, முதல் விக்கெட்டுக்கு 65 ரன்கள் சேர்த்தனர். ஆனால், பார்த்தீவ்- குல்திப் ஜோடி பிரிந்த பின்னர் சீரான இடைவெளியில் மும்பையின் விக்கெட்டுகள் சரிந்த வண்ணமிருந்தன.

இதில், அதிரடி வீரர்களான கேப்டன் ரோஹித் சர்மா, பொல்லார்டு ஆகியோர் வந்த வேகத்திலேயே வெளியேறியது மும்பை ரசிகர்களை நிலைகுலைய வைத்தது. 6ஆவது விக்கெட்டிற்கு ஜோடி சேர்ந்த நிதிஷ் ரானாவும் ஹர்த்திக் பாண்டியாவும் மும்பையை வீழ்ச்சியிலிருந்து அபாரமாக மீட்டெடுத்தனர்.

கடைசி 4 ஓவருக்கு 60 ரன்கள் குவிக்க வேண்டும் என்ற இக்கட்டான நிலையில், இருந்த போது அதிரடி வேட்டையை இவர்கள் இருவரும் ஆரம்பித்தனர்.  தொடர்ச்சியாக ரன்களைக் குவித்தனர். 

18ஆவது ஓவரில் ரானா ஆட்டமிழந்தார். கடைசி ஒரு ஓவரில் 11 ரன்கள் எடுக்க வேண்டிய நிலையில் ஹர்த்திக் பாண்டியா வெளுத்து வாங்கினார். இன்னும் இரண்டு பந்துகள் கைவசம் இருக்கும் போதே மும்பை 180 ரன்களை எட்டி வெற்றியை நிலைநாட்டியதால் மும்பை வாங்கடே அரங்கம் ரசிகர்களின் உற்சாகத்தில் அதிர்ந்தது.

More Articles ...